အခန်း (၁၂၈၉-၁၂၉၁)

အခန်း (၁၂၈၉) သတ္တမမြောက်ဂိမ်းအထိ ကစားခြင်း

ရုံးခန်းသို့ ပြန်ရောက်သည့်အခါ ဖုန်းယွီသည် လော့စ်အိန်ဂျလိစ် ဖုန်းယွီအသင်း၏ နည်းပြထံသို့ ဖုန်းခေါ်ဆိုလိုက်ပြီး ပြောလိုက်သည်။ "ဂျော့ဂျ်... ငါပါ"

"Boss... ကျွန်တော်တို့ ဗိုလ်လုပွဲကို နောက်တစ်ကြိမ် တက်လှမ်းနိုင်ခဲ့ပြန်ပြီ" ဖုန်းထဲမှ ဂျော့ဂျ် ကားလ် ၏ မအောင့်အီးနိုင်အောင် စိတ်လှုပ်ရှားနေသော အသံ ထွက်ပေါ်လာသည်။

"ငါ သိပါတယ်၊ မင်း တော်တော်လေး ကောင်းကောင်း လုပ်နိုင်ခဲ့တယ်။ အသင်းကို မင်းလက်ထဲ အပ်ထားရတာ ငါ တကယ့်ကို စိတ်ချပါတယ်။ ငါ အခု နယူးယောက်ကို ရောက်နေတယ်၊ ဗိုလ်လုပွဲ စတင်တဲ့အခါကျရင် ငါ အားလုံးနဲ့အတူ ရှိနေမှာပါ"

ဂျော့ဂျ်သည် အလွန်အမင်း ဝမ်းသာသွားခဲ့သည်။ Bossကိုယ်တိုင် လာရောက်အားပေးမည်ဆိုပါက အသင်း၏စိတ်ဓာတ်ခွန်အားမှာ သေချာပေါက် တဟုန်ထိုး မြင့်တက်လာပေလိမ့်မည်။

"Boss စိတ်ချပါ၊ ကျွန်တော် နယူးယောက်မှာ သေချာပေါက် တစ်ပွဲ အနိုင်ယူပြပါ့မယ်။ အဲဒီနောက် လော့စ်အိန်ဂျလိစ်ကို ပြန်လာတဲ့အခါမှာ နှစ်ပွဲဆက်တိုက် ထပ်နိုင်အောင် လုပ်မယ်၊ ဒီနှစ်မှာ ကျွန်တော်တို့ မျှော်လင့်ချက် အများကြီး ရှိပါတယ်"

"ဂျော့ဂျ်... ငါ ပြောတာကို အရင်ဆုံး ဆုံးအောင် နားထောင်ဦး။ အရင်တစ်ကြိမ်က မင်းနဲ့ ငါ ငါးနှစ်စာချုပ် ချုပ်ခဲ့တယ်၊ မင်းက အသင်းအတွက် အများကြီး စွမ်းဆောင်ပေးခဲ့တယ်လို့ ငါ ထင်တယ်။ ဒါကြောင့် မင်းနဲ့ နောက်ထပ် ငါးနှစ် စာချုပ်သက်တမ်း ထပ်တိုးဖို့ ငါ စီစဉ်ထားတယ်၊ မင်း လိုချင်တဲ့ လစာကိုသာ ပြောလိုက်ပါ"

ဒီနှစ်တွင် ဂျော့ဂျ် ကားလ် ၏ စာချုပ်မှာ သက်တမ်းကုန်ဆုံးတော့မည် ဖြစ်သည်။ ယခင်က ဖုန်းယွီသည် စာချုပ်သက်တမ်းတိုးရန်ကိစ္စကို လုံးဝ မပြောဆိုခဲ့သဖြင့် ဂျော့ဂျ်သည် ဖုန်းယွီက သူ၏ လွန်ခဲ့သော နှစ်နှစ်အတွင်း အသင်းကို ဦးဆောင်ခဲ့သည့် ရလဒ်များအပေါ် မကျေနပ်ဟု ထင်နေခဲ့ခြင်း ဖြစ်သည်။ အမှန်စင်စစ် သူ၏ဘက်တွင်လည်း အခက်အခဲများ ရှိခဲ့ပါသည်။ အကယ်၍ ကာတာကို Netsအသင်းထံသို့ လဲလှယ်မပို့ခဲ့ပါက အသင်းအနေဖြင့် အနောက်အုပ်စု ချန်ပီယံဆုကိုပင် မရရှိဘဲ နေလိမ့်မည် မဟုတ်ပါချေ။

ယခုအခါ ဖုန်းယွီက စာချုပ်သက်တမ်းတိုးရန်ကိစ္စကို စတင်ပြောဆိုလာသဖြင့် သူသည် အလွန်ပင် ဝမ်းမြောက်သွားခဲ့သည်။ အခြားသော အသင်းများသို့ သွားမည်ဆိုလျှင်လည်း လစာကောင်းသော အလုပ်ကို သူ ရှာဖွေနိုင်မည် ဖြစ်သော်လည်း ဤနေရာမှာ လော့စ်အိန်ဂျလိစ် မဟုတ်ပါလား။ ထို့ပြင် ဖုန်းယွီအသင်း၏ လူစာရင်းအသစ်မှာလည်း အလွန်ပင် အလားအလာကောင်းသည်ဟု သူ ခံစားနေရသည်။ အနည်းဆုံး သုံးနှစ်အတွင်းမှာမူ ချန်ပီယံဆုကို လှမ်းကိုင်နိုင်မည့် အခွင့်အရေးများ ရှိနေသဖြင့် သူသည် ဤကဲ့သို့သော အခွင့်အရေးကောင်းကို လက်လွတ်မခံလိုပါချေ။

ဂျော့ဂျ် ကားလ် ခဏမျှ စဉ်းစားလိုက်ပြီးနောက် မေးလိုက်သည်။ " Boss... တစ်နှစ်ကို ပျမ်းမျှ ဒေါ်လာ ငါးသန်း ဆိုရင် အဆင်ပြေပါ့မလား"

အခြားသော အသင်းများက သူ့ကို ကမ်းလှမ်းထားသော လစာမှာလည်း ဒေါ်လာ လေးသန်းအထက်တွင် ရှိနေသော်လည်း ဤနေရာမှာ လော့စ်အိန်ဂျလိစ် ဖြစ်နေသလို ဖုန်းယွီကလည်း အလွန်ပင် လက်ဖွာသူဖြစ်သဖြင့် အနည်းငယ် ပို၍ရလိုစိတ် ရှိနေခြင်း ဖြစ်သည်။

"ရတာပေါ့၊ ဒါဆိုရင် ငါတို့ နောက်ထပ် ငါးနှစ်စာချုပ် ချုပ်ကြတာပေါ့"

"Bossကို တကယ့်ကို ကျေးဇူးတင်ပါတယ်" ဂျော့ဂျ် ကားလ် မှာ ဝမ်းသာအားရ ဖြစ်သွားသည်။ အလုပ်ရှင်သည် တကယ်ပင် ရက်ရောလှပေသည်။ လက်ရှိ နည်းပြများထဲတွင် သူ၏ လစာမှာလည်း ထိပ်တန်းအဆင့်တွင် ပါဝင်သွားပြီ ဖြစ်သည်။

"အခု ငါ မင်းကို ကိစ္စတစ်ခု မှာစရာ ရှိတယ်၊ ဒီကိစ္စကို မင်းတစ်ယောက်တည်း သိထားရင် ရပြီ၊ အသင်းမန်နေဂျာကိုတောင် မပြောနဲ့ဦး" ဖုန်းယွီ၏ လေသံမှာ ရုတ်တရက်ပင် တည်ကြည်လေးနက်သွားခဲ့သည်။

ဂျော့ဂျ် ကားလ် သည် ထိုစကားကို ကြားလိုက်ရသည့်အခါ Bossက သူ့ကို အသင်းမန်နေဂျာ ရာထူးကိုပါ ပူးတွဲတာဝန်ပေးလိုခြင်းလောဟု တွေးမိသွားသည်။ ထိုသို့ဆိုလျှင် ပို၍ပင်ကောင်းဦးမည်။ လစာ မတိုးလျှင်ပင် သူ၏ လုပ်ပိုင်ခွင့်မှာ ပိုမို ကြီးမားလာမည်ဖြစ်သလို ဆုကြေးငွေများလည်း ပိုမို ရရှိနိုင်မည် မဟုတ်ပါလား။

ဂျော့ဂျ် ကားလ် သည် အခြားသော လူများကို ရုံးခန်းထဲမှ မောင်းထုတ်လိုက်ပြီးနောက် ဖုန်းကို ရိုရိုသေသေဖြင့် ဆိုလိုက်သည်။ "Boss... ကျွန်တော့် ဘေးနားမှာ အခု ဘယ်သူမှ မရှိတော့ပါဘူး။ ပြောပါ... ကျွန်တော် နားထောင်နေပါတယ်"

"နယူးယောက်မှာ ကစားမယ့် ပထမဆုံး နှစ်ပွဲကို မင်း ရှုံးပေးရမယ်"

ဘာ…

ဂျော့ဂျ် ကားလ် မှာ အလွန်ပင် ထိတ်လန့်သွားခဲ့ရသည်။ အလုပ်ရှင်က ဘာကိုဆိုလိုခြင်းသနည်း၊ အလုပ်ရှင်သည် လောင်းကစားများ ပြုလုပ်နေခြင်းလား။ အကယ်၍ ဤအချက်ကို တစ်စုံတစ်ယောက်က ရှာဖွေတွေ့ရှိသွားမည်ဆိုပါက တကယ့်ကို ကြီးမားလှသော အရှုပ်တော်ပုံကြီး ဖြစ်လာပေလိမ့်မည်။

" Boss... ကျွန်တော် Bossရဲ့ ဆိုလိုရင်းကို နားမလည်ပါဘူး"

"သိပ်ပြီး အဝေးကြီး မတွေးပါနဲ့၊ ငါက လောင်းကစား လုပ်နေတာ မဟုတ်ပါဘူး။ ငါ ကိုယ်တိုင်လည်း လောင်းကစားတာကို သိပ်ပြီး မနှစ်သက်ဘူး။ ငါနဲ့ Netsအသင်းရဲ့ Boss ကီရီလန်ကိုက သူငယ်ချင်းအရင်းကြီးတွေဆိုတာ လူတိုင်း သိထားကြတာပဲ။ ဒါကြောင့် ငါတို့ အချင်းချင်း သဘောတူထားကြတယ်၊ ၇ပွဲမြောက်ဂိမ်းကျမှသာ အရှုံးအနိုင်ကို တစ်ခါတည်း ဆုံးဖြတ်ကြမယ်လို့ပေါ့။ အဲဒီမတိုင်ခင် အပွဲပွဲတိုင်းမှာတော့ ဘယ်သူ့အိမ်ကွင်းပဲ ဖြစ်ဖြစ်၊ အိမ်ရှင်ကပဲ နိုင်ရမယ်။ မင်း နားလည်ပြီလား"

ဂျော့ဂျ် ကားလ် မှာ ပါးစပ်အဟောင်းသား ဖြစ်သွားခဲ့ရသည်။ ပြိုင်ပွဲတစ်ခုကို ဤကဲ့သို့ သီးသန့် သဘောတူညီချက်များ ပြုလုပ်၍ ရသည်လား။ မင်းတို့တွေက ဆုံးဖြတ်ချက်ကို ကျောက်စရစ်၊ ကတ်ကြေး၊ စက္ကူ လုပ်ပြီး ဆုံးဖြတ်ခဲ့ကြတာလား။

သို့သော် ပွဲစဉ်ကို သတ္တမမြောက်ဂိမ်းအထိ ဆွဲဆန့်လိုက်ခြင်းမှာ အသင်းနှစ်သင်းလုံးအတွက်လည်း ကောင်းမွန်သော အရာဖြစ်သည်။ လက်မှတ်များကို ပိုမို ရောင်းချနိုင်မည်ဖြစ်သလို သူတို့လည်း play off ဆုကြေးငွေများကို ပိုမိုရရှိကြမည် မဟုတ်ပါလား။

သို့သော် ဤကဲ့သို့ ပြုလုပ်ခြင်းမှာ အသက်အရွယ် ကြီးရင့်နေပြီဖြစ်သော အိုလာဂျူဝမ်အတွက်မူ တကယ့်ကို ဝန်ထုပ်ဝန်ပိုး ဖြစ်သွားပေလိမ့်မည်။

အိုလာဂျူဝမ်သည် ဒီနှစ်ကို နောက်ဆုံးအဖြစ် အစွမ်းကုန် ကြိုးစားကာ ချန်ပီယံလက်စွပ် တစ်ကွင်း ရယူပြီးမှ အနားယူရန် စီစဉ်ထားခြင်း ဖြစ်သည်။ အကယ်၍ ၇ပွဲမြောက်ဂိမ်းအထိ ကစားရမည်ဆိုပါက အိုလာဂျူဝမ်၏ ခွန်အားမှာ တောင့်ခံနိုင်ရန် မသေချာတော့ဘဲ စွမ်းဆောင်ရည်မှာလည်း သေချာပေါက် ကျဆင်းသွားပေလိမ့်မည်။

အသင်းတွင် တာ့ယောင် (ယောင်မင်း) ရှိနေသော်လည်း တာ့ယောင်မှာ နုပျိုနေသေးသလို ခံနိုင်ရည်မှာလည်း ပြဿနာ ရှိနေသေးသည်။ ပွဲတစ်ပွဲတွင် မိနစ် ၃၀ ခန့်သာ စွမ်းဆောင်ရည်ကို ထိန်းထားနိုင်ပြီး ထိုထက် ကျော်လွန်သွားပါက အဆင်မပြေတော့ပါချေ။ အိုလာဂျူဝမ်မှာ လူစားလဲ ကစားသမား ဖြစ်သော်လည်း သူ၏ အသက်အရွယ်မှာ ကြီးရင့်နေပြီ ဖြစ်စေကာမူ အလွန် အစွမ်းထက်သော လူစားလဲ ကစားသမား တစ်ဦး ဖြစ်သည်။

အထူးသဖြင့် Netsအသင်းမှ ဂါဆော၏ ကစားဟန်မှာ တာ့ယောင်နှင့် တစ်ဦးကိုတစ်ဦး ထိန်းချုပ်နိုင်သည့် ပုံစံမျိုး ဖြစ်နေသည်။ သူသည် မူလက အိုလာဂျူဝမ်ကို အားသွန်ခွန်စိုက် ကစားခိုင်းပြီး ဂါဆောကို လူစားလဲအောင် ပြုလုပ်ရန် စီစဉ်ထားခြင်း ဖြစ်သည်။

ထိုသို့ဆိုလျှင် အတွင်းစည်းပိုင်းကို တာ့ယောင်က အလွယ်တကူ စိုးမိုးသွားနိုင်မည် ဖြစ်သည်။ တာ့ယောင်၏ နူးညံ့လှသော လက်စွမ်းနှင့်ဆိုလျှင် အနည်းဆုံး အမှတ် ၃၀ ခန့် ရရှိနိုင်ပေလိမ့်မည်။

ဤနည်းဖြင့် အသင်း၏ အနိုင်ရနိုင်ခြေမှာ များစွာ မြင့်မားသွားမည် ဖြစ်သည်။ ယခုကဲ့သို့ ပြုလုပ်လိုက်မည်ဆိုပါက အားသာချက်မှာ အားနည်းချက် ဖြစ်သွားပေလိမ့်မည်။ Netsအသင်းဘက်တွင်လည်း အသက်ကြီးသော စင်တာများ ရှိနေသော်လည်း ၎င်းတို့မှာ ပုံမှန်အားဖြင့် ကွင်းထဲသို့ သိပ်ဝင်ရလေ့ မရှိသဖြင့် အိုလာဂျူဝမ်၏ အခန်းကဏ္ဍနှင့်မူ မည်သို့မျှ နှိုင်းယှဉ်၍ မရနိုင်ပါချေ။

" Boss... ၇ပွဲဂိမ်းအထိ ဆွဲဆန့်လိုက်တာက ကျွန်တော်တို့အတွက် တကယ့်ကို အခြေအနေ မကောင်းပါဘူး။ ကျွန်တော်တို့ရဲ့ လူစားလဲ ကစားသမားအချို့က အသက်အရွယ်တွေ ကြီးနေကြပြီလေ" ဂျော့ဂျ် ကားလ် က ခက်ခဲသော အသံဖြင့် ပြောလိုက်သည်။

ဖုန်းယွီက ပေါ့ပေါ့ပါးပါး လေသံဖြင့် ဆိုလိုက်သည်။ "သူတို့တွေက အခုလောလောဆယ် ဒဏ်ရာရနေလို့ ရှေ့က ပွဲစဉ်အချို့ကို မကစားနိုင်ဘူး မဟုတ်လား"

ဂျော့ဂျ် ကားလ် သည် ရုတ်တရက်ပင် သတိဝင်လာခဲ့သည်။ ဟုတ်သားပဲ၊ ရှေ့က ပွဲစဉ်တွေမှာ အရှုံးပေးမှာ ဖြစ်တဲ့အတွက် အိုလာဂျူဝမ်တို့လို အဖိုးကြီးတွေကို အနားပေးထားလို့ ရတာပဲ။ ဤသို့ဖြင့် ၇ပွဲမြောက် ရောက်သည့်အခါတွင် သူတို့သည် အင်အားအပြည့်နှင့် ဖြစ်နေမည်ဖြစ်ရာ အနိုင်ရနိုင်ခြေမှာလည်း များစွာ မြင့်တက်လာပေလိမ့်မည်။

"မှတ်ထားပါ၊ အဓိက ကစားသမားတွေ ဒဏ်ရာ မရစေနဲ့၊ ပြီးတော့ သိသာလွန်းအောင်လည်း မလုပ်နဲ့။ ဧည့်သည်ကွင်းမှာ ကစားတဲ့အခါ နည်းဗျူဟာ အသစ်တွေကို စမ်းသပ်ကြည့်လို့ ရပါတယ်၊ နည်းဗျူဟာ အမှားအယွင်းကြောင့် ရှုံးသွားတယ်လို့ပဲ သဘောထားလိုက်ပါ။ မင်းက ဒီလောက် မြင့်မားတဲ့ လစာကို ရထားတာဆိုတော့ အသင်းရှုံးနိမ့်တဲ့အခါမှာ တာဝန်ယူမှုကိုတော့ မင်းဘက်က တောင့်ခံထားရလိမ့်မယ်"

"Boss စိတ်ချပါ၊ အရှုံးအနိုင်တိုင်းက လူတိုင်းအတွက် သဘာဝကျနေစေရမယ်လို့ ကျွန်တော် အာမခံပါတယ်။ ငါတို့တွေ ပွဲညှိတာ(ပွဲလိမ်) လုပ်နေတယ်ဆိုတာကို ဘယ်သူမှ ရိပ်မိစေမှာ မဟုတ်ပါဘူး"

"ကောင်းပြီ၊ ကျန်တာကိုတော့ ငါ ထပ်မပြောတော့ဘူး။ ပွဲကို ဘယ်လို ကစားရမလဲဆိုတာ မင်းကိုယ်တိုင် သိမှာပါ။ ဒါပေမဲ့ သတ္တမမြောက်ဂိမ်းမှာသာ မင်း အနိုင်ယူနိုင်ခဲ့မယ်ဆိုရင် ၂၀၀၈ အိုလံပစ်ပွဲတော်ကျရင် မင်းက အမေရိကန်အသင်းရဲ့ နည်းပြချုပ် မဟုတ်ဘူးဆိုတာ ငါ သိတယ်၊ ဒါပေမဲ့ ငါ မင်းကို တရုတ်အသင်းရဲ့နည်းပြချုပ် ဖြစ်အောင် လုပ်ပေးနိုင်တယ်။ တရုတ် ကစားသမားတွေနဲ့လည်း မင်းက ရင်းနှီးပြီးသားပဲ မဟုတ်လား၊ အဲဒီ လစာကလည်း မင်းအတွက် နည်းမှာ မဟုတ်ပါဘူး"

ဖုန်းယွီသည် နောက်ထပ် အကျိုးအမြတ်တစ်ခုဖြင့် ထပ်မံ၍ ဆွဲဆောင်လိုက်ပြန်သည်။ မည်သို့ပင်ဖြစ်စေ လက်ရှိ တရုတ်အမျိုးသား ဘတ်စကက်ဘော အသင်း၏ နည်းပြချုပ်မှာ အရည်အချင်း သာမန်မျှသာ ဖြစ်သလို နွေရာသီတိုင်းတွင်လည်း တရုတ်ကစားသမား အမြောက်အမြားမှာ လော့စ်အိန်ဂျလိစ်သို့ လာရောက် လေ့ကျင့်လေ့ရှိကြရာ ကားလ် ကိုလည်း အလွန်ပင် လေးစားကြပါသည်။

အိုလံပစ် အသင်းတစ်သင်းကို ဦးဆောင်ရမည်ဟူသော အချက်မှာ ဂျော့ဂျ် ကားလ် အတွက် တကယ့်ကို ဆွဲဆောင်မှု ရှိလှသည်။ အမေရိကန်အမျိုးသား အသင်းက သူ့ကို လက်ထောက်နည်းပြ ရာထူးတောင် မပေးခဲ့ကြသဖြင့် ထိုသူများ၏ မျက်စိမှားမှုကို သူ ပြသချင်နေခဲ့ခြင်းလည်း ဖြစ်သည်။

လွန်ခဲ့သော နှစ်နှစ်အတွင်း အမေရိကန်၏ အဓိက အားကစား လိဂ်လေးခုထဲတွင် NBA ၏ အဆင့်အတန်းမှာ များစွာ မြင့်တက်လာခဲ့သည်။ ဒီနှစ်တွင်လည်း လော့စ်အိန်ဂျလိစ်နှင့် နယူးယောက်ဟူသော မြို့ကြီးနှစ်မြို့၏ ထိပ်တိုက်တွေ့ဆုံမှု ဖြစ်နေသလို အသင်းနှစ်သင်းလုံးမှာလည်း တိုက်စစ်ရော ခံစစ်ပါ မျှတကာ လှပသော ကစားဟန်များကို ပိုင်ဆိုင်ထားကြသဖြင့် ကြည့်ရှုသူနှုန်းမှာ သေချာပေါက် စံချိန်တင် မြင့်မားပေလိမ့်မည်။

ပြိုင်ပွဲ မစတင်မီကပင် မီဒီယာအမျိုးမျိုးမှာ ဗိုလ်လုပွဲအတွက် စတင်၍ ကြိုတင် ရေးသားနေကြပြီ ဖြစ်သည်။ အသင်းနှစ်သင်းလုံး၏ ပြည်သူ့ဆက်ဆံရေး အဖွဲ့များရော NBA လိဂ်၏ ပြည်သူ့ဆက်ဆံရေး အဖွဲ့များပါ ပါဝင်နေကြခြင်း ဖြစ်သည်။

ပြီးခဲ့သည့်နှစ်က Netsအသင်းနှင့် လေကာအသင်းတို့၏ ပွဲစဉ်မှာလည်း ပြောစရာများစွာ ရှိခဲ့သည်။ Netsအသင်းမှာ ယခင်က ထီပေါက်သလိုမျိုး အသင်းဖြစ်ခဲ့သည် မဟုတ်ပါလား။ ဒီနှစ်တွင်မူ Netsအသင်းက နယူးယောက်သို့ ပြောင်းရွှေ့လာခဲ့သဖြင့် နယူးယောက် ပြည်သူများကို ဗိုလ်လုပွဲ၏ အရသာကို တစ်ဖန် ပြန်လည် မြည်းစမ်းခွင့် ပေးလိုက်နိုင်သည်မှာ အလွန်ပင် စိတ်လှုပ်ရှားစရာ ကောင်းလှပေသည်။

ပြီးခဲ့သည့်နှစ်က Netsအသင်းသည် လော့စ်အိန်ဂျလိစ်ကို အနိုင်ယူခဲ့သည်။ ဒီနှစ်တွင်လည်း Netsအသင်းသည် လော့စ်အိန်ဂျလိစ်နှင့် တစ်ဖန် ပြန်လည်ရင်ဆိုင်ရပြန်သော်လည်း အခြားသော အသင်းတစ်သင်း ဖြစ်နေခဲ့သည်။ ၎င်းတို့သည် ထပ်မံ၍ အနိုင်ရရှိနိုင်ဦးမည်လား။ သို့မဟုတ် NBA ၏ အမြင့်ဆုံးသော စင်တာကြီး ရှိနေသည့် ဖုန်းယွီအသင်းက အနိုင်ရရှိသွားမည်လား။

တာ့ယောင်သည် ထိုစဉ်က ရရှိနိုင်မည့် ထိပ်တန်း အဆင့်နေရာကို စွန့်လွှတ်ကာ NBA လူသစ်ရွေးချယ်ပွဲကို မဝင်ဘဲ ဖုန်းယွီအသင်းသို့ ဝင်ရောက်ခဲ့သဖြင့် လိဂ်တာဝန်ရှိသူများကို ဒေါသထွက်လုနီးပါး ဖြစ်စေခဲ့သည်။ ကံကောင်းသည်မှာ တာ့ယောင်သည် သူ၏ တန်ဖိုးကို လက်တွေ့ သက်သေပြနိုင်ခဲ့သဖြင့် ထိုစဉ်က သူတို့၏ မြှင့်တင်ပေးမှုများမှာ အချည်းနှီး မဖြစ်ခဲ့ပါချေ။

လူအများအပြား သတိထားမိလိုက်သည့် နောက်ထပ်အချက်တစ်ခုမှာ ဤတစ်ကြိမ်သည် နိုင်ငံခြားသား အလုပ်ရှင်နှစ်ဦး ပိုင်ဆိုင်သည့် NBA အသင်းနှစ်သင်း၏ တိုက်ပွဲ ဖြစ်နေခြင်းပင် ဖြစ်သည်။ ဤသို့ဖြင့် စိတ်ဝင်စားဖွယ်ရာ အချက်အလက်များမှာ ပို၍ပင် ပြည့်စုံသွားခဲ့ရသည်။

ပရိသတ်အားလုံး၏ မျှော်လင့်ချက်များအကြားတွင် ဗိုလ်လုပွဲ၏ ပထမဆုံးသော ပွဲစဉ်မှာ စတင်ခဲ့လေတော့သည်။

******

အခန်း (၁၂၉၀) နယူးယောက်တွင် လင်းလက်တောက်ပခြင်း

ပြိုင်ပွဲမစတင်မီအချိန်တွင် ဖုန်းယွီသည် ဖုန်းယွီအသင်း တည်းခိုရာ ဟိုတယ်သို့ ရောက်ရှိလာခဲ့ပြီး အသင်းသားအားလုံးကို မိန့်ခွန်းပြောကြားခဲ့သည်။

ပုံမှန်အခြေအနေအရဆိုလျှင် အလုပ်ရှင်တစ်ဦးသည် မိမိ၏ ကစားသမားများကို အနိုင်ရရှိစေရန်အတွက် အစွမ်းကုန် ကြိုးစားအားထုတ်ကြဖို့ တိုက်တွန်းနှိုးဆော်ရမည် ဖြစ်သည်။ သို့သော် ဖုန်းယွီ၏ပြောကြားချက်မှာမူ အခြားသူများနှင့် ကွဲပြားခြားနားနေခဲ့သည်။

"အားလုံးပဲ... မင်းတို့အားလုံး ချန်ပီယံဆုကို လိုချင်နေကြတယ်ဆိုတာ ငါသိပါတယ်။ ဒါပေမဲ့ Netsအသင်းကလည်း အားနည်းတဲ့အသင်း မဟုတ်ဘူးဆိုတာကိုတော့ သိထားဖို့ လိုလိမ့်မယ်။ အားလုံးပဲ စိတ်ထဲမှာ ဝန်ထုပ်ဝန်ပိုးတွေ မထားကြပါနဲ့၊ လွတ်လွတ်လပ်လပ်ပဲ ကစားကြပါ။ အရှုံးအနိုင်က အဓိကမကျပါဘူး"

ထိုစကားကြောင့် လူတိုင်းမှာ ကြောင်အမ်းအမ်း ဖြစ်သွားကြရသည်။ ဒါက ဘာကို ဆိုလိုတာလဲ။ Bossက အရှုံးအနိုင်က အဓိကမကျဘူးဟု ပြောနေခြင်းမှာ အရှုံးပေးခိုင်းနေခြင်းလား။

ပီယာ့စ်သည် ဤနေရာတွင် တိုက်ခိုက်လိုစိတ် အမြင့်မားဆုံးသူ ဖြစ်သည်။ ထိုစဉ်က Bossသည် ကာတာကို ထွက်ခွာခွင့်ပြုခဲ့ပြီး သူ့ကို ချန်ထားရစ်ခဲ့ခြင်းမှာ သူ့ကို အသင်း၏ အဓိက တိုက်စစ်မှူးအဖြစ် သတ်မှတ်ထားခြင်းကြောင့် ဖြစ်သည်ဟု သူက ယူဆထားသည်။ ထို့ကြောင့် သူသည် ကာတာထက် ပိုမိုအစွမ်းထက်ကြောင်း သက်သေပြလိုနေခဲ့သည်။

မာတင်သည်လည်း အလားတူပင် စိတ်မသက်မသာ ဖြစ်နေခဲ့ရသည်။ သူသည် ကာတာနှင့် လဲလှယ်ခံခဲ့ရပြီးနောက် Netsအသင်းမှာ ချက်ချင်းဆိုသလို ချန်ပီယံဆု ရရှိသွားခဲ့သည်။ တူညီသော ထိပ်တန်းအဆင့် ကစားသမားများ ဖြစ်ကြစေကာမူ ကွာဟချက်မှာ အဘယ်ကြောင့် ဤမျှအထိ ကြီးမားနေရသနည်းဟု သူက ခံစားနေရခြင်း ဖြစ်သည်။

ထိုအချိန်တွင် ကားလ် က ကြားဖြတ်၍ ဖြည့်စွက်ပြောကြားလိုက်သည်မှာ "Boss ဆိုလိုတာက ပထမဆုံး ဧည့်သည်ကွင်း ပွဲစဉ်မှာ အရှုံးအနိုင်က အဓိကမကျဘူးလို့ ပြောတာပါ။ ငါတို့အနေနဲ့ တစ်ပွဲ အနိုင်ရရင်ကို လုံလောက်ပါပြီ။ လော့စ်အိန်ဂျလိစ်ကို ပြန်ရောက်တဲ့အခါ နှစ်ပွဲဆက်တိုက် အနိုင်ယူနိုင်ရင် ငါတို့က အသာစီးရသွားမှာပါ"

ထိုအခါမှသာ လူတိုင်းမှာ သဘောပေါက်သွားကြတော့သည်။ အလုပ်ရှင်မှာ ဤကဲ့သို့သော ဆိုလိုရင်း ရှိနေခြင်းပင် ဖြစ်သည်။

သို့သော်လည်း လူတိုင်းက အနိုင်ရရှိအောင် ကြိုးစားသွားမည်ဖြစ်ကြောင်း အသီးသီး ထုတ်ဖော်ပြောကြားခဲ့ကြသည်။

"အားလုံး ပွဲကစားတဲ့အခါ ကိုယ့်ကိုယ်ကိုယ် ကာကွယ်ဖို့ကိုလည်း သတိထားကြဦး၊ ဒဏ်ရာ မရစေနဲ့။ ဒီနှစ် Play offမှာ Lakersအသင်းက ကိုဘီကို ကြည့်လိုက်လေ၊ ကွင်းထဲမှာတင် လဲကျသွားခဲ့ရတယ် မဟုတ်လား"

ကိုဘီသည် စပါးစ်အသင်းမှ ဘိုးဝမ်း၏ ခံစစ်အောက်တွင် "မတော်တဆ" ခြေကျင်းဝတ် လည်သွားခဲ့ရသဖြင့် စပါးစ်အသင်းက ပွဲစဉ်များကို အနိုင်ရရှိသွားခဲ့ခြင်း ဖြစ်သည်။ သို့သော် ဘိုးဝမ်း၏ ထိုနည်းလမ်းမှာ ပီယာ့စ်အပေါ်တွင်မူ အသုံးမဝင်ပါချေ။ ပီယာ့စ်သည် ထိုမျှအထိ အမြင့်ကြီး ခုန်လေ့မရှိသဖြင့် တစ်စုံတစ်ယောက်၏ခြေထောက်ပေါ်သို့ နင်းမိလျှင်ပင် ခြေကျင်းဝတ် လည်သွားနိုင်ခြေ နည်းပါးလှသည်။

......

ပြိုင်ပွဲ စတင်ခဲ့ပြီ ဖြစ်သည်။ ကစားသမားများ ကွင်းအတွင်းသို့ စတင် ဝင်ရောက်လာကြသည့်အခါ ကီရီလန်ကိုက ဖုန်းယွီ၏ဘေးနားသို့ လျှောက်လာပြီး ပြောလိုက်သည်။ "ပွဲအနားယူချိန်ကျရင် မင်းအတွက် အံ့သြစရာတစ်ခု ရှိတယ်"

ဖုန်းယွီမှာ ဇဝေဇဝါ ဖြစ်သွားခဲ့ရသည်။ ဒီနေ့က ငါ့မွေးနေ့လည်း မဟုတ်သလို၊ ဤတစ်ကြိမ်သည် မင်း၏ Netsအသင်း အိမ်ကွင်းပွဲစဉ် ဖြစ်နေပါလျက်နှင့် ငါ့ကို ဘာများ အံ့သြစရာ ပေးဦးမှာလဲ။

သို့သော် ကီရီလန်ကိုသည် ပြောပြီးသည်နှင့် သူ၏ အသင်းရှိရာဘက်သို့ ပြန်လည် ထွက်ခွာသွားခဲ့သဖြင့် ဖုန်းယွီမှာလည်း မေးမြန်းရန် အချိန်မရလိုက်ပါချေ။

ပွဲစတင်၍ ဘောလုံးပုတ်တင်ရာတွင် ဂါဆောက တာ့ယောင်ကို အသာစီးရယူနိုင်ခဲ့သဖြင့် Netsအသင်းက စတင် တိုက်စစ်ဆင်ခဲ့သည်။

ကစ်ဒ်သည် ဘောလုံးကို လက်ခံရရှိသည်နှင့် ရှေ့တန်းသို့ တိုက်ရိုက် ပစ်တင်ပေးလိုက်ရာ ကာတာက လေထဲတွင် ဘောလုံးကို ဖမ်းယူ၍ အားပါပြင်းထန်စွာ ပုတ်သွင်းလိုက်သဖြင့် မြောက်ဝင်ရိုးစွန်းဝက်ဝံအားကစားကွင်း တစ်ခုလုံး ဟိန်းခနဲ ဖြစ်သွားခဲ့ရသည်။ ဤသည်မှာ ဘရွတ်ကလင်း Netsအသင်း၏ ကွင်းပင် ဖြစ်သည်။

မိုဘလီ၏မျက်နှာမှာ ပျက်ယွင်းသွားခဲ့ရသည်။ သူသည် ကာတာနောက်သို့ အမီလိုက်ခဲ့စေကာမူ ကာတာလောက် မခုန်နိုင်ခဲ့ပါချေ။

ဖုန်းယွီအသင်းဘက်မှ ဘောလုံး ပြန်လည်စတင်သည့်အခါတွင်လည်း အလွန်လျင်မြန်စွာ ပြေးလွှားနေကြသဖြင့် ပရိသတ်အများအပြားမှာ အံ့သြသွားကြရသည်။ တာ့ယောင် ကွင်းထဲတွင် ရှိနေချိန်တွင် ၎င်းတို့သည် ဤကဲ့သို့သော ပြေးလွှားပစ်ခတ်သည့် နည်းဗျူဟာကို တစ်ခါမျှ မသုံးခဲ့ကြဖူးသောကြောင့် ဖြစ်သည်။

နှစ်ဖက်အသင်းမှာ အပြန်အလှန် တိုက်စစ်ဆင်နေကြပြီး ပထမပိုင်း ပွဲရပ်နားချိန်အထိ မည်သည့်အသင်းကမျှ ပွဲရပ်နားခွင့်မတောင်းခဲ့ကြပါချေ။

ရမှတ်များမှာလည်း အလွန်မြင့်မားနေခဲ့သည်။ ဒီနေ့ ကားလ် ၏ နည်းဗျူဟာမှာ Netsအသင်းနှင့် တိုက်စစ်ချင်း ယှဉ်ပြိုင်ရန် ဖြစ်ပုံရသည်။

ကျွမ်းကျင်သူ ဝေဖန်ရေးသမား အများအပြားက ကားလ် မှာ ဦးနှောက်ဖောက်ပြန်နေပြီဟု ပြောဆိုနေကြသည်။ ဖုန်းယွီအသင်းက ကားလ် နှင့် စာချုပ်သက်တမ်း မတိုးခြင်းမှာလည်း ကားလ် သည် ဖုန်းယွီအသင်းကို ဦးဆောင်ရန် မသင့်တော်တော့ဟု ယူဆထားသောကြောင့် ဖြစ်လိမ့်မည်ဟု ၎င်းတို့က ခန့်မှန်းနေကြသည်။

၎င်းတို့ မသိရှိသည်မှာ စာချုပ်သက်တမ်း မတိုးရခြင်းမှာ ဖုန်းယွီက ထိုကိစ္စကို လုံးဝ သတိမထားမိခဲ့သောကြောင့်သာ ဖြစ်သည်ဟူသောအချက်ပင် ဖြစ်သည်။

ပထမပိုင်း ပြီးဆုံးသွားသည့်အခါ ရမှတ်မှာ ၃၈ မှတ် ၃၅ မှတ်ဖြင့် Netsအသင်းက ဦးဆောင်နေခဲ့သည်။ ဗိုလ်လုပွဲ စင်မြင့်ထက်တွင် ဤမျှ မြင့်မားသော ရမှတ်များ ထွက်ပေါ်လာခြင်းမှာ အလွန်ပင် ရှားပါးလှသဖြင့် ပရိသတ်များမှာလည်း အလွန်ပင် စိတ်လှုပ်ရှားနေကြသည်။

ဒုတိယပိုင်း စတင်သည့်အခါတွင်လည်း အသင်းနှစ်သင်းမှာ တိုက်စစ်ကိုသာ အဓိကထား ကစားနေကြဆဲ ဖြစ်သည်။ သို့သော် လူတိုင်းကို ဇဝေဇဝါ ဖြစ်စေသည့်အချက်မှာ ဒီနေ့ ပီယာ့စ်၏ လက်စွမ်းမှာ အလွန်ကောင်းမွန်နေပါလျက်နှင့် အဘယ်ကြောင့် သုံးကြိမ်ဆက်တိုက် ဂိုးသွင်းပြီးနောက်တွင် ကားလ် က သူ့ကို လူစားလဲလိုက်ရသနည်း ဟူသောအချက်ပင် ဖြစ်သည်။

ပီယာ့စ်သည်လည်း နားမလည်နိုင် ဖြစ်နေခဲ့သော်လည်း ကားလ် ကမူ ပီယာ့စ်မှာ ပင်ပန်းနေပြီဖြစ်သဖြင့် အနားယူရန် လိုအပ်ကြောင်း၊ သို့မှသာ ဒဏ်ရာရရှိနိုင်ခြေကို လျှော့ချနိုင်မည်ဖြစ်ကြောင်း ပြောဆိုခဲ့သည်။ ထိုအခါ ပီယာ့စ်မှာလည်း ဘာမျှမပြောနိုင်တော့ပါချေ။ နည်းပြက သူ့ကို ကာကွယ်ပေးနေခြင်း မဟုတ်ပါလား။

ဤသို့ဖြင့် ပွဲတစ်ဝက် ရပ်နားချိန်တွင် Netsအသင်းက ၇၀ မှတ် ၆၂ မှတ်ဖြင့် ၈ မှတ် အသာစီးရကာ ဦးဆောင်နေခဲ့သည်။ ပွဲတစ်ဝက်တွင် ဤမျှ မြင့်မားသော ရမှတ်ကို ရရှိလိမ့်မည်ဟု ဝေဖန်ရေးသမားများပင် မထင်မှတ်ထားခဲ့ကြပါချေ။

အသင်းနှစ်သင်းလုံးမှာ အဘယ်ကြောင့် ခံစစ်ကို မကစားကြသနည်း၊ ဤသည်မှာ ဗိုလ်လုပွဲ မဟုတ်ပါလား။

ဤကိစ္စကို အသင်းနှစ်သင်းလုံး၏အလုပ်ရှင်များနှင့် နည်းပြချုပ်များသာ သိရှိကြပြီး ကျန်ရှိသောသူများမှာမူ အကြောင်းရင်းကို မသိရှိကြပါချေ။

ပွဲတစ်ဝက် ရပ်နားချိန်တွင် ကစားသမားများအားလုံး အနားယူခန်းသို့ ထွက်ခွာသွားကြသည်။ ယခင်က ကီရီလန်ကိုသည် နယူးယောက် ပရိသတ်များကို ဖုန်းယွီအသင်းအား နှောင့်ယှက်ခြင်း မပြုကြရန်နှင့် သူတို့သည် တရားမျှတစွာဖြင့် အနိုင်ယူပြမည်ဖြစ်ကြောင်း ပြောဆိုထားခဲ့သည်။

ထို့ကြောင့် ဤတစ်ကြိမ်တွင် ဖုန်းယွီအသင်းသားများမှာ မနှစ်မြို့ဖွယ်ရာ ကိစ္စရပ်များနှင့် မကြုံတွေ့ခဲ့ရပါချေ။

ကစားသမားများ အနားယူနေကြပြီ ဖြစ်သော်လည်း ဖုန်းယွီမှာမူ သူ၏ နေရာတွင်သာ ဆက်လက်ထိုင်နေခဲ့သည်။ သူသည် ကီရီလန်ကို ပြောခဲ့သော အံ့သြစရာကို စောင့်ဆိုင်းနေခြင်း ဖြစ်သည်။

မီးအလင်းရောင်များမှာ ရုတ်တရက် မှိန်ကျသွားခဲ့ပြီး ကွင်းလယ်ဗဟိုသို့ မီးမောင်းထိုးလိုက်သည့်အခါ ဖုန်းယွီ၏ မျက်လုံးများမှာ ရုတ်တရက် ပြူးကျယ်သွားရသည်။

အယ်လီနာလား။ သူမက ဘာလို့ ဒီကို ရောက်နေရတာလဲ။

တေးဂီတသံ ထွက်ပေါ်လာပြီး သာယာနာပျော်ဖွယ် ကောင်းလှသော သီချင်းသံမှာ အားကစားကွင်း တစ်ခုလုံးသို့ ပျံ့လွင့်သွားခဲ့ရာ ပရိသတ်အားလုံးမှာလည်း ရုတ်တရက် ငြိမ်သက်သွားကြသည်။

ဖုန်းယွီသည် ကီရီလန်ကို ရှိရာဘက်သို့ ကြည့်လိုက်သော်လည်း မီးရောင်များ မှောင်နေသဖြင့် ဘာမျှမမြင်ရပါချေ။ ဤသည်မှာ ကီရီလန်ကို ပြောသော အံ့သြစရာ ဖြစ်ပေလိမ့်မည်။ ပွဲတစ်ဝက် ဖျော်ဖြေရေးလား။

အယ်လီနာသည် ဥရောပတွင် ရှိနေရမည် မဟုတ်ပါလား၊ အဘယ်ကြောင့် အမေရိကန်သို့ ရောက်လာရသနည်း။

သို့သော်လည်း မည်သို့ပင်ဖြစ်စေ၊ အယ်လီနာနှင့် ဆုံတွေ့ရသဖြင့် ဖုန်းယွီမှာ အလွန်ပင် ဝမ်းသာနေခဲ့သည်။ အထူးသဖြင့် အယ်လီနာ၏သီချင်းသံကို တစ်ဖန် ပြန်လည် ကြားရသည့်အခါ ဖုန်းယွီမှာ အလွန်အမင်းပင် စိတ်ကျေနပ်မှု ရရှိခဲ့သည်။

ကွင်းအတွင်းရှိ ပရိသတ်များမှာလည်း အံ့သြမှင်တက်နေခဲ့ကြသည်။ ယခင်က All-Star ပြိုင်ပွဲများတွင်သာ ပွဲတစ်ဝက် ဖျော်ဖြေရေးများကို မြင်တွေ့ဖူးကြပြီး ဗိုလ်လုပွဲ စင်မြင့်ထက်တွင်မူ တစ်ခါမျှ မမြင်တွေ့ဖူးကြပါချေ။ အနိုင်ရရှိရန် သေချာနေသည်လည်း မဟုတ်ဘဲ၊ ဤသည်မှာ ပထမဆုံး ပွဲစဉ်သာ ရှိသေးသည် မဟုတ်ပါလား။ ဤကဲ့သို့သော ဖျော်ဖြေရေးအတွက် ငွေအမြောက်အမြား ကုန်ကျပေလိမ့်မည်။

သို့သော် ၎င်းတို့ နားထောင်ကြည့်လိုက်သည့်အခါ ဤသည်မှာ ရုရှားဘာသာဖြင့် သီဆိုထားသော သီချင်းဖြစ်နေသဖြင့် ဤရုရှား အလုပ်ရှင်ကြီးက ဖိတ်ခေါ်ထားခြင်း ဖြစ်ကြောင်း သိလိုက်ကြသည်။

ဂီတကို စိတ်ဝင်စားသူ အချို့မှာမူ ဤအမျိုးသမီးမှာ အခုလောလောဆယ် ဥရောပတွင် အယ်လ်ဘမ် ရောင်းအား အကောင်းဆုံးဖြစ်နေသော ရုရှား၏ အကျော်ကြားဆုံး အမျိုးသမီး အဆိုတော် ဖြစ်နေသည်ကို သတိပြုမိလိုက်ကြသည်။ သူမသည် ယခင်က ရုရှား၏ အကျော်ကြားဆုံး ဘဲလေးကချေသည် တစ်ဦးလည်း ဖြစ်သည်။ သူမ၏ ကိုယ်လုံးကိုယ်ပေါက်မှာ တကယ့်ကို အံ့မခန်းပါလား။

သူတို့သည်လည်း ဤသီချင်းသံမှာ တကယ်ပင် နားထောင်ကောင်းလှသည်ကို ခံစားလိုက်ကြရသဖြင့် ဆူညံနေသော အားကစားကွင်းကြီးမှာ အလွန်ပင် ငြိမ်သက်သွားခဲ့ရသည်။

အယ်လီနာသည် သီချင်းနှစ်ပုဒ် သီဆိုခဲ့သည်။ ဒုတိယသီချင်း၏ကြားတွင်မူ အကကွက်တစ်ခုလည်း ပါဝင်နေခဲ့သည်။

ဤသည်မှာ ဘဲလေးအကနှင့် ကွဲပြားသော အကမျိုး ဖြစ်ပြီး အယ်လီနာ၏ ကိုယ်ဟန်အနေအထားနှင့် ပေါင်းစပ်လိုက်သည့်အခါတွင် ပရိသတ်များမှာ အလွန်အမင်း စိတ်လှုပ်ရှားသွားကြရသည်။

ပရိသတ်အများအပြားကပင် အိမ်ပြန်ရောက်လျှင် အယ်လီနာ၏ အယ်လ်ဘမ်ကို သေချာပေါက် ဝယ်ယူမည်ဖြစ်ကြောင်း၊ သူမ၏ MV များကို ကြည့်ရှုမည်ဖြစ်ကြောင်းနှင့် အကယ်၍ ဖျော်ဖြေပွဲများ ရှိခဲ့ပါကလည်း သွားရောက် ကြည့်ရှုမည်ဖြစ်ကြောင်း ပြောဆိုနေကြသည်။

နယူးယောက်ရှိ ဤပရိသတ်များထဲတွင် ဆင်းရဲသားဟူ၍ မရှိသလောက်ပင် ဖြစ်သဖြင့် သူတို့သည် စိတ်ပိုင်းဆိုင်ရာ အပန်းဖြေမှုများအတွက် ငွေအသုံးပြုရန် ဝန်မလေးကြပါချေ။

အယ်လီနာ၏ ယခု ဖျော်ဖြေမှုကို အမေရိကန် တစ်နိုင်ငံလုံးသို့ တိုက်ရိုက် ထုတ်လွှင့်နေခြင်းဖြစ်ရာ အမေရိကန် ပြည်သူအားလုံးမှာ သူမ၏ ဖျော်ဖြေမှုကို မြင်တွေ့ရပြီး သီချင်းသံကို ကြားရမည် ဖြစ်သည်။

ဤသို့ဖြင့် အယ်လီနာသည် အမေရိကန်တွင် တစ်ခါတည်း နာမည်ကျော်ကြားသွားပေလိမ့်မည်။ အမေရိကန် ပြည်သူများအနေဖြင့် အယ်လီနာ၏ ဖျော်ဖြေမှုနှင့် သီချင်းများကို နှစ်သက်ကြပါ့မလားဟူသော မေးခွန်းအတွက်မူ ပရိသတ်များ၏ စိတ်လှုပ်ရှားစွာ အော်ဟစ်အားပေးသံများက အဖြေပေးနေခဲ့ပြီ ဖြစ်သည်။

ဖုန်းယွီသည်လည်း အားတက်သရော လက်ခုပ်တီး၍ အားပေးနေခဲ့သလို အနားယူခန်းသို့ မသွားခဲ့ကြသော ဖုန်းယွီအသင်း ဝန်ထမ်းအချို့ကလည်း လက်ခုပ်တီးနေကြသည်။ ၎င်းတို့သည် အလုပ်ရှင်အနေဖြင့် ဤပွဲစဉ်၏ အရှုံးအနိုင်အပေါ်တွင် ကြီးကြီးမားမား အရေးစိုက်ပုံ မရသည်ကို သတိပြုမိလိုက်ကြသည်။

ကီရီလန်ကို ပေးခဲ့သော ဤအံ့သြစရာကို ဖုန်းယွီက အလွန်ပင် နှစ်သက်ခဲ့သည်။ အယ်လီနာ ကွင်းထဲမှ ထွက်ခွာသွားပြီးနောက်တွင် ဖုန်းယွီသည်လည်း ကွင်းအတွင်းမှ ထွက်လာခဲ့သည်။

ကီရီလန်ကိုက အယ်လီနာ့အတွက် ပြင်ဆင်ပေးထားသော အနားယူခန်းတွင် ဖုန်းယွီသည် သူ့ကို စောင့်ဆိုင်းနေသော မိန်းကလေးကို မြင်တွေ့လိုက်ရသည်။ ခုနက သီချင်းဆိုနေစဉ်အတွင်းမှာပင် အယ်လီနာ၏ မျက်လုံးများသည် ဖုန်းယွီကို အမြဲတမ်း ရှာဖွေနေခဲ့ခြင်း ဖြစ်သည်။

"ချစ်သူ... ခုနက ငါ သီချင်းဆိုတာ နားထောင်လို့ ကောင်းရဲ့လား" အယ်လီနာက ဖုန်းယွီ၏ ရင်ခွင်ထဲသို့ တိုးဝင်လိုက်သည်။

ဖုန်းယွီသည် အယ်လီနာ၏ ဆံနွယ်ရှည်များကို ပွတ်သပ်ပေးလိုက်ရင်း မေးလိုက်သည်။ "နားထောင်လို့ ကောင်းပါတယ်၊ ဘယ်သူမှ နားထောင်လို့ မကောင်းဘူးလို့ ပြောမှာ မဟုတ်ပါဘူး။ ဘယ်လိုလဲ... ငါ ပြောခဲ့သလိုပဲ သီချင်းဆိုရတာက ကရတာလိုပဲ စိတ်ဝင်စားဖို့ ကောင်းတယ် မဟုတ်လား"

"အင်း... ဒီနှစ်ကုန်ပိုင်းမှာ ငါ့ရဲ့ ဘဲလေးအက ဖျော်ဖြေရေး ခရီးစဉ် အချို့ ရှိသေးတယ်၊ နောက်နှစ်ကျရင်တော့ ငါ ဘဲလေးအက စင်မြင့်ပေါ်ကနေ လုံးဝ အနားယူတော့မယ်"

"မင်းမှာ ဒီထက် ပိုကြီးမားတဲ့ စင်မြင့်တွေ ရှိနေဦးမှာပါ။ မင်းက နိုင်ငံတကာ ကြယ်ပွင့်တစ်ဦး ဖြစ်လာမှာပါ" ဖုန်းယွီက အခိုင်အမာ ပြောကြားလိုက်လေတော့သည်။

******

အခန်း (၁၂၉၁) မထင်မှတ်ထားသော နိဂုံး

ပထမဆုံးပွဲစဉ်တွင် မျှော်လင့်ထားသည့်အတိုင်း Nets အသင်းက ရှစ်မှတ်အသာဖြင့် အနိုင်ရရှိသွားခဲ့သည်။ လူအများက ဂျော့ဂျ် ကားလ် ၏ ကွင်းတွင်းအခြေအနေကို လိုက်လျောညီထွေ ပြောင်းလဲနိုင်စွမ်းမရှိမှုကို ပြစ်တင်ဝေဖန်ကြသည်။ Nets အသင်းနှင့် တိုက်စစ်ချင်း ယှဉ်ပြိုင်သည့်အဆင့်အထိ အဘယ်ကြောင့် ကစားသနည်း။ ပိုမိုကောင်းမွန်သော ခံစစ်စွမ်းရည်များ ရှိနေသည်ကို မေ့လျော့နေကြပြီလားဟု ဝေဖန်ကြခြင်းဖြစ်သည်။

နယူးယောက်ပရိသတ်များမှာမူ အတော်လေး စိတ်လှုပ်ရှားနေကြပြီဖြစ်သည်။ ဤမျှကောင်းမွန်သော ပွဲစဉ်မျိုးကို မမြင်ရသည်မှာ နှစ်ပေါင်းများစွာ ကြာခဲ့ပြီ မဟုတ်ပါလား။ "တွေ့လား... ငါတို့ ဘရွတ်ကလင်း Nets အသင်းဟာ ခံစစ်မကစားဘဲနဲ့တောင် အနိုင်ရနိုင်တယ်" သူတို့က ကြွေးကြော်နေကြသည်။ ဗိုလ်လုပွဲစင်မြင့်ထက်တွင် အသင်းနှစ်သင်းလုံးက ရမှတ် ၁၂၀ ကျော်စီ ရရှိကြခြင်းမှာ လွန်ခဲ့သော နှစ်ပေါင်းများစွာကမှ ရှိခဲ့ဖူးသည့် စံချိန်တစ်ခု ဖြစ်သည်။

ဖုန်းယွီအသင်း၏ ကစားသမားများသည် အစပိုင်းတွင် အနည်းငယ် ရှက်ရွံ့နေကြသော်လည်း ဖုန်းယွီက ပွဲအပြီးတွင် သူတို့အား "ကောင်းကောင်း ကစားနိုင်ခဲ့ကြပါတယ်။ ဒီနေ့ပွဲက တကယ့်ကို ကြည့်လို့ကောင်းတယ်။ ကံလေး နည်းနည်း လိုသွားတာပါ" ဟု အားပေးစကား ပြောကြားလိုက်သည်။ ဤကဲ့သို့သော ရမှတ်မျိုးကို လောင်းကစားသမားများထဲတွင် မည်သူမျှ ခန့်မှန်းနိုင်ခြင်း မရှိကြသလို လောင်းကစားဒိုင်များမှာမူ တပြုံးပြုံး ဖြစ်နေကြတော့သည်။

ဒုတိယပွဲစဉ်တွင် အသင်းနှစ်သင်းလုံး ခံစစ်ကို အပြင်းအထန် ကစားခဲ့ကြသည်။ ဒီတစ်ကြိမ်တွင် နှစ်ဖက်စလုံး၏ ရမှတ်များသည် တစ်ရာအောက်၌သာ ရှိနေခဲ့သော်လည်း Nets အသင်းက ငါးမှတ်အသာဖြင့် ထပ်မံအနိုင်ရရှိသွားပြန်သည်။

နှစ်ပွဲရှုံး၊ သုညရမှတ်ဖြင့် လော့စ်အိန်ဂျလိစ်သို့ ပြန်လာခဲ့ရသော်လည်း ဂျော့ဂျ် ကားလ် တွင်မူ ဖိအားများစွာ မရှိလှချေ။ သူသည် ဤနှစ်ပွဲအတွင်း၌ပင် Nets အသင်း၏ ကွင်းတွင်းတုံ့ပြန်ပုံများကို အကဲခတ်နိုင်ခဲ့သလို Nets အသင်းမှ ကစ်ဒ်သည် လိဂ်၏ နံပါတ်တစ် လူပေးကစားသမားဆိုသည့် ဂုဏ်ပုဒ်နှင့် တကယ့်ကို ထိုက်တန်လှကြောင်း ဝန်ခံလိုက်ရသည်။

"နည်းပြကားလ် ... ဧည့်သည်ကွင်းမှာ နှစ်ပွဲဆက်တိုက် ရှုံးနိမ့်ခဲ့တာနဲ့ ပတ်သက်ပြီး ဘာများ ပြောချင်ပါသလဲ" လော့စ်အိန်ဂျလိစ် သတင်းထောက်တစ်ဦးက မေးမြန်းလိုက်သည်။

"ငါ ဘာမှ ပြောစရာ မရှိပါဘူး"

"ဒါဆိုရင် ဒီရှုံးနိမ့်မှုအတွက် ဘယ်သူက အဓိက တာဝန်ယူရမယ်လို့ ထင်ပါသလဲ"

"သိသာနေတာပဲလေ၊ ငါက အသင်းရဲ့ နည်းပြချုပ်ပဲ၊ ငါပဲ တာဝန်ယူရမှာပေါ့"

"နယူးယောက် မီဒီယာတွေကတော့ Nets အသင်းက ဖုန်းယွီအသင်းကို အပြတ်အသတ် အနိုင်ယူပြီး ချန်ပီယံဆုကို ကာကွယ်သွားလိမ့်မယ်လို့ ပြောနေကြတယ်။ ဒီအပေါ်မှာရော ဘာများ ပြောချင်ပါသလဲ"

"ငါ စိတ်ကူးယဉ်တတ်တဲ့ လူတွေနဲ့ ပြိုင်ပွဲအကြောင်း မဆွေးနွေးချင်ဘူး။ ငါ အနိုင်ရမယ့် နည်းလမ်းကို ရှာတွေ့ထားပြီးသားပါ" ကားလ် က ဆိုသည်။

အမှန်စင်စစ် ဖုန်းယွီဆိုသူမှာ ယခုအချိန်တွင် နောင်တရနေလောက်ပြီဖြစ်သည်။ ထိုရုရှားလူမျိုး၏ အသင်းကို ကူညီမြှင့်တင်ပေးခဲ့ရာမှ ယခုအခါ ၎င်း၏ ချန်ပီယံဆု ရရှိမည့် အခွင့်အရေးများ ဆုံးရှုံးသွားပြီ မဟုတ်ပါလား။ ပေါလ်အယ်လန်သည် Nets အသင်းက ဖုန်းယွီအသင်းကို နှစ်ပွဲအသာဖြင့် ဦးဆောင်နေသည်ဟူသော သတင်းကို ကြားရသည့်အခါ စိတ်ထဲ၌ တိတ်တဆိတ် ကျေနပ်နေမိသည်။ ဤကိစ္စကြောင့် သူတို့နှစ်ဦးကြား ဆက်ဆံရေးများ ပျက်ပြားသွားလျှင် ပို၍ပင် ကောင်းဦးမည်ဟု တွေးနေခဲ့သည်။

ပေါလ်အယ်လန်သည် ဤအသင်းနှစ်သင်းလုံးတွင် ပြဿနာတစ်စုံတစ်ရာ ဖြစ်လာရန်သာ လှိုက်လှိုက်လဲလဲ မျှော်လင့်နေခဲ့ခြင်း ဖြစ်သည်။ Play-off တွင် ရန်ဖြစ်ကြခြင်းမျိုး ဖြစ်စေ၊ အဓိက ကစားသမားများ ဒဏ်ရာရသွားခြင်းမျိုး ဖြစ်စေ ဖြစ်ပွားသွားပါက နောက်ရာသီတွင် ၎င်းတို့ မည်မျှအထိ ကြွားဝါနိုင်ဦးမည်နည်းဟု စောင့်ကြည့်ချင်နေခြင်း ဖြစ်သည်။

"အယ်လီနာ... မနက်ဖြန် မင်း သွားတော့မှာလား" ဖုန်းယွီသည် အယ်လီနာ့ကို ဖက်ထားရင်း အနားမှ မခွာချင်ဖြစ်နေမိသည်။

"ဟုတ်တယ်... မနက်ဖြန် တခြားမြို့တွေကို ဖျော်ဖြေရေး ခရီးစဉ် သွားရတော့မယ်။ နောက်အပတ်ကျရင် မော်စကိုကို ပြန်ပြီး ဘဲလေးအကအတွက် ပြင်ဆင်ရတော့မယ်လေ။ ကျွန်မကတော့ အကောင်းဆုံးပုံစံနဲ့ပဲ စင်မြင့်ပေါ်ကနေ နှုတ်ဆက်ချင်တာ" အယ်လီနာက ဖုန်းယွီ၏ ရင်ခွင်ထဲတွင် ကြောင်လေးတစ်ကောင်လို တိုးဝှေ့ရင်း ပြောလိုက်သည်။

"ကောင်းပါပြီ... သိပ်ပြီးတော့ မပင်ပန်းစေနဲ့ဦး။ တစ်ခုခု လိုအပ်တာရှိရင် ကီရီလန်ကိုကို အားမနာဘဲ ပြောလိုက်နော်" ဖုန်းယွီက မှာကြားလိုက်ရာ "မစ္စတာကီရီလန်ကိုက ကျွန်မကို အများကြီး ဂရုစိုက်ပေးပါတယ်။ ဒါတွေအားလုံးဟာ ရှင့်ရဲ့မျက်နှာကြောင့်ဆိုတာ ကျွန်မ သိပါတယ်" အယ်လီနာက ပြန်လည်ပြောကြားသည်။

သူတို့နှစ်ဦးမှာ တစ်ဦးကိုတစ်ဦး ဖက်ထားရင်း စကားများ ပြောနေကြရာမှ မသိမသာပင် တစ်ဦးကိုယ်ပေါ်တစ်ဦး ထပ်မံ ငြိတွယ်သွားကြပြန်သည်။ အယ်လီနာ ထွက်ခွာသွားချိန်တွင် သူမ၏ မျက်ဝန်းများထဲ၌ ခွဲခွာရသည့်အတွက် မချင့်မရဲ ဖြစ်နေသော အရိပ်အယောင်များ ရှိနေခဲ့သည်။ သို့သော် ဖုန်းယွီကမူ သူမကို သူမ၏ အိပ်မက်များနောက်သို့သာ လိုက်ရန် အားပေးခဲ့သည်။ လူတစ်ယောက်တွင် အိပ်မက်များ မရှိတော့ပါက ဘဝမှာ အတော်လေး ခြောက်သွေ့သွားမည် မဟုတ်ပါလား။

အယ်လီနာ့ကို ပို့ဆောင်ပြီးနောက် ဖုန်းယွီသည် အားကစားကွင်းသို့ ပြန်လာခဲ့သည်။ တတိယပွဲစဉ်မှာ စတင်ရန် နီးကပ်နေပြီ ဖြစ်သည်။ ဒီတစ်ကြိမ်တွင် ဒဏ်ရာရစာရင်းထဲရှိ ကစားသမားများကို ပြန်လည်ထည့်သွင်းလိုက်သလို ဖုန်းယွီအသင်းသည်လည်း အတွင်းစည်းပိုင်းတွင် ပွဲကို လွှမ်းမိုးထားနိုင်ခဲ့ရာ နောက်ဆုံး၌ ဆယ်မှတ်အသာဖြင့် အနိုင်ရရှိပြီး တစ်ပွဲ ပြန်လိုက်နိုင်ခဲ့သည်။

တစ်ရက်အကြာတွင် ဖုန်းယွီအသင်းက ထပ်မံအနိုင်ရရှိခဲ့ပြီး ရလဒ်ကို နှစ်ပွဲစီ သရေအဖြစ် ပြောင်းလဲလိုက်သည့်အခါ ကျွမ်းကျင်သူ ဝေဖန်ရေးသမားများနှင့် ဝါရင့်ပညာရှင်များအားလုံး ငြိမ်သက်သွားကြတော့သည်။ ဖုန်းယွီအသင်းသည် ဤမျှအထိ ခံနိုင်ရည်ရှိလိမ့်မည်ဟု သူတို့ မထင်ထားခဲ့ကြသလို အိမ်ကွင်း၌ နှစ်ပွဲဆက်တိုက် ပြန်လည်အနိုင်ယူနိုင်လိမ့်မည်ဟုလည်း မတွက်ချက်ထားခဲ့ကြချေ။

သေချာပေါက် ဤအချက်ကို အသင်းနှစ်သင်းလုံး၏ နည်းပြချုပ်များက ကြိုတင်တွက်ဆထားပြီးသား ဖြစ်သည်။ နောက်ထပ်ပွဲစဉ်နှစ်ပွဲတွင် အသင်းနှစ်သင်းလုံးသည် အိမ်ကွင်း၌ အသီးသီး အနိုင်ရရှိခဲ့ကြပြီး ဧည့်သည်ကွင်းတွင်မူ အနည်းငယ်စီဖြင့် ရှုံးနိမ့်ခဲ့ကြသည်။ အသင်းနှစ်သင်းလုံးသာမက မြို့နှစ်မြို့လုံးမှ ပရိသတ်များပါ အလွန်အမင်း စိတ်လှုပ်ရှားနေကြပြီဖြစ်သည်။ ဗိုလ်လုပွဲသည် ၇ပွဲမြောက်အထိ ရောက်ရှိလာခဲ့ပြီဖြစ်ရာ မည်သူမျှ အရှုံးမပေးလိုကြတော့ချေ။

"အားလုံး သေချာနားထောင်ကြ၊ အခု ငါတို့ တကယ် တိုက်ခိုက်တော့မယ်။ ဒီပွဲမှာ ငါတို့ဟာ အပြင်စည်း တိုက်စစ်ကိုပဲ အဓိကထားမယ်။ အတွင်းစည်းက လူတွေအားလုံးဟာ ပစ်ခတ်မှုတွေကို လျှော့ချပြီး Reboundတွေကိုပဲ ကာကွယ်ရမယ်။ အပြင်စည်းက ကစားသမားတွေလည်း သတိထားကြ၊ ဂိုးဝန်းထဲအထိ ထိုးဖောက်ဝင်ရောက်ပြီး သူတို့ရဲ့ အတွင်းစည်းက လူတွေကို ဖောက်ထုတ်ရမယ်။ ခံစစ်ကစားတဲ့အခါမှာလည်း ပြစ်ဒဏ်ဘော လုပ်ရမှာကို မကြောက်ကြနဲ့။ ပြစ်ဒဏ်ဘော လုပ်ရင် အပြင်းအထန် လုပ်လိုက်ပါ၊ ပြိုင်ဘက်ကို အမှတ်နဲ့အတူ ပြစ်ဒဏ်ဘော တစ်ကြိမ်ရမယ့် '2+1' အခွင့်အရေးမျိုး လုံးဝ မပေးမိစေနဲ့..."

ဂျော့ဂျ် ကားလ် က နည်းဗျူဟာများ ချမှတ်နေချိန်တွင် တခြားတစ်ဖက်၌လည်း Nets အသင်းမှာ တန်ပြန်နည်းလမ်းများကို အပူတပြင်း ဆွေးနွေးနေကြသည်။ ထိုအချိန်တွင် အသင်းပိုင်ရှင်နှစ်ဦးမှာမူ ရုံးခန်းထဲ၌ အအေးများ သောက်လိုက်၊ မုန့်များ စားလိုက်ဖြင့် အေးအေးဆေးဆေး ရှိနေကြသည်။

"ဖုန်း... မင်း ဘယ်သူ နိုင်မယ်လို့ ထင်သလဲ" ကီရီလန်ကိုက မေးလိုက်သည်။

"ငါ့အသင်း နိုင်မယ်လို့ ငါထင်တယ်" ဖုန်းယွီက ဆိုလိုက်သည်။

"ဘာလို့လဲ... ဒါ ငါ့ရဲ့ အိမ်ကွင်းလေ၊ ဒီမှာ လာအားပေးတဲ့သူတွေ အားလုံးကလည်း နယူးယောက် ပရိသတ်တွေချည်းပဲ" ကီရီလန်ကိုက အတော်လေး မကျေမနပ် ပြောလိုက်သည်။

"ဘာလို့လဲဆိုတော့ ငါတို့ရဲ့ လူစားလဲ ကစားသမားတွေက ပိုတော်သလို တိုက်ခိုက်လိုစိတ်လည်း ပိုရှိကြလို့ပေါ့။ မင်းတို့ နိုင်ချင်ရင်တော့ နောက်နှစ်မှ စောင့်တော့" ဖုန်းယွီက ပြန်ပြောလိုက်သည်။

အမှန်စင်စစ် ဖုန်းယွီ ဤမျှအထိ ယုံကြည်မှု ရှိနေရခြင်းမှာ ကီရီလန်ကို၏ အကြောင်းကို ကောင်းကောင်း သိထားသောကြောင့်လည်း ဖြစ်သည်။ Nets အသင်း၏ ဤပွဲစဉ်များတွင် ရမှတ်အများဆုံး ရနေသူမှာ ကာတာ မဟုတ်သလို၊ ကစ်ဒ် သို့မဟုတ် ဂါဆောလည်း မဟုတ်ဘဲ အန်ဒရေဖြစ်နေခဲ့သည်။ သိသာလှသည်မှာ ကီရီလန်ကိုသည် သူ၏ ဇာတိမြေမှ အန်ဒရေကို MVP ဆု ရစေချင်နေခြင်းဖြစ်သည်။ အန်ဒရေက မတော်ဟု ဆိုလိုခြင်း မဟုတ်သော်လည်း သူသည် အစွမ်းအစ အစုံအလင် ရှိသော်ငြား အကြီးမားဆုံး အားနည်းချက်မှာ ပစ်ခတ်မှုတွင် တိကျမှုမရှိခြင်းပင် ဖြစ်သည်။ ရမှတ်များစွာ ရယူလိုပါက အကြိမ်ရေများစွာ ပစ်ခတ်ရမည်ဖြစ်ရာ ကီရီလန်ကို၏ ဤတောင်းဆိုချက်မှာ Nets အသင်း၏ နည်းဗျူဟာစနစ်ကြီးကို ဖျက်ဆီးပစ်လိုက်သလို ဖြစ်နေသည်။

ဖုန်းယွီသည်လည်း တာ့ယောင်ကို FMVP (ဗိုလ်လုပွဲ၏ အဖိုးတန်ဆုံး ကစားသမား) ဆု ရစေချင်သော်လည်း တာ့ယောင်နှင့် ဂါဆောမှာ တစ်ဦးကိုတစ်ဦး ထိန်းချုပ်ထားကြသဖြင့် မည်သူမျှ ထူးထူးခြားခြား စွမ်းဆောင်နိုင်ခြင်း မရှိကြချေ။ ဖုန်းယွီ၏သဘောထားမှာ သဘာဝအတိုင်းသာ ဖြစ်စေပြီး နည်းပြ၏ အစီအစဉ်အတိုင်း ဘယ်သူက ပိုသေချာလဲ၊ ထိုသူကိုသာ ပိုမိုပစ်ခတ်စေခြင်းဖြစ်သည်။

"ဒါတော့ မသေချာဘူးနော်၊ ငါတို့ နိုင်မှာဖြစ်သလို အန်ဒရေကလည်း MVP ရလိမ့်မယ်။ ရုရှားလူမျိုး တစ်ယောက်က အမေရိကန်ရဲ့ အကောင်းဆုံး ဘတ်စကက်ဘော ပြိုင်ပွဲမှာ အဖိုးတန်ဆုံး ကစားသမားဆု ရရှိသွားမယ်ဆိုတာ ဘယ်လောက်တောင် စိတ်ဝင်စားဖို့ ကောင်းလိုက်မလဲ" ကီရီလန်ကိုက အရက်တစ်ငုံ သောက်ရင်း ကျေနပ်စွာ ပြောလိုက်သည်။

ဖုန်းယွီကမူ ခေါင်းခါလိုက်ပြီး ဆိုလိုက်တော့သည်။ "ဖြစ်နိုင်ရင် ဖြစ်မှာပေါ့"

ပြိုင်ပွဲစတင်ခဲ့ပြီ ဖြစ်သလို ဒီတစ်ကြိမ်တွင် နှစ်ဖက်အသင်းလုံးမှာ ဤပွဲ၏ နောက်ဆုံးအနိုင်ရလဒ်ကို ရယူရန် အားကုန်ထုတ်နေကြပြီဖြစ်သည်။ ပွဲတစ်ဝက်တွင် နှစ်ဖက်အသင်းမှာ ၅၀ မှတ်စီဖြင့် သရေကျနေခဲ့သလို နှစ်ဖက်စလုံး၏ ပြစ်ဒဏ်ဘော အကြိမ်ရေများမှာလည်း အတော်လေး များပြားနေခဲ့သည်။ မကြာခင်မှာပင် Nets အသင်း နည်းပြချုပ်၏ မျက်နှာမှာ ပျက်ယွင်းသွားတော့သည်။ သူသည် ဖုန်းယွီအသင်း၏ ရည်ရွယ်ချက်ကို ရိပ်မိသွားခဲ့ပြီဖြစ်သည်။ ဒါဟာ ဂါဆောကို ကွင်းထဲမှ ထွက်သွားအောင် လုပ်ဆောင်နေခြင်းပင်။ ထိုသို့ဆိုလျှင် သူတို့၏ အတွင်းစည်းတွင် မည်သည့်အကာအကွယ်မျှ ရှိတော့မည် မဟုတ်ချေ။ တခြားသော အတွင်းစည်း ကစားသမားများဖြစ်သည့် တာ့ပါးနှင့် ရန်းဒေါ့ဖ်တို့လို လူများမှာလည်း အလွန်နှေးကွေးလှသဖြင့် အပြင်စည်းမှ လူများမှာ တစ်လှမ်းတည်းဖြင့်ပင် သူတို့ကို ကျော်ဖြတ်နိုင်ကြမည်ဖြစ်သည်။

သို့သော် သူ နားမလည်နိုင်သည်မှာ ဘေလူးပစ်နှင့် မိုဘလီတို့ကဲ့သို့ နောက်တန်းလူနှစ်ယောက်၏ ပြစ်ဒဏ်ဘော အကြိမ်ရေများမှာလည်း အလွန်များပြားနေခြင်းဖြစ်သည်။ ဤအတိုင်းသာဆိုလျှင် ဤလူနှစ်ယောက်သည်လည်း မကြာခင် ကွင်းထဲမှ ထွက်သွားရတော့မည် မဟုတ်ပါလား။

ကားလ်မှာမူ တည်တည်ငြိမ်ငြိမ်ပင်။ သူသည် ဤလူနှစ်ယောက် ထွက်သွားရမည်ကို လုံးဝမကြောက်ပေ။ အဘယ်ကြောင့်ဆိုသော် ဖုန်းယွီအသင်း၏ လူစားလဲ နောက်တန်းကစားသမားနှစ်ဦးမှာ တိုက်စစ်ရော လူပေးပါ အတော်လေး ကောင်းမွန်ကြသူများ ဖြစ်နေသောကြောင့်ဖြစ်သည်။ တခြားအသင်းများတွင်ဆိုလျှင် သူတို့မှာ သေချာပေါက် ပွဲထွက်ကစားသမားများ ဖြစ်နေပေလိမ့်မည်။

တတိယပိုင်း ပွဲတစ်ဝက်ခန့်တွင် ဂါဆောမှာ ပြစ်ဒဏ်ဘော အကြိမ်ရေ ပြည့်သွားသဖြင့် ကွင်းထဲမှ ထွက်သွားခဲ့ရသလို၊ တတိယပိုင်း ပြီးဆုံးချိန်တွင် ဘေလူးပစ်၊ မိုဘလီနှင့် တာ့ယောင်တို့ပါ အကုန်လုံး ထွက်သွားခဲ့ရပြီ ဖြစ်သည်။ ထိုအချိန်တွင် ဖုန်းယွီအသင်း၏ နောက်ထပ် နောက်တန်းလူနှစ်ယောက် ကွင်းထဲသို့ ဝင်လာခဲ့ပြီး ပွဲကို အလွယ်တကူပင် ထိန်းချုပ်လိုက်နိုင်တော့သည်။

အရီနပ်စ်နှင့် ဂျီနိုဘီလီတို့နှစ်ဦးမှာ အတွင်းစည်း ထိုးဖောက်ခြင်းရော အပြင်စည်းမှ ပစ်ခတ်ခြင်းပါ အစွမ်းပြခဲ့ကြရာ စတုတ္ထပိုင်း စတင်ပြီး သုံးမိနစ်အတွင်း၌ပင် ဖုန်းယွီအသင်းအတွက် ဆယ်မှတ်အသာဖြင့် အားသာချက်ကို တည်ဆောက်ပေးလိုက်နိုင်သည်။ အရီနပ်စ်မှာ ကာရီ မတိုင်ခင် လိဂ်၏နံပါတ်တစ် အပြင်စည်း ပစ်ခတ်သူပင် ဖြစ်သည်။ သုံးမှတ်စည်းနှင့် နှစ်လှမ်းခန့် ဝေးသည့်နေရာမှ သူ လှမ်းပစ်လိုက်သည်ကို ကစ်ဒ်တောင် သတိမထားမိခင်မှာပင် ဘောလုံးက ဂိုးဝင်သွားခဲ့ပြီ။ ဂျီနိုဘီလီ၏ ထူးခြားဆန်းပြားသော ကစားကွက် အရှိန်အဟုန်ကိုလည်း ကာတာမှာ လုံးဝ တားဆီးနိုင်ခြင်း မရှိချေ။ ဥရောပထက်စာလျှင် NBA ၏ ထိုးဖောက်မှုကို ကာကွယ်နိုင်သည့် အဆင့်မှာ အတော်လေး ကွာခြားလှသည်။

ပွဲသိမ်းဝီစီသံ မြည်လာသည့်အခါ ဖုန်းယွီအသင်းက ၁၂ မှတ်အသာဖြင့် အနိုင်ရရှိသွားခဲ့သည်။ MVP နာမည်ကို ကြေညာလိုက်သည့်အခါ မည်သူမျှ မထင်မှတ်ထားဘဲ ဂျီနိုဘီလီ ဖြစ်နေခဲ့သည်။ သူသည် လူစားလဲ ကစားသမားတစ်ဦးသာ မဟုတ်ပါလား။ သို့သော် ဂျီနိုဘီလီမှာ ဤခုနစ်ပွဲအတွင်း ဖုန်းယွီအသင်း၏ ရမှတ်အမြင့်ဆုံး ကစားသမား ဖြစ်နေခဲ့သလို အထူးသဖြင့် သတ္တမမြောက်ဂိမ်းတွင် ၃၂ မှတ်အထိ ရယူပေးကာ အသင်းကို အနိုင်ရရှိစေခဲ့ခြင်းဖြစ်သည်။ ဗိုလ်လုပွဲတွင် နိုင်ငံခြားသား FMVP တစ်ဦး ပေါ်ထွက်လာခဲ့ပြီ ဖြစ်သည်။

ဖုန်းယွီက ကီရီလန်ကိုကို ကြည့်ပြီး ဆိုလိုက်သည်။ "ဘယ်လိုလဲ... ငါ့အသင်း နိုင်မယ်လို့ ငါ ပြောသားပဲ မဟုတ်လား"

ကီရီလန်ကိုကမူ အလွန်အမင်း စိတ်လှုပ်ရှားစွာဖြင့် ပြောလိုက်တော့သည်။ "ဟားဟားဟား... MVP က အမေရိကန်လူမျိုး မဟုတ်ဘူးကွ။ အဲဒီ လိဂ်တာဝန်ရှိသူတွေရဲ့မျက်နှာ ဘယ်လို ဖြစ်သွားမလဲဆိုတာ တကယ်ကို ကြည့်ချင်စမ်းပါဘိ"

ဖုန်းယွီ "......" အသင်းရှုံးနေတာတောင် ဒီလောက်အထိ ပျော်ရွှင်နိုင်သေးတယ်။ ညီလေးကီ... မင်း တကယ်ကို စိတ်ထားကြီးမြတ်တာပဲ။