မွေးရာပါ စွမ်းရည်ထူး

ချန်ဖေး အနေဖြင့် နောင်တစ်ချိန်တွင် သူ၏ ကိုယ်ခံပညာ အဆင့်မြင့်မားလာသည်နှင့်အမျှ လေဟာနယ် အကွက်ကဲ့သို့သော အရာမျိုး ပေါ်ပေါက်လာခြင်း ရှိမရှိ မသိသော်လည်း ဤသည်မှာ စမ်းသပ်မှုကို ဖြတ်ကျော်ရန် နည်းလမ်းတစ်ခု ဖြစ်နေသဖြင့် သဘာဝကျကျပင် လက်ခံလိုက်သည်။

"ဆရာတော်... ရှုစားတော်မူပါ..."

ချန်ဖေးက ပြောရင်းဆိုရင်း ညာဘက်လက်ကို ရှေ့သို့ ဆန့်ထုတ်ကာ ဝက်နံရိုးပေါင်းကြီး တစ်ခုကို ဆွဲထုတ်လိုက်သည်။

ဘုန်းကြီး၏ မျက်လုံးများ အရောင်လက်သွားပြီး ချန်ဖေး၏ လှုပ်ရှားမှု အသေးစိတ်ကို ခွဲခြမ်းစိတ်ဖြာ ကြည့်ရှုသော်လည်း ဝက်နံရိုးပေါင်းက ချန်ဖေး၏ လက်ထဲသို့ မည်သို့မည်ပုံ ရောက်ရှိလာသည်ကိုမူ အဖြေရှာမရ ဖြစ်နေသည်။

ဤသည်မှာ ဘုန်းကြီးများ နားလည်ထားသော 'လက်အိတ်ထဲမှ ကမ္ဘာလောက' သဘောတရားနှင့် အနည်းငယ် ဆင်တူသော်လည်း များစွာ ကွာခြားမှု ရှိနေသည်။

"ဆရာတော်..." ဘုန်းကြီးတစ်ပါး စက်လည်သွားသကဲ့သို့ ဖြစ်နေသည်ကို မြင်လိုက်ရသဖြင့် ချန်ဖေးက တိုးတိုးလေး လှမ်းခေါ်လိုက်သည်။

"စောင့်ဆိုင်းစေမိတဲ့အတွက် တောင်းပန်ပါတယ်... ဒကာ ဒီစမ်းသပ်မှုကို အောင်မြင်ပါပြီ..."

ဘုန်းကြီးက လက်အုပ်ချီလိုက်ရာ ကျောက်မျှော်စင်ပေါ်မှ နှလုံးသား ပုတီးစေ့က ချန်ဖေး၏ ခြေရင်းသို့ ဖြည်းညှင်းစွာ ပျံဝဲလာသဖြင့် ချန်ဖေးက လှမ်းယူလိုက်သည်။

"ကျေးဇူးတင်ပါတယ် ဆရာတော်..." ချန်ဖေးက ပြုံး၍ ပြောလိုက်သည်။

ဘုန်းကြီးက စကားမဆိုဘဲ ခေါင်းညိတ်ရုံသာ ညိတ်ပြလိုက်သည်။ ပတ်ဝန်းကျင်ရှိ လေထုမှာ ချက်ချင်း ကွဲအက်သွားပြီး ချန်ဖေးသည် အပြင်ဘက် ပတ်ဝန်းကျင်သို့ ပြန်လည် ရောက်ရှိသွားသည်။

ချန်ဖေးက လက်ထဲမှ နှလုံးသား ပုတီးစေ့ကို ကြည့်လိုက်ပြီးနောက် ရွေ့လျားနေသော အမည်းစက်များကို ရှောင်ကွင်း၍ ဘေးကင်းသော နေရာတစ်ခုသို့ သွားလိုက်သည်။

ပထမ နှလုံးသား ပုတီးစေ့ကဲ့သို့ပင် ဤပုတီးစေ့သည်လည်း အချိန်မရွေး ကွဲကြေသွားတော့မည့်အလား အက်ကွဲကြောင်းများဖြင့် ပြည့်နှက်နေသည်။

ချန်ဖေး အချိန်ဆွဲမနေဘဲ နှလုံးသား ပုတီးစေ့ပေါ်မှ ပုံစံများကို စတင် လေ့လာလိုက်သည်။ ၁၅ မိနစ်ခန့် အကြာတွင် ချန်ဖေး၏ စနစ်မျက်နှာပြင်ပေါ်၌ အပြောင်းအလဲ အသစ်တစ်ခု ဖြစ်ပေါ်လာပြီး နှလုံးသား အစီအရင်နှင့် ပတ်သက်သော သူ၏ ဗဟုသုတများစွာ တိုးတက်လာခဲ့သည်။

"တတိယမြောက် နှလုံးသား ပုတီးစေ့ဆီ တန်းသွားရမယ်..."

ချန်ဖေး ခေတ္တမျှ စဉ်းစားလိုက်သည်။

နှလုံးသား ပုတီးစေ့ တစ်လုံးစီအတွက် အချိန်ကန့်သတ်ချက် တစ်နာရီ ပေးထားသည်ဟု ဖန်းချင်းဟုန်က ပြောထားပြီး ယခုအချိန်ထိ အချိန်မပြည့်သေးသဖြင့် တတိယမြောက် နှလုံးသား ပုတီးစေ့ကို သွားရှာရန် ချန်ဖေးတွင် အကြောင်းပြချက် ကောင်းကောင်း ရှိနေသည်။

သေချာသည်မှာ ပို၍ အရေးကြီးသည့် အချက်က ယခုအချိန်၌ ချန်ဖေး ဖန်းချင်းဟုန်ကို သွားတွေ့ရန် အနည်းငယ် ကြောက်ရွံ့နေခြင်း ဖြစ်သည်။

ဖန်းချင်းဟုန်က ကိစ္စပြီးသည်နှင့် ချန်ဖေးကို ကိုယ်ပွား သို့မဟုတ် ရုပ်သေးအဖြစ် ပြောင်းလဲရန် ရည်ရွယ်ထားသည်မှာ ထင်ရှားသည်။

ယခုတစ်ကြိမ် ချန်ဖေး ပြန်သွားပါက တစ်ဖက်လူသည် ချန်ဖေး၏ ခန္ဓာကိုယ်ကို စေ့စေ့စပ်စပ် စစ်ဆေးပြီး နောက်ပိုင်းတွင် ထိန်းချုပ်ရ လွယ်ကူစေရန် စွမ်းအင်စိမ်းများ ထပ်မံ ထည့်သွင်းပေလိမ့်မည်။

မူလက ထည့်ပေးလိုက်သော စွမ်းအင်စိမ်းများကို နဂါးဆင် နှိမ်နင်းခြင်း ကျင့်စဉ်က စုပ်ယူလိုက်ပြီး ဖြစ်ရာ အကယ်၍ စစ်ဆေးလိုက်ပါက ပြဿနာ ရှိနေကြောင်း ချက်ချင်း သိရှိသွားပေလိမ့်မည်။

ချန်ဖေးအတွက် တစ်ခုတည်းသော ရွေးချယ်စရာမှာ တတိယမြောက် နှလုံးသား ပုတီးစေ့ကို ရှာဖွေပြီး ဖန်းချင်းဟုန်ကို တန်ပြန်နိုင်မည့် နည်းလမ်း ရှိမရှိ ကြည့်ရှုရန်သာ ဖြစ်သည်။

သို့မဟုတ်ပါက ဤအတိုင်း နှာခေါင်းပေါက် အဆွဲခံနေရလျှင် နောက်ဆုံးတွင် သူ အသေကစားခံရလိမ့်မည်။

နှလုံးသား ပုတီးစေ့ကို ဂရုတစိုက် သိမ်းဆည်းပြီးနောက် ချန်ဖေးသည် နောက်ဆုံး နှလုံးသား ပုတီးစေ့ ရှိရာနေရာသို့ အလျင်အမြန် သွားလိုက်သည်။

ယခုတစ်ကြိမ် တည်နေရာမှာ အလွန် နီးကပ်သဖြင့် ချန်ဖေးသည် သတ်မှတ်ထားသော နေရာသို့ ခဏအတွင်း ရောက်ရှိသွားသည်။

တစ္ဆေနယ်မြေ အပြင်ဘက် စခန်းချရာနေရာ။

"တစ္ဆေနယ်မြေ ဝင်ပေါက်ပွင့်ဖို့ ဘယ်လောက်လိုသေးလဲ..." စွန်းချွမ်က တစ္ဆေနယ်မြေ ဝင်ပေါက်ကို ကြည့်ရင်း မျက်မှောင်အနည်းငယ် ကြုတ်လိုက်သည်။ ပွင့်လာမည့်ပုံ မပေါ်ပေ။

"အကြီးအကဲ... တစ္ဆေနယ်မြေထဲမှာ ဘာတွေ ဖြစ်နေလဲ မသိပေမယ့် ဝင်ပေါက်က ချိပ်ပိတ်စည်းတွေ ပိုပြီး အားကောင်းလာတယ်... အဲဒီ တစ္ဆေဘုရင်က အသေခံတိုက်ဖို့ ပြင်နေပုံရတယ်..."

ဂိုဏ်းသားတစ်ဦးက နဖူးမှ ချွေးများကို သုတ်ရင်း အားကိုးရာမဲ့စွာ ပြောလိုက်သည်။

"ဖြေရှင်းဖို့ ဘယ်လောက် ကြာဦးမလဲ..."

စွန်းချွမ်၏ မျက်မှောင်များ ပိုမို တွန့်ချိုးသွားသည်။ သူက အစီအရင်များကို နားမလည်သဖြင့် ဂိုဏ်းသားများကိုသာ အားကိုးနေရသည်။

တစ္ဆေနယ်မြေကို အင်အားသုံး၍ တိုက်ခိုက်ဖွင့်လှစ်ခြင်းက ဖြစ်နိုင်သော်လည်း တစ္ဆေနယ်မြေက ရှိသမျှ အင်အားသုံး၍ ခုခံနေမည် ဖြစ်သောကြောင့် အချိန်များစွာ ပိုကြာပေလိမ့်မည်။

"အနည်းဆုံး သုံးနာရီလောက်တော့ လိုပါလိမ့်မယ်..." ဂိုဏ်းသားက တီးတိုး ပြောလိုက်သည်။

"ဂိုဏ်းထဲက အကြီးအကဲချင်ကို ဒီကို လာခဲ့ဖို့ ပြောလိုက်မယ်... မင်းတို့ ဆက်လုပ်ကြ..."

စွန်းချွမ် စဉ်းစားလိုက်ပြီး သုံးနာရီ ဆိုသည်မှာ ကြာလွန်းသည်ဟု ယူဆလိုက်သည်။

ထိုအချိန်ရောက်လျှင် အထဲမှ ဂိုဏ်းသားများ လုံးဝ သေဆုံးကုန်လောက်ပြီ။ ဤအခြေအနေတွင် ဂိုဏ်းထဲမှ အကူအညီ တောင်းခံသင့်သည်။

တစ္ဆေနယ်မြေ အတွင်း၌။

ဖန်းချင်းဟုန်သည် လက်ထဲမှ နှလုံးသား ပုတီးစေ့ကို ကစားနေပြီး ပုတီးစေ့ပေါ်တွင် မှတ်တမ်းတင်ထားသော ထိန်းချုပ်နည်းစနစ်က သူမ၏ စိတ်ထဲတွင် အဆက်မပြတ် လည်ပတ်နေသည်။

ဒွာရသန့်စင်ခြင်းနယ်ပယ် အောက်တွင် ဤအစီအရင် ထိန်းချုပ်နည်းကို သင်ယူခြင်းက မျှော်လင့်ချက် မရှိသည် မဟုတ်သော်လည်း အချိန်အလွန် ကြာမြင့်ပေလိမ့်မည်။

ထို့ကြောင့် ချန်ဖေး အနေဖြင့် အစီအရင် ထိန်းချုပ်နည်းကို သင်ယူပြီး သူမကို ဒုက္ခပေးနိုင်မည်ကို ဖန်းချင်းဟုန် လုံးဝ စိတ်မပူခြင်း ဖြစ်သည်။

ထိန်းချုပ်နည်းစနစ်ကို သင်ယူရန် ခက်ခဲသည်သာမက နှလုံးသား အစီအရင်ကို အမှန်တကယ် အသက်သွင်းရန်အတွက် အလွန် ကျွမ်းကျင်သော နည်းစနစ်များ လိုအပ်သည်။ သင်ယူဖို့ ခက်ခဲလွန်းရုံသာမက ထိုနည်းစနစ်ကို ကျွမ်းကျင်ပိုင်နိုင်ဖို့ ဆိုသည်မှာ မည်သည့်နည်းနှင့်မျှ မဖြစ်နိုင်သလောက်ပင်။

"ဟင်... ဒုတိယမြောက် နှလုံးသား ပုတီးစေ့က ရွေ့သွားပုံပဲ..."

ဖန်းချင်းဟုန်၏ လှုပ်ရှားမှု အနည်းငယ် ရပ်တန့်သွားသည်။ ချိပ်ပိတ်ခံထားရသူ ဖြစ်သည့်အတွက် ဖန်းချင်းဟုန်သည် နှလုံးသား အစီအရင်နှင့် ပတ်သက်ပြီး အနည်းငယ် အာရုံခံစားနိုင်စွမ်း ရှိနေသေးသည်။

သို့သော် အာရုံခံစားနိုင်စွမ်းက အလွန် အားနည်းပြီး နှလုံးသား အစီအရင် ပျက်စီးနေသောကြောင့်သာ ဤမျှ အာရုံခံစားနိုင်ခြင်း ဖြစ်သည်။

အကယ်၍ နှလုံးသား အစီအရင်သာ မပျက်မစီး ရှိနေခဲ့လျှင် ဖန်းချင်းဟုန် အနေဖြင့် မည်သူ့ကိုမျှ ဤနေရာသို့ ခေါ်လာနိုင်မည် မဟုတ်သလို ရွှေ့ပြောင်းနိုင်မည်လည်း မဟုတ်ပေ။

တကယ်တော့ နှလုံးသား ပုတီးစေ့များ ပျက်စီးယိုယွင်းလာမှုနှင့် ဖန်းချင်းဟုန်အပေါ် သက်ရောက်မှုများအရ နှလုံးသား အစီအရင်သည် အများဆုံး ဆယ်နှစ်အတွင်း ပျက်ပြယ်သွားနိုင်သည်။

သို့သော် ယခုအခါ နှလုံးသား အစီအရင်ကို စောစီးစွာ ဖောက်ခွဲပစ်နိုင်မည့် အခွင့်အရေး ရှိလာသဖြင့် ဖန်းချင်းဟုန် အနေဖြင့် နောက်ထပ် ဆယ်နှစ် ထပ်မစောင့်လိုတော့ပေ။

အရာအားလုံးက သူမ၏ ထိန်းချုပ်မှုအောက်တွင် ရှိနေပြီး ချန်ဖေး၏ ရုပ်ပိုင်းဆိုင်ရာ ခန္ဓာကိုယ်ကပင် ဖန်းချင်းဟုန်ကို အံ့အားသင့်စေခဲ့သည်။

သူ၏ ကျင့်ကြံမှုအဆင့်မှာ အနည်းငယ် အားနည်းသော်လည်း ကိုယ်ပွားပြုလုပ်ခြင်းကို ကျွမ်းကျင်ထားပြီးဖြစ်ရာ ဒွာရသန့်စင်ခြင်းနယ်ပယ် အဆင့်သို့ မြှင့်တင်ပေးနိုင်ကောင်း မြှင့်တင်ပေးနိုင်လိမ့်မည်။

ယခုအခါ သူသည် လူတစ်ဝက် တစ္ဆေတစ်ဝက် ဖြစ်နေပြီး နှလုံးသား အစီအရင်ကြောင့် ကျင့်ကြံမှုအဆင့် များစွာ ထိခိုက်ခဲ့ရသည်။ သို့သော် တစ္ဆေနယ်မြေ အတွင်းရှိ တစ္ဆေဘုရင်ကို ဝါးမျိုနိုင်မည့် အခွင့်အရေး ရပါက သူ၏ ဒဏ်ရာများ ပျောက်ကင်းသွားနိုင်ပြီး ပိုမိုမြင့်မားသော အဆင့်သို့ပင် ရောက်ရှိသွားနိုင်သည်။

သူ့ကို ယခုကဲ့သို့ အခြေအနေ ရောက်အောင် လုပ်ခဲ့သည်မှာ တစ္ဆေနယ်မြေ၏ တစ္ဆေဘုရင်ပင် ဖြစ်ပြီး ထိုအကြောင်းရင်းကြောင့်ပင် ဖန်းချင်းဟုန်သည် တစ္ဆေနယ်မြေ၏ အစိတ်အပိုင်း တစ်ခုကို ထိန်းချုပ်နိုင်ခြင်း ဖြစ်သည်။

သို့သော် ယခုတစ်ကြိမ် လွတ်မြောက်ပြီးနောက်တွင် ဖန်းချင်းဟုန်သည် တစ္ဆေဘုရင်နှင့် ထိပ်တိုက်ရင်ဆိုင် တိုက်ခိုက်မည် မဟုတ်ပေ။

ဖန်းချင်းဟုန်၏ တွက်ချက်မှုအရ တစ္ဆေနယ်မြေ၏ ဝင်ပေါက်သည် နာရီအနည်းငယ် အတွင်း ပွင့်သွားပေလိမ့်မည်။

ယွမ်ချန်ဓားဂိုဏ်းနှင့် တစ္ဆေဘုရင်တို့ တိုက်ခိုက်နေချိန်တွင် ဖန်းချင်းဟုန်က အလစ်ဝင်တိုက်ရန် စီစဉ်ထားရာ အောင်မြင်နိုင်ချေ အလွန် မြင့်မားသည်။

ယခုအခါ နှလုံးသား ပုတီးစေ့ သုံးလုံး ပြန်ရောက်လာပြီး နှလုံးသား အစီအရင်ကို ထိန်းချုပ်နိုင်မည့်အချိန်ကိုသာ စောင့်ဆိုင်းရန် လိုတော့သည်။

တစ္ဆေဘုရင်ရော ယွမ်ချန်ဓားဂိုဏ်းပါ သူရှိနေသည်ကို သိရှိကြမည် မဟုတ်ပေ။

စောစောက ပြန်လွှတ်ပေးလိုက်သော မူလန်ထောင်နှင့် အခြားတစ်ယောက်ကိုမူ ဖန်းချင်းဟုန်က ပြန်ဖမ်းထားလိုက်ပြီ ဖြစ်သည်။

သူက လွှတ်ပေးမယ်လို့ပဲ ကတိပေးခဲ့တာ... ပြန်မဖမ်းဘူးလို့ ကတိမပေးခဲ့ဘူးလေ။ သို့သော် သူတို့နှစ်ဦးကို တစ္ဆေနယ်မြေ၏ အခြားနေရာတစ်ခုတွင် ဖန်းချင်းဟုန်က ချိပ်ပိတ်ထားလိုက်သည်။

တစ္ဆေနယ်မြေ၏ အခြားတစ်နေရာတွင်။

ချန်ဖေးသည် လမ်းကြားတစ်ခု၌ ရပ်နေပြီး မီတာတစ်ရာခန့် အကွာတွင် တတိယမြောက် နှလုံးသား ပုတီးစေ့ ရှိနေသော်လည်း ရှေ့မတိုးရဲ ဖြစ်နေသည်။

နှလုံးသား ပုတီးစေ့ တစ်လုံးချင်းစီ၏ ပတ်ဝန်းကျင်တွင် အမည်းစက်များစွာ ဝန်းရံနေသည်ကို ချန်ဖေး အာရုံခံမိသည်။

ဤနေရာတွင်မူ တစ္ဆေဘုရင်က တစ်စုံတစ်ရာ အာရုံခံမိ၍လား သို့မဟုတ် အခြား အကြောင်းရင်း တစ်ခုခုကြောင့်လား မသိသော်လည်း အခြေအနေက ပိုဆိုးနေသည်။

ဤနေရာရှိ ထူးဆန်းသော သတ္တဝါ အရေအတွက်မှာ ပုံမှန်မဟုတ်လောက်အောင် များပြားနေသည်။ အခြားနေရာ နှစ်ခုတွင် ဒါဇင်နှင့်ချီ၍ ရှိလျှင် ဤနေရာ၌ အနည်းဆုံး ရာနှင့်ချီ၍ ရှိနေပြီး အချိန်ကုန်လွန်လာသည်နှင့်အမျှ အရေအတွက်က တဖြည်းဖြည်း တိုးပွားလာနေသည်။

ချန်ဖေးက သူ့စိတ်ထဲရှိ စွမ်းအင်စိမ်းကို အသက်သွင်းလိုက်သော်လည်း သူ့ရှေ့တွင် ဂယက်များ ပေါ်မလာပေ။ အကွာအဝေး ဝေးလွန်းနေသဖြင့် ဝင်ရောက်နိုင်မည့် အခြေအနေ မပြည့်မီသောကြောင့် ဖြစ်သည်မှာ ထင်ရှားနေ၏။

သူ့ဆီသို့ တွားသွားလာနေသော ထူးဆန်းသည့် သတ္တဝါတစ်ခုကို အာရုံခံမိသဖြင့် ချန်ဖေးက မီတာ ဒါဇင်အနည်းငယ် အကွာသို့ လျင်မြန်စွာနှင့် သတိထား၍ ဆုတ်ခွာလိုက်ပြီး ဘေးကင်းသော အကွာအဝေး တစ်ခုတွင် နေလိုက်သည်။

ဖန်းချင်းဟုန်က ချန်ဖေး၏ ခန္ဓာကိုယ်ထဲသို့ ထည့်သွင်းပေးလိုက်သော စွမ်းအင်သည် ဖုံးကွယ်နိုင်စွမ်း အလွန် ကောင်းမွန်သဖြင့် ထူးဆန်းသော သတ္တဝါများက ချန်ဖေးကို မသိစိတ်ဖြင့် လျစ်လျူရှုထားစေကြောင်း ချန်ဖေး တွေ့ရှိထားပြီး ဖြစ်သည်။

သို့သော် မသိစိတ်ဖြင့် လျစ်လျူရှုထားသည် ဆိုလျှင်ပင် အကယ်၍ ချန်ဖေးက ထိုအတိုင်း တိုးဝင်သွားပါက ထူးဆန်းသော အကြည့်များအားလုံး သူ့အပေါ်သို့ ချက်ချင်း ကျရောက်လာမည် ဖြစ်ပြီး ချန်ဖေးအတွက် စောင့်ကြိုနေသည်မှာ အပိုင်းပိုင်းအစစ ဖြစ်သွားခြင်း သို့မဟုတ် ဘာမှ မကျန်တော့သည်အထိ ဝါးမျိုခံလိုက်ရခြင်းသာ ဖြစ်ပေလိမ့်မည်။

"ဆရာတော်... ဆရာတော်... ရှိပါသလား..."

ချန်ဖေးက အိတ်ကပ်ထဲမှ နှလုံးသား ပုတီးစေ့ကို ထုတ်၍ တိုးတိုးလေး မေးကြည့်သော်လည်း ခဏကြာသည်အထိ မည်သည့် တုံ့ပြန်မှုမှ မရရှိပေ။

ချန်ဖေး မျက်မှောင်ကြုတ်လိုက်ပြီး ခေါက်တုံ့ခေါက်ပြန် လမ်းလျှောက်လိုက်ကာ အိတ်ကပ်ထဲမှ ဖယောင်းတိုင်အဖြူ တစ်တိုင်ကို ထုတ်လိုက်သည်။

တတိယမြောက် နှလုံးသား ပုတီးစေ့ကို ချန်ဖေး မဖြစ်မနေ ရယူရမည်။ နှလုံးသား ပုတီးစေ့ သုံးလုံးစလုံးကို စုစည်းနိုင်မှသာ နှလုံးသား အစီအရင် ထိန်းချုပ်နည်း အပြည့်အစုံကို ချန်ဖေး သင်ယူနိုင်မည် ဖြစ်သည်။

ဖန်းချင်းဟုန်၏ အကွက်ချခြင်းကို ခံခဲ့ရသည်မှာ ကြာပြီဖြစ်ရာ ဤအတိုင်း အလွယ်တကူ လက်လွှတ်မခံနိုင်ပေ။ ဖန်းချင်းဟုန်၏ အမှတ်တရ အပိုင်းအစများကို မြင်တွေ့ခဲ့ရပြီးနောက် သူမသည် စေ့စပ်သေချာစွာ စီစဉ်တတ်သူ တစ်ဦး ဖြစ်ကြောင်း ရှင်းလင်းစွာ သိလိုက်ရသည်။

တစ္ဆေနယ်မြေ ဝင်ပေါက်ကို ကြာရှည်စွာ ပိတ်ဆို့မထားနိုင်ကြောင်း သိလျက်နှင့်ပင် ချိပ်ပိတ်ရန် ရွေးချယ်ခဲ့သည်။ ဂိုဏ်းမှ အကြီးအကဲများ ရောက်လာလျှင်ပင် ဖြေရှင်းရန် အခြားနည်းလမ်းများ ဖန်းချင်းဟုန်တွင် ရှိပုံရသည်။

ချန်ဖေး အနေဖြင့် မိမိကိုယ်ကို ကယ်တင်နိုင်ကောင်း ကယ်တင်နိုင်မည် ဖြစ်သော်လည်း ကောဟုန်ကျဲနှင့် အဖွဲ့သားများမှာမူ သေလမ်းသာ ရှိတော့သည်။

"ခင်ဗျားကို ဒီလောက် လွယ်လွယ်နဲ့ လွှတ်မပေးနိုင်ပါဘူး..."

ချန်ဖေး ကိုယ့်ကိုယ်ကိုယ် ရေရွတ်လိုက်ပြီး မီတာတစ်ရာကျော်ခန့် ဝေးသော နေရာသို့ ပြေးသွားကာ နောက်ဆုံးတွင် ရပ်တန့်လိုက်ပြီး ခြံဝင်းနံရံတစ်ခုပေါ်တွင် ဖယောင်းတိုင်အဖြူကို တင်ထားလိုက်သည်။

ထို့နောက် မူလနေရာသို့ ပြန်ပြေးလာပြီး အဝေးရှိ ဖယောင်းတိုင်အဖြူကို လှမ်းကြည့်ကာ မြှားတစ်စင်းကို မီးညှိလိုက်သည်။

ချန်ဖေး၏ လေဟာနယ် အကွက်ထဲတွင် မြှားတံများစွာ ပါဝင်ပြီး ဤကဲ့သို့သော မီးမြှားများကိုလည်း သူ အများအပြား ပြင်ဆင်ထားသည်။

မြှားတံကို ကြိုးတွင် တပ်ဆင်၍ လေးကြိုးကို ဆွဲတင်လိုက်ရာ ချန်ဖေး၏ မျက်လုံးများ ကျဉ်းမြောင်းသွားသည်။ သူ့ရှေ့ မီတာတစ်ရာကျော် အကွာအဝေးရှိ နေရာသည် ရုတ်တရက် ကြီးမားလာပြီး ချန်ဖေး၏ မျက်လုံးထဲတွင် ရှင်းလင်းပြတ်သားစွာ မြင်တွေ့လာရသည်။

နောက်တစ်ခဏ၌ မြှားတံက လေထုကို ခွင်းလျက် ပျံသန်းသွားပြီး ဖယောင်းတိုင်အဖြူ၏ မီးစာကို ဖြတ်သန်းသွားသည်။

ဖယောင်းတိုင်အဖြူ ချက်ချင်း မီးတောက်သွား၏။

မီးတောက်များ ကခုန်လာသည်နှင့် မီတာရာပေါင်းများစွာ အကွာအဝေးအတွင်းရှိ တစ္ဆေဆန်သော လေထုသည် ရုတ်တရက် တိတ်ဆိတ်သွားပြီး ပြင်းထန်သော ဖိနှိပ်မှု အာရုံခံစားမှုတစ်ခု ပတ်ဝန်းကျင်တွင် ပျံ့နှံ့သွားသည်။

နောက်တစ်ခဏ၌ ထူးဆန်းသော သတ္တဝါများက ရူးသွပ်စွာ တုန်ခါလာပြီး ဖယောင်းတိုင်အဖြူ ဆီသို့ ခုန်အုပ်လိုက်ကြသည်။

ထူးဆန်းသော လှုပ်ရှားမှုများကို စိတ်ထဲတွင် အာရုံခံမိလိုက်သဖြင့် ချန်ဖေး၏ ကျောရိုးတလျှောက် စိမ့်ခနဲ ဖြစ်သွားသော်လည်း သူသည် တတိယမြောက် နှလုံးသား ပုတီးစေ့ ရှိရာနေရာသို့ အမြန် ပြေးသွားလိုက်သည်။

မျက်တောင်တစ်ခတ် အတွင်း ချန်ဖေးသည် မီတာတစ်ရာကျော် အကွာအဝေးကို ဖြတ်ကျော်ပြီး တည်နေရာသို့ ရောက်ရှိသွားသည်။ ဂယက်များ သူ့ရှေ့တွင် ပေါ်လာပြီး ချန်ဖေး ဝင်ရောက်လိုက်သည်။

"ဟူး..."

ရှေ့ရှိ ကျောက်မျှော်စင်ကို မြင်လိုက်ရသောအခါ ချန်ဖေး သက်ပြင်းချနိုင်သွားသည်။ နောက်ဆုံး အခိုက်အတန့်က အနည်းငယ် အန္တရာယ် များသော်လည်း ကံကောင်းစွာဖြင့် အရာအားလုံး ချောမွေ့သွားခဲ့သည်။

"ဆရာတော်..."

ချန်ဖေး ပတ်ဝန်းကျင်ကို ကြည့်ပြီး တိုးတိုးလေး ခေါ်လိုက်သည်။

ချန်ဖေး စကားဆုံးသည်နှင့် ပတ်ဝန်းကျင် အခြေအနေ ချက်ချင်း ပြောင်းလဲသွားပြီး ဘုန်းကြီးက ချန်ဖေး၏ ရှေ့တွင် နောက်တစ်ကြိမ် ထပ်မံ ပေါ်လာသည်။

"ဒကာ..." ဘုန်းကြီးက လက်အုပ်ချီပြီး ပြုံးလိုက်သည်။

"ဆရာတော်... ဒီတစ်ခါ စမ်းသပ်မှုက ဘာလဲ..." ချန်ဖေးက ရိုသေစွာ ဦးညွှတ်ရင်း မေးလိုက်သည်။

"ဒီဘုန်းကြီးက ဒကာ့ရဲ့ နည်းစနစ်ကို ကြည့်ချင်ပေမယ့် နားလည်နိုင်မယ် မထင်ဘူး..."

ဘုန်းကြီးက မျက်မှောင်အနည်းငယ် ကြုတ်ပြီး ပြောလိုက်သည်။ "ဒကာ... အပေးအယူ တစ်ခုလောက် လုပ်မလား..."

"ဘာအပေးအယူလဲ..."

"ဒကာ့ရဲ့ နည်းစနစ်ကို သင်ပေးပါ... ဘုန်းကြီးက ဒီနှလုံးသား အစီအရင်ကို ဘယ်လို လွယ်လွယ်ကူကူ ထိန်းချုပ်ရမလဲဆိုတာ သင်ပေးမယ်... ဘယ်လိုလဲ..." ဘုန်းကြီးက အကြံပြုလိုက်သည်။

ချန်ဖေး မျက်မှောင်အနည်းငယ် ကြုတ်သွားပြီး ဤကဲ့သို့သော အပေးအယူမျိုးကြောင့် အံ့သြသွားသည်။ လူအများစု ဆိုလျှင် သဘောတူလိုက်ကြပေလိမ့်မည်။

မည်သို့ပင်ဆိုစေကာမူ နှလုံးသား အစီအရင်ကို ထိန်းချုပ်နည်းသည် နှလုံးသား ပုတီးစေ့ပေါ်တွင် ရှိနေသော်လည်း သင်ယူရန် အလွန် ခက်ခဲလှသည်။

ယခုအချိန်၌ ချန်ဖေး၏ စိတ်ထဲတွင် နှလုံးသား အစီအရင် ထိန်းချုပ်နည်းနှင့် ပတ်သက်ပြီး လုံးဝ မေ့သွားပြီ ဖြစ်သည်။

အကယ်၍ စနစ်သာ မရှိခဲ့လျှင် ချန်ဖေး တကယ် သဘောတူလိုက်မိမည် ဖြစ်သည်။

သို့သော် စနစ်ကြောင့် ချန်ဖေး အနေဖြင့် ဘာမှမရှိရာမှ ဖန်တီးခြင်း နည်းစနစ်ကို သင်ပေး၍ မရနိုင်ပေ။ ဤလေဟာနယ် အကွက်ကို ထုတ်ပြ၍ မရသလို အရောင်းအဝယ် လုပ်၍လည်း မရနိုင်ချေ။

"ဆရာတော်... ကျွန်တော် တကယ် သင်ပေးချင်ပေမယ့် ဒီနည်းစနစ်က ကျွန်တော် မွေးကတည်းက ပါလာတာမို့လို့ သင်ပေးလို့ မရပါဘူး..." ချန်ဖေးက ရိုးသားစွာ ပြောလိုက်သည်။

"မွေးရာပါ စွမ်းရည်ထူးလား..."

ဘုန်းကြီးက ချန်ဖေး၏ မျက်လုံးများကို ကြည့်လိုက်ရာ ချန်ဖေး လိမ်ညာနေခြင်း မဟုတ်ကြောင်း အာရုံခံမိလိုက်သည်။

အကယ်၍ မလိမ်ညာဘူး ဆိုလျှင် ဤစွမ်းရည်က ပို၍ပင် ဆန်းကြယ်နေပေသည်။

"ဒီဘုန်းကြီးမှာ ကံပါမလာဘူးနဲ့ တူပါတယ်..." ဘုန်းကြီးက နောင်တရစွာဖြင့် ခေါင်းခါလိုက်သည်။