အခန်း (၁၂၉၈-၁၃၀၀)

အခန်း (၁၂၉၈) ကုမ္ပဏီတိုင်းတွင် ရှိရမည်

ဖုန်းယွီသည် တည့်တည့်တိုးတိုးပင် ပြောဆိုလိုက်သည်။ နိုင်ငံတော်အတွက်၊ လူမျိုးအတွက် ဟူသော ခပ်မြင့်မြင့် ကြွေးကြော်သံများကို မထုတ်ဖော်ခဲ့ပါချေ။ စီးပွားရေး လုပ်ဆောင်ရခြင်း၏ ပန်းတိုင်မှာ တကယ့်ကို ရိုးရှင်းသည်။ ထိုအရာမှာ ငွေရှာရန်သာ ဖြစ်သည်။

ငွေမရှာချင်သောသူသည် စီးပွားရေးလုပ်ရန် သေချာပေါက် ရွေးချယ်လိမ့်မည် မဟုတ်ပါချေ။ ထိပ်တန်း အရည်အချင်းရှိသူ အမြောက်အမြားမှာ သုတေသန ရလဒ်အချို့ကို ဖော်ထုတ်နိုင်ကြသော်လည်း ၎င်းတို့ကို စီးပွားရေး ရင်းနှီးမြှုပ်နှံမှုအတွက် အသုံးမပြုဘဲ အထက်သို့ တင်ပြကာ ရာထူးတိုးရန် သို့မဟုတ် ဂုဏ်သတင်း ကျော်စောရန်အတွက်သာ အသုံးပြုတတ်ကြသည်။ သေချာပေါက် သုတေသနကိုသာ ရူးသွပ်ပြီး ပိုမိုကောင်းမွန်သော သုတေသန အခွင့်အလမ်းများ ရရှိရန် ကြိုးပမ်းနေသည့်သူများလည်း ရှိနေတတ်သည်။ ထိုသူများသည် ငွေကြေးအတွက် မဟုတ်သဖြင့် စီးပွားရေးသမားများ ဖြစ်မလာခဲ့ကြခြင်း ဖြစ်သည်။ လီရန့်ဟုန်သည် ကမ္ဘာ့အဆင့်မီ ရှာဖွေရေး အင်ဂျင်တစ်ခုကို ဖန်တီးလိုခဲ့သည်ဟု ဆိုရမည်ဖြစ်ရာ အကယ်၍ သူသာ ငွေမရှာလိုပါက သုတေသန ပညာရှင်တစ်ဦးအဖြစ်သာ နေထိုင်သွား၍ မရနိုင်ပါသလော။ နည်းပညာ၏ မူပိုင်ခွင့်မှာလည်း သူ၏ အမည်နှင့်သာ ရှိနေမည် မဟုတ်ပါလား။

သေချာပေါက် ငွေရှာပြီးသွားသည့် အခါတွင်မူ အခြားသော အရာများကို လုပ်ဆောင်လိုသည့် စိတ်ကူးများ ရှိလာနိုင်ပါသည်။ လူအများအပြားမှာ အခြားသူများကို ကူညီခြင်း သို့မဟုတ် နိုင်ငံတော် အင်အားတောင့်တင်းလာအောင် ကူညီခြင်း စသည့် နည်းလမ်းများကို ရွေးချယ်တတ်ကြသည်။

သို့သော် အခြေခံအကျဆုံး အချက်မှာ ငွေရှာနိုင်ရန်နှင့် လုပ်ဖော်ကိုင်ဖက်များထက် ပိုမို၍ ရှာဖွေနိုင်ရန်ပင် ဖြစ်သည်။

"မန်နေဂျာဖုန်း... ဒါဆိုရင် ကျွန်တော်တို့ အားလုံးမှာ ကိုယ်ပိုင် မဟာဗျူဟာမြောက် ထုတ်ကုန်တွေ ရှိရမှာပေါ့" Aiwa Electronics ၏ အကြီးအကဲက မေးမြန်းလိုက်သည်။

"မှန်ပါတယ်၊ ဒါပေမဲ့ ခင်ဗျားတို့ကတော့ အနည်းငယ် ကွဲပြားပါတယ်။ ခင်ဗျားတို့က Aiwa Electronics နဲ့အတူ Aiwa ဟူသော အမှတ်တံဆိပ်တစ်ခုတည်းကို အတူတူ သုံးစွဲနေကြသလို၊ ဖုန်းယွီ အီလက်ထရွန်နစ်၊ ဖုန်းယွီ လျှပ်စစ်ပစ္စည်း စတာတွေနဲ့လည်း နည်းပညာချင်း မျှဝေနေကြတာပါ။ ဒါကြောင့် ခင်ဗျားတို့ဟာ မဟာဗျူဟာမြောက် ထုတ်ကုန်တွေကို အတူတကွ ပူးပေါင်းပြီး ထုတ်လုပ်နိုင်ပါတယ်။ အရင်အတိုင်းပါပဲ၊ Aiwaက ပြည်တွင်းဈေးကွက်ကို အာရုံစိုက်ပြီး ဖုန်းယွီ အမှတ်တံဆိပ်ကတော့ ပြည်ပဈေးကွက်ကို အဓိကထားမှာပါ။ အမှန်တကယ်တော့ အားလုံးရဲ့ အကျိုးစီးပွားက အတူတူပါပဲ"

လူတိုင်းသည် ခေါင်းငုံ့၍ သူတို့ ကုမ္ပဏီ၏ မဟာဗျူဟာမြောက် ထုတ်ကုန်မှာ အဘယ်အရာ ဖြစ်မည်နည်းဟု တွေးတောနေကြသည်။ ချွမ်ကျူထယ်မှ ကျန်းက ခဏမျှ စဉ်းစားလိုက်သည်နှင့် သဘောပေါက်သွားခဲ့သည်။ ချွမ်ကျူထယ်၏ မဟာဗျူဟာမြောက် ထုတ်ကုန်မှာ သဘာဝကျကျပင် ချွမ်ကျူထယ် ဘဲကင်ပင် ဖြစ်သည်။ မည်သည့် ဆိုင်ခွဲတွင်မဆို၊ မည်သည့် ဟင်းလျာမျိုးကို ရောင်းချသည်ဖြစ်စေ ချွမ်ကျူထယ် ဘဲကင်မှာ အမြဲတမ်း ပါဝင်နေသလို ရောင်းအား အကောင်းဆုံးလည်း ဖြစ်သည်။ ဤဟင်းလျာမှာ ချွမ်ကျူထယ် အမှတ်တံဆိပ်၏ အဓိက အနှစ်သာရ ထုတ်ကုန်ပင် ဖြစ်သည်။

လီမင်တယ်သည်လည်း တွေးတောနေမိသည်။ မန်နေဂျာဖုန်းက မော်ဒယ် တစ်မျိုးတည်းကိုသာ အာရုံစိုက်ပြီး အများအပြား မလုပ်ရန် အဘယ်ကြောင့် ပြောရသနည်းဆိုသည်ကို သူ နားလည်သွားခဲ့ပြီ ဖြစ်သည်။ သာမန် ကားများတွင်မူ ကော်အော် ကို အဓိကထား၍ SUV တွင်မူ တုန်းဖန်းရှန်လုကို လုပ်ဆောင်နေခြင်း ဖြစ်သည်။ ဤမော်ဒယ်နှစ်မျိုးမှာ ကုမ္ပဏီက အဓိက မြှင့်တင်နေသော အရာများဖြစ်ပြီး အခြားသော မော်ဒယ်များမှာမူ နောက်ဆက်တွဲများသာ ဖြစ်သည်။ ဤနှစ်မျိုးမှာ မဟာဗျူဟာမြောက် မော်ဒယ်များ ဖြစ်ပေလိမ့်မည်။

မော်တော်ဆိုင်ကယ်တွင်မူ ရေပန်းအစားဆုံး ဖြစ်သည့် Songjiang ၁၀၀ ရှိနေသည်။ ၎င်း၏ တစ်မျိုးတည်းသော ရောင်းအားမှာ အခြားသော ကုမ္ပဏီများ၏ မော်ဒယ်အားလုံး ပေါင်းထားသော ရောင်းအားနှင့်ပင် ရင်ဘောင်တန်းနိုင်သလို ကုန်ကျစရိတ်ကိုလည်း အနိမ့်ဆုံးသို့ ထိန်းချုပ်ထားနိုင်သည်။

လျှပ်စစ်စက်ဘီးများတွင်လည်း မဟာဗျူဟာမြောက် ထုတ်ကုန်တစ်ခုကို ဖော်ထုတ်ရမည်ဖြစ်ပြီး ခေတ်အဆက်ဆက် အောင်မြင်နေရန် လိုအပ်သည်။ မန်နေဂျာဖုန်းက သူတို့၏ ကုမ္ပဏီကို ဥပမာအနေဖြင့် ထည့်သွင်းပြောဆိုခဲ့သဖြင့် ထိုအချိန်ကျမှ အရှက်ရစရာ မဖြစ်စေရပါချေ။

ဟားပင်း ဆေးဝါးထုတ်လုပ်ရေး အုပ်စုကလည်း တွေးတောနေမိသည်။ ကုမ္ပဏီ၏ မဟာဗျူဟာမြောက် ထုတ်ကုန်မှာ ကမ္ဘာတစ်ဝန်းတွင် ရောင်းအားအကောင်းဆုံး ဖြစ်နေသော ဝေကော့ ပင် ဖြစ်သည်။ သေချာပေါက် ဂလူးကို့စ် အမျိုးအစား အာဟာရ ဖြည့်စွက်စာများမှာလည်း ယခုအချိန်အထိ ရောင်းအား အလွန်ကောင်းနေဆဲ ဖြစ်သည်။ ထို့အပြင် အမြဲတစေ အာရုံစိုက် သုတေသနပြုနေသော ပဋိဇီဝဆေးများမှာလည်း တရုတ်ပြည် ဈေးကွက်တွင် နံပါတ်တစ် ဖြစ်နေခဲ့ပြီ ဖြစ်သည်။

ထိုအချိန်တွင် ဖူကွမ်းဝေမှာမူ အနည်းငယ် ဇဝေဇဝါ ဖြစ်နေခဲ့သည်။ ထိုက်ဟွာ စူပါမားကတ်အုပ်စု၏ မဟာဗျူဟာမြောက် ထုတ်ကုန်မှာ အဘယ်အရာ ဖြစ်မည်နည်း။ အဖွဲ့ဝင်ကတ်များလား။ သို့မဟုတ် နေ့စဉ် အလတ်ဆတ်ဆုံးဖြစ်အောင် အာမခံထားသော လတ်ဆတ်ကုန်စုံများလား။ သို့မဟုတ် အခြားသော အရာများလား။ ခဏနေလျှင် ဖုန်းအစ်ကိုနှင့် သေသေချာချာ ဆွေးနွေးရဦးမည်ဟု သူက တွေးလိုက်သည်။

ကျန့်လီပေါင်၏ မဟာဗျူဟာမြောက် ထုတ်ကုန်မှာ သေချာပေါက် ကျန့်လီပေါင် အချိုရည်ပင် ဖြစ်သည်။ လီဟဟ၏ မဟာဗျူဟာမြောက် ထုတ်ကုန်များမှာမူ လက်ဖက်စိမ်းရည်၊ အာဟာရဖြည့်စွက် အချိုရည်၊ အားဖြည့်အချိုရည် နှင့် ချင်းရွှမ်ကိုလာတို့ ဖြစ်ကြသည်။ အခြားသော ထုတ်ကုန်များမှာမူ ရောင်းအား မဆိုးလှစေကာမူ ဤထုတ်ကုန်အချို့နှင့် နှိုင်းယှဉ်လျှင်မူ ကွာဟချက် များစွာ ရှိနေခဲ့သည်။

လူတိုင်းက တွေးတောနေကြစဉ်မှာပင် ဖုန်းယွီသည် သူ၏မိန့်ခွန်းကို အဆုံးသတ်လိုက်သည်။ ဤစကားများမှာ သူ၏အရင်ဘဝက နားထောင်ခဲ့ဖူးသော ဟောပြောပွဲများနှင့် သူ၏ ယခုဘဝ အတွေ့အကြုံများကို ပေါင်းစပ်၍ စဉ်းစားထားခြင်း ဖြစ်သည်။

Toyotaနှင့် Hondaတို့သည် တစ်ကမ္ဘာလုံးဆိုင်ရာ မဟာဗျူဟာမြောက် မော်ဒယ်များကို အားကိုးခြင်းဖြင့် အမြတ်အစွန်း အမြောက်အမြား ရရှိခဲ့ကြကာ ဈေးကွက်ဝေစုမှာလည်း တရိပ်ရိပ် မြင့်တက်လာခဲ့ပြီး အဆင့်အတန်းမှာလည်း တစ်နေ့ထက်တစ်နေ့ ပိုမို မြင့်မားလာခဲ့ခြင်း ဖြစ်သည်။

အရင်ဘဝတွင် Toyotaသည် ကမ္ဘာ့ကားဈေးကွက်၏ ဘုရင်ဖြစ်လာခဲ့စဉ်က လူအမြောက်အမြားမှာ Toyota၏ အတွေ့အကြုံများကို လေ့လာခဲ့ကြသည်။ ကုမ္ပဏီ စီမံခန့်ခွဲမှု အတွေ့အကြုံများသာမက ထုတ်ကုန် သုတေသနနှင့် အရောင်းပိုင်းဆိုင်ရာ စသည့် ကဏ္ဍပေါင်းစုံမှ အတွေ့အကြုံများကို လေ့လာခဲ့ကြခြင်း ဖြစ်သည်။

အများဆုံး ပြောစမှတ် ပြုကြသည်မှာ Toyota၏ "ထုတ်ကုန်တစ်ခုတည်းဖြင့် ဘုရင်ဖြစ်စေသော" မဟာဗျူဟာနှင့် "ဖားကို ရေနွေးပူဖြင့် ချက်ခြင်း" ဟူသော မဟာဗျူဟာပင် ဖြစ်သည်။ ဂျီအမ်သည်လည်း နောက်ဆုံးတွင် ထိုအခြေအနေကြောင့်ပင် ပြိုလဲသွားခဲ့ရသည် မဟုတ်ပါလား။

အစည်းအဝေး ပြီးဆုံးသွားသည့်နောက်တွင် လူအမြောက်အမြားမှာ အုပ်စုဖွဲ့၍ မန်နေဂျာဖုန်း ပြောကြားခဲ့သော ပန်းတိုင်များကို မည်သို့ အကောင်အထည်ဖော်ရမည်နည်းဟု ဆွေးနွေးနေကြသည်။

ကြည့်ရသည်မှာ ငွေရှာရန်ဟူသော ပန်းတိုင်မှာ ရိုးရှင်းလှသော်လည်း ငွေအမြောက်အမြား ရှာဖွေနိုင်ရန်နှင့် အစဉ်တစိုက် ရှာဖွေနိုင်ရန်မှာမူ လွယ်ကူလှသည် မဟုတ်ပါချေ။

ပထမဆုံးအနေဖြင့် သုံးစွဲသူများ နှစ်သက်သော ထုတ်ကုန်များ ရှိရန် လိုအပ်သည်၊ ဒုတိယအနေဖြင့် မိမိ၏ ထုတ်ကုန်မှာ လုပ်ဖော်ကိုင်ဖက်များထက် ပိုမိုကောင်းမွန်ရန် လိုအပ်သည်၊ ထို့နောက်တွင် နည်းပညာပိုင်း ဦးဆောင်မှုကို ထိန်းသိမ်းထားရမည်ဖြစ်သလို မည်သည့် အမည်းစက်မျိုးမျှ မရှိစေရဘဲ ဈေးကွက် ဦးတည်ချက် တိကျရန်နှင့် ဖွဲ့စည်းပုံ မှန်ကန်ရန်လည်း လိုအပ်ပေသည်။

အဆိုးရွားဆုံး အချက်မှာ မင်းက အပြတ်အသတ် ဦးဆောင်နေသည့် အခါတွင်ပင် အခြားသူများကို အသက်ရှူပေါက် ပေးထားရန် လိုအပ်ခြင်းပင် ဖြစ်သည်။ အဘယ်ကြောင့်ဆိုသော် လုံးဝဥဿုံ လက်ဝါးကြီးအုပ်မှု ဖြစ်လာသည်နှင့် ဝိုင်းဝန်းဆန့်ကျင်မှုကို ခံရပေလိမ့်မည်ဖြစ်ရာ ကုမ္ပဏီကို အစိတ်စိတ်အမွှာမွှာ ခွဲပစ်ရမည့် အန္တရာယ်ပင် ရှိနေသောကြောင့် ဖြစ်သည်။

အရင်ဘဝတွင်ဖြစ်စေ၊ ယခုဘဝတွင်ဖြစ်စေ မည်သည့် ကုမ္ပဏီမျှ လုံးဝဥဿုံ လက်ဝါးကြီးအုပ်မှုကို မလုပ်ဆောင်နိုင်ခဲ့ပါချေ။ ထိုအခြေအနေသို့ ရောက်ရှိရန် နီးကပ်လာသော ကုမ္ပဏီတိုင်းမှာ အမျိုးမျိုးသော ပြဿနာများနှင့် ရင်ဆိုင်ရလေ့ ရှိသည်။ ဥပမာအားဖြင့် မိုက်ခရိုဆော့ဖ်သည် ကွန်ပျူတာ စနစ်မောင်းနှင်မှု ဆော့ဖ်ဝဲလ် နယ်ပယ်တွင် တစ်ဦးတည်း စိုးမိုးထားသဖြင့် တရားရင်ဆိုင်မှုများနှင့် အမြဲတစေ ကြုံတွေ့နေရသည် မဟုတ်ပါလား။

ဖုန်းယွီ လုပ်ဆောင်လိုသည်မှာ ကုမ္ပဏီ၏ဈေးကွက်ဝေစုကို နံပါတ်တစ် ဖြစ်စေရန်နှင့် ဦးဆောင်မှုကို အာမခံနိုင်ရန်ပင် ဖြစ်သည်။ ထိုသို့ဆိုလျှင် အကြီးမားဆုံးသော ကိတ်မုန့် အစိတ်အပိုင်းကို ခွဲဝေရရှိနိုင်မည် ဖြစ်သည်။

လက်ရှိတွင် ဖုန်းယွီ လက်အောက်ရှိ ကုမ္ပဏီများထဲမှ အချို့သာလျှင် ကမ္ဘာ့နံပါတ်တစ် ဖြစ်နေကြသည်။ ဥပမာ Amazonသည် အကြီးဆုံးသော အွန်လိုင်းဈေးဝယ်စင်တာ ဖြစ်သော်လည်း အမြတ်အစွန်းမှာမူ အလွန်ပင် နည်းပါးလှပေသည်။

သို့သော် Amazonဟူသော ဤလုပ်ငန်း နံပါတ်တစ်မှာလည်း eBay ထက် များစွာသာလွန်နေခြင်း မရှိသေးဘဲ အပြတ်အသတ် အားသာချက် မရှိသေးပါချေ။ လက်ရှိ အမြတ်အစွန်းမှာပင် eBay ကို မမှီသေးပါချေ။

သေချာပေါက် ပြင်ပ ငွေပေးချေမှု ဆော့ဖ်ဝဲလ်များကို ထည့်သွင်း တွက်ချက်မည်ဆိုပါက Pay Palနှင့် Alipayတို့မှာ နယ်ပယ်၏နံပါတ်တစ်နှင့် နံပါတ်နှစ် ဖြစ်သည်ဟု ဆိုနိုင်သော်လည်း လက်ရှိ အမြတ်အစွန်းမှာမူ များစွာ မြင့်မားခြင်း မရှိသေးပါချေ။

ထို့ထက် ပို၍ထူးခြားသည်မှာ အခြားသော လုပ်ငန်းနယ်ပယ်များတွင် အဆင့်နိမ့်သော ကုမ္ပဏီများက ပိုမို၍ အမြတ်အစွန်း ရရှိနေကြခြင်းပင် ဖြစ်သည်။

သို့သော် ကိစ္စမရှိပါချေ။ ထိုကုမ္ပဏီများ၏ အရှိန်အဟုန် မြှင့်တင်ရမည့် အချိန်သို့ မရောက်သေးသောကြောင့် ဖြစ်သည်။ နောက်ထပ် နှစ်အနည်းငယ် ကြာလျှင်မူ Amazon၊ Alipay၊ PayPal စသည့် ကုမ္ပဏီများမှ အမြတ်အစွန်းများမှာ တဟုန်ထိုး စီးဝင်လာပေလိမ့်မည်။

Sixth Sense ကုမ္ပဏီနှင့် AIWA တို့ကို ကြည့်ခြင်းဖြင့် နယ်ပယ်၏ နံပါတ်တစ် ဖြစ်လာသည့်အခါ မည်မျှအထိ အားသာချက် ကြီးမားသည်ကို သိရှိနိုင်ပါသည်။

"အစ်ကိုဖုန်း... အခုနက အစ်ကို ပြောတဲ့ ကုမ္ပဏီတိုင်းမှာ ကိုယ်ပိုင် မဟာဗျူဟာမြောက် ထုတ်ကုန်တွေ ရှိရမယ်ဆိုတာလေ၊ ဒါဆိုရင် ကျွန်တော်တို့ ထိုက်ဟွာ စူပါမားကတ် အုပ်စုရဲ့ မဟာဗျူဟာမြောက် ထုတ်ကုန်က ဘာဖြစ်မလဲ"

"ငါတို့ရဲ့ ဘယ်ထုတ်ကုန်က ရောင်းအား အကောင်းဆုံးလဲ၊ အမြတ် အများဆုံးလဲ၊ ပြီးတော့ ကုန်ကျစရိတ် အသက်သာဆုံးလဲဆိုတာကို စဉ်းစားကြည့်လိုက်ရင် မင်း သိသွားမှာပါ" ဖုန်းယွီသည် ဖူကွမ်းဝေ၏ ပုခုံးကို ပုတ်ပေးလိုက်ကာ "ငါ မင်းကို အရိပ်အမြွက် ပေးလိုက်ပြီနော်၊ မင်း သဘောပေါက်သင့်ပြီ" ဟူသော မျက်နှာပေးမျိုးဖြင့် ကြည့်လိုက်သည်။

ဖူကွမ်းဝေမှာမူ ဇဝေဇဝါ ဖြစ်နေဆဲပင် ဖြစ်သည်။ သူသည် အိမ်ပြန်ရောက်လျှင် သူ၏ဖခင်ကို မေးမြန်းရန် သို့မဟုတ် အခြားသော အဆင့်မြင့် အရာရှိများကို မေးမြန်းရန် ဆုံးဖြတ်လိုက်သည်။ ထျန်းဖုန်းဝက် များလား။

အမှန်စင်စစ် ဖုန်းယွီကိုယ်တိုင်လည်း စူပါမားကတ်၏ မဟာဗျူဟာမြောက် ထုတ်ကုန်မှာ အဘယ်အရာ ဖြစ်သည်ကို အသေအချာ မသိရှိပါချေ။ သို့သော် ကုန်ပစ္စည်း အမျိုးအစား တစ်ခုစီတိုင်းတွင် ဝယ်ယူသူများကို အဆွဲဆောင်နိုင်ဆုံးသော ထုတ်ကုန်များ ရှိနေတတ်သည်ကို သူ သိရှိထားသည်။

ဥပမာအားဖြင့် လတ်ဆတ်ကုန်စုံများတွင် ထျန်းဖုန်းဝက် နှင့် ပေတချန်း တို့မှာ တစ်မျိုးအပါအဝင် ဖြစ်သည်။ မဟာဗျူဟာမြောက် ထုတ်ကုန်ဟူသည်မှာ တစ်မျိုးတည်းသာ ရှိရမည် မဟုတ်ပါချေ။ Toyotaတွင်ပင် Corolla၊ Camry စသည့် မဟာဗျူဟာမြောက် မော်ဒယ် အမြောက်အမြား ရှိနေသည် မဟုတ်ပါလား။

လူတိုင်းက မိမိတို့၏မဟာဗျူဟာမြောက် ထုတ်ကုန်များကို ရှာဖွေနေကြစဉ်မှာပင် ဖုန်းယွီသည် တိတ်တဆိတ် ထွက်ခွာသွားခဲ့ပြီ ဖြစ်သည်။

ကိစ္စရပ်များကို အခြားသူများထံသို့သာ လွှဲအပ်လိုက်တော့မည်။ သူသည် အိမ်သို့ အမြန်ဆုံး ပြန်ရန် လိုအပ်နေသည်။ လီန၏ မွေးဖွားမည့် ရက်မှာ မဝေးတော့ပါချေ။

******

အခန်း (၁၂၉၉) ဟားပင်း ဘီယာ၏ ဖွံ့ဖြိုးတိုးတက်မှု

"မိန်းမရေ... ပင်ပန်းနေပြီလား၊ ငါ ခြေထောက်လေး နည်းနည်း နှိပ်ပေးမယ်လေ" လီနနှင့်အတူ လမ်းလျှောက်ထွက်ရာမှ ပြန်ရောက်လာသည့်အခါ ဖုန်းယွီသည် ဇနီးသည်ဖြစ်သူအပေါ် အလွန်ပင် ဂရုတစိုက်ရှိစွာဖြင့် ပြုစုယုယပေးနေခဲ့သည်။

စားပွဲပေါ်တွင် တင်ထားသော ဖုန်းယွီ၏ ဖုန်းမှာ ရုတ်တရက် မြည်လာခဲ့ရာ သူ လျှောက်သွား၍ ကြည့်လိုက်သည့်အခါ ကျန်းရွေ့ချန်းက ဖုန်းခေါ်ဆိုနေခြင်း ဖြစ်သည်ကို တွေ့လိုက်ရသည်။

"ဟော... ဒီနေ့ ဘယ်လိုဖြစ်လို့ ငါ့ဆီ ဖုန်းဆက်ဖို့ အားနေရတာလဲ၊ တစ်ခုခု ကူညီခိုင်းဖို့များ ရှိနေပြန်ပြီလား" ဖုန်းယွီက ရယ်မောရင်း မေးမြန်းလိုက်သည်။

တစ်ပြိုင်နက်တည်းမှာပင် ဖုန်းယွီသည် လီနကို ဖုန်းပြောဆိုရန်အတွက် လက်ဟန်ခြေဟန်ဖြင့် အချက်ပြလိုက်ရာ လီနသည်လည်း လိမ္မာယဉ်ကျေးစွာဖြင့် ဧည့်ခန်းသို့ သွားရောက်ကာ တီဗွီကြည့်နေခဲ့သည်။

"ငါက မင်းကို အကူအညီတောင်းဖို့ မရှိရင် ဖုန်းမဆက်ရတော့ဘူးလား" ကျန်းရွေ့ချန်းက မကျေမနပ် ဖြစ်နေသော လေသံဖြင့် ပြန်လည်ပြောဆိုလိုက်သည်။

"အဲဒီလိုတော့လည်း မဟုတ်ပါဘူး၊ ဒါပေမဲ့ မင်း သေသေချာချာ ပြန်စဉ်းစားကြည့်လေ၊ ကိစ္စမရှိဘဲနဲ့ ငါ့ဆီ ဖုန်းဆက်ဖူးလို့လား။ မင်း ငါ့ဆီ ဖုန်းဆက်တိုင်း ဘယ်နှစ်ကြိမ်လောက်များ သတင်းကောင်း ပါဖူးလို့လဲ"

"ဒီတစ်ကြိမ်ကတော့ သေချာပေါက် သတင်းကောင်းပဲ! ငါတို့ ဟားပင်းရဲ့ ဘီယာပွဲတော် စတော့မယ်လေ။ ဒီတစ်ခါမှာတော့ ငါတို့ ပြည်နယ်အစိုးရ၊ ဟားပင်း မြို့တော်အစိုးရနဲ့ တရုတ်ပြည် ပေါ့ပါးကုန်ထုတ်လုပ်ငန်း အဖွဲ့ချုပ်တို့ ပူးပေါင်းပြီး ကျင်းပတာပါ။ အထက်ကလည်း ထောက်ခံမှု ပေးထားတဲ့အတွက် ဒီတစ်ကြိမ်ဟာ စစ်မှန်တဲ့ နိုင်ငံတကာ ဘီယာပွဲတော် ဖြစ်လာတော့မယ်။ နိုင်ငံတကာမှာ ရှိသမျှ အဓိက ဘီယာလုပ်ငန်းကြီးတွေနဲ့ ဆက်စပ်လုပ်ငန်းတွေ အားလုံးကိုလည်း တက်ရောက်ဖို့ ဖိတ်ကြားထားပြီးပြီ" ကျန်းရွေ့ချန်းက သူ၏ ဂုဏ်ယူဝင့်ကြွမှုကို မဖုံးဖိနိုင်ဘဲ ပြောကြားလိုက်သည်။

ဟားပင်း၏ ဘီယာပွဲတော်ကို လွန်ခဲ့သော ၈၈ ခုနှစ်ကတည်းက ကျင်းပခဲ့ခြင်းဖြစ်ပြီး နိုင်ငံတကာ ဘီယာပြပွဲကြီးတစ်ခုလည်း ဖြစ်သည်။ သို့သော် ထိုစဉ်က ဟားပင်း၏ ကျော်ကြားမှုမှာ မမြင့်မားလှသေးသလို တရုတ်ပြည်သည်လည်း ဤမျှအထိ မဖွံ့ဖြိုးသေးပါချေ။ ထို့ကြောင့် ဖိတ်ကြားခဲ့သော လုပ်ငန်းများမှာ ဩဇာအရှိန်အဝါ မကြီးမားလှသလို ပြည်တွင်းရှိ ဘီယာလုပ်ငန်း အမြောက်အမြားပင်လျှင် လာရောက် တက်ရောက်ခြင်း မရှိခဲ့ကြပါချေ။

သို့သော် တရုတ်ပြည်၏ စီးပွားရေးမှာ တစ်နေ့ထက်တစ်နေ့ ပိုမိုကောင်းမွန်လာသည်နှင့်အမျှ တရုတ်ပြည်အတွင်း ဟားပင်း၏အရေးပါမှုမှာလည်း ပိုမိုမြင့်မားလာခဲ့သည်။ ဤဘီယာပွဲတော်သို့ တရုတ်ပြည်ရှိ ဘီယာလုပ်ငန်းများမှာ သေချာပေါက် တက်ရောက်ကြမည်ဖြစ်သလို တရုတ်ပြည်တွင် စက်ရုံတည်ဆောက်ထားသော နိုင်ငံခြား ဘီယာလုပ်ငန်းများကလည်း ကိုယ်စားလှယ်များ စေလွှတ် တက်ရောက်ကြပေလိမ့်မည်။

သို့သော် ယခင်က ဘီယာပွဲတော်များ အားလုံးကို ဟားပင်းမြို့ကသာ ဦးဆောင်ကျင်းပခဲ့ခြင်းဖြစ်ပြီး ပြည်နယ်အစိုးရကမူ များစွာ စိတ်ဝင်တစား မရှိခဲ့ပါချေ။ ယခုတစ်ကြိမ်မှာမူ ထိုသို့မဟုတ်တော့ဘဲ ပြည်နယ်အစိုးရသာမက အထက်လူကြီးများပါ ပါဝင်လာခဲ့ရာ အချို့သော နိုင်ငံတကာ ဘီယာလုပ်ငန်းကြီးများနှင့် ဆက်စပ်လုပ်ငန်းများကို အထက်လူကြီးများကပင် ကူညီ၍ ဆက်သွယ်ပေးခဲ့ကြသည်။

ဖုန်းယွီသည် ထိုအချိန်တွင် ကျန်းရွေ့ချန်းအပေါ်သို့ ရေအေးဖြင့် လောင်းချလိုက်သကဲ့သို့ပင်။ "ဖိတ်ကြားတာက တစ်ပိုင်းပေါ့၊ သူတို့ လာရောက် တက်ရောက်ကြမလားဆိုတာကတော့ နောက်တစ်ပိုင်းပဲ။ ငါတို့ ဟားပင်း ဘီယာဟာ တရုတ်ပြည်မှာတောင် နံပါတ်တစ် မဟုတ်သေးဘဲ နံပါတ်ငါးနေရာမှာပဲ ရှိသေးတာလေ။ နိုင်ငံတကာက အဓိက ဘီယာလုပ်ငန်းကြီးတွေနဲ့ ဆက်စပ်လုပ်ငန်းတွေ အားလုံး လာတက်ကြမယ်လို့ မင်း တကယ်ပဲ ယုံကြည်နေတာလား"

"အားလုံးတော့ ဘယ်ဟုတ်ပါ့မလဲ၊ ဒါပေမဲ့ ကမ္ဘာ့အဆင့် ဆယ်ခုအတွင်းမှာ ရှိတဲ့ ဘီယာလုပ်ငန်းတွေကတော့ တက်ရောက်မယ်လို့ အကြောင်းပြန်ထားပြီးပြီ။ ပြီးတော့ ကမ္ဘာ့ထိပ်တန်း ဘီယာကုန်ကြမ်း တင်သွင်းသူတွေနဲ့ ဆက်စပ်လုပ်ငန်းတွေကလည်း တက်ရောက်မယ်လို့ အတည်ပြုထားကြတယ်"

ကျန်းရွေ့ချန်းသည် စိတ်ထဲမှ ကြိတ်၍ တွေးနေမိသည်မှာ "မင်းက ငါ ဒါတွေကို မစဉ်းစားမိဘူးလို့ ထင်နေတာလား" ဟူ၍ ဖြစ်သည်။ ထိုကုမ္ပဏီငယ်လေးများမှာ လာချင်လာ၊ မလာချင်နေ၊ ဤကုမ္ပဏီကြီးများ လာရောက်လျှင်ပင် လုံလောက်လှပြီ ဖြစ်သည်။ ထိပ်တန်း ဆယ်ခုအတွင်းမှ ကုမ္ပဏီများ ရောက်ရှိလာလျှင် ကျန်ရှိသော ကုမ္ပဏီ ဆယ်ခုကို ပေါင်းလိုက်လျှင်ပင် ထိပ်တန်းကုမ္ပဏီ တစ်ခု၏ အတိုင်းအတာကို မှီနိုင်မည် မဟုတ်ပါချေ။ ထိုသူများကို အရေးတယူ လုပ်နေရန် လိုအပ်ပါဦးမည်လော။

ဖုန်းယွီက သက်ပြင်းတစ်ချက်ချလိုက်ကာ မေးလိုက်သည်။ "သူတို့ ဘာလို့ အားလုံး လာတက်ကြတာလဲဆိုတာကိုရော မင်း မစဉ်းစားမိဘူးလား"

ကျန်းရွေ့ချန်းမှာ အနည်းငယ် အံ့သြသွားကာ ပြန်လည် မေးခွန်းထုတ်လိုက်သည်။ "ဒီအတွက် ဘာအကြောင်းရင်းများ ရှိလို့လဲ။ ဒါဟာ ပွဲတော်တစ်ခုတင် မဟုတ်ဘဲ စီးပွားရေး ဆွေးနွေးပွဲတစ်ခုလည်း ဖြစ်တာပဲ မဟုတ်လား"

"ဟုတ်တာပေါ့၊ အဲဒီအတိုင်းပဲ မင်းတို့က အလေးထားရမှာ။ ဒါက ဘာကို ပြနေတာလဲဆိုတော့ သူတို့တွေဟာ တရုတ်ပြည် ဈေးကွက်ထဲကို အလုံးအရင်းနဲ့ ဝင်ရောက်ဖို့ ပြင်ဆင်နေကြပြီဆိုတာပဲ။ ဒါဟာ သူတို့အတွက် တရုတ်ပြည်ရဲ့ ဘီယာဈေးကွက်နဲ့ တရုတ်ပြည် ဘီယာလုပ်ငန်းတွေရဲ့ အင်အားကို လာရောက် လေ့လာနိုင်မယ့် အခွင့်အရေးပဲ။ ဆိုလိုတာက ဟားပင်း ဘီယာနဲ့ တရုတ်ပြည်က တခြားသော ဘီယာလုပ်ငန်းတွေဟာ ကမ္ဘာ့ထိပ်တန်း ဘီယာလုပ်ငန်းကြီးတွေရဲ့ တိုက်ခိုက်မှုကို ခံရတော့မယ်ဆိုတဲ့ အဓိပ္ပာယ်ပဲ"

"မင်း ပြောတဲ့အတိုင်းဆိုရင် ငါတို့ ဒီဘီယာပွဲတော် ကျင်းပပြီး သူတို့ကို ဖိတ်ကြားတာက မှားယွင်းတဲ့ လုပ်ရပ်တစ်ခု ဖြစ်နေတာလား" ကျန်းရွေ့ချန်းက မကျေမနပ် ဖြစ်စွာဖြင့် မေးမြန်းလိုက်သည်။

"မှားတယ်လို့တော့ မဆိုလိုပါဘူး၊ ဒါပေမဲ့ မင်းအနေနဲ့ ပြည်တွင်းက ဘီယာလုပ်ငန်းတွေနဲ့ ဆွေးနွေးပြီး နိုင်ငံခြား ဘီယာတွေကို ဘယ်လိုမျိုး စုပေါင်း ဆန့်ကျင်ကြမလဲဆိုတာကို တိုင်ပင်ထားတာ ပိုကောင်းလိမ့်မယ်။ သေချာပေါက် သူတို့ရဲ့အဆင့်မြင့်တဲ့ အတွေ့အကြုံတွေ၊ နည်းပညာတွေနဲ့ အရသာပိုင်းဆိုင်ရာတွေကိုတော့ လေ့လာပြီး ကိုယ့်ကိုယ်ကိုယ် မြှင့်တင်ရမှာပေါ့။ ငါတို့ရဲ့ ဘီယာလုပ်ငန်းတွေ အပြင်ကို ခြေဆန့်တဲ့အခါမှာလည်း ကိုယ့်ရဲ့ အခြေစိုက်စခန်းကို ကာကွယ်ဖို့ သတိထားရမယ်။ ကိုယ်က အပြင်ကို ထွက်ပြီး ငွေမရှာနိုင်သေးခင်မှာ သူတို့က အထဲကို အရင်ဝင်လာပြီး ငွေတွေ အကုန်ယူသွားတာမျိုး၊ ဈေးကွက်ကို လုယူသွားတာမျိုး မဖြစ်စေနဲ့ဦး"

"ဒီကိစ္စကိုတော့ ငါ အထက်က လူကြီးတွေနဲ့ ဆွေးနွေးကြည့်ပါ့မယ်။ ငါ့မျက်နှာတစ်ခုတည်းနဲ့တော့ အဲဒီ ဘီယာလုပ်ငန်းတွေက နားထောင်ကြမှာ မဟုတ်ဘူး" ကျန်းရွေ့ချန်းသည် ယခုအခါ ဒုတိယ အကြီးအကဲ ရာထူးသို့ ရောက်ရှိနေပြီဖြစ်ကာ အဆင့်အတန်းမှာလည်း မနိမ့်လှသော်လည်း အခြားသော ဘီယာလုပ်ငန်းများကိုမူ သူက အမိန့်ပေး၍ မရနိုင်ပါချေ။ မည်သူကမျှ အခြားသော ခေါင်းဆောင်တစ်ဦးက သူ၏လုပ်ငန်းအပေါ်တွင် ဝင်ရောက် ခြယ်လှယ်နေသည်ကို နှစ်သက်ကြမည် မဟုတ်ပါချေ။

"ပေါင်းစည်းပြီး ယှဉ်ပြိုင်နိုင်စွမ်း မြှင့်တင်ဖို့ ငါ မင်းကို ပြောခဲ့တာ မှတ်မိသေးလား" ဖုန်းယွီက အရိပ်အမြွက် ပြောလိုက်သည်။

ကျန်းရွေ့ချန်းသည် ရုတ်တရက်ပင် သတိဝင်လာခဲ့ကာ "မင်း ဆိုလိုတာက ဟားပင်း ဘီယာအနေနဲ့ အခြားသော ဘီယာလုပ်ငန်းတွေကို ဝါးမြိုတာမျိုး ဒါမှမဟုတ် ဝယ်ယူတာမျိုး လုပ်သင့်တယ်လို့ ပြောတာလား"

"မှန်တာပေါ့။ ငါ သိသလောက်တော့ ဟားပင်း ဘီယာဟာ လုံကျန်းတစ်ခုလုံးကို သိမ်းပိုက်ပြီးပြီ ဖြစ်သလို တောင်ဘက်က ရှန်ချန်အထိပါ တိုးချဲ့ပြီး အရှေ့မြောက်ဒေသရဲ့ ဘုရင် ဖြစ်နေပြီလေ။ ဒါပေမဲ့ တောင်ဘက်ပိုင်းကျတော့ရော… အဲဒီမှာ စက်ရုံငယ်လေး တစ်ခုပဲ ရှိတာ မဟုတ်လား။ ဟွာရွန့်အုပ်စုကို မင်း သိမှာပေါ့၊ သူတို့ရဲ့ နယ်မြေချဲ့ထွင်မှု အရှိန်အဟုန်ကို ကြည့်လိုက်ဦး။ အကယ်၍ မင်းတို့ဘက်ကသာ ထပ်ပြီး မချဲ့ထွင်ဘူးဆိုရင် အနာဂတ်မှာ ဈေးကွက်တစ်ခုလုံးကို ဟွာရွန့်က လုယူသွားလိမ့်မယ်။ ငါ မှတ်မိသလောက်တော့ ဟားပင်း ဘီယာအုပ်စုမှာ ငွေမရှိတာလည်း မဟုတ်ပါဘူး။ စတော့ဈေးကွက်မှာ စာရင်းဝင်ပြီး ဒီနှစ်နှစ်အတွင်းမှာ ရှယ်ယာဈေးနှုန်းတွေကလည်း အရမ်းကောင်းနေတာပဲ၊ စီးပွားရေး ပျက်ကပ် ဆိုက်နေတဲ့ အချိန်မှာတောင် သက်ရောက်မှု မရှိခဲ့ဘူး မဟုတ်လား"

ပေတချန်းသည် စတော့ဈေးကွက်တွင် စာရင်းမဝင်သေးသော်လည်း ၎င်း၏ လက်အောက်ခံ ကုမ္ပဏီဖြစ်သော ဟားပင်းဘီယာအုပ်စုမှာမူ စတော့ဈေးကွက်သို့ တက်လှမ်းခဲ့ပြီ ဖြစ်ကာ ရှယ်ယာ ဈေးနှုန်းမှာလည်း အလွန်ပင်ကောင်းမွန်နေခဲ့သည်။

ရောင်းအား တဟုန်ထိုး မြင့်တက်နေသည့် ရှယ်ယာမျိုး မဟုတ်စေကာမူ ရင်းနှီးမြှုပ်နှံသူများအတွက်မူ အားကိုးထိုက်သော အနေအထားတွင် ရှိနေခဲ့ပြီး ရှယ်ယာဈေးမှာ တည်ငြိမ်စွာဖြင့် မြင့်တက်နေခဲ့ရာ ဟောင်ကောင် စတော့အိတ်ချိန်း၏ အကောင်းဆုံး စာရင်းဝင် ကုမ္ပဏီဆုကိုပင် နှစ်နှစ်ဆက်တိုက် ရရှိခဲ့သည်။

"ဟားပင်း ဘီယာမှာ တကယ်ပဲ ငွေမပြတ်ပါဘူး၊ ဒီနှစ်နှစ်အတွင်း အမြတ်ဝေစုကလည်း မနည်းလှဘူးလေ။ ဒါဆိုရင်တော့ ငါတို့ အမြန်ဆုံး နယ်မြေချဲ့ထွင်ဖို့ လိုနေပြီပေါ့။ ဒီနှစ်နှစ်အတွင်း ပေတချန်းကလည်း ငွေအနည်းငယ် ရှာထားနိုင်တဲ့အတွက် ရင်းနှီးမြှုပ်နှံမှုတွေ ထပ်တိုးလိုက်မယ်ဆိုရင် တောင်ဘက်က ပြည်နယ်အဆင့် ဘီယာကုမ္ပဏီ နှစ်ခု သုံးခုလောက်ကို ဝယ်ယူဖို့ဆိုတာ အလွန်ပင် လွယ်ကူတဲ့ ကိစ္စပါ" ကျန်းရွေ့ချန်းက ချက်ချင်းပင် ဆုံးဖြတ်ချက် ချလိုက်သည်။

"နှစ်ခု သုံးခုလား… နည်းလွန်းပါတယ်။ ငါတို့ အခု ဝယ်ယူလို့ မရနိုင်တဲ့ အကြီးစား ဘီယာလုပ်ငန်းက သုံးခုပဲ ရှိတယ်။ ချင်းတောင် ဘီယာ၊ ပီကင်း ဘီယာနဲ့ ဟွာရွန့် ဘီယာတို့ပဲ။ ဒီသုံးခုရဲ့ အတိုင်းအတာက ဟားပင်း ဘီယာထက် ကြီးမားနေတဲ့အတွက် ဝယ်ယူဖို့ဆိုရင် ငွေကြေးပမာဏက အလွန်ကြီးမားသလို အထက်ကလည်း ကြားဝင်နိုင်ခြေ ရှိတယ်။ ကျန်တဲ့ လုပ်ငန်းတွေ အားလုံးကိုတော့ ဝါးမြိုနိုင်အောင် ကြိုးစားရမယ်။ ဟွာရွန့်ရဲ့ နယ်မြေချဲ့ထွင်မှု အရှိန်နဲ့ နည်းလမ်းတွေကို ကြည့်ထားလိုက်။ တရုတ်ပြည်မှာ မင်းတို့ လေးခုတည်းသော ပြည်တွင်း ဘီယာလုပ်ငန်းတွေပဲ ကျန်တော့တဲ့ အချိန်ကျရင် ဘီယာဈေးနှုန်းကို မင်းတို့ စိတ်ကြိုက် ထိန်းချုပ်လို့ ရသွားပြီ၊ အဲဒီအခါကျရင် ဈေးနှုန်းကို မြှင့်ပြီး အမြတ်ကိုလည်း ပိုရအောင် လုပ်လို့ရပြီပေါ့"

"နိုင်ငံခြား ဘီယာလုပ်ငန်းတွေအတွက်ကတော့ စိတ်မပူပါနဲ့။ သူတို့က အတိုင်းအတာ ကြီးမားတယ်ဆိုပေမဲ့ တရုတ်ပြည်မှာ ရှိတဲ့ စက်ရုံတွေကတော့ သိပ်မကြီးပါဘူး။ အကယ်၍ မင်းက အရသာသစ်တွေကို မိတ်ဆက်ချင်တယ်ဆိုရင် သူတို့ကို ဝါးမြိုဖို့ ကြိုးစားလို့ ရသလို ရှယ်ယာလဲလှယ်တဲ့ နည်းလမ်းကိုလည်း သုံးလို့ ရပါတယ်။ ပြည်ပကို တင်ပို့ဖို့ ကိစ္စအတွက်ကတော့ စိုးရိမ်စရာ မလိုပါဘူး၊ အချိုရည် မဟာမိတ်အဖွဲ့ကြီးက နိုင်ငံခြားက အဓိက စူပါမားကတ်ကြီးတွေနဲ့ ဆွေးနွေးပြီးသွားပြီဖြစ်လို့ ဟားပင်း ဘီယာကိုလည်း ကုန်ပစ္စည်းစင်တွေပေါ် တင်ပေးထားလိမ့်မယ်"

ဤကဲ့သို့သော အရောင်းလမ်းကြောင်း ကောင်းကောင်း ရရှိထားပြီ ဖြစ်သဖြင့် ဟားပင်း ဘီယာ၏ ရောင်းအားမှာ သေချာပေါက် တဟုန်ထိုး မြင့်တက်လာပေလိမ့်မည်။ သို့သော် နောက်ဆက်တွဲ ပြဿနာမှာ ကုန်ကျစရိတ်ပင် ဖြစ်သည်။ ပြည်တွင်းမှ သယ်ယူပို့ဆောင်ရန်မှာ မည်သို့မျှ တွက်ခြေမကိုက်လှပါချေ။ အကောင်းဆုံး နည်းလမ်းမှာ ပြည်ပတွင် ဘီယာစက်ရုံများကို ဝယ်ယူ၍ ဟားပင်း ဘီယာကို ထုတ်လုပ်ရန်ပင် ဖြစ်သည်။ ဤအတွက်ကြောင့်လည်း ငွေအမြောက်အမြား လိုအပ်ဦးမည် ဖြစ်သည်။

"ဖုန်းယွီ... မင်း ပြောတဲ့ အချက်တွေကို ငါ သေသေချာချာ စဉ်းစားရဦးမယ်။ ဒီလိုလုပ်ပါလား၊ မင်းလည်း ဟားပင်းမှာ ရှိနေတာပဲ မဟုတ်လား။ ညကျရင် ငါ့အိမ်ကို လာခဲ့ပါဦး၊ ငါတို့ သေသေချာချာ ဆွေးနွေးကြတာပေါ့"

ဖုန်းယွီ "......" ကဲ... ကြည့်ဦး၊ နောက်တစ်ကြိမ် အခမဲ့ အကြံပေးပုဂ္ဂိုလ် ဖြစ်ရပြန်ပြီ။

******

အခန်း (၁၃၀၀) အသေးက အကြီးကို ဝါးမြိုခြင်း

"မိန်းမရေ... ညနေကျရင် ငါ လောင်ကျန်းဆီမှာ ထမင်းသွားစားမလို့၊ အဖေနဲ့အမေကို ပြောလိုက်ဦး၊ ငါ့ကို စောင့်မနေနဲ့တော့လို့"

"အင်း... ငါ့ယောကျာ်းက တကယ့်ကို တော်တာပဲ၊ ပြည်နယ်အုပ်ချုပ်ရေးမှူးကတောင် ရှင့်ဆီက အကူအညီ တောင်းနေရတယ်နော်" လီနက အလွန်ပင် ဂုဏ်ယူဝင့်ကြွစွာဖြင့် ဆိုလိုက်သည်။

ဖုန်းယွီသည် လီန၏ နှာခေါင်းလေးကို အသာအယာ ဆွဲလိုက်ပြီး သူမ၏ နဖူးကို နမ်းရှုံ့ကာ အဝတ်အစားလဲ၍ အိမ်ပြင်သို့ ထွက်ခွာလာခဲ့သည်။

ကျန်းရွေ့ချန်း နေထိုင်ရာ ဝင်းအတွင်းသို့ ရောက်ရှိလာသည့်အခါ ဖုန်းယွီသည် ချွမ်ကျူထယ်မှ ဝယ်ယူလာသော ဘဲကင်ထုပ်ကို ကိုင်ဆောင်၍ အဆောက်အအုံအတွင်းသို့ လှမ်းဝင်လိုက်သည်။

"ကြည့်စမ်း... မင်းကတော့ လာတိုင်း တစ်ခုခု ယူလာတာပဲ" ကျန်းရွေ့ချန်း၏ ဇနီးက ပြုံးရွှင်စွာဖြင့် အပြစ်တင်သလို ပြောဆိုလိုက်သည်။

"ကျွန်တော်က အမြဲတမ်း အလကား လာစားနေလို့ ဘယ်ဖြစ်မလဲ။ ဒါကလည်း ကိုယ့်အိမ်က ပစ္စည်းပဲလေ၊ အပူထိန်းဗူးနဲ့ ထည့်လာတာဆိုတော့ အခု စားရင် အတော်ပဲ ဖြစ်မှာပါ"

ကျန်းရွေ့ချန်း၏ ဇနီးသည် ဖုန်းယွီ ညနေပိုင်းတွင် ရောက်လာမည်ကို သိထားသဖြင့် ညစာကို ကြိုတင် ပြင်ဆင်နေခဲ့ခြင်း ဖြစ်သည်။

အိမ်ထဲသို့ လှမ်းဝင်လိုက်သည့်အခါတွင်မူ အခြားသော ဧည့်သည်တစ်ဦးကိုပါ မြင်တွေ့လိုက်ရသည်။ ဖုန်းယွီ ကြည့်ရသည်မှာ မျက်မှန်းတန်းမိနေသဖြင့် ခဏမျှ စဉ်းစားလိုက်သည့်အခါမှ ဤသူမှာ ယခင်က ရွှီချန်ယို၏ အတွင်းရေးမှူးဖြစ်ခဲ့ပြီး ယခုအခါ ဟားပင်း အစိုးရ၏ ဒုတိယအကြီးအကဲ ဖြစ်နေသူဖြစ်ကြောင်း သတိရသွားခဲ့သည်။

ရွှီချန်ယိုအနားယူသွားပြီးနောက် ထိုစဉ်က လူအများအပြားမှာ ယခုအခါ ကျန်းရွေ့ချန်း၏ လက်အောက်သို့ ရောက်ရှိနေကြပြီ ဖြစ်သည်။ ဖုန်းယွီ ဝင်လာသည်ကို မြင်လိုက်ရသည့်အခါ ကျန်းရွေ့ချန်းနှင့် ကျောက်ကော်လျန်တို့မှာ တစ်ပြိုင်နက်တည်း ထရပ်လိုက်ကြသည်။

"လာပြီလား... လက်ဆေးလိုက်ဦး၊ ထမင်းစားဖို့ ပြင်ရအောင်"

ထမင်းစားနေစဉ်အတွင်း ကျန်းရွေ့ချန်း၏ ဇနီးသည် အလွန်ပင် လျင်မြန်စွာ စားသောက်ခဲ့ပြီး ဆယ်မိနစ်ပင် မပြည့်မီ အချိန်အတွင်းမှာပင် ပန်းကန်များကို ချလိုက်ကာ သူမ စောင့်ကြည့်နေသော အစီအစဉ် စတော့မည်ဖြစ်သဖြင့် အတွင်းခန်းထဲသို့ တီဗွီဝင်ကြည့်မည်ဟု ဆိုကာ ထွက်သွားတော့သည်။ သူမ မသွားမီတွင်လည်း ၎င်းတို့အတွက် လက်ဖက်ရည် တစ်အိုးကို ကြိုတင်၍ ဖျော်ပေးထားခဲ့သေးသည်။

"ဖုန်းယွီ... ပြောပါဦး၊ ငါတို့ ဟားပင်း ဘီယာကို ဘယ်လိုမျိုး အမြန်ဆုံး ကြီးထွားလာအောင် လုပ်မလဲဆိုတာလေ။ ကော်လျန်က အခု စီးပွားရေးပိုင်းကို အဓိက တာဝန်ယူနေရတာဆိုတော့ ဒီလုပ်ငန်းစဉ်တွေကို သူကပဲ တိုက်ရိုက် ကိုင်တွယ်ရမှာ"

ကျောက်ကော်လျန်သည် ဖုန်းယွီကို ခေါင်းတစ်ချက် ညိတ်ပြလိုက်ကာ ဆိုလိုက်သည်။ "မန်နေဂျာဖုန်း... အများကြီး လမ်းညွှန်ပေးပါဦးဗျာ"

"လမ်းညွှန်တာတော့ မဟုတ်ပါဘူး၊ အားလုံး တိုင်ပင်ကြတာပေါ့။ ကျွန်တော်ကတော့ စီးပွားရေးသမား တစ်ယောက်ရဲ့ ရှုထောင့်ကနေ 'အသေးက အကြီးကို ဝါးမြိုခြင်း' ဆိုတဲ့ နည်းလမ်းအကြောင်းကို ပြောပြချင်ပါတယ်"

အသေးက အကြီးကို ဝါးမြိုခြင်း… ကျန်းရွေ့ချန်းနှင့် ကျောက်ကော်လျန်တို့သည် တစ်ဦးကိုတစ်ဦး ကြည့်လိုက်ကြသည်။ ဤစကားကို ကြားရသည်မှာ မြွေက ဆင်ကို ဝါးမြိုသကဲ့သို့ ခံစားချက်မျိုး ပေးစွမ်းနေခဲ့သည်။

"စတော့ဈေးကွက်မှာ စာရင်းဝင်ထားတဲ့ ကုမ္ပဏီတစ်ခု နယ်မြေချဲ့ထွင်ဖို့ဆိုတာ တကယ်တော့ အလွန်ပင် ရိုးရှင်းပါတယ်။ ငွေကြေး မလုံလောက်တော့ဘူးဆိုရင် ရှယ်ယာအသစ်တွေ ထုတ်ဝေပြီး ရန်ပုံငွေ ရှာလို့ ရသလို၊ ရှယ်ယာချင်း လဲလှယ်တဲ့ နည်းလမ်းနဲ့လည်း တစ်ဖက်ကုမ္ပဏီကို ချုပ်ကိုင်လို့ ရပါတယ်။ အမေရိကန်မှာ ကျွန်တော် ရှယ်ယာပါဝင်ထားတဲ့ ကုမ္ပဏီတစ်ခု ရှိတယ်၊ ဒီနည်းလမ်းကို သုံးပြီးတော့ပဲ နှစ်အနည်းငယ်အတွင်းမှာ ဒေါ်လာ သန်းရာဂဏန်းလောက်ပဲ ရှိတဲ့ ပိုင်ဆိုင်မှုကနေ ဒေါ်လာ ဘီလီယံ နှစ်ရာနီးပါး ရှိတဲ့ ဧရာမ ကုမ္ပဏီကြီး ဖြစ်လာခဲ့ဖူးတယ်"

"အဲဒီနောက်ပိုင်းကျတော့ရော" ကျန်းရွေ့ချန်းက စိတ်ဝင်တစား မေးမြန်းလိုက်သည်။

"အဲဒီနောက်ပိုင်းမှာတော့ အဲဒီကုမ္ပဏီက ဒေဝါလီ ခံလိုက်ရတယ်" ဖုန်းယွီက ပုခုံးတွန့်ပြလိုက်သည်။

ကျန်းရွေ့ချန်း "......"

ကျောက်ကော်လျန်မှာလည်း ကြောင်တောင်တောင် ဖြစ်သွားခဲ့ရသည်။ မင်းက ငါတို့ကို နည်းလမ်းတွေ ပြောပြပြီး နောက်ဆုံးကျတော့ ဒေဝါလီခံလိုက်ရတဲ့ ကုမ္ပဏီရဲ့ ဥပမာကို ပေးနေတာလား။

"အဲဒီကုမ္ပဏီ ဒေဝါလီခံရတဲ့ အကြောင်းရင်း အချို့ ရှိပါတယ်။ ပထမ အကြောင်းရင်းကတော့ သူတို့က ဒီနည်းလမ်းကို သုံးပြီး ကမ္ဘာ့နံပါတ်တစ် ဖြစ်ချင်ခဲ့တာ။ အဲဒီမတိုင်ခင်က သူတို့ဟာ နယ်ပယ်ရဲ့ ထိပ်တန်း သုံးခုအတွင်းမှာ ရှိနေခဲ့ပြီးသားဖြစ်သလို နှစ်အနည်းငယ်အတွင်းမှာပဲ အောင်မြင်မှုတွေ ရရှိခဲ့တာကြောင့် ဒါကို အံ့ဖွယ်တစ်ခုလို့တောင် ခေါ်ဆိုခဲ့ကြတယ်။ ဒုတိယ အကြောင်းရင်းကတော့ သူတို့ရဲ့ စီမံခန့်ခွဲမှု ဆုံးဖြတ်ချက်တွေ မှားယွင်းခဲ့တာပဲ။ သူတို့က တစ်ဆင့်တည်းနဲ့ အောင်မြင်မှုကို ရယူချင်ခဲ့သလို လုပ်ငန်း နယ်ပယ်ချဲ့ထွင်မှုတွေကလည်း လက်တွေ့နဲ့ အရမ်းကို ဝေးကွာနေခဲ့တယ်။ ရလဒ်အနေနဲ့ကတော့ အရင်းအမြစ်တွေ အများအပြားကို အလဟဿ ဖြစ်စေခဲ့သလို ထိုက်တန်တဲ့ တန်ဖိုးကိုလည်း ဖန်တီးမပေးနိုင်ခဲ့တဲ့အတွက် ကုမ္ပဏီရဲ့ ငွေကြေးလည်ပတ်မှု စနစ်ကို ပြိုလဲသွားစေခဲ့တယ်။ တတိယ အကြောင်းရင်းကတော့ သူတို့က ဘဏ္ဍာရေး စာရင်းဇယားတွေကို လိမ်လည်ခဲ့တာပဲ။ အဲဒီသတင်းကို ကျွန်တော်က လူလွှတ်ပြီး ဖွင့်ချလိုက်တဲ့အခါမှာတော့ ယုံကြည်မှု ပျက်ပြားသွားပြီး ရင်းနှီးမြှုပ်နှံသူ အားလုံးက ရှယ်ယာတွေကို အလုအယက် ရောင်းချခဲ့ကြသလို ရှယ်ယာဈေးနှုန်းတွေလည်း ပြိုလဲသွားခဲ့ရတာပေါ့"

ကျောက်ကော်လျန်သည် စိတ်ထဲမှ တွေးတောနေမိသည်မှာ "မင်း ပေးတဲ့ ဒီဥပမာက မင်းကိုယ်တိုင် ဖျက်ဆီးခဲ့တဲ့ ကုမ္ပဏီအကြောင်းလား။ ဘယ်လိုပဲဖြစ်ဖြစ် မန်နေဂျာဖုန်းဟာ တကယ့်ကို ကြောက်စရာကောင်းတဲ့ သူပဲ" ဟူ၍ ဖြစ်သည်။

"ဒီအဓိက အကြောင်းရင်း သုံးခုကို ဖယ်ထုတ်လိုက်မယ်ဆိုရင်တော့ ဒီကုမ္ပဏီရဲ့ နယ်မြေချဲ့ထွင်တဲ့ ပုံစံကို စံနမူနာတစ်ခုအဖြစ် သတ်မှတ်လို့ ရပါတယ်။ ဘာလို့လဲဆိုတော့ သူတို့ နယ်မြေချဲ့ထွင်တိုင်းမှာ လက်ငင်းငွေသားကို အသုံးပြုရန် လုံးဝ မလိုအပ်သလောက် ဖြစ်နေခဲ့လို့ပါပဲ။ ရှယ်ယာအသစ်တွေ ထုတ်ဝေတာမျိုး ဒါမှမဟုတ် ရှယ်ယာချင်း လဲလှယ်တဲ့ နည်းလမ်းမျိုးကို သုံးခဲ့တာပါ။ နောက်ပြီး ကုမ္ပဏီအသစ်ကို ရာနှုန်းပြည့် ဝယ်ယူစရာလည်း မလိုပါဘူး၊ ချုပ်ကိုင်နိုင်တဲ့ ရှယ်ယာပမာဏ ရှိနေရင်ကို လုံလောက်လှပါပြီ"

"နောက်ပြီး ငါတို့ မှတ်ထားရမယ့် အချက်တစ်ခု ရှိသေးတယ်၊ အဲဒါကတော့ ငါတို့က ဈေးကွက်ကို တစ်ဦးတည်း လက်ဝါးကြီးအုပ်ဖို့ စိတ်ကူးမရှိတဲ့အတွက် ဝိုင်းဝန်း ဆန့်ကျင်မှုတွေကို ခံရမှာ မဟုတ်ပါဘူး။ ထို့ပြင် ငါတို့ဟာ ဘဏ္ဍာရေးပိုင်းမှာလည်း လုံးဝ လိမ်လည်မှာ မဟုတ်သလို၊ လိမ်လည်လို့လည်း လုံးဝ မဖြစ်ပါဘူး။ စာရင်းဝင် ကုမ္ပဏီတစ်ခုအတွက် ဒါဟာ အကြီးမားဆုံးသော တားမြစ်ချက်ဖြစ်ပြီး အကယ်၍သာ ရှာဖွေတွေ့ရှိသွားခဲ့ရင် ကုမ္ပဏီ ပြိုလဲသွားနိုင်တဲ့ အန္တရာယ်က အလွန်ကြီးမားတယ်"

"မန်နေဂျာဖုန်း... ဘာလို့ ကျွန်တော်တို့က ဈေးကွက်ကို တစ်ဦးတည်း စိုးမိုးဖို့ မကြိုးစားတာလဲ။ ခေါင်းဆောင် ပြောတာ ကြားရတာတော့ မင်းရဲ့အမြင်အရ ချင်းတောင် ဘီယာ၊ ပီကင်း ဘီယာ စတာတွေကို ဝါးမြိုဖို့ စိတ်ကူးမရှိဘူးဆို၊ ဘာကြောင့်လဲ"

"အကြောင်းရင်းကတော့ အဲဒီ လုပ်ငန်းနှစ်ခုဟာ တရုတ်ပြည်မှာ ရောင်းအားအကောင်းဆုံး ဘီယာတွေ ဖြစ်ခဲ့ဖူးသလို ပြည်တွင်းမှာတင်မကဘဲ ပြည်ပမှာပါ နာမည်ကြီးနေလို့ပါပဲ။ ပြီးတော့ အဲဒီ လုပ်ငန်းနှစ်ခုမှာ နိုင်ငံတော်အဆင့် ရင်းနှီးမြှုပ်နှံမှု ကုမ္ပဏီတွေရဲ့ ရှယ်ယာတွေ အမြောက်အမြား ရှိနေခဲ့တာပါ။ ရိုးရိုးလေး ပြောရရင် သူတို့မှာ ငွေမရှိတာ မဟုတ်ပါဘူး။ ငါတို့ကသာ တိုက်ရိုက် ဝယ်ယူဖို့ ကြိုးစားမယ်ဆိုရင် သူတို့ တောင်းဆိုမယ့် ဈေးနှုန်းက မင်းတို့ တောင့်ခံနိုင်မှာ မဟုတ်ပါဘူး။ အကယ်၍ ရှယ်ယာချင်း လဲလှယ်မယ်ဆိုရင်လည်း သူတို့ တောင်းဆိုမယ့် ရှယ်ယာပမာဏက နက္ခတ္တဗေဒ ကိန်းဂဏန်းမျိုး ဖြစ်နေမှာဖြစ်သလို ငါတို့ကိုလည်း အပြည့်အဝ ချုပ်ကိုင်ခွင့် ပေးမှာ မဟုတ်ပါဘူး။ အရေးကြီးဆုံးကတော့ အထက်က လူကြီးတွေ သေချာပေါက် ကြားဝင်လာမှာမို့လို့ပါ"

ကျောက်ကော်လျန်သည် စဉ်းစားတွေးတောရင်း ခေါင်းညိတ်လိုက်သည်။ အကယ်၍ ဟားပင်း ဘီယာကိုသာ ချင်းတောင် ဘီယာက လာရောက် ဝါးမြိုမည်ဆိုပါက သူသည်လည်း မြို့တော်အကြီးအကဲ တစ်ဦးအနေဖြင့် သေချာပေါက် ကြားဝင် တားဆီးပေလိမ့်မည်။

"နောက်ထပ် အရေးကြီးတဲ့ အကြောင်းရင်း တစ်ခုကတော့ ဤကဲ့သို့သော နယ်မြေချဲ့ထွင်မှုဟာ ကုမ္ပဏီအတွက် ကြီးမားလှတဲ့ အကြွေးဝန်ထုပ်ဝန်ပိုးတွေကို သယ်ဆောင်လာပေးနိုင်လို့ပါပဲ။ ကုမ္ပဏီရဲ့ အကြွေးနှုန်း အရမ်း မြင့်မားနေတာဟာ ကောင်းတဲ့ ကိစ္စတော့ မဟုတ်ပါဘူး။ အကယ်၍ ငွေကြေးလည်ပတ်မှုမှာ အနည်းငယ် ပြဿနာ ရှိသွားတာနဲ့ ကုမ္ပဏီကို ပြိုလဲသွားစေမယ့် နောက်ဆုံးသော ကောက်ရိုးတစ်မျှင် ဖြစ်သွားနိုင်ပြီး ကုမ္ပဏီကို ပြင်းထန်တဲ့ အကျပ်အတည်းဆီကို တွန်းပို့သွားနိုင်ပါတယ်"

ထိုစဉ်က WorldComသည်လည်း ဤကဲ့သို့ပင် ဖြစ်သည်။ ငွေချေးခြင်း၊ ရန်ပုံငွေ ရှာဖွေခြင်းနှင့် ထပ်မံ ငွေချေးခြင်း ဟူသော ပုံစံဖြင့် တိုးတက်လာခဲ့ခြင်း ဖြစ်သော်လည်း ၎င်းတို့၏ လက်ထဲတွင်မူ လက်ငင်းငွေသား အမြောက်အမြား ရှိမနေခဲ့ပါချေ။

ကုမ္ပဏီ ဖွံ့ဖြိုးတိုးတက်မှုအတွက် လက်ငင်းငွေသားသည်သာ အဓိကဟု မဆိုနိုင်စေကာမူ၊ လက်ငင်းငွေသား မရှိဘဲနှင့်မူ မည်သို့မျှ မဖြစ်နိုင်ပါချေ။

"ဒါဆိုရင် ငါတို့ ဘယ်လိုမျိုး နယ်မြေချဲ့ထွင်သင့်သလဲလို့ မင်း ထင်သလဲ။ တောင်ဘက်ကနေ မြောက်ဘက်အထိ တစ်ဆင့်ချင်းစီ ဝါးမြိုသွားရမှာလား။ ငါတို့လည်း ရှယ်ယာအသစ်တွေ ထုတ်ဝေရမှာလား" ကျန်းရွေ့ချန်းက အသေးစိတ် မေးမြန်းလိုက်သည်။

"ဘာလို့ တောင်ဘက်ကနေ မြောက်ဘက်အထိ တစ်ဆင့်ချင်းစီ သွားရမှာလဲ။ ငါတို့က နေရာအနှံ့မှာ တစ်ပြိုင်နက်တည်း အစပျိုးတဲ့ နည်းဗျူဟာကို သုံးသင့်တာပေါ့။ မည်သည့် ပြည်နယ်မှာပဲ ဖြစ်ဖြစ်၊ အတိုင်းအတာ တစ်ခုအထိ ရှိတဲ့ ဘီယာလုပ်ငန်းမျိုးဆိုရင် ဝါးမြိုနိုင်အောင် ကြိုးစားရမယ်။ တစ်ဖက်မှာတော့ ပေတချန်းကို ဟားပင်း ဘီယာထဲမှာ ရင်းနှီးမြှုပ်နှံမှုတွေ ဆက်တိုက် ထည့်ဝင်ခိုင်းမယ်၊ နောက်တစ်ဖက်မှာတော့ ချေးငွေတွေ ရယူမယ်။ သေချာပေါက် ရှယ်ယာအသစ် ထုတ်ဝေတာက အလွယ်ကူဆုံး ဖြစ်ပေမဲ့ အတိုင်းအဆမရှိဘဲတော့ မလုပ်သင့်ပါဘူး"

"ဒီလိုလုပ်ပါ... ရှယ်ယာအသစ်တွေ ထုတ်ဝေတဲ့အခါ ငါ့ဆီကို အချို့ ရောင်းချပေးပါ၊ ဒါမှမဟုတ် ငါ မင်းအတွက် ဝယ်ယူမယ့်သူတွေ ရှာပေးမယ်။ နယ်မြေချဲ့ထွင်တော့မယ့် ဟားပင်း ဘီယာရဲ့ ရှယ်ယာတွေကို စိတ်ဝင်စားမယ့်သူတွေ အမြောက်အမြား ရှိနေလိမ့်မယ်လို့ ငါ ယုံကြည်တယ်။ ငါတို့ မှတ်ထားရမှာက အခြားသော ဘီယာစက်ရုံတွေကို ဝယ်ယူတဲ့အခါမှာ လုပ်ဆောင်ချက်တွေက အလွန် မြန်ဆန်ရမယ်။ သူတို့ကို အခြားသော ကုမ္ပဏီတွေနဲ့ ညှိနှိုင်းပြီး ဈေးတင်ဖို့အတွက် အချိန် လုံးဝ မပေးသင့်ဘူး"

"အပြည့်အဝ ဝယ်ယူလို့ ရမယ်ဆိုရင်တော့ သေချာပေါက် အကုန်ဝယ်ရမှာပေါ့၊ ဒါပေမဲ့ မဖြစ်နိုင်ဘူးဆိုရင်တော့ ချုပ်ကိုင်နိုင်တဲ့ ရှယ်ယာပမာဏ ရှိရင်ကို ရပါပြီ။ အကယ်၍ ချုပ်ကိုင်ခွင့်တောင် မရနိုင်ဘူးဆိုရင်တော့ ရှယ်ယာ အချို့ ပါဝင်ထားတာမျိုးလည်း ဖြစ်နိုင်ပါတယ်၊ ဒါပေမဲ့ အနည်းဆုံးတော့ သူတို့ဆီမှာ ဟားပင်း အမှတ်တံဆိပ် ဘီယာတွေကို ထုတ်လုပ်ခွင့် ရအောင် လုပ်ရမယ်။ ထိုသို့ဆိုလျှင် မည်သည့် ပြည်နယ်မှာမဆို ငါတို့ရဲ့ ဟားပင်း ဘီယာ ရှိနေမှာဖြစ်သလို ငါတို့ဟာ တရုတ်ပြည်မှာ လူသိအများဆုံးနဲ့ အရောင်းလမ်းကြောင်း အကျယ်ပြန့်ဆုံး ဘီယာလုပ်ငန်း ဖြစ်လာမှာပါ"

"ရောင်းချမှုပိုင်းအတွက်ကတော့ ကျုံးချင်းရှန်နဲ့ ဆွေးနွေးကြည့်လို့ ရပါတယ်။ အကယ်၍ မင်းက ထိုက်ဟွာ ဟိုးဒင်း အုပ်စုကို ဟားပင်း ဘီယာမှာ ရှယ်ယာ ပါဝင်ခွင့် ပေးမယ်ဆိုရင်တော့၊ ထိုက်ဟွာ ဟိုးဒင်းရဲ့ အချိုရည် အရောင်းလမ်းကြောင်းတွေကို ဟားပင်း ဘီယာနဲ့ မျှဝေအသုံးပြုလို့ ရလိမ့်မယ်။ ဒါဟာ ငါတို့ တရုတ်ပြည်မှာ အကောင်းဆုံးသော အချိုရည် အရောင်းလမ်းကြောင်းဖြစ်ပြီး ဘယ်လုပ်ငန်းကမျှ ငါတို့ကို ယှဉ်နိုင်မှာ မဟုတ်ပါဘူး။ ရုပ်သံနဲ့ အင်တာနက် ကြော်ငြာတွေကိုပါ ပေါင်းစပ်လိုက်မယ်ဆိုရင်တော့ အချိန်တိုအတွင်းမှာ ဟားပင်း ဘီယာဟာ တရုတ်ပြည်ရဲ့ ကျော်ကြားမှု အရှိဆုံး ဘီယာအမှတ်တံဆိပ် ဖြစ်လာပေလိမ့်မယ်"

ကျန်းရွေ့ချန်းသည် ကျောက်ကော်လျန်ကို ကြည့်လိုက်ရာ နှစ်ဦးသားလုံး၏ မျက်ဝန်းများထဲတွင် ထောက်ခံချက်များကို မြင်တွေ့လိုက်ရသည်။ အိမ်ပြန်ရောက်လျှင် အသေးစိတ် အစီအစဉ်များ ရေးဆွဲကာ ဟားပင်း ဘီယာ၏ နယ်မြေချဲ့ထွင်မှု ခြေလှမ်းများကို အမြန်ဆုံး စတင်ရန် ဆုံးဖြတ်လိုက်ကြလေတော့သည်။