နောက်ထပ် မြေဆီလွှာကောင်းတစ်ခု

"ဒါ မြေဆီလွှာကောင်းပဲ" ရွှီရှင်း ချက်ချင်းပင် စိတ်လှုပ်ရှားသွားသည်။

အချိန်အတော်ကြာပြီးနောက်တွင်မှ သစ်ပင်အိမ်စိုက်ပျိုးစဉ်က တွေ့ခဲ့သော မြေဆီလွှာအပြင် ဒုတိယမြောက် အပြာရောင်အဆင့် မြေဆီလွှာကို သူ ရှာတွေ့ခဲ့ခြင်း ဖြစ်သည်။ ဤမြေရှိလျှင် သူကိုယ်တိုင် အပြာရောင်အဆင့် အပင်များကို စိုက်ပျိုးနိုင်တော့မည် ဖြစ်သည်။

သူသည် ပုဆိန်ကိုယူကာ အဆင့်မြင့် မိုးမခပင်ကို အရင်ဆုံး ခုတ်လှဲလိုက်ရာ အပြာရောင်အဆင့် သစ်သား ၅ တုံး ရရှိခဲ့သည်။

[သစ်သား (အပြာရောင်အဆင့်) - သစ်သားလိုအပ်သော ကိရိယာများ ပြုလုပ်ရာတွင် တစ်တုံး ထည့်သွင်းအသုံးပြုပါက ကိရိယာ၏ ကြံ့ခိုင်မှုကို များစွာ တိုးတက်စေသည်။ ပရိဘောဂများ ပြုလုပ်ရာတွင် အသုံးပြုပါက ပရိဘောဂ၏ အဆင့်အတန်းကို မြှင့်တင်ပေးနိုင်သည်။]

အပြာရောင်အဆင့် သစ်သားမှာ ကိရိယာများ၏ ကြံ့ခိုင်မှုကို မြှင့်တင်ရန်နှင့် ပရိဘောဂများကို အဆင့်မြှင့်ရန်အတွက် အံ့သြစရာကောင်းလောက်အောင် ကောင်းမွန်လှသည်။ အရည်အသွေးမြင့် ပရိဘောဂပြုလုပ်နည်းများကို သူ ရှာမတွေ့ဘဲ အဖြူရောင်အဆင့် ပရိဘောဂပြုလုပ်နည်းများသာ တွေ့ရခြင်းမှာ အဆင့်မြင့်ကုန်ကြမ်းများ လိုအပ်သောကြောင့် ဖြစ်သည်ကို သူ နားလည်သွားတော့သည်။

ရွှီရှင်းသည် သူ့လက်ထဲမှ အစိမ်းရောင်အဆင့် ကျောက်ပုဆိန် ကို ကြည့်လိုက်ရာ ကြံ့ခိုင်မှု တစ်ဝက်ခန့်သာ ကျန်တော့သဖြင့် အသုံးပြုခဲ့သော အပြာရောင်ကျောက်တုံးများအတွက် နှမြောမိသွားသည်။

သူသည် အတွေးများကို ဖယ်ကာ အဆင့်မြှင့်ထားသော ကျောက်ဂေါ်ပြားကို ကိုင်၍ မြေကြီးကို စတင်တူးတော့သည်။

[မြေဆီလွှာကောင်း (အပြာရောင်အဆင့်) ၁ ခု၊ သစ်သား (အပြာရောင်အဆင့်) ၁ ခု နှင့် မိုးမခပင်မျိုးစေ့ ၁ ခု ရရှိပါသည်]

အပြာရောင်အဆင့် ငုတ်တိုမှ သာမန်မျိုးစေ့သာ ထွက်ရှိခြင်းက ရွှီရှင်း၏ ယခင်ခန့်မှန်းချက်ကို ပိုမိုခိုင်မာစေသည်။ သူသည် အကြိမ်ပေါင်းများစွာ သယ်ယူပြီးနောက် သစ်သားနှင့် မြေဆီလွှာအားလုံးကို သစ်ပင်အိမ်သို့ ယူဆောင်လာခဲ့သည်။

သစ်ပင်အိမ်ဘေးရှိ မြေညံ့သောနေရာတစ်ခုကို တူးထုတ်ကာ ထိုနေရာတွင် မြေဆီလွှာကောင်းများဖြင့် အစားထိုး ဖြည့်တင်းလိုက်သည်။

မြေပြင်ပေါ်ရှိ မြေဆီလွှာကောင်းများကို ကြည့်ရင်း ရွှီရှင်း ကျေနပ်စွာ ခေါင်းညိတ်လိုက်သည်။ ဤသည်မှာ ယနေ့အတွက် အကြီးမားဆုံးသော ရလဒ်ပင် ဖြစ်သည်။ ဤမြေရှိလျှင် သူသည် အပြာရောင်အဆင့် သစ်သားများနှင့် အသီးအနှံများကို စဉ်ဆက်မပြတ် ထုတ်လုပ်နိုင်တော့မည် ဖြစ်သည်။

"အရင်ဆုံး ဘာစိုက်ရင် ကောင်းမလဲ"

ရွှီရှင်းသည် အစောပိုင်းက နောက်ထပ် အဆင့်မြင့် မိုးမခပင်တစ်ပင်ကို တွေ့ခဲ့သည်ကို သတိရသွားကာ ထိုအပင်ကို သွားရောက်ခုတ်လှဲပြီး ငုတ်တိုကိုပါ တူးထုတ်လိုက်ရာ စုစုပေါင်း အပြာရောင်သစ်သား ၁၂ တုံး ရရှိခဲ့သည်။

"ငါ ပန်းသီးပင် စိုက်မယ်၊ ပန်းသီးတွေလည်း ရမယ်၊ ပြီးရင် သစ်ပင်ကို ခုတ်လိုက်ရင် အပြာရောင်အဆင့် အသီးအနှံရော သစ်သားရော ရမှာပေါ့" ဟု ရွှီရှင်း တွေးတောတွက်ချက်လိုက်သည်။

သူ့လက်ထဲတွင် ပန်းသီးမျိုးစေ့ မရှိသော်လည်း ဤအရင်းအမြစ်နယ်မြေထဲတွင် အစိမ်းရောင်အဆင့် ပန်းသီးပင်များစွာ ရှိနေသဖြင့် မျိုးစေ့အတွက် တူးယူနိုင်ပေသည်။ ထို့ပြင် သူသည် အပြာရောင်အဆင့် ပန်းသီးများကို မတွေ့ဖူးသေးချေ။ ၎င်းမှာ ထူးခြားသော အစွမ်းရှိသည့် အစားအစာ ဖြစ်လာမည်မှာ သေချာသည်။

သူ စဉ်းစားလေလေ ပို၍ ယုတ္တိရှိလေလေ ဖြစ်သဖြင့် ရွှီရှင်းသည် ပန်းသီးပင်တစ်ပင်ကို အရင်ဆုံး ခုတ်လှဲကြည့်လိုက်သည်။ အစိမ်းရောင်သစ်သား ၅ တုံး ရရှိပြီး သစ်ငုတ်တိုကို တူးထုတ်သော်လည်း ယခုတစ်ခေါက်တွင်မူ ကံမကောင်းသဖြင့် ပန်းသီးမျိုးစေ့ မရရှိခဲ့ချေ။ ကိစ္စမရှိပါ၊ သူသည် နောက်ထပ် ပန်းသီးပင်တစ်ပင်ကို ထပ်မံခုတ်လှဲလိုက်သည်။

[ပန်းသီးပင်မျိုးစေ့ - မြေကြီးထဲတွင် စိုက်ပျိုးနိုင်သည်။ ငါးရက်အတွင်း ပန်းသီးပင်အဖြစ် ကြီးထွားလာပြီး နောက်ထပ် ငါးရက်အကြာတွင် အသီး သီးပါလိမ့်မည်။]

ရွှီရှင်းသည် ယခင်က စားခဲ့သော ပန်းသီးများမှ မျိုးစေ့ထုတ်ရန် ကြိုးစားခဲ့သော်လည်း စနစ်မှ အကြောင်းကြားစာ မပေါ်သဖြင့် အသီးမှရသော မျိုးစေ့မှာ သာမန်မျိုးစေ့သာ ဖြစ်ကြောင်း သူ သိလိုက်ရသည်။

၎င်းတို့ကို စိုက်၍ရနိုင်သော်လည်း သာမန်ပန်းသီးပင်တစ်ပင် ကြီးထွားရန်နှင့် အသီးသီးရန်မှာ အချိန်အတော်ကြာ ပေးရပေလိမ့်မည်။ ရွှီရှင်းမှာ ထိုမျှ အချိန်မပေးနိုင်ချေ။ ယခု တူးယူရရှိသော မျိုးစေ့များမှာမူ စနစ်၏ မြှင့်တင်ပေးမှုကြောင့် ၁၀ ရက်အတွင်း အသီး သီးနိုင်ပေသည်။

ရွှီရှင်းသည် ထိုပန်းသီးမျိုးစေ့ကို အပြာရောင်အဆင့် မြေဆီလွှာကောင်းတွင် စိုက်ပျိုးလိုက်ရာ မျက်မြင်တွေ့ရှိနိုင်သော အရှိန်ဖြင့် မျိုးစေ့မှာ တဖြည်းဖြည်း အညှောက်ထွက်လာတော့သည်။

[ပန်းသီးပင်ပျိုးပင် (အပြာရောင်အဆင့်) - ငါးရက်အတွင်း ပန်းသီးပင်အဖြစ် ကြီးထွားလာမည်။ မရင့်မီအချိန်တွင် အလွန်နုနယ်သဖြင့် နင်းမိခြင်း လုံးဝ မရှိပါစေနှင့်]

အောင်မြင်သွားပြီ အပင်လေးကို အေးအေးဆေးဆေး ကြီးထွားခိုင်းရမယ်။

ရွှီရှင်းသည် ပစ္စည်းများကို ယူဆောင်ကာ သစ်ပင်အိမ်သို့ ပြန်လာခဲ့သည်။ သစ်သားများကို ပထမထပ်တွင် ထားရှိပြီး အစားအစာများကို တတိယထပ်ရှိ စားပွဲပေါ်တွင် တင်ထားလိုက်သည်။

ထို့နောက် တူးထုတ်လာသော မြေညံ့များကို ပစ္စည်းလဲလှယ်ရေးကဏ္ဍတွင် ရောင်းချရန် ကြိုးစားသော်လည်း မြေကြီးမှာ ပုဂ္ဂိုလ်ရေးဆိုင်ရာ အရင်းအမြစ်ဖြစ်သဖြင့် လဲလှယ်၍ မရနိုင်ကြောင်း စနစ်က အကြောင်းကြားလာသည်။

အနည်းငယ်တော့ နှမြောစရာပင်။ သူ့ပတ်ဝန်းကျင်တွင် အစိမ်းရောင်မြေကြီးများ ပေါများသဖြင့် ၎င်းတို့ကို တူး၍ ရောင်းချနိုင်မလားဟု သူ စိတ်ကူးယဉ်ခဲ့သော်လည်း မအောင်မြင်ခဲ့ချေ။

ထားလိုက်ပါတော့၊ အခု ငါ့ဆီမှာ ဘယ်လို အပြာရောင်အဆင့် ပစ္စည်းတွေ ရှိလဲဆိုတာ ပြန်ကြည့်ရအောင်။

အနီရောင် ဘယ်ရီသီးအကြီး (အပြာရောင်အဆင့်) - ညဘက်တွင် နှစ်နာရီကြာ မြင်နိုင်စွမ်းကို ပေးသည်။ မီးတုတ်ကဲ့သို့ မဟုတ်ဘဲ ညဘက်တွင် နေ့ခင်းဘက်ကဲ့သို့ အတိုင်းသား မြင်ရခြင်း ဖြစ်သည်။

အဆင့်မြင့်မှို (အပြာရောင်အဆင့်) - စားသုံးပြီးပါက ဉာဏ်ရည်ကို အနည်းငယ် အမြဲတမ်း တိုးတက်စေသည်။

မှိုကို အစိမ်းစား၍ မရသဖြင့် အကင်ဖိုပြုလုပ်ပြီးပါက ဤမှို ၂၀ ကျော်ကို အရင်ဆုံး ကင်စားရန် ရွှီရှင်း စီစဉ်ထားသည်။ အမြဲတမ်း အရည်အချင်း တိုးတက်စေမည့်အရာမှာ အမြဲတမ်း အကျိုးရှိသည် မဟုတ်ပါလား။

လိမ္မော်သီး (အပြာရောင်အဆင့်) - စိတ်ကို လန်းဆန်းတက်ကြွစေသော ပစ္စည်းကောင်းတစ်ခု ဖြစ်သည်။ ဘေးထွက်ဆိုးကျိုး မရှိဘဲ တစ်နာရီကြာ စိတ်အားတက်ကြွနေစေကာ ထို့နောက်တွင် နှစ်နှစ်ခြိုက်ခြိုက် အိပ်စက်နိုးထလာသကဲ့သို့ ခံစားရစေသည်။

ကျောက်တုံး (အပြာရောင်အဆင့်) - ကိရိယာများ၏ လုပ်ဆောင်နိုင်စွမ်းကို များစွာ မြှင့်တင်ပေးသည်။

သစ်သား (အပြာရောင်အဆင့်) - ကိရိယာများ၏ ကြံ့ခိုင်မှုကို မြှင့်တင်ပေးပြီး ပရိဘောဂများကို အဆင့်မြှင့်တင်ပေးသည်။

သံသတ္တုရိုင်း (အပြာရောင်အဆင့်) - ရွှီရှင်းတွင် မရှိသေးသော်လည်း လီဝမ်ရှီးထံတွင် မြင်ဖူးသည်။ အပြာရောင် သံတုံးများ အရည်ကျိုရန်အတွက် အလွန်ကောင်းမွန်သည်။

လောလောဆယ်တွင် အစားအစာများက ခဏတာ သို့မဟုတ် အမြဲတမ်း စွမ်းဆောင်ရည် မြှင့်တင်မှုများကို ပေးစွမ်းပြီး ကုန်ကြမ်းပစ္စည်းများက ပြုလုပ်ထားသော ကိရိယာများ၏ လုပ်ဆောင်ချက်ကို သိသိသာသာ မြှင့်တင်ပေးပေသည်။ အချိန်မဆွဲတော့ဘဲ ပစ္စည်းလုပ်ဆောင်သည့် စားပွဲတွင် ပြုလုပ်နိုင်သမျှကို အရင်ဆုံး ပြုလုပ်ရပေမည်။

ရွှီရှင်းသည် လီဝမ်ရှီးထံသို့ ဗီဒီယိုဖုန်းခေါ်ဆိုမှု တစ်ခု ပြုလုပ်လိုက်သည်။

စက္ကန့်ပိုင်းအတွင်း ဖုန်းဆက်သွယ်သွားပြီး ဗီဒီယိုထဲတွင် လီဝမ်ရှီးမှာ အရင်ကထက် ပိုမိုသန့်ရှင်းသပ်ရပ်နေသည်ကို တွေ့ရသည်။ သူမ၏ နောက်ကွယ်ရှိ နံရံတွင် မီးလင်းဖိုတစ်ခုကိုပါ ရွှီရှင်း မြင်လိုက်ရသည်။

"အလုပ်တွေ ပြီးပြီလား" လှပျိုဖြူလေးက ကုတင်ပေါ်တွင် ထိုင်ရင်း ဝမ်းသာအားရ မေးလိုက်သည်။

"မင်း မီးလင်းဖိုတောင် လုပ်ပြီးပြီလား" ရွှီရှင်း အနည်းငယ် အံ့သြသွားသည်။ ၎င်းမှာ အခုအချိန်တွင် အရေးတကြီး မလိုအပ်ဟု သူ ထင်ထားသောကြောင့် ဖြစ်သည်။

"မီးလင်းဖိုတင် မဟုတ်ဘူး၊ အခြေခံမီးဖိုနဲ့ အကင်ဖိုပါ လုပ်ပြီးပြီ ပစ္စည်းတွေက အများကြီး ဖြစ်နေတာနဲ့ ကြည့်ရတာ ရှုပ်လို့ အကုန်သုံးပစ်လိုက်တာ"

"ငါ့အတွက်ကော ချန်ထားရဲ့လား"

"ရှင့်ကို ဘယ်လိုလုပ် မေ့မှာလဲ။ ကျွန်မမှာ ကျောက်တုံးတွေ အပုံလိုက် ရှိနေတာကို နည်းနည်းပဲ သုံးရသေးတယ်။ မလောက်ရင် ထပ်တူးရုံပေါ့"

ရွှီရှင်းက သူမကို သံသယဝင်နေသည်ကို မြင်ရသဖြင့် မိန်းကလေးမှာ မကျေမနပ်ဖြစ်ကာ သူမ၏ ခါးကို လက်ထောက်ပြီး ပြောလိုက်သည်။

ကြည့်ရတာ သူမက သူဌေးမလေးပဲ...

"ဒါကို ကြည့်ဦး" ရွှီရှင်းသည် လီဝမ်ရှီး မြင်နိုင်အောင် အပြာရောင်သစ်သားတစ်တုံးကို ပြလိုက်သည်။

"ဒါက ဘာလဲ" မိန်းကလေးက ဇဝေဇဝါ ဖြစ်နေသည်။

ဤတစ်ကြိမ်တွင်မှ သူမသည် စစ်ဆေးသည့် စားပွဲမပါဘဲ ပစ္စည်း၏ အဆင့်အတန်းကို မမြင်နိုင်ကြောင်း ရွှီရှင်း သတိရသွားကာ အပြာရောင်သစ်သား၏ ဖော်ပြချက်ကို သူမထံ ပေးပို့လိုက်သည်။

"ဒါ...ဒါက ပရိဘောဂတွေကို အဆင့်မြှင့်မယ့် အပြာရောင်ကုန်ကြမ်းပဲ" လီဝမ်ရှီး၏ မျက်လုံးများ ပြူးသွားပြီး သူမ၏ ကိုယ်ခန္ဓာကို ရှေ့သို့ တိုးလိုက်ရာ သူမထိုင်နေသော ကုတင်မှ ကျွီကျွီမြည်သံ ထွက်ပေါ်လာသည်။

"ဟုတ်တယ်...ငါ့မှာ အစိမ်းရောင်သစ်သားတွေလည်း အများကြီး ရှိသေးတယ်။ မင်းမှာ ကျောက်တုံးတွေ ပေါတယ် မဟုတ်လား။ လဲကြရအောင်၊ ငါ ဒီပစ္စည်းတွေကို မြန်မြန် လုပ်ချင်နေပြီ"

"အော်... အိုကေ"

ရွှီရှင်းသည် လီဝမ်ရှီးနှင့် အစိမ်းရောင်သစ်သား ၂၀၀ ကို အစိမ်းရောင်ကျောက်တုံး ၂၀၀ နှင့် လဲလှယ်လိုက်ပြီး အခြေခံမီးဖိုတစ်ခုကို အရင်ဆုံး ပြုလုပ်ကာ သစ်ပင်အိမ်၏ ဒုတိယထပ်တွင် ထားရှိလိုက်သည်။ ပြုလုပ်နေစဉ်အတွင်း မီးဖို၏ စွမ်းဆောင်ရည် မြင့်တက်စေရန် အပြာရောင်ကျောက်တုံး တစ်တုံး ထည့်သွင်း၍ ရမလားဟု သူ ကြည့်လိုက်သည်။

ကံမကောင်းစွာဖြင့် မအောင်မြင်ခဲ့ချေ။ ကျောက်တုံး ၁၀၀ လိုအပ်သော မီးဖိုကြီးတွင် ကျောက်တုံးတစ်တုံးတည်းနှင့် အစွမ်းထက်လာရန် မျှော်လင့်ခြင်းမှာ အနည်းငယ် လက်တွေ့မကျသည်မှာလည်း မှန်ကန်လှပေသည်။

---

အခန်း ၁၃ ပြီး....