ကောင်းကင်ပေါ် တက်သွားလိုက်စမ်း

ယီထျန်းယွမ်၏ သတ်ဖြတ်လိုသော အငွေ့အသက်များက ယွမ်လဲ့ အရှင်သခင်ကို ထိတ်လန့်သွားစေခြင်း မရှိသည့်အပြင် တစ်ဖက်လူကို ပို၍ပင် ကျယ်လောင်စွာ ရယ်မောစေခဲ့သည်။

“တကယ်ကို မောက်မာလွန်းတာပဲ... ဒီတိုက်ခိုက်ရေးကွင်းက မင်းအိမ်က ဖွင့်ထားတာလို့ ထင်နေတာလား...”

ယွမ်လဲ့ အရှင်သခင်၏ လေသံမှာ ကဲ့ရဲ့လှောင်ပြောင်မှုများဖြင့် ပြည့်နှက်နေခဲ့သည်။ နောက်တစ်ပွဲတွင် ယီထျန်းယွမ်နှင့် တွေ့ဆုံရမည်ဟု သူကိုယ်တိုင်ပင် အတတ်မပြောနိုင်ချေ။ အကယ်၍ ယီထျန်းယွမ်နှင့်သာ တွေ့ဆုံရမည်ဆိုပါက သူ သေချာပေါက် ဝမ်းသာမိပေလိမ့်မည်။ သို့သော် ပြိုင်ဘက်ကို မည်သူက ဆုံးဖြတ်ပေးမည်နည်း ဆိုသည်မှာမူ ပြောရန် ခက်ခဲလှသည်။

ယီထျန်းယွမ်သည် သူ့ကို ဂရုမစိုက်တော့ဘဲ အကြီးအကဲ ငါးဦးရှိရာသို့ လှည့်ကြည့်လိုက်သည်။ လူအများ၏ အကြည့်များအောက်တွင် သူက လေးနက်သောလေသံဖြင့် ဆိုလိုက်သည်။

“အကြီးအကဲများခင်ဗျာ... ကျွန်တော့်ရဲ့ နောက်တစ်ပွဲ ပြိုင်ဘက်ကို ယွမ်လဲ့ အရှင်သခင် ဖြစ်အောင် စီစဉ်ပေးဖို့ တောင်းဆိုပါတယ်... ခွင့်ပြုပေးပါဦး...”

ယွမ်လဲ့ အရှင်သခင်၏ ပြိုင်ဘက်မှာ သူဖြစ်လာမည် မဟုတ်သည်ကို သူ စိုးရိမ်နေခဲ့သည်။ အကယ်၍ နောက်တစ်ပွဲတွင် ယွမ်လဲ့ အရှင်သခင်က ထျန်ချင်းမြေကမ္ဘာအရှင်နှင့် တွေ့ဆုံသွားမည်ဆိုပါက သူ့အတွက် အခွင့်အရေး ရှိတော့မည် မဟုတ်ချေ။

ဤကဲ့သို့သော တောင်းဆိုမှုမျိုးကို ကွင်းအတွင်း၌ တစ်ခါမျှ မတွေ့ဖူးကြချေ။ အကြီးအကဲများ၏ အစီအစဉ်ကို မျိုးဆက်သစ် တစ်ဦးက ပြောင်းလဲနိုင်ပါမည်လော။

အကြီးအကဲ ကောက်ဟွမ်တို့သည် အခြေအနေအားလုံးကို သိရှိထားကြသဖြင့် ယီထျန်းယွမ် ဘာကြောင့် ဤသို့ တောင်းဆိုသည်ကို နားလည်ကြသည်။

၎င်းတို့သည် ယွမ်လဲ့ အရှင်သခင်ဘက်သို့ တစ်ချက်ကြည့်လိုက်ပြီးနောက် ယီထျန်းယွမ်ဘက်သို့ ပြန်ကြည့်လိုက်ကြကာ တစ်ဦးနှင့်တစ်ဦး အကြည့်ချင်း ဖလှယ်လိုက်ကြသည်။ ၎င်းတို့ သဘောတူညီမှု ရရှိသွားပုံရသည်။

“ကောင်းပြီလေ... မူလကတော့ ယွမ်လဲ့ အရှင်သခင်ကို ထျန်ချင်းမြေကမ္ဘာအရှင်နဲ့ ယှဉ်ပြိုင်ဖို့ စီစဉ်ထားတာပါ... ဒါပေမဲ့ မင်းက ဒီလောက်အထိ တောင်းဆိုနေမှတော့ မင်းတို့နှစ်ယောက်ကိုပဲ တွဲပေးလိုက်ပါ့မယ်...”

အကြီးအကဲ ကောက်ဟွမ်က မူလအစီအစဉ်ကို ချက်ချင်းပင် ပြောင်းလဲလိုက်သည်။

ဤစကား ထွက်ပေါ်လာသည်နှင့်တစ်ပြိုင်နက် လူအများမှာ လှုပ်လှုပ်ရှားရှား ဖြစ်သွားခဲ့ကြရသည်။ ၎င်းတို့အနေဖြင့် အစီအစဉ်ကို တကယ်ပင် ပြောင်းလဲနိုင်လိမ့်မည်ဟု မထင်မှတ်ထားခဲ့ကြချေ။ သို့သော် သေသေချာချာ စဉ်းစားကြည့်မည်ဆိုပါက အလွန်သန်မာသော စွမ်းဆောင်ရည် ရှိသူမျိုးမှသာ ဤကဲ့သို့ ပြောင်းလဲနိုင်စွမ်း ရှိပေလိမ့်မည်။ သာမန်အဆင့်ရှိသူဆိုပါက သေချာပေါက်ပင် ပြောင်းလဲနိုင်လိမ့်မည် မဟုတ်ချေ။

“ဒီတိုက်ခိုက်ရေးကွင်းက ငါ့အိမ်က ဖွင့်ထားတာ မဟုတ်ပေမဲ့ အနည်းဆုံးတော့ ပြိုင်ဘက်ကိုတော့ ပြောင်းလဲနိုင်သေးတယ်...”

ယီထျန်းယွမ်က ယွမ်လဲ့ အရှင်သခင်ကို တည်ငြိမ်စွာ ကြည့်လျက် ပြောလိုက်သည်။

“ဟားဟားဟား... မင်းကို တကယ်ပဲ ကျေးဇူးတင်ရမှာပဲ... မူလက ထျန်ချင်းမြေကမ္ဘာအရှင်နဲ့ တွေ့မှာဆိုတော့ အနိုင်ရဖို့ သိပ်ပြီး မသေချာဘူး ဖြစ်နေတာ... အခု မင်းနဲ့ တွေ့ရပြီဆိုတော့ ငါ့အတွက် အနိုင်ရဖို့ ပိုပြီး သေချာသွားတာပေါ့...”

ယွမ်လဲ့ အရှင်သခင်၏ မျက်ဝန်းများတွင် လှောင်ပြောင်မှုများ ပြည့်နှက်နေခဲ့သည်။

“ခဏနေရင် မင်းရဲ့ ရွေးချယ်မှုက ဘယ်လောက်အထိ မိုက်မဲလဲဆိုတာ မင်း သိစေရမယ်...”

“စိတ်ချပါ... တကယ်လို့ မင်းက ဝက်တစ်ကောင်လို မိုက်မဲနေရင်တောင် ငါကတော့ မိုက်မဲမှာ မဟုတ်ဘူး... အော်... မှားလို့... မင်းက မူလကတည်းက ဝက်တစ်ကောင်ပါပဲ... အားမနာပါနဲ့...”

ယီထျန်းယွမ်က လှောင်ပြောင်လိုက်သည်။

“တောက်... ခဏနေရင် မင်းမျက်နှာကို ဝက်မျက်နှာဖြစ်အောင် မရိုက်နိုင်ရင် ငါ့နာမည် ယွမ်လဲ့ အရှင်သခင် မဟုတ်တော့ဘူး...”

ယွမ်လဲ့ အရှင်သခင်က ဒေါသတကြီး အော်ဟစ်လိုက်သည်။

“မင်းက မူလကတည်းက ယွမ်လဲ့ အရှင်သခင် မဟုတ်ဘဲ ဝက်တစ်ကောင်ပါဆို...”

မုရုန်ရှောင်းက ယွမ်လဲ့ အရှင်သခင်ကို လက်ညှိုးထိုးကာ အော်ဟစ်လိုက်သည်။

ယွမ်လဲ့ အရှင်သခင်က သူမကို အေးစက်သော အကြည့်ဖြင့် ကြည့်လိုက်ပြီး ဒေါသတကြီး ပြောလိုက်သည်။

“သူနဲ့ အတူနေတာ ကြာသွားတော့ မင်းလည်း မောက်မာတတ်လာတာပဲ... ငါနဲ့ မတွေ့ရပါစေနဲ့လို့ ဆုတောင်းထားလိုက်... မဟုတ်ရင် မင်း တကယ်ကို အကြည့်ရဆိုးအောင် သေရလိမ့်မယ်...”

တကယ်လို့သာ ဤနေရာမှာ တိုက်ခိုက်ရေးကွင်း မဟုတ်ဘဲ ပြင်ပလောကတွင်ဆိုပါက မုရုန်ရှောင်းမှာ အစောကတည်းက အသတ်ခံလိုက်ရလောက်ပြီ ဖြစ်သည်။

“မင်းမှာ အဲဒီလို အခွင့်အရေး ရှိတော့မှာ မဟုတ်ဘူး...”

ယီထျန်းယွမ်က တည်ငြိမ်စွာ ပြောလိုက်သည်။

“ဟုတ်ပါ့မလား... အဲဒီစကားကို ငါက ပြောရမှာပါ...”

ယွမ်လဲ့ အရှင်သခင်သည် သူ့ကို စကားဆက်မပြောတော့ဘဲ နောက်သို့ လှည့်ကာ ပြင်ဆင်မှုများ လုပ်ဆောင်ရန် ထွက်ခွာသွားတော့သည်။

သူ ထွက်သွားပြီးနောက် ယီထျန်းယွမ်သည် လင်ယွမ်ဖုန်း၏ ဒဏ်ရာများကို ဆက်လက်ကုသပေးနေခဲ့ပြီး မကြာမီမှာပင် အခြား အုပ်ထိန်းသူများ ရောက်ရှိလာကာ ကူညီပေးကြသည်။ မူလကပင် ဤသည်မှာ သူ၏ တာဝန်မဟုတ်သဖြင့် ထိုအုပ်ထိန်းသူများကိုသာ လွှဲပြောင်းပေးလိုက်ရသည်။

“ထျန်းယွမ်အစ်ကို... အဲဒီ ယွမ်လဲ့ အရှင်သခင်ကို သေချာပေါက် အနိုင်ယူပြပါနော်...”

မုရုန်ရှောင်းက ဒေါသတကြီး ပြောလိုက်သည်။

“အဲဒါကတော့ အသေအချာပဲပေါ့...”

ယီထျန်းယွမ်သည် အဝေးတွင် တရားထိုင်ကာ နားယူနေသော ယွမ်လဲ့ အရှင်သခင်ကို မျက်မှောင်ကြုတ်ကြည့်လိုက်သည်။ ထိုယွမ်လဲ့ အရှင်သခင်ကို ကြောက်ရွံ့မှုဆိုသည်မှာ ဘာလဲဆိုသည်ကို သူ သေချာပေါက် သိရှိစေရမည်။

ဒုတိယအဆင့် တိုက်ပွဲမှာ မကြာမီမှာပင် ပြီးဆုံးသွားခဲ့ပြီး တစ်ကွင်းလုံးတွင် ပြိုင်ပွဲဝင် ထက်ဝက်မှာ ပြုတ်သွားခဲ့ပြန်သည်။ ယခုအခါ တစ်ကွင်းလုံးတွင် ပြိုင်ပွဲဝင် သုံးဆယ်ကျော်သာ ကျန်ရှိတော့ပြီး နောက်တစ်ပွဲ တိုက်ခိုက်မည်ဆိုပါက ထိပ်သီး တစ်ဆယ့်ငါးဦး ထွက်ပေါ်လာပေလိမ့်မည်။

ဤသည်မှာ အလွန်အရေးကြီးသော တိုက်ပွဲပင် ဖြစ်သည်။ ထိပ်သီး တစ်ဆယ့်ငါးဦးအတွင်း ဝင်ရောက်နိုင်ပါက ထိပ်သီး ဆယ်ဦးအတွင်း ဝင်ရောက်ရန်မှာ မဝေးတော့ချေ။ ထိပ်သီး တစ်ဆယ့်ငါးဦးမှာ ၎င်းတို့၏ ပန်းတိုင်မဟုတ်ဘဲ ထိပ်သီး ဆယ်ဦးမှာသာ စစ်မှန်သော ပန်းတိုင် ဖြစ်သည်။

ရက်အနည်းငယ် နားယူပြီးနောက် တတိယအဆင့် တိုက်ပွဲမှာ မကြာမီ စတင်လေတော့သည်။ ယီထျန်းယွမ် သတ်မှတ်ထားသော ပြိုင်ဘက်မှာ ယွမ်လဲ့ အရှင်သခင် ဖြစ်ပြီး ဤသည်မှာ အကြီးအကဲ ကောက်ဟွမ်က သဘောတူထားခဲ့ခြင်း ဖြစ်သည်။ မုရုန်ရှောင်း ရွေးချယ်ရသော ပြိုင်ဘက်မှာမူ အခြေခံ အလွန်ကောင်းသော ပြိုင်ပွဲဝင်တစ်ဦး ဖြစ်နေခဲ့သည်။ ယီထျန်းယွမ်က အနည်းငယ် စစ်ဆေးကြည့်လိုက်ရုံဖြင့် မုရုန်ရှောင်းအတွက် ယခုတစ်ကြိမ်မှာ အလွန်ခက်ခဲမည်ဖြစ်ပြီး ရှုံးနိမ့်သွားနိုင်ကြောင်း သိရှိလိုက်ရသည်။

သို့သော် ထိုအရာများ မစတင်မီ သူသည် ယွမ်လဲ့ အရှင်သခင်ကို စိုက်ကြည့်လိုက်သည်။ သူ၏ မျက်ဝန်းအစုံမှာ အလွန်ပင် တည်ငြိမ်နေခဲ့ပြီး ထိတ်လန့်စရာကောင်းလောက်အောင်ပင် တည်ငြိမ်နေခဲ့သည်။ သူသည် ဒေါသထွက်ခြင်း မရှိသလို ဝမ်းနည်းသော အမူအရာလည်း မပြဘဲ တစ်ဖက်လူကို တည်ငြိမ်စွာ ကြည့်နေခဲ့သည်။

“ကောင်လေး... မင်းရဲ့ ခန္ဓာကိုယ်က တကယ်ပဲ သန်မာတာလား... တကယ်လို့ သတ္တိရှိရင် လက်နက် မသုံးဘဲ ငါနဲ့ ခန္ဓာကိုယ်ချင်းပဲ ယှဉ်ကြည့်မလား...”

ယွမ်လဲ့ အရှင်သခင်က ယီထျန်းယွမ်ကို ချက်ချင်းပင် ထောင်ချောက်ဆင်လိုက်သည်။ သူသည် ယီထျန်းယွမ်ကို လက်နက် မသုံးစေဘဲ မိမိနှင့် ခန္ဓာကိုယ်ချင်းသာ ယှဉ်ပြိုင်စေချင်နေခြင်း ဖြစ်သည်။

“ပြဿနာမရှိဘူး...”

ယီထျန်းယွမ်က တည်ငြိမ်စွာ ပြန်လည်ဖြေကြားလိုက်သည်။

“ကောင်းပြီလေ...”

ယွမ်လဲ့ အရှင်သခင်၏ မျက်ဝန်းများအတွင်း၌ ဝမ်းသာရိပ်များ ထွက်ပေါ်လာခဲ့သည်။ ယီထျန်းယွမ်က မိမိနှင့် ခန္ဓာကိုယ်ချင်း မယှဉ်ပြိုင်မှာကိုသာ သူ စိုးရိမ်နေခဲ့ခြင်း ဖြစ်သည်။ သူ၏ အသန်မာဆုံးသော အစွမ်းမှာ ခန္ဓာကိုယ်ဖြစ်ပြီး အနီးကပ် တိုက်ခိုက်မှသာ သူ၏ အသန်မာဆုံးသော စွမ်းအားကို ထုတ်ဖော်နိုင်မည် ဖြစ်သည်။

ယီထျန်းယွမ်က ထိုမျှလွယ်ကူစွာ သဘောတူလိုက်သဖြင့် ဘေးနားရှိ ကြည့်ရှုသူများမှာ ခေါင်းခါလိုက်ကြသည်။ ဤသည်မှာ အလွန်ပင် မိုက်မဲသော အတွေးပင် ဖြစ်သည်။ ဤတိုက်ပွဲအတွင်း၌ အောင်နိုင်သူမှာသာ အရှင်သခင်ဖြစ်ရာ ပြိုင်ဘက်ကို မည်သို့ပင် တိုက်ခိုက်သည်ဖြစ်စေ မျှတသည်သာ ဖြစ်သည်။

ယခုမူ ယီထျန်းယွမ်သည် မိမိ၏ အားသာချက်ကို စွန့်လွှတ်လိုက်ပြီဖြစ်ရာ ယီထျန်းယွမ်မှာ ငယ်ရွယ်လွန်းသေးပြီး အခြေခံစည်းမျဉ်းများကိုပင် နားမလည်သေးကြောင်း ၎င်းတို့က ယူဆလိုက်ကြသည်။

“ဒါဆိုရင် အခု တရားဝင် စတင်ပြီ... ငါ အရင် တိုက်ခိုက်မယ်...”

ယွမ်လဲ့ အရှင်သခင်၏ နှုတ်ခမ်းထောင့်တွင် အေးစက်သော အပြုံးတစ်ခု ပေါ်ထွက်လာသည်။ လူမိုက်တစ်ဦးနှင့် တွေ့ဆုံရသဖြင့် ဤပွဲမှာ သူ သေချာပေါက် အနိုင်ရပြီဟု ယူဆလိုက်သည်။

သူသည် ယီထျန်းယွမ်ကို ဦးတည်၍ တိုက်ခိုက်ရန် ပြင်လိုက်စဉ်မှာပင် သူ၏ရှေ့မှောက်ရှိ ယီထျန်းယွမ်မှာ ပျောက်ကွယ်သွားကြောင်း ရုတ်တရက် သိရှိလိုက်ရသည်။

“ဘုန်း...”

သူ လူရှာရန် ပြင်လိုက်စဉ်မှာပင် သူ၏ နောက်ကျောသို့ ပြင်းထန်သော လက်သီးတစ်ချက် ကျရောက်လာသဖြင့် နာကျင်မှုကို ခံစားလိုက်ရပြီး တစ်ကိုယ်လုံး ထိန်းချုပ်မရဘဲ လွင့်စင်သွားခဲ့ရသည်။ သူသည် မိမိ၏ ခန္ဓာကိုယ်ကို လျင်မြန်စွာ လှည့်၍ လမ်းကြောင်းရှာကာ ရှောင်တိမ်းရန် ပြင်လိုက်သော်လည်း သူ၏ နောက်ကျောသို့ နောက်ထပ် ပြင်းထန်သော နာကျင်မှုတစ်ခု ကျရောက်လာပြန်သည်။

“ဝုန်း...”

ထိုအသံနှင့်အတူ သူသည် မြေပြင်ပေါ်သို့ ပြင်းထန်စွာ ရိုက်ချခြင်း ခံလိုက်ရသည်။ ဤလက်သီး၏ ပြင်းအားမှာ များစွာ မကြီးမားသော်လည်း သူ၏ ကိုယ်ပေါ်တွင် အရှိုးရာများ ထင်ကျန်ရစ်စေခဲ့သည်။

ဤသို့ ပြင်းထန်စွာ ရိုက်ချခံရမှုကြောင့် ယွမ်လဲ့ အရှင်သခင်မှာ အနည်းငယ် မူးဝေသွားခဲ့ရသည်။ အရာအားလုံးမှာ လျင်မြန်လွန်းလှသဖြင့် သူ သတိမထားမိခင်မှာပင် လက်သီးနှစ်ချက် ဆက်တိုက် တိုက်ခိုက်ခံလိုက်ရခြင်း ဖြစ်သည်။

“ရှုး...”

နောက်ထပ် လေပြင်းတစ်ခု ဖြတ်သန်းသွားပြန်သည်။ ယွမ်လဲ့ အရှင်သခင်သည် ဒေါသတကြီး အော်ဟစ်လိုက်ပြီး မြေပြင်ကို ပြင်းထန်စွာ ရိုက်ချလိုက်ရာ ဖြန်းခနဲ အသံနှင့်အတူ တစ်ကိုယ်လုံး အပေါ်သို့ ခုန်တက်သွားခဲ့သည်။ ခန္ဓာကိုယ်အတွင်းရှိ ကြမ်းတမ်းလှသော မိုးကြိုးများမှာ ချက်ချင်းပင် ထွက်ပေါ်လာခဲ့ပြီး သူ၏ လှုပ်ရှားမှုများမှာ ယခင်ကထက် အဆပေါင်းများစွာ ပိုမို လျင်မြန်လာခဲ့သည်။

“ဘုန်း...”

ယွမ်လဲ့ အရှင်သခင်သည် လက်ဖြင့် ကာကွယ်လိုက်သော်လည်း နောက်သို့ ခြေလှမ်းအနည်းငယ် ဆုတ်ခွာသွားခဲ့ရသည်။ ထိုအခါမှသာ သူသည် ယီထျန်းယွမ်၏ ပုံရိပ်ကို ရှင်းလင်းစွာ မြင်တွေ့လိုက်ရသည်။

“အရှိန်ကတော့ မဆိုးပါဘူး... ဒါပေမဲ့ ဒီလောက်ပါပဲ... အရှိန်နဲ့ ပတ်သက်ရင် ငါ ယွမ်လဲ့ အရှင်သခင်က ဘယ်သူ့ကိုမှ မကြောက်ဘူး...”

ယွမ်လဲ့ အရှင်သခင်က အေးစက်စွာ ပြုံးလိုက်သည်။ သူသည် မိုးကြိုးနတ်ဘုရား ခန္ဓာကိုယ် ပိုင်ရှင်ဖြစ်ပြီး မိုးကြိုးစွမ်းအားများကို ပိုင်ဆိုင်ထားသဖြင့် လျှပ်စီးအလား လျင်မြန်စွာ လှုပ်ရှားနိုင်စွမ်း ရှိသည်။

သူ၏ မိုးကြိုးအရှိန်ထက် ပိုမို လျင်မြန်နိုင်သည့် အစွမ်းမျိုး ရှိပါဦးမည်လော။

“စကားတွေ များလွန်းတယ်... ကောင်းကင်ပေါ် တက်သွားလိုက်စမ်း...”

ယီထျန်းယွမ်သည် မည်သည့်အချိန်က ရောက်ရှိလာသည် မသိရဘဲ ယွမ်လဲ့ အရှင်သခင်၏ နောက်ကျောသို့ ရောက်ရှိနေခဲ့ပြီ ဖြစ်သည်။ သူသည် တစ်ဖက်လူ၏ နောက်ကျောကို ခြေထောက်ဖြင့် ပြင်းထန်စွာ ကန်ထုတ်လိုက်ရာ ဒုန်းခနဲ အသံနှင့်အတူ ဘောလုံးတစ်လုံးအလား ကောင်းကင်ပေါ်သို့ လွင့်တက်သွားခဲ့တော့သည်။ နောက်ကျောမှာ ကြီးမားသော အစိတ်အပိုင်းတစ်ခု ချိုင့်ဝင်သွားခဲ့သော်လည်း အသက်အန္တရာယ်ရှိသော ဒဏ်ရာမျိုးတော့ မဟုတ်ချေ။

ယီထျန်းယွမ်သည် ယွမ်လဲ့ အရှင်သခင်ကို ကောင်းကောင်းကြီး ကစားပေးချင်နေခြင်းသာ ဖြစ်သည်။ ယွမ်လဲ့ အရှင်သခင်က လင်ယွမ်ဖုန်းကို လှောင်ပြောင်ကစားခဲ့သကဲ့သို့ပင် သူက ပြန်လည်လုပ်ဆောင်ပေးနေခြင်း ဖြစ်သည်။

အခန်း ၁၀၂၈ ပြီးပါပြီ။