ယုန်ရုပ်တု

ရွှီရှင်းသည် ရေအိုင်ဘေးတွင် ကြာကြာမနေခဲ့ချေ။

ရေထဲရှိ မိကျောင်းများကြောင့် ရေစပ်က သားရဲအချို့မှာ လန့်ပြေးကုန်ကြသည်။

သူသည် ရေအိုင်ကို တစ်ပတ်ပတ်ကြည့်သော်လည်း အဆင့်မြင့်ကုန်ကြမ်းသစ်များ မတွေ့ရသဖြင့် အမဲလိုက်ခြင်းကိုသာ ဆက်လက်အာရုံစိုက်ခဲ့သည်။

ယခုအခါ ရွှီရှင်းနှင့် ငွေရောင်ဘုရင်တို့၏ ပူးပေါင်းဆောင်ရွက်မှုမှာ အပြစ်ပြောစရာမရှိအောင် ကောင်းမွန်လှသည်။

မြေပုံ၏အချက်ပြမှုနှင့် ခဲခဲ ၏ လမ်းညွှန်မှုကြောင့် သားရဲများ၏ တည်နေရာမှာ အတိအကျသိနေရပြီး မြက်တောထဲတွင် ငြိမ်သက်စွာပုန်းနေသော သတ္တဝါငယ်လေးများမှာ ရွှီရှင်းအတွက် လှုပ်ရှားနေသော ပစ်မှတ်များထက် ပစ်ရသည်မှာ ပို၍ပင် လွယ်ကူနေသေးသည်။

သူ၏ အမဲလိုက်နိုင်စွမ်းမှာ အခြားရှင်ကျန်သူများ လိုက်မမီနိုင်အောင် မြန်ဆန်လှ၏။

မိုးမချုပ်မီမှာပင် ရွှီရှင်းသည် တောယုန် ၁၈ ကောင်၊ တောကြောင် ၇ ကောင်၊ တောဝက် ၂ ကောင်နှင့် အခြားတိရစ္ဆာန်အမျိုးမျိုးကို အမဲလိုက်ပြီးခဲ့ပြီ ဖြစ်သည်။

သူသည် ဝံပုလွေအုပ်ကိုတော့ လောလောဆယ် သွားမရှုပ်သေးချေ။

အဓိကအားဖြင့် ငွေရောင်ဘုရင်ကိုခေါ်ပြီး ၎င်း၏မျိုးနွယ်စုကို သွားတိုက်ခိုက်ရမှာက တစ်မျိုးကြီးဖြစ်နေသလို၊ ဝံပုလွေအုပ်ကြီးကို ထိပ်တိုက်ရင်ဆိုင်ရမှာကလည်း မလွယ်ကူလှပေ။

ရွှီရှင်းသည် သွေးရောင်ဓားသွားရှိသော အနက်ရောင်ဓားငယ်ကို ကိုင်ကာ ရှေ့က တောဝက်၏ အစွယ်များကို ကိုယ်ထည်မှ ခွဲထုတ်လိုက်သည်။

တောဝက်အစွယ်များသည် ယဇ်ပူဇော်ဓား အောက်တွင် တို့ဟူးကဲ့သို့ နူးညံ့နေပြီး ရွှီရှင်းအနေဖြင့် အားစိုက်စရာပင် မလိုဘဲ ခွဲထုတ်နိုင်ခဲ့သည်။

ထို့နောက် သူ၏မျက်လုံးများ ဝင်းခနဲ ဖြစ်သွားသည်။

[တောဝက်အစွယ် ပူဇော်သက္ကာ (အပြာရောင်အဆင့်): "နတ်ဘုရား" ထံ ပူဇော်ရန် အသုံးပြုသည့် အဆင့်မြင့် ပူဇော်သက္ကာများအနက် တစ်ခု။]

အဆင့်မြင့် ပူဇော်သက္ကာ ရပြီ။

သို့သော် ဤတောဝက်၏ အစွယ်နှစ်ချောင်းအနက် တစ်ချောင်းတည်းသာ အပြာရောင်အဆင့် ဖြစ်နေသဖြင့် သူ အနည်းငယ်တော့ စိတ်ပျက်သွားမိသည်။

ဤသည်မှာ ရွှီရှင်း အမဲလိုက်ခဲ့သည့် တတိယမြောက် တောဝက်ဖြစ်သည်။

ယခင် နှစ်ကောင်ထံမှလည်း အစွယ် ၄ ချောင်း ရခဲ့သော်လည်း အားလုံးမှာ အစိမ်းရောင်အဆင့် များသာ ဖြစ်ကြသည်။

တောဝက်ကိုယ်လုံးကို ခွဲစိတ်ပြီး ကျောပိုးအိတ် ထဲ ထည့်လိုက်ပြီးနောက် ရွှီရှင်း ကောင်းကင်ကို မော့ကြည့်လိုက်ရာ အနောက်ဘက်တွင် နေဝင်ရီတရော အချိန်သို့ ရောက်ရှိနေပြီဖြစ်ကြောင်း တွေ့ရသည်။

"ဒီပူဇော်သက္ကာတွေကို အရင်ဆုံး သွားဆက်သလိုက်တာ ပိုကောင်းမယ်။"

ဝံပုလွေကိုစီးကာ ယဇ်ပလ္လင်ဆီသို့ သွားခဲ့သော်လည်း ငွေရောင်ဘုရင်မှာ ယခင်အတိုင်း မဝင်ရဲသေးချေ။

ရွှီရှင်းက ၎င်းကို အပြင်မှာ စောင့်ခိုင်းထားခဲ့ပြီး ခဲခဲ ကတော့ သူ၏ပုခုံးပေါ်သို့ ခုန်တက်လိုက်သည်။

"ချက်။"

ယဇ်ပလ္လင်ပေါ်သို့ ခြေလှမ်းလိုက်သည်နှင့် ရွှီရှင်းသည် အသံသဲ့သဲ့ကို နောက်တစ်ကြိမ် ကြားလိုက်ရပြန်သည်။

ဤတစ်ကြိမ်တွင်မူ ပို၍ ရှင်းလင်းစွာ ကြားလိုက်ရသည်၊ ထိုအသံမှာ မြေအောက်ထဲမှ ထွက်ပေါ်လာခြင်း ဖြစ်သည်။

"ယဇ်ပလ္လင်အောက်မှာ တစ်ခုခုများ ရှိနေတာလား"

ရွှီရှင်း မျက်မှောင်ကြုတ်လိုက်မိသည်။

ပူဇော်ရာစားပွဲသို့ ရောက်သောအခါ ရွှီရှင်းသည် အရင်ဆုံး ယုန်နားရွက် ပူဇော်သက္ကာ တစ်ခုကို ထုတ်ယူကာ စားပွဲပေါ်သို့ တင်လိုက်သည်။

ယခင် ယုန်သားတင်စဉ်ကထက် ပို၍အေးစိမ့်သော အအေးဓာတ်က ပူဇော်ရာစားပွဲမှ ပျံ့နှံ့လာသည်။

ဤတစ်ကြိမ်တွင် ရွှီရှင်း နောက်မဆုတ်တော့ဘဲ စားပွဲပေါ်က အပြောင်းအလဲများကိုသာ စိုက်ကြည့်နေရင်း ဘေးက ယုန်ရုပ်တုရှိသော ကျောက်တိုင်ကိုလည်း အာရုံစိုက်ထားလိုက်သည်။

စားပွဲအနားသတ်ရှိ ပုံစံများမှာ စတင်လှုပ်ရှားလာသည်။

ရွှီရှင်း၏ မျက်စိရှေ့မှာတင် ထိုသွေးရောင်ပုံစံများသည် ယခင်ကလို ဖြည်းဖြည်းချင်း တွားသွားနေခြင်းမျိုး မဟုတ်ဘဲ ဝင်းခနဲ လင်းလက်လာကာ စားပွဲအလယ်ရှိ ပူဇော်သက္ကာဆီသို့ လျင်မြန်စွာ ပျံ့နှံ့သွားပြီး တစ်ခုလုံးကို လွှမ်းခြုံသွားတော့သည်။

စက္ကန့်ပိုင်းအတွင်းမှာပင် ပူဇော်သက္ကာမှာ ပိန်လိမ်ပျောက်ကွယ်သွားပြီး၊ ရွှီရှင်း၏ အမြင်အာရုံထဲတွင် ယုန်ရုပ်တုရှိသော ကျောက်တိုင်အောက်ခြေမှ သွေးရောင်များသည် အပေါ်သို့ လျင်မြန်စွာ ပျံ့နှံ့သွားကာ ရိုးရိုးပုံစံများနေရာတွင် သွေးရောင်များ စိမ့်ဝင်သွားတော့သည်။

ပူဇော်သက္ကာ တစ်ခုတည်းနှင့်ပင် ကျောက်တိုင်တစ်ခုလုံး၏ ၂၀ စင်တီမီတာခန့်မှာ နီရဲသွားခဲ့သည်။

စားပွဲပေါ်က သွေးရောင်ပုံစံများသည်လည်း အရောင်မှိန်သွားကာ ဘေးဘက်များသို့ ဖြည်းဖြည်းချင်း ပြန်လည်ဆုတ်ခွာသွားကြသည်။

ရွှီရှင်းသည် တောယုန် ၁၈ ကောင် အမဲလိုက်ခဲ့သဖြင့် စုစုပေါင်း ယုန်နားရွက် ပူဇော်သက္ကာ ၃၆ ခု ရရှိထားသည်။

သူ ခဏစဉ်းစားပြီးနောက် ကျန်ရှိသော ၃၅ ခုစလုံးကို စားပွဲပေါ်သို့ တင်လိုက်၏။

လေအေးများ တိုက်ခတ်လာပြီး သွေးရောင်များ ပျံ့နှံ့သွားကာ၊ မကြာမီမှာပင် ပူဇော်သက္ကာအားလုံး ပျောက်ကွယ်သွားပြီး ယုန်ရုပ်တုရှိသော ကျောက်တိုင်ကြီးမှာ လုံးဝ နီရဲသွားတော့သည်။

ယုန်ရုပ်တု၏ အစိတ်အပိုင်း အတော်များများမှာပင် အနီရောင် ပြောင်းသွားခဲ့ပြီဖြစ်သည်။

သွေးရောင်ပုံစံများ ဖုံးလွှမ်းနေသော ယုန်ရုပ်တုမှာ ကြောက်မက်ဖွယ်ကောင်းသော်လည်း ထူးဆန်းသော အလှတရားတစ်မျိုး ရှိနေသည်။

ကျောက်တိုင်မှ ပြင်းထန်သော အပူရှိန်များ ထွက်ပေါ်လာသည်။

စားပွဲ၏ အအေးဓာတ် ပျောက်ကွယ်သွားချိန်တွင် ကျောက်တိုင်မှ အပူရှိန်က ရွှီရှင်းကို ရိုက်ခတ်လာရာ ရေနွေးငွေ့ခန်း ထဲ ရောက်နေသကဲ့သို့ ခံစားလိုက်ရသည်။

ကျောက်တိုင်ပေါ်က ပုံစံများသည် သူ့ကို မြေအောက်က နွယ်ပင်များကို သတိရသွားစေသည်။

ထိုနွယ်ပင်များသည်လည်း သွေးကြောကဲ့သို့သော အစင်းကြောင်းများဖြင့် ဖုံးလွှမ်းနေသည် မဟုတ်ပါလား။

ရွှီရှင်း ရင်ထဲတွင် မကောင်းသော အငွေ့အသက်ကို ခံစားလိုက်ရသည်။

"ဒါက.."

သူ၏ ယူဆချက်ကို သူကိုယ်တိုင်ပင် မသေချာတော့ချေ။

ရုပ်တု၏ အနည်းငယ်သော အစိတ်အပိုင်းသာ နီရန် ကျန်တော့သည်ကို မြင်သောအခါ ရွှီရှင်း သွားကိုတင်းတင်းကြိတ်ပြီး၊ ကျောပိုးအိတ် ထဲရှိ ယုန်သားအားလုံးကို ထုတ်၍ စားပွဲပေါ်သို့ တင်လိုက်သည်။

သွေးရောင်များ နောက်တစ်ကြိမ် ပျံ့နှံ့သွားပြန်သည်၊ ဤတစ်ကြိမ်တွင်မူ ဖြည်းဖြည်းချင်း ဖြစ်သည်။

ရွှီရှင်းသည် အလယ်ဗဟိုရှိ စားပွဲနှင့် ထူးဆန်းသော ယုန်ရုပ်တုရှိရာ ကျောက်တိုင်မှ ခပ်ဝေးဝေးသို့ ဆုတ်လိုက်ပြီး၊ မနီသေးဘဲ ကျန်နေသည့် နောက်ဆုံးအပိုင်းကို စူးစိုက်ကြည့်နေလိုက်သည်။

ရုပ်တုပေါ်တွင် သွေးရောင်ပုံစံများသည် ဖြည်းဖြည်းချင်း တက်သွားပြီး နောက်ဆုံးတွင် ယုန်ရုပ်တုတစ်ခုလုံး သွေးရောင်များဖြင့် လုံးဝဖုံးလွှမ်းသွားတော့သည်။

"အီးးး အီးးး အီးးး"

ခဲခဲ မှာ ရုတ်တရက် ဂနာမငြိမ်ဖြစ်လာပြီး၊ ကျောက်တိုင်ပေါ်က ယုန်ရုပ်တုကို လက်ကလေးဖြင့် ညွှန်ပြကာ ရွှီရှင်း၏ အဝတ်ကို အဆက်မပြတ် ဆွဲနေတော့သည်။

"အန္တရာယ် ရှိလို့လား"

ရွှီရှင်းက ရုပ်တုကို မျက်တောင်မခတ်ဘဲ စိုက်ကြည့်ရင်း မေးလိုက်သည်။

"အီးးး"

ခဲခဲ က သူ၏ပုခုံးပေါ်မှနေ၍ ခေါင်းကို အားပါးတရ ညိတ်ပြသည်။

"သောက်ကျိုးနည်း။ ငါ့အထင် တကယ်မှန်သွားပြီလား။"

ရွှီရှင်းသည် ယဇ်ပလ္လင်နယ်မြေ ပြင်ပရှိ ငွေရောင်ဘုရင်ရှိရာအထိ နောက်ပြန်ဆုတ်လိုက်ပြီး၊ ထိုရုပ်တုကို စိုးရိမ်တကြီး စောင့်ကြည့်နေမိသည်။

စက္ကန့်အနည်းငယ်..စက္ကန့်ပိုင်း..တစ်မိနစ်... ရွှီရှင်းသည် မြှားသေနတ် ကို ကိုင်ထားပြီး ဇွတ်အတင်း မလှုပ်ရှားရဲချေ။

ကျောက်တိုင်မှ ထွက်ပေါ်နေသော အပူရှိန်မှလွဲ၍ ယဇ်ပလ္လင်အတွင်းမှာ အလွန်ပင် တိတ်ဆိတ်နေသည်။

ဘာမှမဖြစ်တော့ဘူးဟု ထင်ကာ ရွှီရှင်း သက်ပြင်းချလိုက်ရုံရှိသေး၊ ရုတ်တရက် အပြောင်းအလဲတစ်ခု ဖြစ်ပေါ်လာသည်။

ယုန်ရုပ်တုရှိသော ကျောက်တိုင်ပေါ်က သွေးရောင်ပုံစံများသည် ဝင်းခနဲ လင်းလက်လာပြီး၊ ကျောက်သားများ ကွဲအက်သံကို ရွှီရှင်း ကြားလိုက်ရသည်။

သွေးရောင်အလင်းတန်းများသည် ထိုပုံစံများအတိုင်း ရုပ်တုအတွင်းပိုင်းမှ ထွက်ပေါ်လာကာ ယဇ်ပလ္လင်တစ်ခုလုံးကို အနီရောင်လွှမ်းသွားစေသည်။

"သောက်ကျိုးနည်း၊ ဒီလိုကိုး"

ရွှီရှင်း စိတ်ထဲမှ ကျိန်ဆဲလိုက်သည်။

ရုပ်တုပေါ်တွင် သွေးရောင်ပုံစံများ စတင်ပေါ်လာကတည်းက တစ်ခုခုတော့ မှားနေပြီဟု သူ ခံစားခဲ့ရသည်။

ထိုပုံစံများ ရုပ်တုတစ်ခုလုံးကို ဖုံးလွှမ်းသွားလျှင် ၎င်းမှာ မိန်းမောဖွယ်ရာ သတ္တဝါကြီးတစ်ကောင်အဖြစ် ပြောင်းလဲသွားလိမ့်မည်ဟု သူ ကြိုတင်သိမြင်ခဲ့သည်။

ဤအနီရောင်ပုံစံများသည် မြေအောက်က အရာများနှင့် ဆက်စပ်နေပြီး၊ သာမန်သတ္တဝါများကို ဗီဇပြောင်းလဲစေသည့် လျှို့ဝှက်ဆန်းပြားသော အင်အား သို့မဟုတ် အထူးဗိုင်းရပ်စ်တစ်မျိုးမျိုး ဖြစ်ပေလိမ့်မည်။

ရွှီရှင်းသည် ကျောပိုးအိတ် ထဲမှ သူ၏ သံချပ်ကာအစုံ (အပြာရောင်အဆင့်) ကို ချက်ချင်းထုတ်ကာ ဝတ်ဆင်လိုက်သည်။

အမဲလိုက်ရာတွင် ထိရောက်မှုရှိစေရန် သူသည် တလျှောက်လုံး သားရေချပ်ဝတ် ကိုသာ ဝတ်လာခဲ့ခြင်း ဖြစ်သည်။

ရုပ်တုပေါ်က အက်ကြောင်းများ ပိုမိုကျယ်လာပြီး အတွင်းမှ ထွက်ပေါ်နေသော သွေးရောင်အလင်းများမှာလည်း ပို၍ ပြင်းထန်လာသည်။

ရုတ်တရက် ရွှီရှင်း၏ နာရီ တုန်ခါလာ၏။

သူ ကြည့်လိုက်ရာ ကျိချောင်းယန်ထံမှ စာတစ်စောင် ဖြစ်နေသည်။

"ရွှီရှင်း... ယဇ်ပလ္လင်မှာ ပူဇော်သက္ကာတွေ သွားမဆက်သနဲ့ဦး၊ အဲဒီ ကျောက်ရုပ်တုတွေက အသက်ဝင်လာလိမ့်မယ်။"

တိုက်ဆိုင်လိုက်တာ။

ကျိချောင်းယန်မှာ စေတနာကောင်းတဲ့ ပညာရှင်တစ်ယောက်ဖြစ်တာ သေချာပေမဲ့၊ ကံမကောင်းစွာဖြင့်...

ရွှီရှင်းသည် ကွဲအက်နေသော ရုပ်တုကို ကြည့်ရင်း ခါးသီးစွာ ပြုံးလိုက်ပြီး သူ၏နာရီကို ကြည့်ကာ ပြန်ပြောလိုက်သည်။

"မင်း ပြောတာ နောက်ကျသွားပြီ၊ သူက အသက်ဝင်နေပြီ။"

ရုပ်တု၏ ကျောက်စအစလေးများမှာ ကျောက်တိုင်ပေါ်မှ ပြုတ်ကျလာပြီး အနီရောင်နှင့် အဖြူရောင် ရောနှောနေသော အမွေးအမျှင်များကို မြင်တွေ့လာရသည်။

နောက်ဆုံးတွင် ကျယ်လောင်သော ပေါက်ကွဲသံနှင့်အတူ ယုန်ရုပ်တုမှာ လုံးဝ ပွင့်ထွက်သွားပြီး၊ ရုပ်တုနှင့် ထပ်တူကျသော တောဝက်တစ်ကောင်စာခန့် ကြီးမားသည့် ယုန်ကြီးတစ်ကောင် ကျောက်တိုင်ပေါ်တွင် ရပ်နေတော့သည်။

အမှန်အတိုင်းပြောရလျှင် ထိုယုန်၏ အရွယ်အစားကို မြင်လိုက်ရသောအခါ ရွှီရှင်း၏ ထိတ်လန့်နေသော စိတ်မှာ အနည်းငယ် ပြန်လည် တည်ငြိမ်သွားသည်။

ဤ သွေးရောင်ယုန် မှာ သာမန်ယုန်ထက် များစွာ ကြီးမားသော်လည်း၊ ဝက်ဝံ သို့မဟုတ် တောဝက် အရွယ်အစားလောက်သာ ရှိပြီး ဖြစ်နိုင်လျှင် ပို၍ပင် သေးငယ်ဦးမည်။

ရွှီရှင်းအနေဖြင့် ၎င်းကို ကိုင်တွယ်နိုင်လိမ့်မည်ဟု ခံစားရသည်။

မြေပုံပေါ်တွင်လည်း သွေးရောင်ယုန် ၏ အနီစက် အလင်းမှာ ဝက်ဝံနက် သို့မဟုတ် တောဝက်ထက် အနည်းငယ်သာ ပိုလင်းပြီး၊ ဝက်ဝံညို နှင့် ကျားများ၏ အလင်းအထိ မရောက်ရှိသေးချေ။

သွေးရောင်ယုန် သည် ရွှီရှင်းရှိရာဘက်သို့ လှည့်ကြည့်လိုက်ရာ၊ ၎င်း၏ နီရဲသော မျက်လုံးများမှ ထူးဆန်းသော အလင်းတန်းများ ထွက်ပေါ်နေပြီး ပါးစပ်မှာ အနည်းငယ် ပွင့်ဟလျက် စူးရှပြီး နားမခံသာသော သွားကြိတ်သံများ ထွက်ပေါ်နေသည်။

အရင်ဦးအောင် ‌ဆော်ရမယ်။

ရွှီရှင်း လက်ကိုမြှောက်ကာ တင်ထားပြီးသား သာမန် မြှားကို ပစ်လွှတ်လိုက်သည်။

မြှားက ယုန်ကို ထိခါနီး အချိန်မှာပင်၊ ထိုယုန်မှာ ကျောက်တိုင်ကို အားပြုကာ မြေပြင်မှ ပစ်လွှတ်လိုက်သော ဒုံးကျည်ကဲ့သို့ပင် မယုံနိုင်စရာ အရှိန်အဟုန်ဖြင့် လေထဲသို့ ခုန်တက်သွားတော့သည်။

မြှားမှာ သွေးရောင်ယုန် မူလရှိနေသည့် နေရာကိုသာ ဖြတ်သွားပြီး တောအုပ်ထဲသို့ ပျောက်ကွယ်သွားသည်။

"ဒါက..."

ရွှီရှင်း၏ မျက်လုံးများ ပြူးသွားကာ သူ၏ မြှားတောင့်ထဲမှ အဆိပ်မြှား တစ်စင်းကို လျင်မြန်စွာ ထုတ်ယူ၍ မြှားတင်လိုက်သည်။

သူ မြှားတင်ပြီးသည်နှင့် ယုန်မှာ လေထဲမှ ပြန်လည် ဆင်းသက်လာခဲ့ပြီ ဖြစ်သည်။

"ဝုန်း"

ကျယ်လောင်သော အသံနှင့်အတူ ယုန်သည် ရွှီရှင်း၏ ရှေ့ မီတာအနည်းငယ် အကွာတွင် ကျရောက်လာ၏။

၎င်း၏ မတ်တပ်ရပ်နေသော ခန္ဓာကိုယ်မှာ တစ်မီတာခွဲခန့် မြင့်မားပြီး၊ နီရဲသော မျက်လုံးများက ရွှီရှင်း၏ မျက်လုံးများနှင့် အေးစက်စွာ ဆုံနေတော့သည်။

၎င်း၏ ပါးစပ်မှလည်း စူးရှသော သွားကြိတ်သံများ အဆက်မပြတ် ထွက်ပေါ်နေပြီး၊ ဓားရှည်များနှင့်တူသော နားရွက်များမှာလည်း ထောင်မတ် နေကာ အချိန်မရွေး ခုတ်ချတော့မည့်အလား ရှိနေသည်။

ယုန် မြေပြင်ပေါ်သို့ ဆင်းသက်လာသည်နှင့် တပြိုင်နက်၊ ရွှီရှင်းသည် မြှားသေနတ် ကို ယုန်၏ ဦးခေါင်းဆီသို့ ချက်ချင်း ချိန်ရွယ်ကာ ခလုတ်ကို ဆွဲလိုက်ပါတော့သည်။

---

အပိုင်း (၆၂) ပြီး။