အသက်ရှင်ကျန်သူတို့ကမ္ဘာ

ရွှီရှင်းသည် သိပ်သည်းလှသော တောနက်ကြီးတစ်ခုအတွင်း နိုးထလာခဲ့သည်။

ပတ်ဝန်းကျင်မှ ပုရစ်၊ အင်းဆက်မျိုးစုံတို့၏ ဆူညံသံများက သူ့အား ဆက်လက်အိပ်စက်ခွင့် မပေးတော့ချေ။ သူသည် ရုတ်တရက် ထထိုင်လိုက်ပြီးနောက် မိမိမှာ စတုရန်းပုံ ကျောက်ဖျာချပ်ကြီးတစ်ခုပေါ်တွင် ရောက်ရှိနေကြောင်း သတိပြုမိလိုက်သည်။ ပတ်ပတ်လည်တွင်တော့ စိမ်းစိုသိပ်သည်းလှသော တောအုပ်ကြီးသာ ရှိနေ၏။

"...."

ရွှီရှင်း၏ စိတ်များ ဝေဝေဝါးဝါး ဖြစ်နေဆဲပင်။

သူမျက်လုံးများကို ပွတ်သပ်လိုက်ပြီး တစ်ကိုယ်လုံး ကိုက်ခဲနေကာ မြေပြင်ပေါ်တွင် တစ်ညလုံး အိပ်စက်ခဲ့ရသလိုပင်။

"ဒါ တကယ်ကြီးလား..."

တစ်စုံတစ်ရာကို အချိန်အတော်ကြာ ငေးနေပြီးနောက် ရွှီရှင်းသည် ဤအရာမှာ အိပ်မက်မဟုတ်ဘဲ လက်တွေ့ဘဝဖြစ်ကြောင်း လက်ခံလိုက်ရတော့သည်။

လွန်ခဲ့သောညက သူသည် အဝတ်အစားများချွတ်၍ အိပ်ရာထဲသို့ ဝင်ခဲ့ကြောင်း သေချာပေါက် မှတ်မိနေသည်။ သို့သော် ယခုမူ မရင်းနှီးသော တီရှပ်နှင့် ဘောင်းဘီတိုကို ဝတ်ဆင်လျက် ဤနေရာသို့ မည်ကဲ့သို့ ရောက်ရှိနေရသနည်း။

ပြန်ပေးဆွဲခံရတာလား။

သူ အမျိုးမျိုး တွေးတောနေစဉ်မှာပင် ဦးနှောက်ထဲမှ ထွက်ပေါ်လာသော အသံတစ်ခုက သူ့အား လက်တွေ့ဘဝထဲသို့ ဆွဲခေါ်လိုက်သည်။

[အသက်ရှင်ကျန်ရစ်သူတို့ကမ္ဘာမှ ကြိုဆိုပါသည်။ ဤနေရာတွင် သင်၏ တစ်ခုတည်းသော ရည်မှန်းချက်မှာ အသက်ရှင်နေထိုင်ရန် ဖြစ်သည်။ သင်တစ်ချိန်က ပိုင်ဆိုင်ခဲ့သမျှကို မေ့ဖျောက်၍ အသက်ရှင်သန်နိုင်ရန်သာ ကြိုးစားပါ။ ကျွန်ုပ်တို့သည် အစပြုသူအားလုံးအတွက် အဖိုးတန်လက်ဆောင်တစ်ခုအဖြစ် 'သစ်ပင်အိမ်' ကို ပြင်ဆင်ပေးထားပါသည်။ မှတ်ထားရန်မှာ သင်၏ သစ်ပင်အိမ်ကို ဘယ်သောအခါမှ စွန့်ခွာခြင်းမပြုပါနှင့်၊ ၎င်းသည် သင်၏ တစ်ခုတည်းသော အားကိုးရာ ဖြစ်သည်။]

[သင်သည် 'သစ်ပင်အိမ်မျိုးစေ့ ၁ ခု' ကို ရရှိပြီး ဖြစ်သည်။ ကျေးဇူးပြု၍ သုံးရက်အတွင်း စိုက်ပျိုးရန် သင့်တော်သောနေရာကို ရွေးချယ်ပါ။ တစ်ကြိမ် စိုက်ပျိုးပြီးပါက သစ်ပင်အိမ်ကို ပြန်လည်ရွှေ့ပြောင်း၍ မရနိုင်တော့ပါ။]

[သင်သည် လက်ရှိတွင် အစပြုသူ ကာကွယ်စောင့်ရှောက်မှုအောက်၌ ရှိနေသည်။ အသက်ရှင်ကျန်ရစ်သူများသည် သုံးရက်အတွင်း မည်သည့်သားရဲ၏ တိုက်ခိုက်မှုကိုမျှ ခံရမည်မဟုတ်ပါ။ ကျေးဇူးပြု၍ သစ်ပင်အိမ်ကို အမြန်ဆုံး စိုက်ပျိုးပါ။]

ဘာ... သစ်ပင်....အိမ်မျိုးစေ့....အစပြုသူ ကာကွယ်စောင့်ရှောက်မှု...

ရွှီရှင်းသည် ကျောက်ဖျာပေါ်တွင် ကြောင်တောင်တောင်ဖြင့် ထိုင်နေဆဲမှာပင် သူ့ရှေ့၌ အလင်းလုံးတစ်ခု ရုတ်တရက် ပေါ်လာသည်။ သူက

ဗီဇအရ လက်ဖြင့် လှမ်းကိုင်လိုက်ရာ ဝါးသီးအရွယ်ခန့်ရှိသော မျိုးစေ့တစ်ခုက သူ့လက်ထဲသို့ ရောက်ရှိလာတော့သည်။

[သစ်ပင်အိမ်မျိုးစေ့ - သေးငယ်သော သစ်ပင်အိမ်တစ်ခုကို ရှင်သန်စေနိုင်ပြီး အသက်ရှင်ကျန်ရစ်သူအတွက် အခြေခံအကျဆုံး လုံခြုံမှုကို ပေးစွမ်းနိုင်သည်။ မြေဆီလွှာ ကောင်းမွန်သောနေရာကို ရှာဖွေရန် မမေ့ပါနှင့်။]

ရုတ်တရက် ရောက်ရှိလာသော အချက်အလက်များစွာကို ရွှီရှင်း အချိန်အတော်ကြာအောင် အစာခြေလိုက်ရသည်။

"ဒါက ဂိမ်းကမ္ဘာတစ်ခုလား၊ ဘာလို့ အစပြုသူလက်ဆောင်တွေ ရှိနေတာလဲ၊ ပြီးတော့ ငါ့ခေါင်းထဲက အသံက ဘာကြီးလဲ"

ရွှီရှင်းသည် ပုံမှန် နည်းလမ်းအတိုင်း မိမိကိုယ်ကို လက်သည်းဖြင့် ဆိတ်ကြည့်လိုက်ရာ သိသာထင်ရှားသော နာကျင်မှုကို ခံစားလိုက်ရသည်။

ရှေ့တွင် ပြောသွားသော 'အစပြုသူအားလုံး' ဆိုသည့် စကားအရ သူ့ကဲ့သို့ အခြေအနေမျိုး ကြုံတွေ့နေရသူများစွာ ရှိနေမည်မှာ သေချာသည်။ ဤနေရာသည် လူတိုင်း အသက်ရှင်ရန် ရုန်းကန်ရမည့် အသက်ရှင်ကျန်ရစ်ရေးဂိမ်းတစ်ခုနှင့် တူလှသည်။

အကယ်၍ ရှုံးနိမ့်သွားပါက သေဆုံးသွားမည်လား။

ရွှီရှင်း မသေချာသော်လည်း စမ်းသပ်ရန်တော့ မဝံ့ရဲချေ။ သူသည် ကျောက်ဖျာပေါ်မှ ဆင်းကာ ခန္ဓာကိုယ်ကို အနည်းငယ် လှုပ်ရှားလိုက်သည်။ ခန္ဓာကိုယ်က ပုံမှန်အတိုင်းပင်ဖြစ်ပြီး စွမ်းအင်များ ပြည့်ဝနေသည်။

သူ့လက်ထဲမှ မျိုးစေ့ကို စတင်စစ်ဆေးလိုက်သည်။

မျိုးစေ့မှာ အဝါဖျော့ရောင်ဖြစ်ပြီး ဝါးသီးအရွယ်ခန့်ရှိကာ အနည်းငယ် လေးလံသည်။ ကြက်ဥတစ်လုံးခန့် အလေးချိန် ရှိလိမ့်မည်။

ဤမျှ သေးငယ်သော မျိုးစေ့က သစ်ပင်အိမ်အဖြစ် ပြောင်းလဲသွားနိုင်သည်မှာ ထူးဆန်းလှသည်။ စိုက်ပျိုးပြီးလျှင် မည်မျှကြာအောင် စောင့်ရမည်နည်း။

မြေဆီလွှာကောင်းသောနေရာကို ရှာဖွေရန် ပြောကြားချက်မှာ အပျော်သဘော ရေးထားခြင်းလား၊ သို့မဟုတ် မြေဆီလွှာက သစ်ပင်အိမ်ကြီးထွားမှုအပေါ် တကယ် သက်ရောက်မှု ရှိသလား။

ရွှီရှင်းသည် သူ့ခြေထောက်အောက်ရှိ မြေကြီးကို ငုံ့ကြည့်လိုက်သည်။ ဤမြေသည် မြေဆီလွှာ ကောင်းမွန်သလား ညံ့ဖျင်းလား သူမသိပေ။

"ဒါက ဘယ်လိုဂိမ်းမျိုးလဲ။ အစပြုသူ လမ်းညွှန်တောင် မပါဘူး၊ လူတွေကို အကြောင်ရိုက်နေတာလား"

ရွှီရှင်းက မကျေမနပ် ရေရွတ်လိုက်သည်။ သူသည် ခရီးသွားဝါသနာပါသူတစ်ဦး ဖြစ်သောကြောင့် အလွန်အမင်းတော့ မထိတ်လန့်ချေ။ သုံးရက်ကြာ အကာအကွယ်ပေးထားမည် ဆိုသောကြောင့် လက်ရှိ အခြေအနေမှာ ဘေးကင်းသည်ဟု ဆိုနိုင်သည်။

ဘယ်သူက သူ့ကို ဒီနေရာကို ပို့လိုက်သလဲ မသိသော်လည်း ရောက်လာမှတော့ အသက်ရှင်ဖို့ နည်းလမ်း ရှာရပေမည်။

[ကမ္ဘာဖန်တီးသူ၏ လုပ်ပိုင်ခွင့်များကို ဖွင့်လှစ်နေသည်...]

ရုတ်တရက် ထွက်ပေါ်လာသော အသံကြောင့် ရွှီရှင်း လန့်သွားသည်။

"အခု ဘာဖြစ်ပြန်ပြီလဲ၊ ဖန်တီးသူရဲ့ လုပ်ပိုင်ခွင့်ဆိုတာ ဘာကြီးလဲ"

[ဖွင့်လှစ်ရန် ကျရှုံးသည်၊ ဒုတိယအကြိမ် ကြိုးစားနေသည်...]

[ဖွင့်လှစ်ရန် ကျရှုံးသည်၊ တတိယအကြိမ် ကြိုးစားနေသည်...]

ဘာတွေ ဖြစ်နေတာလဲ၊ စနစ်က ချွတ်ယွင်းနေတာလား။

ရွှီရှင်း စိုးရိမ်သွားသည်။ အစကတည်းက စနစ်က ချွတ်ယွင်းနေလျှင် ဒီဂိမ်းက ဘာအဓိပ္ပာယ် ရှိတော့မည်နည်း။

[ဖွင့်လှစ်ရန် ကျရှုံးသည်၊ သတ္တမအကြိမ် ကြိုးစားနေသည်...]

သတ္တမအကြိမ်မြောက်သို့ ရောက်သောအခါ ရွှီရှင်းသည် မည်သည့်လုပ်ပိုင်ခွင့်ကိုမျှ မမျှော်လင့်တော့ချေ။ အမှားအယွင်းတစ်ခုခု မဖြစ်ရန်သာ သူ ဆုတောင်းနေမိတော့သည်။

[ဖွင့်လှစ်ရန် ကျရှုံးသည်၊ တစ်စိတ်တစ်ပိုင်းသော လုပ်ပိုင်ခွင့်ကို ရရှိသည် - အရာဝတ္ထုများကို ခွဲခြားစစ်ဆေးနိုင်စွမ်း]

နောက်ဆုံးတွင် ကျရှုံးသွားသော်လည်း တစ်စိတ်တစ်ပိုင်းသော လုပ်ပိုင်ခွင့်ကို ရရှိခဲ့သည်။

ရွှီရှင်း၏ မျက်လုံးများ လင်းခနဲ ဖြစ်သွားသည်။ ဂိမ်းများစွာ ကစားဖူးသူဖြစ်သောကြောင့် 'ဖန်တီးသူအဆင့်' ဆိုသည်မှာ မည်မျှ အစွမ်းထက်ကြောင်း သူ သိသည်။ အကန့်အသတ်မဲ့ အရင်းအမြစ်များကို ရရှိမည့် အခြေအနေဖြစ်ပြီး ဂိမ်းထဲတွင် အပိုင်ခိုးနည်း သုံးထားသလိုပင် ဖြစ်သည်။

"အရာဝတ္ထုတွေကို ခွဲခြားစစ်ဆေးနိုင်စွမ်း ဟုတ်လား..."

ရွှီရှင်းသည် သူ့လက်ထဲမှ သစ်ပင်အိမ်မျိုးစေ့ကို ကြည့်လိုက်ရာ မျိုးစေ့၏ ရှင်းလင်းချက်မှာ ယခင်ကနှင့် မတူတော့ဘဲ ပြောင်းလဲသွားသည်ကို တွေ့လိုက်ရသည်။

[သစ်ပင်အိမ်မျိုးစေ့ - သေးငယ်သော သစ်ပင်အိမ်အဖြစ် ကြီးထွားနိုင်သည်။ မြေညံ့တွင် စိုက်ပျိုးပါက 'ပုကွသော သစ်ပင်အိမ်'၊ သာမန်မြေတွင် စိုက်ပျိုးပါက 'သစ်ပင်အိမ်အသေး' နှင့် မြေဆီလွှာကောင်းသောနေရာတွင် စိုက်ပျိုးပါက 'မြင့်မားသော သစ်ပင်အိမ်' အဖြစ် ရရှိမည် ဖြစ်သည်။]

ဒါက ဖန်တီးသူရဲ့ လုပ်ပိုင်ခွင့်ပေါ့၊ တကယ်ကို မဆိုးဘူးပဲ။

ရွှီရှင်း စိတ်လှုပ်ရှားသွားပြီး ခြေထောက်အောက်ရှိ မြေကြီးကို အာရုံစိုက်ကြည့်လိုက်သည်။

[မြေညံ့ (အဖြူရောင်အဆင့်) - အာဟာရဓာတ် နည်းပါးသော အသုံးအများဆုံး မြေအမျိုးအစား ဖြစ်သည်။]

သူ့အကြည့်များကို စုစည်းလိုက်သောအခါ မြေကြီးမှ ခပ်ဖျော့ဖျော့ အဖြူရောင်အလင်းတန်းများ ထွက်ပေါ်လာသည်။

ပတ်ဝန်းကျင်ရှိ မြေများကို ဝေ့ကြည့်လိုက်ရာ သူ့စိတ်အလိုအတိုင်း မြေများအားလုံးမှာ အဖြူရောင်အလင်းများ ထွက်ပေါ်လာတော့သည်။ သေသေချာချာ ကြည့်လိုက်သောအခါ အားလုံးမှာ အဖြူရောင်အဆင့် မြေညံ့များသာ ဖြစ်သည်။

ပတ်ဝန်းကျင်ကို သူ ဆက်လက် စူးစမ်းလိုက်သည်။

[ကျောက်ဖျာ (အဖြူရောင်အဆင့်) - အစပြုရာနေရာ။ အသက်ရှင်ကျန်ရစ်သူ၏ တစ်ကိုယ်လုံးကို ကိုက်ခဲအောင် လုပ်ပေးသည်မှလွဲ၍ အသုံးဝင်ပုံမရှိချေ။ ထုခွဲ၍ ရနိုင်သည်။]

[မိုးမခပင် (အဖြူရောင်အဆင့်) - တောအုပ်ထဲတွင် အတွေ့များသော သစ်ပင်၊ ထင်းအဖြစ် ခုတ်နိုင်သည်။]

[အဆိပ်မှို (အဖြူရောင်အဆင့်) - အဆိပ်ရှိသောမှို၊ သေချင်လျှင် စားသုံးနိုင်သည်။]

ဟင်? မှိုတွေ အဆိပ်ရှိမရှိတောင် သိနိုင်တာလား၊ ဒီစွမ်းရည်က တကယ်ကို အစွမ်းထက်တာပဲ။

ရွှီရှင်း စိတ်လှုပ်ရှားစွာဖြင့် ပတ်ဝန်းကျင်ကို လှည့်ကြည့်သော်လည်း စိတ်ပျက်စရာကောင်းသည်မှာ ပတ်ဝန်းကျင်ရှိ အရင်းအမြစ်အားလုံးမှာ အဖြူရောင်အဆင့်များသာ ဖြစ်နေခြင်းပင်။ သို့သော်လည်း ဒါက အစပြုရာနေရာ ဖြစ်သောကြောင့် ကောင်းမွန်သောအရာများ မရှိနိုင်သည်မှာ သဘာဝကျလှသည်။

ယခု လက်ရှိ ပန်းတိုင်မှာ မြေဆီလွှာကောင်းသောနေရာကို ရှာဖွေပြီး မျိုးစေ့စိုက်ရန် ဖြစ်သည်။ ယခုအချိန်တွင် သူ ဘာမှမသိသေးသော်လည်း ဤကမ္ဘာ၏ ထူးခြားချက်အားလုံးမှာ သစ်ပင်အိမ်ထဲတွင် ရှိနေနိုင်သည်။ စနစ်၏ ပြောကြားချက်အရ "သစ်ပင်အိမ်သည် သင်၏ တစ်ခုတည်းသော အားကိုးရာ" မဟုတ်ပါလား။

အကယ်၍ ရွှီရှင်းသည် အရာဝတ္ထု ခွဲခြားစစ်ဆေးနိုင်စွမ်းသာ မရရှိခဲ့ပါက မြေဆီလွှာကောင်းသောနေရာကို လိုက်ရှာနေပြီး အချိန်ဖြုန်းနေမည် မဟုတ်ပေ။ အဘယ်ကြောင့်ဆိုသော် မည်သည့်မြေက ကောင်းသည်၊ မကောင်းသည်ကို သူ ခွဲခြားနိုင်မည် မဟုတ်သောကြောင့် ဖြစ်သည်။ သို့သော် ယခုမူ သူ ယုံကြည်ချက်ရှိရှိဖြင့် ရှာဖွေနိုင်ပြီ ဖြစ်သည်။

သုံးရက်ဆိုသော အချိန်မှာ အစပြုသူ ကာကွယ်စောင့်ရှောက်မှုအောက်တွင် ရှိနေသောကြောင့် ရွှီရှင်းအတွက် လုံလောက်သော လုံခြုံမှု ရှိသည်။

ဆုံးဖြတ်ချက်ချပြီးနောက် ဝါးသီးအရွယ် မျိုးစေ့ကို ဘောင်းဘီအိတ်ထဲသို့ ထည့်လိုက်သည်။ ကျောက်ဖျာနှင့် ပတ်ဝန်းကျင်ကို သေသေချာချာ စစ်ဆေးပြီး အခြားကိရိယာများ မရှိကြောင်း သေချာမှ ခရီးစတင်ခဲ့သည်။

"အရမ်း တွန့်တိုတဲ့ ကမ္ဘာပဲ၊ အစပြုကိရိယာတောင် တစ်ခုမှ မပေးဘူး" သစ်ရွက်ခြောက်များကို နင်းလျှောက်ရင်း ရွှီရှင်းသည် ဦးတည်ချက်တစ်ခုအတိုင်း ရှေ့သို့ တိုးလာခဲ့သည်။ ဤလမ်းက ဘယ်ကို ဦးတည်မည်မှန်း မသိသော်လည်း တစ်နေရာတည်းတွင်တော့ ထိုင်မနေနိုင်ချေ။

သူ့စိတ်အလိုအတိုင်း ခွဲခြားစစ်ဆေးနိုင်စွမ်းကို အသက်သွင်းလိုက်ရာ ပတ်ဝန်းကျင်ရှိ အရာဝတ္ထုမျိုးစုံမှာ အဖြူရောင်အလင်းတန်းများ ထွက်ပေါ်လာသည်။ အစပြုသူ ကာကွယ်စောင့်ရှောက်မှုကြောင့် ဖြစ်နိုင်သည်၊ တောအုပ်ထဲတွင် အင်းဆက်သံများမှလွဲ၍ အခြားသားရဲများ မရှိချေ။

သူ့လေ့လာချက်အရ ဤစွမ်းရည်၏ အကွာအဝေးမှာ အလွန်ကျယ်ပြောသည်။ အမြင်အာရုံကို ပိတ်ဆို့နေသော ဤတောအုပ်ထဲတွင်ပင် အနီးအဝေးရှိ အရာအားလုံး၏ အလင်းတန်းများကို သူ မြင်နေရသည်။

"ဟင်"

သူ ဘယ်လောက် လျှောက်လာခဲ့မိသည်မသိ၊ ရွှီရှင်း၏ မြင်ကွင်းထဲသို့

စိမ်းစိုသော အရောင်တစ်ခု ဝင်ရောက်လာသည်။ သူ စိတ်အားထက်သန်သွားပြီး အစိမ်းရောင်အလင်းတန်းများ ထွက်ပေါ်နေသော နေရာသို့

အမြန်ဆုံး ပြေးသွားလိုက်တော့သည်။

---

အခန်း ၁ ပြီး..