အခန်း (၃-၄)
Vol. 1 Ch. 3-4
အခန်း (၃) - မင်း ဒါကို ဘယ်လိုလုပ် သိတာလဲ
“ဟို... အကဲဖြတ်ဆရာ ကျန်း၊ ကျွန်တော်တို့က ဆရာ့ကိုပဲ ပိုယုံကြည်လို့ အကဲဖြတ်ဆရာ လင်းကို ထပ်ကြည့်ခိုင်းဖို့ မလိုတော့ဘူး ထင်ပါတယ်ဗျာ”
ဖောက်သည်များမှာ ပြဿနာတက်မည်ကို စိုးရိမ်သဖြင့် တညီတညွတ်တည်း ပြောဆိုကြလေသည်။
ကျန်းဟယ်ကမူ လင်းကျင်း နောက်ဆုတ်သွားမည်ကို စိုးရိမ်သဖြင့် သူတို့အား အလျင်အမြန် တိုးတိုးလေး ပြောလိုက်၏။ “ဘာမှ မဖြစ်ပါဘူး၊ သူ့ကိုပဲ ကြည့်ခိုင်းလိုက်ပါ။ စိတ်မပူပါနဲ့၊ ခင်ဗျားတို့အတွက် ဘာမှ ထိခိုက်မှာ မဟုတ်ပါဘူး။ လင်းကျင်းရဲ့ အရည်အချင်းကို ကျွန်တော် အသိဆုံးပါ။ သူ ကြည့်ရင်တောင် ဘာမှ ထူးထူးခြားခြား မြင်မှာ မဟုတ်ပါဘူး”
ကျန်းဟယ်သည် ယခင်က ဒေါသထွက်ပြနေခြင်းမှာ လင်းကျင်းအား သူ၏ ထောင်ချောက်ထဲသို့ ဆွဲသွင်းရန်အတွက်သာ ဖြစ်၏။ လင်းကျင်းကလည်း အယုံလွယ်စွာဖြင့် ထိုထောင်ချောက်ထဲသို့ တည့်တည့်တိုးဝင်လာခဲ့ချေပြီ။
'အရင်က အမှားအပြင် ဒီနေ့ ငါ့လို အလုပ်သင်ကိုပါ ထပ်ရှုံးသွားရင်တော့... မင်း ဘယ်လောက်ပဲ မျက်နှာပြောင်ပါစေ၊ အသင်းချုပ်ကတော့ မင်းရဲ့ လက်မှတ်ကို ရုပ်သိမ်းမှာ အသေအချာပဲ လင်းကျင်း'
ကျန်းဟယ်က တွေးတောရင်း အနီးရှိ အလုပ်သင်တစ်ဦးအား သတင်းဖြန့်ရန် မျက်ရိပ်ပြလိုက်သည်။ မကြာမီမှာပင် သားရဲအကဲဖြတ် ဌာနတစ်ခုလုံးမှ လူများမှာ စုရုံးလာကြတော့သည်။
“ဘာတွေ ဖြစ်နေတာလဲ"
“သားရဲအကဲဖြတ် ပြိုင်ပွဲလေ။ ဘယ်သူက ပိုပြီး တိကျသေချာအောင် အကဲဖြတ်နိုင်မလဲဆိုတာ ဗဟုသုတနဲ့ အတွေ့အကြုံကို ယှဉ်ပြိုင်နေကြတာ”
“ဟိုမှာ လင်းကျင်း မဟုတ်လား... သူက အတည်ပြုပြီးသား ဆရာတစ်ယောက်ပဲကို”
“သူ့ရဲ့ ဂုဏ်သတင်းက အပိုတွေပါကွာ။ မကြာခင်က စစ်ဆေးမှုမှာ သူက အဆင့်မြင့်အလုပ်သင်တွေထက်တောင် အမှတ်နည်းသေးတယ်။ ဒီလိုလူက အဆင့်မြင့်ရာထူးကို ယူထားတာ တကယ်တော့ ရှက်စရာပဲ”
“ဟုတ်တယ်၊ လင်းကျင်းသာ ထွက်သွားရင် ကျန်းဟယ် ရာထူးတက်ဖို့ အခွင့်အရေး ရှိမလား”
လူအများ၏ ဝေဖန်သံများကြားတွင် ကျန်းဟယ်သည် ပထမဆုံး အကဲဖြတ်မှုကို စတင်လေသည်။ သူသည် ထိုသားရဲနှစ်ကောင်၏ အခြေအနေကို ကြိုတင်လေ့လာထားပြီး ဖြစ်သဖြင့် ဟန်ပြသက်သက်သာ စစ်ဆေးနေခြင်း ဖြစ်၏။
အကဲဖြတ်ပွဲများတွင် တစ်ဦး၏ အဖြေကို တစ်ဦးက ခိုးယူခြင်း မပြုနိုင်ရန်အတွက် ရလဒ်များကို စက္ကူပေါ်တွင် အသီးသီး ရေးသားကြရပြီးမှ တစ်ပြိုင်နက်တည်း ထုတ်ဖော်ပြသကြရစမြဲ ဖြစ်သည်။
လင်းကျင်းသည် သူ၏ ခန္ဓာကိုယ်ပိုင်ရှင်ဟောင်းမှာ ကံကောင်းလွန်း၍သာ အကဲဖြတ်ဆရာ ဖြစ်လာခဲ့ခြင်းဖြစ်ကြောင်း မှတ်ဉာဏ်များအရ သိရှိထားသည်။ ယခု လင်းကျင်းမှာမူ သားရဲအကဲဖြတ်ပညာကို လုံးဝ မသိနားမလည်ပေ။ သို့သော် သူ၌ 'သားရဲပြတိုက်' ရှိနေပေသည်။
လင်းကျင်းသည် သားရဲတစ်ကောင်၏ နဖူးကို အသာအယာ ထိတွေ့လိုက်၏။ သူ မျှော်လင့်ထားသည့်အတိုင်း သားရဲပြတိုက်အတွင်းရှိ ကျောက်စာတိုင်တွင် သားရဲ၏ အချက်အလက်များ ပေါ်ထွက်လာတော့သည်။
[အဆင့် (၁) သားရဲ - လေဝိညာဉ်မြေခွေး]
[အခြေအနေ - အနည်းငယ် ဆာလောင်နေသည်]
[ဂုဏ်သတ္တိ - လေ၊ လေဓာတ်ရှိသော လူသားနှင့် သွေးကတိစာချုပ်ချုပ်ရန် အသင့်တော်ဆုံး ဖြစ်သည်...]
[ပါရမီအဆင့် - ၁။ တိုးတက်ရန် နည်းလမ်း (၁၂) သွယ် ရှိသည်...]
လင်းကျင်း၏ ယုံကြည်မှုမှာ ချက်ချင်း မြင့်တက်လာခဲ့၏။ ထို့နောက် သူသည် နောက်ထပ် သားရဲတစ်ကောင်ကို ထပ်မံ ထိတွေ့လိုက်ပြန်သည်။
[အဆင့် (၁) သားရဲ - ကျောက်လိပ်ပြာ]
[ဂုဏ်သတ္တိ - မြေ၊ မီး သို့မဟုတ် ရွှေဓာတ်ရှိသူနှင့် အသင့်တော်ဆုံး ဖြစ်သည်...]
[ပါရမီအဆင့် - ၂။ တိုးတက်ရန် နည်းလမ်း (၆) သွယ် ရှိသည်...]
[ထူးခြားချက် - ရွှေနဂါး၏ သွေးမျိုးဆက် ပါဝင်နေပြီး ယခုအချိန်တွင် အစွမ်းမပြသေးပေ။ အစွမ်းနှိုးဆော်ရန် နည်းလမ်း (၃) သွယ် ရှိသည်...]
လင်းကျင်းသည် သားရဲနှစ်ကောင်လုံး၏ အချက်အလက်များကို အကုန်အစင် သိရှိသွားခဲ့ပြီ ဖြစ်သည်။ သူသည် ဖောက်သည်အား မေးခွန်းအချို့ မေးမြန်းပြီးနောက် ဘောပင်ကို ယူကာ အကဲဖြတ်ချက်များကို စတင် ရေးသားလေတော့သည်။
ခေတ္တအကြာတွင် ကျန်းဟယ်က မေးလိုက်၏။
“မင်း ပြီးပြီလား”
လင်းကျင်းက ခေါင်းညိတ်ပြကာ စာရွက်များကို သေသပ်စွာ ထပ်လိုက်ပြီး စေတနာဖြင့် သတိပေးလိုက်သည်။
“ကျန်းဟယ်... မင်း အခုချိန်မှာ နောင်တရပြီး နောက်ဆုတ်မယ်ဆိုရင် မနှောင်းသေးဘူးနော်”
ကျန်းဟယ်က လှောင်ပြောင်ရယ်မောလိုက်၏။
“ကျွန်တော့်အတွက် စိတ်မပူပါနဲ့ ဆရာလင်း။ လူပုံအလယ်မှာ ရှုံးနိမ့်သွားပြီးရင် ဘယ်လို ဆင်ခြေပေးရမလဲဆိုတာကိုပဲ ကြိုစဉ်းစားထားလိုက်ပါ”
အကဲဖြတ်ချက် ရလဒ်များကို ဖောက်သည်က အသံကျယ်ကျယ်ဖြင့် ဖတ်ပြလေသည်။
“ကျန်းဟယ်က 'ကျောက်လိပ်ပြာ' ကို ရွေးချယ်ဖို့ အကြံပြုထားပြီး၊ လင်းကျင်းကတော့ 'လေဝိညာဉ်မြေခွေး' ကို ရွေးချယ်ဖို့ အကြံပြုထားပါတယ်”
ထိုအခါ လူအုပ်ကြီးအတွင်း ဝေဖန်သံများ ထွက်ပေါ်လာ၏။ ဖောက်သည်မှာ မြို့ထဲမှ ကုန်သည်တစ်ဦးဖြစ်ပြီး လေဓာတ်ရှိသူ ဖြစ်သည်။ ကျောက်လိပ်ပြာမှာ မြေဓာတ်ဖြစ်သဖြင့် ဖောက်သည်နှင့် ဓာတ်မတည့်ပေ။ ထို့ကြောင့် လေဝိညာဉ်မြေခွေးက ပို၍ သင့်တော်သည်ဟု အချို့က ယူဆကြသည်။ သို့သော် ကျန်းဟယ်မှာ ယုံကြည်မှု အပြည့် ရှိနေဆဲ ဖြစ်၏။
ဖောက်သည်က ဆက်လက် ဖတ်ပြပြန်သည်။
“ကျန်းဟယ်ရဲ့ အကြံပြုချက် - 'ကျောက်လိပ်ပြာ' မှာ မြေနဂါးရဲ့ သွေးမျိုးဆက် ဖုံးကွယ်ပါဝင်နေတဲ့အတွက် ပါရမီအဆင့် မြင့်မားပါတယ်။ အစွမ်းနှိုးဆော်နိုင်ရင် အဆင့်တက်နိုင်မှာ ဖြစ်ပါတယ်။ 'လေဝိညာဉ်မြေခွေး' ကတော့ သာမန်ပါရမီပဲ ရှိတာကြောင့် အကြံမပြုပါ”
“မြေနဂါး သွေးမျိုးဆက် ဟုတ်လား”
လူအုပ်ကြီး အံ့အားသင့်သွားကြသည်။ ရှေးဟောင်းသားရဲတို့၏ သွေးမျိုးဆက် ပါဝင်နေပါက ထိုသားရဲ၏ တန်ဖိုးမှာ အဆမတန် မြင့်မားသွားပေလိမ့်မည်။ ဤအချက်ကို ကျန်းဟယ်က မြင်နိုင်စွမ်း ရှိသည်မှာ အမှန်ပင် ချီးကျူးစရာ ဖြစ်၏။
ကျန်းဟယ်သည် မိမိကိုယ်မိမိ အောင်နိုင်သူအဖြစ် သတ်မှတ်ကာ ကျေနပ်နေတော့သည်။ သူသည် လင်းကျင်းအား အထင်သေးစွာ ကြည့်လိုက်သော်လည်း လင်းကျင်းက အသာအယာ ချောင်းဟန့်ကာ မေးလိုက်၏။
“မင်း တကယ်ပဲ နိုင်ပြီလို့ သေချာနေတာလား"
“ဘာလို့ မသေချာရမှာလဲ... မင်းကတော့ ကျောက်လိပ်ပြာထဲမှာ သွေးမျိုးဆက် ပါနေတာကိုတောင် မမြင်နိုင်ဘူး။ ဒီလို အရည်အချင်းနဲ့ လက်မှတ်ရထားတာ တကယ်ကို ရှက်စရာပဲ”
ကျန်းဟယ်က ဟားတိုက် ရယ်မောလိုက်သည်။
ထိုစဉ် ဖောက်သည်ဖြစ်သူ၏ မျက်နှာမှာ ထူးဆန်းစွာ ပြောင်းလဲသွားပြီး တိုးတိုးလေး ပြောလိုက်၏။
“ဟို... အကဲဖြတ်ဆရာ ကျန်း၊ ကျွန်တော် ဖတ်လို့ မပြီးသေးဘူးဗျ”
ကျန်းဟယ်က မျက်မှောင်ကြုတ်ကာ စိတ်မရှည်စွာ ပြောလိုက်သည်။
“ဆက်ဖတ်လိုက်လေ၊ သူ ဘယ်လောက်တောင် ရှက်စရာကောင်းအောင် ရှုံးသွားသလဲဆိုတာ အားလုံး သိသွားအောင်ပေါ့”
ဖောက်သည်က လင်းကျင်း၏ အစီရင်ခံစာကို ဆက်လက် ဖတ်ပြလေတော့သည်။
“လင်းကျင်းရဲ့ အကြံပြုချက် - 'လေဝိညာဉ်မြေခွေး' သည် ဖောက်သည်၏ ဂုဏ်သတ္တိနှင့် ကိုက်ညီပြီး ပါရမီအဆင့် ၂ အထိ မြှင့်တင်နိုင်မည် ဖြစ်သည်။ 'ကျောက်လိပ်ပြာ' တွင် မြေနဂါး သွေးမျိုးဆက် ပါဝင်နေသည်မှာ မှန်သော်လည်း၊ အမှန်စင်စစ် ၎င်းမှာ 'ရွှေနဂါး'၏ သွေးမျိုးဆက် ဖြစ်သည်။ အစွမ်းနှိုးဆော်ပြီးပါက ၎င်း၏ အဓိက ဂုဏ်သတ္တိမှာ 'ရွှေ' ဖြစ်သွားမည်ဖြစ်ရာ ဖောက်သည်၏ 'လေ' ဓာတ်နှင့် အလွန်အမင်း ဓာတ်မတည့် ဖြစ်သွားမည် ဖြစ်သည်။ ထို့ကြောင့် အကြံမပြုပါ...”
“ဘာ...”
လူအုပ်ကြီးမှာ အံ့သြလွန်းသဖြင့် အသက်ပင် ရှူရခက်သွားကြ၏။
ကျန်းဟယ်၏ လှောင်ပြုံးမှာ ချက်ချင်းပင် အေးခဲသွားတော့သည်။ လင်းကျင်းသည် သွေးမျိုးဆက် ပါဝင်နေသည်ကို မြင်နိုင်ရုံမျှမက၊ ၎င်းမှာ မည်သည့် နဂါးအမျိုးအစားဖြစ်ပြီး မည်သည့် ဂုဏ်သတ္တိ ပြောင်းလဲသွားမည်ကိုပါ အသေးစိတ် သိနေသည် မဟုတ်ပါလား။
ဤကဲ့သို့သော အဆင့်မြင့် အကဲဖြတ်မှုကို အဆင့် (၂) သားရဲအကဲဖြတ်ဆရာများသာ လုပ်ဆောင်နိုင်စွမ်း ရှိပေသည်။ ကျန်းဟယ်မှာ အလုပ်သင်မျှသာ ဖြစ်သဖြင့် မသိသည်မှာ မဆန်းသော်လည်း အရည်အချင်း မရှိဟု သတင်းကြီးနေသော လင်းကျင်းက ဤအချက်ကို မည်ကဲ့သို့ သိနိုင်ရသနည်း။
အခန်း (၄) - တုန်လှုပ်ချောက်ချားဖွယ်ရာ
အမှန်စင်စစ် လင်းကျင်းကိုယ်တိုင်မှာ အဆင့် (၁) သားရဲအကဲဖြတ်ဆရာတစ်ဦးသာ ဖြစ်ပေသည်။
ကျန်းဟယ်၏ ပထမဆုံး တုံ့ပြန်မှုမှာ လင်းကျင်းတစ်ယောက် ပေါက်ကရများ လျှောက်ပြောနေသည်ဟူသော အတွေးပင်။ ထိုသို့ တွေးလိုက်မိမှသာ သူ၏ ပျာယာခတ်နေသော စိတ်အစဉ်မှာ ပြန်လည်တည်ငြိမ်သွားတော့သည်။
'ဟုတ်ပြီ... သူ ငါ့ကိုရှုံးမှာ ကြောက်လွန်းလို့ ဒါတွေကို တမင်လုပ်ကြံဖန်တီးလိုက်တာပဲ ဖြစ်ရမယ်။ ဖုံးကွယ်နေတဲ့ သွေးမျိုးဆက်ရဲ့ ဂုဏ်သတ္တိတွေကို သိနိုင်ဖို့ဆိုတာ လုံးဝ မဖြစ်နိုင်တဲ့ကိစ္စပဲ။ သူသာ တကယ်သိတယ်ဆိုရင် အဆင့် (၂) အကဲဖြတ်ဆရာဖြစ်တဲ့ ဌာနမှူး ဝမ်ကျိထက်တောင် ပိုတော်နေမှာပေါ့။ ဟင်း... လင်းကျင်း၊ မင်းကတော့ မင်းရဲ့ ကိုယ်ပိုင်ဉာဏ်နီဉာဏ်နက်နဲ့ မင်းကိုယ်မင်း ပြန်သတ်လိုက်တာပဲ။ ဖောက်သည်ကို လိမ်ညာတာနဲ့ အကဲဖြတ်ချက်ကို အတုလုပ်တာက ငါတို့လောကရဲ့ အကြီးမားဆုံး တားမြစ်ချက်ကွ။ မင်း ဒီပြဿနာကို ဘယ်လိုဖြေရှင်းမလဲဆိုတာ ငါ စောင့်ကြည့်လိုက်မယ်။'
ကျန်းဟယ်၏ မျက်ဝန်းထဲတွင် ကောက်ကျစ်သော အရိပ်အယောင်များ ဖြတ်ပြေးသွား၏။ ရှော့ခ်ရသွားပြီးနောက်တွင် ပတ်ဝန်းကျင်ရှိ လူအားလုံးမှာလည်း ကျန်းဟယ်ကဲ့သို့ပင် တွေးတောနေကြပြီး လင်းကျင်းအား အထင်အမြင်သေးသော အကြည့်များဖြင့် ဝိုင်းကြည့်နေကြတော့သည်။
အရည်အချင်း မရှိခြင်းကို ကြိုးစားမှုဖြင့် ကုစားနိုင်သော်လည်း ကိုယ်ကျင့်တရား ပျက်ပြားခြင်းကိုမူ ကုစားရန် နည်းလမ်းမရှိပေ။ သားရဲအကဲဖြတ်ဆရာတစ်ဦးအနေဖြင့် အကဲဖြတ်ချက်ကို အတုလုပ်ခြင်းမှာ ခွင့်မလွှတ်နိုင်သော ကိစ္စဖြစ်သည်။ အကယ်၍သာ ဤအချက်က မှားယွင်းကြောင်း သက်သေပြနိုင်ခဲ့လျှင် လင်းကျင်းသည် လူအများ၏ ကဲ့ရဲ့ရှုတ်ချမှုကို ခံရပေလိမ့်မည်။ လင်းကျင်းအပေါ် သနားစိတ်ရှိသော ကျောက်ရင်ပင်လျှင် စိတ်ပျက်စွာ ခေါင်းခါယမ်းနေမိတော့သည်။
“လင်းကျင်း... မင်းကတော့ တကယ်ကို သတ္တိကောင်းတာပဲ။ အကဲဖြတ်ချက်ကို အတုလုပ်ရုံတင်မကဘူး၊ မဟုတ်ကဟုတ်ကတွေပါ လျှောက်ပြောရဲသေးတယ်ပေါ့လေ”
ကျန်းဟယ်က အော်ဟစ်ဆဲဆိုလိုက်သည်။
လင်းကျင်းကမူ တည်ငြိမ်မြဲ တည်ငြိမ်နေဆဲပင်။ သူက အေးစက်စွာဖြင့် ပြောလိုက်၏။
“ဘာလို့ အော်ဟစ်နေတာလဲ... 'သားရဲသွေးမျိုးဆက် အကဲဖြတ်ခြင်း'ဆိုတဲ့ ကျမ်းစာအုပ်ထဲမှာ ရွှေနဂါးရဲ့ သွေးမျိုးဆက်ကို စမ်းသပ်တဲ့ နည်းလမ်း ပါပြီးသားပဲ။ ငါပြောတာ မှန်၊ မမှန် သိချင်ရင် အဲဒီနည်းလမ်းအတိုင်း စမ်းသပ်ကြည့်လိုက်ရင် သိရမှာပေါ့”
ထို 'သားရဲသွေးမျိုးဆက် အကဲဖြတ်ခြင်း' ကျမ်းမှာ သားရဲအကဲဖြတ်လောက၏ ဂန္ထဝင်ကျမ်းတစ်စောင်ဖြစ်ပြီး နှစ်ပေါင်း ရာချီ၍ လက်ဆင့်ကမ်းလာခဲ့သည့်အတွက် အကဲဖြတ်ဆရာတိုင်း မဖြစ်မနေ လေ့လာရသော စာအုပ်ဖြစ်သည်။ အဆိုပါကျမ်းတွင် အချက်အလက်များ လွန်စွာများပြားသဖြင့် အလွတ်မှတ်ရန် ခက်ခဲသော်လည်း အသင်းခွဲတွင် ထိုစာအုပ်ရှိနေသဖြင့် လူတစ်ယောက်က အမြန်သွားယူကာ ရွှေနဂါး သွေးမျိုးဆက် စမ်းသပ်နည်းကို ရှာဖွေလေတော့သည်။
စမ်းသပ်နည်းမှာ ရိုးရှင်းလှပြီး လိုအပ်သော ပစ္စည်းအနည်းငယ်သာ ရှိလျှင် စမ်းသပ်နိုင်သည်။ ကျောက်လိပ်ပြာ၏ သွေးတစ်စက်ကို ဖန်ခွက်ထဲသို့ ထည့်လိုက်သောအခါ ၎င်း၌ ရွှေနဂါး သွေးမျိုးဆက် အမှန်တကယ် ပါဝင်နေပါက ထိုသွေးစက်မှာ ရွှေရောင်သို့ ပြောင်းလဲသွားမည် ဖြစ်သည်။ အားလုံးက စိတ်လှုပ်ရှားစွာ စောင့်ကြည့်နေစဉ်မှာပင် သွေးစက်မှာ ဖန်ခွက်အတွင်း၌ ရွှေရောင်ဝင်းခနဲ တောက်ပသွားတော့သည်။
“တကယ်ပဲ... တကယ်ပဲ ရွှေနဂါး သွေးမျိုးဆက်ပဲ”
တစ်စုံတစ်ယောက်က တုန်ရီသောအသံဖြင့် အော်ဟစ်လိုက်၏။ ရွှေနဂါး သွေးမျိုးဆက်မှာ အလွန်ပင် ရှားပါးလှပေသည်။ အကယ်၍ ဤသားရဲကို ကိုယ်တိုင်မသုံးလျှင်တောင် အလွန်မြင့်မားသော ဈေးနှုန်းဖြင့် ပြန်လည်ရောင်းချနိုင်ပေသည်။
ထိုအခါ လူတိုင်းက လင်းကျင်းအား ထူးဆန်းသော သတ္တဝါတစ်ကောင်ကို ကြည့်သကဲ့သို့ အံ့သြတကြီး ကြည့်နေကြတော့သည်။ အထူးသဖြင့် ကျန်းဟယ်မှာမူ သွေးစက် ရွှေရောင်ပြောင်းသွားသည်ကို မြင်လိုက်ရချိန်တွင် ပါးစပ်အဟောင်းသားဖြင့် စကားပင် မဆိုနိုင်တော့ပေ။
လင်းကျင်းသည် သွေးမျိုးဆက် ပါဝင်နေသည်ကို သိရုံမျှမက၊ ၎င်း၏ အမျိုးအစားနှင့် ဂုဏ်သတ္တိကိုပါ တိကျစွာ အကဲဖြတ်နိုင်ခဲ့ခြင်း ဖြစ်၏။ ဤစွမ်းဆောင်ရည်မှာ ကျန်းဟယ်ထက် အဆပေါင်းများစွာ သာလွန်နေချေပြီ။
ဤအချက်အလက်အရ ကျောက်လိပ်ပြာမှာ မည်မျှပင် ထူးခြားနေပါစေ၊ ဖောက်သည်နှင့် ဂုဏ်သတ္တိချင်း ပြင်းထန်စွာ တိုက်ခိုက်နေသည်။ ထို့ကြောင့်ပင် လင်းကျင်းက ဖောက်သည်အတွက် အမှားအယွင်းမရှိစေမည့် လေဝိညာဉ်မြေခွေးကိုသာ အကြံပြုခဲ့ခြင်း ဖြစ်၏။
အကယ်၍သာ ကျန်းဟယ်၏ အကြံပြုချက်အတိုင်း ကျောက်လိပ်ပြာနှင့် သွေးကတိစာချုပ် ချုပ်လိုက်ပါက နောင်တစ်ချိန်တွင် ဂုဏ်သတ္တိများ အပြင်းအထန် တိုက်ခိုက်မှုကြောင့် နောင်တရလျှင်ပင် အချိန်နှောင်းသွားပေလိမ့်မည်။ တွေးကြည့်ရုံနှင့်ပင် ကြောက်စရာ ကောင်းလှ၏။
ပြိုင်ပွဲ၏ အောင်နိုင်သူမှာ ရှင်းလင်းသွားခဲ့ပြီ ဖြစ်သည်။ လင်းကျင်းကို အထင်သေးခဲ့သော ဖောက်သည်များပင် သူ့ထံ လာရောက်၍ စိတ်ရင်းဖြင့် ကျေးဇူးတင်ကြလေသည်။ ကျန်းဟယ်မှာမူ မျက်နှာတစ်ခုလုံး နီမြန်းကာ ရှက်လွန်းသဖြင့် ဦးရေပြားပင် ပွက်ပွက်ဆူလာသလို ခံစားနေရသည်။ သူသည် လင်းကျင်းအား အရှက်ခွဲရန် ကြံစည်ခဲ့သော်လည်း ယခုမူ မိမိကိုယ်မိမိသာ အရှက်ခွဲမိသလို ဖြစ်သွားခဲ့ချေပြီ။ သို့သော် အရှုံးမှာ အရှုံးပင် ဖြစ်သည်။ လူပုံအလယ်တွင် ဖြစ်သဖြင့် သူ မည်မျှပင် မျက်နှာပြောင်ပါစေ ငြင်း၍ မရနိုင်တော့ပေ။ ထို့ကြောင့် သူက အံကြိတ်ကာ လင်းကျင်းအား ပြောလိုက်၏။
“ငါ... ငါ ရှုံးပါတယ်”
သူသည် ဤနေရာမှ အမြန်ဆုံး ထွက်ပြေးချင်နေပြီ ဖြစ်သည်။ သို့သော် လင်းကျင်းက သူ့ကို တားဆီးလိုက်ပြီး အသာအယာ ပြုံးလျက် ပြောလိုက်သည်။
“မင်း မသွားခင် အမှားဝန်ခံဖို့ ကျန်သေးတယ်လေ”
ကျန်းဟယ်မှာ ဒေါသနှင့် အရှက်ကြောင့် လက်သီးကို တင်းတင်းဆုပ်ထားမိသော်လည်း ဤအခြေအနေကို သူ အောင့်အည်းသည်းခံရပေမည်။
“ငါ မှားသွားပါတယ်”
“ဘာလဲ... မင်းအသံက အရမ်းတိုးနေတာပဲ၊ ငါ မကြားရဘူး” လင်းကျင်းက လှောင်ပြောင်လိုက်သည်။
“ငါ မှားသွားပါတယ်”
ကျန်းဟယ်က အော်ဟစ်ဝန်ခံလိုက်ရတော့သည်။ သူ ငိုချင်စိတ်ပင် ပေါက်နေချေပြီ။ ယနေ့တွင် သူသည် လူပုံအလယ်၌ အရှက်တကွဲ ဖြစ်ခဲ့ရပြီ မဟုတ်ပါလား။
လင်းကျင်းက ကျေနပ်စွာ ခေါင်းညိတ်လိုက်ပြီး-
“မှားမှန်းသိရုံနဲ့ မလုံလောက်သေးဘူး၊ မင်းရဲ့ အကျင့်တွေကို ပြင်ဖို့လည်း ကြိုးစားဦး။ ငါကတော့ အလုပ်များနေလို့ မင်းကို အများကြီး မပြောတော့ဘူး။ မင်းဘာသာမင်း ပြန်ဆင်ခြင်ပေတော့” ဟု ဆိုကာ လူအုပ်ကြီးကြားမှ ခန့်ညားစွာ ထွက်ခွာလာခဲ့လေသည်။
အပြင်ရောက်သောအခါ လင်းကျင်းမှာ အားရပါးရ ရယ်မောလိုက်မိ၏။
တကယ်တော့ သူသည် သားရဲပြတိုက်ထဲတွင် မြင်တွေ့ရသည့် အချက်အလက်များ၏ အနည်းငယ်ကိုသာ ရေးသားခဲ့ခြင်း ဖြစ်သည်။ အကယ်၍ အကုန်လုံးကိုသာ ချရေးလိုက်ပါက လူများမှာ အံ့သြလွန်း၍ သေပင်သေသွားနိုင်ပေသည်။ မိမိ၏ လျှို့ဝှက်ချက်ကို မပေါက်ကြားစေရန် သူက သတိထားနေခြင်း ဖြစ်၏။
လင်းကျင်းသည် ကံကြမ္မာကို ယုံကြည်သူ ဖြစ်သည်။ သူသည် ဤကမ္ဘာသို့ မည်သို့ပြန်ရမည်မှန်း မသိဘဲ ရောက်ရှိလာခဲ့ခြင်းဖြစ်ရာ ဤနေရာတွင်သာ ပျော်ရွှင်စွာ နေထိုင်သွားရန် ဆုံးဖြတ်ထားသည်။ သူသည် စိတ်ကို အကောင်းမြင်ဘက်သို့ ပြောင်းလိုက်၏။ အကောင်းမြင်စိတ် မရှိဘဲနှင့်လည်း သူ ဘာလုပ်နိုင်ဦးမည်နည်း။
သူ လမ်းအနည်းငယ် လျှောက်လာချိန်တွင် ကျောက်ရင်က အနောက်မှ ပြေးလိုက်လာခဲ့သည်။
“ဆရာလင်း”
ကျောက်ရင်မှာ အလွန် စိတ်လှုပ်ရှားနေ၏။ သူမ၏ ဘဝရည်မှန်းချက်မှာ ထူးချွန်သော သားရဲအကဲဖြတ်ဆရာတစ်ဦး ဖြစ်လာရန် ဖြစ်သည်။ ယနေ့ လင်းကျင်း ပြသသွားသော စွမ်းရည်မှာ သူမအား အတွေးသစ် အမြင်သစ်များ ပေးလိုက်သကဲ့သို့ပင်။
ယခင်က လင်းကျင်းသည် အရည်အချင်း မရှိသူဟု သူမ ယုံကြည်ခဲ့သမျှမှာ ကောလာဟလများသာ ဖြစ်ကြောင်း ယခုမှ သိလိုက်ရတော့သည်။ လင်းကျင်းအား အထင်သေးခဲ့မိသည့်အတွက် သူမ မိမိကိုယ်မိမိ ရှက်မိသည်။
“ဆရာလင်း... အဲဗာလက်စတင်းမြို့ကို သွားဖို့အတွက် တစ်ခုခု ပြင်ဆင်ဖို့ လိုဦးမလားဟင်... ခရီးက တစ်ညအိပ် ကြာနိုင်တယ်ရှင့်”
ယခင်က ကျောက်ရင်သည် လင်းကျင်းနှင့်အတူ ခရီးသွားရမည်ကို စိတ်ကုန်နေခဲ့သော်လည်း ယခုမူ လေးစားသမှုဖြင့် မေးမြန်းနေခြင်း ဖြစ်၏။ လင်းကျင်းက ခေတ္တစဉ်းစားပြီးနောက် သူ၏ အဖော်သားရဲ 'ရှောင်ဟော့' ကိုသာ ခေါ်သွားရန် ဆုံးဖြတ်လိုက်လေသည်။
အဲဗာလက်စတင်းမြို့မှာ မေပယ်မြို့၏ လက်အောက်ခံမြို့ တစ်မြို့ဖြစ်ပြီး ခရီးလမ်းမှာ အနည်းငယ် ကြမ်းတမ်းလှပေသည်။ တောင်တက် တောင်ဆင်းနှင့် ကွေ့ကောက်သော လမ်းများကို ဖြတ်ကျော်ပြီးမှသာ ထိုမြို့သို့ ရောက်ရှိနိုင်မည် ဖြစ်သည်။