ရှင်းယွဲ့ အင်မော်တယ်ဓား

ကျင့်စဉ်မျှော်စင် အပြီး ဒုတိယမြောက်နေ့မှာတင် လန်တင်းအင်မော်တယ်အရှင်က လက်နက်သွန်းလုပ်တဲ့ဖို တစ်ခုကို ချင်းရွှီခြံဝင်းထဲအထိ ကိုယ်တိုင်ကိုယ်ကျ ယူလာပေးခဲ့သည်။

လန်တင်းအင်မော်တယ်အရှင်ဆီက ထွက်လာတဲ့ ပစ္စည်းဆိုတာနဲ့ အကောင်းဆုံးတွေထဲက အကောင်းဆုံးပဲ ဖြစ်ရမည်။

သူယူဆောင်လာတာက အမှန်တကယ်ပင် ဧကရာဇ်အဆင့် ရတနာ တစ်ခု ဖြစ်နေ၏။

လန်တင်းအင်မော်တယ်အရှင်ရဲ့ ပြောပြချက်အရဆိုရင် ဒါက တစ်ချိန်က လက်နက်သွန်းလုပ်ခြင်း အတတ်ပညာ မှာ အလွန်ကျွမ်းကျင်တဲ့ အင်မော်တယ်ဧကရာဇ်တစ်ပါး အမြဲတမ်းအသုံးပြုခဲ့တဲ့ ရတနာဖြစ်သည်။

တစ်နေ့မှာ အပြောင်းအလဲတစ်ခု ဖြစ်ပွားခဲ့ပြီးနောက် ဒီဧကရာဇ်အဆင့်ဖိုက လက်ဆင့်ကမ်း လာရင်း နောက်ဆုံးမှာတော့ ထျန်းဖူနန်းတော် ရဲ့ လက်ထဲကို ရောက်ရှိလာခဲ့ခြင်းဖြစ်သည်။

နောက်ပိုင်းမှာ လောကကြီးရဲ့ အခြေအနေ ပြောင်းလဲမှုတွေကြောင့် လက်နက်သွန်းလုပ်ခြင်း အတတ်ပညာ က တဖြည်းဖြည်း ဆုတ်ယုတ်လာခဲ့ပြီး ဒီဖိုကြီးကလည်း ထျန်းဖူနန်းတော် ရဲ့ ဘဏ္ဍာတိုက်ထဲမှာပဲ ဖုန်တက်ပြီး အပိတ်လှောင်ခံထားခဲ့ရသည်။

ဒီနေ့မှသာ အလင်းရောင် ပြန်မြင်တွေ့ခွင့် ရခဲ့ခြင်း ဖြစ်၏။

"ဒါက ငါရှာနိုင်သမျှထဲမှာ အရည်အသွေး အကောင်းဆုံးဖိုပဲ။"

" ဒါပေမဲ့ သူက အရမ်းကို ရှေးကျတယ်၊ အဲဒီခေတ်က လက်နက်သွန်းလုပ်တဲ့ နည်းစနစ်တွေကလည်း တကယ်ကို ကြမ်းတမ်းခက်ထန်ပြီး ဖိုကထွက်တဲ့မီးကလည်း အလွန်ပြင်းထန်တယ်။"

" မင်း အသုံးပြုတဲ့အခါမှာတော့ အထူးသတိထားပါ"

လန်တင်းအင်မော်တယ်အရှင်က မှာကြားခဲ့သည်။

ထန်ထျန်းက ခေါင်းညိတ်ပြီး ကျေးဇူးတင်စကား ဆိုလိုက်၏။

သူ အမှန်တကယ် လိုအပ်နေတာကလည်း အခုလို ပြင်းထန်တဲ့ ဖိုမီးမျိုးပင် ဖြစ်သည်၊ ဒါမှသာ ကြယ်တာရာ ခရစ်စတယ် တွေကို အောင်မြင်စွာနဲ့ အကုန်အစင် အရည်ဖျော်နိုင်မည် ဖြစ်၏။

တကယ်လည်း လက်တွေ့မှာ ထိုသို့ပင် ဖြစ်ခဲ့သည်။

လေးရက်တာ အချိန်အတွင်းမှာတင် ထန်ထျန်းက ဒီအင်မော်တယ်ဧကရာဇ်ဖိုကို အသုံးပြုပြီး ကြယ်တာရာ ခရစ်စတယ် သန်းပေါင်းများစွာကို အရည်ဖျော်ပစ်ခဲ့သည်။

ကြယ်တာရာ ခရစ်စတယ်တွေနဲ့ သန့်စင်ထားတဲ့ ဓားကိုယ်ထည် ကလည်း ဖိုထဲမှာ တဖြည်းဖြည်း ပုံပေါ်လာခဲ့ပြီပင်။

ဒီလို သွန်းလုပ်တဲ့ ဖြစ်စဉ်မှာ ထန်ထျန်းက တခြားသော ပစ္စည်းတွေကို ထည့်သွင်းခြင်း မပြုခဲ့ပေ ။

ပထမ အကြောင်းရင်းကတော့ ကြယ်တာရာ ခရစ်စတယ်တွေနဲ့ နှိုင်းယှဉ်ရင် လက်ရှိ သူ့ဆီမှာရှိတဲ့ တခြားပစ္စည်းတွေက အရည်အသွေး နိမ့်လွန်းနေလို့ဖြစ်သည်။

ဒါတွေကို ရောထည့်လိုက်ရင် ဓားရဲ့ အရည်အသွေး တစ်ခုလုံးကိုသာ ထိခိုက်စေပါလိမ့်မည်။

ရွှမ်ဟွမ်မူလသတ္တု နဲ့ အင်မော်တယ်သတ္တု အပိုင်းအစတွေကတော့ သုံးလို့ရပေမဲ့ အရေအတွက်က နည်းလွန်းနေသည်။

ဒါ့အပြင် ဒီပစ္စည်းနှစ်မျိုးကို ထန်ထျန်းက တခြားနေရာမှာ သုံးဖို့အတွက် ရည်ရွယ်ထားခြင်း ဖြစ်၏။

ဒုတိယ အကြောင်းရင်းကတော့ ထန်ထျန်းက ဒီလက်နက်ကို အခုချက်ချင်း ပုံသေ အပြီး သတ်အဆင့်ထိ မလုပ်ချင်သေးလို့ ဖြစ်သည်။

ဒါကြောင့် သူက သန့်စင်တဲ့ ကြယ်တာရာ ခရစ်စတယ်တွေကိုပဲ သုံးပြီး "တစ်ဝက်တစ်ပျက် အချောထည်" တစ်ခုကို ဖန်တီးခဲ့သည်။

ဒါက ပြည့်စုံတဲ့ အင်မော်တယ်ဓားတစ်လက်အဖြစ် သုံးနိုင်သလို ဓားကိုယ်ထည်အဖြစ်လည်း သဘောထားလို့ရသည်၊ နောင်တစ်ချိန်မှာ ပိုပြီး အဆင့်မြင့် တဲ့ ပစ္စည်းတွေ ရလာရင်လည်း အဲဒါတွေကိုပါ ထပ်မံအရည်ဖျော်ပြီး ထည့်သွင်းနိုင်မည် ဖြစ်၏။

အဲဒီအခါကျရင်တော့ အင်မော်တယ်ဓားရဲ့ အရည်အသွေးက နောက်တစ်ဆင့် ထပ်ပြီး တက်လာလိမ့်မည်။

ရိုးရိုးရှင်းရှင်း ပြောရရင်တော့ အမြဲတမ်း အဆင့်မြှင့်တင်လို့ရတဲ့ အင်မော်တယ်လက်နက် တစ်ခုပင် ဖြစ်သည်။

ဖိုမီးတွေက တဟုန်းဟုန်း တောက်လောင်နေ၏။ အကယ်၍ ဒီစွမ်းအားတွေကို ဖိုထဲမှာ ပိတ်လှောင်မထားနိုင်ဘူးဆိုရင် အဲဒီကြောက်စရာကောင်းတဲ့ စွမ်းအားတွေက ထုန်းရှန့်တောင် တစ်ခုလုံးကိုတောင် လောင်ကျွမ်းသွားစေနိုင်သည်။

မကြာခင်မှာပဲ ဓားရှည်က ဖိုထဲမှာ လျင်မြန်စွာ ပုံပေါ်လာသည်။

ဓားတစ်ကိုယ်လုံးက ကြယ်အလင်းတန်းတွေ ဝေဝေဖြာဖြာ ထွက်ပေါ်နေပြီး လူ့လောကမှာ မရှိသင့်တဲ့အရာတစ်ခုလိုကို တင့်တယ်လွန်းလှ၏။

ကြယ်အလင်းတန်းတွေရဲ့ တောက်ပမှုက အထွတ်အထိပ်ကို ရောက်သွားတဲ့အချိန်မှာတော့ ထန်ထျန်းက လက်ဝါးကြီးနဲ့ ဖိုကို အားပြင်းပြင်း တစ်ချက် ရိုက်လိုက်သည်။

"ဘုန်း" ဆိုတဲ့ အသံကြီးနဲ့အတူ ဖိုကြီးက လေပေါ်ကို ပျံတက်သွားပြီး အရှိန်အဟုန်နဲ့ တုန်ခါသွားသည်။

နောက်တစ်ခဏမှာတော့ အနည်းငယ် ဖောက်ထွင်းမြင်နေရတဲ့ ဓားရှည်တစ်လက်က ဖိုထဲကနေ ငေါက်ကနဲ ထွက်ပေါ်လာ၏။

အပူရှိန်ပြင်းတဲ့ စွမ်းအားတွေနဲ့အတူ အဆုံးမဲ့တဲ့ ကြယ်တာရာစွမ်းအားတွေက ချင်းရွှီခြံဝင်းထဲမှာ လှိုင်းထသွားပါတော့သည်။

မျက်စိတစ်မှိတ်အတွင်းမှာပဲ ကောင်းကင်ယံမှာ ကြီးမားတဲ့ စွမ်းအင်ဝဲဂယက်ကြီးတစ်ခု ဖြစ်ပေါ်လာပြီး တဖြည်းဖြည်း ကြီးထွားလာကာ လေထုကို မွှေနှောက်နေသည်။

ဒီအတိုင်းသာ ဆက်ပြီး လွှတ်ထားရင် ထျန်းဖူ နန်းတော်တစ်ခုလုံးက ဒီ အင်မော်တယ်ဓား ထွက်ပေါ်လာခြင်းကို ခံစားမိသွားပါလိမ့်မည်။

ဒါပေမဲ့ ထန်ထျန်းက ကြိုတင်ပြင်ဆင်ထားပြီးသား ဖြစ်၏။

ငွေရောင် ဝိုင်အိုးလေးတစ်လုံးက သူ့လက်ထဲမှာ ပေါ်လာသည်။

အဲဒီနောက် အိုးထဲကနေ ငွေရောင်အင်မော်တယ်ဝိုင် တွေ စီးထွက်လာပြီး ကောင်းကင်မှာ မျောနေတဲ့ ဓားဆီကို ပြေးဝင်သွားသည်။

လအင်မော်တယ်ဝိုင် ကို သူသောက်လာတာ နှစ်လကျော်ပြီမို့ အဲဒီအရက်ရဲ့ အခြေခံ ဂုဏ်သတ္တိတွေကို သူ ကောင်းကောင်း နားလည်ပြီးသားဖြစ်သည်။

ဒါကို ဓားကို "အအေးခံ" ဖို့ သုံးမယ်ဆိုရင် လုံးဝ ပြဿနာမရှိနိုင်ပေ ။

တကယ်လည်း ထိုသို့ပင် ဖြစ်၏။ လအင်မော်တယ်ဝိုင် က ဓားနဲ့ ထိတွေ့လိုက်တဲ့အခါ "ရှဲ..." ဆိုတဲ့ အသံနဲ့အတူ အင်မော်တယ်မြူခိုးတွေ ချက်ချင်း ဖုံးလွှမ်းသွားသည်။

နောက်ဆက်တွဲအနေနဲ့ ကောင်းကင်က စွမ်းအင်ဝဲဂယက်ကြီးကလည်း ချက်ချင်း ရပ်တန့်သွား၏။

ပြီးနောက် လျင်မြန်စွာပဲ ပြန်လည်ကျုံ့ဝင်သွားပြီး ကြီးမားတဲ့ ကန်တော့ပုံစံဖြစ်ကာ ဓားကိုယ်ထည်ထဲကို စီးဝင်သွားပါတော့သည်။

ခဏအကြာမှာတော့ အရာအားလုံး ပျောက်ကွယ်သွားပြီး ဘာမှမဖြစ်ခဲ့သလိုမျိုး ပြန်လည် ငြိမ်သက်သွား၏။

ကောင်းကင်ယံမှာတော့ ဖြူစင်တဲ့ အင်မော်တယ်ဓားတစ်လက်က ငြိမ်သက်စွာ မျောလွင့်နေသည်။

ထန်ထျန်းက လက်ယပ်ခေါ်လိုက်တဲ့အခါ ဓားက ညွှန်ကြားချက် ရသလိုမျိုး ကောင်းကင်မှာ အရိပ်တစ်ခု ချန်ထားခဲ့ပြီး ထန်ထျန်းရဲ့ လက်ထဲကို ရောက်ရှိလာသည်။

ထိတွေ့လိုက်တဲ့အခါ အေးစိမ့်နေပြီး ဘာအလေးချိန်မှ မရှိသလို ပေါ့ပါးနေ၏။

ဒါပေမဲ့ ဒီဓားရဲ့အတွင်းထဲမှာ ဘယ်လောက်တောင် ကြောက်စရာကောင်းတဲ့ စွမ်းအားတွေ ဖုံးကွယ်နေမလဲဆိုတာ ထန်ထျန်း ခံစားမိသည်။

သူကိုယ်တိုင် သွန်းလုပ်ထားတာဖြစ်ပေမဲ့ ရွှေအင်မော်တယ် အဆင့်ကို ရောက်တော့မယ့် သူတောင်မှ ဒီဓားရဲ့ စွမ်းအားအပြည့်အဝကို ထုတ်သုံးနိုင်ဖို့ ခက်ခဲလိမ့်ဦးမည်။

ဒီဓားသာ ထွက်ပေါ်လာရင် ဂိုဏ်းပေါင်းစုံ ကို အမှုန့်ခြေပစ်နိုင်စွမ်း ရှိ၏။

"မင်းကို... ရှင်းယွဲ့ဓား လို့ ခေါ်မယ်"

သွန်းလုပ်ခဲ့တဲ့ ပစ္စည်းတွေရဲ့ နာမည်ကို အစွဲပြုပြီး ထန်ထျန်းက နာမည်ပေးလိုက်ခြင်း ဖြစ်သည်။

ရှင်းယွဲ့ဓားဆီကနေ ပျော်ရွှင်တဲ့ တုန်ခါမှုလေးတစ်ခု ထွက်ပေါ်လာ၏။ သူ့ရဲ့ ဖြစ်တည်မှုကို ဂုဏ်ပြုနေတဲ့အလားပင်။

ရှင်းယွဲ့ဓားရဲ့ ခံစားချက်ကို သိလိုက်ရတဲ့ ထန်ထျန်းကလည်း စိတ်ချမ်းသာသွားပြီး သူ့မှာ ကိုယ်ပိုင်လက်နက်တစ်ခု ရှိသွားပြီဖြစ်လို့ ကျေနပ်သွားသည်။

ဒီအင်မော်တယ်ဓားက ဓားပုံစံ ဖြစ်ပေမဲ့ ထန်ထျန်းရဲ့ ဆန်းပြားတဲ့ နည်းစနစ်တွေကြောင့် ကျင့်စဉ်ပေါင်းစုံကို အထောက်အကူပြုနိုင်တဲ့ စွမ်းရည် ရှိ၏။

ဒါက ထန်ထျန်းက သူ့အတွက် အထူးသွန်းလုပ်ထားတဲ့ လက်နက်ဖြစ်ခြင်းကြောင့်ပင်။

ရှင်းယွဲ့ဓား ရှိလာပြီးနောက်မှာတော့ သူ့ရဲ့ အစွမ်းက အရင်ကထက် တစ်ဝက်ကျော်လောက် ပိုပြီး တိုးတက်လာခဲ့ပြီပင်။

ထန်ထျန်းက ပိုကြည့်လေ ပိုသဘောကျလေဖြစ်ပြီး ကြယ်တာရာ ခရစ်စတယ်တွေနဲ့ပဲ လှပတဲ့ ဓားအိမ်တစ်ခုကို သီးသန့်သွန်းလုပ်ကာ ရှင်းယွဲ့ဓားကို အထဲထည့်ပြီး ခါးမှာ ချိတ်လိုက်သည်။

ဘာမှ ထူးခြားတာ မရှိဘူးဆိုရင်တော့ ရှင်းယွဲ့ဓားက သူ့ရဲ့ ရှေ့ဆက်မယ့် လမ်းခရီးတစ်လျှောက်လုံးမှာ အမြဲတမ်းအဖော် ဖြစ်လာမှာပင်။

ဒါတွေအားလုံး ပြီးဆုံးသွားတဲ့အခါမှာတော့ ငါးရက်တိုင်တိုင် ကုန်ဆုံးသွားခဲ့ပြီ။

ထန်ထျန်းက အသက်ရှည်ရှည် ရှူလိုက်ပြီး ခြံဝင်းထဲမှာ ခဏလောက် နားနေခဲ့သည်။

အဲဒီနောက် ဖိုရှေ့မှာ ပြန်ထိုင်လိုက်ပြီး လက်မအရွယ်အစားရှိတဲ့ အဝါရောင် ရှေးဟောင်းကျောက်စိမ်းတုံးလေးကို ထုတ်ယူလိုက်၏။

ဒါက ရတနာလေ့လာ ပွဲတုန်းက တာအိုကျောက်စိမ်း ၁.၅ သန်းနဲ့ ဝယ်ထားတဲ့ ရွှမ်ဟွမ်မူလသတ္တု ဖြစ်သည်။

ပွဲပြီးကတည်းက ကျင့်စဉ်မျှော်စင်မှာ အချိန်ကုန်ခဲ့ရသလို ကိုယ်ပိုင်လက်နက် သွန်းလုပ်နေရတာကြောင့် ဒီရွှမ်ဟွမ်မူလသတ္တုကို မလေ့လာရသေးပေ ။

အခုမှပဲ သေသေချာချာ ကြည့်ပြီး ထန်ထျန်းက ဒီသတ္တုက အင်မော်တယ်သတ္တု အပိုင်းအစတွေရဲ့ အဓိက အနှစ်သာရပစ္စည်းဖြစ်မှန်း ပိုသေချာသွား၏။

"ဒါကြောင့်လည်း မူလဟင်းလင်းပြင် ခေါင်းလောင်း အပိုင်းအစတွေနဲ့အတူ သွန်းလုပ်လို့ ရနေတာကိုး။ ဒါကလည်း ကမ္ဘာဦးကတည်းက ရှိနေခဲ့တဲ့ အဖိုးတန် ရတနာတစ်ခုပဲ"

ထန်ထျန်းက ရေရွတ်လိုက်သည်။

ရွှမ်ဟွမ်မူလသတ္တုက ကြယ်တာရာ ခရစ်စတယ်ထက်တောင် ပိုပြီး အဖိုးတန်သည်။

ကမ္ဘာဦးအစမှာပဲ ဖြစ်ပေါ်လာတဲ့ အရာဖြစ်လို့ မူလအရာဝတ္ထုလို့ ဆိုရမည်။

အရင်ကတော့ ထန်ထျန်းက အင်မော်တယ်သတ္တု တွေပေါ်က အစီအရင်တွေနဲ့ ဖွဲ့စည်းပုံတွေကို နားမလည်နိုင်ခဲ့ပေ။

အခုတော့ ဒီရွှမ်ဟွမ်မူလသတ္တု ရှိနေပြီဖြစ်လို့ ဒါကို စတင်လေ့လာနိုင်ပါပြီပင်။

သုံးရက်အတွင်းမှာတင် သူက အင်မော်တယ်သတ္တုရဲ့ တည်ဆောက်ပုံနဲ့ အစီအရင်တွေကို အကုန်လုံး နားလည်သွားသည်။

အင်မော်တယ်သတ္တုနဲ့ မူလဟင်းလင်းပြင် ခေါင်းလောင်းအပိုင်းအစတွေကြားက ဆက်နွယ်မှုကိုလည်း သူ မြင်လာရ၏။

ထန်ထျန်းရဲ့ ရှေ့မှာ ကမ္ဘာသစ်တစ်ခု ပွင့်လင်းလာသလိုပင်။

"ဒါက တကယ့်ကို ဉာဏ်ရည်တု ဦးနှောက် တစ်ခုနဲ့ တူတာပဲ..."

ထန်ထျန်းက တစ်ဦးတည်း ရေရွတ်လိုက်သည်။

"ငါ..."

" စွမ်းရည် တစ်ခုကို ဖန်တီးနိုင်တော့မယ် ထင်တယ်..."