သတင်းအချက်အလက်ဖလှယ်ခြင်းနှင့် ကံကောင်းခြင်းငါး

"မင်းပေးတဲ့ သတင်းအချက်အလက်တွေက အမှန်တွေပါလို့ ငါက ဘယ်လိုယုံရမှာလဲ။"

အရင်က ကျိချောင်းယန်သည် တောကြောင်ကို သတ်ပြီးနောက် ရွှီရှင်းကို အမှတ်တွေ၊ ပစ္စည်းတွေ မရစေချင်သည့်အတွက် ယဇ်မပူဇော်ရန် တားဆီးသည့်စာ ပို့ခဲ့ဖူးသည်။

အခုတော့ ရွှီရှင်းက ဗီဇပြောင်းသတ္တဝါကို ကိုင်တွယ်နိုင်မှန်း သိသွားတော့မှ ပူးပေါင်းဆောင်ရွက်ဖို့ ကမ်းလှမ်းလာခြင်းဖြစ်သည်။

ဒီလူက အတွေးအခေါ် တော်တော်ရှင်းသည်။

အကယ်၍ သူက ရုတ်တရက် နောက်ကျောကို ဓားနဲ့ထိုးဖို့ ဆုံးဖြတ်လိုက်ရင် ကာကွယ်ဖို့ တော်တော်ခက်လိမ့်မည်။

"မင်းက တခြားဗီဇပြောင်းသတ္တဝါတစ်ကောင်ကို သတ်နိုင်ခဲ့တာဆိုတော့၊ ဗီဇပြောင်းတောကြောင်ကို သတ်ဖို့ဆိုတာ မင်းအတွက် မဖြစ်နိုင်တာတော့ မဟုတ်ဘူး မဟုတ်လား။ အပေးအယူတစ်ခုတော့ ရှိနိုင်တာပေါ့။ ငါ မင်းကို လိမ်ရင်တောင် မင်းက တောကြောင်ကို သတ်နိုင်ဦးမှာပဲ။ အဲဒီလိုလုပ်ရင် ငါက မင်းနဲ့ ရန်သူဖြစ်သွားမှာ၊ ဒါက ငါ့အတွက် ဘာမှမထူးခြားတဲ့ အလုပ်ပဲ။ဒါဟာ ငါ့အတွက်တင်မကဘဲ မင်းအတွက်လည်း အတူတူပါပဲ။ ငါက နှစ်ဦးနှစ်ဖက်လုံး ပေးဆပ်ရတာ နည်းစေချင်လို့ပါ။ ဒါက နှစ်ယောက်လုံးအတွက် အကျိုးရှိတဲ့ အခြေအနေ လေ။"

ကျိချောင်းယန်၏ ရှင်းပြချက်က တည်ငြိမ်ပြီး ယုတ္တိရှိလှသဖြင့် ရွှီရှင်း အတော်လေး နားဝင်သွားသည်။

"မင်းနဲ့ ပူးပေါင်းရတာ တော်တော်လေး ဖိအားများတယ်။"

ရွှီရှင်း ခေါင်းခါရင်း ရယ်မောလိုက်သည်။

"ဟားဟား၊ မင်းကော ငါ့ကိုပေးတဲ့ ဖိအားက နည်းတယ်ထင်လို့လား။ငါလည်း မင်းကို အကဲခတ်ရခက်နေတာပဲလေ။"

တစ်ဖက်မှ ရယ်သံတွင်လည်း အားကိုးရာမဲ့သည့် အရိပ်အယောင်လေး ပါဝင်နေသည်။

ထို့နောက် သူတို့နှစ်ဦးသည် မိမိတို့သတ်ခဲ့သော ဗီဇပြောင်းသတ္တဝါများ၏ အချက်အလက်များကို အပြန်အလှန် ဖလှယ်လိုက်ကြသည်။

"ဒါနဲ့... မင်းမှာလည်း အဆင့်မြင့်လက်နက်တွေ ရှိနေပြီ မဟုတ်လား။ ငါတို့ အဖွဲ့အစည်းထဲမှာ အစိမ်းရောင်အဆင့် သံလက်နက်တွေကို စတင်အရောင်းအဝယ် ဖွင့်ပေးလို့ရပြီထင်တယ်။"

ရွှီရှင်းသည် အရင်းရှင်ဝါဒ၏ အရသာကို မြည်းစမ်းဖူးသွားပြီဖြစ်ရာ ရပ်တန့်ဖို့ ခက်ခဲနေပြီဖြစ်သည်။

"အင်း... ငါလည်း အဲဒီလိုပဲ တွေးနေတာ။ အစိမ်းရောင်အဆင့် ပဲ ဖွင့်ပေးလိုက်ရင် လုံလောက်ပါပြီ။"

ကျိချောင်းယန်က ရယ်မောရင်း ပြန်ဖြေသည်။

သူတို့နှစ်ဦးစလုံး အလိုကျစွာ ရယ်မောလိုက်ကြ၏။

ဖုန်းမချမီ ရွှီရှင်းက ရုတ်တရက် မေးလိုက်သည်။

"နေဦး... မင်းရဲ့ ယဇ်ပလ္လင် ကျောက်တိုင် လေးတိုင်ပေါ်မှာ ဘာရုပ်တုတွေ ရှိလဲ။"

"ကြောင်၊ ယုန်၊ ဝံပုလွေ၊ ဝက်... ဒီလေးမျိုးပဲ။"

ကျိချောင်းယန်က ဖုံးကွယ်မထားဘဲ ဖြေလိုက်သည်။

"အင်း... ငါ့ဆီမှာလည်း အဲဒီ လေးမျိုးပဲ။ မင်းက ပွင့်ပွင့်လင်းလင်း ရှိလို့ ငါတစ်ခု ပြောပြမယ်... အဲဒီ ကျောက်တိုင်ပေါ်က ရုပ်တုတွေက ပုံစံပြောင်းသွားတတ်တယ်၊ ဒါပေမဲ့ ဘာလို့လဲဆိုတာတော့ ငါလည်း မသိဘူး။"

"... အော် သိပြီ၊ ကျေးဇူးပဲ။"

ကျိချောင်းယန်၏ ပြောပြချက်အရ ဗီဇပြောင်းတောကြောင်၏ အရွယ်အစားမှာ ကျားငယ်တစ်ကောင်ခန့်ရှိပြီး အရှိန်အဟုန်မှာ အလွန်ပင် မြန်ဆန်လှသည်။

၎င်း၏ အဓိက တိုက်ခိုက်မှုမှာ ထက်မြက်သော လက်သည်းတစ်စုံဖြစ်ပြီး၊ တစ်ချက်တည်းနှင့် မိုးမခပင်ကိုပင် အပိုင်းပိုင်းပြတ်အောင် လုပ်နိုင်သည်။

ထို့ကြောင့် ၎င်းကို အနား အကပ်မခံသင့်ချေ။

အစကတည်းက အကွာအဝေးတစ်ခု ထားရမည်၊ မဟုတ်ပါက ၎င်း၏ မြန်ဆန်လှသော အရှိန်ကြောင့် ရှောင်တိမ်းရန် မဖြစ်နိုင်ဘဲ ကာကွယ်ဖို့ လက်မြှောက်ရန်ပင် အချိန်ရလိမ့်မည် မဟုတ်ချေ။

သို့သော် ဗီဇပြောင်းတောကြောင်တွင် အားနည်းချက်တစ်ခု ရှိသည်၊ ၎င်းမှာ ကြောင်မျိုးနွယ်ဝင်များ၏ ဘုံပြဿနာဖြစ်သော ဇွဲ အားနည်းခြင်းပင်။

ကျိချောင်းယန်၏ အဆိုအရ အခြေအနေ မဟန်သည်ကို မြင်လျှင်မြင်ချင်း သူ၏ စီးစရာသတ္တဝါ ကို စီး၍ အဝေးသို့ ထွက်ပြေးခဲ့သည်။

သွေးရောင်တောကြောင် သည်လည်း သူ၏နောက်သို့ မဆုတ်မနစ် လိုက်လံတိုက်ခိုက်ခဲ့သည်။

သူ အတတ်နိုင်ဆုံး ရှောင်တိမ်းခဲ့သော်လည်း ဒဏ်ရာပြင်းထန်စွာ ရခဲ့သည်။

နောက်ဆုံး တောကြောင်မှာ အားအင်ကုန်ခမ်းသွားချိန်မှသာ သူက အသေအလဲ တိုက်ခိုက်နိုင်ခဲ့ခြင်း ဖြစ်သည်။

သူတို့နှစ်ဦး ဆွေးနွေးပြီးနောက် တူညီချက်တဲ့အချက်တစ်ခု ရရှိခဲ့သည်။

"ဒီ သွေးရောင် သတ္တဝါတွေက ဒေါသထွက်သွားပြီဆိုရင် ပစ်မှတ်ကို မသေမချင်း မဆုတ်မနစ် လိုက်လံတိုက်ခိုက်ကြလိမ့်မယ်။"

ကျိချောင်းယန် တွေ့ခဲ့သော တောကြောင်မှာလည်း ဤသို့ပင်။

ပုံမှန်အားဖြင့် ကြောင်မျိုးနွယ်ဝင် အမဲလိုက်သတ္တဝါများသည် သားကောင်ကို အမီမလိုက်နိုင်ပါက နောက်တစ်ကြိမ် ချောင်းမြောင်းရန်အတွက် အားအင်ချွေတာသောအားဖြင့် လက်လျှော့လေ့ရှိသည်။

ရွှီရှင်း တွေ့ခဲ့သော သွေးရောင်ယုန် မှာလည်း အတူတူပင်။

ဒဏ်ရာပြင်းထန်စွာ ရနေသော်လည်း ပုံမှန်သားရဲကဲ့သို့ ကြောက်လန့်ထွက်ပြေးမည့်အစား ရွှီရှင်းကို ပိုမိုရန်လိုစွာ တိုက်ခိုက်ခဲ့သည်။

ဤ သွေးရောင် ပုံစံများသည် ဗီဇပြောင်းသတ္တဝါများ၏ စိတ်ဓာတ်ကို ထိခိုက်စေပုံရသည်။

၎င်းတို့က သတ္တဝါများကို ပိုမိုရန်လိုစေသော်လည်း ထင်ရှားသော အားနည်းချက်များကိုလည်း ဖြစ်ပေါ်စေသည်။

အကယ်၍ ထိုယုန်သာ အသိစိတ်မပျောက်ဘဲ ထွက်ပြေးခဲ့လျှင် ရွှီရှင်းအနေဖြင့် ၎င်းကို သတ်နိုင်ရန် လုံးဝမဖြစ်နိုင်ချေ။

ခေတ္တမျှ ကိုယ်လက်သန့်စင်ပြီးနောက် ရွှီရှင်း ကုတင်ပေါ်တွင် လှဲလိုက်သည်။

အစက ထောင့်တွင် ခွေအိပ်နေသော ခဲခဲ မှာ ဘယ်အချိန်က ကုတင်စွန်းသို့ ရောက်လာမှန်းမသိဘဲ ပက်လက်လှန်ကာ အိပ်ပျော်နေသည်ကို မြင်ပြီး ရွှီရှင်း ပြုံးမိသွားသည်။

ဤသတ္တဝါလေးသည် သစ်ပင်အိမ်ထဲတွင် အလွန်ဘေးကင်းသည်ဟု ခံစားနေရပုံပေါ်သည်။

တစ်နေကုန် ပင်ပန်းခဲ့သဖြင့် ရွှီရှင်း မျက်လုံးများကို မှိတ်လိုက်တော့သည်။

နက်ဖြန်မနက် နိုးလာသောအခါ နေရောင်ခြည်မှာ သစ်ပင်အိမ်ထဲသို့ တိုးဝင်လာပြီး ရွှီရှင်း၏ မျက်နှာပေါ်သို့ ကျရောက်နေသည်။

နံနက်စာ စားရင်း ဆက်သွယ်ရေးလိုင်းကို စစ်ဆေးကြည့်သော်လည်း ထူးခြားတာ ဘာမှမတွေ့ရချေ။

သို့သော် စူးစမ်းရှာဖွေသူများ အဖွဲ့ထဲတွင်မူ စည်ကားနေသည်။

ဝမ်လေ့ : "ဟေ့လူတွေ... မနေ့က ငါ သတ္တဝါကြီး အတော်များများကို သတ်နိုင်ခဲ့တယ်၊ ဒီတစ်ခါတော့ အဆင့် ၁၀ ထဲ ပါဖို့ သေချာသလောက်ရှိပြီ"

ကျောက်ရှောင်ချွမ်း "တောဝက်နဲ့ ဝံပုလွေက သတ္တဝါကြီးစာရင်းဝင်ရင်၊ ဧရာမ သတ္တဝါကြီးတွေလည်း ရှိဦးမှာပေါ့"

ဝမ်လေ့ : "မင်းပြောပုံက ကျားနဲ့ ဝက်ဝံညိုတွေကို သတ်ခဲ့သလိုပဲနော်။"

ကျောက်ရှောင်ချွမ်း : "ဟားဟား... ပြိုင်ချင်လို့လား။ ပြီးခဲ့တဲ့အပတ်က မင်း ငါ့ထက် အဆင့်မြင့်ခဲ့ပေမဲ့၊ ဒီတစ်ခါတော့ မင်းခေါင်းကို ငါ နင်းပြမယ်။"

ဝမ်လေ့ : "လာလေ ဘယ်သူကကြောက်မှာလဲ ရှုံးတဲ့သူက ဆက်သွယ်ရေးလိုင်းမှာ ငါဟာ လူအ ပါလို့ ဆယ်ခါ ရိုက်ပို့ရမယ်နော်"

ဝမ်ကွေ့ရှင်း : "မင်းတို့တွေကလည်း မနက်စောစောစီးစီး ဘာတွေဖြစ်နေကြတာလဲ"

ချင်ယွန်လုံ : "မနေ့က မင်းတို့ အမှတ် ဘယ်လောက်ရလဲ။"

ဝမ်ကွေ့ရှင်း : "ဘာလို့မေးတာလဲ။ ဒီည အဆင့်သတ်မှတ်ချက်ကိုပဲ စောင့်ကြည့်လိုက်ပါ၊ မင်းတို့ အံ့သြသွားလိမ့်မယ်။"

ရွှီရှင်း : "ကျိချောင်းယန်နဲ့ ဆွေးနွေးပြီးနောက်မှာ ငါတို့ သံလက်နက်တွေကို အရောင်းအဝယ်ဖွင့်ပေးဖို့ ဆုံးဖြတ်လိုက်ပြီ။ မြှားသေနတ်၊ သံလှံ၊ သံဓားရှည်၊ သံဓား၊ သံဓားမြှောင်... စိတ်ဝင်စားရင် ဈေးနှုန်းနဲ့တကွ လာခဲ့ကြပါ။"

ရွှီရှင်း စာပို့ပြီး မကြာမီမှာပင် ချင်ယွန်လုံထံမှ ကိုယ်ပိုင်စာတစ်စောင် ရောက်လာသည်။

"ရွှီရှင်း... ငါ မြှားသေနတ် နှစ်လက် လိုချင်တယ်။ ငါ့ဆီမှာ ထူးခြားတဲ့ အရင်းအမြစ်တစ်ခု ရှိတယ်၊ မင်း လိုအပ်မလားတော့ မသိဘူး။"

ထိုသို့ပြောရင်း အရင်းအမြစ် ဖော်ပြချက်ကို ပို့လာသည်။

[ကံကောင်းခြင်းငါး (အပြာရောင်အဆင့်): ၎င်းကို စားသုံးခြင်းဖြင့် ကံကောင်းခြင်း ကို အမြဲတမ်း အနည်းငယ် တိုးမြင့်ပေးသည်။ တစ်ကြိမ်သာ စားသုံး၍ရသည်။ သေဆုံးနေသည်မှာ ကြာသွားပါက အာနိသင် လျော့နည်းသွားနိုင်သဖြင့် အမြန်စားသုံးပါ။]

ရွှီရှင်း : "...."

ကံကောင်းခြင်းငါး..ရေထွက်ကုန် အရင်းအမြစ်ပဲ။

ရွှီရှင်း ရေထွက်ကုန်တွေကို မရှာဖွေရသေးချေ။

သစ်ပင်အိမ်နားက ရေအိုင်မှာ အသားစားငါး တွေကြောင့် ဘာငါးမှ မရှိသလို၊ အရင်းအမြစ်နယ်မြေက ရေအိုင်မှာလည်း မိကျောင်းတွေကြောင့် သွားလို့မရသေးချေ။

အဓိကအားဖြင့် သူသည် ရေကူးမကျွမ်းကျင်လှသလို ဖောင် ကဲ့သို့သော ကိရိယာများကိုလည်း မဖန်တီးနိုင်သေးသောကြောင့် ဖြစ်သည်။

ရေထဲမှာ ဒီလောက်ကောင်းတဲ့ အရင်းအမြစ်ရှိမယ်လို့ သူ မထင်ထားခဲ့ပေ။

ကံကောင်းခြင်းဆိုတာ တကယ့်ကို တန်ဖိုးရှိတဲ့အရာပဲ။

၎င်းက အရာအားလုံးရဲ့ ဖြစ်နိုင်ခြေ အပေါ် သက်ရောက်မှုရှိသည်။

ဥပမာ - အဆင့်မြင့်ကုန်ကြမ်းတွေ ပိုရလာတာမျိုး၊ ဒါမှမဟုတ် ပစ္စည်းဖန်တီးတဲ့အခါ အောင်မြင်မှုနှုန်း ပိုမြင့်လာတာမျိုးပေါ့။

လက်ရှိမှာ သူ ပစ္စည်းလုပ်ရင် ၁၀၀ ရာခိုင်နှုန်း အောင်မြင်နေပေမဲ့၊ ခရမ်းရောင်အဆင့် လက်နက်တွေ လုပ်လာတဲ့အခါမှာတော့ ကျရှုံးနိုင်ခြေ ရှိလာနိုင်သည်ဟု သူ ခန့်မှန်းထားသည်။

ဤငါးကို တစ်ကြိမ်သာ စားသုံး၍ရသည်ဟု မြင်လိုက်ရချိန်တွင် တစ်ဖက်လူက ဘာကြောင့် ဤတန်ဖိုးရှိသည့်အရာကို ရောင်းချသလဲဆိုသည်ကို သူ နားလည်သွားသည်။

သူတို့ စားပြီးသွားပြီ ဖြစ်ရပေမည်။

အပြန်အလှန် ညှိနှိုင်းပြီးနောက် ရွှီရှင်းသည် မြှားသေနတ် နှစ်လက်ကို ထိုငါးနှင့် လဲလှယ်လိုက်သည်။

"မင်းတို့က အဆင့်မြင့် ရေထွက်ကုန်တွေ ရအောင် ရေကူးတော်တာလား"

လဲလှယ်ပြီးနောက် ရွှီရှင်းက မေးလိုက်သည်။

"မဆိုးပါဘူး၊ ငါနဲ့ ငါ့ညီက ဒီကမ္ဘာကို မရောက်ခင်က ရေငုပ်သင်တန်းဆရာတွေလေ။"

"မိုက်လိုက်တာ။ နောက်ပိုင်း ရေထဲမှာ တန်ဖိုးရှိတာတွေ တွေ့ရင် ငါ့ကို အရင်ဆုံး သတိရပေးပါ။ မင်းတို့ ကျေနပ်မယ့် ဈေးနှုန်း ငါပေးပါ့မယ်။"

ရွှီရှင်းက မြှား အစင်း ၈၀ ကို ပို့ပေးလိုက်သည်။

"အပို ၄၀ ကတော့ ငါ့ရဲ့ စေတနာ လက်ဆောင်ပေါ့။"

ဤညီအစ်ကိုနှစ်ဦးမှာ ရေကူးကျွမ်းကျင်သလို အင်အားလည်း ရှိသူများဖြစ်သဖြင့် ဆက်ဆံရေး ကောင်းမွန်အောင် ထားရှိသင့်သည် မဟုတ်ပါလား။

"အိုကေလေ၊ နောက်ပိုင်း ရောင်းစရာရှိရင် မင်းကိုပဲ အရင်ဆုံး လာရှာပါ့မယ်။"

တစ်ဖက်လူ၏ လေသံမှာ သိသိသာသာ ပျော့ပြောင်းသွားသည်။

"အမဲလိုက်တာ အောင်မြင်ပါစေ။"

"အင်း... မင်းလည်း အဆင့် ၁ ပြန်ရပါစေ။"

ချင်ယွန်လုံနှင့် စကားပြောပြီးနောက်၊ ချီရွှယ်ဖေးကလည်း မြှားသေနတ် အတွက် စာပို့လာသည်။

သူမက အပြာရောင်အဆင့် သွေးတိတ်မြက် တစ်ပင်နှင့် မြှားသေနတ် တစ်လက်၊ မြှား အစင်း ၄၀ တို့ကို လဲလှယ်လိုက်သည်။

အပြာရောင်အဆင့် သွေးတိတ်မြက် မှာ အသက်တစ်ချောင်းနှင့် ညီမျှသဖြင့် ဤလဲလှယ်မှုမှာလည်း တန်လှသည်။

လဲလှယ်ပြီးနောက် ရွှီရှင်းက မေးကြည့်လိုက်သည်။

"ငါ သွေးတိတ်မြက် တွေ ထပ်လိုချင်ရင် မင်းဆီကနေ ထပ်ဝယ်လို့ ရမလား"

တစ်ဖက်လူက ခေတ္တမျှ တိတ်သွားပြီးနောက်

"ရတယ်" ဟု ပြန်ဖြေသည်။

ရွှီရှင်း ပြုံးလိုက်မိသည်၊ နောက်ထပ် ကံကောင်းသူတစ်ယောက်ပေါ့။

ရှင်ကျန်သူတွေထဲမှာ ထူးချွန်တဲ့သူတွေ အများကြီး ရှိနေတာပဲ...။

ဒါကြောင့် သူလည်း ပိုပြီး ကြိုးစားရတော့မည်။

---

အခန်း (၆၈) ပြီး။