ပိုကောင်းလာသော ကိရိယာများ

"ဒီကျောက်တုံးတွေကို ရောင်းမှာလား၊ ငါ သုံးတုံးလောက် လိုချင်တယ်" ရွှီရှင်းက လိုရင်းကိုသာ တိုက်ရိုက်မေးလိုက်သည်။

"ရှင် ပေးမယ့် ဈေးပေါ် မူတည်တာပေါ့" တစ်ဖက်လူကလည်း အလျှော့မပေးဘဲ ပြန်ပြောလာသည်။

ရွှီရှင်း ခဏမျှ စဉ်းစားလိုက်ပြီးနောက် "မင်းဆီမှာ အစိမ်းရောင်ကျောက်တုံးတွေ အများကြီးရှိမှာပဲ မဟုတ်လား။ ငါ့ဆီမှာလည်း အစိမ်းရောင်သစ်သားတွေ အများကြီးရှိတယ်။ မင်း ပစ္စည်းလုပ်တဲ့ စားပွဲတစ်ခု ပြုလုပ်နိုင်ဖို့ အစိမ်းရောင်သစ်သား ၅၀ ပေးမယ်၊ အဲ့ဒီအစား ငါ့ကို အပြာရောင်ကျောက်တုံး ၃ တုံးပေး" ဟု အကွက်ချ၍ ကမ်းလှမ်းလိုက်သည်။

တစ်ဖက်လူက အချိန်အတော်ကြာအောင် ပြန်စာမပို့ချေ။ ကြည့်ရသည်မှာ တွေးတောနေပုံရသည်။

"အစိမ်းရောင်သစ်သား ၆၀ ပေးရမယ်၊ ပြီးတော့ မင်းဆီက အနီရောင်ဘယ်ရီသီးတွေပါ လိုချင်တယ်"

"ကောင်းပြီလေ၊ ဒါပေမဲ့ ဘယ်ရီသီးတွေကိုတော့ သံသတ္တုရိုင်းနဲ့ လဲမယ်။ ဘယ်ရီသီးတစ်လုံးကို သံသတ္တုရိုင်း ၂၀"

"သဘောတူတယ်"

[တစ်ဖက်လူမှ သင့်ထံသို့ အရောင်းအဝယ် ကမ်းလှမ်းချက် ပို့လိုက်သည် - ကျောက်တုံး (အပြာရောင်အဆင့်) ၃ လုံး နှင့် သစ်သား (အစိမ်းရောင်အဆင့်) ၆၀]

ဒီလောက်တောင် မြန်တာလား။ ရွှီရှင်းသည် ထိုကမ်းလှမ်းချက်ကို နှမြောသော်လည်း ပယ်ဖျက်လိုက်ကာ "ငါ့ဆီမှာ အခုလောလောဆယ် အစိမ်းရောင်သစ်သား အဲ့လောက်အများကြီး မရှိသေးဘူး၊ ထပ်ခုတ်ရဦးမယ်။ အရင်ဆုံး ဘယ်ရီသီးတွေကို လဲရအောင်။ ဘယ်နှစ်လုံး လိုချင်လဲ" ဟု ပြောလိုက်သည်။

"... လောလောဆယ် သုံးလုံးပေး"

ရွှီရှင်းက အရောင်းအဝယ်ကို စတင်လိုက်သည်။

[သင်သည် အရောင်းအဝယ်တစ်ခု ပြုလုပ်လိုက်သည် - အနီရောင် ဘယ်ရီသီးအကြီး (အပြာရောင်အဆင့်) ၃ လုံး နှင့် သံသတ္တုရိုင်း (အစိမ်းရောင်အဆင့်) ၆၀]

[တစ်ဖက်လူမှ အရောင်းအဝယ်ကို လက်ခံလိုက်ပြီး သံသတ္တုရိုင်း (အစိမ်းရောင်အဆင့်) ၆၀ ကို ရရှိသွားပါပြီ]

[တစ်ဖက်လူမှ သင့်ထံသို့ အရောင်းအဝယ်တစ်ခု စတင်လိုက်သည် - ကျောက်တုံး (အပြာရောင်အဆင့်) ၁ လုံး ကို အလကားပေးသည်]

"ဟင်..." ရွှီရှင်း အံ့သြသွားသည်။ သူမက သူ့ကို တစ်လုံး လက်ဆောင်ပေးတာလား။

"ရှင့် ကို တစ်လုံး အရင်ပေးထားမယ်။ သစ်ပင်တွေမြန်မြန်ခုတ်နိုင်အောင် ပုဆိန်အသစ် အရင်လုပ်လိုက်ဦး။ ကျန်တဲ့ နှစ်လုံးကိုတော့ ရှင် ခုတ်ပြီးမှ ကျွန်မကိုပေး" ဟု တစ်ဖက်လူက ရှင်းပြလာသည်။

တော်တော်လေး စဉ်းစားပေးတာပဲ။ ရွှီရှင်း မပြုံးဘဲ မနေနိုင်ချေ။ ကြည့်ရသည်မှာ သူမထံတွင် အပြာရောင်ကျောက်တုံးများမှာ သူပိုင်ဆိုင်သော ဘယ်ရီသီးများကဲ့သို့ အမြောက်အမြား ရှိနေပုံရသည်။

ရွှီရှင်းသည် အရောင်းအဝယ်ကို လက်ခံလိုက်ပြီး သူမကို လက်မထောင်ပြသည့် ပုံရိပ်လေး ပို့လိုက်သည်။ ထို့နောက် ချက်ချင်းပင် ပုဆိန်အသစ်တစ်ခုကို ပြုလုပ်လိုက်တော့သည်။

[ပိုမိုကောင်းမွန်သော ကျောက်ပုဆိန် (အစိမ်းရောင်အဆင့်) - အပြာရောင်အဆင့်နှင့် အောက်ရှိ သစ်ပင်များကို ခုတ်လှဲနိုင်သည်။ အဆင့်မြင့်ကျောက်တုံးကို ထည့်သွင်းထားသဖြင့် ပိုမိုမာကျောပြီး ထက်မြက်လာသည်။ ကြံ့ခိုင်မှု ၂၀၀ ရှိသည်။]

ခံစားချက်က ရှယ်ပဲ! အခုဆိုရင် အပြာရောင်အဆင့် သစ်ပင်တွေကိုတောင် ခုတ်လို့ရပြီ။ လီဝမ်ရှီးနှင့်တော့ ဆက်ဆံရေး ကောင်းကောင်းထားရမည်ဟု သူ တွေးလိုက်သည်။

သူသည် အစောပိုင်းက တွေ့ခဲ့သော အပြာရောင်အဆင့် မိုးမခပင်ကို ရုတ်တရက် သတိရသွားသည်။ အပြာရောင်သစ်သား၏ အသုံးဝင်ပုံမှာ အပြာရောင်ကျောက်တုံးကဲ့သို့ပင် ထူးခြားနိုင်ပေသည်။ ဤပုဆိန်သစ်နှင့်ဆိုလျှင် ထိုအပင်ကို ခုတ်လှဲရန် အချိန်တန်ပြီ။

...

အခြားတစ်နေရာတွင်တော့ ရွှီရှင်း၏ သစ်ပင်အိမ်ထက် အနည်းငယ်သေးငယ်သော သစ်ပင်အိမ်လေးအတွင်း၌ ဆံပင်တိုတိုနှင့် မိန်းကလေးတစ်ဦးသည် လက်ထဲမှ အနီရောင်ဘယ်ရီသီးကို သေသေချာချာ စစ်ဆေးနေသည်။

အစပြုသူဝတ်စုံ ဘောင်းဘီတိုနှင့် တီရှပ်ကို ဝတ်ဆင်ထားသော်လည်း သူမ၏ သွယ်လျသော ကိုယ်လုံးကိုယ်ပေါက်နှင့် ကြံ့ခိုင်သော လက်မောင်းခြေထောက်များက သူမသည် ပုံမှန် လေ့ကျင့်ခန်းလုပ်သူဖြစ်ကြောင်း သက်သေပြနေသည်။

"အမြင်အာရုံကို ကြည်လင်စေပြီး ညဘက်မှာ နှစ်နာရီကြာ မြင်နိုင်စွမ်းပေးတယ်တဲ့... ဟုတ်သားပဲ၊ အပြာရောင်အဆင့် ပစ္စည်းတွေက တကယ်ကို အစွမ်းထက်တာပဲ" ဟု မိန်းကလေးက သူမဘာသာ တိုးတိုးလေး ရေရွတ်လိုက်သည်။

၎င်းမှာ နှစ်ထပ် သစ်ပင်အိမ်ဖြစ်ပြီး တစ်ထပ်လျှင် စတုရန်းမီတာ ငါးဆယ်ခန့် ရှိသည်။ ထိုစဉ် လီဝမ်ရှီးသည် ဒုတိယထပ်ရှိ ဖန်သားပြင်ရှေ့တွင် ထိုင်နေခြင်း ဖြစ်သည်။ လီဝမ်ရှီးသည် ပထမထပ်သို့ ဆင်းလာကာ ထိုနေရာတွင် ပုံထားသော ကျောက်တုံးမျိုးစုံနှင့် သံသတ္တုရိုင်းများကို ကြည့်လိုက်သည်။

ပစ္စည်းလဲလှယ်ရေးကဏ္ဍ ယနေ့ပွင့်မည်ကို သူမ သိထားသဖြင့် ဤကျောက်နှင့် သတ္တုများကို ပစ္စည်းကောင်းများနှင့် လဲနိုင်ရန် မနေ့က တစ်နေ့ကုန် မနားတမ်း တူးဖော်ခဲ့ရာ တစ်ကိုယ်လုံး နုံးခွေနေလေပြီ။

ဤပစ္စည်းများကို သယ်ဆောင်ရန်အတွက် အကြိမ်ပေါင်းများစွာ ခေါက်တုံ့ခေါက်ပြန် သွားခဲ့ရသည်။ ကံကောင်းသည်မှာ သူမ၏ သစ်ပင်အိမ်က သတ္တုတွင်းနှင့် နီးနေခြင်းပင်။ ထို့ပြင် သူမ၏ ကိုယ်ခန္ဓာကြံ့ခိုင်မှုမှာ အခြားမိန်းကလေးများထက် သိသိသာသာ သာလွန်သဖြင့် အားလုံးကို သယ်ယူလာနိုင်ခဲ့ခြင်း ဖြစ်သည်။

သို့သော်လည်း ယနေ့တွင်မူ တစ်ကိုယ်လုံး ကိုက်ခဲနေပြီး ခြေလှမ်းတိုင်းမှာ တုန်ယင်နေသည်။ တစ်နေ့ကုန် အလွန်အမင်း အပင်ပန်းခံခဲ့ရသဖြင့် ပုံမှန် လေ့ကျင့်ခန်းလုပ်နေကျလူပင် မခံနိုင်တော့ချေ။ ထို့ကြောင့် ယနေ့တွင် အပြင်မထွက်တော့ဘဲ ပစ္စည်းလဲလှယ်ရေးစနစ်ကို အသုံးပြု၍ လိုအပ်သော ရိက္ခာများနှင့် လဲလှယ်ရန်သာ သူမ ဆုံးဖြတ်လိုက်သည်။

"ဒီလူကတော့ တော်တော်စွမ်းတာပဲ၊ ပစ္စည်းလုပ်ဆောင်တဲ့ စားပွဲတောင် လုပ်ပြီးနေပြီ။ ငါကတော့ မနေ့က တစ်မွန်းလွဲလုံး သစ်ပင်ခုတ်တာ အစိမ်းရောင်သစ်သား အရိပ်အယောင်တောင် မမြင်ရဘူး၊ အကုန် အဖြူရောင်တွေချည်းပဲ" လီဝမ်ရှီးသည် တုန်ယင်နေသော ခြေထောက်များကို အသာအယာမ၍ ဒုတိယထပ်သို့ ပြန်တက်ကာ ကုတင်ပေါ်တွင် လှဲချလိုက်ရင်း သက်ပြင်းချလိုက်မိသည်။

"သူက တကယ်ကို အံ့သြစရာပဲ။ ဒါပေမဲ့ သူ့မှာ သံရမယ့်နေရာ ရှိပုံမရဘူး၊ ငါတို့တွေ ပူးပေါင်းဆောင်ရွက်သင့်တယ်"

လီဝမ်ရှီးသည် သူမ၏ သစ်ပင်အိမ်ကို သတ္တုတွင်းရှိရာနေရာတွင် စိုက်ပျိုးခဲ့ခြင်းဖြစ်ပြီး အနီးနားတွင် စမ်းချောင်းလေးတစ်ခုလည်း ရှိသည်။ အရင်းအမြစ် နှစ်မျိုးစလုံး ရှိနေသဖြင့် ဦးတည်ချက်မရှိ လျှောက်သွားနေမည့်အစား ဤနေရာတွင်သာ အခြေချရန် သူမ ရွေးချယ်ခဲ့ခြင်း ဖြစ်ပေသည်။

---

"စတုရန်းမီတာ ၂၀ ကျော်ပဲရှိပြီး တစ်ထပ်တည်းရှိတဲ့ ပုကွသော သစ်ပင်အိမ် တဲ့လား။ ငါ့ရဲ့ သစ်ပင်အိမ်က သူတို့ထက် ပိုအဆင့်မြင့်နေတာများလား" လီဝမ်ရှီးသည် သူမဘာသာ ကျေနပ်စွာ ပြုံးလိုက်မိသည်။

တက္ကသိုလ် ဒုတိယနှစ်ကျောင်းသူလေးဖြစ်သော သူမသည် ဤစိမ်းကားလှသော ကမ္ဘာသစ်ထဲတွင် နိုးထလာခဲ့ခြင်း ဖြစ်သည်။

"အဲ့ဒီလူရဲ့ သစ်ပင်အိမ်က ဘယ်လိုပုံစံရှိမလဲ မသိဘူး။ ငါ့အိမ်က ပိုတောင် ကောင်းနေဦးမယ် ထင်တယ်" လီဝမ်ရှီးသည် ထိုသို့တွေးကာ ဝမ်းသာအားရဖြင့် ကုတင်ပေါ်တွင် ဘေးစောင်းလှဲရင်း စကားပြောခန်းထဲမှ စာသားများကို ဆက်လက်ဖတ်ရှုနေခဲ့သည်။

သူမ၏ သံသတ္တုရိုင်းအကြောင်းကို ရွှီရှင်းတစ်ယောက်သာ လာရောက်မေးမြန်းခဲ့သည်။ လူအတော်များများမှာ ပစ္စည်းလုပ်ဆောင်သည့် စားပွဲကိုပင် မပြုလုပ်ရသေးသလို၊ ပစ္စည်းအဆင့်အတန်း ခွဲခြားနိုင်ရန်အတွက် ခွဲခြားစစ်ဆေးသည့် စားပွဲကိုသာ အားကိုးနေရသဖြင့် ပစ္စည်းတစ်ခုနှင့်တစ်ခု အလဲအလှယ်လုပ်ရန်သာ အာရုံစိုက်နေကြသည်။

ထို့ကြောင့် လက်ရှိအခြေအနေတွင် သံသတ္တုရိုင်းမှာ လူအများစုအတွက် အသုံးဝင်မသေးသည်မှာ မဆန်းချေ။

"တကယ်လို့ အဲ့ဒီအမည်ဝှက်နဲ့လူက တကယ်ပဲ ယုံကြည်စိတ်ချရတယ်ဆိုရင် သူ့ကို အပြာရောင်အဆင့် သံသတ္တုရိုင်းအချို့ ရောင်းပေးဖို့ကလည်း မဖြစ်နိုင်တာတော့ မဟုတ်ဘူး"

စကားပြောခန်းထဲတွင် အသုံးဝင်မည့်အရာ မတွေ့တော့သဖြင့် လီဝမ်ရှီး၏ စိတ်က ရွှီရှင်းထံသို့ ပြန်ရောက်သွားပြန်သည်။

သူမသည် အပြာရောင်အဆင့် ပစ္စည်းများကို ဒုတိယထပ်တွင် သိမ်းဆည်းထားသည်။ သူမ၏ ခွဲခြားစစ်ဆေးသည့် စားပွဲတွင် သာမန်သံသတ္တုရိုင်းနှင့်မတူဘဲ အပြာရောင်အလင်းတန်း ထွက်ပေါ်နေသော သတ္တုရိုင်းတစ်ခု ရှိနေသည်။

သူမတွင် အပြာရောင်ကျောက်တုံးများ ရှိနေသဖြင့် သူမ၏ ကိရိယာများမှာ အပြာရောင်အဆင့် ပစ္စည်းများကို စုဆောင်းနိုင်စွမ်း ရှိပေသည်။

[သံသတ္တုရိုင်း (အပြာရောင်အဆင့်) - သံကို အရည်ကျိုသည့်အခါ ဤအပြာရောင်သတ္တုရိုင်း တစ်တုံး ထည့်သွင်းရုံဖြင့် အပြာရောင် သံတုံးများကို ထွက်ရှိစေမည်။ အလွန်အသုံးဝင်ပြီး ထိရောက်မှု မြင့်မားသည်!]

ရုတ်တရက် ရွှီရှင်းထံမှ သူမထံသို့ စာတစ်စောင် ရောက်လာသည်။

"ဟင်... သူ ဒီလောက်မြန်မြန် ပြန်လာတာလား"

...

အခြားတစ်ဖက်တွင်တော့ ရွှီရှင်းသည် အသစ်ပြုလုပ်ထားသော ကျောက်ပုဆိန် (အစိမ်းရောင်အဆင့်) ကို ကိုင်ဆောင်ကာ သစ်ပင်အိမ်ပေါ်မှ ဆင်းလာခဲ့သည်။ သစ်ပင်အိမ်အောက်ခြေတွင် ရှင်းလင်းရန် ကျန်နေသေးသော အပင်များမှာ အဖြူရောင်နှင့် အစိမ်းရောင်အဆင့်ရှိ မိုးမခပင်များ ဖြစ်ကြသည်။

သူသည် အနီးဆုံးရှိ မိုးမခပင် (အဖြူရောင်အဆင့်) ကို ပုဆိန်ဖြင့် အားရပါးရ ခုတ်လိုက်သည်။

"ခရက်"

မိုးမခပင်မှာ တစ်ချက်တည်းနှင့်ပင် လဲကျသွားပြီး မြေပြင်ပေါ်တွင် အပိုင်းအစ ငါးပိုင်းအဖြစ် ကွဲထွက်သွားတော့သည်။

"တကယ်ကြီးလား" ရွှီရှင်းသည် သူ့လက်ထဲမှ ပိုမိုထက်မြက်လာသော ပုဆိန်ကို ကြည့်ကာ မျက်လုံးအပြူးသား ဖြစ်သွားရသည်။ အဖြူရောင်အပင်တစ်ပင်ကို လဲရန် ငါးချက်ခန့် ခုတ်ခဲ့ရသည်ကို သူ မှတ်မိနေသေးသည်။

ထို့နောက် သူသည် မိုးမခပင် (အစိမ်းရောင်အဆင့်) ကို တစ်ချက်၊ နှစ်ချက် ခုတ်လိုက်သည်။

"ခရက်...." အစိမ်းရောင်အပင်မှာလည်း မြေပြင်ပေါ်သို့ အပြီးတိုင် လဲကျသွားတော့သည်။

"ဒါ... ဒါက တကယ်ကို အစွမ်းထက်တာပဲ!"

အလုပ်လုပ်နှုန်းက ငါးဆလောက် မြန်သွားတာပဲ။ ပုဆိန်တစ်ချက်ခုတ်တာက အရင်က ငါးချက်နဲ့ ညီမျှနေတာလား။ ဒါက အပြာရောင်အဆင့် ပစ္စည်းတွေရဲ့ စွမ်းအားပေါ့။ ဘယ်ရီသီးတွေထက်တောင် အများကြီး ပိုအသုံးဝင်သေးသည်။

ရွှီရှင်းသည် စစ်နတ်ဘုရားတစ်ပါးကဲ့သို့ သစ်ပင်အိမ်အောက်ရှိ ကျန်ရှိသောအပင်အားလုံးကို ခုတ်ထွင်ရှင်းလင်းလိုက်ရာ အဖြူရောင်နှင့် အစိမ်းရောင် သစ်သားတုံးများမှာ မြေပြင်ပေါ်တွင် ပြန့်ကျဲသွားတော့သည်။

သူသည် သစ်ပင်အိမ်၏ အောက်ခြေတည့်တည့်တွင် အလုပ်လုပ်နေခြင်းဖြစ်သဖြင့် အဝေးကြီး သယ်နေရန် မလိုပေ။ သစ်သားတုံးများကို ပွေ့ပိုက်ကာ သစ်ပင် အမြစ် ကို ဆွဲလိုက်ရုံဖြင့် အပေါ်သို့ ရောက်ရှိသွားသည်။ သူသည် သစ်သားတုံးအားလုံးကို ပထမထပ်တွင် ပုံထားလိုက်ပြီး လီဝမ်ရှီးနှင့် အရောင်းအဝယ်ကို စတင်လိုက်သည်။

[သင်သည် အရောင်းအဝယ်တစ်ခု ပြုလုပ်လိုက်သည် - သစ်သား (အစိမ်းရောင်အဆင့်) ၆၀ နှင့် ကျောက်တုံး (အပြာရောင်အဆင့်) ၂ လုံး]

သူ ထင်ထားသည့်အတိုင်းပင်။ ပစ္စည်းများမှာ သစ်ပင်အိမ်အတွင်း၌ ရှိနေသရွေ့ အရောင်းအဝယ်ကို မည်သည့်နေရာမှမဆို ပြုလုပ်နိုင်ပေသည်။

[တစ်ဖက်လူမှ အရောင်းအဝယ်ကို လက်ခံလိုက်ပြီး ကျောက်တုံး (အပြာရောင်အဆင့်) ၂ လုံးကို ရရှိသွားပါပြီ]

အခန်း ၉ ပြီး...