စိတ်ညှို့နတ်ဆိုးကို ဝါးမြိုခြင်း၊ အိပ်မက်ဝိညာဉ်ကူ စတုတ္ထအဆင့် ထိပ်တန်းအဆင့်သို့ တက်လှမ်းခြင်း(၂)။

ဘာ...။

စိတ်ညှို့နတ်ဆိုး ခေါင်းမော့ကြည့်လိုက်ရာ လိပ်ပြာလွင့်မတတ် ကြောက်လန့်သွားရသည်။

ကောင်းကင်ယံထက်တွင် အဆုံးမဲ့ ကပ်ဘေးတိမ်တိုက်များ ဝန်းရံနေပြီး၊ ခရမ်းရောင် ကပ်ဘေးမိုးကြိုး အများအပြားသည် တိမ်လွှာများကြားတွင် လင်းခနဲ လက်ခနဲ ဖြစ်ပေါ်နေသည်။ မိုးကြိုးမြွေများ ကူးခတ်နေသကဲ့သို့ ရှိပြီး ရင်တုန်ဖွယ်ရာ အရှိန်အဝါများ ထုတ်လွှတ်နေကာ၊ ကောင်းကင်ဘုံ ကပ်ဘေးကျရောက်လာသကဲ့သို့ ဖြစ်နေချေသည်။

ဤဧရိယာတစ်ခုလုံးသည် အဆုံးမဲ့ မိုးကြိုးပင်လယ်အဖြစ် ပြောင်းလဲသွားချေပြီ။

ဤလူသားကျင့်ကြံသူသည် မိုးကြိုးပင်လယ်ကို ဆင့်ခေါ်နိုင်လောက်သော အတိုင်းအတာအထိ ကြောက်မက်ဖွယ် ကောင်းနေလိမ့်မည်ဟု သူ အိပ်မက်ပင် မမက်ဖူးခဲ့ပေ။

ဒါ… ဒါ… လူရော ဟုတ်ရဲ့လားကွာ...။

ထင်ရှားသည်မှာ အစောပိုင်းက တိုက်ခိုက်မှုသည် အမြည်းသဘောမျှသာ ဖြစ်ပုံရလေသည်။

ဘန်း… ဘန်း… ဘန်း…။

နောက်တစ်စက္ကန့်တွင် ရာထောင်ချီသော ခရမ်းရောင် ကပ်ဘေးမိုးကြိုးများသည် ကောင်းကင်မှ ကျဆင်းလာပြီး ဤဧရိယာကို ဖုံးလွှမ်းသွားကာ၊ အကြီးအကဲချင်းယဲ့နှင့် အကြီးအကဲယွီကူ စသည့် ပင်လယ်မျိုးနွယ်စု ဝိညာဉ်သန္ဓေသား ကျင့်ကြံသူများ၏ အရှိန်အဝါများကို အသေမှတ်လိုက်လေသည်။

၎င်းတို့သည် မိုးကြိုးနဂါးများကဲ့သို့ ဟိန်းဟောက်သံများဖြင့် ကောင်းကင်ကို ဖြတ်သန်းကာ အံ့သြဖွယ် အမြန်နှုန်းဖြင့် ပစ်ခတ်ကျဆင်းလာရာ၊ ရှောင်လွှဲပုန်းကွယ်၍ မရနိုင်အောင် ဖြစ်နေလေသည်။

"သေစမ်းကွာ..."

အကြီးအကဲချင်းယဲ့နှင့် အကြီးအကဲယွီကူ အစရှိသော ပင်လယ်မျိုးနွယ်စု ကျင့်ကြံသူများ၏ မျက်နှာအမူအရာများ ကြီးမားစွာ ပျက်ယွင်းသွားကြသည်။ သူတို့တွင် ရွေးချယ်စရာ မရှိတော့ဘဲ နတ်ဘုရားစွမ်းရည်ကို ထုတ်သုံးလိုက်ပြီး ကြီးမားသော ရေစီးကြောင်းနံရံတစ်ခုကို သူတို့ရှေ့တွင် ပိတ်ဆို့ထားလိုက်ကြရသည်။

ဤရေစီးကြောင်းနံရံပေါ်တွင် သိပ်သည်းသော ရေစွမ်းအင်သင်္ကေတများ ဖုံးလွှမ်းထားပြီး ရေစွမ်းအင်အတားအဆီးတစ်ခု ဖြစ်ပေါ်နေသကဲ့သို့ ရှိလေသည်။

စွမ်းအားကြီးမားသော ကာကွယ်မှုစွမ်းရည်ပင်။

ဝမ်းနည်းစရာမှာ ဤကဲ့သို့သော လုပ်ရပ်သည် အဓိပ္ပာယ်မရှိဘဲ မည်သည့် အကျိုးသက်ရောက်မှုမျှ မရှိခြင်းပင် ဖြစ်၏။

ခရမ်းရောင် ကပ်ဘေးမိုးကြိုးများ တစ်ခုပြီးတစ်ခု ဆက်တိုက်ကျဆင်းလာပြီး ဤရေစီးကြောင်းနံရံကို လွယ်ကူစွာ ဖောက်ထွင်းသွားကာ သူတို့၏ ခန္ဓာကိုယ်ပေါ်သို့ တိုက်ရိုက် ရောက်ရှိသွားလေသည်။

ဝုန်း...

သူတို့ ဂုဏ်ယူဝင့်ကြွားရသော ပင်လယ်မျိုးနွယ်စု ကျင့်ကြံသူများ၏ အကာအကွယ်သည် ယခုအခါ ကပ်ဘေးမိုးကြိုးရှေ့တွင် စက္ကူကဲ့သို့ ပါးလျနေပြီး၊ လွယ်ကူစွာ ဖြတ်တောက်ခံလိုက်ရကာ သူတို့၏ ခန္ဓာကိုယ် အတွင်းပိုင်းအထိ တိုက်ရိုက် တိုက်ခိုက်ခံလိုက်ရသည်။

"အား... အား... အား..."

ချက်ချင်းပင် ဤပင်လယ်မျိုးနွယ်စု ကျင့်ကြံသူများသည် သနားစဖွယ် အော်ဟစ်လိုက်ကြရပြီး၊ ခန္ဓာကိုယ်တွင် စူးရှသော နာကျင်မှုကို ခံစားလိုက်ရကာ၊ ကြောက်မက်ဖွယ် ကပ်ဘေးမိုးကြိုးစွမ်းအားများသည် သူတို့၏ ခန္ဓာကိုယ်ကို ရူးသွပ်စွာ ဖျက်ဆီးပစ်လိုက်တော့သည်။

ဘန်းခနဲ အသံနှင့်အတူ သူတို့၏ ခန္ဓာကိုယ်သည် တစ်စက္ကန့်မျှပင် ခံနိုင်ရည်မရှိဘဲ ချက်ချင်း အပိုင်းပိုင်းကွဲကြေကာ သွေးများ ပန်းထွက်သွားတော့သည်။

တစ်ယောက်စီတိုင်း မျက်လုံးပြူးကျယ်နေပြီး သေဆုံးခြင်းကို လက်သင့်မခံနိုင်ဘဲ သေဆုံးသွားကြရသကဲ့သို့ ရှိနေလေသည်။

သူတို့သည် ဝိညာဉ်သန္ဓေသား အစောပိုင်းအဆင့် လူသားကျင့်ကြံသူတစ်ဦး၏ လက်ချက်ဖြင့် ဤမျှ ဆိုးရွားစွာ သေဆုံးရလိမ့်မည်ဟု မယုံကြည်နိုင်ကြပေ။

အကယ်၍ ဤကိစ္စသာ ပျံ့နှံ့သွားပါက ချန်လန်ပင်လယ်ဒေသတစ်ခုလုံးကို သေချာပေါက် တုန်လှုပ်သွားစေလိမ့်မည်။

"'မိုးကြိုးကပ်ဘေးကူ'ရဲ့ စွမ်းအားက ဒီလောက်တောင် ကြမ်းတာလား..."

ဤမြင်ကွင်းကို မြင်လိုက်ရသောအခါ ကျိုးစွေ့သည်လည်း တိတ်တဆိတ် အံ့သြသွားမိလေ၏။

'မိုးကြိုးကပ်ဘေးကူ'သည် ပြိုင်ဘက်ကင်းအောင် စွမ်းအားကြီးမားကြောင်း သူ စောစီးစွာကပင် သိထားသော်လည်း၊ ဤမျှအထိ စွမ်းအားကြီးမားလိမ့်မည်ဟု မထင်ထားခဲ့မိပေ။ ဤပင်လယ်မျိုးနွယ်စု ကျင့်ကြံသူများကို ချက်ချင်း သတ်ဖြတ်နိုင်ပြီး ဟင်းသီးဟင်းရွက် လှီးဖြတ်သကဲ့သို့ လွယ်ကူလွန်းလှသည်။

မှန်ပေသည်၊ ဤသို့ လုပ်ဆောင်နိုင်ရခြင်း အကြောင်းရင်းမှာ ကပ်ဘေးမိုးကြိုး၏ စွမ်းအားသည် မိစ္ဆာသားရဲကျင့်ကြံသူများအတွက် သေစေနိုင်သော စွမ်းအားဖြစ်ပြီး၊ သဘာဝရန်သူကဲ့သို့ ဖြစ်နေသောကြောင့် ဖြစ်သည်။

တစ်ဆ အားစိုက်ထုတ်ရုံဖြင့် ဆယ်ဆသော ထိခိုက်မှုကို ဖြစ်စေနိုင်သည်။

ထို့ကြောင့်သာ ဤကဲ့သို့သော ရလဒ် ထွက်ပေါ်လာခြင်း ဖြစ်၏။

အကယ်၍ အခြားစွမ်းအားသာ ဆိုပါက ဤကဲ့သို့သော အကျိုးသက်ရောက်မှု ရှိချင်မှ ရှိပေလိမ့်မည်။

ဝှစ်...

နောက်တစ်စက္ကန့်တွင် အလင်းမဲတစ်ခုသည် မီးခိုးငွေ့များကြားမှ ရုတ်တရက် ထွက်ပေါ်လာပြီး၊ လျှပ်စီးလက်သကဲ့သို့ လျင်မြန်သော အရှိန်ဖြင့် ကျိုးစွေ့ထံသို့ ပြေးဝင်လာကာ သူ၏ ခန္ဓာကိုယ်ထဲသို့ ချက်ချင်း ဝင်ရောက်သွားလေသည်။

"ဟားဟား... မိုက်မဲတဲ့ လူသား... မင်း နောက်ဆုံးတော့ ငါ့အကွက်ထဲ ဝင်လာပြီပဲ..."

"မကြာခင် မင်း ငါ့ရဲ့ ရုပ်သေးရုပ် ဖြစ်လာတော့မှာ... ငါ့ထိန်းချုပ်မှုကို အသာလေး ခံယူလိုက်တော့..."

စကားပြောလိုက်သူမှာ စိတ်ညှို့နတ်ဆိုးဖြစ်ကြောင်း ထင်ရှားပေသည်။

အစောပိုင်းက ပင်လယ်မျိုးနွယ်စု ကျင့်ကြံသူ အများအပြား သေဆုံးသွားခဲ့သော်လည်း စိတ်ညှို့နတ်ဆိုးမှာမူ မသေဆုံးသေးပေ။

ထို့အစား ကျိုးစွေ့ သတိလွတ်နေချိန်ကို အခွင့်ကောင်းယူပြီး သူ၏ ခန္ဓာကိုယ်ထဲသို့ ချက်ချင်း ဝင်ရောက်ကာ ဝိညာဉ်ကို ထိန်းချုပ်ရန် ကြိုးစားလိုက်ခြင်းပင် ဖြစ်သည်။

ထင်ရှားသည်မှာ သူသည် ကျိုးစွေ့ကို သတ်ဖြတ်လိုသည့် အကြံအစည်ကို ဘယ်တုန်းကမှ မေ့ပျောက်ခြင်း မရှိခဲ့ပေ။

"ငါ့ကိုယ်ထဲကို တကယ်ပဲ ဝင်လာရဲတာလား..."

"တကယ့်ကို နတ်ပြည်မှာ လမ်းရှိတာကျ မလျှောက်ဘဲ... ငရဲမှာ တံခါးမရှိတာကိုမှ ဇွတ်တိုးဝင်လာတာပဲ..."

ကျိုးစွေ့၏ မျက်နှာပေါ်တွင် ထူးဆန်းသော အပြုံးတစ်ခု ပေါ်လာချေသည်။

သူသည် လက်ရှိတွင် ကိုယ်ပွားတစ်ခုသာ ဖြစ်နေပြီး၊ တစ်ဖက်လူက ထိန်းချုပ်လိုက်နိုင်လျှင်တောင်မှ မူလခန္ဓာကို ဘာမှ လုပ်နိုင်မည် မဟုတ်ပေ။

ထို့အပြင်၊ သူ၏ကိုယ်ပေါ်တွင် 'အိပ်မက်ဝိညာဉ်ကူ'၏ အကာအကွယ် ရှိနေသည်ဖြစ်ရာ၊ ဤစိတ်ညှို့နတ်ဆိုး သူ့ခန္ဓာကိုယ်ထဲ ဝင်လာခြင်းသည် ကိုယ့်သေတွင်း ကိုယ်တူးခြင်းပင် မဟုတ်ပါလော။

ဝုန်း...

ဤအခိုက်အတန့်တွင် 'အိပ်မက်ဝိညာဉ်ကူ'သည် တစ်စုံတစ်ခုကို အာရုံခံမိလိုက်သကဲ့သို့ ရှိပြီး၊ မမြင်နိုင်သော အိပ်မက်စွမ်းအားတစ်ခုက စိတ်ညှို့နတ်ဆိုးကို ချက်ချင်း ဖုံးလွှမ်းသွားကာ စိတ်ညှို့နတ်ဆိုး၏ ဆုတ်ခွာလမ်းကြောင်း အားလုံးကို ပိတ်ဆို့လိုက်လေသည်။

"ဘာဖြစ်တာလဲ..."

စိတ်ညှို့နတ်ဆိုးမှာ ချက်ချင်း ကြောင်အသွားသည်။ မူလက သူသည် ဤလူသား၏ ဝိညာဉ်နှင့် စိတ်နှလုံးကို လျင်မြန်စွာ ညစ်ညမ်းစေပြီး၊ ဤလူသားကို မိမိလို စိတ်တိုင်းကျ ဖြစ်လာအောင် ပြောင်းလဲကာ ရုပ်သေးရုပ်အဖြစ် ပြောင်းလဲပစ်ချင်ခဲ့သည်။

သို့သော် ယခုမူ သူ၏ ရှေ့တွင် ကြောက်မက်ဖွယ် ကူပိုးကောင်ကြီးတစ်ကောင် ပေါ်လာသည်ကို အံ့သြစွာ တွေ့လိုက်ရသည်။ ၎င်းသည် နက်ရှိုင်းသော ချောက်ကမ်းပါးကြီးထဲမှ မကောင်းဆိုးဝါးကြီးနှင့် တူညီကာ ခန္ဓာကိုယ်ပေါ်တွင် ရောင်စုံအဆင်းများ ပေါ်လွင်နေလေသည်။

တစ်ဖက်လူ၏ ခန္ဓာကိုယ်ထဲတွင် အိပ်မက်ပူပေါင်းများ ပါဝင်နေပုံရပြီး၊ အတွင်းထဲတွင် စိတ်နှလုံး အမှိုက်သရိုက်များ မည်မျှ ပါဝင်နေသည်ကို မသိနိုင်ချေ။

နှိုင်းယှဉ်လိုက်ပါက မိမိသည် ဖြူစင်သန့်ရှင်းသော ကြွက်ဖြူလေးတစ်ကောင်ကဲ့သို့ ဖြစ်နေလေသည်။ တစ်ဖက်လူကမှ စစ်မှန်သော နက်ရှိုင်းသည့် ချောက်ကမ်းပါးကြီးထဲမှ မကောင်းဆိုးဝါးသားရဲကြီး ဖြစ်နေသည်။

ယခု သူသည် ဘိုးဘေးဆရာသခင်ကို တွေ့ဆုံလိုက်ရသကဲ့သို့ ဖြစ်နေတော့သည်။

"သေစမ်းကွာ... ဒီလူသားရဲ့ ကိုယ်ပေါ်မှာ ဘာကောင်ကြီး ရှိနေတာတုန်း..."

"ဘယ်သူက နတ်ဆိုးလဲကွာ..."

စိတ်ညှို့နတ်ဆိုးခမျာ ချက်ချင်းပင် သေးထွက်လုမတတ် ကြောက်လန့်သွားရသည်။

သူသည် နဂါးခံတွင်း၊ ကျားလိုဏ်ဂူထဲသို့ ဝင်ရောက်မိသွားသကဲ့သို့ ခံစားလိုက်ရပြီး၊ ဤခန္ဓာကိုယ်ထဲမှ ထွက်ပြေးရန် ပင်ကိုအသိစိတ်ဖြင့် ကြိုးစားလိုက်တော့သည်။

ဝမ်းနည်းစရာမှာ အလွန် နောက်ကျသွားချေပြီ။

'အိပ်မက်ဝိညာဉ်ကူ'သည် ပါးစပ်ကြီးကို ဖွင့်လိုက်ပြီး စိတ်ညှို့နတ်ဆိုးကို တစ်လုပ်တည်း ဝါးမြိုလိုက်လေသည်။

"မလုပ်... မလုပ်နဲ့..."

စိတ်ညှို့နတ်ဆိုး စူးရှစွာ အော်ဟစ်လိုက်သည်။ မူလက အစွမ်းကုန် ရုန်းကန်ကာ၊ ခန္ဓာကိုယ်ပေါ်မှ မိစ္ဆာအငွေ့အသက်များကို ထုတ်လွှတ်ရန် ကြိုးစားသော်လည်း၊ 'အိပ်မက်ဝိညာဉ်ကူ' အတွက် မည်သည့် အကျိုးသက်ရောက်မှုမျှ မရှိဘဲ မည်သို့မျှ ညစ်ညမ်းအောင် လုပ်ဆောင်နိုင်ခြင်း မရှိချေ။

ဂျလွတ်… ဂျလွတ်…

စိတ်ညှို့နတ်ဆိုးသည် 'အိပ်မက်ဝိညာဉ်ကူ'၏ ဝါးမြိုခြင်းကို ခံလိုက်ရပြီး အရသာရှိသော အစားအစာတစ်ခု ဖြစ်သွားရတော့သည်။

ခဏအကြာတွင် ဤစိတ်ညှို့နတ်ဆိုးသည် လျင်မြန်စွာ ချေဖျက်ခံလိုက်ရပြီး အနက်ရောင် အိပ်မက်ပူပေါင်းတစ်လုံးအဖြစ် ပြောင်းလဲသွားလေသည်။

ဝုန်း...

ဤအချိန်တွင် စိတ်ညှို့နတ်ဆိုးကို ဝါးမြိုပြီးနောက် 'အိပ်မက်ဝိညာဉ်ကူ'သည် နှစ်သောင်းချီ သက်တမ်းရှိသော ဝိညာဉ်ဆေးမြစ်ကို စားသုံးလိုက်ရသကဲ့သို့ အကန့်အသတ်ထိ ကြီးမားသော ဝိညာဉ်စွမ်းအင်များကို ရရှိလိုက်လေသည်။

ဝိညာဉ်သန္ဓေသားအဆင့် စိတ်ညှို့နတ်ဆိုးတစ်ကောင် ပိုင်ဆိုင်ထားသော ဝိညာဉ်စွမ်းအင် တစ်ခုတည်းကပင် ဝိညာဉ်သန္ဓေသား ကျင့်ကြံသူ ရာပေါင်းများစွာ၏ ဝိညာဉ်စွမ်းအင်နှင့် ညီမျှနေပြီး အရည်အသွေးလည်း အလွန် မြင့်မားလှသည်။

တစ်ခဏချင်းတွင် 'အိပ်မက်ဝိညာဉ်ကူ'၏ ခန္ဓာကိုယ်ပေါ်ရှိ စွမ်းအားသည် ဆတိုးကိန်းဖြင့် တိုးတက်လာခဲ့သည်။

၎င်း၏ ခန္ဓာကိုယ်အတွင်းပိုင်း ဟင်းလင်းပြင်သည်လည်း ဤအခိုက်အတန့်တွင် ထပ်မံ ကျယ်ပြန့်လာပုံ ရသည်။

စတုတ္ထအဆင့် ထိပ်တန်းအဆင့်...။

ချက်ချင်းပင် 'အိပ်မက်ဝိညာဉ်ကူ'၏ အဆင့်သည် စတုတ္ထအဆင့် အလယ်အလတ်အဆင့်မှ စတုတ္ထအဆင့် ထိပ်တန်းအဆင့်သို့ တိုးတက်သွားခဲ့သည်။

မူလက ၎င်း၏ စွမ်းအားတိုးတက်ရန်အတွက် ဝိညာဉ်စွမ်းအင် အမြောက်အမြား လိုအပ်ပြီး ရှည်လျားသော အချိန်ကာလတစ်ခုအထိ ကျင့်ကြံရန် လိုအပ်သည်။

သို့သော် ယခုမူ စိတ်ညှို့နတ်ဆိုးကို ဝါးမြိုပြီးနောက် 'အိပ်မက်ဝိညာဉ်ကူ'၏ စွမ်းအားကို ချက်ချင်း အမြောက်အမြား တိုးပွားလာစေခဲ့သည်။

"ဒီလို အကျိုးကျေးဇူးတွေတောင် ရှိတာလား..."

"တကယ်လို့ စိတ်ညှို့နတ်ဆိုး အများကြီးကို ဝါးမြိုနိုင်ရင် 'အိပ်မက်ဝိညာဉ်ကူ'ရဲ့ စွမ်းအားကို ပဉ္စမအဆင့်အထိ အမြန်ဆုံး တိုးမြှင့်နိုင်မှာ မဟုတ်ဘူးလား..."

ကျိုးစွေ့ မေးစေ့ကို ပွတ်သပ်လိုက်သည်။

'အိပ်မက်ဝိညာဉ်ကူ'က စိတ်ညှို့နတ်ဆိုးကို ဝါးမြိုပြီးနောက် ဤမျှများပြားသော အကျိုးကျေးဇူးများ ရရှိလိမ့်မည်ဟု သူ မထင်ထားခဲ့မိပေ။

ဤအခိုက်အတန့်တွင် 'အိပ်မက်ဝိညာဉ်ကူ' ပိုင်ဆိုင်ထားသော အိပ်မက်ကမ္ဘာစွမ်းအားသည် ပိုမို အားကောင်းလာပြီး လွှမ်းခြုံနိုင်သော ဧရိယာသည်လည်း နှစ်ဆ ကျယ်ပြန့်လာခဲ့သည်။

အိပ်မက်ထဲသို့ ဝင်ရောက်စေနိုင်သော စွမ်းအားသည်လည်း ပိုမို ဆန်းကြယ်လာခဲ့သည်။

သို့သော် စိတ်ညှို့နတ်ဆိုး အမြောက်အမြားကို ဝါးမြိုရန်မှာ အခြေခံအားဖြင့် မဖြစ်နိုင်သော ကိစ္စဖြစ်သည်။

အဘယ်ကြောင့်ဆိုသော် နတ်ဆိုးအများအပြားကြားတွင်ပင် စိတ်ညှို့နတ်ဆိုးသည် အတော်လေး ထူးခြားပြီး အရေအတွက် အလွန် ရှားပါးသောကြောင့် ဖြစ်သည်။

ရှေးဟောင်းခေတ်တွင်ပင် စိတ်ညှို့နတ်ဆိုးကို အများအပြား ရှာဖွေ၍ မရနိုင်ခဲ့ပေ။

ဤကဲ့သို့ ဝိညာဉ်သန္ဓေသားအဆင့် စိတ်ညှို့နတ်ဆိုးတစ်ကောင်ကို ဝါးမြိုနိုင်ခြင်းသည် ကောင်းကင်ဘုံပေးသော ကံကောင်းခြင်းတစ်ခုဟု ပြောနိုင်ပေသည်။

မှန်ပေသည်၊ သာမန်နည်းလမ်းဖြင့် စိတ်ညှို့နတ်ဆိုးကို သတ်ဖြတ်ရန်မှာလည်း အခြေခံအားဖြင့် မဖြစ်နိုင်သော ကိစ္စပင်။

အကယ်၍ 'အိပ်မက်ဝိညာဉ်ကူ'၏ စွမ်းအားသာ မပါဝင်ခဲ့လျှင် စိတ်ညှို့နတ်ဆိုး ထွက်ပြေးလွတ်မြောက်သွားနိုင်ချေ ရှိပေသည်။