ကောင်းကင်ဘုံဖီးနစ်ထာဝရမူလခန္ဓာကိုယ် သေးငယ်သောအောင်မြင်မှု ရရှိခြင်း

[နတ်ဘုရားစိတ်ဝိညာဉ်အဆင့် ကြက်သွေးရောင်မျက်လုံး အမှောင်ဖီးနစ်ကို သတ်ဖြတ်ပြီး။ စုစုပေါင်း နတ်ဆိုးသက်တမ်း ၁၂၃၀၀၀ နှစ်၊ ကျန်ရှိသော နတ်ဆိုးသက်တမ်း ၃၃၀၀၀ နှစ်၊ စုပ်ယူခြင်းပြီး]

[ကျန်ရှိသော နတ်ဆိုးသက်တမ်း: ၂၅၆၀၀၀ နှစ်]

ရှန်းယီသည် ကြက်သွေးရောင်မျက်လုံး အမှောင်ဖီးနစ်၏အလောင်းကို သူ၏ သိုလှောင်ရတနာထဲသို့ ထည့်သိမ်းလိုက်သည်။

ထို့နောက် သူ၏ရှေ့သို့ ဆင်းသက်လာသော နီကျွင်းကို တစ်ချက်လှမ်းကြည့်လိုက်၏။ နီကျွင်း၏ နန်ယန်ဂိုဏ်းဝတ်ရုံမှာ စုတ်ပြဲနေသော်လည်း သူ၏ ဒဏ်ရာများမှာ သုံးလေးဆယ်ရာခိုင်နှုန်းခန့် သက်သာသွားပြီဖြစ်၍ ပြဿနာကြီးကြီးမားမားမရှိတော့ပေ။

ထို့နောက် သူသည် ကောင်းကင်ယံရှိ နေရာတစ်ခုသို့ မော့ကြည့်လိုက်၏။

ရှန်းယီ အကြည့်ကို ရုပ်သိမ်းလိုက်ပြီး ခေါင်းကို ညင်သာစွာညိတ်ပြလိုက်သည်။ "သွားပြီး ဒဏ်ရာတွေကို အရင်ကုသလိုက်ဦး"

“…”

နီကျွင်းသည် ဤမျှအရေးကြီးသော အခြေအနေမျိုးတွင် သူဘာကြောင့်ရုတ်တရက် ပျောက်ကွယ်သွားခဲ့ရသည်ကို ရှင်းပြချင်နေခဲ့သည်။

သို့သော် တစ်ဖက်လူက သူ့ကိုမေးခွန်းထုတ်မည့် အရိပ်အယောင်မျှမပြသည်ကို အံ့သြစွာ တွေ့လိုက်ရ၏။

သူ ခဏမျှတုံ့ဆိုင်းသွားပြီးနောက် လမ်းဖယ်ပေးရန် ဘေးသို့ဆင်းပေးလိုက်ကာ စိတ်ထဲမှတိုးတိုးလေး သက်ပြင်းချလိုက်မိသည်။

ဤသည်ကား ရှန်းယီနှင့် သူ၏ဆရာသခင်ကြားမှ အကြီးမားဆုံး ကွာခြားချက်ပင် ဖြစ်ကောင်းဖြစ်လိမ့်မည်။

တစ်ဖက်လူသည် သူ့အတွက် အလုပ်လုပ်ပေးရန် မည်သူ့ကိုမျှ ထိန်းချုပ်ဖို့ ဘယ်တုန်းကမှ မတွေးခဲ့ပေ။ သူသည် လွတ်လပ်သော ဝိညာဉ်တစ်ခုနှင့် ပိုတူသည်။ လာချင်လျှင် လာနိုင်သည်။ မလာချင်လျှင်လည်း အတင်းအကျပ် မတိုက်တွန်းပေ။ သူသည် မိမိကိုယ်ကိုသာ ပို၍ မျှော်လင့်ချက်ထားတတ်သူဖြစ်သည်။

ထို့အပြင် သူသည် အခြားသူများ၏ကိစ္စများကို တွေးတောရမည်ကိုလည်း အလွန်ပျင်းရိလှသည်။

အကယ်၍ ယနေ့ သူတို့နှစ်ယောက်သာ နေရာချင်း လဲလိုက်မည်ဆိုပါက... အောက်ဘက်တွင် ရပ်နေသူက သူ၏ဆရာသခင်ဖြစ်ပြီး သူ့ကို ရှန်းယီက ခေါ်ဆောင်သွားခြင်းဆိုပါစို့။ သူ၏ဆရာသခင်သည် သေချာပေါက် သံသယဝင်မည်ဖြစ်ပြီး ရှန်းယီပြောခဲ့သမျှ စကားတစ်ခွန်းမကျန် ပြန်လည်သတင်းပို့ခိုင်းမှသာ စိတ်အေးမည်ဖြစ်သည်။

လူအများ၏စောင့်ကြည့်နေမှုအောက်တွင်ပင်။

ရှန်းယီသည် မူလအရောင်ကိုပင် မမှတ်မိနိုင်လောက်အောင် သွေးနှင့်အသားစများ ပေကျံနေသော သူ၏ဆေးမီးဖိုကို ထုတ်ယူကာ ခြံဝင်း (က) ထဲသို့ အလျင်အမြန် ဝင်သွားတော့သည်။

နောက်ဆုံးတော့ သူသည် သင့်တော်မှန်ကန်သော မီးဓာတ်ပါဝင်သည့် ငှက်နတ်ဆိုးသွေးအဆီအနှစ်ကို ရရှိခဲ့ပြီဖြစ်သည်။

လွန်ခဲ့သော အချိန်များက နေ့ရောညပါ အဆက်မပြတ် ဆေးဖော်စပ်ခဲ့ရခြင်းမှာ အကျိုးအမြတ် ထွက်ပေါ်လာခဲ့ပြီ။ အဆင့်နိမ့် ထျန်းဟွမ်ဆေးလုံးအပုံလိုက်ကြီးကို ဘေးဖယ်ထားလိုက်လျှင်ပင်၊ အနည်းဆုံးတော့ ယခုအချိန်တွင် ရှန်းယီသည် ဤဆေးညွှန်းကို အလွန်ကျွမ်းကျင်ရင်းနှီးနေပြီ ဖြစ်သည်။

စတုတ္ထလှိုဏ်ဂူထဲမှ သင့်တော်သော မိုးမြေရတနာအချို့ကို ဖြုန်းတီးပစ်လိုက်ရခြင်းကတော့ ပေးဆပ်လိုက်ရသော တန်ဖိုးပင်။

သို့သော် ကိစ္စမရှိပေ။ သူ နန်ယန်ဂိုဏ်းမှ ထွက်ခွာနိုင်သရွေ့ ဤအရာများ ပြတ်လပ်သွားစရာ အကြောင်းမရှိတော့ပေ။

"ကျွတ်"

ရှန်းယီသည် ဆေးနီးဖိုပေါ်ရှိ အက်ကွဲကြောင်းငယ်လေးများကို ကြည့်ရင်း ဆေးမီးဖိုကို သန့်စင်အောင် သုတ်သင်လိုက်ကာ ခေါင်းခါလိုက်မိသည်။

နန်ယန်ဂိုဏ်းမှ ချန်ထားခဲ့သော ဤရတနာများမှာ တကယ်ကို ကောင်းမွန်လှ၏။

ဤဆေးမီးဖိုဆိုလျှင် အကြိမ်ပေါင်းများစွာ ပေါက်ခွဲခဲ့သော်လည်း ကျိုးပဲ့သွားခြင်း မရှိပေ။ ၎င်းသည် ဖီးနစ်နတ်ဆိုး၏ဓားတိုရတနာကိုလည်း တစ်ချက်တည်းဖြင့် ရိုက်ချိုးနိုင်ခဲ့ပြီး လူကိုထုရိုက်ရန်အတွက်လည်း တော်တော်လေး အသုံးတည့်သည်။

အနာဂတ်တွင် ၎င်းကို ဂရုတစိုက် အသုံးပြုရပေမည်။

မွေးနေ့ပွဲအတွက် အသုံးပြုခဲ့သော ထိုဝတ်ရုံသာ မပျက်စီးခဲ့လျှင် ပိုကောင်းမည်။

သူ၏စိတ်သည် ဆေးဖော်စပ်ခြင်းတွင်သာ အာရုံစိုက်ထားခဲ့လျှင်တောင် ဖီးနစ်နတ်ဆိုး၏ အော်ရာကို အစောကြီးကတည်းက သူ အာရုံခံမိသင့်သည်။ ကြီးမားသော ဝင်္ကပါကြီးကို ဖျက်ဆီးပစ်ဖို့ သူ့ကို သူ ဘယ်လိုလုပ်အခွင့်အရေး ပေးလိုက်မိတာပါလိမ့်။

ရှန်းယီသည် ကျွမ်းကျင်စွာဖြင့် ကောင်းကင်ဘုံရတနာအမျိုးမျိုးကို ထုတ်ယူလိုက်သည်။

ထို့နောက် ငွေရောင်ခေါင်းလောင်းထဲမှ သူ မကြာသေးမီက ထုတ်ယူထားသော ဖီးနစ်နတ်ဆိုး၏ သွေးအဆီအနှစ်ကို ထုတ်ယူကာ ဆေးမီးဖိုထဲသို့ တစ်ခုပြီးတစ်ခု ထည့်လိုက်သည်။

နောက်တစ်စက္ကန့်တွင် များပြားလှသော လီမီးတောက်များကို ထဲသို့ လောင်းထည့်လိုက်သည်။

မီးအပူချိန်ကို ထိန်းချုပ်ခြင်းဖြစ်စေ၊ ဆေးပင် အမျိုးမျိုးကို အဆီအနှစ်ထုတ်ယူခြင်းဖြစ်စေ သူသည် ပြီးပြည့်စုံသော အခြေအနေတစ်ခုသို့ ရောက်ရှိနေပြီဖြစ်သည်။

သေချာသည်မှာ ဤသည်က ထျန်းဟွမ်ဆေးလုံး အတွက်သာ ကန့်သတ်ထားခြင်းဖြစ်သည်။

ဖီးနစ်နတ်ဆိုး သွေးအဆီအနှစ်ထဲရှိ နတ်ဆိုး အငွေ့အသက်များ အားလုံး ကင်းစင်သွားစေရန် ဤဆေးအသုတ်ကို ဖော်စပ်ရန် ဆယ့်ကိုးရက်တိတိ အချိန်ယူခဲ့ရသည်။

နောက်ဆုံးတွင် ဆေးမီးဖို၏ တုန်ခါမှု ရုတ်တရက် ရပ်တန့်သွားသည်။

၎င်းသည် လှိုင်းတံပိုးကဲ့သို့ ပူပြင်းသော အပူရှိန်များကို လွှင့်ထုတ်လျက်အသံကျယ်လောင်စွာဖြင့် အောက်သို့ ကျဆင်းသွားသည်။

ရွှေနီရောင်အလင်းတန်းများသည် ဆေးမီးဖို၏ အက်ကွဲကြောင်းများမှလျှံကျလာပြီး တစ်ချိန်တည်းမှာပင် တည်ငြိမ်‌သော ဖီးနစ်ငှက်၏ အော်မြည်သံတစ်ခု ဖြည်းညှင်းစွာ ထွက်ပေါ်လာ၏။

ကြက်သွေးရောင် ဆေးလုံးတစ်လုံးသည် ဆေးမီးဖိုထဲမှ ညင်သာစွာ မျောလွင့်ထွက်လာသည်။

လက်မအရွယ်အစားရှိသော ထိုဆေးလုံးပေါ်တွင် အသက်ဝင်နေသကဲ့သို့ ထင်ရသော ရွှေဖီးနစ်ငှက်တစ်ကောင်ကို ရေးဆွဲထားပြီးကူးခတ်နေသကဲ့သို့ပင်။

"ဟင်"

ရှန်းယီသည် ၎င်းကို လက်ချောင်းနှစ်ချောင်းဖြင့် ကောက်ယူကာ သေချာစွာ စစ်ဆေးကြည့်လိုက်၏။ ယခင်က သူဖော်စပ်ခဲ့သော ဆေးလုံးများနှင့် ဘာကြောင့် ဤမျှကွာခြားနေရသနည်း။

၎င်းသည် ဆေးဖော်စပ်နည်းမှတ်တမ်းပါ ဖော်ပြချက်များနှင့်လည်း အပြည့်အဝ ကိုက်ညီမှုမရှိပေ။

ပြဿနာတစ်ခုခုများ ရှိနေနိုင်မည်လော။

ရှန်းယီသည် ၎င်းကို ပါးစပ်ထဲသို့ ထည့်လိုက်ပြီးနောက်၊ သူဖွင့်ထားပြီးဖြစ်သော စနစ်မျက်နှာပြင်ပေါ်တွင် နတ်ဆိုးသက်တမ်းများကို ကောင်းကင်ဘုံဖီးနစ်ထာဝရမူလခန္ဓာကိုယ်ထဲသို့ စီးဆင်းစေလိုက်သည်။

[ ၁ နှစ်၊ သင်သည် ထျန်းဟွမ်ရတနာဆေးလုံးကို မြိုချလိုက်ပြီး၊ ၎င်းအတွင်းရှိ ကြက်သွေးရောင်မျက်လုံးအမှောင်ဖီးနစ် သွေးအဆီအနှစ်နှင့် တန်ဖိုးကြီး ဆေးပင် ဒါဇင်ပေါင်းများစွာ၏အကူအညီဖြင့် ဤကြီးမားလှသော အော်ရာကို သင့်ခန္ဓာကိုယ်အတွင်းသို့ အပြည့်အဝပေါင်းစပ်နိုင်ရန် မျှော်လင့်နေသည်။]

[ ၁၇ နှစ်၊ သင်သည် ဆေးအာနိသင်များကို အောင်မြင်စွာ ချေဖျက်နိုင်ခဲ့ပြီး ဤဆေးလုံးကြီးကို သင့်ဝိညာဉ်ကိုယ်ထည်ထဲသို့ စုပ်ယူနိုင်ခဲ့သည်။ နောက်တစ်ဆင့်မှာ ၎င်းအတွင်းရှိ နတ်ဆိုးသွေးများကို သန့်စင်ရန်အချိန်ကြာမြင့်စွာ အသုံးပြုရမည်ဖြစ်သည်။]

စနစ်မျက်နှာပြင်ပေါ်ရှိ အချက်ပြချက်များကို ကြည့်ရင်း

ရှန်းယီသည် ၎င်းကို ဆက်လက် ဆင်ခြင်တွက်ချက်ခွင့်ပြုလိုက်ပြီး သူ ယခင်က သိမ်းဆည်းထားသော နတ်ဆိုး၏ အသွေးအသားများကို ထုတ်ယူလိုက်၏။

သူသည် နတ်ဆိုးနှိမ်နှင်းကျောက်တိုင်နှစ်ခုကို ဖန်တီးရန် နတ်ဆိုးသက်တမ်း နှစ်သောင်းကို အသုံးပြုခဲ့သည်။

အသွေးနှင့်အသားများကို စုပ်ယူပြီးသွားသည်နှင့်အမျှ၊ မျက်ခုံးနှစ်ခုကြားရှိ ရွှေရောင်အမှတ်အသားပေါ်မှ မျက်လုံးမပါသောသားရဲကြီးနှင့် အတောင်ပံဖြန့်ထားသော အမှောင်ဖီးနစ်ရုပ်တုတို့သည် လျင်မြန်စွာ ပုံပေါ်လာသည်။

အခြား နတ်ဆိုးငယ်များကို သူ ဂရုမစိုက်သော်လည်း၊ ဖီးနစ်နတ်ဆိုးနှင့် ရှန်းဖုန်းဟူသော ဤနတ်ဆိုးဧကရာဇ်ကြီး နှစ်ပါးကို ပြန်လည်ဖန်တီးရခြင်းမှာ သေချာပေါက် တန်ဖိုးရှိလှသည်။

နတ်ဆိုးမူလများကို တစ်ခုပြီးတစ်ခု ကျွေးမွေးလိုက်၏။

ရှန်းဖုန်းသည် ပြီးပြည့်စုံသည်ဟု သတ်မှတ်နိုင်ရန် မူလခုနစ်ခုတိတိကို စားသုံးခဲ့ရသည်။

ဆန့်ကျင်ဘက်အားဖြင့်၊ ရှန်းယီကို အနည်းငယ် အံ့အားသင့်စေခဲ့သည်မှာ ဖီးနစ်နတ်ဆိုးပင် ဖြစ်သည်။ နတ်ဘုရားစိတ်ဝိညာဉ်အဆင့်၏ အထွတ်အထိပ်တွင်ရှိသော ဤနတ်ဆိုးကြီးသည် အမှန်တကယ်ပင် မူလတစ်ခုသာ လိုအပ်သည်လော။

အကြိမ်ပေါင်းများစွာ ကျွေးမွေးပြီးနောက်တွင်

ရှန်းယီသည် အတွေ့အကြုံအချို့ ရရှိခဲ့သည်။

နတ်ဆိုးမူလ၏ အဓိကရည်ရွယ်ချက်မှာ နတ်ဆိုးဝိညာဉ်ကို ၎င်း၏အသိစိတ် ပြန်လည်တည်ဆောက်ရန် ကူညီပေးခြင်းဖြစ်သည်။ နတ်ဆိုးတစ်ကောင်သည် အသက်ရှည်လေလေ၊ ၎င်း၏ဝိညာဉ်က ပိုမိုအားကောင်းလေလေဖြစ်ပြီး မူလများ ပိုမိုလိုအပ်လေလေ ဖြစ်သည်။

နှစ်ကိုးသောင်းသက်တမ်းရှိသော ဤဖီးနစ်နတ်ဆိုး၏ဝိညာဉ်မှာ အံ့သြစရာကောင်းလောက်အောင် အားနည်းနေပြီး ချင်းဟွာ၏ ဝိညာဉ်နှင့် ဆင်တူနေ၏။

အကယ်၍ ဤအချက်ကိုသာ သူ ကြိုသိခဲ့လျှင်၊ နတ်ဆိုးနှိမ်နှင်းရွှေမြှားကို ချွေတာထားပြီး သူ့ကို လီမီးတောက်နှလုံးသားလောင်ကျွမ်းလက်ဝါးဖြင့်သာ သတ်ပစ်ခဲ့မည်။

ရှန်းယီသည် ထိုနတ်ဆိုးဝိညာဉ်နှစ်ခုကို ကျောက်တိုင်များအတွင်းသို့ ထည့်သွင်းလိုက်၏။

အရောင်မွဲခြောက်နေသော မီးခိုးရောင် ရုပ်တုများသည် ချက်ချင်းပင်အရောင်အသွေး စုံလင်လာသည်။

ဤအချိန်တွင် စနစ်မျက်နှာပြင်ပေါ်ရှိ တွက်ချက်မှုမှာ တိုးတက်မှု ရရှိသွားပုံရသည်။

ရှန်းယီသည် ထျန်းဟွမ်ဆေးလုံးများစွာကို စားသုံးခြင်းမှ သူ၏စိတ်ဝိညာဉ်ခန္ဓာကိုယ်အတွင်း စုဆောင်းထားသော ဆေးအာနိသင်များအားလုံးသည် ဖီးနစ်ငှက်တစ်ကောင်၏လမ်းညွှန်မှုကို ခံရကာ သူ၏ခန္ဓာကိုယ်အတွင်း လှည့်လည်သွားလာနေသကဲ့သို့ ရုတ်တရက် ခံစားလိုက်ရသည်။

သူ၏ခြေလက်များနှင့် အရိုးများကို အဆက်မပြတ် သန့်စင်ပေးနေသည်။

[နှစ် ၃၇၀၀၊ သင်သည် ဆေးအာနိသင် အားလုံးကို စုပ်ယူပြီးသွားကာ ထိုမျက်လုံးနီ အမှောင်ဖီးနစ် သွေးအဆီအနှစ်အငွေ့အသက်လေးကို အပြည့်အဝ ချေဖျက်နိုင်ခဲ့သည်။ ကောင်းကင်ဘုံဖီးနစ်ထာဝရမူလခန္ဓာကိုယ်တွင် မှတ်တမ်းတင်ထားသော နည်းလမ်းများအရ၊ အတားအဆီးကို ချိုးဖျက်ရန် ၎င်းတို့ကို သင်လှုံ့ဆော်အသုံးပြုနေသည်။]

[နှစ် ၇၆၀၀၊ နှစ်တစ်သောင်းနီးပါး စုဆောင်းထားမှုသည် နောက်ဆုံးတွင် အသီးအပွင့်များ ထွက်ပေါ်လာပြီဖြစ်သည်။ သင်သည် ပင်လယ်လေးစင်းကိုလှည့်လည်သွားလာနေသော ကောင်းကင်ဘုံကိုးထပ်မှ ဖီးနစ်ငှက်တစ်ကောင်အဖြစ် အသွင်ပြောင်းသွားသကဲ့သို့ ခံစားရသည်။]

[ဟင်းလင်းပြင်လျှောက်လှမ်းခြင်း။ ကောင်းကင်ဘုံဖီးနစ်ထာဝရမူလခန္ဓာကိုယ်: သေးငယ်သောအောင်မြင်မှု]

တစ်ခဏအတွင်းမှာပင်၊ ရှန်းယီ၏ခန္ဓာကိုယ်ပေါ်ရှိ ရွှေရောင်အလင်းတန်းများ အားလုံးသည် စတင်စုစည်းလာကာ နောက်ဆုံးတွင် သူ၏တာအိုဝိညာဉ်၏ကလီစာငါးခု အလယ်ဗဟို၌ ကြက်သွေးရောင်မီးတောက်များဖြင့် ဝန်းရံထားသော ရွှေရောင်ဖီးနစ်ဥတစ်လုံးအဖြစ်သို့ ပြောင်းလဲသွား၏။

၎င်းသည် ရှန်းယီ၏အသက်ရှူသံနှင့်အတူ အနည်းငယ်တုန်ခါနေပြီး ၎င်း၏ သက်စောင့်အင်အားမှာ သူနှင့် နီးကပ်စွာ ယှက်နွယ်ချိတ်ဆက်နေသည်။

သူ့တွင် ဒုတိယမြောက် အသက်တစ်ချောင်း ရရှိထားသကဲ့သို့ပင်။

ရွှေရောင်အလင်းတန်းများသည် နောက်ဆုံးတွင် မျက်နှာပြင်ပေါ်၌ ကျန်ရစ်မနေတော့ဘဲ အတွင်းပိုင်းသို့ ဝင်ရောက်သွားကာ တာအိုဝိညာဉ်၏ ကလီစာငါးခုနှင့် သူ၏ခြေလက်၊ အရိုးများကို ချိတ်ဆက်ပေးပြီး ရှန်းယီ၏ အစိတ်အပိုင်းတစ်ခု ဖြစ်လာတော့သည်။

"ဟူး"

ရှန်းယီသည် ဤမျှနှင့် ကျေနပ်မနေဘဲ အနန္တအင်ပါယာနတ်ဆိုးနန်းတော်အတွင်းသို့ နတ်ဆိုးသက်တမ်းများကို ဆက်လက် စီးဆင်းစေလိုက်၏။

[ ၁ နှစ် ၊ သင်သည် ကျောက်တိုင်ရုပ်တုနှစ်ခုကို တာအိုနန်းတော်အတွင်းသို့ ထည့်သွင်းလိုက်ပြီး နတ်ဆိုးသွေးမျိုးဆက်များမှတစ်ဆင့် တာအိုမှော်စွမ်းရည်အသစ်များကို နားလည်သဘောပေါက်လာသည်။]

[နတ်ဆိုးတစ်သောင်းဦးညွှတ်ခြင်း။ကြက်သွေးရောင်နေမင်း]

[ ၇၂ နှစ်၊ နတ်ဆိုးဧကရာဇ် ရှန်းဖုန်းနှင့် ရွှေတောင်ပံအစင်းကိုးခု နတ်ဆိုးဧကရာဇ်တို့၏ သွေးမျိုးဆက်များသည် တူညီမှုများရှိကြောင်း သင်ရှာဖွေတွေ့ရှိခဲ့ပြီး တာအိုနည်းစနစ်နှစ်ခုကို ပေါင်းစပ်ရန် ကြိုးစားခဲ့သည်။]

[နတ်ဆိုးတစ်သောင်း ဦးညွှတ်ခြင်း။ ရွှေရောင်လေဆင်နှာမောင်းဝိညာဉ်ဆုပ်ကိုင်ခြင်း]

[သင့်တာအိုနန်းတော်သည် ပိုမိုတည်ငြိမ်လာပါပြီ။]

[ကျန်ရှိသော နတ်ဆိုးသက်တမ်း: ၁၄၈၃၀၀ နှစ်]

ယခုအခါ တာအိုနန်းတော်အတွင်း၌ကျောက်တိုင် ရုပ်တုလေးခု ရှိနေပြီဖြစ်သည်။ တာအိုနည်းစနစ်အသစ်များ ဖန်တီးခြင်းအပြင်၊ အခြားမည်သည့်နေအတွက် အသုံးပြုရမည်ကို ရှန်းယီ ယာယီအားဖြင့် မသိသေးပေ။

နန်ယန်ဂိုဏ်းမှထွက်ခွာပြီး ပိုမိုကျယ်ပြန့်သော ကမ္ဘာကြီးကို တွေ့ကြုံခံစားရပြီးမှသာ သူ အနည်းငယ် နားလည်သဘောပေါက်လာနိုင်မည် ။

ဤတစ်ကြိမ်တော့ သူ တကယ်ပင် လမ်းဆုံးကို ရောက်သွားခဲ့ပြီဖြစ်သည်။

ရှန်းယီ ဖြည်းညှင်းစွာမတ်တပ်ရပ်လိုက်ပြီး တံခါးဆီသို့ လျှောက်သွားလိုက်၏။