အခန်း (၂၇၈)

နဂါးကျားဂိုဏ်း၏ မြေအောက်ဌာနချုပ်ကို အနှံ့အပြား ရှာဖွေပြီးနောက် လုချွမ်းသည် သူ၏ ဇွန်ဘီရုပ်သေးများကို အမိန့်ပေးကာ ရရှိလာသော လက်ရဖလှယ်ပစ္စည်း အမြောက်အမြားကို ရပ်ကွက်ရှိရာသို့ ပြန်လည်သယ်ယူစေခဲ့သည်။

အမှတ် ၈ အဆောက်အအုံ၊ တတိယထပ်။

"လုချွမ်း... ဒီပစ္စည်းတွေအကုန်လုံးကို ဘယ်ကနေ ရလာတာလဲ"

ဇွန်ဘီများက တစ်ကောင်ပြီးတစ်ကောင် အိမ်ထဲသို့ ပစ္စည်းမျိုးစုံ သယ်ယူလာကြသည်ကို မြင်သောအခါ ကျောက်လင်းက အံ့ဩတကြီး မေးမြန်းလိုက်သည်။ တစ်ချက်ကြည့်လိုက်ရုံနှင့်ပင် ဆန်၊ ဂျုံမှုန့်နှင့် အဝတ်အထည်မျိုးစုံကို တွေ့ရရာ စူပါမားကက်တစ်ခုလုံးကို လုယက်လာသည့်အလားပင်။

"နဂါးကျားဂိုဏ်းဆီက"

လုချွမ်းသည် ဇွန်ဘီရုပ်သေးများကို ညွှန်ကြားနေရင်း ကျောက်လင်း၏အသံကို ကြားသောအခါ စက္ကူပေါ်တွင် ရေးသား၍ ပြလိုက်သည်။

"နင် နဂါးကျားဂိုဏ်းကို အမြစ်ပြတ်ရှင်းပစ်လိုက်ပြီလား"

ကျောက်လင်းမှာ အစက အံ့ဩသွားသော်လည်း နောက်ပိုင်းတွင် အနည်းငယ် မကျေမနပ်

ဖြစ်ကာ ဗျစ်တောက်ဗျစ်တောက် ပြောလေသည်။

"အား... လုချွမ်း၊ ဘာလို့ ငါ့ကိုမခေါ်တာလဲ။ အဲဒီယုတ်မာတဲ့ကောင်တွေကို ငါကိုယ်တိုင် သွားရှင်းမလို့ စဉ်းစားနေတာ။ နင်က အရင်လက်ဦးသွားလိမ့်မယ်လို့ မထင်ထားဘူး"

လုချွမ်းက ထိုမိန်းမကို ဂရုမစိုက်ဘဲ ဇွန်ဘီရုပ်သေးများကိုသာ ဆက်လက်ညွှန်ကြားနေပြီး ရိက္ခာများကို အမျိုးအစားခွဲကာ စနစ်တကျ စီခိုင်းနေသည်။

လုချွမ်းက သူမကို လျစ်လျူရှုထားသည်ကို မြင်သဖြင့် ကျောက်လင်းမှာ ဘာမှမတတ်နိုင်တော့ပေ။ ထို့နောက် သူမသည် နဂါးကျားဂိုဏ်း၏ ပစ္စည်းများကို စူးစမ်းရှာဖွေကြည့်ရာ သေတ္တာအချို့အတွင်း စုပုံထားသော သေနတ်နှင့် ခဲယမ်းအမြောက်အမြားကို ရုတ်တရက် တွေ့ရှိသွားခဲ့သည်။

"နဂါးကျားဂိုဏ်းက ဒီသေနတ်တွေနဲ့ ကျည်ဆန်တွေကို ဘယ်ကရတာလဲ"

သေတ္တာထဲရှိ ပစ္စည်းများကို ကြည့်ရင်း ကျောက်လင်း မျက်မှောင်ကြုတ်လိုက်သည်။ တစ်ခုခုတော့ မှားနေပြီဟု သူမ သိလိုက်သည်။ သာမန်အခြေအနေတွင် ရဲစခန်းတစ်ခု၌ပင် ဤမျှများပြားသော ရိုင်ဖယ်အရှည်များကို မတွေ့နိုင်ချေ။ လက်ပစ်ဗုံးများနှင့် တစ်ကိုယ်ရေသုံး ဒုံးပစ်လောင်ချာများအကြောင်း ဆိုဖွယ်ရာမရှိပေ။

ဤအရာများသည် သာမန်မြို့ပြတစ်ခုတွင် မရှိသင့်သော စစ်လက်နက်ပစ္စည်းများ ဖြစ်သည်။

ကျောက်လင်းသည် သူမ၏ ရင်ထဲမှ သံသယများကို မျိုသိပ်ထားလိုက်ပြီး ဆက်လက်မတွေးတောတော့ဘဲ အခြားရိက္ခာများကိုသာ စူးစမ်းရန် ပြောင်းလဲလိုက်တော့သည်။

"ဒါက... မောက်ထိုင်အရက်တွေလား။ ဒီနဂါးကျားဂိုဏ်းကကောင်တွေကတော့ တကယ့်ကို အပျော်အပါး မက်ကြတာပဲ"

"ဝါး... ဆေးလိပ်တွေလည်း အများကြီးပဲ..."

"..."

ကျောက်လင်းသည် စိတ်လှုပ်ရှားစွာ ရေရွတ်ရင်း ရိက္ခာပုံကြီးထဲ၌ လိုချင်တာများကို ရှာဖွေနေသည်။ သူမ မမျှော်လင့်ထားသော ပစ္စည်းတစ်ခုခုကို တွေ့တိုင်းလည်း နဂါးကျားဂိုဏ်းကို တစ်ခွန်းပြီးတစ်ခွန်း ဆဲဆိုနေလေသည်။

ကျောက်လင်း၏ ဗျစ်တောက်ဗျစ်တောက် ပြောဆိုသံများကို လျစ်လျူရှုပြီး လုချွမ်းသည် သူ၏ဘေးမှ ဇွန်ဘီရုပ်သေးတစ်ကောင်ထံမှ သစ်သားသေတ္တာအသေးလေးတစ်လုံးကို ယူလိုက်သည်။ ထို့နောက် ၎င်းကိုဖွင့်ကာ ကျောက်လင်း ပစ္စည်းရှာနေသည်ကို ငေးကြည့်နေသော ချီချီလေးထံသို့ ကမ်းပေးလိုက်သည်။

သေတ္တာထဲတွင် လုချွမ်း နဂါးကျားဂိုဏ်းထံမှ သိမ်းဆည်းလာခဲ့သည့် မျိုးဗီဇဆင့်ကဲဆေးရည် ပုလင်းလေးများ ရှိနေသည်။

သူက စက္ကူပေါ်တွင် "ချီချီလေး... ဒါလေးတွေ သောက်တာက သမီးအတွက် အကျိုးရှိလိမ့်မယ်" ဟု ရေးသားလိုက်သည်။

ကျိရုရွှယ်သည် သေတ္တာထဲရှိ ပုလင်းလေးများကို ကြည့်ကာ ၎င်းတို့မှာ အခြေခံမျိုးဗီဇဆေးရည်များဖြစ်ကြောင်း ချက်ချင်း မှတ်မိသွားသည်။ ဤအဆင့်ရှိသော ဆေးရည်များသည် အဆင့် ၁ နှင့် အဆင့် ၂ ဆင့်ကဲပြောင်းလဲသူများအတွက်သာ အသုံးဝင်ခြင်းဖြစ်သည်။ သူမသည် အဆင့် ၄ သို့ ရောက်ရှိနေပြီဖြစ်ရာ ဤဆေးရည်များကို သောက်ခြင်းမှာ ရေသောက်သကဲ့သို့ပင် ထူးခြားမှု ရှိမည်မဟုတ်ပေ။

သို့သော်လည်း ဤအရာမှာ သူမ၏ ဖေဖေပေးသော လက်ဆောင်ဖြစ်သဖြင့် သူမ မငြင်းဆန်နိုင်ပေ။

သူမသည် ထိုသစ်သားသေတ္တာလေးကို ယူ၍ ရင်ခွင်ထဲပိုက်ကာ ရွှင်ပျစွာ ပြောလိုက်သည်။

"ကျေးဇူးတင်ပါတယ် ဖေဖေ။ ချီချီ သောက်ပါ့မယ်"

ထိုစကားကို ကြားသောအခါ လုချွမ်းက ကျေနပ်စွာ ပြုံးလိုက်ပြီး ချီချီလေး၏ ခေါင်းကို ပုတ်ပေးလိုက်သည်။

ဤမျိုးဗီဇဆင့်ကဲဆေးရည်များဖြင့် ချီချီလေးသည် အဆင့် ၂ သို့ ပိုမိုမြန်ဆန်စွာ ရောက်ရှိနိုင်မည်ဖြစ်ပြီး သူမ၏ ကိုယ့်ကိုယ်ကိုယ် ကာကွယ်နိုင်စွမ်းမှာလည်း ပိုမိုအားကောင်းလာပေလိမ့်မည်။ ချီချီလေး၏ ဖခင်တစ်ဦးအနေဖြင့် လုချွမ်းသည် သူမကို ကိုယ်တိုင်တိုက်ခိုက်ရန် မလိုအပ်သော်လည်း အင်အားကြီးမားလာခြင်းက သူမအတွက် ကောင်းကျိုးသာ ဖြစ်စေမည်ဖြစ်သည်။

ထို့အပြင် ဘဝဆိုသည်မှာ ခန့်မှန်းရခက်လှပြီး သူ့ထံ၌ မမျှော်လင့်ထားသော အန္တရာယ်တစ်ခုခု ကျရောက်လာမည်မဟုတ်ဟုလည်း လုချွမ်း မအာမခံနိုင်ချေ။ ချီချီလေး ပိုမိုအစွမ်းထက်လာလေလေ ဤကမ္ဘာပျက်ကပ်ဘေးကြီးထဲတွင် အသက်ရှင်သန်နိုင်ခြေ ပိုများလေလေပင်။

......

ညမှောင်လာသောအခါ ကျောက်လင်းက နဂါးကျားဂိုဏ်း ပျက်စီးသွားသည်ကို ဂုဏ်ပြုချင်

သည်ဟု ပြောကာ အောက်ထပ်၌ အသားကင်ပွဲတစ်ခုကို သူမကိုယ်တိုင် စတင်ပြုလုပ်နေတော့သည်။

အမှန်တော့ သူမက အသားကင်မည်ဟု ဆိုသော်လည်း တကယ်တမ်းတွင်မူ ဟင်းသီးဟင်းရွက် ဆေးကြောခြင်း၊ အသားလှီးခြင်းနှင့် အသားများကို တုတ်ထိုးခြင်း စသည့် ဝေယျာဝစ္စများကိုသာ ကူညီပေးခြင်း ဖြစ်သည်။

လုချွမ်းကသာ အသားကင်တုတ်များကို လှန်ပေးခြင်း၊ မီးအရှိန်ကို ထိန်းညှိခြင်းနှင့် အချိန်ကိုက် ဆား၊ နယ်ဖတ်စာများ ထည့်ခြင်းတို့ကို တာဝန်ယူထားရသည်။ တစ်ဖက်တွင်မူ ချီချီလေးမှာမူ အားရပါးရ စားသောက်ရန်သာ အာရုံစိုက်နေတော့သည်။

"ဟီးဟီး... လုချွမ်း ငါ့ကို နောက်ထပ် တစ်ပုလင်းလောက် ပေးပါဦး"

နဂါးကျားဂိုဏ်းထံမှ ရိက္ခာများ ရရှိပြီးနောက်တွင်မူ သူတို့သည် အစားအသောက်များကို စိတ်ကြိုက် စားသောက်ခွင့် ရရှိသွားကြသည်။ ထမင်းစားပွဲတွင် အရက် ၃၊ ၄ ပုလင်းခန့် မော့ထားသော ကျောက်လင်းမှာမူ မျက်နှာတစ်ခုလုံး နီမြန်းကာ မျက်လုံးများ ရီဝေလျက် လုံးဝကို မူးနောက်နေသည့် အခြေအနေသို့ ရောက်ရှိနေပြီ ဖြစ်သည်။

"ငါ သိတယ်... ဒီမိန်းမကို အများကြီး မသောက်ခိုင်းလိုက်သင့်ဘူး"

ကုလားထိုင်ပေါ်တွင် ပုံပျက်ပန်းပျက် ထိုင်နေသော ကျောက်လင်းကို ကြည့်ရင်း လုချွမ်းက မျက်မှောင်ကြုတ်လိုက်မိသည်။ သူမ၏ အရက်ခံနိုင်ရည်မှာ တကယ်ပင် ညံ့ဖျင်းလှကြောင်း သူ သတိပြုလိုက်မိသည်။

"ဖေဖေ... အန်တီကျောက်လင်းကို ထပ်မတိုက်နဲ့တော့နော် သူမ တော်တော်မူးနေပြီ"

ကျိရုရွှယ်ကလည်း ကျောက်လင်း၏ အခြေအနေကို သတိပြုမိသွားပြီး အမြန် သတိပေးလိုက်လေသည်။ ထိုစကားကို ကြားသောအခါ လုချွမ်းက ခေါင်းညိတ်ပြလိုက်သည်။

သူမကို ဆက်သောက်ခွင့်ပေး၍ မဖြစ်တော့ပေ။ မဟုတ်လျှင် ဘယ်လို ပြဿနာတွေ ထပ်ရှာဦးမလဲ မသိနိုင်ချေ။ လုချွမ်း၏ စိတ်အမိန့်ကြောင့် သူ၏ဘေးတွင် ရပ်နေသော ဇွန်ဘီရုပ်သေးက သူ၏ခြေရင်းရှိ အရက်ဖာကို ချက်ချင်း မယူသွားတော့သည်။

"ဟွန့်... မရှိတော့ဘူးလား... မသောက်ဘူး..."

မူးနေသော ကျောက်လင်းသည် လုချွမ်းကို စိုက်ကြည့်ရင်း ယိုင်တိုင်တိုင်ဖြင့် ထရပ်လိုက်သည်။ သူမက မျက်တောင်တခတ်ခတ်လုပ်ပြီး အနီးနားရှိ တာဖန်းကို လက်ညှိုးညွှန်ကာ အော်

ပြောလိုက်သည်။

"လုချွမ်း... မြန်မြန်လုပ် ဒီကောင်ကြီးကို ငါနဲ့ အလှည့်ကျ လေ့ကျင့်ပေးဖို့ ခိုင်းစမ်း"

ပြောပြောဆိုဆိုဖြင့် ကျောက်လင်းမှာ တာဖန်းရှိရာသို့ ယိုင်ထိုးကာ လျှောက်သွားလေတော့သည်။ ကျောက်လင်း၏ မူးရူးပြီး သောင်းကျန်းနေသော အမူအရာကို ကြည့်ရင်း ကျိရုရွှယ်မှာ စိတ်ပျက်လက်ပျက်ဖြင့် မျက်နှာကို လက်နှင့် အုပ်ထားလိုက်မိသည်။

ဒီမိန်းမကို နောက်တစ်ခါ ဘယ်တော့မှ အရက် အလွန်အကျွံ မသောက်ခိုင်းတော့ဘူး။

သူမ စိတ်ထဲက ကျိန်ဆိုနေမိသည်။ တကယ့်ကို အရှက်ရစရာပင်။

အဆင့် ၃ ဆင့်ကဲပြောင်းလဲသူတစ်ဦးဖြစ်ပါလျက် အဆင့် ၄ ဇွန်ဘီကို စိန်ခေါ်ခြင်းမှာ မိမိကိုယ်မိမိ သေတွင်းထဲသို့ ဆွဲချနေခြင်းပင်။

ကျောက်လင်း၏ တောင်းဆိုမှုကို ကြားရသောအခါ လုချွမ်း၏ မျက်နှာတွင် ထူးဆန်းသော အမူအရာတစ်ခု ပေါ်ပေါက်လာသည်။ ဤကဲ့သို့သော တောင်းဆိုမှုမျိုးကို သူ တစ်ကြိမ်တစ်ခါမျှ မကြားဖူးခဲ့ချေ။ သို့သော်လည်း ကျောက်လင်းကိုယ်တိုင် အခိုင်အမာ တောင်းဆိုလာသဖြင့် လုချွမ်းအနေဖြင့် မငြင်းသာတော့ဘဲ ဤအမျိုးသမီးအား တာဖန်း၏ ပြင်းထန်သော သံလက်သီးအရသာကို မြည်းစမ်းကြည့်စေရန် ခွင့်ပြုလိုက်တော့သည်။

"ဟေ့ လူကောင်ကြီး... သတိထားစမ်း"

ကျောက်လင်းသည် ယိုင်တိယိုင်တိုင်ဖြင့် တာဖန်းအနီးသို့ ချဉ်းကပ်သွားပြီး မျက်လုံးများကို အတင်းပြူးကြည့်ကာ ရုတ်တရက် ခုန်တက်၍ လက်သီးဖြင့် ထိုးနှက်လိုက်သည်။ သို့သော် ဝေဝါးနေသော အသိစိတ်ကြောင့် တာဖန်း၏ ဘယ်ဘက်ရင်အုံကို ပစ်မှတ်ထားသော်လည်း ညာဘက်သို့သာ လွဲချော်ရောက်ရှိသွားသည်။

ထိုအခိုက်အတန့်တွင် လုချွမ်း၏ စိတ်အမိန့်ကြောင့် တည်ငြိမ်နေသော တာဖန်းသည် ချက်ချင်း လှုပ်ရှားလာတော့သည်။

ဘုန်း...

တာဖန်းက လက်သီးကို အသာအယာ ဝှေ့ယမ်းလိုက်ရုံမျှရှိသော်လည်း ကျောက်လင်းမှာ တာဖန်းကို တိုက်ခိုက်နိုင်ခြင်း မရှိမီမှာပင် ကြိတ်ဆုံကျောက်တုံးခန့်ရှိသော လက်သီးကြီး၏ အရှိန်ကြောင့် လွင့်စင်ထွက်သွားသည်။ သူမသည် မီတာ ဒါဇင်ပေါင်းများစွာအကွာသို့ ပျံထွက်သွားကာ မြေပြင်ပေါ်သို့ ပြင်းထန်စွာ ကျရောက်၍ လိမ့်ထွက်သွားလေသည်။

"အား... နာလိုက်တာ"

ပြင်းထန်သော နာကျင်မှုကြောင့် ကျောက်လင်း၏ မူးရူးနေသော အသိစိတ်များ ချက်ချင်း လန်းဆန်းသွားသော်လည်း သူမ မတ်တပ်ထရပ်ချိန်တွင် တာဖန်းက တစ်ဖန် အရှိန်အဟုန်ဖြင့် ပြေးဝင်လာပြန်သည်။

"လုချွမ်း... ငါ စတာပါဆို"

ကျောက်လင်း ထိတ်လန့်သွားကာ စကားပင် မဆုံးသေးမီမှာပင် တာဖန်း၏ ထိုးချက်ကြောင့် တစ်ဖန် လွင့်ထွက်သွားပြန်ရာ ကြည့်ရသည်မှာ အလွန်ပင် သနားစရာ ကောင်းလှသည်။ တာဖန်းသည်လည်း အလျှော့မပေးဘဲ သူမနောက်သို့ ထပ်ကြပ်မကွာ လိုက်လံတိုက်ခိုက်နေတော့သည်။

ဘုန်း... ဘုန်း...

ထို့နောက်တွင်မူ ကျောက်လင်း၏ နာကျင်စွာ အော်ဟောက်သံများသည် ရပ်ကွက်တစ်ခုလုံးတွင် ပဲ့တင်ထပ်သွားလေသည်။ လုချွမ်းသည် တာဖန်းအား ကျောက်လင်းကို မညှာမတာ ဆုံးမရန် အမိန့်ပေးထားရင်း အခြားသော အရေးကြီးကိစ္စရပ်များကို အတွေးဝင်နေမိသည်။

၎င်းတို့မှာ နဂါးကျားဂိုဏ်းနှင့် အာဏာပိုင်များအကြား ဆက်သွယ်မှုများနှင့် ယနေ့ လွတ်မြောက်သွားသော ဂိုဏ်းဝင်နှစ်ဦးတို့၏ ကိစ္စပင်။ နဂါးကျားဂိုဏ်းသည် အာဏာပိုင်များနှင့် ပူးပေါင်းကြံစည်နေသည်မှာ သေချာလှသည်။ မဟုတ်ပါက ဤမျှများပြားသော စစ်လက်နက်ပစ္စည်းများကို မည်သို့မျှ ရရှိနိုင်မည်မဟုတ်ပေ။ ယခုအခါ သူက နဂါးကျားဂိုဏ်းကို အမြစ်ပြတ် ချေမှုန်းလိုက်ပြီဖြစ်ရာ လွတ်မြောက်သွားသူနှစ်ဦးသည် အာဏာပိုင်များထံသို့ သတင်းပေးပို့ကြမည်မှာ ဧကန်မလွဲပင်။

ထိုအခါ သူ၏ တည်နေရာသည် အာဏာပိုင်တို့၏ စောင့်ကြည့်မှုအောက်သို့ တစ်ဖန် ပြန်လည်ရောက်ရှိသွားမည်ဖြစ်သည်။ ထို့ကြောင့် ပိုင်ချန်မြို့သည် သူတို့အတွက် ရေရှည်ခိုလှုံရန် မသင့်တော်သော နေရာတစ်ခု ဖြစ်လာသည်။