အပြာရောင်အဆင့် ပရိဘောဂများ

မီးဖိုကြီးမှာ ရွှီရှင်းထက်ပင် အရပ်မြင့်ပြီး အနည်းဆုံး နှစ်မီတာခွဲခန့် ရှိသည်။ ကျောက်မီးဖိုကြီးမှာ စက်မှုလုပ်ငန်းသုံး ပုံစံမျိုး ပေါက်နေသည်။

ရွှီရှင်းသည် အဖြူရောင်သစ်သားတစ်တုံးကို မီးဖိုထဲသို့ ထည့်လိုက်သည်။ သစ်သားမှာ ချက်ချင်း မီးမတောက်သေးသော်လည်း အကြောင်းကြားစာတစ်ခု ပေါ်လာ၏။

[ကျန်ရှိသော လောင်ကျွမ်းချိန် - ၅ မိနစ်]

အဖြူရောင်သစ်သားတစ်တုံးသည် ၅ မိနစ်သာ လောင်ကျွမ်းနိုင်သည်ဆိုလျှင် အစိမ်းရောင်အဆင့်ကရော မည်သို့ရှိမည်နည်း။ ရွှီရှင်းသည် အစိမ်းရောင်အဆင့် သစ်သားတစ်တုံးကို မီးဖိုထဲသို့ ထပ်ထည့်လိုက်သည်။

[ကျန်ရှိသော လောင်ကျွမ်းချိန် - ၂ နာရီ ၃၅ မိနစ်]

"... ဒီလောက်တောင်လား"

၂ နာရီ ၃၅ မိနစ်ဆိုသည်မှာ ၁၅၅ မိနစ် ဖြစ်သည်။

အဖြူရောင်သစ်သား၏ ၅ မိနစ်ကို နှုတ်လိုက်လျှင် စုစုပေါင်း ၁၅၀ မိနစ် ဖြစ်သဖြင့် အဖြူရောင်ထက် အဆ ၃၀ ပို၍ အလောင်ခံခြင်း ဖြစ်သည်။ ရွှီရှင်းသည် သူလဲလှယ်ထားသော အစိမ်းရောင် သံသတ္တုရိုင်း ၆၀ ထဲမှ ၂၀ ကို အပေါ်ထပ်အလွှာထဲသို့ လောင်းထည့်လိုက်သည်။

ချက်ချင်းပင် မီးများ ဝုန်းခနဲ တောက်လောင်လာပြီး အပူရှိန်များ ထွက်ပေါ်လာကာ မီးဖိုတစ်ခုလုံးကို ခဏချင်းပင် ရဲရဲနီသွားစေတော့သည်။

[သံတုံး အရည်ကျိုရန် ကြာချိန် - ၂ နာရီ]

မီးဖိုကို သူ့ဘာသာ လောင်ကျွမ်းနေစေရန် ထားခဲ့ပြီး ရွှီရှင်းသည် တတိယထပ်သို့ ပြန်တက်လာခဲ့သည်။ ဗီဒီယိုဖုန်းခေါ်ဆိုမှုမှာ ဆက်ရှိနေဆဲဖြစ်ပြီး လီဝမ်ရှီးမှာ ကုတင်ပေါ်တွင် ငိုင်တိုင်တိုင် ထိုင်နေဆဲ ဖြစ်သည်။

ရွှီရှင်း ပြန်လာသည်ကို မြင်သောအခါ သူမက ချက်ချင်း ပြုံးလိုက်ပြီး "မီးဖိုကိစ္စ ပြီးပြီလား" ဟု မေးလိုက်သည်။

"အင်း... ပြီးပြီ" ရွှီရှင်း ခေါင်းညိတ်ပြလိုက်သည်။

"ပြောပြဦးမယ်၊ သံတုံးတစ်တုံးရဖို့ သံသတ္တုရိုင်း ၅ တုံး လိုတယ်၊ ပြီးတော့ တစ်တုံးကျိုဖို့ နာရီဝက်တောင် ကြာတာ။ ဒီမီးဖိုရဲ့ လုပ်ဆောင်နှုန်းက တော်တော်လေး နှေးတာပဲ"

"ဟင်"

ဒါဆို သံသတ္တုရိုင်း ၂၀ ကနေ သံတုံး ၄ တုံး ရမယ်ပေါ့။

ထိုနှုန်းမှာတော့ လက်ခံနိုင်စရာ ရှိပါသည်။

"မင်း ဒီနေ့လယ် အပြင်မထွက်ဘူးလား" ရွှီရှင်းက မေးလိုက်သည်။

"အင်း... လမ်းလျှောက်တော့ ထွက်ဖြစ်တယ်၊ ဒါပေမဲ့ အဝေးကြီးတော့ မသွားဘူး။ ပတ်ဝန်းကျင်မှာ သစ်ပင်သိပ်မရှိပေမဲ့ ကျောက်တုံးတွေတော့ အများကြီးပဲ။ ဘယ်ဟာက အဆင့်မြင့်လဲဆိုတာ ကျွန်မ မသိတာနဲ့ တွေ့တဲ့ကျောက်တုံး နည်းနည်းပဲ ယူလာခဲ့လိုက်တယ်။ ကံမကောင်းစွာနဲ့ပဲ ထူးထူးခြားခြား ဘာမှမတွေ့ဘူး" လီဝမ်ရှီးက ပုခုံးတွန့်ပြလိုက်ပြီး ရွှီရှင်းကို မျှော်လင့်တကြီး ကြည့်ကာ

"ဟေး... ရွှီရှင်း၊ အစ်ကိုရှင်း... ရှင် ရဲ့ အပြာရောင်သစ်သားတွေကို ရောင်းဦးမလား။ ကျွန်မ ကို နည်းနည်းလောက် ခွဲပေးပါဦး၊ ဒီကုတင်ကြီးက တကယ်ကို ဆိုးလွန်းလို့"

ထိုသို့ပြောရင်း လီဝမ်ရှီးက သူမအောက်ရှိ ကုတင်ကို ပုတ်ပြလိုက်ရာ ကျွီကျွီ ဟု မြည်သွားတော့သည်။ ရွှီရှင်းသည် အစောပိုင်းကတည်းက သူမကို ရောင်းရန် ရည်ရွယ်ချက်ဖြင့် အပြာရောင်သစ်သားကို ပြခဲ့ခြင်း ဖြစ်သည်။

ဘာပဲဖြစ်ဖြစ် သူဌေးမလေးနှင့် အရောင်းအဝယ်လုပ်ရင်း အရင်းအမြစ်များကို သေချာစုဆောင်းရန် အရေးကြီးသည် မဟုတ်ပါလား။

"ရတာပေါ့၊ ဘယ်နှတုံး လိုချင်လဲ"

လီဝမ်ရှီး၏ မျက်လုံးများ လင်းခနဲ ဖြစ်သွားသည်။ "ရှင့်ဆီမှာ အများကြီး ရှိလို့လား"

"အများကြီးတော့ မဟုတ်ပါဘူး" ရွှီရှင်း ပုခုံးတွန့်ပြလိုက်ရင်း

"အများဆုံး ၅ တုံးအထိတော့ ပေးနိုင်ပါတယ်" ဟု ပြောလိုက်သည်။

"ကောင်းပြီ၊ ကောင်းပြီ ဈေးကတော့ အရင်အတိုင်းပဲ၊ အပြာရောင်သစ်သား ၅ တုံးအတွက် အစိမ်းရောင် အရင်းအမြစ် ၆၀ ပေးမယ်"

စောစောက သစ်သားလောင်ကျွမ်းချိန်ကို ကြည့်ခြင်းအားဖြင့် အစိမ်းရောင်သစ်သားမှာ အဖြူရောင်ထက် အဆ ၃၀ ပိုအစွမ်းထက်သည်။ ထို့ပြင် အစိမ်းရောင်တွင် အဖြူရောင်၌ မရှိသော လုပ်ဆောင်ချက်များ ပါရှိသည်။

အစိမ်းရောင်တစ်တုံးကို အဖြူရောင် အတုံး ၄၀-၅၀ နှင့် လဲလျှင်ပင် ပြဿနာမရှိနိုင်ရာ အပြာရောင်တစ်တုံးမှာ အစိမ်းရောင် ၂၀ ထက်မက တန်ဖိုးရှိသည်မှာ သေချာသည်။

လီဝမ်ရှီးနှင့် အရောင်းအဝယ်လုပ်ရာတွင်တော့ သူ သိပ်ပြီး တွက်ကပ်မနေပါ။ ယခင်ကလည်း အပြာရောင်ကျောက်တုံးအတွက် ၂၀-၁ အချိုး နှုန်းနှင့် လဲခဲ့ဖူးသည် မဟုတ်ပါလား။

သို့သော် လက်ရှိတွင် သူသည် အစိမ်းရောင်အရင်းအမြစ်များ မရှားပါးသေးသဖြင့်

"မင်းဆီမှာ အပြာရောင် သံသတ္တုရိုင်း ဘယ်နှတုံး ကျန်သေးလဲ။ ငါ သတ္တုရိုင်းကို တစ်တုံးချင်းနှုန်းနဲ့ လဲချင်တယ်၊ အော်... ပြီးတော့ အပြာရောင်ကျောက်တုံးလည်း နည်းနည်း ထပ်လိုချင်သေးတယ်" ဟု ပြောလိုက်သည်။

လီဝမ်ရှီးက အလွန်ပင် ပြတ်သားစွာဖြင့် အရောင်းအဝယ်ကို စတင်လိုက်သည်။

[တစ်ဖက်လူမှ သင့်ထံသို့ အရောင်းအဝယ် ကမ်းလှမ်းချက် ပို့လိုက်သည် - သံသတ္တုရိုင်း (အပြာရောင်အဆင့်) ၃ တုံး၊ ကျောက်တုံး (အပြာရောင်အဆင့်) ၂ တုံး နှင့် သစ်သား (အပြာရောင်အဆင့်) ၅ တုံး]

ရွှီရှင်း သဘောတူလိုက်ပြီးနောက် နှစ်ဦးသား စကားအနည်းငယ် ထပ်ပြောကာ ဗီဒီယိုဖုန်းခေါ်ဆိုမှုကို အဆုံးသတ်လိုက်သည်။ တစ်ဖက်တွင် သူမလည်း ကုတင်အိုကြီးပေါ်မှာ အိပ်ရသည်မှာ အဆင်မပြေလှသဖြင့် သူမ၏ ပရိဘောဂများကို အဆင့်မြှင့်ရန် စိတ်အားထက်သန်နေပေလိမ့်မည်။

ရွှီရှင်းလည်း အားမနေပါ။ သူသည် ဟောင်းနွမ်းနေသော ကုတင်ပျက်ကြီးကို ချက်ချင်း ဖျက်ဆီးပစ်လိုက်ပြီး အပြာရောင်သစ်သားတစ်တုံးကို အသုံးပြုကာ ကုတင်အသစ်တစ်ခု ပြုလုပ်လိုက်သည်။

အံ့သြစရာကောင်းသည်မှာ မူလသစ်သားကုတင်မှာ အဖြူရောင်သစ်သားဖြင့် ပြုလုပ်ထားခြင်းဖြစ်သော်လည်း ယခုတစ်ကြိမ်တွင် အခြေခံကုန်ကြမ်းအဖြစ် အစိမ်းရောင်သစ်သား ၉ တုံးနှင့် အပြာရောင်သစ်သား ၁ တုံးကို အသုံးပြုထားခြင်း ဖြစ်သည်။

[အစိမ်းရောင်သစ်သား ၉ တုံး နှင့် အပြာရောင်သစ်သား ၁ တုံး ကို အသုံးပြု၍ သစ်သားကုတင် ပြုလုပ်လိုပါသလား]

ရွှီရှင်းက ဟုတ်ကဲ့ ကို ရွေးချယ်လိုက်သည်။ မူလထက် များစွာ အဆင့်မြင့်သော ကုတင်တစ်ခု သူ့ရှေ့တွင် ပေါ်လာတော့သည်။

[သစ်သားကုတင် (အပြာရောင်အဆင့်) - အဆင့်မြင့်သစ်သားဖြင့် ပြုလုပ်ထားသော ကုတင်ဖြစ်သည်။ အဆင့်မြင့်သစ်သား၏ ထူးခြားသော ရနံ့များ ထွက်ပေါ်နေပြီး အိပ်စက်မှုကို ကောင်းမွန်စေကာ စိတ် နှင့် ကိုယ်ခန္ဓာစွမ်းအင် ပြန်နာလန်ထူမှုကို မြန်ဆန်စေသည်။ သို့သော် အလွန်သက်သောင့်သက်သာရှိလှသဖြင့် အိပ်ရာထနောက်ကျခြင်း ဖြစ်ပေါ်စေနိုင်သည်။]

၎င်းမှာ အခင်း သို့မဟုတ် စောင်များမပါသော သစ်သားကုတင်မာမာကြီး ဖြစ်နေဆဲ ဖြစ်သော်လည်း အပြာရောင်အဆင့်၏ အာနိသင်ကြောင့် ရွှီရှင်း အံ့အားသင့်သွားရသည်။ သူသည် ပြုလုပ်နည်းစာရင်းကို ချက်ချင်း စစ်ဆေးကြည့်ရာ အဆင့်မြင့်ပြုလုပ်နည်းအသစ် ထွက်မလာသေးဘဲ မူလအတိုင်း အဖြူရောင်သစ်သား ၁၀ တုံးဖြင့် ကုတင်လုပ်နည်းသာ ရှိနေသေးသည်။

"ဒါဆို... ဒီပြုလုပ်နည်းတွေက အခြေခံတွေပဲပေါ့၊ အဆင့်မြင့်ကုန်ကြမ်းတွေကို သုံးလိုက်ရင် ပိုကောင်းတဲ့ ကိရိယာတွေ ထွက်လာတာမျိုးလား"

ရွှီရှင်းတွင် မူလက အပြာရောင်သစ်သား ၁၂ တုံး ရှိရာ လီဝမ်ရှီးကို ၅ တုံးပေးလိုက်ပြီး ကုတင်အတွက် ၁ တုံး သုံးလိုက်သဖြင့် ၆ တုံး ကျန်သေးသည်။ ထို့ပြင် အပြာရောင်ကုန်ကြမ်းများ စဉ်ဆက်မပြတ် ထုတ်လုပ်ပေးမည့် မြေဆီလွှာကောင်းတစ်ခုလည်း ရှိနေပြီဖြစ်ရာ သူ တွန့်တိုမနေတော့ပါ။

[ မှီကုလားထိုင် (အပြာရောင်အဆင့်) - အဆင့်မြင့်သစ်သားဖြင့် ပြုလုပ်ထားသည်။ လူ့ခန္ဓာကိုယ်၏ ကွေးညွှတ်မှုနှင့် အံဝင်ခွင်ကျဖြစ်အောင် ပြုလုပ်ထားပြီး ယင်းပေါ်တွင် ထိုင်ခြင်းဖြင့် ခွန်အားနှင့် စိတ်ဓာတ်စွမ်းအင်များကို ဖြည်းဖြည်းချင်း ပြန်လည်နာလန်ထူစေကာ ပစ္စည်းပြုလုပ်ရာတွင် အောင်မြင်မှုနှုန်းကို မြှင့်တင်ပေးသည်။]

[ထမင်းစားပွဲ (အပြာရောင်အဆင့်) - အဆင့်မြင့်သစ်သားဖြင့် ပြုလုပ်ထားသည်။ ဤစားပွဲအနီးတွင် စားသောက်ခြင်းက အစားအစာကို ပိုမိုအရသာရှိစေပြီး အစားအစာ၏ အာနိသင်များကို မြှင့်တင်ပေးသည်။]

မှီထိုင်ကုလားထိုင်နှင့် ထမင်းစားပွဲ၏ အာနိသင်များကို ကြည့်ပြီး ရွှီရှင်း ပြုံးလိုက်မိသည်။ ဤ မှီကုလားထိုင်မှာ ပစ္စည်းပြုလုပ်ရာတွင် အောင်မြင်မှုနှုန်းကို မြှင့်တင်ပေးနိုင်သည်။ လောလောဆယ်တွင် သူ့စာရင်းထဲ၌ ရှုံးနိမ့်နိုင်ခြေရှိသော ပြုလုပ်နည်းများ မရှိသေးသော်လည်း ၎င်းတို့မှာ အခြေခံများသာ ဖြစ်သည်။ ဂိမ်းအတွေ့အကြုံအရ နောင်တွင် ပုံစံထုတ်နည်း လိုအပ်သော ပစ္စည်းများတွင် ရှုံးနိမ့်နိုင်ခြေ ပါလာနိုင်ရာ ဤအပြာရောင်ကုလားထိုင်မှာ အသုံးဝင်လာပေလိမ့်မည်။

ထမင်းစားပွဲမှာမူ ပို၍ပင် စိတ်လှုပ်ရှားစရာ ကောင်းလှသည်။ ရွှီရှင်းသည် ညဘက်တွင် နှစ်နာရီကြာ မြင်နိုင်စွမ်းပေးသော အပြာရောင်အဆင့် အနီရောင်ဘယ်ရီသီးတစ်လုံးကို ချက်ချင်း ထုတ်ယူလိုက်သည်။ ယခုအခါ အပြင်ဘက်တွင် တဖြည်းဖြည်း မှောင်စပြုနေပြီဖြစ်ပြီး အကာအကွယ်ပေးထားသည့် ကာလကုန်ဆုံးရန် အချိန်သိပ်မကျန်တော့ချေ။ ဤနောက်ဆုံး ဘေးကင်းသော အချိန်လေးအတွင်း သစ်ပင်ခုတ်ခြင်းကဲ့သို့သော အလုပ်များကို သူ လုပ်ဆောင်လိုသည်။

ရွှီရှင်းသည် မှီကုလားထိုင်ပေါ်တွင် ထိုင်ကာ ထမင်းစားပွဲဘေး၌ ညစာအဖြစ် သာမန်ပန်းသီးတစ်လုံးနှင့် လိမ္မော်သီးနှစ်လုံးကို စားလိုက်ပြီးနောက် အပြာရောင်ဘယ်ရီသီးအကြီးကို စားလိုက်သည်။ စားပြီးသည်နှင့် ရွှီရှင်း၏ အမြင်အာရုံမှာ လင်းခနဲ ဖြစ်သွားပြီး အပြင်ဘက်ရှိ မှောင်စပြုနေသော မြင်ကွင်းများမှာ နေ့ခင်းဘက်ကဲ့သို့ပင် ပြန်လည်ကြည်လင်လာတော့သည်။

"၃ နာရီလား" ရွှီရှင်းသည် ခန္ဓာကိုယ်မှပေးသော သတင်းအချက်အလက်အရ အနီရောင်ဘယ်ရီသီး၏ အာနိသင်မှာ မူလ ၂ နာရီမှ ၃ နာရီအထိ တိုးတက်သွားကြောင်း သိလိုက်ရသည်။ အာနိသင် ၅၀ ရာခိုင်နှုန်းတိတိ တိုးသွားခြင်း ဖြစ်သည်။

ထို့ပြင် ရွှီရှင်းသည် အနည်းငယ် ဗိုက်ပြည့်သွားသလို ခံစားလိုက်ရသည်။ ပုံမှန်အားဖြင့် ပန်းသီးတစ်လုံးနှင့် လိမ္မော်သီးနှစ်လုံးမှာ ဗိုက်မဆာအောင်သာ တားဆီးပေးနိုင်သော်လည်း ယခုတစ်ခေါက်တွင်မူ တကယ် ဗိုက်ပြည့်သွားခြင်း ဖြစ်သည်။

ဤထမင်းစားပွဲမှာ အပြာရောင်အဆင့် အစားအစာများ၏ ထူးခြားသော အာနိသင်ကို မြှင့်တင်ပေးရုံတင်မက အစားအစာ၏ အခြေခံစွမ်းအင်ပေးစွမ်းမှုကိုလည်း မြှင့်တင်ပေးသည်။ ဆိုလိုသည်မှာ သူ၏ အစားအသောက် ရိက္ခာများ တစ်ဝက်ခန့် တိုးလာခြင်းပင် ဖြစ်သည်။

ဤထမင်းစားပွဲမှာ တကယ့်ကို ပစ္စည်းကောင်းတစ်ခု ဖြစ်ပေတော့သည်။

အပိုင်း ၁၄ ပြီး...