အမဲလိုက်ပွဲ အဆုံးသတ်ခြင်း

ရွှီရှင်းသည် သူ၏ရှေ့ရှိ တောဝက်ကို ခွဲစိတ်နေသည်။

ဤတောဝက်သည် အကြောင်းတစ်စုံတစ်ရာကြောင့် တောအုပ်ထဲတွင် တစ်ကောင်တည်း ရှိနေခြင်းဖြစ်သည်။

သူသည် ငွေရောင်ဘုရင်ကို စီးနှင်းပြီး လှံဖြင့် အားကုန်ထိုးကာ တောဝက်၏ဦးခေါင်းကို တွန့်ဆုတ်ခြင်းမရှိဘဲ ရယူနိုင်ခဲ့သည်။

ယခုအခါ တောဝက်များသည် သူ့အတွက် အန္တရာယ် လုံးဝမပေးနိုင်တော့ချေ။

"ဝိုး... ကံကောင်းခြင်းငါးရဲ့ အာနိသင်က တကယ်ပြနေပြီပဲ။"

ဤတောဝက်ထံမှ အပြာရောင်အဆင့် သားရဲအရေခွံ နောက်တစ်ခု ရရှိခဲ့သည်။

ယခုဆိုလျှင် ရွှီရှင်းတွင် အပြာရောင်အဆင့် အရေခွံ နှစ်ခုနှင့် အပြာရောင်အဆင့် အရိုး နှစ်ခု ရှိနေပြီဖြစ်သည်။

အပြာရောင်အဆင့် သားရေချပ်ဝတ် အစုံလိုက်ဖန်တီးနိုင်ရန် တစ်မျိုးလျှင် နှစ်ခုစီသာ လိုတော့သည်။

ယနေ့တွင် သားရေချပ်ဝတ်အတွက် လိုအပ်သော ကုန်ကြမ်းအားလုံး စုဆောင်းနိုင်ရန် သူ ရည်မှန်းထားသည်။

ထိုချပ်ဝတ်တန်ဆာ အစုံလိုက်ဝတ်ဆင်ပါက မည်သည့်အာနိသင်များ ရှိမည်ကို သူ သိချင်နေမိသည်။

ကုန်ကြမ်းများကို ကျောပိုးအိတ်ထဲ သိမ်းဆည်းပြီးနောက် ရွှီရှင်း၏ နာရီ တုန်ခါလာသည်။

၎င်းမှာ လီဝမ်ရှီးထံမှ ပြန်စာဖြစ်သည်။

"ကျွန်မ အပြာရောင်အဆင့် ဂေါ်ပြားတစ်ခု လုပ်လိုက်ပြီ။ အဲဒါမှာ အပင်ပြောင်းစိုက်တဲ့ စွမ်းရည် တကယ်ပါတာ။ ဒါပေမဲ့ အောင်မြင်မှုနှုန်းက နည်းတယ်၊ ၅၀ ရာခိုင်နှုန်းပဲ ရှိတယ်။ ဒါပေမဲ့ မျိုးစေ့တူးဖော်နိုင်စွမ်းကတော့ ၁၀၀ ရာခိုင်နှုန်း ဖြစ်သွားပြီ။"

အောင်မြင်မှုနှုန်း ၅၀ ရာခိုင်နှုန်းပဲလား... ကံကောင်းခြင်းငါးရဲ့ အာနိသင်က ဒီအောင်မြင်မှုနှုန်းအပေါ် သက်ရောက်မှုရှိမလား မသိဘူး။

သို့သော်လည်း အောင်မြင်မှုနှုန်း ၁၀၀ ရာခိုင်နှုန်း မရှိသရွေ့ ရွှီရှင်းအနေဖြင့် အပင်ပြောင်းစိုက်ရန် ရွေးချယ်မည်မဟုတ်ချေ။

လက်ရှိရထားသော အသီး တစ်ရာကျော်မှာ လောလောဆယ် လုံလောက်နေပြီဖြစ်ရာ အပင်ပြောင်းစိုက်ရန် အလောတကြီး မလိုအပ်သေးပေ။

ဤအပင်ပြောင်းစိုက်သည့် စွမ်းရည်မှာ အလွန်ကောင်းမွန်လှသည်။

အကယ်၍ သူ့တွင် ၁၀၀ ရာခိုင်နှုန်း အောင်မြင်မည့် ကိရိယာသာ ရှိပါက မြေသြဇာကောင်းသော မြေဆီလွှာ ကို အသုံးပြု၍ အသီးနှံအပင်မျိုးစုံကို အဆက်မပြတ် စိုက်ပျိုးနိုင်မည်ဖြစ်သည်။

ထိုအခါ သစ်သီးစူပါမားကတ်တစ်ခု ဖွင့်၍ပင် စီးပွားရှာနိုင်ပေလိမ့်မည်။

ထိုအတွေးများကို ခေတ္တဘေးဖယ်ထားပြီး ရွှီရှင်းက လီဝမ်ရှီးထံ ပြန်စာပို့လိုက်သည်။

"အိုကေ သိပြီ။ ဆက်ပြီး ကြိုးစားထားဦး၊ ဒီတစ်ခါလည်း ထိပ်ဆုံး ၁၀ ယောက်ထဲ ပါအောင်လုပ်နော်။"

လီဝမ်ရှီးက ချက်ချင်း ပြန်စာပို့လာသည်။

" ကျွန်မ မှာ အပြာရောင်အဆင့် ချပ်ဝတ်တန်ဆာနဲ့ မြှားသေနတ် ရှိနေပြီ၊ အကုန်လုံးကို သတ်ပစ်နေတာ။ ရှင် တောင် ကျွန်မကို ကျော်နိုင်ပါ့မလား မသိဘူး"

ရွှီရှင်း ရယ်မိသွားသည်။

သူက သွေးရောင် ဗီဇပြောင်းသတ္တဝါ နှစ်ကောင်တောင် သတ်ထားသည် မဟုတ်ပါလား။

ထို့ကြောင့် သူက

"ဒီည အဆင့်စာရင်း ထွက်လာရင် သိရမှာပေါ့။ ကဲ... ငါ အမဲလိုက်တာ ဆက်လုပ်လိုက်ဦးမယ်။"

"အိုကေ... ရှင်လည်း ကြိုးစားလိုက်ဦး"

ရွှီရှင်းသည် ဒေသတွင်း ဆက်သွယ်ရေးလိုင်းရှိ လူဦးရေကို ကြည့်လိုက်ရာ ၆,၁၅၄ ဦးသာ ကျန်တော့သည်။

ဤအစီအစဉ်တွင်လည်း လူများစွာ သေဆုံးခဲ့ရပြန်ပြီဖြစ်ကာ နောက်ထပ် ၅၀ မှာလည်း ဖယ်ရှားခံရဦးမည်ဖြစ်သည်။

ကျန်ရှိနေသူများ မည်မျှကြာအောင် တောင့်ခံနိုင်မည်ကို မည်သူမျှ မသိနိုင်ချေ။

သူ ကောင်းကင်ကို မော့ကြည့်လိုက်ရာ နေမှာ အနောက်ဘက်သို့ စောင်းနေပြီဖြစ်သည်။

"အစီအစဉ် မပြီးခင်မှာ သားရေချပ်ဝတ်အတွက် ကုန်ကြမ်းတွေ အကုန်စုရမယ်"

ရွှီရှင်း အမဲလိုက်ခြင်းကို ပြန်လည်စတင်လိုက်သည်။

ဝံပုလွေကိုစီးကာ တောအုပ်အတွင်း အရှိန်ပြင်းပြင်း ပြေးလွှားရင်း မြင်သမျှ သားရဲမှန်သမျှကို မလွတ်တမ်း ပစ်ခတ်တော့သည်။

သူ၏ မြှားသေနတ် မှာ နားချိန်မရှိသလောက်ဖြစ်ကာ မြှားအတော်များများပင် ပျက်စီးသွားခဲ့သည်။

ကောင်းကင်ယံတွင် နေဝင်ဆည်းဆာ အနီရောင်များ လွှမ်းမိုးလာချိန်၌ ရွှီရှင်းသည် သမင်တစ်ကောင်ထံမှ နောက်ဆုံးလိုအပ်သော အပြာရောင်အဆင့် သားရဲအရိုးကို ရယူနိုင်ခဲ့ပြီး သားရေချပ်ဝတ်တစ်စုံစာ ကုန်ကြမ်းများ ပြည့်စုံသွားခဲ့ပြီဖြစ်သည်။

"နောက်ဆုံးတော့ အကုန်ရပြီ။"

ရွှီရှင်း သက်ပြင်းချလိုက်သည်။

ကံကောင်းခြင်းငါး၏ အာနိသင်မှာ အမှန်ပင် သိသာလှသည်။

ဤ အပြာရောင်အဆင့် အရေခွံနှင့် အရိုးများအပြင် ရွှီရှင်းသည် အဆိပ်မြွေတစ်ကောင်ထံမှ အပြာရောင်အဆင့် အဆိပ်အိတ် တစ်ခုကိုလည်း ရရှိခဲ့သေးသည်။

[အဆိပ်အိတ် (အပြာရောင်အဆင့်): အဆိပ်မြွေ၏ အဆိပ်အားလုံး ပါဝင်သော အဆင့်မြင့်ကုန်ကြမ်းဖြစ်သည်။ အဆိပ်မြှား များ ပြုလုပ်ရန် သို့မဟုတ် လက်နက်များကို အဆိပ်သုတ်ရန် အသုံးပြုနိုင်ကာ အဆိပ်မှာ ပိုမိုပြင်းထန်သည်။ အသုံးပြုနိုင်သည့် အကြိမ်ရေ - ၃ ကြိမ်]

ဤ အပြာရောင်အဆင့် အဆိပ်အိတ်မှာ အစိမ်းရောင်အဆင့် နှင့် ယှဉ်လျှင် အဆိပ်ပိုပြင်းရုံသာမက ၃ ကြိမ် အသုံးပြုနိုင်သည်။

တစ်ကြိမ်အသုံးပြုလျှင် အဆိပ်မြှား အစင်း ၂၀ ကို အဆိပ်သုတ်နိုင်သဖြင့် သုံးကြိမ်ဆိုလျှင် အလွန်ပြင်းထန်သော အဆိပ်မြှား အစင်း ၆၀ ကို ရရှိမည်ဖြစ်သည်။

ဤတစ်ကြိမ်တွင် ရွှီရှင်းသည် သူ၏လှံကိုပါ အဆိပ်ခတ်ရန် စမ်းသပ်ကြည့်ဖို့ စီစဉ်ထားသည်။

နာရီမှ အချိန်ကို စစ်ဆေးကြည့်ရာ အစီအစဉ်ပြီးဆုံးရန် နာရီဝက်သာ လိုတော့သည်။

နှစ်ရက်တာ အမဲလိုက်ပြီးနောက် ယခုအခါ သူ့တွင် အမှတ် နှစ်ထောင်ကျော် ရှိနေပြီဖြစ်ကာ၊ ထိုအထဲမှ ၁,၀၀၀ မှတ်မှာ ဗီဇပြောင်းသတ္တဝါများကို သတ်ဖြတ်ခြင်းမှ ရရှိခဲ့ခြင်းဖြစ်သည်။

ဤအမှတ်များဖြင့် သူ ပထမရနိုင်မလားဟု စဉ်းစားနေမိသည်။

သူ၏ ပထမနေရာကို ခြိမ်းခြောက်နိုင်သူမှာ ကျိချောင်းယန် တစ်ဦးတည်းသာ ရှိသည်။

ရွှီရှင်း အိမ်သို့ ချက်ချင်းမပြန်သေးဘဲ ယဇ်ပလ္လင်သို့ ပြန်သွားခဲ့သည်။

မနေ့က သင်ခန်းစာကို သူ မမေ့သေးချေ။

သူသည် အရင်ဆုံး အမဲလိုက်ကာ ရလာသော တောဝက်အစွယ် ပူဇော်သက္ကာ ကို ပူဇော်လိုက်ရာ တောဝက်ရုပ်တု ကျောက်တိုင်၏ တိုးတက်မှုမှာ တစ်ဝက်ကျော်သွားခဲ့သည်။

ထို့နောက်မှ ယဇ်ပူဇော်ဓား ကို မူလနေရာသို့ ပြန်ထားခဲ့လိုက်သည်။

ထို့နောက် ယခင်က ဆားတွင်းရှိသော ဂူသို့သွားကာ ဆား ကီလိုဂရမ် တစ်ရာခန့်ကို တူးဖော်ခဲ့သည်။

"ပြန်ဖို့ အချိန်တန်ပြီ။"

ခဲခဲ မှာ ဝံပုလွေကျောပေါ်တွင် အိပ်ပျော်နေပြီဖြစ်သည်။

၎င်းမှာ အိပ်နေစဉ်မှာပင် ဝံပုလွေအမွေးများကို ခြေလေးဖက်စလုံးဖြင့် မြဲမြံစွာ ဆုပ်ကိုင်ထားတတ်သဖြင့် ပြုတ်ကျစရာ အကြောင်းမရှိချေ။

"သွားကြစို့ ငွေရောင်ဘုရင်"

ရွှီရှင်း ငွေရောင်ဘုရင်ပေါ် တက်စီးကာ အိမ်သို့ ပြန်လာခဲ့သည်။

"အူးးး"

ငွေရောင်ဘုရင်က အူလိုက်ပြီး သစ်ပင်အိမ်ရှိရာသို့ အရှိန်အဟုန်ဖြင့် ပြေးထွက်သွားတော့သည်။

သစ်ပင်အိမ်သို့ အပြန်လမ်းတွင်လည်း ရွှီရှင်း မရပ်တန့်ဘဲ မြင်သမျှ သားရဲများကို လက်မလွတ်တမ်း ပစ်ခတ်ခဲ့သည်။

သစ်ပင်အိမ်အောက်သို့ ရွှီရှင်း ပြန်ရောက်သောအခါ မြေပြင်နှင့် သစ်ပင်များတွင် အလိုအလျောက် မြှားပစ်စက် ၏ မြှားကြီးများဖြင့် အစိုက်ခံထားရသော သားရဲအလောင်းအချို့ကို တွေ့လိုက်ရသည်။

မြေပြင်ပေါ်ရှိ အလောင်းနှစ်ခုမှာ အခြားသားရဲများ၏ စားသောက်ခြင်းကို ခံထားရသဖြင့် အတော်လေး ပျက်စီးနေပြီဖြစ်သည်။

သူသည် ထိုသားရဲများထံမှ ကုန်ကြမ်းအချို့ကို ရယူနေစဉ်မှာပင် လျှို့ဝှက်ဆန်းပြားသော အသံတစ်ခု သူ၏နားထဲတွင် ထွက်ပေါ်လာသည်။

[အမဲလိုက်စူးစမ်းခြင်း အစီအစဉ် ပြီးဆုံးပါပြီ။ ပစ္စည်းအပြည့်အစုံဖြင့် ပြန်လာနိုင်ကြသော ရှင်ကျန်သူများကို ဂုဏ်ပြုပါသည်။ ယခု သင်တို့သည် ရင့်ကျက်သော မုဆိုးများ ဖြစ်နေကြပါပြီ။]

[ရှင်ကျန်သူတိုင်း အမှတ်များစွာ ရရှိထားကြမည်မှာ သေချာပါသည်။ မကြာမီ အမှတ်လဲလှယ်ရေး အရောင်းစင်တာ ကို ဖွင့်လှစ်ပေးမည်ဖြစ်ရာ ရှင်ကျန်သူများအနေဖြင့် လိုအပ်သော ကုန်ကြမ်းများကို ရွေးချယ်ဝယ်ယူနိုင်ပါပြီ။]

[ယခု ဤအစီအစဉ်အတွက် ဒေသတွင်း အဆင့်စာရင်းကို ကြေညာပါမည်။ ထိပ်ဆုံး ၁၀၀ မှာ ထိုက်တန်သော ဆုလာဘ်များကို ရရှိပါမည်။ ရှင်ကျန်သူများ သစ်ပင်အိမ်အတွင်းရှိ ဖန်သားပြင်တွင် စစ်ဆေးကြည့်ရှုပါ။]

[နောက်ဆုံးကျန်ရစ်သော ရှင်ကျန်သူ ၅၀... သင်တို့တွင် ကမ္ဘာကြီးကို နှုတ်ဆက်ရန် ၁၀ မိနစ်သာ လိုတော့သည်။]

ရွှီရှင်း သစ်ပင်အိမ်ထဲသို့ ပြန်ဝင်ရန် အချိန်မစောင့်တော့ဘဲ နာရီကို ချက်ချင်းဖွင့်၍ အဆင့်စာရင်း ကို ကြည့်လိုက်သည်။

အဆင့်စာရင်းတွင် ရွေးချယ်စရာ နှစ်ခုရှိနေပြီး တစ်ခုမှာ ယခင် တောအုပ်စူးစမ်းခြင်း အစီအစဉ် နှင့် နောက်တစ်ခုမှာ ယခု တောအုပ်အမဲလိုက်ခြင်း အစီအစဉ် တို့ ဖြစ်ကြသည်။

သူသည် တောအုပ်အမဲလိုက်ခြင်း အစီအစဉ် ကို နှိပ်လိုက်ရာ အဆင့်စာရင်းမှာ သူ၏မျက်စိရှေ့တွင် ပေါ်လာတော့သည်။

"မိုက်တယ်ဟေ့...."

သူ၏အမည်ကို ထိပ်ဆုံးတွင် မြင်လိုက်ရသောအခါ ရွှီရှင်း လက်သီးကို ကျစ်ကျစ်ပါအောင် ဆုပ်လိုက်မိသည်။

ဘာပဲဖြစ်ဖြစ် ကျိချောင်းယန်က သူ့အပေါ် ဖိအားတော်တော်ပေးခဲ့သဖြင့် ဤတစ်ကြိမ်တွင် ပထမရမည်ဟု သူ သိပ်ပြီး ယုံကြည်ချက် မရှိခဲ့ခြင်း ဖြစ်သည်။

ပထမနေရာနှင့် ဒုတိယနေရာတို့၏ ဆုလာဘ်များမှာ ကွဲပြားခြားနားလှပြီး နောင်တွင် ရှင်သန်နိုင်ရေးအတွက် အလွန်အရေးပါလှသည် မဟုတ်ပါလား။

[ပထမနေရာ: ရွှီရှင်း။ အမှတ်: ၂၀၅၄]

[ဒုတိယနေရာ: ကျိချောင်းယန်။ အမှတ်: ၁၈၆၃]

[တတိယနေရာ: ဝမ်ကွေ့ရှင်း။ အမှတ်: ၁၅၈၆]

[စတုတ္ထနေရာ: ကျောက်ရှောင်ချွမ်း။ အမှတ်: ၆၃၆]

[ပဉ္စမနေရာ: ချင်ယွန်ဟု။ အမှတ်: ၆၀၅]

...

[အဆင့် ၆၀၈၇: လူရန်ယီ။ အမှတ်: ၀]

ထိပ်ဆုံးရှိ အမည်အချို့မှာ ရင်းနှီးပြီးသားသူများ ဖြစ်ကြသည်။

သူတို့၏ လက်နက်နှင့် ချပ်ဝတ်တန်ဆာများမှာ အခြားသူများထက် သာလွန်သဖြင့် သူတို့ကို ကျော်တက်ရန်မှာ မလွယ်ကူလှချေ။

ကျိချောင်းယန်မှာ သူ့ထက် အမှတ် ၂၀၀ ခန့် လျော့နည်းနေသည်ကို မြင်လိုက်ရသောအခါ ရွှီရှင်း၏ နှုတ်ခမ်းဖျားတွင် အပြုံးတစ်ခု ပေါ်လာသည်။

အစီအစဉ် နှစ်ခုဆက်တိုက် ပထမနေရာ ရရှိထားသဖြင့် သူ၏ ခေါင်းဆောင်ဟူသော ဂုဏ်ပုဒ်မှာ ဒေသတွင်းမှာရော သူတို့၏ စူးစမ်းရှာဖွေသူများ အဖွဲ့ထဲမှာပါ ခိုင်မာသွားခဲ့ပြီဖြစ်ရာ မည်သူမျှ သူ၏အစွမ်းကို သံသယရှိတော့မည် မဟုတ်ချေ။

သို့သော် ရွှီရှင်းကို အံ့သြစေဆုံးအရာမှာ ကျိချောင်းယန် မဟုတ်ဘဲ တတိယနေရာက ဝမ်ကွေ့ရှင်း ဖြစ်နေသည်။

"သူက ၁,၅၈၆ မှတ်တောင် ရတာလား"

ရွှီရှင်း အံ့သြစွာ တွေးလိုက်မိသည်။

တွက်ကြည့်ရလျှင် ဗီဇပြောင်းသတ္တဝါ နှစ်ကောင်ဆီမှရသော အမှတ်များကို နှုတ်လိုက်ပါက သူကိုယ်တိုင်မှာ ၁,၀၅၄ မှတ်သာ ရှိပြီး ကျိချောင်းယန်မှာ ၈၆၃ မှတ်သာ ရှိသည်။

အကယ်၍ ဗီဇပြောင်းသတ္တဝါများကို သတ်သည့်အချိန်အားလုံးကို အခြားသားရဲများကို အမဲလိုက်ရန်သာ အသုံးပြုခဲ့လျှင်ပင် အမှတ် ၁,၅၀၀ ကျော်ရရန်မှာ မဖြစ်နိုင်သလောက်ပင်။

ဝမ်ကွေ့ရှင်း၏ အောက်တွင်ရှိသော စတုတ္ထနေရာမှ ကျောက်ရှောင်ချွမ်းမှာမူ သူမနှင့် အမှတ် ၁,၀၀၀ နီးပါး ကွာဟနေသည်။

ထို့အပြင် ဝမ်ကွေ့ရှင်းမှာ ယခင်အစီအစဉ်များတွင် ရတနာသေတ္တာ သုံးခုစလုံး စုဆောင်းနိုင်ခဲ့သူ မဟုတ်သလို၊ သူနှင့် ကျိချောင်းယန်တို့လို စီးစရာသတ္တဝါ စာချုပ်လည်း မရှိသဖြင့် သွားလာလှုပ်ရှားမှုမှာ သူတို့လောက် မလွယ်ကူနိုင်ချေ။

"သူ့သစ်ပင်အိမ်နားမှာလည်း ယဇ်ပလ္လင် ရှိနေတာလား"

ရွှီရှင်း မစဉ်းစားဘဲ မနေနိုင်တော့ချေ။

ထို့နောက် သူက ပြန်ပယ်ချလိုက်သည်။

"မဖြစ်နိုင်ပါဘူး၊ တကယ်လို့ ယဇ်ပလ္လင်တွေက သစ်ပင်အိမ် အကွာအဝေးအတွင်းမှာသာ ကျပန်းပေါ်တာဆိုရင် ဆက်သွယ်ရေးလိုင်းမှာ လူတွေ ဆွေးနွေးနေကြမှာ ကြာပေါ့။ ဒါ့အပြင် ငါနဲ့ ကျိချောင်းယန်က ၃ ကီလိုမီတာ အကွာအဝေး အပြင်ဘက်မှ တွေ့ခဲ့ကြတာလေ။"

ဤအမျိုးသမီးမှာ တကယ့်ကို မရိုးရှင်းလှသည်မှာတော့ သေချာလှသည်။

အခန်း ၇၃ ပြီး။