ယန်ရှောင်းဟွာ

နောက်ရက်အနည်းငယ်အတွင်း ထန်ထျန်းက တောင်ထိပ်ကြယ်ကြည့်ပွဲ စတင်မည့်အချိန်ကို စောင့်ဆိုင်းရင်း ချင်းရွှီခြံဝင်းထဲတွင် အေးအေးဆေးဆေး ကျင့်ကြံနေခဲ့သည်။

သူ၏ ရွှေအင်မော်တယ် နှောင်းပိုင်း အဆင့် မှာ အပြည့်အဝ တည်ငြိမ်သွားပြီ ဖြစ်သည်။

ဤအတောအတွင်း ကြောင်လေးမှာလည်း အစားကောင်းများ စားခဲ့ရသည်။ အရင်က ဝမ့်ယွဲ့လှိုဏ်ဂူ ထဲမှ အဆုံးမဲ့လစွမ်းအား များကို ရရှိခဲ့သလို နောက်ပိုင်းတွင်လည်း ဟင်းလင်းပြင် ခေါင်းလောင်း ကွဲအက်သွားရာမှ ထွက်လာသော အဖိုးတန်သတ္တု အပိုင်းအစများ၊ အင်မော်တယ် အရှင် အဆင့် လက်နက်ဖြစ်သည့် ဝိညာဉ်စားအလံ နှင့် အခြား အင်မော်တယ်လက်နက် အပျက် အပုံကြီးကို ဝါးမြိုခဲ့သည်။

ထို့ကြောင့် သူ၏ ကြီးထွားမှုမှာလည်း အလွန်ပင် လျင်မြန်လှသည်။

ထူးဆန်းသော ရှေးဟောင်းကျောက်စိမ်းထဲမှ စီးဝင်လာသော အင်မော်တယ်စွမ်းအားများမှာ အရည်အသွေးရော ပမာဏပါ သိသိသာသာ မြင့်တက်လာကြောင်း ထန်ထျန်း သိသိသာသာ ခံစားရသည်။

လအင်မော်တယ် ကျောက်စိမ်း၏ အာနိသင်နှင့် ပေါင်းစပ်လိုက်သောအခါ ထိပ်တန်းအင်အားစုများ၏ အထူးသီးသန့် လျှို့ဝှက်နယ်မြေများ မရှိသော်လည်း သူ၏ ကျင့်ကြံမှုဝန်းကျင်မှာ ထိုနေရာများထက် လုံးဝ မနိမ့်ကျပေ။

သူ၏ ကျင့်ကြံမှုအမြန်နှုန်း မှာလည်း လူပြောလျှင် လန့်သေသွားလောက်သည့်အထိ အလွန်ပင် ပြင်းထန်နေဆဲ ဖြစ်သည်။

မကြာမီ အချိန်အတွင်း နောက်တစ်ဆင့်သို့ ထပ်မံ တက်လှမ်းနိုင်လိမ့်မည်ဟု ခန့်မှန်းရသည်။

ရက်အနည်းငယ်မှာ လျင်မြန်စွာ ကုန်ဆုံးသွားပြီးနောက် တောင်ထိပ်ကြယ်ကြည့်ပွဲ ကျင်းပမည့်နေ့သို့ ရောက်ရှိလာခဲ့သည်။

မနက်စောစောတွင် ထန်ထျန်းက ကုရှောင်းရွှယ်ကို အခန်းထဲမှ ခေါ်ထုတ်လိုက်သည်။

"နေ့တိုင်း အိမ်ထဲမှာပဲ အောင်းမနေနဲ့၊ ငါနဲ့အတူ အပြင်ထွက်ပြီး လျှောက်ကြည့်ရအောင်။"

" မပျင်းဘူးလား"

"ဒီအတိုင်း ဆက်သွားရင် မင်း မှိုတက်တော့မယ်"

ထန်ထျန်းက ပြောလိုက်သည်။

ဤကောင်မလေးက အခုဆိုလျှင် တစ်နေ့ကုန် အခန်းထဲမှာပဲ အောင်းနေတတ်သည်။ ချင်းရွှီခြံဝင်း ပိတ်ပင်မှု လွတ်မြောက်သွားစဉ်က လီဟုန်တို့နှင့်အတူ ရက်အနည်းငယ် အပြင်ထွက်ခဲ့သည်မှလွဲလျှင် ကျန်သည့်အချိန်များ၌ အရင်အတိုင်း ပုံမှန်ဇယား အတိုင်း ပြန်ဖြစ်သွားသည်။

"ဘယ်မှာ မှိုတက်လို့လဲ၊ ကျွန်မ အခုတလော တိုးတက်မှုက အရမ်းမြန်လို့ ကောင်းကင်အင်မော်တယ် အဆင့်ကို တက်တော့မှာ။"

" ရှင်က ကျွန်မ အမီလိုက်မှာစိုးလို့ တမင်သက်သက် အပြင်ခေါ်ထုတ်တာ မဟုတ်လား"

ပုံမှန်အခြေအနေဆို ကုရှောင်းရွှယ်မှာ စကားအတော်လေး ပြန်ပြောတတ်သူ ဖြစ်သည်။

ထန်ထျန်းက နှာခေါင်းရှုံ့ကာ "မင်း ငါ့ကို မြန်မြန်ကျော်တက်ပြီး အစတုန်းကလို ငါ့ကို ကာကွယ်ပေးနိုင်ဖို့ ငါ တကယ် မျှော်လင့်ပါတယ်။ "

"ဒါပေမဲ့ စိတ်မကောင်းစရာကတော့ ဒါက လှပတဲ့ စိတ်ကူးယဉ် အိပ်မက်တစ်ခုပဲ ဖြစ်လာလိမ့်မယ် ထင်တယ်"

ရှောင်းရွှယ်၏ တိုးတက်မှုအရှိန်မှာ တကယ်ပင် မယုံနိုင်စရာ ကောင်းသော်လည်း သူကိုယ်တိုင်က ပို၍ ထူးခြားနေသည်။ အနည်းဆုံးတော့ လက်ရှိအခြေအနေအရ နှစ်ဦးကြားက ကွာဟချက်မှာ ပို၍သာ ကျယ်ပြန့်လာလိမ့်မည် ဖြစ်သည်။

သို့သော် ရှောင်းရွှယ်ကမူ ထိုစကားကို ကြားသောအခါ လုံးဝ မကျေနပ်သည့် မျက်နှာမျိုး ဖြစ်သွားသည်။

"ကျွန်မ သေချာပေါက် ရှင့်ကို ကျော်တက်ပြမယ်၊ စောင့်ကြည့်နေလိုက်"

ကုရှောင်းရွှယ်ကို ခေါ်ပြီးနောက် ထန်ထျန်းက လီဟုန်ကိုပါ ခေါ်လိုက်သည်။

ယနေ့ တောင်ထိပ်ကြယ်ကြည့်ပွဲသို့ သူတို့နှစ်ဦးစလုံးကို ခေါ်သွားရန် သူ ပြင်ဆင်ထားသည်။

မနက်စာ စားပြီးနောက် နေမင်းကြီးမှာ အရှေ့ဘက်ကောင်းကင်မှ ခေါင်းပြူရုံသာ ရှိသေးသည်။

သိပ်မကြာမီမှာပင် အပြင်ဘက်ရှိ အစီအရင်ကို တစ်စုံတစ်ယောက်က ထိတွေ့လိုက်သည်။

ခြံဝင်းတံခါးကို ဖွင့်လိုက်ရာ လူငယ်တပည့် အချို့မှာ အပြင်ဘက်တွင် ရပ်နေကြသည်။

သူတို့ ဝတ်ဆင်ထားသော ဝတ်စုံများကို ကြည့်ခြင်းအားဖြင့် အားလုံးမှာ ကုံးချန်ခြံဝင်း မှ တပည့်များ ဖြစ်ကြပြီး တစ်ဦးချင်းစီမှာ ထူးခြားသော အရှိန်အဝါရှိသူများ ဖြစ်သည်။

ထိုအထဲမှ ရှေ့ဆုံးတွင် ရပ်နေသူမှာ အစိမ်းရောင်ဝတ်စုံနှင့် လူငယ်လေး တစ်ဦးဖြစ်သည်။

လီဟုန်၏ အရင်က မိတ်ဆက်ပေးမှုများအရ သူက ဂိုဏ်းပေါင်းစုံ မဟာမိတ်မှ ကျီယန်နန်းတော် ၏ ခေါင်းဆောင် ယန်ရှောင်းဟွာ ဖြစ်ကြောင်း ထန်ထျန်း သိလိုက်သည်။

သူကိုယ်တိုင် ထန်ထျန်းကို လာရောက်ကြိုဆိုခြင်းပင်။

"ဂျူနီယာညီလေးထန်၊ နာမည်ကြီးနေတာ ကြာပြီနော်"

ယန်ရှောင်းဟွာက ပြုံးလျက် လက်သီးဆုပ် နှုတ်ဆက်လိုက်သည်။

"စီနီယာအစ်ကိုယန်က တကူးတက အပင်ပန်းခံပြီး လာကြိုပေးတာ ကျေးဇူးတင်ပါတယ်"

ထန်ထျန်းကလည်း ပြန် နှုတ်ဆက်လိုက်သည်။

သူတို့နှစ်ဦးစလုံးမှာ ကုံးချန်ခြံဝင်းမှ တပည့်များ ဖြစ်ကြသဖြင့် စီနီယာ အစ်ကို ၊ ဂျူနီယာညီလေး ဟု ခေါ်ဝေါ်ခြင်းမှာ ပြဿနာ မရှိပေ။

ထို့ပြင် ယန်ရှောင်းဟွာင ကျီယန်နန်းော် ၏ ခေါင်းဆောင်ဖြစ်သလို ကုံးချန်ခြံဝင်း၏ ထင်ရှားသော ထူးချွန်သူတစ်ဦး ဖြစ်ရာ သူ၏ အစွမ်းမှာလည်း အလွန်ပင် ကြီးမားလှသည်။

သူ၏ ကိုယ်မှ မသိမသာ ထွက်ပေါ်နေသော အော်ရာအရ သူက မြင့်မြတ် ရွှေအင်မော်တယ် အဆင့်သို့ ရောက်ရှိနေပြီဖြစ်ပြီး အခြေခံမှာလည်း အတော်လေး ခိုင်မာလှသည်။

"အပင်ပန်းခံတယ်လို့ မဟုတ်ပါဘူး။ "

"ဂျူနီယာညီလေးရဲ့ နာမည်က အခုဆိုရင် ထုန်းရှန့်တောင်မှာ လူတိုင်း သိနေကြပြီပဲ။"

"ဂျူနီယာ ညီလေးကို ကိုယ်တိုင်လာဖိတ်ဖို့အတွက် ငါက ဟိုနှစ်ယောက်နဲ့တောင် တော်တော်လေး လုယူခဲ့ရတာ"

ယန်ရှောင်းဟွာက ပြုံး ရင်း ပြောလိုက်သည်။

သူက လူငယ်လေးပုံစံ ဖြစ်သော်လည်း အပြောအဆို အပြုအမူမှာမူ အတော်လေး ရင့်ကျက်လှသည်။

"စီနီယာအစ်ကိုက မြှောက်ပြောလွန်းနေပါပြီ။ "

"ဒါဆို ကျွန်တော်တို့ အခုပဲ သွားကြမလား"

ထန်ထျန်းက မေးလိုက်သည်။

ယန်ရှောင်းဟွာက ခေါင်းညိတ်ပြသည်။

ထို့နောက် ယန်ရှောင်းဟွာ၏ လမ်းပြမှုဖြင့် ထန်ထျန်းက လီဟုန်နှင့် ကုရှောင်းရွှယ်ကို ခေါ်ကာ တောင်ထိပ်သို့ ဦးတည် ထွက်လာခဲ့ကြသည်။

လမ်းတွင် ထန်ထျန်းနှင့် ယန်ရှောင်းဟွာတို့ ပေါ့ပေါ့ပါးပါး စကားပြောဖြစ်ကြသည်။

"ဒီထုန်းရှန့်တောင်မှာ နှစ်စဉ်နှစ်တိုင်း တောက်ပတဲ့ လူငယ်တွေ ထွက်ပေါ်လာလေ့ရှိတယ်။ "

"ဒါပေမဲ့ ဂျူနီယာ ညီလေးလိုမျိုး တောင်ပေါ်မတက်ခင်ကတည်းက နာမည်ကြီးနေတဲ့သူမျိုးကတော့ တကယ်ကို ရှားတယ်။ "

"ပြောရရင် တစ်ယောက်မှတောင် မရှိခဲ့ဖူးဘူးလို့ ဆိုနိုင်တယ်"

ယန်ရှောက်ဟွာက ပြောသည်။

ထန်ထျန်းက ပြုံးလျက် "စီနီယာအစ်ကိုက နဂါးတံခါး ကိစ္စကို ပြောတာလား။ "

"အဲဒီလိုဆိုရင်တော့ ကျွန်တော့်လောက် ဒီလို ပြဿနာအကြီးကြီး ရှာနိုင်တဲ့သူမျိုးတော့ ရှိမှာ မဟုတ်ဘူး"

ယန်ရှောင်းဟွာက ချက်ချင်း ခေါင်းခါပြကာ "နဂါးတံခါး ကိစ္စကို ထျန်းဖူနန်းတော်က ရှင်းပြပြီးသားပါ။ "

"ဒီကိစ္စက ဂျူနီယာ ညီလေးနဲ့ မဆိုင်ဘဲနဲ့ ဂျူနီယာ ညီလေးက ပြစ်ဒဏ်ခံ ခဲ့ရတာဆိုတော့ တကယ်တော့ မတရားပါဘူး။"

" ဒါပေမဲ့ အထက် အကြီးအကဲ တွေရဲ့ ဆုံးဖြတ်ချက်ကို ငါတို့က ဘာမှ မတတ်နိုင်ဘူးလေ။"

" ငါ သဘောကျတာကတော့ ဂျူနီယာ ညီလေးရဲ့ နဂါးတံခါးမှာ ပြသခဲ့တဲ့ စွမ်းဆောင်ရည်နဲ့ ပြီးခဲ့တဲ့ ရက်ပိုင်းက တပည့်ပေါင်း ရာချီကို လက်တစ်ဖက်တည်းနဲ့ နှိမ်နင်းခဲ့တဲ့ စွမ်းအားကိုပါ။"

" ငါတို့အားလုံး ထင်တာကတော့ တကယ်လို့ နဂါးတံခါး ကိစ္စသာ မရှိရင် ဂျူနီယာ ညီလေးက ရှန်းယွမ် စင်မြင့် ကို တိုက်ရိုက် တက်သွားမှာဆိုတော့ ငါတို့တောင် ဂျူနီယာ ညီလေးနဲ့ သိခွင့်ရမှာ မဟုတ်ဘူး"

သူက ပြုံး ရင်း ပြော သည်။

ထန်ထျန်းက အလျင်အမြန်ပင် "စီနာအစ်ကိုက ချီးမွမ်းလွန်းနေပါပြီ။ "

"ဂိုဏ်းရဲ့ ဆုံးဖြတ်ချက်က သူ့အကြောင်းပြချက်နဲ့သူ ရှိမှာပါ၊ ကျွန်တော့်မှာ ဘာကန့်ကွက်ချက်မှ မရှိပါဘူး"

ဤစကားဝိုင်းတွင် နှစ်ဦးစလုံးမှာ တစ်ဖက်လူ၏ သဘောထားကို အကဲခတ်နေကြခြင်း ဖြစ်သည်။

သူတို့နှစ်ဦးစလုံး လိုချင်သော အဖြေကို ရရှိခဲ့ကြသည်။

ထန်ထျန်းအတွက်မူ ဂိုဏ်းပေါင်းစုံ မဟာမိတ်ဘက်က လူများမှာ ဦးနှောက်ရှိကြပြီး နဂါးတံခါးကိစ္စမှာ သူ၏ အမှားမဟုတ်မှန်းနှင့် ထျန်းဖူနန်းတော်က သူ့ကို ဤကိစ္စကြောင့် အငြိုးမထားမှန်း သိကြခြင်းကို ကျေနပ်မိသည်။

ယန်ရှောင်းဟွာအတွက်မူ ထန်ထျန်းမှာ စည်းရှိသူဖြစ်ပြီး အနည်းဆုံးတော့ ထျန်းဖူနန်းတော် အထက်ပိုင်း၏ ဆုံးဖြတ်ချက်ကို လူသိရှင်ကြား မဝေဖန်ခြင်းကို သတိပြုမိလိုက်သည်။

ဤအချက်များက သူတို့နှစ်ဦး ရှေ့ဆက် ပတ်သက်ရန် လုံလောက်သွားပြီ ဖြစ်သည်။

"ဂျူနီယာညီလေးက ချင်းယွဲ့ဂိုဏ်း က လာတာလို့ ငါ ကြားတယ်"

ယန်ရှောင်းဟွာက မေးလိုက်သည်။

ထန်ထျန်းက ခေါင်းညိတ်ကာ "ဟုတ်ပါတယ်"

"ကျွန်တော်က ချင်းယွဲ့ဂိုဏ်းမှာပဲ ကျွန်တော့်ရဲ့ ကျင့်ကြံခြင်းလမ်းစဉ်ကို စတင်ခဲ့တာပါ"

ယန်ရှောင်းဟွာက ခေါင်းညိတ်ရင်း "အဲဒီနေရာက လမ်းပြပေးခဲ့တဲ့ နေရာဖြစ်သလို မွေးရပ်မြေလည်း ဟုတ်တာပေါ့။"

" လူတွေက ပြောလေ့ရှိကြတယ်၊ ထျန်းဖူနန်းတော်ကို ရောက်လာရင် အရင်က အဆင့်အတန်း တွေကို မေ့ပစ်ပြီး ထျန်းဖူနန်းတော် တပည့်အဖြစ်ပဲ ခံယူရမယ်တဲ့။ "

"ဒါပေမဲ့ လူတွေက ကိုယ့်ရဲ့ မွေးရပ်မြေကို ဘယ်လိုလုပ် လွယ်လွယ်နဲ့ မေ့နိုင်မှာလဲ"

ထန်ထျန်း တိတ်ဆိတ်သွားသည်။ ဤစကားမှာ သူ၏ သဘောထားကို စမ်းသပ်နေခြင်း ဖြစ်ပေလိမ့်မည်။

"မွေးရပ်မြေကိုတော့ မေ့လို့ မရပါဘူး။ "

"ဒါပေမဲ့ အပြင်ရောက်နေတဲ့အချိန်မှာတော့ ကိုယ့်အတွက် အသင့်တော်ဆုံး နည်းလမ်းနဲ့ တိုးတက်အောင် လုပ်ရမှာပဲ။"

" အဲဒီလိုမှသာ ကိုယ့်မွေးရပ်မြေကို ပိုပြီး ပြန်လည် ကျေးဇူးဆပ်နိုင်မှာ မဟုတ်လား။ "

"စီနီယာအစ်ကို... ကျွန်တော် ပြောတာ မှန်တယ်မလား"

သူက သူ၏ သဘောထားကို ပါးပါးနပ်နပ်ပင် ဖော်ပြလိုက်သည်။

ယန်ရှောင်းဟွာကလည်း သဘောပေါက်သွားသော်လည်း သူက ကြိုတင်ပြင်ဆင်ထားပုံရပြီး ထွေထွေထူးထူး မပြဘဲ ပြုံးလျက် "ဂျူနီယာညီလေး ပြောတာ တကယ့်ကို မှန်ပါတယ်"

ထို့နောက် ခဏမျှ တိတ်ဆိတ်သွားပြီးနောက် ယန်ရှောင်းဟွာက ရုတ်တရက် ထပ်မေးလိုက်သည်။

"ဒါနဲ့..."

" လွန်ခဲ့တဲ့ တစ်နှစ်တုန်းက ဂျူနီယာညီလေးလည်း လျူလီ လျှို့ဝှက်နယ်မြေ ရဲ့ စမ်းသပ်ပွဲကို တက်ခဲ့သေးတယ် မဟုတ်လား"

ထန်ထျန်း တစ်ခဏ ကြောင်သွားသည်။ သူ ဘာကြောင့် ဤကိစ္စကို ရုတ်တရက် မေးလာသလဲဆိုသည်ကို မသိပေ။

သို့သော် လျူလီ လျှို့ဝှက်နယ်မြေ တည်ရှိရာ နေရာမှာ ကျီယန်ဂိုဏ်း ၏ စီမံခန့်ခွဲမှုအောက်တွင် ရှိကြောင်း သူ ရုတ်တရက် သတိရလိုက်သည်။

ထိုနေရာမှာ တစ်ခုခု ပြဿနာ တက်နေလို့လား။