ကျိန်စာသင့် နယ်မြေ

နတ်ဆိုးသင်္ချိုင်းနယ်မြေသည် ကျယ်ပြန့်ပြီး မျက်စိတစ်ဆုံး ရှည်လျားသည်။

နတ်ဆိုးချီများသည် ပတ်ဝန်းကျင်တွင် တလိမ့်လိမ့်ထနေပြီး လေဟာနယ်မုန်တိုင်းများ တိုက်ခတ်နေကာ တိုက်ပွဲစိတ်ဆန္ဒများက မိုးကောင်းကင်ယံအတွင်းသို့ ထွင်းဖောက်ဝင်ရောက်နေကြသည်။

အပျက်အစီးများကြားတွင် ဆွေးမြေ့နေသော နံရံများနှင့် ကျိုးပဲ့နေသော အုတ်ခဲများကို ဝိုးတဝါး မြင်တွေ့နေရဆဲပင်။

ဤရှေးဟောင်းအဆောက်အအုံများသည်အထွတ်အထိပ် အချိန်ကာလတွင် အလွန် ခမ်းနားထည်ဝါခဲ့မည်ဟု ခန့်မှန်းရသည်။

ဤနေရာတွင် ရှေးဟောင်းဝင်္ကပါပုံစံများ ရေးထွင်းထားသော အရိပ်အယောင်များ ရှိနေသည်။

ကံမကောင်းစွာဖြင့် အချိန်ကာလ၏ တိုက်စားမှုအောက်တွင် ဤအရာအားလုံးသည် ရှေးဟောင်းအပျက်အစီးများ ဖြစ်လာခဲ့လေပြီ။

ထိုအရာများသည် ငြိမ်းသေလုဆဲဆဲ ဖယောင်းတိုင်မီးအလား အချိန်မရွေး ဖုန်မှုန့်တစ်ဆုပ် ဖြစ်သွားနိုင်ပြီး လေထဲတွင် ယိမ်းနွဲ့နေကြသည်။

ကျုံးချင်သည် နတ်ဆိုးသင်္ချိုင်းနယ်မြေ၏ နက်ရှိုင်းသောနေရာသို့ တိုးဝင်သွားသည်။

အချိန်တခဏအတွင်းမှာပင် သူ၏ပုံရိပ်သည် နယ်မြေ၏အဆုံးတွင် ပျောက်ကွယ်သွားတော့သည်။

...

တစ်ချိန်တည်းမှာပင် ပြိုလဲပျက်စီးနေသည့် တောင်တစ်လုံးအောက်တွင် ခရမ်းရောင်ဝတ်စုံ ဝတ်ဆင်ထားသော အမျိုးသမီးတစ်ဦးသည် သူမ၏ခန္ဓာကိုယ်မှ နတ်ဆိုးချီများကို ဖယ်ရှားရှင်းလင်းရန် ကျင့်ကြံနေသည်။

ထိုအမျိုးသမီး၏အသက်အရွယ်ကို ခွဲခြား၍ မရနိုင်သော်လည်း သူမ၏မျက်နှာသွင်ပြင်အရ အမှန်တကယ်ကို ပြိုင်ဘက်ကင်း အလှပဂေးတစ်ဦးပင်။

သူမ၏မျက်နှာသွင်ပြင်သည် ချောမောလှပပြီး ခန္ဓာကိုယ်အချိုးအစား ကျော့ရှင်းကာ ခရမ်းရောင်ဝတ်စုံသည် သူမအား ဆွဲဆောင်မှုနှင့်ကျက်သရေရှိမှုကို ပေါင်းထည့်ပေးထားသည်။

သူမ၏အမည်မှာ ယွဲ့ကျီပင်။

သူမသည် ပျံသန်းခြင်းအင်မော်တယ်တံခါး ဂိုဏ်း၏ မဟာအကြီးအကဲ ဖြစ်ပြီး နှစ်ပေါင်း တစ်သောင်းနီးပါး အသက်ရှင်နေထိုင်ခဲ့သော ရှေးဟောင်းခေတ်မှ အစွမ်းထက်ပုဂ္ဂိုလ်တစ်ဦးဖြစ်ပေ၏။

သူမ၏စွမ်းအားသည် အလွန်ကြောက်မက်ဖွယ်ကောင်းပြီး ယင်သုံးပါးနယ်ပယ် တတိယအဆင့် မဟာပြီးပြည့်စုံခြင်းတွင်ရှိသော ကျင့်ကြံသူတစ်ဦးပင်။

သူမသည် ယန်သုံးပါးနယ်ပယ်သို့ရောက်ရန် ခြေတစ်လှမ်းအကွာသာ လိုအပ်တော့သည်။

ပြိုကျနေသော ကျောက်ကမ်းပါးအောက်တွင် ယွဲ့ကျီ၏ခန္ဓာကိုယ်သည် ခရမ်းရောင်ကြယ်တစ်ပွင့်ကဲ့သို့ နက်နဲသိမ်မွေ့သော အလင်းတန်းများ ဖြာထွက်နေသည်။

သူမသည် ခန္ဓာကိုယ်အနှံ့အပြား၌ စိတ်ဝိညာဉ်စွမ်းအင်များကို လှည့်ပတ်လိုက်သည်နှင့်အမျှ သူမ၏သွေးချီများသည် ကျန်းဟူမြစ်အလား လှိုင်းထလာသည်။

နတ်ဆိုးချီအမျှင်တန်းများသည် သူမ၏ ခန္ဓာကိုယ်အတွင်းမှ စိမ့်ထွက်လာကြသည်။

အချိန်အတော်ကြာပြီးနောက် ယွဲ့ကျီသည် သူမ၏ကျင့်ကြံခြင်းကို ရပ်တန့်လိုက်၏။

ထိတ်လန့်ခြင်းအရိပ်အယောင်တစ်ရပ်က သူမ၏မျက်လုံးထဲတွင် ဖြတ်ပြေးသွားသည်။

"ဒီနတ်ဆိုးချီတွေက တကယ့်ကို ကြောက်စရာ ကောင်းတာပဲ...အရိုးထဲ စွဲနေတဲ့ လောက်ကောင်တွေလိုမျိုး နေရာတိုင်းကို ထိုးဖောက်ဝင်ရောက်နေတယ်...ငါ့ရဲ့စွမ်းအားနဲ့တောင် အမြစ်ပြတ် ဖယ်ရှားရှင်းလင်းလို့ မရဘူး..."

သူမ၏မျက်နှာအမူအယာ ပျက်ယွင်းနေပြီး ရေစက်များ ကျဆင်းလာနိုင်လောက်အောင် အုံ့မှိုင်းနေသည်။

ယွဲ့ကျီ ဤနေရာသို့ ရောက်လာရသည့် အကြောင်းအရင်းမှာ သူမသည် ယင်သုံးပါးနယ်ပယ် တတိယအဆင့်တွင် ကြာမြင့်စွာ နေခဲ့ရသောကြောင့်ပင်။

နှစ်ပေါင်းသုံးထောင် ကြာမြင့်ခဲ့လေပြီ။

နတ်ဆိုးသင်္ချိုင်းနယ်မြေသည် တားမြစ်နေရာတစ်ခုဖြစ်သော်လည်း အစွန်းရောက်ယင်ချီသည် ယန်ချီကို ထုတ်လုပ်ပြီး အစွန်းရောက်ယန်ချီသည် ယင်ချီကို ထုတ်လုပ်ပေ၏။

လောကကြီးရှိ အန္တရာယ်များသော မည်သည့်တားမြစ်နယ်မြေမဆို အံ့အားသင့်ဖွယ် အခွင့်အရေးများ ရှိနေသည်။

ထို့ကြောင့် သူမသည် ဤနေရာသို့ လာရောက်ပြီး အခွင့်အရေး ရှာဖွေကာ သူမ အဆင့်ချိုးဖျက်နိုင်မည့် အခွင့်အလမ်းရှိမရှိ ကြည့်ရှုလိုခဲ့သည်။

သို့သော် သူမသည် နတ်ဆိုးသင်္ချိုင်းနယ်မြေသို့ ခြေချခဲ့သည်မှာ နှစ်နှစ်တိတိ ကြာမြင့်ခဲ့လေပြီ။

သူမသည် မည်သည့်အရာကိုမျှ မရရှိခဲ့သေးချေ။

ထိုအစား သူမသည် ဤနေရာတွင် ကြွင်းကျန်ခဲ့သော ရှေးဟောင်းဝင်္ကပါကြောင့် ဒဏ်ရာရခဲ့သည်။

ဤအရာက သူမအား နတ်ဆိုးချီများ၏ တိုက်စားခြင်းကို ခံရစေခဲ့သည်။

သူမ၏ဒဏ်ရာများသည် မပြင်းထန်သော်လည်း သူမ၏ခန္ဓာကိုယ်ထဲသို့ ဝင်ရောက်လာသော နတ်ဆိုးချီများသည် အလွန်ဒုက္ခပေးပေ၏။

နတ်ဆိုးချီအစအနတစ်ခုကို ဖယ်ရှားရှင်းလင်းလိုက်လျှင် နောက်ထပ်အစအနတစ်ခု ထွက်ပေါ်လာတတ်သည်။

ဤသည်မှာ အဆုံးမရှိဘဲ မရပ်မနားပင်။

ယခုအချိန်၌ သူမသည် အလွန်အဆင်မပြေသော အခြေအနေသို့ ရောက်ရှိနေလေပြီ။

အကယ်၍ သူမ ဤအတိုင်း ထွက်ခွာသွားပါက ပြင်ပလောက၌ သူမ၏ခန္ဓာကိုယ်ထဲမှ နတ်ဆိုးချီများကို ဖယ်ရှားရှင်းလင်းရန် ပို၍ပင် ခက်ခဲပေလိမ့်မည်။

အဆိုးဆုံးအနေဖြင့် သူမ၏ကျင့်ကြံမှုလမ်းကြောင်း ပြတ်တောက်သွားပြီး ကျင့်ကြံဆင့် နောက်ပြန်ဆုတ်သွားမည် ဖြစ်သည်။ ထို့ထက် ပို၍ဆိုးရွားသော အခြေအနေတွင်မူ သူမ၏လူသားဆန်မှု ပျောက်ကွယ်သွားပြီး ချီဖောက်ပြန်ကာ သတ်ဖြတ်ခြင်းကိုသာသိပြီး အသိစိတ်ကင်းမဲ့သည့် နတ်ဆိုးတစ်ကောင် ဖြစ်သွားပေလိမ့်မည်။

အကယ်၍ သူမ ဤှနေရာ၌ ဆက်နေလျှင် မျှော်လင့်ချက်တချို့ ရှိကောင်းရှိနိုင်သည်။

သို့သော် သူမ ဆက်နေသရွေ့ သူမ၏ ခန္ဓာကိုယ်ထဲမှ နတ်ဆိုးချီကပ်ဘေးသည် ဤပတ်ဝန်းကျင်တွင် ဆက်ရှိနေသမျှ တိုက်စားမှု တိုးပွားလာကာ ပိုဆိုးလာနိုင်ခြေရှိသည်။

သူမ ဤနေရာ၌ ထွက်ခွာခြင်းနှင့်ဆက်နေခြင်း နှစ်ခုလုံးသည် ရွေးချယ်စရာ ကိစ္စတစ်ရပ် မဟုတ်တော့ချေ။

ဤအချက်မှတဆင့် ဤနေရာသည် သာမန်လူများ ခြေချရမည့် နေရာမဟုတ်ကြောင်း ပြသနေသည်။

"နတ်ဆိုးရင်းမြစ်ကျောက်တုံးကို ရှာတွေ့တာက ငါ့အတွက် မျှော်လင့်ချက်ကိုရှာဖွေဖို့ တစ်ခုတည်းသောနည်းလမ်း ဖြစ်ကောင်းဖြစ်နိုင်တယ်..."

ယွဲ့ကျီက တီးတိုးရေရွတ်လိုက်သည်။

ဤနတ်ဆိုးရင်းမြစ်ကျောက်တုံး သည် နတ်ဆိုးလမ်းစဉ်၏ရတနာတစ်ခု ဖြစ်ပြီး နတ်ဆိုးချီများကို ဖိနှိပ်ပြီး ဖယ်ရှားရှင်းလင်းနိုင်သော အံ့အားသင့်ဖွယ်စွမ်းရည်ရှိသည်။

သို့သော် သူမသည် ဤနေရာပတ်ဝန်းကျင်တစ်ဝိုက်တွင် နှစ်နှစ်ကြာ လှည့်လည်သွားလာခဲ့သည့်တိုင်....

နတ်ဆိုးရင်းမြစ်ကျောက်တုံးကို မဆိုထားနှင့် တန်ဖိုးရှိသော မည်သည့်အရာကိုမျှ သူမ မတွေ့ရှိခဲ့ပေ။

ဤရတနာကို ရှာတွေ့ရန် မျှော်လင့်ချက်မှာ အလွန်နည်းပါးလှသည်။

သို့ရာတွင် သူမ၏အသက်နှင့် သက်ဆိုင်နေသောကြောင့် ကောက်ရိုးပုံထဲတွင် အပ်ပျောက်ရှာသကဲ့သို့ ဖြစ်နေလျှင်ပင် သူမ သွားရောက် ရှာဖွေရပေမည်။

ထိုအချိန်တွင် လှိုင်းထနေသော နတ်ဆိုးမြူခိုးများကြားတွင် ဆွေးမြေ့နေသော ကျောက်တုံးတစ်တုံး၏နောက်မှနေ၍ ပုံရိပ်တစ်ခု ချဉ်းကပ်လာသည်။

"ဘယ်သူလဲ..."

ယွဲ့ကျီ၏အာရုံကြောများ တင်းမာသွားပြီး သတိကြီးစွာထား၍ မေးမြန်းလိုက်သည်။

ဤနေရာတွင် ထွက်ပေါ်လာသူမှာ ကျုံးချင်ပင်။

ဤကဲ့သို့သော နတ်ဘုရားများက စွန့်ပစ်ထားသည့် နေရာမျိုးတွင် လူတစ်ဦးတစ်ယောက်ကို မြင်တွေ့ရလိမ့်မည်ဟု သူ မျှော်လင့်မထားမိခဲ့ချေ။

ဤအမျိုးသမီးသည် အစစ်အမှန် နတ်ဆိုးအမွေအနှစ်အတွက် ရောက်ရှိနေခြင်း ဖြစ်သလော....

ဤနေရာသည် အလွန်ကြီးမားကျယ်ပြန့်ကာ သူ၏နတ်ဘုရားစိတ်အာရုံသည် ပြင်းထန်စွာ တားဆီးကန့်သတ်ခြင်း ခံထားရသည်။

သူသည် ခေါင်းပြတ်နေသော ယင်ကောင်အလား စမ်းတဝါးဝါးဖြင့် ရက်ပေါင်းများစွာ ရှာဖွေခဲ့ရသည်။

အစစ်အမှန် နတ်ဆိုးအမွေအနှစ်နယ်မြေ မဆိုထားနှင့် သရဲတစ္ဆေတစ်ကောင်ကိုပင် သူ မမြင်ခဲ့ရချေ။

ထိုကြောင့် တစ်ဖက်လူကို လမ်းမေးကြည့်လျှင် ရနိုင်ကောင်းသည်။

ကျုံးချင်က ယွဲ့ကျီ၏ရှေ့သို့ ရောက်လာသည်။

ထို့နောက် သူသည် လက်နှစ်ဖက်ကို ပူးဆုပ်ပြီး ပြောဆိုလိုက်၏။

"ကျွန်တော်က ကျုံးချင်ပါ... မိတ်ဆွေအနေနဲ့ အစစ်အမှန် နတ်ဆိုးအမွေအနှစ်နယ်မြေကို သိမလားလို့ မေးချင်လို့ပါ..."

ယွဲ့ကျီက မျက်မှောင်အနည်းငယ် ကြုတ်လိုက်သည်။

"ရှင်က ဘာလို့ အဲ့ဒီနေရာကို ရှာနေတာလဲ..."

သူမ ဤသို့ မေးမြန်းခြင်းမှာ အံ့အားသင့်စရာ မဟုတ်ချေ။

အစစ်အမှန် နတ်ဆိုးအမွေအနှစ်ကို နတ်ဆိုးမျိုးနွယ်၏ဆက်ခံသူများသာ ရယူနိုင်သည်။

သူမသည် ကျုံးချင်ကို စူးစမ်းလေ့လာကြည့်လိုက်ရာ သူ့ထံတွင် နတ်ဆိုးချီများ ရှိမနေသည်ကို မြင်တွေ့လိုက်ရသည်။

အကယ်၍ သူ ရှာတွေ့လျှင်ပင် ထိုအမွေအနှစ်ကို လက်ခံနိုင်မည် မဟုတ်ပေ။ သူသည် အမွေအနှစ် နယ်မြေထဲသို့ပင် ဝင်ရောက်နိုင်မည် မဟုတ်ချေ။

ကျုံးချင်က တုံ့ပြန်အဖြေပေးလိုက်သည်။

"အကြောင်းအရင်းတွေကို အသေးစိတ် ရှင်းပြဖို့ အဆင်မပြေပါဘူး...ခင်ဗျား သိတယ်ဆိုရင် ကျေးဇူးပြုပြီး လမ်းပြပေးပါ...ကျွန်တော်က အရမ်းကျေးဇူးတင်မိမှာပါ..."

ယွဲ့ကျီက အချိန်တခဏကြာမျှ စဉ်းစားပြီးနောက် ဖျော့တော့တော့လေသံဖြင့် ပြောဆိုသည်။

"အစစ်အမှန် နတ်ဆိုးအမွေအနှစ် နယ်မြေက နတ်ဆိုးသင်္ချိုင်းနယ်မြေရဲ့ နက်ရှိုင်းတဲ့နေရာမှာ ရှိတယ်...ဒီကနေ မြောက်ဘက်တည့်တည့်ကို သွားလိုက်ရင် ယဇ်ပလ္လင်တစ်ခုကို တွေ့လိမ့်မယ်...အဲ့ဒီကနေ ဝင်သွားရင် အစစ်အမှန် နတ်ဆိုးအမွေအနှစ် နယ်မြေကို ရောက်လိမ့်မယ်..."

"ဒါပေမဲ့ အတွင်းပိုင်းကို ပိုပြီးနက်နက်ရှိုင်းရှိုင်း သွားလေ နတ်ဆိုးချီတွေက ပိုထူထပ်လာလေလေ ဖြစ်ပြီးတော့ တိုက်စားခံရဖို့ အရမ်းလွယ်ကူတယ်...ဘယ်သူမဆို ဝင်သွားလို့ ရတာ မဟုတ်ဘူး...မလိုအပ်ရင် အထဲကို နက်နက်ရှိုင်းရှိုင်း မဝင်ဖို့ ငါ နင့်ကို အကြံပေးချင်တယ်... အဲ့ဒီလိုမှ မဟုတ်ရင် နတ်ဆိုးချီတွေ နင်ရဲ့ခန္ဓာကိုယ်ထဲကို ဝင်သွားတာနဲ့ နင် နောင်တရဖို့ နောက်ကျသွားလိမ့်မယ်..."

ယွဲ့ကျီသည် စကားများများ ပြောဆိုတတ်သူ မဟုတ်ချေ။

သို့သော် သူမသည် ကျုံးချင်၏ထူးခြားချက်များကို သတိပြုမိသည်။

သူသည် အသက်အရွယ် ငယ်ရွယ်သော်လည်း ဤနတ်ဆိုးမြူခိုးများကြားတွင် လွတ်လပ်စွာ သွားလာနိုင်ခြင်းက သူ၏ကျင့်ကြံဆင့် အတော်အတန် မြင့်မားမည်ဖြစ်ကြောင်း ပြသနေသည်။

ဤကဲ့သို့ လူငယ်ဂျူနီယာတစ်ဦးသည် ဤနေရာမျိုးတွင် သေဆုံးသွားသည်ကို သူမ အမှန်တကယ် မမြင်လိုချေ။ ထို့ကြောင့် သူမသည် အပိုစကားများပြောဆိုပြီး အကြံဉာဏ်တချို့ ပေးလိုက်ခြင်းပင်။

ကျုံးချင်က ပြုံးလိုက်သည်။

"သတိပေးတဲ့အတွက် ကျေးဇူးတင်ပါတယ်... ဒါပေမဲ့ ကျွန်တော့်မှာ သွားရမယ့် အကြောင်းပြချက် ရှိလို့ပါ..."

တစ်ဖက်လူက အတင်းအကြပ် သွားလိုသည်ကို မြင်တွေ့ချိန်၌ ယွဲ့ကျီသည် မည်သည့်စကားမျှ ဆက်မပြောတော့ချေ။

သူမ၏လမ်းညွှန်မှုသည် ယခုအချိန်အထိ ကြင်နာပြီး ဖြောင့်မတ်မှန်ကန်မှုကို ပြသခဲ့ပြီးလေပြီ။

ကျုံးချင် မည်သို့ ရွေးချယ်မည် ဆိုသည်မှာ သူ၏ကိစ္စသာဖြစ်ပြီး သူမနှင့် မသက်ဆိုင်တော့ချေ။

ထိုအချိန်မှာပင် လေဟာနယ်ထဲ၌ နတ်ဆိုးချီများ လှိုင်းထလာသည်။ လှိုင်းထနေသော နတ်ဆိုးချီများသည် ဒီရေလှိုင်းတစ်ခုအဖြစ် စုစည်းသွားကြကာ လေဟာနယ်ကို ထိုးဖောက်သွားပေ၏။

အချိန်နှင့်လေဟာနယ်သည် တိုက်ရိုက်စုတ်ပြဲသွားပြီး ပေဆယ်ဂဏန်းကျော် ကြီးမားသော အက်ကွဲကြောင်းကြီးတစ်ခု ဖြစ်ပေါ်လာသည်။

"ဝေါင်း..."

ဟိန်းဟောက်သံများ ထွက်ပေါ်လာပြီးနောက် အနက်ရောင်ပုံရိပ်တစ်ခု ဖြတ်သန်းသွားပြီး လေဟာနယ်နတ်ဆိုးဝံပုလွေ ဆယ်ကောင်ကျော်သည် အက်ကွဲကြောင်းထဲမှ ပြေးထွက်လာကာ ကျုံးချင်နှင့်ယွဲ့ကျီထံသို့ တန်းတန်းမတ်မတ် ဦးတည်လာကြသည်။

နတ်ဆိုးသင်္ချိုင်းနယ်မြေသည် သာမန်သက်ရှိများအတွက် အန္တရာယ်များသည့် တားမြစ်နယ်မြေတစ်ခု ဖြစ်ကောင်းဖြစ်နိုင်သည်။

သို့သော် နတ်ဆိုးချီများ ပေါများနေခြင်းသည် ပုံမှန်မဟုတ်သော သက်ရှိတချို့ ပေါက်ဖွားလာစေရန် လုံလောက်သည်။

ဤလေဟာနယ် နတ်ဆိုးဝံပုလွေများသည် ထိုသက်ရှိများအနက်မှ အမျိုးအစားတစ်ခုပင်။

ထိုသားရဲတစ်ကောင်ချင်းစီသည် မြေကမ္ဘာနက်နဲသိမ်မွေ့နယ်ပယ်မှ ကောင်းကင်နက်နဲသိမ်မွေ့နယ်ပယ်အထိ ကျင့်ကြံဆင့်စွမ်းအားရှိပြီး အတော်အသင့် သန်မာကြသည်။

နတ်ဆိုးသင်္ချိုင်းနယ်မြေသည် အန္တရာယ်များဖြင့် ပြည့်နှက်နေခြင်းက မြောက်ပိုင်းဒေသတစ်ခုလုံးတွင် သဘောတူညီချက်တစ်ခုနီးပါး ဖြစ်လာခဲ့သည်။

သာမန်လူများ တောင့်မခံနိုင်သော လှိုင်းထနေသည့် နတ်ဆိုးချီများကို ဘေးဖယ်ထားလျှင်ပင်....

ကြွင်းကျန်နေသော တိုက်ပွဲစိတ်ဆန္ဒများနှင့် သတ်ဖြတ်လိုခြင်း စိတ်ဆန္ဒများ ရှိနေပြီး ထိုအရာများသည်လည်း အလွန်ကြောက်မက်ဖွယ် ကောင်းသည်။

ထို့ပြင် နတ်ဆိုးသင်္ချိုင်းနယ်မြေရှိ နတ်ဆိုးသားရဲများသည် ပို၍ပင် အခက်တွေ့ချင်စရာကောင်းသည်။

သာမန်သက်ရှိများသည် ဤနယ်မြေထဲသို့ ဝင်ရောက်လာပါက တစ်ရက်ပင် အသက်ရှင်မည် မဟုတ်ဟု ဆိုရပေမည်။

အမှန်အားဖြင့် ဤအဆင့် ခြိမ်းခြောက်မှုသည် ကျုံးချင်အတွက် ဘာမှမဟုတ်ချေ။

သူသည် လှုပ်ရှားပြီး ဤ လေဟာနယ် နတ်ဆိုးဝံပုလွေ များကို သတ်ဖြတ်ရန် ဟန်ပြင်လိုက်စဉ်မှာပင် သူ၏တတိယတပည့်ကို ရုတ်တရက် သတိရလိုက်သည်။

အကယ်၍ ထိုကောင်လေးသာ ဤနေရာတွင် ရှိနေပါက မည်သို့ တုံ့ပြန်မည်နည်း။

သူသည် အလွန်အမင်း သူရဲဘောကြောင်ပြီး သူ၏ကျင့်ကြံမှုကို တတ်နိုင်သမျှ ဖိနှိပ်ထားပေလိမ့်မည်။

တခြားလူများမှ သူ၏စွမ်းအားအမှန်ကို သိရှိသွားမည်အား ကြောက်ရွံ့နေပေလိမ့်မည်။

ဤသို့ တွေးမိရင်း ကျုံးချင်သည် တုဟောက်၏လွှမ်းမိုးမှုကို ခံရသည် ဟုတ်မဟုတ် မသိသော်လည်း မသိစိတ်ဖြင့် သူ၏ကျင့်ကြံဆင့်ကို ယင်သုံးပါးနယ်ပယ် ပထမအဆင့်သို့ ဖိနှိပ်လိုက်သည်။

ထို့နောက် သူသည် လေဟာနယ်နတ်ဆိုးဝံပုလွေ များအပေါ် တိုက်ခိုက်မှုကို စတင်လိုက်သည်။

သူ၏ကျင့်ကြံဆင့်ကို ဖိနှိပ်ထားလျှင်ပင် သူသည် ဤလေဟာနယ် နတ်ဆိုးဝံပုလွေများကို လွယ်လင့်တကူ ကိုင်တွယ်နိုင်ခဲ့သည်။

ဤသည်မှာ ကလေးများကို လက်ဝါးတစ်ချက်တည်းဖြင့် ရိုက်နှက်လိုက်သည့်အလားပင်။

သူ၏ဟန်ပန်သည် အလွန်အမင်း သက်သောင့်သက်သာ ရှိပေ၏။

ယွဲ့ကျီဘက်တွင်မူ သူမသည်ဒဏ်ရာအနည်းငယ် ရရှိထားသော်လည်း.....

ဆိုရိုးစကားအတိုင်း သေခါနီး ကုလားအုတ်သည် မြင်းထက် ကြီးမားနေဆဲပင်။

သူမ၏နည်းစနစ်များသည် လေဟာနယ် နတ်ဆိုးဝံပုလွေအနည်းငယ်မှ ရန်စနိုင်သော အရာမျိုး မဟုတ်ပေ။

မကြာမီ သူတို့နှစ်ဦး၏ ပူးပေါင်းကြိုးပမ်းမှုအောက်တွင် လေဟာနယ်နတ်ဆိုးဝံပုလွေ ဆယ်ကောင်ကျော်လုံး အမြစ်ပြတ် ချေမှုန်းခြင်း ခံလိုက်ရသည်။

သို့သော် ကျုံးချင်၏စွမ်းအားကို မြင်တွေ့ပြီးနောက် ယွဲ့ကျီ၏နှလုံးသားထဲတွင် လှိုင်းဂယက်များ စတင်၍လှုပ်ရှားလာခဲ့လေသည်။

...