ချန်လင်း ဆေးလုံး အမှတ် ၂

"ဆေးဖော်စပ်နည်းကို မွမ်းမံထားကြောင်း ဘယ်လို သက်သေပြရမလဲ... ဆေးလုံးအသစ်ကို သုံးပြီး နှိုင်းယှဉ်ပြရမှာလား..."

ချန်ဖေးက ချင်ကျင်လန်၏ နေ့ခင်းကြောင်တောင် အိပ်မက်မက်နေမှုကို ဖြတ်ပြောလိုက်၏။

"ဟုတ်ပါတယ်... ဆေးလုံးအသစ် ယူလာခဲ့ပါ... ဆေးစွမ်းအာနိသင် ထိရောက်မှု ရှိတယ်ဆိုရင် ပါဝင်ပစ္စည်းတွေကို သက်သေပြဖို့ နေရာမှာတင် ဖော်စပ်ပြရပါလိမ့်မယ်..."

ချင်ကျင်လန်က သတိပြန်ဝင်လာပြီး ခေါင်းညိတ်လိုက်သည်။

ပုံမှန်အားဖြင့် ဖေးလင်း ဆေးလုံးကို မွမ်းမံလိုပါက အနည်းဆုံး အဆင့် ၇ ဆေးပညာရှင် စွမ်းရည် ရှိရန် လိုအပ်သည်။

ကိုယ်တိုင် ဖော်စပ်သည့် ဖေးလင်း ဆေးလုံးက လုံလောက်အောင် ကောင်းမွန်မှသာ မွမ်းမံခြင်းအကြောင်း ဆွေးနွေးခွင့် ရှိပေမည်။

သို့သော် အဂ္ဂိရတ်ပညာရှင် မဟာမိတ်အဖွဲ့သည် နောက်ဆုံးတွင် ဤလိုအပ်ချက်ကို ထည့်သွင်းခြင်း မပြုဘဲ အဆင့် ၈ ဆေးပညာရှင် အဆင့်၌သာ သတ်မှတ်ထားလိုက်၏။

အဘယ်ကြောင့်ဆိုသော် တစ်ခါတစ်ရံတွင် ဆရာသခင် အဆင့် ဆေးပညာရှင် တစ်ဦးသည် ရုတ်တရက် ဉာဏ်ပွင့်သွားပြီး ကောင်းမွန်သော အကြံပြုချက်များ ပေးနိုင်သောကြောင့် ဖြစ်သည်။

ထို့ပြင် အဆင့် ၈ ဆေးပညာရှင် အများအပြားသည် ဖေးလင်း ဆေးလုံးကို ဖော်စပ်နိုင်စွမ်း ရှိကြပြီး သူတို့၏ လက်ရာက ထိပ်တန်း အရည်အသွေး မမီရုံသာ ရှိကြသည်။

"မဟာမိတ် ခေါင်းဆောင်ကပဲ အဆုံးအဖြတ် ပေးမှာလား..."

"မဟုတ်ပါဘူး..."

ချင်ကျင်လန် ခေါင်းခါလိုက်ပြီး ပြောလိုက်၏။

"မဟာမိတ် ခေါင်းဆောင် အပြင် တခြား ဆေးပညာရှင် အများအပြားလည်း ပါဝင်မှာပါ... နောက်ပြီး ဒီတာဝန်က အချိန်ကန့်သတ်ချက် မရှိတာတော့ မဟုတ်ဘူးနော်... သခင်လေး အနေနဲ့ ဆုလာဘ် လိုချင်ရင် မြန်မြန်လုပ်မှ ရလိမ့်မယ်..."

"ဘာကို ဆိုလိုတာလဲ..."

ချန်ဖေး နားမလည်စွာ မေးလိုက်သည်။

"ဆေးပညာရှင် တစ်ယောက်ရဲ့ ရလဒ်ကို မဟာမိတ် ခေါင်းဆောင်နဲ့ တခြား ဆေးပညာရှင်တွေက အသိအမှတ်ပြုလိုက်ပြီ ဆိုရင် ကျန်တဲ့ ဆေးပညာရှင်တွေက ပိုကောင်းတဲ့ ဆေးဖော်စပ်နည်းကို တစ်လအတွင်း တင်ပြနိုင်ရမယ်... ဒါမှမဟုတ်ရင် တာဝန်ပြီးဆုံးပြီလို့ သတ်မှတ်လိုက်မှာ..."

ချန်ဖေး သဘောပေါက်နားလည်စွာ ခေါင်းညိတ်လိုက်၏။ ဤကဲ့သို့ ကန့်သတ်ချက် ထားခြင်းက တာဝန်ကို အကန့်အသတ်မရှိ ကြာမြင့်သွားခြင်းမှ တားဆီးပေးနိုင်သည်။

ဝေရှင်းရှန်းနှင့် အခြားသူများ၏ ဆေးပညာ စွမ်းရည်ဖြင့် ဆိုလျှင် ဆေးဖော်စပ်နည်း တစ်ခု၏ အရည်အသွေးကို သေချာပေါက် ဝေဖန်ပိုင်းခြားနိုင်ပေလိမ့်မည်။

"နားလည်ပါပြီ... ကျေးဇူးပါပဲ..."

ချန်ဖေး ဦးညွှတ်လိုက်သည်။

"သခင်လေး... ဂရုစိုက်ပါ... အားတဲ့အခါ မကြာခဏ လာလည်နော်..."

ချန်ဖေး ထွက်ခွာတော့မည်ကို မြင်သောအခါ ချင်ကျင်လန်မှာ မခွဲခွာချင် ဖြစ်နေသော်လည်း အတင်းအကျပ် ဆွဲထားရန် မရဲသဖြင့် တိုးတိုးလေးသာ ပြောလိုက်ရှာသည်။

ချန်ဖေး အနည်းငယ် ပြုံး၍ လက်ဝှေ့ယမ်းပြပြီး အဂ္ဂိရတ်ပညာရှင် မဟာမိတ်အဖွဲ့မှ ထွက်ခွာလာခဲ့၏။

နာရီဝက် ကြာပြီးနောက် ချန်ဖေး ရေပူစမ်း အင်းသို့ ရောက်ရှိသွားသည်။

"ဒီနေ့ကစပြီး ဆေးမြစ်တွေကို ဒီနေရာဆီ လာပို့ပေးမှာလား..."

ချီတာဖုန်းက အင်း၏ ပတ်ဝန်းကျင် အထူးသဖြင့် ကြီးမားသော ရေပူစမ်းကန်ကို ကြည့်ပြီး မျက်လုံးများ အနည်းငယ် တောက်ပသွား၏။ တကယ့်ကို ကောင်းမွန်တဲ့ နေရာပဲ…

"ဟုတ်တယ်... ငါ အခုကစပြီး ဒီနေရာမှာပဲ ကျင့်စဉ်ကို ဆင်ခြင်သုံးသပ်တော့မယ်..."

ချန်ဖေး ခေါင်းညိတ်လိုက်ပြီး ဤနေရာ၌ တစ်နေ့လုံး နေထိုင်ရန် ဆုံးဖြတ်လိုက်သည်။

အဘယ်ကြောင့်ဆိုသော် ဤအပေါ်ထပ် အခန်းတွင် ချောင်းမြောင်း ကြည့်ရှုခြင်းကို တားဆီးပေးနိုင်သော အစီအရင် တစ်ခု ပါရှိသောကြောင့် ဖြစ်သည်။

ချန်ဖေးတွင် လျှို့ဝှက်ချက်များစွာ ရှိသည်။

တစ်စုံတစ်ယောက်က သူ့ကို အချိန်တိုင်း စောင့်ကြည့်နေမည်ဟု မဆိုလိုသော်လည်း အကာအကွယ် တစ်ခု ပိုရှိထားခြင်းက အမြဲတမ်း ကောင်းမွန်ပေသည်။

"ကောင်းပြီ... ဒါဆို မနက်ဖြန် မနက်ကျရင် ဆေးမြစ်တွေ ဒီကို ယူလာပေးမယ်..."

ချီတာဖုန်း ခေါင်းညိတ်လိုက်၏။

စကားစမြည် ပြောပြီးနောက် ချီတာဖုန်း နှုတ်ဆက်ကာ ထွက်ခွာသွားသည်။

ချန်ဖေးသည် အိမ်၏ အစီအရင်ကို ဖွင့်လိုက်ပြီး ရင်ဘတ်ထဲမှ နာယွမ်ပုလဲကို ထုတ်ကာ ရေပူစမ်းဆီသို့ တစ်လှမ်းချင်း လျှောက်သွားလိုက်သည်။

လွန်ခဲ့သော တစ်လအတွင်း ချန်ဖေးသည် ကျင့်စဉ်များစွာကို လေ့လာခဲ့ရသည်။

ကျင်ယွမ်ကျင့်စဥ် ပဉ္စမအဆင့်နှင့် ထုန်ယွမ် ကျင့်စဥ်တို့သည် မဟာအောင်မြင်ခြင်း အဆင့်သို့ ရောက်ရှိနိုင်တော့မည် ဖြစ်သည်။

အသစ် ရရှိထားသော လေဟာနယ် ခရီးသွားခြင်း ကျင့်စဉ် ကိုလည်း သဘာဝကျစွာပင် စွန့်လွှတ်ထား၍ မရပေ။

၎င်းကို မဟာအောင်မြင်ခြင်း အထိ ကျင့်ကြံထားနိုင်လျှင် လျှို့ဝှက်နယ်မြေ ခရီးစဉ်အတွက် ပိုမို လုံခြုံစိတ်ချရပေလိမ့်မည်။

အမှန်စင်စစ် နဂါးဆင် နှိမ်နင်းခြင်း ကျင့်စဉ်လည်း ရှိသေးသည်။

ယခု ကနဦးအဆင့်၌သာ ရှိသေးသော်လည်း ချန်ဖေး၏ ခန္ဓာကိုယ်သည် သိသိသာသာ ပြောင်းလဲလာခဲ့ပြီး ပြင်ပစွမ်းအင်များက သူ့ကို ခြိမ်းခြောက်ရန် ခက်ခဲလာစေသည်။

ချန်ဖေး ရေမျက်နှာပြင်အောက်သို့ ငုပ်လျှိုးလိုက်သည်နှင့် ပတ်ဝန်းကျင်ရှိ မူလစွမ်းအင်များကို စုပ်ယူလိုက်သဖြင့် ရေပြင်မှာ အနည်းငယ် တုန်ခါသွား၏။

နဂါးဆင် နှိမ်နင်းခြင်း ကျင့်စဉ် စတင် လည်ပတ်ပြီး မူလစွမ်းအင်များကို ဖြိုခွဲကာ သူ၏ ကြွက်သားများထဲသို့ သန့်စင် ပို့ဆောင်ပေးလိုက်သည်။

ငါးရက်မြောက်နေ့တွင် ဖေးလင်း ဆေးလုံး၏ ဆေးဖော်စပ်နည်း ကျွမ်းကျင်မှုသည် မဟာအောင်မြင်ခြင်း အဆင့်သို့ ရောက်ရှိသွားသည်။

အကယ်၍ ချန်ဖေးသာ ယခုအချိန်တွင် အဂ္ဂိရတ်ပညာရှင် မဟာမိတ်အဖွဲ့ စာမေးပွဲကို ဝင်ရောက်ဖြေဆိုပါက အဆင့် ၇ ဆေးပညာရှင် တစ်ဦး အလွယ်တကူ ဖြစ်လာနိုင်ပေသည်။

"ပေါင်းစပ်..."

ချန်ဖေးက စနစ်ကို ထိန်းချုပ်လိုက်ပြီး ဖေးလင်း ဆေးလုံး ဆေးဖော်စပ်နည်းနှင့် ချန်ဖူ ဆေးလုံး ဆေးဖော်စပ်နည်း နှစ်ခုကို ပေါင်းစပ်လိုက်၏။

မှန်ပေသည်... မွမ်းမံထားသော ဖေးလင်း ဆေးလုံး ဆေးဖော်စပ်နည်း တာဝန်အကြောင်း ကြားလိုက်ရသောအခါ ချန်ဖေး၏ ပထမဆုံး အတွေးမှာ ဖေးလင်း ဆေးလုံးကို အခြား ဆေးဖော်စပ်နည်းများနှင့် ပေါင်းစပ်ရန် ဖြစ်သည်။ အထူးသဖြင့် အောက်ခြေအဆင့် ပေါင်းစပ်ခြင်း ဖြစ်သည်။

၎င်းသည် ချန်ဖူ ဆေးလုံးကို အဓိက အစိတ်အပိုင်း အဖြစ် အသုံးပြုပြီး ဖေးလင်း ဆေးလုံးကို ဒုတိယ အစိတ်အပိုင်း အဖြစ် အသုံးပြုကာ ဆေးဖော်စပ်နည်း အသစ်တစ်ခု ဖွဲ့စည်းခြင်း ဖြစ်သည်။ ရည်ရွယ်ချက်မှာ အဆင့်ချိုးဖျက်ခြင်း အတွက် မဟုတ်ပေ။

ဖေးလင်း ဆေးလုံးကို အသုံးပြုပြီး ပိုမို ထိရောက်သော ဆေးလုံးတစ်လုံး ရရှိရန်ထက် ဖေးလင်း ဆေးလုံးအတွက် လိုအပ်ချက်များကို လျှော့ချရန် ဖြစ်သည်။

ချန်ဖေးသည် ဆေးဖော်စပ်နည်း နှစ်ခုစလုံးကို မဟာအောင်မြင်ခြင်း အဆင့်အထိ ကျင့်ကြံထားပြီးဖြစ်ရာ ဆေးလုံးနှစ်မျိုးစလုံး၏ အသေးစိတ် အချက်အလက်များကို နှံ့စပ်ကျွမ်းကျင်နေပြီ ဖြစ်သည်။

ထို့ကြောင့် ဤအခိုက်အတန့်တွင် ချန်ဖေးသည် ဖေးလင်း ဆေးလုံး၏ အာနိသင်ကို တိုးမြှင့်ပေးနိုင်သော နည်းလမ်းအားလုံးကို ချန်ဖူ ဆေးလုံးထံ လွှဲပြောင်းပေးလိုက်ပြီး ဆေးမြစ်သက်တမ်း တိုးမြှင့်ခြင်းဖြင့် အာနိသင် တိုးစေသော အစိတ်အပိုင်းများကို ဖယ်ရှားလိုက်သည်။

စနစ်၏ အကူအညီဖြင့် ချန်ဖေး၏ ပေါင်းစပ်မှုမှာ အလွန် လျင်မြန်လှ၏။ ဆယ့်ငါးမိနစ် မပြည့်မီမှာပင် ဆေးဖော်စပ်နည်း အသစ်တစ်ခု ချန်ဖေး၏ ခေါင်းထဲတွင် ပေါ်လာသည်။

ဆေးဖော်စပ်နည်း အသစ်တွင် လိုအပ်သော ဆေးမြစ်များ အားလုံးသည် သာမန် သက်တမ်းရှိ ဆေးမြစ်များ ဖြစ်ကြသည်။ အလွယ်တကူ ရနိုင်သည် မဟုတ်သော်လည်း စိတ်ပိုင်းဖြတ်ထားလျှင် စုဆောင်းရန် ခက်ခဲသော အရာတော့ မဟုတ်ပေ။

ဆေးဖော်စပ်နည်း အသစ်၏ အာနိသင်ကိုတော့ မသိရသေးပေ။ ဤသည်မှာ ခန့်မှန်းတွက်ချက်မှုသာ ဖြစ်သည်။ လက်တွေ့ အကျိုးသက်ရောက်မှုသည် နောက်ဆုံး ထွက်ကုန်အပေါ်တွင်သာ မူတည်ပေလိမ့်မည်။

အင်းမှ ထွက်ခွာပြီးနောက် ချန်ဖေးသည် ဆေးဆိုင် အနည်းငယ်သို့ ဂရုတစိုက် သွားရောက်ပြီး ဆေးမြစ်များကို ဝယ်ယူလိုက်သည်။

မီးမွှေးပြီး မီးဖို တည်လိုက်သည်။

မဟာအောင်မြင်ခြင်း အဆင့်ရှိသော ဆေးဖော်စပ်နည်း အသစ်ကို ဖော်စပ်ရန်မှာ ချန်ဖေးအတွက် အခက်အခဲ မရှိပေ။

ဖော်စပ်နည်းသည် ချန်ဖူ ဆေးလုံးနှင့် ဆင်တူသော်လည်း ဖေးလင်း ဆေးလုံးမှ နည်းစနစ် အချို့ကို ထည့်သွင်းထားသည်။

ခဏအကြာတွင် ဆေးရနံ့များ အခန်းအတွင်း ပြည့်နှက်သွား၏။ တစ်နာရီ၏ လေးပုံတစ်ပုံ ကြာပြီးနောက် ချန်ဖေး မီးဖိုအဖုံးကို ဖွင့်ပြီး အတွင်းသို့ ကြည့်လိုက်သည်။

ချန်ဖေးသည် မွှေးပျံ့သော ရနံ့သင်းနေသည့် ဆေးလုံးကို ထုတ်ယူလိုက်ပြီး တိုက်ရိုက် မျိုချလိုက်၏။

အမွှေးတိုင် တစ်တိုင်စာ မကုန်မီမှာပင် ချန်ဖေး မျက်လုံးဖွင့်လိုက်ပြီး စဉ်းစားခန်း ဝင်သွားသည်။

ဆေးစွမ်းအာနိသင်သည် ချန်ဖူ ဆေးလုံးနှင့် ယှဉ်လျှင် အနည်းငယ် တိုးတက်လာသော်လည်း များများစားစား မဟုတ်ပေ။

ချန်ဖူ ဆေးလုံး၏ အဆင့်မြှင့်ထားသော ဗားရှင်းဟုသာ ခေါ်ဆိုနိုင်ပြီး ဖေးလင်း ဆေးလုံး၏ အာနိသင်နှင့် လုံးဝ မယှဉ်နိုင်ပေ။

ဤဆေးဖော်စပ်နည်းတွင် သေချာပေါက် တန်ဖိုး ရှိသည်။

မည်သို့ပင်ဆိုစေကာမူ ၎င်းသည် ချန်ဖူ ဆေးလုံးထက် ပိုမို ထိရောက်ပြီး အသုံးပြုထားသော ဆေးမြစ်များမှာ သာမန် သက်တမ်းသာ ရှိသဖြင့် ကုန်ကျစရိတ် တိုးလာခြင်း မရှိပေ။

တစ်ခုတည်းသော အားနည်းချက်မှာ ဖေးလင်း ဆေးလုံး ဖော်စပ်သည့် နည်းစနစ်အချို့ ပေါင်းထည့်ထားသောကြောင့် ဖော်စပ်စဉ်အတွင်း မီးဖိုထဲ၌ ဆေးပစ္စည်းများ၏ ပဋိပက္ခသည် ပိုမို ပြင်းထန်လာသဖြင့် အဆင့် ၈ ဆေးပညာရှင် တစ်ဦးအတွက် သိပ်ပြီး အဆင်ပြေမည် မဟုတ်ပေ။

"လောလောဆယ် ဒါကို ချန်လင်း ဆေးလုံး အမှတ် ၁ လို့ ခေါ်ကြတာပေါ့..."

ချန်ဖေးက ဤဆေးဖော်စပ်နည်းကို နာမည်အသစ် ပေးလိုက်သည်။

ဆေးဖော်စပ်နည်း နာမည်နှစ်ခုမှ စာလုံး တစ်လုံးစီ ယူပြီး ပေါ့ပေါ့ပါးပါး ပေးလိုက်ခြင်း ဖြစ်သည်။

ချန်လင်း ဆေးလုံး အမှတ် ၁ ကို အသုံးပြုပြီး အဂ္ဂိရတ်ပညာရှင် မဟာမိတ်အဖွဲ့သို့ သွားလျှင် တာဝန်ပြီးဆုံးမည် မဟုတ်သည်မှာ သေချာသည်။

အဘယ်ကြောင့်ဆိုသော် တာဝန် လိုအပ်ချက်မှာ ဖေးလင်း ဆေးလုံးကို မွမ်းမံရန် ဖြစ်ပြီး ချန်ဖူ ဆေးလုံးကို အဆင့်မြှင့်တင်ရန် မဟုတ်သောကြောင့် ဖြစ်သည်။

"ကြည့်ရတာ သာမန် ဆေးမြစ်တွေကိုပဲ သုံးတာက အောင်မြင်ဖို့ အရမ်း ခက်ခဲမယ့်ပုံပဲ... ဒွာရသန့်စင်ခြင်း အဆင့်တွေ သောက်တဲ့ ဆေးလုံးမျိုး ဒါမှမဟုတ် ပိုစွမ်းအားကြီးတဲ့ ဆေးလုံးမျိုး ဖော်စပ်နိုင်ပြီး ဖော်စပ်နေစဉ်မှာ ဆေးဂုဏ်သတ္တိ ပဋိပက္ခကို မြှင့်တင်ပေးနိုင်မှသာ လက်ရှိ အဆို့အတားကို ချိုးဖျက်နိုင်လိမ့်မယ်..."

ချန်ဖေး မျက်မှောင်အနည်းငယ် ကြုတ်လိုက်သည်။ ဆေးပညာ ဆိုသည်မှာ တစ်ခါတစ်ရံတွင် လူတစ်ဦး၏ နည်းစနစ်ပိုင်းကို စမ်းသပ်ခြင်း ဖြစ်သည်။

ဆန့်ကျင်ဘက် ဆေးဂုဏ်သတ္တိများကို ကျွမ်းကျင်စွာ ကိုင်တွယ်နိုင်လေလေ ဆေးမြစ်များကို ပိုမို ထိရောက်စွာ လှုံ့ဆော်နိုင်ပြီး ပိုမို ပြင်းထန်သော ဆေးစွမ်းအာနိသင်ကို ထုတ်လုပ်နိုင်လေလေ ဖြစ်သည်။

သို့သော် ချန်ဖေးသည် လက်ရှိတွင် အဆင့် ၇ ဆေးပညာရှင် အဆင့်၌သာ ရှိသေးပြီး သူ၏ စွမ်းရည်မှာ ဤအဆင့်သို့သာ ရောက်ရှိသေးသည်။

ပိုမို အားကောင်းသော ဖော်စပ်နည်းစနစ်များကို ထည့်သွင်းရန်မှာ သူ့အတွက် မဖြစ်နိုင်ကြောင်း ထင်ရှားသည်။

ထို့ပြင် ထိုကဲ့သို့ အားကောင်းသော ဖော်စပ်နည်းစနစ်သည် သာမန် အဆင့် ၇ ဆေးပညာရှင် တစ်ဦး၏ စွမ်းရည်ကို ကျော်လွန်နေပါက မွမ်းမံထားသော ဆေးဖော်စပ်နည်းသည် အများအတွက် အဆင်ပြေမည် မဟုတ်ပေ။

"သက်တမ်းရင့် ဆေးမြစ်တချို့ကိုတော့ ဆက်လက် ထိန်းသိမ်းထားဖို့ လိုဦးမယ်..."

ချန်ဖေး တစ်ကိုယ်တည်း ရေရွတ်လိုက်၏။

"နည်းစနစ်တွေနဲ့ ဆေးဂုဏ်သတ္တိကို မလှုံ့ဆော်နိုင်ရင် ဆေးမြစ်တွေရဲ့ သက်တမ်းကို တိုးမြှင့်ပြီး ဆေးဂုဏ်သတ္တိ လိုအပ်ချက် ပြည့်မီအောင် လုပ်ရုံပဲ ရှိတော့တယ်..."

ထိုအတွေးဖြင့် ချန်ဖေးသည် ဖေးလင်း ဆေးလုံးနှင့် ချန်ဖူ ဆေးလုံး၏ ဆေးဖော်စပ်နည်းကို ပြန်လည် ပြင်ဆင်လိုက်သည်။

ဤတစ်ကြိမ်တွင် ချန်ဖေးသည် ဆေးဂုဏ်သတ္တိ မလုံလောက်သော ဆေးမြစ်အချို့၏ သက်တမ်းကို လျှော့ချရန် ကြိုးစားပြီး အခြား ဆေးမြစ်များနှင့် ပေါင်းစပ်ကာ အာနိသင်ကို လှုံ့ဆော်ပေးလိုက်သည်။

တစ်နာရီခန့် ကြိုးစားပြီးနောက် ချန်ဖေးသည် ဒုတိယမြောက် ဆေးဖော်စပ်နည်းကို နောက်ဆုံးတွင် ရှာဖွေတွေ့ရှိသွားသည်။

ချန်လင်း ဆေးလုံး အမှတ် ၂... ဤသည်မှာ ချန်ဖေး ပေးလိုက်သော နာမည်အသစ် ဖြစ်သည်။

ဆေးဖော်စပ်နည်း ပြင်ဆင်ပြီးနောက် ချန်ဖေး ဆေးဆိုင် ရှာရန် ထွက်လာခဲ့သည်။ ချန်ဖေးတွင် ဆေးမြစ် အများစု ရှိနေပြီးသား ဖြစ်သဖြင့် လိုအပ်သော ဆေးမြစ်များကို ဆေးဆိုင် တစ်ဆိုင်တည်းမှပင် အကုန် ဝယ်ယူနိုင်ခဲ့သည်။

ဆေးဖော်စပ်မီးဖိုကို ဆေးကြောပြီး မီးဖို တည်ဆောက်ပြီးနောက် ချန်ဖေး သူ၏ ဒုတိယမြောက် စမ်းသပ်မှုကို စတင်လိုက်သည်။

ဆေးမြစ်များသည် မီးဖိုထဲတွင် ပြင်းထန်စွာ လှုပ်ရှားနေကြ၏။

ချန်ဖေးသည် သူ၏ အတွင်းအားကို အသုံးပြုပြီး ဆန့်ကျင်ဘက် ဆေးဂုဏ်သတ္တိများကို ထိန်းချုပ်လိုက်သည်။ မကြာမီတွင် နောက်ထပ် ဆေးရနံ့တစ်ခု အခန်းထဲ၌ ပြည့်နှက်သွားသည်။

ချန်လင်း ဆေးလုံး အမှတ် ၁ နှင့် နှိုင်းယှဉ်လျှင် ချန်လင်း ဆေးလုံး အမှတ် ၂ စတင် ဖော်စပ်ပြီးနောက် ထွက်ပေါ်လာသော ဆေးရနံ့သည် အမှန်တကယ်ပင် ပိုမို ပြင်းထန်သည်။

ဤအချက်ကို ကြည့်ခြင်းအားဖြင့် ချန်လင်း ဆေးလုံး အမှတ် ၂ ၏ အာနိသင်သည် သိသိသာသာ တိုးတက်လာနိုင်ဖွယ် ရှိကြောင်း ကောက်ချက်ချနိုင်သည်။

ဆယ့်ငါးမိနစ် အချိန်ကာလသည် လျင်မြန်စွာ ကုန်ဆုံးသွား၏။

ချန်ဖေး မီးဖိုကို ရိုက်ဖွင့်လိုက်ရာ ဆေးရနံ့များ လေထုထဲသို့ ပျံ့လွင့်သွားသည်။

ချန်ဖေး ဆေးလုံးကို ထုတ်ယူလိုက်သည်။ အသွင်အပြင်အရ ချန်လင်း ဆေးလုံး အမှတ် ၂ သည် အမှတ် ၁ ထက် မပိုသာပေ။

ချန်ဖေး သေချာစွာ ထပ်မံ စစ်ဆေးကြည့်သော်လည်း အခြား ထူးခြားမှု မတွေ့ရပေ။ ထို့နောက် ချန်ဖေး ဆေးလုံးကို မျိုချလိုက်သည်။

ဆေးလုံးသည် ချန်ဖေး ပါးစပ်ထဲတွင် ချက်ချင်း အရည်ပျော်သွားပြီး စွမ်းအင်လှိုင်းတစ်ခု သူ၏ ခန္ဓာကိုယ်အတွင်း ပေါက်ကွဲထွက်ပေါ်လာ၏။

အမွှေးတိုင် တစ်တိုင်စာ မကုန်မီမှာပင် ချန်ဖေး မျက်လုံးဖွင့်လိုက်ရာ မျက်လုံးများ အနည်းငယ် တောက်ပနေသည်။

ချန်လင်း ဆေးလုံး အမှတ် ၂ ၏ အာနိသင်သည် အမှတ် ၁ ကို ကျော်လွန်သွားပြီး ကွာခြားချက်မှာ သိသာထင်ရှားသည်။

သက်တမ်းရင့် ဆေးမြစ်များကို အသုံးပြုထားသောကြောင့် ချန်ဖေး၏ ဆေးဖော်စပ်နည်းတွင် ပြဿနာ မရှိပါက အာနိသင် တိုးလာမည်မှာ မလွဲဧကန် ဖြစ်သည်။

"ဆေးစွမ်းအာနိသင်က ဖေးလင်း ဆေးလုံးရဲ့ ၆၀ ရာခိုင်နှုန်းလောက် ရှိတယ်... ဆေးမြစ်တွေရဲ့ ဈေးနှုန်းက ၅၀ ရာခိုင်နှုန်းကျော်ကျော်လောက်ပဲ ရှိပြီး ဖော်စပ်ရတာလည်း ပိုလွယ်ကူတယ်... အဲဒီလို ကြည့်မယ်ဆိုရင် ဒါက တကယ်ကို တွက်ခြေကိုက်တယ်..."

ချန်ဖေး မေးစေ့ကို ပွတ်သပ်လိုက်သည်။ ကုန်ကျစရိတ် ရှုထောင့်မှ ကြည့်လျှင် သေချာပေါက် တန်ဖိုးရှိသည်။ ထိုသို့ လုပ်ဆောင်ခြင်းဖြင့် ချန်ဖေးသည် အနှစ်သာရအားဖြင့် ချန်ဖူ ဆေးလုံးနှင့် ဖေးလင်း ဆေးလုံး ကြားတွင် ရှိသော ဆေးလုံးတစ်မျိုးကို ဖန်တီးလိုက်ခြင်း ဖြစ်သည်။

ယခု မေးခွန်းထုတ်စရာ တစ်ခုတည်းမှာ အဂ္ဂိရတ်ပညာရှင် မဟာမိတ်အဖွဲ့က ဤမွမ်းမံမှုကို လက်ခံမလား ဆိုသည်ပင်။

"နည်းနည်းတော့ စွန့်စားရမယ်... ဒါပေမဲ့ အရင် စမ်းကြည့်လို့ ရတာပဲ... အဆင်မပြေရင် ပြန်လာပြီး သုတေသန ဆက်လုပ်ရုံပေါ့..."

ချန်ဖေး ခဏတာ စဉ်းစားပြီးနောက် မီးဖိုထဲမှ ကျန်ရှိနေသော ချန်လင်း ဆေးလုံး နှစ်လုံးကို ဆေးပုလင်းထဲ ထည့်ကာ အင်းမှ ထွက်ခွာလာခဲ့သည်။

ဆယ့်ငါးမိနစ် ကြာပြီးနောက် ချန်ဖေး မဟာမိတ်အဖွဲ့သို့ ရောက်ရှိသွား၏။

"သခင်လေး... အဖြေရှာတွေ့သွားပြီလား..."

ချင်ကျင်လန်သည် ချန်ဖေးကို မြင်သောအခါ ဝမ်းသာသွားသော်လည်း သူ၏ စကားကို ကြားလိုက်ရသဖြင့် အံ့အားသင့်ကာ မျက်လုံးများ ပြူးကျယ်သွားသည်။

"ရက်အနည်းငယ်ပဲ ရှိပါသေးတယ်... အဖြေရှာတွေ့သွားပြီလို့ ပြောနေတာလား... နည်းနည်း မြန်လွန်းမနေဘူးလား..."

"နောက်ဆုံးမှာ အလုပ်ဖြစ်မဖြစ် ဆိုတာကတော့ မဟာမိတ် ခေါင်းဆောင်နဲ့ တခြားလူတွေအပေါ်မှာ မူတည်ပါတယ်..."

ချန်ဖေး ပြုံး၍ ပြောလိုက်သည်။

"ဆေးလုံး ပါလာလား..."

ချန်ဖေး နောက်ပြောင်နေခြင်း မဟုတ်ကြောင်း မြင်သောအခါ ချင်ကျင်လန်သည် ချန်ဖေးကို ကောင်တာသို့ အမြန် ခေါ်သွားပြီး အထက်လူကြီးများကို သတင်းပို့လိုက်သည်။

မကြာမီ ကြီးကြပ်ရေးမှူး တစ်ဦး ချန်ဖေးထံသို့ ရောက်လာ၏။

"အဆင့် ၈ ဆေးပညာရှင် ဟုတ်လား..."

တွမ်မူယိုက မျက်မှောင်အနည်းငယ် ကြုတ်လျက် မေးလိုက်သည်။

ချန်ဖေး သဘောပေါက်လိုက်ပြီး တွမ်မူယို ဆိုလိုသည်ကို နားလည်လိုက်သည်။

မဟာမိတ်အဖွဲ့သည် တာဝန်အတွက် အနိမ့်ဆုံး သတ်မှတ်ချက်ကို အဆင့် ၈ ဆေးပညာရှင် ဟု သတ်မှတ်ထားသော်လည်း အဆင့် ၈ ဆေးပညာရှင် တစ်ဦးက တစ်ခုခု ရှာဖွေတွေ့ရှိပြီဟု ပြောလာခြင်းကို ယုံကြည်ရန် ခက်ခဲနေဆဲ ဖြစ်သည်။

"ဒါ ကျွန်တော် ဖော်စပ်ထားတဲ့ ဆေးလုံးပါ... ယူပြီး အရင် စစ်ဆေးကြည့်လို့ ရပါတယ်... တကယ်လို့ ကျွန်တော့်ရဲ့ ဆေးပညာရှင် အဆင့်အတန်းက မလုံလောက်ဘူးလို့ ထင်ရင် အဆင့် ၇ ဆေးပညာရှင် စာမေးပွဲကို ဝင်ဖြေပေးလို့လည်း ရပါတယ်..."

ချန်ဖေးသည် ဆေးပုလင်း တစ်လုံးထဲမှ ချန်လင်း ဆေးလုံး တစ်လုံးကို ယူကာ အခြား ဆေးပုလင်း တစ်လုံးထဲသို့ ထည့်လိုက်ပြီးနောက် တွမ်မူယိုကို ကမ်းပေးလိုက်သည်။