အသစ်ပင်အိမ်၏ အတွင်းပိုင်း

ရွှီရှင်းသည် လှေကားအတိုင်း အပေါ်သို့ တက်လာခဲ့သည်။

သစ်ပင်အိမ်တစ်ခုလုံးမှာ သုံးထပ်ရှိသည်။ ဒုတိယထပ်မှာ ပထမထပ်နှင့် ဆင်တူပြီး ပြတင်းပေါက်အချို့မှလွဲ၍ ဟာလာဟင်းလင်း ဖြစ်နေသည်။ နံရံတစ်ခုပေါ်တွင်မူ အောက်ထပ်တွင် မြင်ခဲ့ရသော စက်ဝိုင်းပုံစံ အပြားတစ်ခု ရှိနေ၏။

"ဒါက အဝင်အထွက် နေရာလား..." ရွှီရှင်းသည် အထဲသို့ မဝင်သေးဘဲ တတိယထပ်သို့ ဆက်တက်ခဲ့သည်။

တတိယထပ်မှာမူ လုံးဝ ခြားနားနေသည်။ ထိုအထပ်သို့ ခြေချလိုက်သည်နှင့် ရွှီရှင်း၏ အာရုံမှာ နံရံတွင် မြှုပ်နှံထားသော ဧရာမ ဖန်သားပြင်ကြီးဆီသို့ ချက်ချင်း ရောက်သွားတော့သည်။

"ဟင်..."

ဒီလောက်အဆင့်မြင့်တဲ့ နည်းပညာတွေ ဘယ်လိုလုပ် ရောက်နေတာလဲ။

အနည်းဆုံး လက်မ တစ်ရာကျော်ခန့်ရှိမည့် ထိုဖန်သားပြင်ကြီးကို ကြည့်ရင်း ရွှီရှင်းမှာ အံ့အားသင့်ကာ ကြောင်အမ်းအမ်း ဖြစ်သွားရသည်။

တောနက်ထဲက အဆင့်မြင့် သစ်ပင်အိမ်မှာ တီဗွီတစ်လုံး ပါနေတာလား။ ဒီလို နေရာမျိုးမှာ လိုင်းရော မိပါ့မလား။

ဟုတ်ပေသည်၊ ဤကမ္ဘာကြီးကို သာမန် စဉ်းစား၍ မရနိုင်ချေ။ ရွှီရှင်းမှာ ခဏမျှ ကြောင်သွားပြီးနောက် ထိုဖန်သားပြင်ကြီးကို စူးစမ်းရန် ရှေ့သို့ တိုးသွားလိုက်သည်။

ဖန်သားပြင်မှာ နံရံတွင် ချိတ်ဆွဲထားခြင်း မဟုတ်ဘဲ သစ်သားနံရံအတွင်း တိုက်ရိုက် မြှုပ်နှံထားခြင်း ဖြစ်သည်။ ဖန်သားပြင်၏ ဘောင်မှာ သစ်ပင်၏ ကွင်းပုံစံ အစင်းကြောင်းများရှိသည့် သစ်သားနံရံပင် ဖြစ်သည်။

ရွှီရှင်းသည် လက်ဖြင့် စမ်းသပ်ကြည့်ရာ ချောမွေ့သော ခံစားချက်မှာ သာမန် တီဗွီဖန်သားပြင်နှင့် သိပ်မခြားနားလှပေ။ သို့သော် မည်မျှပင် ရှာဖွေစေကာမူ ခလုတ်တစ်ခုမျှ ရှာမတွေ့ခဲ့ချေ။

ဖန်သားပြင်ဘေးရှိ ကြမ်းပြင်ပေါ်တွင် စက္ကူကတ်ထူသေတ္တာ တစ်လုံးရှိသည်။ ရွှီရှင်း ဖွင့်ကြည့်လိုက်ရာ အထဲတွင် ရေ ငါးပုလင်းနှင့် ပေါင်မုန့် ငါးထုပ်ကို တွေ့လိုက်ရသည်။ ကြည့်ရသည်မှာ အစပြုသူများအတွက် ထောက်ပံ့ပေးထားသော ပစ္စည်းများ ဖြစ်ပုံရသည်။

ဤပစ္စည်းများကိုတော့ အလွယ်တကူ မသုံးစွဲသင့်ပေ။ ၎င်းတို့မှာ အထားခံသဖြင့် အရေးပေါ် ရိက္ခာအဖြစ် သိမ်းဆည်းထားရမည် ဖြစ်သည်။

ထိုစဉ်မှာပင် ဖန်သားပြင်မှာ ရုတ်တရက် လင်းထိန်လာခဲ့သည်။

[သစ်ပင်အိမ် ပိုင်ရှင်အဖြစ် စတင် သတ်မှတ်နေသည်...]

[လက်ရှိ အသုံးပြုနိုင်သော လုပ်ဆောင်ချက်များ - အခြေခံ အရင်းအမြစ်များ ပြုလုပ်ခြင်း၊ ဒေသတွင်း ဆက်သွယ်ရေး လိုင်း]

ဖန်သားပြင်ပေါ်တွင် ရွေးချယ်စရာများစွာ ပေါ်လာသော်လည်း ဤနှစ်ခုသာ လင်းနေသည်။ ကျန်ရှိသော အပိုင်းများမှာ မီးခိုးရောင်ဖြင့် ဖုံးအုပ်နေပြီး တစ်စုံတစ်ရာဖြင့် အားထုတ်ရဦးမည့် ပုံစံမျိုး ဖြစ်နေသည်။

ရွှီရှင်းသည် အခြေခံ အရင်းအမြစ်များ ပြုလုပ်ခြင်း ကို နှိပ်လိုက်သည်။ သူ ထင်ထားသည့်အတိုင်းပင် သစ်ပင်အိမ်ကို အသုံးပြု၍ ရိုးရှင်းသော ကိရိယာများနှင့် အသုံးအဆောင်များကို ပြုလုပ်နိုင်ပေသည်။

ကျောက်ပုဆိန်၊ ကျောက်ပေါက်ချွန်း၊ ကျောက်ဂေါ်ပြား အစရှိသည့် ကျောက်ကိရိယာများအပြင် သစ်သားကုတင်၊ စားပွဲ၊ ကုလားထိုင် စသည့် ရိုးရှင်းသော ပရိဘောဂများကိုလည်း ပြုလုပ်နိုင်သည်။

[ကျောက်ပုဆိန် (အဖြူရောင်အဆင့်) - အစိမ်းရောင်အဆင့်နှင့် သူ့အောက်ရှိ သစ်ပင်များကို ခုတ်လှဲနိုင်သည်။ ကြံ့ခိုင်မှု ၂၀၀ ရှိသည်။ သစ်ကိုင်း (အဖြူရောင်) သို့မဟုတ် သစ်သား (အဖြူရောင်) ၅ ခု နှင့် ကျောက်တုံး (အဖြူရောင်) ၅ လုံး လိုအပ်သည်။]

[ကျောက်ပေါက်ချွန်း (အဖြူရောင်အဆင့်) - အစိမ်းရောင်အဆင့်နှင့် အောက်ရှိ ကျောက်တုံးနှင့် သတ္တုရိုင်းများကို တူးဖော်နိုင်သည်။ ကြံ့ခိုင်မှု ၂၀၀ ရှိသည်။ သစ်ကိုင်း (အဖြူရောင်) သို့မဟုတ် သစ်သား (အဖြူရောင်) ၅ ခု နှင့် ကျောက်တုံး (အဖြူရောင်) ၅ လုံး လိုအပ်သည်။]

[ကျောက်ဂေါ်ပြား (အဖြူရောင်အဆင့်) - အစိမ်းရောင်အဆင့်နှင့် အောက်ရှိ မြေသားများကို တူးနိုင်သည်။ ထိုမြေပေါ်တွင် ပေါက်နေသောအပင်များ၏ မျိုးစေ့ကို ရရှိနိုင်သည့် အခွင့်အရေး အနည်းငယ်ရှိသည်။ ကြံ့ခိုင်မှု ၂၀၀ ရှိသည်။ သစ်ကိုင်း (အဖြူရောင်) သို့မဟုတ် သစ်သား (အဖြူရောင်) ၅ ခု နှင့် ကျောက်တုံး (အဖြူရောင်) ၅ လုံး လိုအပ်သည်။]

ထို့ပြင် ရွှီရှင်းအား ဂိမ်းက တကယ် စပြီဟ ဟု ခံစားရစေသော ပစ္စည်းတစ်ခုလည်း ရှိသေးသည်။

[ပစ္စည်းလုပ်ဆောင်သည့် စားပွဲ (အစိမ်းရောင်အဆင့်) - ပိုမိုအဆင့်မြင့်သော ကိရိယာများကို ပြုလုပ်နိုင်သည်။ သစ်သား (အစိမ်းရောင်) ၅၀ နှင့် ကျောက်စရစ်ခဲ (အစိမ်းရောင်) သို့မဟုတ် ကျောက်တုံး (အစိမ်းရောင်) ၅၀ လိုအပ်သည်။]

"ရှယ်ပဲဟေ့"

အစိမ်းရောင်အဆင့် သစ်သားနှင့် ကျောက်စရစ်ခဲများ လိုအပ်သည်။

ဤအိုင်ကြီးကို မတွေ့မီကဆိုလျှင် ရှာဖွေရန် ခက်ခဲမည်ဖြစ်သော်လည်း ယခုမူ ပတ်ဝန်းကျင်တွင် အစိမ်းရောင်သစ်သားများ နေရာအနှံ့ ရှိနေပြီး ကျောက်စရစ်ခဲများကိုလည်း စမ်းချောင်းထဲတွင် ရှာတွေ့နိုင်သည်။ ဤစားပွဲကို ပြုလုပ်ရန် သူ့အတွက် မခဲယဉ်းတော့ချေ။

သို့သော် ကျောက်ကိရိယာများ အရင်ပြုလုပ်ရန် သစ်ကိုင်းများနှင့် ကျောက်တုံးများကို အရင် စုဆောင်းရပေမည်။

ရွှီရှင်းသည် အောက်သို့ ချက်ချင်း မဆင်းသေးဘဲ ဒေသတွင်း ဆက်သွယ်ရေး လိုင်း ထဲသို့ ဝင်ကြည့်လိုက်သည်။

သူ အနည်းငယ် ရင်ခုန်နေမိသည်။ ဤအမည်အရ ဆိုလျှင်...

ဆက်သွယ်ရေးလိုင်းထဲသို့ ဝင်လိုက်သည်နှင့် တွေ့လိုက်ရသော မိတ်ဆက်စာကြောင့် ရွှီရှင်း၏ မျက်နှာတွင် အပြုံးတစ်ခု ပွင့်လန်းသွားတော့သည်။

[ဤလိုင်းသည် နယ်မြေတစ်ခုတည်းရှိ အသက်ရှင်ကျန်ရစ်သူများနှင့် အပြန်အလှန် စကားပြောနိုင်ခြင်း၊ အရင်းအမြစ်များ လဲလှယ်နိုင်ခြင်းတို့ကို ပြုလုပ်ပေးနိုင်သည်။ လက်ရှိနယ်မြေ - တောနက်ဇုန် ၁၈၈၊ လက်ရှိနယ်မြေအတွင်းရှိ လူဦးရေ - ၉၉၉၈ ဦး]

[ဤလုပ်ဆောင်ချက်သည် အစပြုသူကာကွယ်စောင့်ရှောက်မှု၏ နောက်ဆုံးနေ့တွင် စတင်မည်ဖြစ်ပြီး အချင်းချင်း ပစ္စည်းများ လဲလှယ်နိုင်ရန် ကူညီပေးပါမည်။ သတိပြုရန်မှာ သင်၏ သစ်ပင်အိမ်ကို စွန့်ခွာခြင်း မပြုပါနှင့်၊ ပြုလုပ်ပါက အကျိုးဆက်ကို ခံစားရပါမည်။]

အစပြုသူကာကွယ်စောင့်ရှောက်မှုရဲ့ နောက်ဆုံးနေ့ဆိုတာ မနက်ဖြန် မဟုတ်လား။ ရွှီရှင်းသည် ပြီးခဲ့သော နှစ်ရက်လုံး ဤလူသူကင်းမဲ့သော တောနက်ထဲတွင် တစ်ယောက်တည်း စူးစမ်းခဲ့ရသဖြင့် ရူးမတတ် ဖြစ်ခဲ့ရသည်။ ယခုအခါ အချင်းချင်း ဆက်သွယ်နိုင်မည့် နေရာတစ်ခုကို တွေ့လိုက်ရသဖြင့် သူ အလွန် ဝမ်းသာသွားသည်။

အသက်ရှင်ကျန်ရစ်သူတွေ အများကြီးရှိတဲ့ အဖွဲ့ထဲမှာ ဘယ်သူကများ စကားမပြောချင်ဘဲ နေပါ့မလဲ။

"အခုတော့ ဒါကို ခဏထားလိုက်ဦးမယ်"

ရွှီရှင်း ခေါင်းခါလိုက်ရင်း

"အရင်ဆုံး ကျောက်ကိရိယာတွေ လုပ်ရအောင်"

လက်ထဲမှာ ကိရိယာမရှိရင် သစ်ပင်ခုတ်တာ၊ ကျောက်တူးတာတွေ လုပ်လို့မရနိုင်ချေ။ သို့သော် ကိရိယာပြုလုပ်ရန် လိုအပ်သော သစ်ကိုင်း (အဖြူရောင်) နှင့် ကျောက်တုံး (အဖြူရောင်) များကိုတော့ မြေပြင်ပေါ်ကနေ တိုက်ရိုက် ကောက်ယူနိုင်သည်။

ဒါနဲ့... အောက်ကို ဘယ်လိုဆင်းရမလဲ။

ရွှီရှင်း ပတ်ဝန်းကျင်ကို ဝေ့ကြည့်လိုက်ရာ ပထမထပ်နှင့် ဒုတိယထပ်တွင် တွေ့ခဲ့သော စက်ဝိုင်းပုံစံ အပြားကို နံရံပေါ်တွင် တွေ့လိုက်ရသည်။ သူသည် အနားသို့ သွားကာ ထိုအပြားကို လက်ဖြင့် ဖိလိုက်သည်။

ထူးဆန်းသော ခံစားချက်တစ်ခု ထပ်မံ ပေါ်လာပြန်သည်။ သူသည် ထိုစက်ဝိုင်းဆီသို့ လှမ်းလျှောက်လိုက်ရာ နံရံမှာ ရွှံ့စေးကဲ့သို့ ပျော့ပြောင်းသွားပြီး သစ်ပင်ထိပ်ဖျားသို့ သူ ရောက်သွားတော့သည်။ ထိုအချိန်တွင် သစ်ပင်အမြစ်တစ်ခုက သူ့ခါးကို ပတ်ကာ အောက်ခြေသို့ အသာအယာ ချပေးလိုက်သည်။

"ဒါ... ဒါက တကယ် အံ့သြဖို့ ကောင်းတာပဲ"

သူ့ခါးမှ အမြစ်မှာ ပြေလျော့သွားပြီး ဘေးဘက်တွင် တွဲလွဲ ခိုနေသည်။ ရွှီရှင်းသည် ထိုအမြစ်ကို ထပ်မံ ကိုင်လိုက်ရာ အထပ်သုံးထပ်၏ ပုံရိပ်မှာ သူ့စိတ်ထဲတွင် ပေါ်လာခဲ့သည်။

"ဒုတိယထပ်" ရွှီရှင်းက စိတ်ထဲကနေ ရေရွတ်လိုက်သည်။

ထိုအမြစ်သည် သူ့ခါးကို ထပ်မံ ပတ်လိုက်ပြီး ဒုတိယထပ်သို့ ပို့ဆောင်ပေးခဲ့သည်။

အထပ်အားလုံးကို တိုက်ရိုက် သွားလို့ရတာပဲ!

အောက်သို့ ဒုတိယအကြိမ် ပြန်ဆင်းပြီးသောအခါ သူသည် သစ်ပင်အိမ်၏ အဝင်အထွက် နည်းလမ်းကို ကျွမ်းကျင်သွားခဲ့ပြီ။ အလွန်ချောမွေ့လှသည့်အပြင် ကစားကွင်းက စက်ဝိုင်းရဟတ် စီးရသလိုမျိုး ရင်ခုန်စရာ ကောင်းလှသဖြင့် သူ ထပ်ခါထပ်ခါ ကစားချင်စိတ်ပင် ပေါက်နေမိသည်။

သို့သော် အရေးကြီးသောအလုပ်ကို အရင်လုပ်ရန် သူ ဆုံးဖြတ်လိုက်သည်။

အစပြုသူ ကာကွယ်စောင့်ရှောက်မှုက သုံးရက်သာ ရှိသည်။ မနက်ဖြန် ပစ္စည်းလဲလှယ်မှု စတင်ချိန်မှာ ဤနေရာတွင် မရှိသော ပစ္စည်းများနှင့် လဲလှယ်နိုင်ရန် အရင်းအမြစ်များကို တတ်နိုင်သမျှ စုဆောင်းထားရပေမည်။

အလုပ်စရအောင်။

ရွှီရှင်းသည် မြေပြင်ပေါ်ရှိ ပစ္စည်းများကို စတင် ကောက်ယူတော့သည်။

သူ၏ ခွဲခြားစစ်ဆေးနိုင်စွမ်းကြောင့် မြေပြင်ပေါ်ရှိ အရည်အသွေးရှိသော ပစ္စည်းများမှာ အလင်းတန်းများ ထွက်ပေါ်နေသည်။ ပစ္စည်းတိုင်းမှာ အဆင့်အတန်းရှိသည်တော့ မဟုတ်ပေ။ သူ့အတွက် လိုအပ်သော သစ်ကိုင်းများထဲတွင် အနည်းငယ် ပိုထူပြီး အသစ်စက်စက် ကြွေကျထားသော အကိုင်းများသာ အဖြူရောင်အဆင့် ရှိကြသည်။ သေးငယ်သော အကိုင်းလေးများမှာ ဘာမှမဟုတ်ချေ။

ကျောက်တုံးများမှာလည်း ထိုနည်းအတိုင်းပင်။

သို့သော် သူ အခက်အခဲတစ်ခု ကြုံနေရသည်။ သူ့မှာ ကျောပိုးအိတ် မရှိခြင်းပင်။ ကျောပိုးအိတ်ရော၊ ပစ္စည်းထည့်စရာ နေရာ ရော မရှိသဖြင့် လက်ဖြင့်သာ သယ်နေရသည်မှာ အလွန် အခက်တွေ့လှသည်။

ဘာပဲဖြစ်ဖြစ် တခြားနည်းလမ်း မရှိသေးပေ။ အခြေခံ အရင်းအမြစ်များ ပြုလုပ်ခြင်း ထဲတွင်လည်း ကျောပိုးအိတ်ကို သူ ရှာမတွေ့ခဲ့ချေ။ ကြည့်ရသည်မှာ ပစ္စည်းလုပ်ဆောင်သည့် စားပွဲကို အသုံးပြုမှသာ ပိုမိုအဆင့်မြင့်သော ပစ္စည်းများကို လုပ်နိုင်ပုံရသည်။

ရွှီရှင်းသည် ဘောင်းဘီအိတ်ထဲသို့ ကျောက်တုံးများ ထည့်ကာ လက်ထဲတွင် သစ်ကိုင်းများကို ပွေ့ပိုက်ပြီး သစ်ကိုင်း (အဖြူရောင်) ၁၅ ခုနှင့် ကျောက်တုံး (အဖြူရောင်) ၁၅ လုံးကို စုဆောင်းနိုင်ခဲ့သည်။ ထို့နောက် သစ်ပင်အမြစ်ကို ဆွဲ၍ တတိယထပ်သို့ ပြန်တက်လာခဲ့သည်။

ဖန်သားပြင်ရှေ့သို့ ရောက်သောအခါ ကျောက်ပုဆိန် ကို နှိပ်လိုက်သည်။ ချက်ချင်းဆိုသလိုပင် လိုအပ်သော ပစ္စည်းများမှာ ပုံထဲမှ ပေါ်ထွက်လာပြီး အလင်းလုံးတစ်ခုအဖြစ် ပေါင်းစည်းသွားတော့သည်။

သစ်ပင်အိမ်မျိုးစေ့ကို ရစဉ်က ဤအလင်းလုံးကို သူ မြင်ဖူးသဖြင့် တွေဝေမနေဘဲ လှမ်းကိုင်လိုက်ရာ ရိုးရှင်းသော ကျောက်ပုဆိန် တစ်လက်မှာ သူ့လက်ထဲသို့ ရောက်ရှိလာသည်။

ကြည့်ရသည်မှာ အလွန်ပင် ရိုးရှင်းလှပြီး ပုဆိန်သွားမှာလည်း တုံးလှသည်။ ဤကိရိယာနှင့် သစ်ပင်များကို တကယ် ခုတ်လို့ရပါ့မလားဟု သူ သံသယဝင်မိသည်။

ထိုနည်းအတိုင်းပင် ရွှီရှင်းသည် ကျောက်ပေါက်ချွန်း တစ်လက်နှင့် ကျောက်ဂေါ်ပြား တစ်လက်ကိုလည်း ပြုလုပ်လိုက်တော့သည်။

အခန်း ၅ ပြီး