အခန်း (၄၅၁-၄၅၃)

အခန်း (၄၅၁) နတ်ဘုရားစွမ်းရည်မျိုးစေ့များ။ သိုင်းဝိဇ္ဇာသူတော်စင်။ (၂)

"ဘုန်း"

ကိုယ်လုံးဖိုင့်ဖိုင့်နှင့် လူဝကြီးကျုံးယွဲ့သည် ရေခဲရုပ်တုတစ်ခုအနားသို့ ချဉ်းကပ်သွားပြီး သူ၏လက်ဖဝါးဖြင့် ရိုက်ချလိုက်သည်။

"ဂျလောက် ဂျောက် ဂျောက်"

ထူထဲလှသော ရေခဲသားက ကွဲအက်မသွားသော်လည်း အတွင်း၌ အေးခဲနေသည့် ချီနဂါးခန်းမ တပည့်၏ ခန္ဓာကိုယ်မျက်နှာပြင်တွင် အက်ကြောင်းများ ပေါ်လာပြီး ကြွေထည်များကဲ့သို့ပင် အစိတ်စိတ်အမွှာမွှာ ကွဲသွားလေတော့သည်။

"ထူးဆန်းလိုက်တာ... ဒီချီနဂါးခန်းမက တပည့်တွေက ရေခဲထဲမှာ အလောင်းအဖြစ် မအေးခဲခင်ကတည်းက သူတို့ရဲ့ သက်စောင့်အားတွေ အကုန်စုပ်ယူခံထားရတာပဲ။ ဒါကြောင့် အခွံလွတ်တွေပဲ ကျန်တော့တာ။"

ကျုံးယွဲ့က စုတ်သက်လိုက်သည်။ ရုပ်တုများအတွင်းမှ တပည့်များသည် သေဆုံးနေသည်မှာ ကြာပြီဖြစ်ကြောင်းနှင့် ရေခဲများက သူတို့၏ အသားစိုင်များကို ရစ်ပတ်ထားခြင်းသာ ဖြစ်ကြောင်း သူ သိသွားသည်။

ဤချီနဂါးခန်းမတွင် တပည့်ပေါင်း ထောင်နှင့်ချီ၍ ရှိမည်ဖြစ်ပြီး သူတို့အားလုံးသည် ခန်းမ၏ အလယ်ဗဟိုသို့ စူးစိုက်ကြည့်ရင်း၊ မျှော်လင့်ချက်ကင်းမဲ့မှုနှင့် မကျေနပ်မှုများ ပြည့်နှက်နေသည့် မျက်နှာထားများဖြင့် အေးခဲသေဆုံးနေကြခြင်း ဖြစ်သည်။

"သွားကြစို့... ဟိုဘက်ကို သွားကြည့်ရအောင်။"

ပိုင်ယွင်ဟယ်က လေးနက်သော လေသံဖြင့် ပြောလိုက်ပြီး ချီနဂါးခန်းမ၏ အလယ်ဗဟိုသို့ ဦးဆောင်သွားရာ ဖုန်းရိယွဲ့နှင့် အခြားသူများကလည်း နောက်မှ လိုက်ပါသွားကြသည်။

စူးချန်ခုန်းသည်လည်း နောက်မှ လိုက်ပါရင်း ခန်းမအတွင်း၌ သဘာဝစွမ်းအင်များ ရှိနေသလားဟု ဝေ့ဝိုက်ကြည့်သော်လည်း ဘာမျှ ရှာမတွေ့ပေ။

ချီနဂါးခန်းမသည် သက်ရှိအငွေ့အသက် လုံးဝကင်းမဲ့နေသည့် မြို့ပျက်ကြီးတစ်ခုကဲ့သို့ပင်။ သဘာဝဝိညာဉ်စွမ်းအင်များပင် အလွန်တရာ ရှားပါးလှသည်။ ဤကဲ့သို့သော နေရာမျိုးသည် မူလချီစွမ်းအင်များ ဖြစ်တည်လာရန် အခြေအနေနှင့် မကိုက်ညီပေ။ သို့ဆိုလျှင် ထိုသိုင်းပညာရှင်များက နှင်းချောက်နက်တောင်တန်းတွင် မူလချီစွမ်းအင်များကို မည်သို့ရရှိခဲ့ကြသနည်း။

စူးချန်ခုန်း ခေတ္တမျှ ဇဝေဇဝါ ဖြစ်သွားသည်။

အဖွဲ့သားများသည် လူပုံသဏ္ဌာန် ရေခဲရုပ်တုများကို ဖြတ်ကျော်ကာ ချီနဂါးခန်းမ၏ အလယ်ဗဟိုသို့ ဦးတည်သွားကြသည်။

ခန်းမ၏ အလယ်ဗဟိုသို့ ရောက်သောအခါ သူတို့တွေ့မြင်လိုက်ရသည့် မြင်ကွင်းကြောင့် အလွန်အမင်း တုန်လှုပ်သွားကြသည်။

ခန်းမ၏ အလယ်တည့်တည့်တွင် ကွင်းပြင်ကျယ်တစ်ခု ရှိပြီး ထိုနေရာ၌ ရေခဲများဖြင့် ပြုလုပ်ထားသော ချီနဂါးတစ်ကောင်သည် ခွေနေသည်။ ဦးချိုမပါသော ထိုနဂါးကြီးသည် ခွေနေသော်လည်း အလျားမှာ ပေသုံးရာခန့် ရှိပေလိမ့်မည်။

ထိုနဂါးကြီး၏ ဦးခေါင်းပေါ်တွင် လူတစ်ယောက်သည် တင်ပျဉ်ခွေလျက် ထိုင်နေ၏။

ထိုသူမှာ အရပ်ရှည်ပြီး ဓားကဲ့သို့ ထက်မြက်သော မျက်ခုံးတန်းများနှင့် ကြယ်ပမာ တောက်ပသော မျက်ဝန်းများ ရှိသည်။ ချီနဂါးပုံများ ထိုးထားသည့် တန်ဖိုးကြီး ဝတ်ရုံကို ဝတ်ဆင်ထားပြီး အထက်တန်းကျသူ တစ်ဦး၏ အရှိန်အဝါများ ထွက်ပေါ်နေလျက်။ သူသည် လူတို့၏အထက်တွင် သဘာဝအတိုင်း ရှိနေသင့်သည့် လူသားနဂါးတစ်ဦးနှင့် တူလှသည်။

ထိုသူက တင်ပျဉ်ခွေလျက် ခေါင်းကို မော့ထားပြီး သူ၏မျက်ဝန်းများတွင် မကျေနပ်မှုများ၊ မျက်နှာတွင် နောင်တနှင့် လက်လျှော့အရှုံးပေးလိုက်ရသည့် အငွေ့အသက်များ ကိန်းအောင်းနေလျက်။

နဂါးကြီး၏ ပတ်လည်တွင်လည်း တင်ပျဉ်ခွေလျက် အေးခဲနေသည့် လူရုပ်တုပေါင်း ၃၀ မှ ၄၀ ခန့် ရှိနေသည်။ သူတို့၏ ဝတ်စုံများသည် အပြင်ဘက်မှ တပည့်များနှင့် မတူဘဲ နဂါးရုပ်ပုံများ ပိုမိုပါရှိရာ သူတို့သည် ချီနဂါးခန်းမ၏ အကြီးအကဲများ ဖြစ်ကြဟန်တူသည်။

"အဲဒီလူက ချီနဂါးခန်းမရဲ့ ခန်းမရှင်ဟောင်း ဟန်ချီ ဖြစ်ရမယ်။"

ရေခဲနဂါးခေါင်းပေါ်တွင် ထိုင်နေသည့် ထိုသူမှာ ချီနဂါးခန်းမကို တစ်ချိန်က အုပ်ချုပ်ခဲ့သူ ဟန်ချီဖြစ်ကြောင်း အားလုံး သိလိုက်ကြသည်။

လွန်ခဲ့သော နှစ်ပေါင်း နှစ်ထောင်၊ သုံးထောင်ခန့်က ဤဟန်ချီသည် မဟာမီးလျှံအင်ပါယာ၏ ထိပ်တန်းပညာရှင်တစ်ဦး ဖြစ်ခဲ့သည်။ နတ်ဘုရားသွေးကြော ၁၂ ချောင်းကို နိုးထစေခဲ့ပြီး ထိပ်ဆုံး၌ ပန်းသုံးပွင့် စုဝေးခြင်းနှင့် အခြေခံစွမ်းအင်ငါးမျိုး ပေါင်းစည်းခြင်း အဆင့်သို့ ရောက်ရှိကာ ပြိုင်ဘက်ကင်းခဲ့သူ ဖြစ်သည်။ သို့သော် သူသည်လည်း အခက်အခဲများနှင့် ရင်ဆိုင်ခဲ့ရပြီး ဤနေရာသို့ ဆုတ်ခွာလာခဲ့ကာ နောက်ဆုံးတွင် ကျင့်ကြံရင်း သေဆုံးခဲ့ရသည်။

"ဟန်ချီဟာ အဆင့်တက်လှမ်းဖို့နဲ့ အင်အားကြီးကြီးမားမားနဲ့ ပြန်လာနိုင်ဖို့အတွက် ဒီနေရာမှာ လာပြီး အနားယူခဲ့တယ်လို့ ပြောကြတယ်။ ဒါပေမဲ့ သူ ကျရှုံးသွားပုံရပြီး သူ့ရဲ့ အကြီးအကဲတွေနဲ့ တပည့်တွေပါ သူနဲ့အတူ မြေမြှုပ်ခံလိုက်ရတာပဲ။"

ပိုင်ယွင်ဟယ်က သူ့ဘာသာသူ ရေရွတ်လိုက်သည်။ တစ်ချိန်က အရှေ့တိမ်တိုက်ဂိုဏ်းထက် များစွာ ပိုမိုစည်ပင်ဝပြောပြီး အင်အားကြီးမားခဲ့သော ဤချီနဂါးခန်းမသည် နောက်ဆုံး၌ သမိုင်း၏ ဖုန်မှုန့်များအောက်တွင် ပျောက်ကွယ်သွားခဲ့ရလေပြီ။

"ဟင်"

သူတို့ စိတ်မကောင်းဖြစ်နေစဉ်မှာပင် အံ့အားသင့်စရာတစ်ခု တွေ့လိုက်ရသည်။

"ဒုတ် ဒုတ် ဒုတ်"

တင်ပျဉ်ခွေလျက် ထိုင်နေသည့် ဟန်ချီ၏ ခန္ဓာကိုယ်အတွင်းမှ အားနည်းလှသော နှလုံးခုန်သံကို သူတို့ ကြားလိုက်ရသည်။

"ဒါ... ဟန်ချီက အသက်ရှင်နေသေးတာလား။"

မီးခိုးရောင်ဝတ်စုံနှင့် အရှေ့တိမ်တိုက်ဂိုဏ်းမှ သိုင်းပညာရှင်တစ်ဦးမှာ မအံ့သြဘဲ မနေနိုင်တော့ပေ။ လူတစ်ယောက်အနေဖြင့် နှစ်ပေါင်း နှစ်ထောင်၊ သုံးထောင်ခန့် အသက်ရှင်နေရန်မှာ မဖြစ်နိုင်သလောက်ပင်။

ဟန်ချီ၏ နှလုံးခုန်သံမှအပ တစ်နေရာလုံး ခေတ္တမျှ တိတ်ဆိတ်သွားသည်။

"ဟမ့်… သေပြီးသားဆိုရင်လည်း အပြီး သေလိုက်စမ်းပါ။"

ကျုံးယွဲ့သည် ဆက်၍ သည်းမခံနိုင်တော့ဘဲ အေးစက်စွာ နှာမှုတ်လိုက်သည်။ သူသည် လေကို အားပါပါ ရှူသွင်းပြီးနောက် ပြင်းထန်စွာ ပြန်ထုတ်လိုက်သည်။

"ဖြန်း"

လေလှိုင်းတစ်ခုသည် ဟန်ချီ၏ ခန္ဓာကိုယ်ကို ထိမှန်သွားပြီး ပေါက်ကွဲသံနှင့်အတူ အပိုင်းပိုင်း ပြတ်ထွက်သွားသည်။ သူ၏ သွေးများသည် ခြောက်ကပ်နေသည်မှာ ကြာပြီဖြစ်ပြီး ခန္ဓာကိုယ်မှာလည်း ရေခဲတုံးကဲ့သို့ ကြွပ်ဆတ်နေ၏။

"ဒီလူက... ဘိုးဘေးတွေကို လေးစားမှု မရှိလိုက်တာ။"

အရှေ့တိမ်တိုက်ဂိုဏ်းမှ သိုင်းပညာရှင်များ မျက်မှောင်ကြုတ်မိကြသည်။ ဟန်ချီသည် သိုင်းလောကတွင် အလွန်ခရီးပေါက်ခဲ့သည့် ရှေ့ဆောင်ပညာရှင်တစ်ဦး ဖြစ်သော်လည်း ကိုယ်လုံးဖိုင့်ဖိုင့်နှင့် ကျုံးယွဲ့သည် ရိုသေမှုမရှိဘဲ သူ၏ခန္ဓာကိုယ်ကို အလောင်းပင် မကျန်တော့အောင် ချက်ချင်း ဖျက်ဆီးပစ်လိုက်သည်။

သို့သော် ဟန်ချီသည် သေဆုံးနေသည်မှာ ကြာပြီဖြစ်ပြီး သူ၏ရုပ်အလောင်းမှာ အနည်းငယ်မျှ ထိလိုက်ရုံဖြင့် ကြွေမွသွားလောက်အောင် ဆွေးမြည့်နေပြီဖြစ်ကြောင်း သိလိုက်ရသဖြင့် အားလုံးက သက်ပြင်းချနိုင်သွားသည်။

"ဒါက ဘာလဲ"

ဟုန်ရှန့်၏ အကြည့်သည် ပျက်စီးသွားသော ရုပ်အလောင်းအတွင်းမှ ထွက်ပေါ်လာသည့် အရာတစ်ခုဆီသို့ ရောက်သွားလေ၏။

၎င်းမှာ လက်မထိပ်ခန့်ရှိသော ကြည်လင်သည့် ရေခဲပြာရောင် သလင်းကျောက်တစ်ခု ဖြစ်ပြီး တောက်ပသော စိန်တစ်လုံးနှင့် တူသည်။ ၎င်းသည် သေးငယ်သော်လည်း မြင်သူတိုင်း၏ ရင်ထဲတွင် ပိုင်ဆိုင်လိုစိတ်ကို အလိုလို တဖွားဖွား ဖြစ်ပေါ်စေသည်။

၎င်းသည် မြေပြင်ပေါ်သို့ ပြုတ်မကျဘဲ မမြင်ရသော စွမ်းအားတစ်ခုဖြင့် လေထဲတွင် ဝဲပျံနေ၏။

"ဒါက... နတ်ဘုရားမျိုးစေ့များလား။"

ပိုင်ယွင်ဟယ်သည် ထိုရေခဲပြာရောင် သလင်းကျောက်ကို စိုက်ကြည့်ရင်း အတွေးတစ်ခု ဝင်လာကာ သူ၏ မျက်စိသူငယ်အိမ်များ ကျုံ့သွားပြီးနောက် အမည်တစ်ခုကို ရွတ်ဆိုလိုက်သည်။

"နတ်ဘုရားမျိုးစေ့။ ဒါက နတ်ဘုရားမျိုးစေ့လား။"

အနီရင့်ရောင် အရိုးမျက်နှာဖုံး တပ်ထားသည့် ဖုန်းရိယွဲ့ပင်လျှင် စိတ်လှုပ်ရှားသွားပြီး ထိုသလင်းကျောက်ကို အကြည့်မခွာဘဲ အသက်ရှူသံများ မြန်လာသည်။

နတ်ဘုရားမျိုးစေ့များသည် လောကတွင် လူတိုင်း လိုက်လံရှာဖွေနေကြသည့် ရှားပါးရတနာများ ဖြစ်သည်။

သိုင်းပညာလမ်းစဉ်ကို ခန္ဓာကိုယ်သန့်စင်ခြင်းနယ်ပယ်၊ ချီသွေးနယ်ပယ်နှင့် မူလနယ်ပယ်ဟူ၍ ဖွဲ့စည်းထားသည်။

မူလနယ်ပယ်သို့ ရောက်ရှိခြင်းသည် သိုင်းပညာရှင် သန်းပေါင်းများစွာထဲမှ ထိပ်တန်းပညာရှင်တစ်ဦး ဖြစ်လာခြင်းဖြစ်ပြီး သောင်းနှင့်ချီသော လူတို့ကို ဆန့်ကျင်နိုင်စွမ်းရှိသူများအဖြစ် သတ်မှတ်ခံရသည်။

ထိပ်ဆုံး၌ ပန်းသုံးပွင့် စုဝေးခြင်းနှင့် အခြေခံစွမ်းအင်ငါးမျိုး ပေါင်းစည်းခြင်းရှိသည်။ ဤသည်မှာ မူလနယ်ပယ်၏ အမြင့်ဆုံး အထွတ်အထိပ်ပင် ဖြစ်ပေတော့သည်။

အခန်း (၄၅၂) နတ်ဘုရားစွမ်းရည်မျိုးစေ့များ။ သိုင်းဝိဇ္ဇာသူတော်စင်။ (၃)

သို့သော် မူလနယ်ပယ်သည် သိုင်းပညာရှင်များ၏ အကန့်အသတ်မဟုတ်ပေ။ မူလနယ်ပယ်ထက် ကျော်လွန်သွားသူများကိုမူ 'သိုင်းဝိဇ္ဇာသူတော်စင်' များဟု ခေါ်ကြသည်။

မဟာမီးလျှံအင်ပါယာ တည်ထောင်ခဲ့သည့် နှစ်ပေါင်း သုံးထောင်နီးပါးကာလအတွင်း ထိုကဲ့သို့သော ပုဂ္ဂိုလ်မျိုးမှာ အလွန်တရာ ရှားပါးလှသည်။ သူတို့ တစ်ဦးချင်းစီသည် သမိုင်းတွင် အမည်တွင်ရစ်ခဲ့ကြပြီး သူတို့၏ ဂိုဏ်းများသည်လည်း ထိပ်တန်းဂိုဏ်းကြီးများ ဖြစ်လာကြကာ သူတို့ တည်ထောင်ခဲ့သည့် မိသားစုများသည်လည်း နှစ်ထောင်ချီ ခိုင်ခံ့သည့် မဟာမျိုးနွယ်စုကြီးများ ဖြစ်လာကြသည်။

မဟာမီးလျှံအင်ပါယာကို စတင်တည်ထောင်ခဲ့သည့် ဧကရာဇ်ကိုယ်တိုင်ပင်လျှင် သိုင်းဝိဇ္ဇာသူတော်စင်တစ်ဦး ဖြစ်သည်။ ပြိုင်ဘက်ကင်း သိုင်းပညာစွမ်းအားသာမရှိခဲ့လျှင် သူသည် အတိုက်အခံအားလုံးကို ရှင်းလင်းပြီး နိုင်ငံတည်ထောင်သူ ဧကရာဇ်တစ်ဦး ဖြစ်လာဖို့ မဖြစ်နိုင်ပေ။

လူအများစုအတွက်မူ သိုင်းဝိဇ္ဇာသူတော်စင်များသည် ဒဏ္ဍာရီလာ နယ်ပယ်တစ်ခုသာ ဖြစ်သည်။ ယခုလက်ရှိလောကတွင် သိုင်းဝိဇ္ဇာသူတော်စင်များ ရှိသလားဆိုတာကတော့ အမှန်တကယ် ရှိပါသည်။ သို့သော် သူတို့သည် လောကီရေးရာများတွင် ပါဝင်ပတ်သက်ခြင်း မရှိသလောက်ပင်ဖြစ်ပြီး တသီးတခြား နေထိုင်ကာ သူတို့၏ ကျင့်ကြံခြင်းကိုသာ အာရုံစိုက်လေ့ရှိကြသည်။

သိုင်းဝိဇ္ဇာသူတော်စင်အဆင့်သို့ ရောက်ရှိရန်မှာ ကောင်းကင်ဘုံသို့ တက်လှမ်းရသကဲ့သို့ ခက်ခဲလှပေသည်။

အခြေခံအကျဆုံး လိုအပ်ချက်မှာ နတ်ဘုရားသွေးကြော ၁၂ ချောင်းကို ဖွင့်ရန်နှင့် ထိပ်ဆုံး၌ ပန်းသုံးပွင့် စုဝေးခြင်း အဆင့်သို့ ရောက်ရှိရန် ဖြစ်သလို သိစိတ်ပင်လယ်အတွင်း၌ အခြေခံစွမ်းအင်ငါးမျိုး ပေါင်းစည်းခြင်း အဆင့်သို့လည်း ရောက်ရှိရမည် ဖြစ်သည်။

ဤအရာများသည် အခြေခံအဆင့်များသာ ရှိသေးသည်။ အရေးကြီးဆုံးအချက်မှာ 'နတ်ဘုရားမျိုးစေ့' တစ်ခုကို ပိုင်ဆိုင်ပြီး ၎င်းကို စုပ်ယူပေါင်းစည်းရန် ဖြစ်သည်။

နတ်ဘုရားမျိုးစေ့ကို စုပ်ယူပေါင်းစည်းခြင်းအားဖြင့် သာမန်သိုင်းပညာရှင်များ စိတ်ကူးပင်မယဉ်နိုင်သော အစွမ်းထက်သည့် 'နတ်ဘုရားသိုင်းပညာစွမ်းရည်' များကို ရရှိမည်ဖြစ်ပြီး သိုင်းဝိဇ္ဇာသူတော်စင် ခန္ဓာကိုယ်ကို တည်ဆောက်ကာ ပြိုင်ဘက်ကင်းသော သိုင်းပညာစွမ်းအားကို ပိုင်ဆိုင်မည်ဖြစ်သည်။ ထိုအခါမှသာ သိုင်းပညာရှင်များထဲမှ သူတော်စင်ဟု ခေါ်ဆိုထိုက်ပေလိမ့်မည်။

မူလနယ်ပယ်၏ အထွတ်အထိပ်သို့ ရောက်ရှိပြီး နတ်ဘုရားမျိုးစေ့ကို သန့်စင်နိုင်ပါက သိုင်းဝိဇ္ဇာသူတော်စင် ဖြစ်လာနိုင်သည်။

သိုင်းပညာရှင်များသည် မူလနယ်ပယ်၏ အထွတ်အထိပ်သို့ ရောက်နိုင်ခြေရှိသည်။ အဘယ်ကြောင့်ဆိုသော် ထိပ်ဆုံး၌ ပန်းသုံးပွင့် စုဝေးခြင်းနှင့် အခြေခံစွမ်းအင်ငါးမျိုး ပေါင်းစည်းခြင်း အဆင့်အထိ ကျင့်ကြံနိုင်သူများသည် ထိုခေတ်ထိုအခါက ထိပ်တန်းပညာရှင်များ ဖြစ်ကြပြီး မိမိတို့နယ်ပယ်တွင် လွှမ်းမိုးနိုင်သူများ ဖြစ်ကြသောကြောင့်ပင်။ ဘုရင့်မိသားစုတွင်ဖြစ်စေ၊ ထိပ်တန်းဂိုဏ်းကြီးများနှင့် နှစ်ထောင်ချီမျိုးရိုးစုများတွင်ဖြစ်စေ ထိုကဲ့သို့သောသူအချို့ ရှိနေတတ်သည်။

သို့သော် နတ်ဘုရားမျိုးစေ့မှာမူ မူလချီစွမ်းအင်ထက် အဆပေါင်း ထောင်ချီ၊ သောင်းချီ၍ ပိုမိုရှားပါးလှသည်။ လောကတွင် ရှာဖွေရန် အလွန်ခက်ခဲလှသဖြင့် သိုင်းဝိဇ္ဇာသူတော်စင်များမှာ အလွန်တရာ နည်းပါးနေခြင်း ဖြစ်သည်။

ပျက်စီးသွားသော ဟန်ချီ၏ ရုပ်အလောင်းအတွင်းမှ ပေါ်ထွက်လာသည့် သလင်းကျောက်သည် လက်မထိပ်ခန့်သာ ရှိသော်လည်း လူတို့အား အလိုလို ပြင်းပြစွာ လိုချင်တပ်မက်စိတ်ကို ဖြစ်ပေါ်စေရာ ၎င်းက နတ်ဘုရားမျိုးစေ့ဖြစ်ကြောင်း ချက်ချင်း သိလိုက်ကြသည်။

"ချီနဂါးခန်းမရှင် ဟန်ချီက ဘာလို့ လောကကနေ အနားယူသွားခဲ့လဲဆိုတာ အံ့သြစရာ မရှိတော့ဘူးပဲ။ သူက ပြင်ပဖိအားတွေကို ရင်ဆိုင်နေရရုံတင်မကဘဲ ဒီနတ်ဘုရားမျိုးစေ့ကို စုပ်ယူဖို့ အာရုံစိုက်ပြီး သိုင်းဝိဇ္ဇာသူတော်စင် ဖြစ်လာဖို့ ကြိုးစားခဲ့တာပဲ။ ဒါပေမဲ့ သူ ကျရှုံးသွားတဲ့ပုံပဲ.. သူ သေသွားရုံတင်မကဘဲ ချီနဂါးခန်းမက တပည့်ထောင်ပေါင်းများစွာပါ သူနဲ့အတူ သေဆုံးသွားခဲ့ရတာပဲ။"

ပိုင်ယွင်ဟယ် ထိုသို့ တွေးနေမိသည်။ အရှေ့တိမ်တိုက်ဂိုဏ်း၏ ဒုတိယဂိုဏ်းချုပ်အနေဖြင့် သူသည် ဗဟုသုတ ကြွယ်ဝသူဖြစ်ပြီး ရှေးဟောင်းကျမ်းစာများစွာကို ဖတ်ရှုဖူးသည်။ နတ်ဘုရားမျိုးစေ့ကို စုပ်ယူပေါင်းစည်းရန်မှာ မလွယ်ကူလှကြောင်း သူ ကောင်းကောင်းသိသည်။

ချီနဂါးခန်းမမှ ထူးချွန်သော တပည့်ထောင်ချီနှင့် မူလနယ်ပယ်ရှိ အကြီးအကဲများသည် ဟန်ချီအား နတ်ဘုရားမျိုးစေ့ စုပ်ယူပေါင်းစည်းပြီး သိုင်းဝိဇ္ဇာသူတော်စင် ဖြစ်လာစေရန် အခမ်းအနားတစ်ခုဖြင့် ဝိုင်းဝန်းကူညီခဲ့ကြဟန်တူသည်။

သို့သော် ထိုကြိုးပမ်းမှုသည် ကျရှုံးမှုဖြင့် အဆုံးသတ်ခဲ့ပြီး ပါဝင်သူအားလုံး အသက်ဆုံးရှုံးခဲ့ရသည်။ နတ်ဘုရားမျိုးစေ့မှ လျှံထွက်လာသော စွမ်းအားများကြောင့် ချီနဂါးခန်းမတစ်ခုလုံး အေးခဲသွားခဲ့ရပြီး နှစ်အတော်ကြာသောအခါ ဤကဲ့သို့ ထူးဆန်းသော မြင်ကွင်း ဖြစ်ပေါ်လာရခြင်း ဖြစ်သည်။

"နတ်ဘုရားမျိုးစေ့..."

အရှေ့တိမ်တိုက်ဂိုဏ်းမှ တပည့်များဖြစ်စေ၊ ဖုန်းရိယွဲ့ဖြစ်စေ သူတို့၏ မျက်ဝန်းထဲတွင် ပြင်းပြသော လိုချင်တပ်မက်မှုများ အထင်းသား။

နတ်ဘုရားမျိုးစေ့သည် သိုင်းဝိဇ္ဇာသူတော်စင်တစ်ဦးကို ဖန်တီးပေးနိုင်စွမ်း ရှိရာ မည်သူမဆို ပိုင်ဆိုင်လိုသည့် ရတနာပင် ဖြစ်သည်။

"အဲဒါက ဘာလဲဟ။"

စူးချန်ခုန်း တစ်ဦးတည်းသာ အနည်းငယ် ဇဝေဇဝါ ဖြစ်နေသည်။ သူသည် နတ်ဘုရားမျိုးစေ့အကြောင်း တစ်ခါမျှ မကြားဖူးသလို ၎င်း၏ တန်ဖိုးကိုလည်း မသိပေ။

"ဒီမူလနယ်ပယ် သိုင်းပညာရှင်တွေရဲ့ ရုပ်အလောင်းတွေထဲမှာ... စွမ်းအင်ဆိုတာ အစအနတောင် မကျန်တော့ဘူး။"

သို့သော် စူးချန်ခုန်း၏ အကြည့်သည် ကွင်းပြင်ပတ်လည်တွင် ထိုင်နေသည့် ရေခဲရုပ်တု ၄၀ သို့မဟုတ် ၅၀ ခန့်ဆီသို့ ရောက်သွားသည်။ ဤသူများသည် ချီနဂါးခန်းမမှ သိုင်းပညာရှင်များဖြစ်ကြောင်း သံသယဖြစ်ဖွယ်မရှိသော်လည်း သူ၏ ဝိညာဉ်စွမ်းအင်ဖြင့် စစ်ဆေးကြည့်သောအခါ ထိုရုပ်အလောင်းများသည် ဆွေးမြည့်နေသည့် သစ်သားတုံးများကဲ့သို့ပင် ဖြစ်နေကြောင်း တွေ့ရှိလိုက်ရသည်။

စူးချန်ခုန်းသည် မူလနယ်ပယ် သိုင်းပညာရှင်များ၏ ရုပ်အလောင်းများကို ယခင်က မြင်ဖူးသည်။ သူတို့သည် သေဆုံးသွားသည့်တိုင် သူတို့၏ အသားစိုင်များမှာ ပုပ်သိုးမသွားဘဲ ခန္ဓာကိုယ်အတွင်း၌ ကျန်ရှိနေသော သဘာဝစွမ်းအင် အငွေ့အသက်များကို သိသိသာသာ ခံစားနိုင်သည်။

သို့သော် မူလနယ်ပယ် သိုင်းပညာရှင်များ သေဆုံးပြီးနောက် ခန္ဓာကိုယ်သည် အချိန်အတော်ကြာ တည်ရှိနေပါက ၎င်းတို့အတွင်းရှိ မူလချီစွမ်းအင်များသည် ကောင်းကင်နှင့် မြေကြီးဆီသို့ ပြန်လည်ရောက်ရှိသွားမည်ဖြစ်သည်။ နှစ်ပေါင်းများစွာ ကြာပြီးနောက်တွင်မူ မူလချီစွမ်းအင်အသစ်တစ်ခု ပြန်လည်ဖြစ်ပေါ်လာနိုင်သည်။ ဤကွင်းပြင်ရှိ ချီနဂါးခန်းမ အကြီးအကဲများ၏ ခန္ဓာကိုယ်အတွင်းမှ မူလချီစွမ်းအင်များသည်လည်း လွန်ခဲ့သော နှစ်ပေါင်းများစွာကတည်းက လွင့်စင်ပျောက်ကွယ်သွားပြီး လောကထဲသို့ ပြန်လည်ရောက်ရှိသွားခြင်း ဖြစ်ပေလိမ့်မည်။

ပြန်လည်စဉ်းစားကြည့်လျှင် နှင်းချောက်နက်တောင်တန်းတွင် မူလချီစွမ်းအင်များ ရုတ်တရက် အများအပြား တွေ့ရှိခြင်းမှာ ဤသိုင်းပညာရှင်များ၏ ခန္ဓာကိုယ်မှ ပြန်ထွက်သွားသော စွမ်းအင်များကြောင့် ဖြစ်နိုင်ပြီး နှစ်ရှည်လများ ကြာပြီးနောက် မူလချီစွမ်းအင်အသစ်များအဖြစ် ပြန်လည်မွေးဖွားလာခြင်း ဖြစ်နိုင်သည်။

မဟုတ်ပါက ဤမူလနယ်ပယ် သိုင်းပညာရှင် ၄၀ ကျော်၏ ရုပ်အလောင်းများက အလွန်တန်ဖိုးရှိလှရာ မူလချီစွမ်းအင်များ ထုတ်ယူနိုင်စွမ်းရှိသည့် မိစ္ဆာဂိုဏ်းများထံ ရောင်းချပါက မူလချီစွမ်းအင် တစ်ခုထက်မက ပိုမိုရရှိနိုင်မှာ သေချာပါသည်။

"နတ်ဘုရားမျိုးစေ့"

ကိုယ်လုံးဖိုင့်ဖိုင့်နှင့် လူကြီးဖြစ်သူ ကျုံးယွဲ့၏ မျက်ဝန်းများတွင် လောဘဇောများ တောက်လောင်နေ၏။ သူ တွေဝေမနေတော့ဘဲ လေထဲတွင် ဝဲပျံနေသည့် ရေခဲပြာရောင် နတ်ဘုရားမျိုးစေ့ဆီသို့ လှမ်းခုန်လိုက်သည်။

ကျုံးယွဲ့၏ လက်ဖဝါးသည် နတ်ဘုရားမျိုးစေ့ကို ဆုပ်ကိုင်လိုက်မိချိန်တွင် သူ ဝမ်းသာရမည့်အစား မျက်နှာပျက်သွားသည်။ ထိုမျိုးစေ့ထံမှ အလွန်အမင်း အေးစက်သော အအေးဓာတ်များ ထွက်ပေါ်လာသည်ကို သူ ခံစားလိုက်ရသည်။ သူသည် ၎င်းကို ချက်ချင်း လွှင့်ပစ်ရန် ကြိုးစားသော်လည်း အချိန်နှောင်းသွားခဲ့ပြီ။

ဝူး

ကျုံးယွဲ့၏ လက်မှစတင်၍ နှင်းခဲများ ပြန့်နှံ့သွားပြီး ရေခဲပြင်များ ဖြစ်ပေါ်လာသည်။ ခဏချင်းအတွင်းမှာပင် သူသည် အံ့သြထိတ်လန့်နေသည့် မျက်ဝန်းများဖြင့် ရေခဲရုပ်တုတစ်ခုအဖြစ် ပြောင်းလဲသွားတော့သည်။

ရေခဲပြာရောင် နတ်ဘုရားမျိုးစေ့သည် ကျုံးယွဲ့၏ လက်ထဲမှ ပြုတ်ကျသွားပြီး ရေခဲသလင်းနဂါးရုပ်တု၏ ဦးခေါင်းပေါ်သို့ ကျရောက်ကာ ၎င်းနှင့် တစ်သားတည်း ပေါင်းစည်းသွားသည်။

ထူးဆန်းသော အရာတစ်ခု ဖြစ်ပေါ်လာသည်။

"ဟူး"

ရေခဲသလင်းနဂါးကြီး၏ ခန္ဓာကိုယ်မှာ တောက်ပလာပြီး မျက်ဝန်းများတွင် နတ်ဘုရားအရှိန်အဝါများ လက်ခနဲ ဖြစ်သွားသည်။ ထို့နောက် ၎င်း၏ ကြီးမားလှသော ခန္ဓာကိုယ်ကြီးမှာ စတင်လှုပ်ရှားလာပြီး နဂါးကြေးခွံများမှာလည်း အေးစက်သော အလင်းရောင်များကို ရောင်ပြန်ဟပ်နေလျက်။ ၎င်းမှာ သက်ရှိတစ်ကောင်ကဲ့သို့ အသက်ဝင်လာခြင်းပင်။

ကျိုးကြောင်းဆီလျော်မှုမျှ မရှိသည့် ဤမြင်ကွင်းကြောင့် ပိုင်ယွင်ဟယ်နှင့် အခြားသူများသည် မသိမသာ နောက်သို့ ခြေလှမ်းအနည်းငယ် ဆုတ်လိုက်ကြပြီး လေးနက်သော အမူအရာများဖြင့် အသင့်ပြင်လိုက်ကြသည်။

"ဒါက နတ်ဘုရားမျိုးစေ့လား။ ဒါထဲမှာ နတ်ဘုရား သိုင်းပညာစွမ်းရည်တွေ ပါနေတာလား။" ဖုန်းရိယွဲ့သည်လည်း အသက်ဝင်လာသည့် ရေခဲနဂါးကြီးကို မော့ကြည့်ရင်း အံ့အားသင့်နေမိသည်။ အခြားသူများကဲ့သို့ပင် သူသည်လည်း နတ်ဘုရားမျိုးစေ့အကြောင်းကို ကြားသာကြားဖူးပြီး ယခုမှ ပထမဆုံးအကြိမ် မြင်ဖူးခြင်း ဖြစ်သည်။

"ဒါ ငါ့ရဲ့ ကံကောင်းမှုပဲ။ ငါသာ ဒီနတ်ဘုရားမျိုးစေ့ကို ရရင် ငါကိုယ်တိုင် မသုံးနိုင်ရင်တောင် အဖွဲ့ခေါင်းဆောင်ဆီ အပ်လိုက်မယ်ဆိုရင် အနည်းဆုံးတော့ အဆင့်မြင့်မိစ္ဆာနတ်ဆိုးရဲ့ အမြုတေတစ်ခုတော့ ရနိုင်တယ်။ ခေါင်းဆောင်က ငါ့ကို ဒါကို စုပ်ယူနိုင်အောင်တောင် ကူညီပေးနိုင်သေးတယ်။"

ဖုန်းရိယွဲ့၏ မျက်ဝန်းများမှာ ပြင်းပြသော ဆန္ဒများဖြင့် တောက်လောင်နေ၏။

"ဒါက မိစ္ဆာအတတ် ဒါမှမဟုတ် သွေးဆက်နတ်ဘုရားစွမ်းရည်လိုမျိုးလား။"

စူးချန်ခုန်းသည်လည်း ရှေ့မှ မြင်ကွင်းကြောင့် အံ့အားသင့်နေမိသည်။ သူ၏ နားလည်မှုအရ မိစ္ဆာနတ်ဆိုးများ၏ မိစ္ဆာအတတ်နှင့် မျိုးရိုးကြီးမိသားစုများ၏ နတ်ဘုရားစွမ်းရည်များမှာ သိုင်းပညာနှင့် သိသိသာသာ ကွာခြားမှု ရှိသည်။ ထိုရေခဲနဂါးရဲ့ ဦးခေါင်းထဲသို့ ဝင်သွားသည့် အရာက ဘာလဲ။

အရှေ့တိမ်တိုက်ဂိုဏ်း၏ ဒုတိယဂိုဏ်းချုပ် ပိုင်ယွင်ဟယ်နှင့် အနီရင့်ရောင် မျက်နှာဖုံးတပ်ထားသည့် လျှို့ဝှက်ဆန်းပြားသော ဖုန်းရိယွဲ့တို့နှစ်ဦးလုံးမှာ ၎င်းကို ရယူလိုစိတ် ပြင်းပြနေကြသည်။

အရှေ့တိမ်တိုက်ဂိုဏ်းမှ အဖွဲ့သားများမှာလည်း ၎င်းကို 'နတ်ဘုရားမျိုးစေ့' ဟု ခေါ်ဆိုကာ တီးတိုး ဆွေးနွေးနေကြသည်။

လူတိုင်းမှာ ကိုယ်စီအတွေးများ ရှိနေကြစဉ် နတ်ဘုရားမျိုးစေ့ ပူးဝင်သွားသည့် ချီနဂါးကြီး၏ မျက်ဝန်းများတွင် အေးစက်သော အရှိန်အဝါများ ရှိနေ၏။ ၎င်းသည် ကြီးမားလှသော နဂါးလက်သည်းကြီးကို မြှောက်ကာ သူ့ကို နှစ်ကြိမ်တိုင်တိုင် စော်ကားခဲ့သည့် ကျုံးယွဲ့ကို ရိုက်ချလိုက်သည်။

"ဂျောက် ဂျလောက် ဂျလောက်"

နဂါးလက်သည်းကြီး ရိုက်ချလိုက်သောအခါ အက်ကွဲသံများနှင့်အတူ ရေခဲများအတွင်း ပိတ်မိနေသည့် ကျုံးယွဲ့၏ ခန္ဓာကိုယ်မှာ အစိတ်စိတ်အမွှာမွှာ ကွဲအက်သွားပြီး မြေပြင်ပေါ်သို့ ပြန့်ကျဲသွားတော့သည်။

"ဒါက နတ်ဘုရားမျိုးစေ့ထဲမှာ ကျန်နေတဲ့ စွမ်းအားတွေပဲ။ နတ်ဘုရားမျိုးစေ့ကို ထိန်းချုပ်ဖို့ ခက်ခဲတယ်လို့ ငါကြားဖူးတယ်။ ဒါကို ရဖို့ မလွယ်ဘူးပဲ။"

ပိုင်ယွင်ဟယ်က ခပ်တိုးတိုး ရေရွတ်လိုက်သော်လည်း သူ၏ မျက်ဝန်းများတွင် စိတ်အားထက်သန်မှုများ ပြည့်နှက်နေ၏။

နတ်ဘုရားမျိုးစေ့ကို စုပ်ယူပေါင်းစည်းရန်အတွက် 'ထိပ်ဆုံး၌ ပန်းသုံးပွင့် စုဝေးခြင်း' နှင့် 'အခြေခံစွမ်းအင်ငါးမျိုး ပေါင်းစည်းခြင်း' အဆင့်သို့ ရောက်ရှိရန် လိုအပ်သည်။ ပိုင်ယွင်ဟယ်မှာ ထိုအဆင့်နှင့် အလှမ်းဝေးသေးသော်လည်း နတ်ဘုရားမျိုးစေ့ကို ကြိုတင်ရရှိထားခြင်းသည် နောင်တွင် သိုင်းဝိဇ္ဇာသူတော်စင်အဆင့်ကို စိန်ခေါ်နိုင်မည့် အခွင့်အရေးပင်။ ဘယ်ကျင့်ကြံသူကမှ ဒီလောကကို လွှမ်းမိုးနိုင်သည့် သိုင်းပညာစွမ်းအားကို မတပ်မက်ဘဲ မနေနိုင်ပေ။

နတ်ဘုရားမျိုးစေ့ကို ရယူရန် လျှို့ဝှက်ဆန်းပြားသည့် ဖုန်းရိယွဲ့ဖြစ်စေ၊ အရှေ့တိမ်တိုက်ဂိုဏ်းမှ ပိုင်ယွင်ဟယ်ကဲ့သို့သော ပညာရှင်များဖြစ်စေ သူတို့အားလုံး၏ ရင်ထဲတွင် ပြင်းပြသော ဆန္ဒတစ်ခု ဖြစ်ပေါ်လာသည်။ ၎င်းက နတ်ဘုရားမျိုးစေ့ကို အရယူဖို့ပင်။

အသက်ဆုံးရှုံးရမည် ဆိုလျှင်ပင် အရယူချင်ကြလေသည်။

အခန်း (၄၅၃) ရေခဲသလင်းချီနဂါး။ မူလချီစွမ်းအင်။ (၁)

နတ်ဘုရားမျိုးစေ့ ပူးဝင်သွားပြီး အသက်ဝင်လာသော ရေခဲသလင်းချီနဂါးကြီးသည် ကောင်းကင်ယံကို တုန်ဟည်းသွားစေသည့် နဂါးဟိန်းသံကြီးကို ၎င်း၏ လည်ချောင်းအတွင်းမှ ဟိန်းဟောက်လိုက်ရာ အမှန်တကယ် အသက်ဝင်လာသည့် နဂါးတစ်ကောင်ကဲ့သို့ပင်။ ၎င်း၏ ကြီးမားလှသော ခန္ဓာကိုယ်ကြီးကို ဆန့်ထုတ်လိုက်ပြီး ဧရာမ အမြီးကြီးဖြင့် ဝေ့ယမ်းချလိုက်တော့သည်။

"ဝုန်း"

နဂါးအမြီး ဖြတ်သန်းသွားရာ တစ်လျှောက်ရှိ ရေခဲသလင်းများမှာ အစိတ်စိတ်အမွှာမွှာ ကွဲအက်ကုန်ပြီး မြင့်မားသော အဆောက်အအုံများမှာလည်း ကြေမွပျက်စီးကုန်သည်။ ထိုတိုက်ခိုက်မှုသည် ကွင်းပြင်အတွင်းရှိ လူများဆီသို့ တည့်တည့်မတ်မတ် ဦးတည်လာသည်။

"ဆုတ်"

စူးချန်ခုန်းက ပထမဆုံး နောက်သို့ ဆုတ်ခွာလိုက်သူ ဖြစ်သည်။ သူသည် နတ်ဘုရားမျိုးစေ့၏ တန်ဖိုးကို မသိသော်လည်း သိလျှင်ပင် ယခုအခြေအနေ၌ သူသည် တစ်ကိုယ်တည်းဖြစ်ပြီး အကူအညီမဲ့နေသောကြောင့် အခြားသူများနှင့် ယှဉ်ရန် ခက်ခဲမည်ဖြစ်ကြောင်း နားလည်ထားသည်။ နတ်ဘုရားမျိုးစေ့က မည်မျှပင် ဆွဲဆောင်မှုရှိစေကာမူ ၎င်းကို အသုံးချနိုင်ရန်အတွက် အသက်ရှင်နေဖို့က ပိုအရေးကြီးပေသည်။

စူးချန်ခုန်းတင်မကဘဲ အရှေ့တိမ်တိုက်ဂိုဏ်းမှ လူများသည်လည်း နောက်သို့ ဆုတ်ခွာသွားကြပြီး တိုက်ပွဲနှင့် ခေတ္တမျှ ဝေးအောင် ရှောင်ရှားလိုက်ကြသည်။

သို့သော်လည်း အံ့သြစရာကောင်းသည်မှာ ဝတ်ရုံနက်နှင့် ဟုန်ရှန့်က နောက်သို့ ဆုတ်မသွားခြင်းပင်။ သူသည် အသံနက်ကြီးဖြင့် ဟိန်းဟောက်လိုက်ရာ သူ၏ ဝတ်ရုံနက်ကြီးမှာ ဖောင်းပွလာပြီး တစ်ကိုယ်လုံးရှိ ကြွက်သားများမှာလည်း ဖောင်းကြွလာသည်။ သူ၏ လက်သီးများကို လေထဲတွင် ဝေ့ရမ်းလိုက်ရာ ပြင်းထန်သော မီးတောက်များ ထွက်ပေါ်လာပြီး လှုပ်ရမ်းလာသော နဂါးအမြီးကြီးကို အားကုန်သုံး၍ ထိုးနှက်လိုက်လေသည်။

"ဘုန်း"

ဧရာမ နဂါးအမြီးကြီးနှင့် နှိုင်းယှဉ်ပါက ဟုန်ရှန်း၏ အရွယ်အစားမှာ မမျှမတ ဖြစ်နေသော်လည်း၊ ဘီလူးငယ်တစ်ကောင်ကဲ့သို့ ကြီးမားလှသော သူ၏ ခန္ဓာကိုယ်ထဲမှ ကြောက်မက်ဖွယ်ကောင်းသော အားအင်များ ပေါက်ကွဲထွက်လာသည်။ နဂါးအမြီး၏ ရိုက်ခတ်မှုအောက်တွင် သူ၏ ခန္ဓာကိုယ်တစ်ခုလုံးသည် ရေခဲပြင်ပေါ်၌ လျှောတိုက်ပါသွားပြီး သူ၏ ခြေထောက်များက မြေပြင်ကို တွန်းကန်ထားမှုကြောင့် နက်ရှိုင်းသော အက်ကြောင်းကြီးနှစ်ခု ဖြစ်ပေါ်သွားသည်။ ဝေ့ရမ်းလာသော အမြီးကြီးမှာလည်း သူ၏ လက်သီးချက်ကြောင့် တုန်ခါသွားပြီး ရုတ်တရက် ရပ်တန့်သွားသည်။

"နတ်ဘုရားမျိုးစေ့ကို ငါယူမယ်။"

ဟုန်ရှန့်၏ နောက်ကွယ်တွင် ရပ်နေသည့် ဖုန်းရိယွဲ့၏ ဘယ်ဘက်မျက်လုံးထဲတွင် တောက်လောင်နေသော နေမင်းတစ်စင်းနှင့် ညာဘက်မျက်လုံးထဲတွင် အေးစက်သော လမင်းတစ်စင်း ရှိနေပုံရပြီး သူ၏ အနက်ရောင်ဝတ်ရုံမှာ လေမတိုက်ဘဲ တဖျတ်ဖျတ် လွင့်နေသည်။ သူ၏ ခန္ဓာကိုယ်မှာ ကမ္ဘာမြေကြီး၏ ဆွဲငင်အားမှ လွတ်မြောက်သွားသကဲ့သို့ လေထဲသို့ ပျံတက်သွားပြီး ဦးမော့နေသော နဂါးခေါင်းကြီးဆီသို့ လက်ဝါးဖြင့် ရိုက်ချလိုက်လေတော့သည်။

"ဘုန်း"

ဤလက်ဝါးရိုက်ချက်သည် ရိုးရှင်းပုံရသော်လည်း ကြောက်မက်ဖွယ်ကောင်းသော အလေးချိန် ပါဝင်နေသည်။ ၎င်းသည် ရေခဲသလင်းချီနဂါး၏ ဦးခေါင်းကို အောက်သို့ ပြင်းထန်စွာ ဖိချလိုက်ရာ ဦးခေါင်းပေါ်ရှိ ရေခဲသလင်းများမှာ စတင်အက်ကွဲလာသည်။

ရေခဲသလင်းချီနဂါး၏ ဦးခေါင်းအတွင်း၌မူ အပြာရောင် နတ်ဘုရားမျိုးစေ့မှာ အလင်းများ ထွက်ပေါ်နေပြီး နဂါးခေါင်းပေါ်ရှိ အက်ကြောင်းများမှာ ချက်ချင်းပင် ပြန်လည်သက်သာသွားသည်။

ယခုအခါ ရေခဲသလင်းချီနဂါးမှာ အလွန်အမင်း အမျက်ထွက်သွားပုံရပြီး ၎င်း၏ ကြီးမားလှသော ပါးစပ်ကြီးကို ဖွင့်ကာ အရာအားလုံးကို အေးခဲစေနိုင်လောက်သည့် အလွန်အေးမြသော လေပြင်းများကို မှုတ်ထုတ်လိုက်သည်။

ကျုံးယွဲ့သည် စောစောက နတ်ဘုရားမျိုးစေ့ကို ထိမိခဲ့သဖြင့် ချက်ချင်းပင် ရေခဲရုပ်တု ဖြစ်သွားခဲ့ရသည်။ ဖုန်းရိယွဲ့သည်လည်း နတ်ဘုရားမျိုးစေ့က မည်မျှ ကြောက်စရာကောင်းကြောင်း ကောင်းကောင်း သိသွားသည်။ ၎င်းမှာ 'နတ်ဘုရားစွမ်းရည်' ၏ အစွမ်းပင် ဖြစ်သည်။

မဟာမျိုးနွယ်စုများ၏ ထူးခြားသော သွေးမျိုးဆက် နတ်ဘုရားစွမ်းရည်များ သို့မဟုတ် မိစ္ဆာနတ်ဆိုးများ၏ 'မိစ္ဆာအတတ်' များမှာ အမှန်စင်စစ်အားဖြင့် 'နတ်ဘုရားစွမ်းရည်' ကဏ္ဍထဲတွင် ပါဝင်သော်လည်း ၎င်းတို့မှာ နတ်ဘုရားမျိုးစေ့၏ နတ်ဘုရားစွမ်းရည်နှင့် နှိုင်းယှဉ်လျှင် အဆင့်အတန်းများစွာ နိမ့်ကျလှပြီး အားနည်းသော ပုံစံများသာ ဖြစ်သည်မှာ သိသာလှသည်။

ဖုန်းရိယွဲ့၏ ဝတ်ရုံနက်မှာ လွင့်ပျံနေပြီး သူ၏ ညာဘက်မျက်လုံးမှ အေးစက်သော လရောင်များမှာ ပိုမိုတောက်ပလာသည်။ အံ့သြစရာကောင်းသည်မှာ ဝင်ရောက်လာသော အအေးဓာတ်လှိုင်းများမှာ မမြင်ရသော အားတစ်ခုဖြင့် တားဆီးခံလိုက်ရသကဲ့သို့ သူ၏ ဘေးတစ်ဖက်တစ်ချက်စီသို့ လမ်းကြောင်းပြောင်းသွားပြီး သူ့ကို အနည်းငယ်မျှပင် မထိမိတော့ပေ။

သို့သော်လည်း လွင့်ပျံလာသော အအေးဓာတ်လှိုင်းများကြောင့် လေထုမှာ ခဲသွားသကဲ့သို့ ဖြစ်သွားပြီး လေထဲတွင် ရေခဲသလင်းများ တွဲလွဲခိုနေလျက် ဟင်းလင်းပြင်ကြီးကိုယ်တိုင် အေးခဲသွားသကဲ့သို့ ထင်မှတ်ရသည်။

"ရိုက်ခွဲပစ်မယ်"

ဟုန်ရှန့်၏ မျက်ဝန်းများတွင် တိုက်ခိုက်လိုစိတ်များ တောက်လောင်နေလျက်။ သူသည် ကြောက်မက်ဖွယ်ကောင်းသော ဟိန်းသံကြီးကို ထုတ်ဖော်လိုက်ပြီး သူ၏ သန်မာလှသော ခန္ဓာကိုယ်ဖြင့် ရေခဲသလင်းချီနဂါး၏ ကိုယ်ထည်ကို တိုက်ခိုက်လိုက်ရာ ပေတစ်ရာကျော် ရှည်လျားသော နဂါးကြီးမှာ တုန်ခါသွားတော့သည်။

ရေခဲသလင်းချီနဂါးမှာ ၎င်း၏ လက်သည်းများကို မြှောက်ကာ ပြင်းထန်စွာ ရိုက်ချလိုက်ရာ ဟုန်ရှန့်မှာ ကိုက်အစိတ်ခန့် လွင့်ထွက်သွားသည်။ သို့သော်လည်း မောပန်းခြင်းနှင့် နာကျင်ခြင်းကို မသိသူတစ်ယောက်ကဲ့သို့ ချက်ချင်းပင် ပြန်ထကာ နောက်တစ်ကြိမ် ထပ်မံတိုက်ခိုက်ပြန်သည်။

ဖုန်းရိယွဲ့က ပို၍ပင် ကြောက်စရာကောင်းလှသည်။ သူက ပျံသန်းနိုင်ပုံရပြီး ခုန်လိုက်တိုင်း လေထဲတွင် ခေတ္တမျှ ဝဲနေနိုင်သည်။ သူ၏ လက်သီးနှင့် ခြေကန်ချက် တစ်ခုချင်းစီမှာ ရေခဲသလင်းချီနဂါး၏ ခန္ဓာကိုယ်ကို အက်ကွဲသွားစေနိုင်လောက်အောင် အစွမ်းထက်လှသည်။

"ဒီနှစ်ယောက်က... သာမန်သိုင်းပညာရှင်တွေ မဟုတ်ဘူးပဲ။"

"ခဏလောက် စောင့်ကြည့်ရအောင်။"

ဟုန်ရှန့်နှင့် ဖုန်းရိယွဲ့တို့က ရေခဲသလင်းချီနဂါးနှင့် ပြင်းထန်စွာ တိုက်ခိုက်နေစဉ် အရှေ့တိမ်တိုက်ဂိုဏ်း၏ ဒုတိယဂိုဏ်းချုပ် ပိုင်ယွင်ဟယ်က တိုးတိုးလေး ပြောလိုက်သည်။ အခြားသော မူလနယ်ပယ် သိုင်းပညာရှင် သုံးဦးနှင့်အတူ သူတို့အားလုံးမှာ မျက်လုံးများ တောက်ပနေလျက် တိုက်ပွဲထဲသို့ ချက်ချင်း ဝင်မသွားကြသေးပေ။ ထိုအစား ဤနှစ်ယောက်ကို ရေခဲသလင်းချီနဂါးနှင့် အရင်တိုက်ခိုက်ခိုင်းပြီးမှ သူတို့က အခွင့်ကောင်းယူရန် ဆုံးဖြတ်လိုက်ကြသည်။

"သူတို့က... မိစ္ဆာစစ်သည်တွေများလား" စူးချန်ခုန်းသည် ဤတိုက်ပွဲကြီးကို ကြည့်ရင်း ဖုန်းရိယွဲ့နှင့် ဟုန်ရှန့်တို့၏ အင်အားကို အံ့သြနေရုံတင်မကဘဲ ဤနှစ်ယောက်မှာ သာမန်သိုင်းပညာရှင်များ မဟုတ်ဘဲ သူယခင်က တွေ့ဖူးသည့် ရှန်းဝေကျောက် ကဲ့သို့သော မိစ္ဆာလူသားများ ဖြစ်နိုင်သည်ဟု သံသယဝင်လာသည်။ မဟုတ်ပါက သူတို့သည် ဘေးနားတွင် အခွင့်ကောင်းချောင်းနေသူများ ရှိနေသည်ကို ဂရုမစိုက်ဘဲ ရေခဲသလင်းချီနဂါးကို ထိပ်တိုက်ရင်ဆိုင်ရဲမည် မဟုတ်ပေ။

"ဝေါင်း"

ကွင်းပြင်အတွင်း၌ ထိုနှစ်ယောက်မှာ ရေခဲသလင်းချီနဂါးနှင့် ရင်ဆိုင်နေရပြီး နဂါးဟိန်းသံများမှာလည်း အဆက်မပြတ် ထွက်ပေါ်နေ၏။ နဂါးကြီး၏ ဧရာမခန္ဓာကိုယ်မှာ လူးလိမ့်နေပြီး ပတ်ဝန်းကျင်ရှိ အရာအားလုံးကို ဖျက်ဆီးပစ်နေသည်။ ၎င်းသည် အနားရှိ ရေခဲရုပ်တုအားလုံးကို ကြိတ်ခြေပစ်လိုက်သော်လည်း ထိုလူနှစ်ယောက်ကိုမူ ခေတ္တမျှ အနိုင်မရနိုင်ဘဲ ဖြစ်နေသည်။

နတ်ဘုရားမျိုးစေ့တစ်ခုကို သိုင်းပညာရှင်တစ်ဦးက ထိန်းချုပ်ပြီး ၎င်း၏ နတ်ဘုရားစွမ်းရည်များကို အသုံးချနိုင်ပါက အမှန်တကယ်ပင် ပြိုင်ဘက်ကင်းဖြစ်ပေလိမ့်မည်။ သို့သော် ယခုအခါ ဤနတ်ဘုရားမျိုးစေ့မှာ ဟန်ချီ၏ ခန္ဓာကိုယ်မှ ထွက်ခွာသွားခဲ့ပြီဖြစ်ပြီး အမြစ်မရှိသော မှော်ပင်တစ်ပင်ကဲ့သို့သာ ဖြစ်နေသည်။

"ဟင်"

စူးချန်ခုန်းသည် ခဏမျှ စောင့်ကြည့်နေရင်း ရုတ်တရက် သူ၏ အမူအရာ ပြောင်းလဲသွားသည်။ မလှမ်းမကမ်းရှိ ကြေမွနေသော ရေခဲရုပ်တု အပျက်အစီးများကြားမှ အဖြူရောင် အလင်းတန်းလေးတစ်ခု ထွက်ပေါ်လာသည်ကို မြင်လိုက်ရသည်။

ထိုအဖြူရောင် အငွေ့အသက်လေးမှာ သိပ်သည်းသော်လည်း လွင့်စင်မသွားဘဲ ဆံပင်တစ်မျှင်ထက် အနည်းငယ်မျှသာ ပိုထူသည်။ သို့သော် ၎င်းမှ ထွက်ပေါ်လာသော အလင်းရောင်မှာမူ အလွန်ပင် ဆွဲဆောင်မှုရှိလှသည်။

"မူလချီစွမ်းအင်ပဲ။ ချီနဂါးခန်းမထဲမှာ မူလချီစွမ်းအင်တွေ ကျန်နေသေးတာပဲ။"

စူးချန်ခုန်းသည် မူလချီစွမ်းအင်ကို ယခင်က တစ်ခါမျှ မမြင်ဖူးသော်လည်း ဤအရာမှာ မူလချီစွမ်းအင် ဖြစ်ကြောင်းကိုမူ အသေအချာ ယုံကြည်နေမိသည်။

ယခင်က နှင်းချောက်နက်တောင်တန်းတွင် တွေ့ခဲ့ရသော မူလချီစွမ်းအင်များမှာ ချီနဂါးခန်းမအတွင်းမှ လွင့်ထွက်လာခြင်း ဖြစ်သည်။ ထိုစွမ်းအင်များသည် ဤနေရာ၌ သေဆုံးခဲ့သည့် မူလနယ်ပယ် သိုင်းပညာရှင် အယောက်လေးဆယ်ခန့်၏ ရုပ်အလောင်းများ ဆွေးမြည့်သွားပြီးနောက် ကျန်ရှိနေသော စွမ်းအင်များ ကောင်းကင်နှင့် မြေကြီးဆီသို့ ပြန်လည်ရောက်ရှိရာမှ ဖြစ်ပေါ်လာသော စွမ်းအင်သစ်များ ဖြစ်သည်။

ယခုမူ ချီနဂါးခန်းမအတွင်းရှိ စစ်ပညာရှင်များ၏ ရုပ်အလောင်းများအတွင်း၌ ခန်းမအပြင်ဘက်သို့ လွင့်မသွားသေးသော မူလချီစွမ်းအင်များ ကျန်ရှိနေခြင်းပင်။

"ဒီမူလချီစွမ်းအင်ကို ရအောင်ယူပြီး... ချက်ချင်း ထွက်သွားရမယ်။"