ကြင်နာစွာ ဖျောင်းဖျခြင်း

သူမသည် ကျုံးချင်ကိုကြည့်ကာ သူမ၏စိတ်ထဲမှ ထိတ်လန့်တုန်လှုပ်မှုကို ထိန်းချုပ်ရင်း ပြောဆိုသည်။

"နင်က ယင်သုံးပါးနယ်ပယ် ပထမအဆင့်မှာ ရှိနေတာပဲ..."

ကျုံးချင်သည် ဝန်ခံခြင်း မပြုသည့်အပြင် ငြင်းဆန်ခြင်းလည်း မပြုခဲ့ချေ။

ယွဲ့ကျီ၏မျက်လုံးထဲတွင်မူ ကျုံးချင်က တိတ်တဆိတ် ဝန်ခံလိုက်သည်ဟု ထင်မှတ်သွားပေ၏။

ယွဲ့ကျီက သက်ပြင်းရှည်ကြီးတစ်ချက်ကို ချလိုက်မိသည်။ ကျုံးချင်၏ အရိုးသက်တမ်းကို ကြည့်ရသလောက် သူသည် အသက်နှစ်ဆယ်ပင် မပြည့်သေးချေ။ သို့သော် သူသည် ယင်သုံးပါးနယ်ပယ်သို့ ရောက်ရှိနေလေပြီ။ ဤကဲ့သို့သော ကျင့်ကြံခြင်းအရှိန်နှုန်းသည် မွန်းစတားတစ်ကောင်ကဲ့သို့ ထူးခြားဆန်းပြားသည်။

ကျုံးချင်၏ အံ့အားသင့်ဖွယ် ကျင့်ကြံခြင်း အရှိန်နှုန်းကြောင့်ပင် သူမသည် သူ့ကို နောက်တစ်ကြိမ် ဖျောင်းဖျခြင်းမပြုဘဲ မနေနိုင်တော့ပေ။

"ဒီနေရာက အရမ်းအန္တရာယ်များတယ်... ဒါက နင် ရှိနေသင့်တဲ့ နေရာမျိုး မဟုတ်ဘူး...နင် လာခဲ့တဲ့နေရာကိုပဲ ပြန်သွားသင့်တယ်...နင့်ရဲ့အနာဂတ်က ဒီထက်ပိုပြီးကျယ်ပြန့်တဲ့ စင်မြင့်ထက်မှာ ရှိနေသင့်တယ်..."

ကျုံးချင်က အပြုံးနှင့် တုံ့ပြန်လိုက်သည်။

"ခင်ဗျားရဲ့စေတနာကို ကျွန်တော် နားလည်ပါတယ်... ဒါပေမဲ့ ကျွန်တော့်မှာ သွားကိုသွားရမယ့် အကြောင်းပြချက် ရှိလို့ပါ...စကားပုံတစ်ခု ရှိတယ်လေ... လုပ်သင့်တာကို လုပ်ရမယ် မလုပ်သင့်တာကို မလုပ်ရဘူးဆိုတာမျိုးပေါ့..."

"ကျွန်တော့်ကို ထပ်ပြီးဖျောင်းဖျမနေပါနဲ့တော့...ဘာပဲဖြစ်ဖြစ်... ဒီနေ့တော့ အစစ်အမှန် နတ်ဆိုးအမွေအနှစ် တည်ရှိတဲ့နေရာကို ကျွန်တော် သွားရလိမ့်မယ်..."

ထိုစကားများက ယွဲ့ကျီကို ခေါင်းခါယမ်းမိသွားစေသည်။ သူမ၏အမြင်အရ ကျုံးချင်၏ လုပ်ရပ်သည် ကျားရှိမှန်းသိလျက်နှင့် ကျားတောင်ပေါ်သို့ တက်နေသည့် လုပ်ရပ်နှင့် တူညီနေပေ၏။ အမှားအယွင်းအနည်းငယ် ရှိရုံနှင့် သူသည် သေဆုံးခြင်းနှင့်စိတ်ဝိညာဉ်ပျက်စီးခြင်းစသည့် ဘေးဒုက္ခများကို ကြုံတွေ့ရနိုင်သည်။

သို့သော် သူမတို့သည် ကံကြမ္မာတိုက်ဆိုင်၍ ဆုံတွေ့ခဲ့ကြသူများသာ ဖြစ်သဖြင့် သူ မည်သည့်အရာကို လုပ်ဆောင်သည်ဖြစ်စေ သူမနှင့် မသက်ဆိုင်ချေ။ သူမ၏ အဓိကဦးစားပေးမှာ နတ်ဆိုးရင်းမြစ်ကျောက်တုံးကို ရှာဖွေပြီး သူမ၏ နတ်ဆိုးချီတိုက်စားမှုဒဏ်ကို ဖြေရှင်းရန်ပင်။

ဤသို့ တွေးတောရင်း သူမက လေသံဖျော့ဖျော့ဖြင့် ပြောဆိုသည်။

"ဒါဆိုရင်လည်း နင့်ရဲ့ခရီးစဉ် ချောမွေ့ပါစေလို့ ငါ ဆုတောင်းပေးပါတယ်...တစ်နေ့မှာ ငါတို့ ပြန်ဆုံဖို့ အခွင့်အရေးရှိမယ်လို့ မျှော်လင့်ပါတယ်..."

သူမက ကျုံးချင်ကို နှုတ်ဆက်စကား ဆိုလိုက်သည်။ အကယ်၍ ငြိမ်းချမ်းသောအချိန်များတွင် ဖြစ်ပါက ဤကဲ့သို့ ကောင်းကင်ဘုံ၏ မျက်နှာသာပေးမှုကို ခံရသော ပါရမီရှင်တစ်ဦးနှင့် ပို၍နီးကပ်စွာ သိကျွမ်းခွင့်ရရန် ယွဲ့ကျီသည် ငြင်းဆန်နေမည် မဟုတ်ပေ။

သို့သော် ယခုအချိန်တွင်မူ သူမ၏စိတ်အာရုံတစ်ခုလုံး၌ နတ်ဆိုးချီတိုက်စားမှုကို မည်သို့ ဖြေရှင်းရမည်ဆိုသည့် အချက်ပေါ်၌သာ ရှိနေပေ၏။ ထို့ပြင် ကျုံးချင်၏ခရီးစဉ်မှာ သူမ၏အမြင်အရ ကိုယ့်ကိုယ်ကိုယ် သတ်သေခြင်းနှင့် ထပ်တူထပ်မျှပင်။ ထိုယဇ်ပလ္လင်၏အနီးသို့ ယင်သုံးပါးနယ်ပယ် တတိယအဆင့် ထိပ်သီးကျင့်ကြံသူဖြစ်သည့် သူမကိုယ်တိုင်ပင် မချဉ်းကပ်ရဲချေ။ ယင်သုံးပါးနယ်ပယ် ပထမအဆင့်တွင်သာ ရှိသေးသည့် ကျုံးချင်သည် အထိအခိုက်မရှိ ပြန်လာနိုင်မည်ဟု သူမ မယုံကြည်ချေ။

ထိုအမျိုးသမီးနှင့် တွေ့ဆုံခြင်းမှာ ကျုံးချင်အတွက် အချိန်တခဏကြာမျှ ကြုံတွေ့ရသော အဖြစ်အပျက်ငယ်လေး တစ်ခုသာ ဖြစ်သည်။ သူတို့နှစ်ယောက်သား လမ်းခွဲပြီးနောက် ကျုံးချင်သည် နတ်ဆိုးသင်္ချိုင်းနယ်မြေ၏အတွင်းပိုင်းသို့ ထပ်မံ၍တိုးဝင်သွားခဲ့ပေ၏။

ဤနယ်မြေအတွင်းပိုင်းသို့ ပို၍နီးကပ်လာလေလေ နတ်ဆိုးချီစွမ်းအင်များ ပို၍ထူထပ်သိပ်သည်းလာလေလေပင်။ အပြင်ဘက်ပိုင်းရှိ နတ်ဆိုးချီစွမ်းအင်များသည် မြူခိုးများကဲ့သို့ ဖြစ်ပါက အတွင်းပိုင်းရှိ နတ်ဆိုးချီစွမ်းအင်များကမူ မင်ရည်ကဲ့သို့ မည်းနက်နေသည်။ ထိုအရာများသည် အစိုင်အခဲအဖြစ်သို့ ခဲလုနီးပါးပင် ဖြစ်နေပေ၏။ အရေအတွက်နှင့်အရည်အသွေးအရ အပြင်ဘက်နှင့် လုံးလုံးလျားလျား နှိုင်းယှဉ်၍ မရနိုင်ချေ။

အချိန်တခဏကြာခန့် ခရီးဆက်ပြီးနောက် ကျုံးချင်သည် ထိုအမျိုးသမီး ပြောခဲ့သည့် ယဇ်ပလ္လင်ကို နောက်ဆုံးတွင် မြင်တွေ့လိုက်ရသည်။

ထိုယဇ်ပလ္လင်တစ်ခုလုံးသည် မည်းနက်နေပြီး အမြင့်သုံးပေခန့်နှင့် အကျယ်ကိုးပေခန့် ရှိကာ ပဉ္စဂံပုံသဏ္ဌာန်ရှိသည်။ ထိုအရာသည် မည်းနက်နေသော အေးခဲမြေပြင်ထက်တွင် ခန့်ညားထည်ဝါစွာ တည်ရှိနေ၏။ ထူးဆန်းသောရုပ်ပုံတချို့ကို ထိုယဇ်ပလ္လင်ပေါ်တွင် ထွင်းထုထားကာ ရှေးဟောင်းဆန်ပြီး နက်ရှိုင်းသည့် နတ်ဆိုးချီအငွေ့အသက်များကို ထုတ်လွှင့်ထားသည်။

ယဇ်ပလ္လင်တစ်ခုလုံး၏ အထက်တွင် ကြောက်မက်ဖွယ်ကောင်းသော အစစ်အမှန် နတ်ဆိုးရုပ်ထုတစ်ခုကို စိုက်ထူထားသည်။ ကျုံးချင်၏မျက်လုံးများထဲတွင် ထူးဆန်းသော အလင်းတန်းတစ်တန်း ဖြတ်ပြေးသွားပေ၏။

"ဒါက အစစ်အမှန် နတ်ဆိုးအမွေအနှစ် ရှိတဲ့နေရာလား..."

သူ သေသေချာချာ လေ့လာကြည့်ရှုလိုက်သည်။ နောက်ဆုံးတွင် ယဇ်ပလ္လင်၏နံဘေးပတ်လည်ရှိ စာသားများမှတဆင့် ဤရုပ်ထုသည် နတ်ဆိုးမျိုးနွယ်စုများကြားတွင် အလွန်အမင်း အစွမ်းထက်သော တည်ရှိမှုကြီးတစ်ခုဖြစ်ကြောင်း အတည်ပြုနိုင်ခဲ့သည်။

ဤရုပ်ထု၏အမည်မှာ နတ်ဆိုးသခင်နီရိုပင်။

ကျုံးချင်သည် ပတ်ဝန်းကျင်ကို ဝေ့ဝိုက်၍ ကြည့်လိုက်၏။ ဤနေရာတဝိုက်တွင် ကြောက်မက်ဖွယ်ကောင်းသော နတ်ဆိုးချီစွမ်းအင်များ လှိုင်းလုံးကြီးများကဲ့သို့ တလိမ့်လိမ့်ထနေသည်။ ထိုလှိုင်းလုံးကြီးများကဲ့သို့ နတ်ဆိုးချီစွမ်းအင်များ၏ တိုက်စားမှုအောက်တွင် သူကိုယ်တိုင်ပင် အနည်းငယ် မသက်မသာ ခံစားလာရသည်။

သူသည် ထိုအရာများကြောင့် ညစ်ညမ်းသွားစေလိုခြင်း မရှိချေ။ ဒဏ္ဍာရီများအရ နတ်ဆိုးချီစွမ်းအင်များသည် စိတ်ဝိညာဉ်စွမ်းအားများကို ညစ်ညမ်းစေပြီး စိတ်ဝိညာဉ်ကိုလည်း ထိခိုက်သွားစေနိုင်သည်။ ထိုနတ်ဆိုးချီများ ပြင်းထန်စွာ ကူးစက်လာခြင်းကို တစ်ကြိမ်မျှ ခံရပါက ကျင့်ကြံသူသည် လမ်းမှားသို့ရောက်ကာ နတ်ဆိုးသက်ရှိတစ်ကောင် ဖြစ်သွားနိုင်သည်။

ကျုံးချင်သည် နတ်ဆိုးချီစွမ်းအင်များ၏ တိုက်စားမှုကို ကာကွယ်ရန် သူ၏ခန္ဓာကိုယ်ပတ်လည်တွင် စွမ်းအင်အကာအကွယ်တစ်ခုကို ဖန်တီးလိုက်၏။ သို့သော် ဤနတ်ဆိုးချီစွမ်းအင်များသည် အလွန်အမင်း အစွမ်းထက်လှသဖြင့် နေရာအနှံ့အပြားသို့ ထိုးဖောက်ဝင်ရောက်နိုင်ပုံရသည်။ ယန်သုံးပါးနယ်ပယ်စွမ်းအားရှိသည့် ကျုံးချင်၏အကာအကွယ်အတွင်းသို့ပင် နတ်ဆိုးချီစွမ်းအင်အနည်းငယ်သည် ထိုးဖောက်ဝင်ရောက်လာခဲ့ပေ၏။

နတ်ဆိုးချီစွမ်းအင်များ သူ၏ခန္ဓာကိုယ်ထဲသို့ ဝင်ရောက်လာသည်နှင့် ကျုံးချင်၏မျက်လုံးများ အနည်းငယ် မှိန်ဖျော့သွားသည်။ နတ်ဆိုးချီစွမ်းအင်အနည်းငယ်သည် သူ့ကို ထိခိုက်စေနိုင်ခြင်း မရှိသော်လည်း ထိုအရာများ စုပုံလာပါက သူသည်လည်း တိုက်စားခံရနိုင်သည်။

"ဒီနေရာက တကယ့်ကို ကြောက်စရာကောင်းတာပဲ...နတ်ဆိုးမဟုတ်တဲ့ ကျင့်ကြံသူတွေအတွက်တော့ ဒါက ငရဲဘုံပဲ..."

ကျုံးချင်က ထိုသို့တွေးတောရင်း မျက်မှောင်ကြုတ်လိုက်၏။ နတ်ဆိုးချီစွမ်းအင်များ သူ၏ခန္ဓာကိုယ်ထဲသို့ ဝင်ရောက်လာသည့် ခံစားချက်မှာ မနှစ်မြို့ဖွယ်ကောင်းလှပြီး အကြိမ်ကြိမ် ကြိုးစားသော်လည်း သူသည် ထိုအရာများကို အပြည့်အဝ ပိတ်ဆို့ထားနိုင်ခြင်း မရှိပေ။

နောက်ထပ်အချိန်တခဏတွင် ကျုံးချင်၏လက်ထဲ၌ 'သုညစည်းတံဆိပ်' ထွက်ပေါ်လာခဲ့သည်။ သုညစည်းတံဆိပ်မှာ သူ၏လက်နက်ဖြစ်ပြီး သူ ဆန္ဒရှိသည့်အတိုင်း ပုံစံပြောင်းလဲနိုင်သည်။ ကျုံးချင်၏ အတွေးတစ်ချက်နှင့်အတူ သုညစည်းတံဆိပ်သည် အမြင့်ပေတစ်ရာခန့်ရှိသော အစစ်အမှန် နတ်ဆိုးကြီးတစ်ကောင်အဖြစ် ပြောင်းလဲသွားသည်။

ထိုနတ်ဆိုးကြီးတွင် စိမ်းဖန့်ဖန့် မျက်နှာနှင့် အစွယ်များရှိပြီး ကြောက်မက်ဖွယ်ကောင်းသော ရုပ်သွင်ရှိကာ ကောင်းကင်နှင့်မြေပြင်ရှိ အရာအားလုံးကို ညစ်ညမ်းစေနိုင်သည့် နတ်ဆိုးချီစွမ်းအင်များ ဝန်းရံနေသည်။ ရှေးဟောင်းဆန်သော အငွေ့အသက်များသည်လည်း ထိုနတ်ဆိုးကြီးတွင် ကိန်းအောင်းနေပေ၏။ ထိုအရာကို ဖန်တီးထားမှုသည် အထူးအဆင့်သို့ ရောက်ရှိနေလေပြီ။

ကျုံးချင်၏စိတ်ကူးမှာ ရိုးရှင်းသည်။ သုညစည်းတံဆိပ်သည် မည်သည့်အရာအဖြစ်မဆို ပြောင်းလဲနိုင်သဖြင့် သူသည် နတ်ဆိုးသခင် နီရို၏အငွေ့အသက်ကို တုပလိုက်ခြင်းပင်။ နတ်ဆိုးချီစွမ်းအင်များကို နတ်ဆိုးချီစွမ်းအင်များနှင့်ပင် ပြန်လည်၍ တိုက်ထုတ်ရပေမည်။

သုညစည်းတံဆိပ်သည် နတ်ဆိုးသခင်နီရိုအဖြစ် ပြောင်းလဲသွားသည်နှင့် ပတ်ဝန်းကျင်ရှိ နတ်ဆိုးချီစွမ်းအင်များသည် အသိစိတ် ရှိနေသည့်အလား ဝေးရာသို့ ဆုတ်ခွာသွားကြ၏။ ဤသည်မှာ ထိုအရာများမှ အညံ့ခံလိုက်သည့် ပုံစံမျိုးပင်။

ဤအခြေအနေက ကျုံးချင်ကို အံ့အားသင့်သွားစေသည်။ သူ၏စမ်းသပ်မှုမှ ဤမျှထိ ကောင်းမွန်သောရလဒ်မျိုး ထွက်ပေါ်လာလိမ့်မည်ဟု သူ မျှော်လင့်မထားခဲ့ချေ။ သို့သော် ကျုံးချင်သည် သတိမပေါ့ဆခဲ့ပေ။ ဤနေရာရှိ နတ်ဆိုးချီစွမ်းအင်များသည် ယန်သုံးပါးနယ်ပယ် ပထမအဆင့် ကျင့်ကြံသူဖြစ်သည့် သူပင်လျှင် တိုက်စားခံခဲ့ရလုနီးပါး ဖြစ်ခဲ့သည်အထိ ကြောက်မက်ဖွယ်ကောင်းသည်။

"ဒီနေရာမှာ အစောင့်အရှောက်တွေ ဒါမှမဟုတ် ထူးဆန်းတဲ့ တည်ရှိမှုမျိုးတွေ ရှိနေမလားဆိုတာ ငါ မသိဘူး....တကယ်လို့ ရှိနေမယ်ဆိုရင် ငါ့ရဲ့ စွမ်းအားနဲ့ အဲ့ဒီနတ်ဆိုးအုပ်စုကို နှိမ်နင်းနိုင်ပါ့မလား..."

ကျုံးချင်၏စိတ်နှလုံးသား အနည်းငယ် လေးလံသွားပေ၏။ သို့သော် သူသည် အလွန်အမင်း စိုးရိမ်မနေချေ။ နှစ်ပေါင်းများစွာအတွင်း၌ သူ ရရှိထားသည့် ဝှက်ဖဲများနှင့်ဆိုလျှင် သူသည် ထိုနတ်ဆိုးများကို အနိုင်မယူနိုင်ခဲ့လျှင်ပင် အထိအခိုက်မရှိ ဆုတ်ခွာနိုင်မည်ဟု ယုံကြည်ချက်ရှိသည်။

သူ ထိုသို့တွေးတောရင်း ယဇ်ပလ္လင်ပေါ်သို့ တက်လိုက်သည်။ နေရာအကန့်အသတ်ရှိသောကြောင့် သူသည် သုညစည်းတံဆိပ်ကို ခါးတွင်ချိတ်သည့် ဆွဲသီးတစ်ခုအဖြစ် ပြောင်းလဲလိုက်ပြီး နတ်ဆိုးသခင်၏အငွေ့အသက်များကိုသာ သူ၏ခန္ဓာကိုယ်နံဘေးပတ်လည်တွင် ထားရှိလိုက်၏။

ကျုံးချင် ယဇ်ပလ္လင်ပေါ်သို့ တက်လိုက်သည်နှင့် အနက်ရောင်အလင်းတန်းတစ်တန်း ဖြတ်ပြေးသွားပြီး လောကကြီး ပြောင်းလဲသွားကာ ကြယ်တာရာများ ရွေ့လျားသွားသကဲ့သို့ သူ ခံစားလိုက်ရသည်။ သူ ပြန်လည်ထွက်ပေါ်လာသည့်အချိန်တွင်မူ သူသည် အခြားနယ်မြေတစ်ခုသို့ ရောက်ရှိနေလေပြီ။

ထိုယဇ်ပလ္လင်မှာ 'နတ်ဆိုးစင်မြင့်' ဟု အမည်ရပြီး တခြားနယ်မြေတစ်ခုသို့ ဆက်သွယ်ထားခြင်းပင်။ ကျုံးချင် ရှာဖွေနေသည့် အစစ်အမှန် နတ်ဆိုးအမွေအနှစ်သည် ထိုယဇ်ပလ္လင်နှင့် ဆက်သွယ်ထားသော လေဟာနယ်ထဲတွင် ရှိနေသည်မှာ သိသာထင်ရှားသည်။

ယဇ်ပလ္လင်၏နောက်ကွယ်ရှိ လေဟာနယ်အတွင်းတွင် မှောင်မည်းနေသော မြို့ကြီးတစ်မြို့ တည်ရှိသည်။

ဤနေရာတွင် ပြာလွင်သော ကောင်းကင် ဖြူစင်သော တိမ်တိုက်များ ကြယ်နှင့်လများ မရှိဘဲ အဆုံးမဲ့သောမှောင်မိုက်မှုသာ ရှိနေသည်။ မြို့ကြီးသည်လည်း တစ်ဝက်ခန့် ပြိုကျပျက်စီးနေကာ ခြောက်ကပ်ပြီး ဆိတ်သုဉ်းနေပေ၏။

ကျယ်ပြန့်သော မိုးကောင်းကင်ယံတွင် သွေးများသည် လေဟာနယ်နှင့် တသားတည်း ဖြစ်နေသည့်အလားပင်။ ထိုသွေးများသည် ကြည်လင်နေပြီး ပျံ့လွင့်မသွားဘဲ သန့်စင်ကာ ထူးကဲသော ခံစားချက်ကို ပေးစွမ်းနေသည်။

ကျုံးချင်သည် တိတ်တဆိတ် အံ့အားသင့်သွားသည်။ လေဟာနယ်ထဲတွင် ပျံ့လွင့်နေသော သွေးများသည် သူ့အတွက် အမှန်တကယ့်ကို အမြင်ကျယ်စေသည့် မြင်ကွင်းပင်။

သူ၏ခန့်မှန်းချက် မှန်ကန်ပါက ထိုသွေးများသည် နတ်ဘုရားသွေးများ ဖြစ်ပေလိမ့်မည်။ သူ လာခဲ့သည့် လမ်းတစ်လျှောက်တွင် မြင်တွေ့ခဲ့ရသည့် အရာအားလုံးမှာ ပျက်စီးယိုယွင်းမှုများသာ ဖြစ်ပေ၏။ တောင်နှင့်မြစ်များ ပျက်စီးနေပြီး ကြယ်တာရာများ ကြွေလွင့်သည်။ နတ်ဆိုးသွေးများ မိုးကောင်းကင်ယံသို့ မြင့်တက်နေပြီး နတ်ဘုရားသွေးများ နေရာအနှံ့အပြား၌ ပြန့်ကျဲနေသည်။ ဤနေရာတွင် ကောင်းကင်နှင့်မြေပြင်၏ ဥပဒေသများပင် ကျိုးပဲ့ပျက်စီးနေပေ၏။

အတိတ်တွင် ဖြစ်ပွားခဲ့သော စစ်ပွဲသည် မည်မျှထိ ကြောက်မက်ဖွယ်ကောင်းခဲ့သည်ကို ခန့်မှန်းရန် မခက်ခဲချေ။ ဤတိုက်ပွဲသည် နယ်မြေတစ်ခုလုံးကို အပိုင်းပိုင်းအစစ ဖြစ်သွားစေခဲ့သည်။ စစ်မြေပြင်၏အကျိုးဆက်ကြောင့် နှစ်ပေါင်းသောင်းနှင့်ချီ၍ ကြာခဲ့သော်လည်း ဤနေရာကို မြက်တစ်ပင် မပေါက်သည့် လူသူကင်းမဲ့သော စွန့်ပစ်မြေရိုင်းအဖြစ် တည်ရှိနေစေဆဲပင်။ ထိုစဉ်က နတ်ဘုရားများနှင့်နတ်ဆိုးများ မည်မျှထိ အစွမ်းထက်ခဲ့သည်ကို တွေးတောကြည့်၍ ရနိုင်သည်။

သို့သော် သူသည် ရှေးဟောင်းသမိုင်းကို လေ့လာရန် လာခဲ့ခြင်း မဟုတ်ချေ။ သူသည် အစစ်အမှန် နတ်ဆိုးအမွေအနှစ်ကို ရှာဖွေရန် လာခဲ့ခြင်းပင်။ ဤသို့တွေးတောရင်း ကျုံးချင်သည် ပတ်ဝန်းကျင်ကို တစ်ချက်ကြည့်ကာ ထိုမှောင်မိုက်နေသော မြို့ကြီးထဲသို့ လျှောက်လှမ်းဝင်လာခဲ့သည်။

ကျုံးချင် မြို့ထဲသို့ ခြေချလိုက်သည်နှင့် ပတ်ဝန်းကျင်ရှိ လေဟာနယ်ထဲမှ နတ်ဆိုးချီစွမ်းအင်များ လှုပ်ခတ်လာခဲ့သည်။ မိုးကောင်းကင်ယံထက်မှ အော်ငေါက်သံတစ်သံ ရုတ်တရက် ထွက်ပေါ်လာပေ၏။

"ငါတို့ရဲ့ နတ်ဆိုးမျိုးနွယ်စုနယ်မြေထဲကို ဘယ်သူက ကျူးကျော်ဝင်ရောက်ရဲတာလဲ..."

ထိုအသံသည် မိုးကြိုးပစ်သံအလားပင်...

လေဟာနယ်တစ်ခုလုံး တုန်ခါသွားကာ မိုးကောင်းကင်ယံတွင် တောင်တစ်လုံးကဲ့သို့ ကြီးမားသော မျက်နှာကြီးတစ်ခု ထွက်ပေါ်လာသည်။ ထိုကြီးမားသော မျက်နှာကြီးကြောင့် မြေပြင်ထက်သို့ အရိပ်မည်းကြီး ကျရောက်လာစေသည်။ ကြောက်မက်ဖွယ်ကောင်းသော ဖိအားကြောင့် ကျုံးချင်၏စိတ်နှလုံးသား လေးလံသွားခဲ့သည်။

ယခုရောက်ရှိလာသူ၏ ကျင့်ကြံဆင့်သည် သူ့ထက် မြင့်မားနေပေ၏။