အခန်း (၉၀၉-၉၁၀)

အခန်း (၉၀၉) နှစ်ဝက်

ပြခန်းမှထွက်ခွာလာစဉ် ဟန်ရှောင်းသည် မပြီးဆုံးသေးသော ပွေ့ဖက်မှုကို အစားထိုးရန် လီယာလင်းကို ပြန်လည်ရှာဖွေခဲ့သည်။ ထိုအခိုက်အတန့်တွင် သူတို့ကြား၌ အဆင့်အတန်းကွာခြားမှု မရှိတော့ဘဲ သူငယ်ချင်းအချင်းချင်း ပြန်လည်ဆုံစည်းခြင်းသာ ဖြစ်သည်။

အနှစ်နှစ်ဆယ်သည် ထိုကဲ့သို့ ကုန်လွန်သွားခဲ့ပြီး သူ၏ပထမဆုံး သူငယ်ချင်းအဖွဲ့အားလုံးသည် သူတို့၏ကိုယ်ပိုင်အတွေ့အကြုံများ ရှိကြသည်။ လူတိုင်းတွင် ကိုယ်ပိုင်ရွေးချယ်မှုများ ပြုလုပ်ရန် လွတ်လပ်ခွင့်ရှိပြီး သူဝင်ရောက်စွက်ဖက်မည်မဟုတ်ပေ။ ထို့ကြောင့် သူ၏ ‘အကြွေး’ ကို ဆပ်ပြီးနောက် သူ လီယာလင်းကို အခြားဘာမှ မပြောတော့ပေ။

နှုတ်ဆက်ပြီးနောက် ဟန်ရှောင်းနှင့် အေးမီစ်တို့သည် ရေပင်လယ်ဂြိုဟ်၏ မြို့ကြီးများကို လှည့်လည်ကြည့်ရှုရန် နောက်ထပ် ဆယ်ရက်ခန့် အချိန်ကုန်ဆုံးခဲ့သည်။ သူတို့ကို တွေ့ရှိသောအခါ လူများစွာသည် သူတို့နှင့် ဓာတ်ပုံရိုက်ရန် အပြေးအလွှား ရောက်ရှိလာကြသည်။ ဤသည်မှာ သူတို့ ဘန်းနက်နှင့် တွေ့ဆုံသည်အထိ ဖြစ်သည်။

လူမှုကွန်ရက်တွင် တင်ထားသော ဓာတ်ပုံများစွာ ရှိနေသဖြင့် ဟန်ရှောင်း သူ့ထံကျိန်းသေလာမည်ကို ဘန်းနက်သိနေပြီး သူ့ကိုမနှောင့်ယှက်ဘဲ စောင့်နေသည်။

ဟန်ရှောင်းနှင့် အေးမီစ်တို့သည် ရေပင်လယ်ဂြိုဟ်နှင့် ပူးပေါင်းဆောင်ရွက်မှု ဆက်ဆံရေးရှိသောကြောင့် ဘန်းနက်သည်လည်း သူတို့နှစ်ဦးကို တွေ့ဆုံရန် ပြင်ဆင်ထား၏။

...

တရားဝင်ကိစ္စရပ်များကို ဆွေးနွေးပြီးနောက် ဘန်းနက်သည် နီရိုအကြောင်း မမေးဘဲမနေနိုင်တော့ပေ။ ဟန်ရှောင်းက နီရို၏ကြီးမားသော လေ့လာမှုဝန်ထုပ်ကြီးအကြောင်း ဘန်းနက်ကို ပြောပြခဲ့သော်လည်း ဤအရာက ဟန်ရှောင်း နီရိုကို အလွန်တန်ဖိုးထားပြီး သူ့ကိုပြုစုပျိုးထောင်ရန် စိတ်ဝင်စားကြောင်းသိရပြီး ဘန်းနက်ကို စိတ်အေးသွားစေသည်။

ရေပင်လယ်ဂြိုဟ်တွင် စစ်ဆေးရေးလုပ်ငန်းများ ပြီးဆုံးပြီးနောက် ဟန်ရှောင်းသည် ဟီလာနှင့်မျှဝေရန် ဟင်းလင်းပြင်နဂါးဝိုင် အချို့ရယူရန် အီဆော့၏ဝိုင်မြေအောက်ခန်းထဲသို့ ခိုးဝင်ရန် ရည်ရွယ်ချက်ဖြင့် မျောလွင့်နဂါးကျွန်းသို့ ပြန်သွား၏။ သို့သော် ၎င်းကို အီဆော့ ကြိုမြင်ခဲ့ပြီး သူ၏ကုတင်နှင့် အိမ်သာကို ဝိုင်မြေအောက်ခန်းသို့ ရွှေ့ကာ သူ၏အသက်နှင့်လဲပြီး စောင့်ကြပ်နေခဲ့သည်။ ထို့ကြောင့် သူသည် လက်ဗလာဖြင့်သာ ဌာနချုပ်သို့ ပြန်လာရသည်။

သူမ၏နန်းတော်ထဲတွင် အေးမီစ်သည် မိုးကုတ်စက်ဝိုင်းဆီသို့ ပျံသန်းသွားသော အာကာသယာဉ်ကိုကြည့်ပြီး သက်ပြင်းချကာ ရေရွတ်လိုက်သည်။ “ငါ အပျင်းထူလို့ မရတော့ဘူး...”

...

ဌာနချုပ်သို့ ပြန်ရောက်သောအခါ သူပထမဆုံးလုပ်သည်မှာ ဖေဒင်နှင့် နီရိုကို ရှာဖွေခြင်းဖြစ်ပြီး သူတို့ကိုနှောင့်ယှက်ပြီးနောက် သူ၏မစ်ရှင် ကျပန်းဆုလာဘ်ကို ရယူရန် သူ့အခန်းသို့ သွားလိုက်သည်။

သင်သည် အေးမီစ်၏ ကျွမ်းကျင်မှုများ (စွမ်းရည်/ပါရမီ) ထဲမှ တစ်ခုကို ကျပန်းဆုလာဘ် မဲနှိုက်ခွင့် ရရှိထားသည်။

သတိပေးချက် - အေးမီစ်သည် အက်စ်ပါတစ်ဦးဖြစ်ပြီး ဖြစ်နိုင်ချေရှိသော စွမ်းရည်များ၏ တစ်စိတ်တစ်ပိုင်းကို သင့်အတန်းအစားနှင့် ကိုက်ညီအောင် အလိုအလျောက် ချိန်ညှိထားသည်။

ကျပန်းရွေးချယ်နေသည်... ပြီးပါပြီ။

ဆုလာဘ်အဖြစ် အောက်ပါရွေးချယ်စရာငါးခုထဲမှ တစ်ခုကို ကျေးဇူးပြု၍ ရွေးချယ်ပါ

၁။ သွေးသန့် – အရည်အချင်း - လူတစ်ဦး၏ မျိုးနွယ်စုအရည်အချင်းကို အတိုင်းအတာတစ်ခုအထိ တိုးတက်စေသည် (တစ်ဦးချင်းစီ၏ အရည်အချင်းများ ကွဲပြားခြားနားသောကြောင့် ပမာဏသတ်မှတ်၍ မရပါ)

၂။ အဆင့်မြင့် ဆွဲဆောင်မှု အော်ရာ – အရည်အချင်း - ဆွဲဆောင်မှု +၁၂၀%

၃။ ကြယ်တာရာများ၏ စောင့်ရှောက်သူ – စွမ်းရည် - ကျပန်း အစပျိုးသော အလိုအလျောက်ပွင့်သည့်စွမ်းရည်။ တစ်ဦးသည် ကြယ်တာရာများ၏ မျက်နှာသာပေးမှုကို ခံရမည်ဖြစ်ပြီး [ကံကောင်းခြင်း] အခြေအနေကို ရရှိမည်ဖြစ်သည်။ ကံကောင်းခြင်း +၉၀%။ ၁၅ ရက် ကြာသည်။

၄။ အလားအလာကို အသက်သွင်းခြင်း – စွမ်းရည် - လူတစ်ဦး၏ အလားအလာကို ထုတ်လွှတ်သည်။ တိုက်ခိုက်မှု +၁၀% - ၁၅% နှင့် အသည်းအသန်ထိခိုက်မှုနှုန်း +၂၀၀%။ ဤအခြေအနေတွင် စွမ်းအင်ကို စဉ်ဆက်မပြတ် သုံးစွဲသည်။

၅။ သူရဲကောင်း လက်ကောက်ဝတ်များ – အရည်အချင်း - သင့်တွင် ကြောက်စရာကောင်းသော လက်ကောက်ဝတ်အင်အား၊ သန်မာသောခန္ဓာကိုယ်နှင့် တက်ကြွသော ဆဲလ်လှုပ်ရှားမှုများ ရှိသည်။ သင့်ဇာတ်ကောင်၏ အလုံးစုံအဆင့် မြင့်တက်လာသည်နှင့်အမျှ သင့်အင်အား၊ ခံနိုင်ရည် နှင့် တိုက်ခိုက်မှု တိုးလာမည်ဖြစ်သည်။

– အဆင့် ၁ - ၁၀၀ - အဆင့် ၁၀ တိုင်းသည် အင်အား +၃၀၊ ခံနိုင်ရည် +၁၅ နှင့် တိုက်ခိုက်မှု +၀.၆% တိုးလာမည်။

– အဆင့် ၁၀၁ - ၂၀၀ - အဆင့် ၁၀ တိုင်းသည် အင်အား +၄၅၊ ခံနိုင်ရည် +၂၅ နှင့် တိုက်ခိုက်မှု +၀.၉% တိုးလာမည်။

– အဆင့် ၂၀၁ နှင့်အထက် - အဆင့် ၁၀ တိုင်းသည် အင်အား +၆၀၊ ခံနိုင်ရည် +၃၅ နှင့် တိုက်ခိုက်မှု +၁.၂% တိုးလာမည်။

“ဟားဟား၊ ထီပေါက်တာပဲ” ဟန်ရှောင်း၏မျက်လုံးများ တောက်ပလာသည်။

ဖေဒင်နှင့် နီရိုတို့သည် တကယ့်ကို သူ့ကံကောင်းစေသော ကြယ်ပွင့်များဖြစ်ပြီး ကောင်းမွန်သော ဆုလာဘ်အားလုံးကို မဲနှိုက်ခွင့်ရစေသည်။

[အဆင့်မြင့် ဆွဲဆောင်မှု အော်ရာ] ၏ အပိုဆုသည် အတော်လေး အထင်ကြီးစရာကောင်းပြီး ‘အဆင့်မြင့်’ ဟူသော စကားလုံးပါသည့် မည်သည့်အရည်အချင်းမဆို မဆိုးသော်လည်း ဟန်ရှောင်း၏ ဆွဲဆောင်မှုလိုအပ်ချက်မှာ မမြင့်မားပေ။

[ကြယ်တာရာများ၏ စောင့်ရှောက်သူ] သည် အစွမ်းထက်သော ကျွမ်းကျင်မှုတစ်ခုဖြစ်ပြီး ၎င်း၏ကံကောင်းခြင်း အပိုဆုသည် မြင့်မားသော်လည်း သူ့တွင် ၎င်းအတွက် လိုအပ်ချက်မရှိပေ။ ထို့အပြင်... အခြေခံ ကံကောင်းခြင်း တစ်မှတ်ဖြင့် အပိုဆု မည်မျှပင်ကြီးမားစေကာမူ ၎င်းသည် အတူတူလောက်ပင် ဖြစ်နေလိမ့်မည်။

[အလားအလာကို အသက်သွင်းခြင်း] သည် လူတစ်ဦး၏ စွမ်းဆောင်ရည်ကို တိုးမြင့်စေမည့် လက်တွေ့ကျသော ကျွမ်းကျင်မှုတစ်ခုဖြစ်သော်လည်း အခြားနှစ်ခုနှင့် နှိုင်းယှဉ်ပါက လိုအပ်ချက်ရှိနေသည်။

ဟန်ရှောင်းသည် [သွေးသန့်] ကို အထူးသဘောကျသည်။ အဘယ်ကြောင့်ဆိုသော် ၎င်းသည် ရှားပါးသော မျိုးနွယ်စုအရည်အချင်း မြှင့်တင်ပေးသည့် ကျွမ်းကျင်မှုတစ်ခု ဖြစ်သလို [သူရဲကောင်း လက်ကောက်ဝတ်များ] သည်လည်း ကြီးထွားမှုအမျိုးအစား အရည်အချင်းတစ်ခုဖြစ်သောကြောင့် ဖြစ်သည်။

သို့သော် ရွေးချယ်စရာ ဆုလာဘ်တစ်ခုတည်းသာ ရှိသောကြောင့် ခေတ္တမျှ စဉ်းစားပြီးနောက် ဟန်ရှောင်း ဆုံးဖြတ်ချက်ချလိုက်သည်။

သင်သည် သူရဲကောင်း လက်ကောက်ဝတ်များ အရည်အချင်းကို ချီးမြှင့်ခြင်း ခံရသည်။

လက်ရှိ အသုံးပြုထားသော ထပ်ဆောင်းအခြေအနေများ - အင်အား +၁၂၃၀၊ ခံနိုင်ရည် +၆၈၀၊ တိုက်ခိုက်မှု +၂၄.၆ တိုးလာသည်။

သူသည် ဤကဲ့သို့သော ကြီးထွားမှုအရည်အချင်းမျိုးကို ပိုမိုနှစ်သက်သည်။ အဘယ်ကြောင့်ဆိုသော် ၎င်းသည် တည်ငြိမ်သည်၊ သန်မာသည်၊ အလားအလာရှိသည်။

နှိုင်းယှဉ်ကြည့်လျှင် [သွေးသန့်] ၏ အကျိုးသက်ရောက်မှုသည် မရေရာလွန်းပြီး အေးမီစ်၏ စွမ်းရည်အပေါ် အခြေခံ၍ ဤအရည်အချင်း၏ အပိုဆုများသည် အကန့်အသတ်ရှိနိုင်သည်။

ထို့အပြင် သူ၏မျိုးနွယ်စုအရည်အချင်းသည် သူ မျိုးနွယ်စုဆင့်ကဲပြောင်းလဲခြင်းကို ခံယူတိုင်း တိုးတက်မှုတစ်ခု ရရှိလိမ့်မည်။ သူသည် ဤနယ်ပယ်တွင် လိုအပ်ချက်မရှိပေ။ ထို့အပြင် သူ၏အဓိက တိုက်ခိုက်ရေးအင်အားမှာ သူ၏ယန္တရားတပ်မတော်ဖြစ်ပြီး မျိုးနွယ်စုအရည်အချင်းသည် သူ၏စစ်မှန်သော ယန္တရားပညာရှင် ခန္ဓာကိုယ်ပေါ်တွင်သာ သက်ရောက်နိုင်သည်။

လက်ရှိတွင် သူ့တိုက်ခိုက်မှုကို တိုက်ရိုက်တိုးမြှင့်ပေးသော [စူပါလူသား] နှင့် [အထွတ်အထိပ် အင်အား] ကျွမ်းကျင်မှုများသာ ရှိပြီး သူတို့သည် လုံးဝကွဲပြားခြားနားသော တိုက်ခိုက်မှုအင်အားကို ဆောင်ကြဉ်းပေးထားပြီးဖြစ်သည်။ ထို့ကြောင့် လူတစ်ဦး၏အင်အားကို တိုက်ရိုက်တိုးမြှင့်ပေးသော [သူရဲကောင်း လက်ကောက်ဝတ်များ] ကျွမ်းကျင်မှုသည် ရှားပါးသည်။

ဟန်ရှောင်းသည် သူ၏ပင်ကိုယ်အရည်အသွေးများကို ကျေနပ်စွာကြည့်ရှုပြီး ဘောင်ကွက်ကို ပိတ်လိုက်ကာ လက်ရှိအခြေအနေကို စဉ်းစားရန် ခေါင်းစောင်းလိုက်သည်။

အခုက ဗားရှင်းရဲ့ အလယ်ပိုင်းအဆင့်ပဲ။ ပြင်ပပတ်ဝန်းကျင်ကို ငြိမ်းချမ်းတယ်လို့ ယူဆလို့ရပြီး လူမှုအဖွဲ့အစည်းကြီးသုံးခုက အချင်းချင်း ပဋိပက္ခတွေကို ငြိမ်းသတ်ဖို့ အချိန်လိုတယ်။ ငါ့နေရာကိုလည်း ငါထူထောင်ပြီးပြီ၊ ပြီးတော့ ဒီအချိန်အတွင်းမှာ ကြီးမားတဲ့ အဖြစ်အပျက်တွေ မရှိသင့်ဘူး... ဗားရှင်းမကုန်ခင်အထိ ငါ့ရဲ့တည်ငြိမ်တဲ့ ဖွံ့ဖြိုးတိုးတက်မှုကို အာရုံစိုက်နိုင်တယ်။

လွန်ခဲ့သောနှစ်တွင် ဟန်ရှောင်းသည် အဖွဲ့အစည်း၏အင်အားကို လျင်မြန်စွာ မြှင့်တင်ခဲ့သည်။ ယခုအချိန်သည် ကြက်သွေးရောင်အင်ပါယာက သူ့အပေါ် ပိုမိုအာရုံစိုက်လာမှု၊ သူ့တွင်ရှိသော ဟန့်တားနိုင်စွမ်းအင်အားနှင့် ဆင့်ကဲဖြစ်စဉ် တိုတမ်များမှ အမြတ်အစွန်းများကဲ့သို့သော သူရရှိထားသည့် အောင်မြင်မှုအမျိုးမျိုးကို ဖြည်းညှင်းစွာ ချေဖျက်ရမည့်အချိန်ဖြစ်သည်။

‘တပ်ဖွဲ့က သိုသိုသိပ်သိပ်နေပြီး ငါတို့ရဲ့အောင်ပွဲရလဒ်တွေကို ချေဖျက်ရမယ်၊ ဖွံ့ဖြိုးတိုးတက်ဖို့ နောက်ထပ်အခွင့်အရေးကို စောင့်ရင်း ငါတို့ရဲ့စီးပွားရေးလုပ်ငန်းတွေကို စုစည်းရမယ်။’

သူ့အစီအစဉ်တွင် နောက်ထပ်အခွင့်အရေးသည် ကြယ်ရောင်တောက်ပကမ္ဘာ ဖွံ့ဖြိုးတိုးတက်မှု ပထမအဆင့်၏ အဆုံးသတ်ဖြစ်လိမ့်မည်။ ကြက်သွေးရောင်အင်ပါယာသည် သူ့အား အတွင်းပိုင်းနယ်မြေ အစိတ်အပိုင်းတစ်ခုကို ခွင့်ပြုထားပြီး ၎င်းသည် သူ၏ယန္တရားလူမှုအဖွဲ့အစည်းနှင့် အနက်ရောင်ဝိညာဉ်မျိုးနွယ်စုကို အားကြိုးမာန်တက် ဖွံ့ဖြိုးတိုးတက်စေမည့်အချိန် ဖြစ်လိမ့်မည်။

တစ်ချိန်တည်းမှာပင် ၎င်းသည် ဗားရှင်း ၄.၀ အတွက် အသာစီးရယူရန် အခွင့်အရေးလည်း ဖြစ်သည်။ ၎င်းသည် ကမ္ဘာလုံးဆိုင်ရာဆာဗာ ဖွင့်လှစ်မည့်အချိန်ဖြစ်ပြီး အဓိကကြယ်နယ်မြေများမှ ကစားသမားများ စုဝေးကာ ဂိုဏ်းစစ်ပွဲကို စတင်ကြလိမ့်မည်။ ၎င်းသည် စကြဝဠာကင်ဆာဖြစ်သော စတုတ္ထကပ်ဘေး မွေးဖွားလာမည့်အချိန်လည်း ဖြစ်သည်။

နောက်ဗားရှင်းတွင် ကစားသမားများ ပြဿနာရှာကြမည်မှာ ရှောင်လွှဲမရနိုင်ပေ။ ထို့ကြောင့် ကမ္ဘာလုံးဆိုင်ရာ ဆာဗာဧရိယာအတွင်း နေရာတစ်ခုရရှိရန်မှာ သူနှင့် ဘလက်စတားစစ်တပ်ရှိ ကစားသမားများအတွက် ကြီးမားသော အားသာချက်တစ်ခု ဖြစ်လိမ့်မည်။ ထိုအချိန်တွင် ကွဲအက်ကြယ်စင်ကွင်းရှိ အကြီးဆုံး ကစားသမားဂိုဏ်းအနေဖြင့် ဘလက်စတားစစ်တပ်သည် ကစားသမားများကြား တိုက်ပွဲတွင် ပါဝင်ပတ်သက်ခြင်းမှ ရှောင်လွှဲနိုင်မည်မဟုတ်ပေ။ အားသာချက်များနှင့် အားနည်းချက်များ ရှိသော်လည်း မုန်တိုင်းကို ရှောင်လွှဲရန် နည်းလမ်းမရှိပေ။

ကွဲအက်ကြယ်စင်ကွင်းရှိ ကစားသမားများသည် ဗားရှင်း ၃.၀ တွင် အရာများစွာကို ကြုံတွေ့ခဲ့ရသည်။ အစောပိုင်း လျှို့ဝှက်စစ်ပွဲမှသည် သူတို့၏စစ်တပ်ကွပ်ကဲရေးမှူး အဆင့် အေ အထက်ဆင့်သို့ ရောက်ရှိခြင်း၊ ကြက်သွေးရောင်အင်ပါယာနှင့် မဟာမိတ်ဖွဲ့ခြင်း၊ နှင့် ကြယ်ရောင်တောက်ပကမ္ဘာတွင် စူးစမ်းရှာဖွေခြင်းနှင့် မီးပြတိုက်ဂြိုဟ် တိုက်ပွဲတို့အထိ ဖြစ်သည်။ မပြီးဆုံးသေးသော ဂူလာလ် လူမှုအဖွဲ့အစည်း ပြည်တွင်းပဋိပက္ခလည်း ရှိသေးသည်။

ကျန်ရှိသောအချိန်တွင် ကွဲအက်ကြယ်စင်ကွင်း၌ ကြီးမားသော အဖြစ်အပျက်များ ဖြစ်ပျက်လာမည်မဟုတ်ဟု ဟန်ရှောင်း ခန့်မှန်းထားသဖြင့် သူသည် ဤအချိန်ကို အနားယူရန် အသုံးပြုနိုင်သည်။

အာကိန်းဘုရားကျောင်း၊ ထို့နောက် အက်စ်ဂေါ့ဒ်တို့ကို တိုက်ခိုက်ခြင်းက သူ့ကို မောပန်းစေခဲ့သည်။ ဤကာလကို ကစားသမားများ၏ အတွေ့အကြုံကို စုပ်ယူရန်နှင့် သူ၏ယန္တရားတပ်မတော်ကို ပြန်လည်တည်ဆောက်ရန် အသုံးပြုခြင်းက သူ့အတွက် ကောင်းမွန်လိမ့်မည်။

သူ အဆင့် အေ အထက်ဆင့် ယန္တရားပညာရှင် ဖြစ်လာသည်မှာ နှစ်နှစ်မပြည့်သေးဘဲ သူ၏ယန္တရားတပ်မတော်သည် မန်နီဆန်၏ အဆင့်သို့ မရောက်ရှိသေးပေ။ မန်နီဆန်ကို မဆိုထားနှင့်၊ အခြားသော ဝါရင့် အဆင့် အေ အထက်ဆင့် ယန္တရားပညာရှင်များနှင့် နှိုင်းယှဉ်လျှင် သူ၏တပ်မတော်သည် သေးငယ်နေသေးသည်။

ငါ မထင်မရှား နေပြီး ပြဿနာလိုက်မရှာတော့ဘူး။

...

ဟန်ရှောင်း၏ မဟာဗျူဟာမြောက် ဦးဆောင်မှုအောက်တွင် ဘလက်စတားစစ်တပ်သည် ၎င်း၏ဖွံ့ဖြိုးတိုးတက်မှုကို ယာယီနှေးကွေးစေပြီး မိမိကိုယ်ကို တည်ငြိမ်စေရန် အတွင်းဘက်သို့ လှည့်ကာ ၎င်း၏လက်ရှိအတိုင်းအတာနှင့် စီးပွားရေးလုပ်ငန်းများကို စုစည်းနေသည်။

ဆင့်ကဲဖြစ်စဉ် တိုတမ်၏ အရောင်းအဝယ်သည် စကြဝဠာထဲတွင် လှိုင်းဂယက်များ ဖြစ်ပေါ်စေခဲ့ပြီး လူမှုအဖွဲ့အစည်းများစွာသည် ဆင့်ကဲဖြစ်စဉ် တိုတမ်ကို ဝယ်ယူခွင့်ရရှိရန်အတွက် နည်းလမ်းအမျိုးမျိုးဖြင့် ကြက်သွေးရောင်အင်ပါယာနှင့် ပူးပေါင်းဆောင်ရွက်မှု ဆက်ဆံရေးရရှိရန် ဆုံးဖြတ်ခဲ့ကြသည်။

ကြက်သွေးရောင်အင်ပါယာသည် မကြုံစဖူး နိုင်ငံရေးသြဇာအာဏာကို ရရှိခဲ့ပြီး ဟန်ရှောင်းသည် လူမှုအဖွဲ့အစည်းအသီးသီးမှ ဖောက်သည်အများအပြားကို ရရှိခဲ့သည်။ ၎င်းသည် ရန်ပုံငွေများ ပေါများလာစေပြီး နှစ်ဖက်စလုံးအတွက် အကျိုးရှိသော အခြေအနေကို ရရှိစေ၏။

ဤကဲ့သို့သော လက်ဝါးကြီးအုပ်မှုသည် ငွေကြေးအုပ်စုများအကြား မနာလိုမှုနှင့် မကျေနပ်မှုများကို ဖြစ်ပေါ်စေခဲ့သော်လည်း သနားစရာကောင်းသည်။ ကြက်သွေးရောင်အင်ပါယာကို ကျောထောက်နောက်ခံအဖြစ် ရထားပြီး ဘလက်စတားစစ်တပ်၏ ကွဲအက်ကြယ်စင်ကွင်းရှိ ဒေသခံအာဏာရှင်အဖြစ် ရပ်တည်မှုကြောင့် မည်သူမျှ သူတို့ကို မစရဲကြပေ။

အခြားတစ်ဖက်တွင် သူတို့၏ယခင်က ပြဿနာများကြောင့် လူမှုအဖွဲ့အစည်းကြီးသုံးခုသည် အချင်းချင်း ပွတ်တိုက်မှုများကို လျှော့ချရန် သတိရှိရှိ ရွေးချယ်ခဲ့ကြသည်။ ထို့ကြောင့် အာကိန်းဘုရားကျောင်းနှင့် အလင်း ဖက်ဒရေးရှင်းတို့သည် ဆင့်ကဲဖြစ်စဉ် တိုတမ်၏ အကျိုးသက်ရောက်မှုများကို စောင့်ကြည့်ရန် ရွေးချယ်ခဲ့ကြသည်။

သူတို့၏ ငြိမ်းချမ်းသော လုပ်ရပ်များကြောင့် ဂလက်ဆီပတ်ဝန်းကျင်သည် ပြန်လည်တည်ငြိမ်လာသည်။ ကြက်သွေးရောင်ဒီရေ၏ ဆယ်နှစ်ကျော်ကြာ သက်ရောက်မှုသည်လည်း တဖြည်းဖြည်း မှေးမှိန်သွား၏။

ဖောလန်းအာ့ခ်၏ ခွဲထွက်မှုသည်လည်း တဖြည်းဖြည်း တည်ငြိမ်သွားသည်။ ရာဇဝတ်ကောင်အချို့ကို လူမှုအဖွဲ့အစည်းကြီးသုံးခုက ဖမ်းဆီးခဲ့ပြီး အချို့မှာ အခြားကြယ်နယ်မြေများရှိ အခြားရာဇဝတ်ဂိုဏ်းများနှင့် ပူးပေါင်းသွားကြကာ အချို့မှာ ကြေးစားစစ်သားများ ဖြစ်လာကြသည်။

ကျန်ရှိသူများကို အခြားလူများက ပြန်လည်ပေါင်းစည်းခဲ့ပြီး ဖောလန်းအာ့ခ်အဖြစ် ဆက်လက် လှုပ်ရှားသည်။ သူတို့၏ခေါင်းဆောင်မှာ တစ်ချိန်က အက်စ်ဂေါ့ဒ်လက်အောက်ရှိ ဒုတိယခေါင်းဆောင် ဖာကီဆန် ဖြစ်ပုံရ၏။ ဖောလန်းအာ့ခ် အသစ်သည် အရွယ်အစား သိသိသာသာ ကျုံ့သွားပြီး မထင်မရှား ပြုမူကာ ငြိမ်သက်နေသော အခြေအနေသို့ ရောက်ရှိသွားသည်။

ဘလက်စတားစစ်တပ်ရှိ ကစားသမားများအတွက်မူ သူတို့သည် ကြယ်ရောင်တောက်ပကမ္ဘာ စူးစမ်းရှာဖွေခြင်းနှင့် ဂူလာလ် လူမှုအဖွဲ့အစည်း စစ်ပွဲဟူသော အဖြစ်အပျက်နှစ်ခုကို အာရုံစိုက်နေကြသည်။ သူတို့သည် ရှေ့ဆောင်ပါတီအား ရှေးဟောင်းဧကရာဇ်ပါတီကို မောင်းထုတ်ပြီး မြေများကို တစ်ဆင့်ပြီးတစ်ဆင့် ပိုမိုသိမ်းပိုက်ရန် ကူညီပေးသည်။ စစ်ပွဲအပေါ် သူတို့၏လွှမ်းမိုးမှုသည် ပိုမိုကြီးမားလာပြီး သူတို့သည် စစ်ပွဲကို ဘယ်တော့မှ မငြီးငွေ့ကြပေ။

ဤငြိမ်းချမ်းသော ပတ်ဝန်းကျင်အောက်တွင် တစ်နှစ်ကျော် အသံတိတ် ကုန်လွန်သွားသည်။

ဗားရှင်း ၃.၀ သည် နောက်ဆုံးအဆင့်သို့ ဝင်ရောက်လာပြီဖြစ်သည်။

စာစဉ် (၅၄)၊ အခန်း (၉၀၉) ပြီးပါပြီ။

လင်းဆက်

+++++

အခန်း (၉၁၀) အန္တိမ ယန္တရား အင်ဂျင်နီယာ

စစ်သင်္ဘော၏သတ္တုနံရံသည် အပေါက်များနှင့် အစင်းကြောင်းများဖြင့် ပြည့်နှက်နေပြီး ၎င်း၏ထွက်ပေါ်နေသော စွမ်းအင်လိုင်းများသည် ဆိုးရွားစွာပျက်စီးနေကာ မီးပွားများ အဆက်မပြတ် ပက်ဖျန်းနေသည်။ အတွင်းပိုင်းသည် ပြင်းထန်သောတိုက်ပွဲတစ်ခု ကြုံတွေ့ခဲ့ရသကဲ့သို့ ဖြစ်နေပြီး မီးတောက်များ တဟုန်းဟုန်းတောက်လောင်နေကာ ကြမ်းပြင်ပေါ်တွင် အမှုထမ်းများ၏ ကိုယ်လက်အင်္ဂါအစိတ်အပိုင်းများ ပြန့်ကျဲနေသည်။

ကိုယ်ထည်ပြည့် သံချပ်ကာဝတ်ဆင်ထားသော စစ်သည်တစ်စုသည် စွမ်းအင်သေနတ်များကို သယ်ဆောင်လျက် အလောင်းများကို လိုက်လံစစ်ဆေးနေပြီး အသက်ရှင်ကျန်ရစ်သူ တွေ့ရှိတိုင်း ပစ်သတ်ကြသည်။

အသတ်ခံရသော အမှုထမ်းများအားလုံးသည် ကျောက်သား နတ်သူငယ်မျိုးနွယ်များ ဖြစ်ကြပြီး ကြမ်းတမ်းသော အညိုရောင်အသားအရေရှိကာ ပျမ်းမျှအရပ် သုံးမီတာခန့်ရှိပြီး အမွှေးအမျှင်များဖြင့် ဖုံးလွှမ်းနေသော ရှေးဟောင်းမျိုးနွယ်စုတစ်ခု ဖြစ်သည်။ သူတို့သည် အသားနှင့်သွေးဖြင့် ဖွဲ့စည်းထားသော်လည်း သဘာဝအတိုင်း ကျောက်ခဲကဲ့သို့ မာကျောသောအရေပြားရှိပြီး ရှားပါးသတ္တုရိုင်းများကို ဖော်ထုတ်ရာတွင် ကျွမ်းကျင်ကြသည်။ သူတို့၏သတ္တုအရင်းအမြစ်များဖြင့် သူတို့သည် ကြယ်ဝိညာဉ်ပင်လယ်တွင် အတော်လေး အစွမ်းထက်သော ကြယ်စနစ်အဆင့် လူမှုအဖွဲ့အစည်းတစ်ခု ဖြစ်သည်။

အမှုထမ်းအားလုံး၏ ယူနီဖောင်းများတွင် သူတို့၏လူမှုအဖွဲ့အစည်းအမှတ်အသား ပါရှိပြီး ဤသည်မှာ သူတို့၏တရားဝင် လူမှုအဖွဲ့အစည်းပိုင် ပုံမှန်ယူနစ်တစ်ခုဖြစ်ကြောင်း သက်သေပြနေသည်။ သို့သော် တိုက်ခိုက်ခံခဲ့ရပြီး အမှုထမ်းတစ်ဖွဲ့လုံး သုတ်သင်ခံလိုက်ရသည်။

ဤစစ်သင်္ဘော၏အဆုံးတွင် ကြီးမားသောသတ္တုဂိုဒေါင်တံခါးကြီးတစ်ချပ် ရှိပြီး ဤအခိုက်အတန့်တွင် တိုက်ခိုက်သူများ၏ခေါင်းဆောင်သည် ပိတ်ထားသော ဂိုဒေါင်တံခါးရှေ့တွင်ရပ်ကာ စကားဝှက်ကိုဖြေရှင်းရန် အထူးပြုကိရိယာတစ်ခု ထုတ်ယူလိုက်သည်။ ဓါတ်ပြားပုံသဏ္ဍာန်ကိရိယာကို တံခါး၏လည်ပတ်မှုဘောင်ကွက်ပေါ်တွင် ဖိလိုက်ပြီး ကြိမ်နှုန်းမြင့် ဘီပီအသံ ထွက်ပေါ်လာသည်။

ဘဇ်

နောက်တစ်ခဏတွင် တံခါးသည် ကျယ်လောင်စွာမြည်လာပြီး သော့ခလောက်များ ပွင့်သွားကာ ဖြည်းညှင်းစွာ ပွင့်လာသည်။

ခေါင်းဆောင်သည် ခြေလှမ်းကျဲကြီးဖြင့် ဝင်သွားပြီး ဂိုဒေါင်ထဲတွင် သေသပ်စွာစီထားသော ဆင့်ကဲဖြစ်စဉ်တိုတမ် ရာပေါင်းများစွာကို တွေ့လိုက်ရသည်။

“ငါတို့ပစ္စည်း ရပြီ။ ရှင်းလင်းပြီး ပြန်သယ်သွားကြ။”

လူများသည် ကျေနပ်စွာခေါင်းညိတ်လိုက်ပြီး သူတို့၏လက်အောက်ငယ်သားများကို ခေါ်ဆောင်ရန် လက်ဝှေ့ယမ်းလိုက်ကြသည်။

ကျောက်သား နတ်သူငယ်များသည် ဘလက်စတားစစ်တပ်ထံမှ ဆင့်ကဲဖြစ်စဉ်တိုတမ် တစ်သုတ် ဝယ်ယူခဲ့ကြပြီး ဤသတင်း ပေါက်ကြားသွားသောအခါ သူတို့၏ တိုက်ခိုက်သူများသည် ဤဆင့်ကဲဖြစ်စဉ်တိုတမ်များကို လုယူရန် ရည်ရွယ်ချက်ဖြင့် ခြုံခိုတိုက်ခိုက်ခဲ့ကြသည်။

ကြယ်စနစ်အဆင့် လူမှုအဖွဲ့အစည်းတစ်ခု၏ အစောင့်များကို ဤမျှလွယ်ကူစွာ ရှင်းလင်းနိုင်ရန်... ၎င်းသည် သာမန်ဓားပြအဖွဲ့ငယ်တစ်ခု မဟုတ်သည်မှာ ထင်ရှားသည်။

ဤတိုက်ခိုက်သူများသည်လည်း ကြယ်တာရာကြေးစားစစ်သားများ ဖြစ်ကြသော်လည်း သူတို့၏သဘာဝသည် ကွဲပြားသည်။ ကြေးစားစစ်သားများကို အမျိုးအစားသုံးမျိုး ခွဲခြားထားသည် - ဘလက်စတားစစ်တပ်ကဲ့သို့ ကြေးစားစစ်သားမဟာမိတ်အဖွဲ့အောက်တွင် မှတ်ပုံတင်ထားသော ပုံမှန်ကြေးစားစစ်သားများ၊ မှတ်ပုံတင်မထားသော လွတ်လပ်သောကြေးစားစစ်သားများနှင့် နောက်ဆုံးအုပ်စုမှာ ဂလက်ဆီမှောင်ခိုဈေးကွက်ကို ထောက်ပံ့ပေးရန် အလုပ်လုပ်သော မှောင်ခိုဈေးကွက် ကြေးစားစစ်သားများ ဖြစ်သည်။

‘အမည်းရောင်အလုပ်များ’ သည် ကြယ်တာရာဥပဒေကို ချိုးဖောက်သော ရာဇဝတ်မှုဆိုင်ရာ အလုပ်များကို ရည်ညွှန်းပြီး သူတို့ကို ပုံမှန်အားဖြင့် မှောင်ခိုဈေးကွက်တွင်သာ တင်လေ့ရှိသည်။ သူတို့တွင် လုယက်ခြင်း၊ ပြန်ပေးဆွဲခြင်းနှင့် အရာရှိများကို လုပ်ကြံသတ်ဖြတ်ခြင်းတို့ ပါဝင်သည်။ မှောင်ခိုဈေးကွက် ကြေးစားစစ်သားများသည် များသောအားဖြင့် ရာဇဝတ်ကောင်များ ဖြစ်ကြသည်... တကယ်တမ်းတွင် ဤနယ်ပယ်ရှိ လူအများစုသည် မူလက အလိုရှိရာဇဝတ်ကောင်များ ဖြစ်ကြသည်။

ဤတိုက်ခိုက်သူအုပ်စုသည် မှောင်ခိုဈေးကွက်ရှိ ထိပ်တန်းအဖွဲ့အစည်းများထဲမှ တစ်ခုဖြစ်သော သွေးရွှေအဖွဲ့အစည်းပိုင် မှောင်ခိုဈေးကွက် ကြေးစားစစ်သား အုပ်စုဝင်များ ဖြစ်ကြသည်။

သွေးရွှေအဖွဲ့အစည်းသည် ကြယ်ဝိညာဉ်ပင်လယ်၊ ရှေးဟောင်းကြယ်သဲကန္တာရနှင့် ရှေးဦးကြယ်မြစ်တဝိုက်တွင် လှုပ်ရှားသော မှောင်ခိုဈေးကွက် ကြေးစားစစ်သားအုပ်စုဖြစ်ပြီး ၎င်း၏အဖွဲ့ဝင်များ၊ အာကာသယာဉ်များနှင့် အခြေစိုက်စခန်းများ၏ တည်နေရာများကို လျှို့ဝှက်ထားသည်။ သူတို့၏လှုပ်ရှားမှုပုံစံသည်လည်း မထင်မရှားဖြစ်သောကြောင့် သူတို့၏အတိအကျအရွယ်အစားမှာ လျှို့ဝှက်ချက်ဖြစ်နေသော်လည်း ကွဲပြားသောကြယ်နယ်မြေသုံးခုတွင် စီးပွားရေးလုပ်နိုင်ခြင်းက ဘီလူးကြီးတစ်ကောင်ဖြစ်ကြောင်း ထင်ရှားသည်။

တစ်ချိန်တည်းမှာပင် သွေးရွှေအဖွဲ့အစည်းသည် မှောင်ခိုဈေးကွက်ရှိ အထက်တန်းအလွှာများထဲမှ တစ်ခုလည်း ဖြစ်သည်။

ကုန်သွယ်မှုအတွက် ထိန်းချုပ်မှုများရှိသည့် နေရာတိုင်းတွင် မှောင်ခိုဈေးကွက်များ တည်ရှိနေမည်ဖြစ်ပြီး သူတို့သည် ဆက်လက်ပေါက်ဖွားလာကာ နောက်ဆုံးတွင် ကြီးမားသောကွင်းဆက်တစ်ခု ဖြစ်လာလိမ့်မည်။

မှောင်ခိုဈေးကွက်အတွင်းတွင်လည်း ကွဲပြားသောအဆင့်များ ရှိပြီး လူတစ်ဦး၏ဒေသနှင့် စီးပွားရေးနယ်ပယ်အလိုက် ခွဲခြားထားသည်။ ဂြိုဟ်အဆင့်မှ ကြယ်စနစ်များ၊ ကြယ်နယ်မြေများအထိ နယ်ပယ်ဖြည်းဖြည်းချင်း ကျယ်ပြန့်လာကာ အခြားမှောင်ခိုဈေးကွက်အားလုံးကို လက်တွေ့ကျကျ လွှမ်းမိုးထားသည့် အမြင့်ဆုံးအဆင့်ဖြစ်သော ဂလက်ဆီမှောင်ခိုဈေးကွက် အထိ ဖြစ်သည်။

ပြီးတော့ အမြင့်ဆုံးအဆင့်ရှိ ဤမှောင်ခိုဈေးကွက်သည် ဓနဥစ္စာရှာဖွေနည်းကို သိသည်၊ သို့မဟုတ်ပါက သူတို့ကိုယ်သူတို့ ‘ဂလက်ဆီမှောင်ခိုဈေးကွက်’ ဟူသော အမည်ပေးကြမည်မဟုတ်ပေ။ ဤသို့မလုပ်သူများသည် ၎င်းကို အမှန်တကယ်အဖွဲ့အစည်းမဟုတ်ဘဲ ဝေါဟာရတစ်ခုဟုသာ ထင်မြင်နေကြဦးမည် ဖြစ်သည်။

အမှန်စင်စစ် လွတ်လပ်သော မှောင်ခိုဈေးကွက်အားလုံးသည် ဂလက်ဆီမှောင်ခိုဈေးကွက်၏ အမိန့်အောက်တွင် လိုက်နာကြသည်မဟုတ်ပေ၊ လူရမ်းကားအချို့သည် သူတို့၏မြေအောက်လောကခေါင်းဆောင် ဘယ်သူလဲဆိုတာ မသိကြသကဲ့သို့ပင်။

ဂလက်ဆီမှောင်ခိုဈေးကွက်သည် အလွန်ကြီးမားပြီး ၎င်း၏စီးပွားရေးသည် စကြဝဠာတစ်ခုလုံးကို လွှမ်းခြုံထားသည်။ ကန့်သတ်ထားသော နည်းပညာအချို့ကို ရယူလိုသော လူမှုအဖွဲ့အစည်းအချို့ အမြဲရှိနေပြီး မှောင်ခိုဈေးကွက်သို့ လှည့်လာကြသည်။ ထို့ကြောင့် လူတိုင်းသည် ၎င်း၏လုပ်ရပ်များကို မျက်ကွယ်ပြုထားကြပြီး ၎င်းအတွက် အကာအကွယ်တစ်ခုအဖြစ် ဆောင်ရွက်ပေးသည်။ ဂလက်ဆီမှောင်ခိုဈေးကွက်သည် ကြီးမားသော မြေအောက်လူ့အဖွဲ့အစည်းတစ်ခုအတွက် ဆက်သွယ်ရေးပလက်ဖောင်းတစ်ခုအဖြစ်လည်း ဆောင်ရွက်ပေးသည်။

သို့သော် ရာဇဝတ်ကောင်အားလုံးသည် မကောင်းဆိုးဝါးဖြစ်ရန်အတွက် တည်ရှိနေကြသည်မဟုတ်ပေ။ အများအပြားသည် အကျိုးခံစားခွင့်များအတွက်သာ ပါဝင်နေကြခြင်းဖြစ်သဖြင့် သူတို့သည်လည်း စနစ်တကျရှိမှုနှင့် ယုံကြည်စိတ်ချရမှု လိုအပ်ပြီး သူတို့အတွက် စည်းမျဉ်းများ ရေးဆွဲပေးမည့်သူ လိုအပ်သည်။ ထို့ကြောင့် ကြေးစားစစ်သားများ၊ ထောက်လှမ်းရေးအဖွဲ့အစည်းများ၊ မှောင်ခိုကုန်သွယ်မှုများ၊ တားမြစ်ကုန်ပစ္စည်းထုတ်လုပ်မှုနှင့် အခြားမီးခိုးရောင်လုပ်ငန်းများမှ ကိုယ်စားလှယ်များ ပါဝင်သော ဂလက်ဆီမှောင်ခိုဈေးကွက်၏ အုပ်ချုပ်သူများ ပေါ်ပေါက်လာသည်။

သွေးရွှေအဖွဲ့အစည်းသည် မှောင်ခိုဈေးကွက်၏ အုပ်ချုပ်သူများထဲမှ တစ်ခုဖြစ်ပြီး သူတို့သည် မြေအောက်လောက၏ အာဏာရှင်များထဲမှ တစ်ဦးနှင့် ညီမျှသည်။

ဖောလန်းအာ့ခ်သည် မှောင်ခိုဈေးကွက်၏ အုပ်ချုပ်သူမဟုတ်ပေ၊ အဘယ်ကြောင့်ဆိုသော် အုပ်ချုပ်သူများသည် ပုံမှန်အားဖြင့် တရားဥပဒေနှင့်အညီ ဆိုးသွမ်းသောဘက်တွင် ရှိနေကြသည်။ သူတို့သည် ဖရိုဖရဲ ဆိုးသွမ်းသောဖြစ်သူ အက်စ်ဂေါ့ဒ်ကိုလည်း မကြိုက်ကြပေ။ နှစ်ဖက်စလုံးသည် ရာဇဝတ်အင်အားစုများ ဖြစ်ကြသော်လည်း သူတို့သည် ဘက်တူတွင်မရှိကြပေ။ ဖောလန်းအာ့ခ် ပြိုကွဲပြီးနောက် သွေးရွှေအဖွဲ့အစည်းသည် ရာဇဝတ်ကောင်အများအပြားကို လက်ခံခဲ့ပြီး သူတို့ပြန်လည်အလုပ်အကိုင်ရရှိရန် ကူညီပေးခဲ့သည်။

အရာရှိတစ်ဦးသည် ခေါင်းဆောင်၏ဘေးသို့ ရောက်လာပြီး သူ့လက်အောက်ငယ်သားများ ဆင့်ကဲဖြစ်စဉ်တိုတမ်များကို သယ်ဆောင်သွားသည်ကို ကြည့်ရင်း မဲ့ပြုံးမပြုံးဘဲ မနေနိုင်တော့ပေ။

“မှောင်ခိုဈေးကွက်မှာ ဆင့်ကဲဖြစ်စဉ်တိုတမ်ဈေးက အခု အရမ်းမြင့်နေပြီ။ ကျွန်တော်သိသလောက်တော့ တိတ်တဆိတ် ဝယ်ယူနေကြတဲ့ လူမှုအဖွဲ့အစည်းတွေ အများကြီးပဲ။ ဒီတစ်သုတ်ကို ကျွန်တော်တို့ မျိုလိုက်ရင် ဘယ်လောက်ရနိုင်မလဲ။”

“စဉ်းစားတောင် မစဉ်းစားနဲ့။ ဒါက ငါတို့အလုပ်ရှင် လိုချင်တဲ့အရာပဲ၊ ပြီးတော့ ငါတို့အလုပ်က ပို့ပေးဖို့ပဲ။ ပစ္စည်းတွေကို မျိုဖို့စဉ်းစားနေတာ၊ မင်း အသက်ရှည်လွန်းနေပြီလို့ ထင်နေတာလား။” ခေါင်းဆောင်က ခေါင်းခါလိုက်သည်။

တစ်နှစ်ခွဲကြာ ရောင်းချပြီးနောက် ဆင့်ကဲဖြစ်စဉ်တိုတမ် စီးပွားရေးသည် အခြေခံအားဖြင့် တည်ငြိမ်သွားပြီဖြစ်သည်။ အလင်း ဖက်ဒရေးရှင်းနှင့် အာကိန်းဘုရားကျောင်းတို့ကို အားကိုးသော လူမှုအဖွဲ့အစည်းအချို့သည် ကြက်သွေးရောင်အင်ပါယာနှင့် ဆက်ဆံရေးမရှိနိုင်သဖြင့် ယခုမှသာ စတင်လှုပ်ရှားနိုင်ကြသည်။

လွန်ခဲ့သော တစ်နှစ်ခွဲက ဘလက်စတား၏ တိုက်ပွဲမှတ်တမ်းများကို မည်သူမျှ မမေ့ကြသေးသဖြင့် ဘလက်စတားစစ်တပ်၏ အာကာသယာဉ်များမှ ခိုးယူရန် အခက်အခဲမှာ အလွန်မြင့်မားသည်။ ထို့ကြောင့် သူတို့သည် ဆင့်ကဲဖြစ်စဉ်တိုတမ်များကို ဝယ်ယူသော လူမှုအဖွဲ့အစည်းများကို အာရုံစိုက်ကာ ဆင့်ကဲဖြစ်စဉ်တိုတမ်များကို သယ်ယူပို့ဆောင်သော အခြားအဖွဲ့အစည်းများကို ပစ်မှတ်ထားကြသည်။

ဤသည်မှာ ဂလက်ဆီဥပဒေများကို ချိုးဖောက်သောကြောင့် သွေးရွှေအဖွဲ့အစည်းမှ ကိုယ်စားပြုသော မှောင်ခိုဈေးကွက် ကြေးစားစစ်သားများသည် ယခု အသုံးဝင်လာသည်။ ဆင့်ကဲဖြစ်စဉ်တိုတမ်သည် မှောင်ခိုဈေးကွက်တွင် တန်ဖိုးဖြတ်မရလောက်အောင် ဖြစ်နေပြီး အမြဲတမ်း ပြတ်လပ်နေသည်။

ကျောက်သား နတ်သူငယ်များထံမှ ဆင့်ကဲဖြစ်စဉ်တိုတမ်များကို ခိုးယူပြီးနောက် သူတို့မထွက်ခွာမီ အာကာသယာဉ်ကို လုံးဝဖျက်ဆီးပစ်လိုက်သည်။

လွန်ခဲ့သည့် လအနည်းငယ်အတွင်း စကြဝဠာ၏ ထောင့်အမျိုးမျိုးတွင် ထိုကဲ့သို့သော မြင်ကွင်းများ အကြိမ်ကြိမ် ဖြစ်ပွားခဲ့သည်။

...

“နောက်ထပ် ဝယ်သူတစ်ယောက် လမ်းမှာ အလုခံလိုက်ရပြန်ပြီလား။”

ဘလက်စတားစစ်တပ် ဌာနချုပ်ရှိ သူ၏ရုံးခန်းအတွင်းတွင် ဟန်ရှောင်းသည် ကစားသမားဖိုရမ်များကို ပိတ်လိုက်ပြီး ဆေးလ်ဗီးယား၏ ခရီးဝေးပရိုဂျက်ရှင်ကို ကြည့်ရင်း မျက်မှောင်ကြုတ်လိုက်သည်။

“ဟုတ်ကဲ့၊ ကျောက်သား နတ်သူငယ်တွေကို ထည့်တွက်ရင် အလုခံရတဲ့ ကြယ်စနစ် လူမှုအဖွဲ့အစည်း ၁၃ ခု ရှိသွားပြီ။ ဆင့်ကဲဖြစ်စဉ်တိုတမ် ထောင်ပေါင်းများစွာ အခု မှောင်ခိုဈေးကွက်မှာ ပေါ်လာပြီ။”

“ဒါ ဘယ်မှာ ဖြစ်တာလဲ။”

“ကြယ်ဝိညာဉ်ပင်လယ်။ ဓားပြတွေရဲ့ အထောက်အထားကို မသိရသေးဘူး၊ ကနဦးသုံးသပ်ချက်တွေအရ အရင်အနည်းငယ်နဲ့ အဖွဲ့အစည်း အတူတူပဲလို့ ညွှန်ပြနေတယ်။”

ဟန်ရှောင်းက မေးစေ့ကို ပွတ်သပ်လိုက်သည်။ “မှောင်ခိုဈေးကွက်ကို ဂရုစိုက်ပါ။ မှောင်ခိုဈေးကွက်မှာ ဆင့်ကဲဖြစ်စဉ်တိုတမ်တွေ အချိန်အတန်ကြာ မရှိရင် အဲဒါ မှောင်ခိုဈေးကွက် ကြေးစားစစ်သားတွေ ဖြစ်သင့်တယ်။ သူတို့က ပုံမှန်အားဖြင့် သူတို့အလုပ်ရှင်တွေဆီ ပစ္စည်းတွေ လွှဲပေးလေ့ရှိတယ်။”

“ဆရာ၊ ကျွန်မတို့ ဒီပြဿနာကို ဖြေရှင်းဖို့ လိုလား။”

“ဂရုစိုက်စရာ မလိုပါဘူး။ ငါက ရောင်းချပြီးဝန်ဆောင်မှုကို တာဝန်ယူထားတာ မဟုတ်ဘူး။ သူတို့ဝယ်လိုက်တာကို သူတို့ကာကွယ်နိုင်မလားဆိုတာ ငါ့ပြဿနာ မဟုတ်ဘူး... ဒါပေမဲ့ သူတို့ ငါ့ရဲ့ယန္တရားတပ်ဖွဲ့တွေကို ငှားရမ်းဖို့ ရွေးချယ်ရင်တော့ ပြဿနာတစ်မျိုး ဖြစ်သွားလိမ့်မယ်။” ဟန်ရှောင်း လက်ကာပြလိုက်သည်။ “ကျောက်သား နတ်သူငယ်မျိုးနွယ်စုက ဘာပြောလဲ။”

“ဆရာ သူတို့ကို နောက်တစ်သုတ် ပေးလိမ့်မယ်လို့ မျှော်လင့်နေကြတယ်။”

“ပေးမယ်။ မဝယ်ဘူးလား။”

“ဟုတ်ပါတယ်။ ဆင့်ကဲဖြစ်စဉ်တိုတမ်ရဲ့ အခြေခံကုန်ကျစရိတ် နည်းပါးတာကို သူတို့သိကြတယ်၊ ပြီးတော့ နောက်တစ်သုတ်ကို ဈေးကြီးပေးပြီး မဝယ်ချင်ကြဘူး၊ ဒါကြောင့် ဆရာ သူတို့ကို တစ်သုတ် ပို့ပေးနိုင်မယ်လို့ မျှော်လင့်နေကြတယ်။ ကျောက်သား နတ်သူငယ်တွေက စကားပြောရင် တဲ့တိုးဆန်တယ်ဆိုတာ ဆရာလည်း သိတာပဲ။” ဆေးလ်ဗီးယား အားကိုးရာမဲ့စွာ ပခုံးတွန့်လိုက်သည်။

“ငါ အာမခံလုပ်ငန်း လုပ်နေတာ မဟုတ်ဘူးလို့ သူတို့ကို ပြောလိုက်။ သူတို့ဝယ်ချင်ရင် နောက်တစ်သုတ် ဝယ်လို့ရတယ်။ အစားထိုးအသုတ်ဆိုတာ မရှိဘူး။ ဒါက မူဝါဒကိစ္စပဲ။”

ဟန်ရှောင်း ခေါင်းခါလိုက်သည်။ အကယ်၍ သူဤအရာကို သဘောတူလိုက်ပါက အစားထိုးရယူရန်အတွက် လူမှုအဖွဲ့အစည်းအချို့က ‘ကိုယ့်ဘာသာ လုယက်ခြင်း’ နည်းလမ်းကို ရွေးချယ်လာမလား မည်သူသိနိုင်မည်နည်း။ သူအရှုံးပေါ်စေမည့် မည်သည့်အရာကိုမျှ လုပ်မည်မဟုတ်ပေ။

ဒီလိုကိစ္စမျိုးက ခန့်မှန်းရခက်တယ်။ အင်ပါယာနဲ့ မရင်းနှီးတဲ့ အခြားလူမှုအဖွဲ့အစည်းတွေနဲ့ သီးသန့်သဘောတူညီချက် ရယူထားပြီး ဒီဆင့်ကဲဖြစ်စဉ်တိုတမ်တွေကို ဝယ်ယူဖို့ သွယ်ဝိုက်ကူညီပေးနေတဲ့ လူမှုအဖွဲ့အစည်းတွေ ရှိနိုင်တယ်။

ထို့အပြင် ဆင့်ကဲဖြစ်စဉ်တိုတမ်များ အခိုးခံရသည်ကို ဟန်ရှောင်း ဂရုမစိုက်ပေ။ အလုခံရလေလေ သူပိုရောင်းရလေလေဖြစ်ပြီး ပိုကြီးမားသောဈေးကွက်က သူ့အပေါ်ဖိအားများကို လျော့ပါးစေလိမ့်မည်။ ဘာပဲဖြစ်ဖြစ် ဒီနှုန်းနဲ့ သူငွေဆုံးရှုံးနေတာ မဟုတ်ပေ။

တစ်ခုတည်းသော ပြဿနာမှာ အင်ပါယာဖြစ်လိမ့်မည်၊ သူမဟုတ်ပေ။ ဘလက်စတားစစ်တပ်ဘက်သို့ မရောက်ရှိသရွေ့ သူတကယ် ဂရုမစိုက်ပေ။

“နားလည်ပါပြီ၊ ကျွန်မ သူတို့ကို သတင်းစကား ပြန်ပေးလိုက်ပါမယ်။” ထို့နောက် ဆေးလ်ဗီးယား ပရိုဂျက်ရှင်ကို ပိတ်လိုက်သည်။

ဟန်ရှောင်း သက်ပြင်းတစ်ချက် မှုတ်ထုတ်လိုက်ပြီး စဉ်းစားရင်း ကုလားထိုင်ပေါ် မှီချလိုက်သည်။

လွန်ခဲ့သော တစ်နှစ်ခွဲအတွင်း ဘလက်စတားစစ်တပ်သည် ဖြည်းဖြည်းချင်း တည်ငြိမ်လာပြီး သူတို့၏စီးပွားရေးလုပ်ငန်းများနှင့် လည်ပတ်မှုများကို စုစည်းခဲ့သည်။ သူတို့ ကောင်းမွန်စွာ ဖွံ့ဖြိုးတိုးတက်လာခဲ့သည်။ သူ၏လုပ်ဆောင်ပုံပုံစံသည် နောက်ဆုံးတွင် ယန္တရားပညာရှင်တစ်ဦးနှင့် တူလာသည်။ သူသည် ယန္တရားများတည်ဆောက်ရန်နှင့် သူ၏တပ်ဖွဲ့ကို ချဲ့ထွင်ရန် အိမ်တွင်နေခဲ့ပြီး သူ၏ယန္တရားတပ်မတော်သည် ကျပန်းဆုလာဘ်များအတွက် မစ်ရှင်များစုဆောင်းရန် လှည့်လည်သွားလာကာ သူ၏မစ်ရှင်ပြီးမြောက်ခြင်းကတ်ပြားများ မဲနှိုက်ရန် သူတို့ကို အသုံးပြုခဲ့သည်။

သူ၏အတွေ့အကြုံ သိုလှောင်မှုသည်လည်း တဖြည်းဖြည်း စုပုံလာပြီး သူ၏စုဆောင်းထားသော အလားအလာအမှတ်များ၏ တစ်စိတ်တစ်ပိုင်းကို သူ၏အဆုံးစွန်အသိပညာများ အဆင့်မြှင့်တင်ရန် အသုံးပြုခဲ့သည်။ ဤကာလအတွင်း သူသည် အင်ပါယာထံမှ သူ၏ပဉ္စမမြောက် အဆုံးစွန်အသိပညာဖြစ်သော [အန္တိမ ယန္တရား အင်ဂျင်နီယာ] ကို ပံ့ပိုးမှုအမှတ် ခြောက်ထောင်ဖြင့် ရရှိခဲ့သည်။

ဤအသိပညာသည် ယန္တရားထုတ်လုပ်မှုနှင့် သက်ဆိုင်ပြီး လူတစ်ဦး၏ထုတ်လုပ်မှုနည်းပညာနှင့် ထုတ်လုပ်ရေးလိုင်းစွမ်းရည်ကို များစွာတိုးတက်စေသည်။ သူသည် ဒီဇိုင်းပုံစံ အများအပြားကိုလည်း ဖွင့်လှစ်နိုင်ခဲ့ပြီး သူ့အား [အန္တိမ ထုတ်လုပ်သူ] အရည်အချင်းနှင့် [စိတ်ကူးဉာဏ် ဖန်တီးမှု] စွမ်းရည်တို့ကို ပေးစွမ်းခဲ့သည်။

[အန္တိမ ထုတ်လုပ်သူ] ၏ အကျိုးသက်ရောက်မှုသည် ရိုးရှင်းပြီး လက်တွေ့ကျကာ သူ၏ယန္တရားများ၏ အခြေခံစွမ်းဆောင်ရည်ကို ၂၅ - ၃၀% တိုးမြှင့်ပေးပြီး သူ၏ထုတ်လုပ်မှုအမြန်နှုန်းကို ၃၀၀ - ၅၀၀% တိုးမြှင့်ပေးသည်။ သိသာထင်ရှားစွာပင် ဤသည်မှာ ပေါက်ကွဲအားကောင်းသော စစ်သားအရေအတွက် ဖန်တီးရန် လိုအပ်သော အရည်အချင်းဖြစ်သည်။

[စိတ်ကူးဉာဏ် ဖန်တီးမှု] အတွက်မူ ၎င်းသည် မလှုပ်ရှားနိုင်သော စွမ်းရည်ဖြစ်သည်။ အသက်သွင်းရန် အခြေအနေမှာ [အန္တိမ ယန္တရား အင်ဂျင်နီယာ] သည် အမြင့်ဆုံးအဆင့် ငါး သို့ ရောက်ရှိရန် ဖြစ်သည်။ ၎င်း၏အကျိုးသက်ရောက်မှုမှာ ကန့်သတ်ချက်မရှိသော ဒီဇိုင်းပုံစံအရေအတွက်ကို မည်သည့်ပေါင်းစပ်မှုဖြင့်မဆို ပေါင်းစပ်ပြီး ဒီဇိုင်းပုံစံ သန့်စင်ခြင်း ပြုလုပ်ကာ အသစ်ပြုပြင်မွမ်းမံထားသော သို့မဟုတ် ပေါင်းစည်းထားသော ဒီဇိုင်းပုံစံများကို ဖန်တီးရန် ဖြစ်သည်။ တိုက်ခိုက်မှု သို့မဟုတ် ကာကွယ်ရေး ကဲ့သို့သော အချို့သောကဏ္ဍများကို အာရုံစိုက်ခြင်းကဲ့သို့ အဆင့်မြင့်ဆက်တင်များကိုလည်း ရွေးချယ်နိုင်ပြီး ၎င်းသည် ကျပန်းဒီဇိုင်းပုံစံများထက် ပိုမိုတည်ငြိမ်သည်။

ဤစွမ်းရည်ကို အဆင့်မြှင့်တင်ရန် အတွေ့အကြုံသာ လိုအပ်သည်... သမုဒ္ဒရာပမာဏရှိသော အတွေ့အကြုံအမှတ်များပင်။

သူတို့၏ ဒီဇိုင်းပုံစံများကို ကိုယ်တိုင်ပြောင်းလဲနိုင်ခြင်းမရှိသော ကစားသမားများအတွက် ဤကျွမ်းကျင်မှုသည် မှော်ပညာနှင့် တူသော်လည်း ဟန်ရှောင်းသည် သူ၏ကိုယ်ပိုင် ဒီဇိုင်းပုံစံများကို မြှင့်တင်နိုင်သဖြင့် ဤကျွမ်းကျင်မှုသည် သိပ်အသုံးမဝင်ပေ။ သို့သော် ၎င်းသည် အစားထိုး၍မရသော အခန်းကဏ္ဍရှိသဖြင့် လုံးဝတန်ဖိုးမရှိသည်တော့ မဟုတ်ပေ။

[စိတ်ကူးဉာဏ် ဖန်တီးမှု] သည် စကြဝဠာရတနာများ၏ ဒီဇိုင်းပုံစံများကို ပေါင်းစပ်ရန် အခွင့်အရေးအနည်းငယ်ရှိပြီး ယန္တရားပညာရှင်တစ်ဦး ရွှေရောင်ကိရိယာ ဖန်တီးရန် တစ်ခုတည်းသောနည်းလမ်းဖြစ်သည်။

လောလောဆယ် ဟန်ရှောင်းတွင် စကြဝဠာရတနာနှစ်ခု ပိုင်ဆိုင်ထားသော်လည်း ပိုရှိလာခြင်းကို သူကျိန်းသေ ငြီးငွေ့မည်မဟုတ်ပေ။ စကြဝဠာရတနာတစ်ခု ပေါင်းစပ်ခြင်းက ဒီဇိုင်းပုံစံများအတွက် လောင်းကစားလုပ်သကဲ့သို့ မဟုတ်သဖြင့် ထိုမျှမလွယ်ကူပေ။ ပုံသေပေါင်းစပ်မှု မရှိဘဲ လူနှစ်ဦးတူညီသော ဒီဇိုင်းပုံစံများကို ပေါင်းစပ်လျှင်ပင် ပေါင်းစပ်ထားသော နောက်ဆုံးဒီဇိုင်းပုံစံသည် ကျပန်းစနစ်ကြောင့် ကွဲပြားနေဦးမည် ဖြစ်သည်။

သူ၏ယခင်ဘဝတွင် စကြဝဠာရတနာ ဒီဇိုင်းပုံစံများကို အမှန်တကယ် ဖန်တီးခဲ့သော ကစားသမားများ ရှိသော်လည်း ပြဿနာနှစ်ခု ရှိသည်။ ပထမအချက်မှာ သူတို့သည် ပေါင်းစပ်မှုကို ထုတ်မပြောကြဘဲ ဒုတိယအချက်မှာ... ဒီဇိုင်းပုံစံတစ်ခုမှ ယန္တရားပညာရှင်များအတွက် မဟုတ်ပေ။

ကြိုတင်လိုအပ်ချက်များမှာ အလွန်တင်းကျပ်ပြီး အဆင့် အေ အထက်ဆင့်အောက်တွင် ထုတ်လုပ်ရန် ဖြစ်နိုင်ခြေ အခြေခံအားဖြင့် မရှိသဖြင့် ကစားသမားအများအပြားသည် ကြိုတင်လိုအပ်ချက်များကိုပင် မဖြည့်ဆည်းနိုင်ကြပေ။

ထို့ကြောင့် ဟန်ရှောင်းသည် [စိတ်ကူးဉာဏ် ဖန်တီးမှု] ကို သူ့စိတ်၏နောက်ဘက်တွင် ယာယီထားလိုက်သည်။ [အန္တိမ ယန္တရား အင်ဂျင်နီယာ] အတွက် အမြင့်ဆုံးအဆင့် ရောက်ရန်ပင် အလားအလာအမှတ် များလွန်းစွာ လိုအပ်ပြီး သူ့တွင် ကြီးမားသော အတွေ့အကြုံသိုလှောင်မှု ရှိသော်လည်း စကြဝဠာရတနာတစ်ခု၏ ဒီဇိုင်းပုံစံကို ပေါင်းစပ်ရန် ကြိုးစားခြင်းသည် အခြားနယ်ပယ်များတွင် အတွေ့အကြုံအမှတ်များ နည်းပါးသွားစေမည်ဖြစ်သည်၊ အထူးသဖြင့် ဗားရှင်းအဆင့်မြှင့်တင်မှု ကာလအတွင်း အရန်သင့်ချန်ထားရန် လိုအပ်သောကြောင့် ဖြစ်သည်။ ထို့ကြောင့် သူ၏အတွေ့အကြုံအမှတ်များကို ဖြုန်းတီးရန် မဝံ့ရဲပေ။

...

ဂူလာလ် ပြည်တွင်းစစ်၏ အလုံးစုံအခြေအနေသည်လည်း တည်ငြိမ်သွားပြီဖြစ်ပြီး သူတို့သည် တစ်ဆင့်ပြီးတစ်ဆင့် တိုးတက်နေကြသည်။ ရှေ့ဆောင်ပါတီသည် အောင်ပွဲ၏ အသီးအပွင့်များကို မြည်းစမ်းခါနီးဖြစ်နေသဖြင့် လုပ်ငန်းစဉ်တွင် ပြဿနာများ မရှိပေ။ သို့သော် ကစားသမားများ၏ အာရုံစိုက်မှုသည် ပရိုလိဂ်ဆီသို့ ပြောင်းရွှေ့သွားပြီ ဖြစ်သည်။

ကစားသမားအရေအတွက် တိုးလာခြင်းကြောင့် ဤဗားရှင်းပရိုလိဂ်၏ လူကြိုက်များမှုသည်လည်း မြင့်တက်လာပြီး အာရုံစိုက်မှုများစွာကို ဆွဲဆောင်နိုင်ခဲ့သည်။ ဤတစ်ကြိမ်တွင် သူတို့ကို အလားတူပင် အဓိကဒေသကြီးကိုးခုအဖြစ် ခွဲခြားထားပြီး အချိန်ဇယားကို ညှိနှိုင်းမှုများ ပြုလုပ်ထားပြီး ဖြစ်သည်။

ဥပမာအားဖြင့် ခြေစစ်ပွဲများနှင့် အရည်အချင်းစစ်ပွဲများကို စောစီးစွာ စတင်ခဲ့ပြီး အချိန်လုံလောက်စွာ ရရှိစေကာ ကစားသမားများ ပိုမိုပါဝင်နိုင်စေရန် ခွင့်ပြုခဲ့သည်။ တစ်ချိန်တည်းမှာပင် ၎င်းသည် ဝိုင်းကဒ်ခွဲတမ်းနှင့် ပရိုလိဂ် ပုံမှန်ရာသီစာရင်းကို ဆုံးဖြတ်ရန်လည်း ခွင့်ပြုခဲ့သည်။

ဟန်ရှောင်းသည် ဖိုရမ်များမှတစ်ဆင့် အရည်အချင်းစစ်ပွဲ ဗီဒီယိုကို ကြည့်ရှုပြီး ကစားသမားများ၏ ထူးဆန်းသော အမူအရာများနှင့် မိုက်မဲမှုများကို သဘောကျနေခဲ့သည်။

တရားဝင်ပြိုင်ပွဲ အတွင်းတွင် ပြိုင်ကွင်း၊ အုပ်စု၊ တစ်ဦးချင်းနှင့် အသင်းလိုက် အသက်ရှင်သန်ရေး တိုက်ပွဲများအပြင် အထူးတိုက်ပွဲ အမျိုးအစားသုံးခု ထပ်မံထည့်သွင်းမည် ဖြစ်သည်။

ပထမတစ်ခုမှာ ‘အလံလုပွဲ’ ဖြစ်ပြီး လူတိုင်း လွတ်လပ်စွာ ပါဝင်နိုင်ကာ ကစားသမားတစ်ဦးစီသည် အကန့်အသတ်မရှိ ပြန်လည်အသက်ရှင်နိုင်မည် ဖြစ်သည်။ အနိုင်ရရှိသူကို အလုံးစုံအမှတ်များဖြင့် ဆုံးဖြတ်မည် ဖြစ်သည်။

ဒုတိယတစ်ခုမှာ အသင်းလိုက် ‘ဒန်ဂျင်ဂိမ်း’ ဖြစ်ပြီး အသင်းများစွာသည် တူညီသော ဒန်ဂျင်ထဲသို့ ဝင်ရောက်ကာ အမှတ်များရယူရန် မစ်ရှင်များကို စိန်ခေါ်ကြမည် ဖြစ်သည်။

နောက်ဆုံးတစ်ခုမှာ ‘အသက်ရှင်သန်ရေး ဂိမ်း’ ဖြစ်သည်။ ၎င်း၏အမည်ကဲ့သို့ပင် မည်သည့်အသင်း ဒန်ဂျင်ထဲတွင် ပိုကြာကြာ အသက်ရှင်နိုင်မလဲ ဆိုသည်ကို ယှဉ်ပြိုင်ကြမည်ဖြစ်ပြီး ယင်းကို သူ၏အတိတ်ဘဝမှ ကစားသမားများက ‘ဘယ်သူ ရှူးအောင့်နိုင်ဆုံးလဲ ပြိုင်ပွဲ’ ဟုလည်း ရည်ညွှန်းကြသည်။

ယှဉ်ပြိုင်မှုပုံစံသည် ဤတစ်ကြိမ်တွင် ပိုမိုကြွယ်ဝလာပြီး ပရိုလိဂ်၏ ရည်မှန်းချက်မှာ ကစားသမားများ၏ ယှဉ်ပြိုင်နိုင်စွမ်းနှင့် စိတ်ဝင်စားမှုကို မြှင့်တင်ရန် ဖြစ်သည်။ ဒန်ဂျင်တိုက်ပွဲများ ထည့်သွင်းခြင်း၏ ရည်မှန်းချက်မှာ ပီဗွီအီး (PVE) ကစားသမားများ ပိုမိုဆွဲဆောင်ရန်လည်း ဖြစ်သည်။

(TL Note: PVE ကစားသမားတွေဆိုတာ ကစားသမားအချင်းချင်း ချတာထက် ဂိမ်းက သတ်မှတ်ထားတဲ့ ဒန်ဂျင်တို့၊ မစ်ရှင်တို့ စတာတွေကို အာရုံစိုက်ကစားတဲ့သူတွေကို ဆိုလိုတာပါ။)

ဤပရိုလိဂ်၏ စည်းမျဉ်းများသည်လည်း ပိုမိုတင်းကျပ်လာပြီး ‘တားမြစ်ထားသော ပစ္စည်းများစာရင်း’ ကို ထုတ်ပြန်ခဲ့သည်။ သူမျှော်လင့်ထားသည့်အတိုင်း [ဘလက်စတား စစ်တပ် တံဆိပ် - ဆင့်ကဲဖြစ်စဉ်] ကို စာရင်း၏ထိပ်ဆုံးတွင် ထားရှိခဲ့သည်။

ဘလက်စတားစစ်တပ် ကစားသမားများသည် သူတို့၏ အဖွဲ့အစည်းရှိ လူတိုင်းအသုံးပြုနိုင်သဖြင့် သိပ်မခံစားရသော်လည်း အခြားကြယ်နယ်မြေများမှ ကလပ်များသည် သက်ပြင်းချနိုင်ခဲ့ကြသည်။ ဤကိရိယာသည် အလွန်အမင်း စွမ်းအားကြီးလွန်းပြီး ကွဲအက်ကြယ်စင်ကွင်းမှ လူတိုင်းလက်ထဲတွင် တစ်ခုစီရှိနေပါက သူတို့ တိုက်ရိုက်အရှုံးပေးလိုက်ရုံသာ ရှိသည်။

သို့သော် ဟန်ရှောင်းက ဤသည်မှာ အကြောင်းပြချက်ဖြစ်သည်ဟု မထင်ပေ။ ဖောက်ပြန်မှုများသည် အလွန်ရုပ်ဆိုးလွန်းသဖြင့် အမျိုးသမီးများကို ခြောက်လှန့်ရန် လွယ်ကူလိမ့်မည်ဟု သူယုံကြည်သည်။

ရုပ်ဆိုးရင် အခွင့်အရေး မရှိဘူး။ ဘယ်လောက် မှန်ကန်တဲ့စကားလဲ။

စာစဉ် (၅၄)၊ အခန်း (၉၁၀) ပြီးပါပြီ။

လင်းဆက်

+++++