အခန်း (၃၀၁)

အခန်း။ ၃၀၁

သစ်သားရှန်းယွီသည် သူ၏ ဝေဝေဆာဆာ ရှင်သန်နေသော ဆေးဖက်ဝင်ဥယျာဉ်ရှေ့တွင် ရပ်နေသည်။

သုတေသနပညာရပ်ကို ရရှိပြီးနောက်တွင်မူ အလင်းကိုယ်ပွါးသည် အလင်းနှင့် အမှောင်စွမ်းအင်များက ဆေးဖက်ဝင်အပင်များအပေါ် သက်ရောက်မှုကို ယခင်ကထက် ပိုမိုထိရောက်စွာ လေ့လာနိုင်ခဲ့သည်။

ရရှိလာသော အချက်အလက်များအားလုံးဖြင့် ရှန်းယွီသည် မိစ္ဆာစွမ်းအင်ကျူးကျော်မှုကို ပြောင်းပြန်လှန်နိုင်မည့် နည်းလမ်းတစ်ခုကို သီအိုရီအရ ဖော်ထုတ်နိုင်ခဲ့ပြီဖြစ်သည်။

ကံကောင်းထောက်မစွာဖြင့် လိုအပ်သော ဆေးဖက်ဝင်အပင်များမှာ ထင်သလောက် အဆင့်မမြင့်လှပေ ဆဋ္ဌမအဆင့်မျှသာ ဖြစ်သည်။

အမှန်စင်စစ် ထိုအပင်များသည် အရှေ့ပိုင်းတိုက်ကြီးတွင် အလွန်ရှားပါးလှသော်လည်း တစ်နေ့လျှင် အကြိမ်ပေါင်းများစွာ ရိတ်သိမ်းနိုင်သော သူ့အတွက်မူ ဘာမှမဟုတ်ပေ။ ယခု သူ ပြန်စဉ်းစားကြည့်မိသည်မှာ ကုသဆေးကို ဖော်စပ်ပြီးပါက အခြားသော ဂိုဏ်းများအနေဖြင့် ၎င်းကို ဝယ်ယူနိုင်စွမ်း ရှိလိမ့်မည်မဟုတ်ပေ။

ဂိုဏ်းကြီးငါးခုပင်လျှင် ဆေးအနည်းငယ်ကိုသာ ဝယ်ယူနိုင်ပေလိမ့်မည်။ သို့သော် ရှန်းယွီက ဆေးကို ဈေးကြီးပေးရန် အစီအစဉ်မရှိပေ။ အမှန်တော့ ထုတ်လုပ်စရိတ် သိပ်မရှိသဖြင့် သူက အခမဲ့ ပေးကမ်းရန်ပင် ဝန်မလေးပေ။ အဆုံးသတ်ကာလများတွင် လူတစ်ယောက်ကို ရေတစ်ခွက် ပေးရုံဖြင့် မိမိအပေါ် အကြွေးတင်သွားအောင် လုပ်ရသည်မှာ ပို၍လွယ်ကူလှသည်။

မီးကိုယ်ပွါးရှန်းယွီသည် တစ်ဝက်ဖြူ တစ်ဝက်နက်နေသော ဆေးလုံးတစ်လုံးကို လက်တွင်

ကိုင်ကာ ဖမ်းဆီးထားသော မိစ္ဆာတစ်ကောင်ကို ချည်နှောင်ထားသည့်နေရာသို့ လမ်းလျှောက်သွားခဲ့သည်။ ထိုသတ္တဝါမှာ ယခင်ကကဲ့သို့ ခွန်အားမရှိတော့ပုံပင်။ သူ စမ်းသပ်မှုပေါင်းများစွာ လုပ်ဆောင်ခဲ့သည်ကို ထည့်တွက်လျှင် ထိုမိစ္ဆာ အသက်ရှင်နေသေးသည်မှာပင် သူ အံ့ဩနေမိသည်။

သူသည် ဆေးလုံးကိုယူကာ မိစ္ဆာကို အတင်းအကျပ် တိုက်ကျွေးလိုက်၏။

ဆေးလုံးသည် မိစ္ဆာ၏ ခန္ဓာကိုယ်အတွင်းသို့ ရောက်သွားသည်နှင့်တစ်ပြိုင်နက် ၎င်းမှာ နာကျင်စွာဖြင့် စတင်လူးလိမ့်တော့သည်။ ထို့နောက် ၎င်း၏ အမည်းရောင် အရေပြားမှာ ရုတ်တရက် ဖြူဖွေးသွားခဲ့သည်။

“အောင်မြင်သွားပြီလား”

ရှန်းယွီ တွေးလိုက်မိသော်လည်း နောက်တစ်စက္ကန့်တွင်မူ ထိုမိစ္ဆာသည် အလင်းစအနအဖြစ်သို့ ညှိုးနွမ်းပျက်စီးသွားပြီး လုံးဝပျောက်ကွယ်သွားတော့သည်။

“ဟင်း...”

ရှန်းယွီက စဉ်းစားဟန်ဖြင့် မေးစေ့ကို ပွတ်သပ်လိုက်သည်။

အသေအချာ ပြန်လည်သုံးသပ်ပြီးနောက် ဆေးလုံးမှာ အမှန်တကယ်ပင် ထိရောက်မှုရှိသည်ဟု သူ ကောက်ချက်ချလိုက်သည်။ မိစ္ဆာ ပျက်စီးသွားရသည့် တစ်ခုတည်းသော အကြောင်းရင်းမှာ ၎င်းသည် သာမန်သတ္တဝါ မဟုတ်သောကြောင့်ပင်။ အမှောင်စွမ်းအင်မှာ ၎င်း၏အစိတ်အပိုင်းတစ်ခုအနေဖြင့် သန့်စင်ပေးနိုင်သောအရာ မဟုတ်ဘဲ ၎င်း၏ ဖြစ်တည်မှုတစ်ခုလုံး ဖြစ်နေသောကြောင့် သန့်စင်ခြင်းဖြစ်စဉ်အပြီးတွင် ၎င်းပါ တစ်ပါတည်း ပျက်စီးသွားခြင်း ဖြစ်သည်။

သူ သက်ပြင်းချလိုက်မိသည်။ စမ်းသပ်ခံပေးမည့် စေတနာ့ဝန်ထမ်းလည်းမရှိ ယခင်ကလို စမ်းသပ်မှုတွေလုပ်ဖို့ လျိုဖုန်းကလည်း ဒီမှာရှိမနေပေ။ ထိုပြဿနာကို စဉ်းစားနေစဉ်မှာပင် သူ့မျက်လုံးထောင့်မှ တစ်စုံတစ်ခုကို သတိပြုမိသွားသည်။

သူ ပြုံးလိုက်ပြီး တိရစ္ဆာန်များထားသည့်အပိုင်းသို့ လမ်းလျှောက်သွားခဲ့သည်။

သူသည် တောဝက်တစ်ကောင်ကို ဖမ်းဆီးကာ အပြင်သို့ မထုတ်လာခဲ့၏။

“မင်းတို့က ဒီမှာ အခမဲ့နေနေကြတာဆိုတော့ သုတေသနအတွက် အသုံးချခံရတာက သိပ်တော့မဆိုးဘူးမလား”

သူက ကျယ်လောင်စွာ ရေရွတ်လိုက်သည်။ ထို့နောက် လျိုဖုန်းဖမ်းဆီးလာခဲ့သည့် မိစ္ဆာသုံးကောင်ထဲမှ နောက်ဆုံးကျန်ရှိနေသော မိစ္ဆာ၏ဘေးတွင် ထိုတောဝက်ကို ချည်နှောင်ထားလိုက်သည်။

လူသားများနှင့် ဝက်များ၏ DNA သည် ၉၀ ရာခိုင်နှုန်းခန့် တူညီကြသည်ဟု သူ ကျိုးကြောင်းဆင်ခြင်လိုက်သည်။ ထို့ပြင် ဤတောဝက်သည်လည်း ဆေးကျွေးမည့်သူများကဲ့သို့ ကျင့်ကြံနိုင်စွမ်းရှိသဖြင့် အလွန်အမင်း ကွာခြားမှုရှိလိမ့်မည်မဟုတ်ပေ။

“ဒီကောင်က အိမ်မွေးဝက်မဟုတ်ဘဲ တောဝက်ဖြစ်နေပေမဲ့လည်း သိပ်မကွာလောက်ပါဘူး။ အခြေအနေအရ တွက်ချက်ကြည့်ရင် ၈၀ ရာခိုင်နှုန်းလောက်တော့ တူညီမှာပါ”

သူ တွေးလိုက်သည်။

ထို့နောက် ရှန်းယွီသည် မိစ္ဆာကို ထိုတောဝက်အား ကုတ်ခြစ်ခိုင်းပြီး မိစ္ဆာစွမ်းအင်များ ထိုးသွင်းစေလိုက်သည်။ တောဝက်သည် မိစ္ဆာစွမ်းအင်များကြောင့် လုံးဝကျူးကျော်ခံလိုက်ရပြီး ၎င်း၏အရေပြားမှာ အမည်းရောင်သို့ ပြောင်းလဲသွားကာ အလွန်အမင်း ရန်လိုကြမ်းတမ်းလာပြီး ချည်နှောင်ထားမှုများမှ ရုန်းထွက်ရန် ကြိုးစားလာတော့သည်။

ရှန်းယွီသည် ဆေးလုံးအသစ်တစ်လုံးကို ထုတ်ယူကာ တောဝက်ကို အတင်းအကျပ် တိုက်ကျွေးလိုက်၏။

ယခင်ကကဲ့သို့ပင် တောက်ပသောအလင်းရောင်သည် တောဝက်၏ခန္ဓာကိုယ်အတွင်းသို့ ပျံ့နှံ့သွားပြီး အခြားအစိတ်အပိုင်းများကို ထိခိုက်မှုမရှိစေဘဲ အတွင်းရှိ ကျူးကျော်နေသော စွမ်းအင်အားလုံးကို သန့်စင်ဖျက်ဆီးပစ်လိုက်သည်။ သုံးစက္ကန့်အတွင်းမှာပင် တောဝက်သည် ပုံမှန်အတိုင်း ပြန်ဖြစ်သွားပြီး အရေပြားအရောင်မှာလည်း မူလအတိုင်း ပြန်လည်ပြောင်းလဲသွားကာ ကြမ်းတမ်းသည့်အပြုအမူများလည်း လုံးဝပျောက်ကွယ်သွားခဲ့သည်။

ရှန်းယွီသည် အရာအားလုံး အဆင်ပြေသွားပြီဖြစ်ကြောင်း အတည်မပြုမီ ထိုတိရစ္ဆာန်ကို စစ်ဆေးမှုအမျိုးမျိုး ပြုလုပ်ခဲ့သည်။

သူ သက်ပြင်းချရင်း စိတ်အေးသွားခဲ့၏။ စမ်းသပ်မှုက အောင်မြင်သွားခဲ့ပြီဖြစ်သည်။ သို့သော်လည်း အချက်အလက်များ ထပ်မံစုဆောင်းရန်နှင့် ဆေးလုံးကို ပိုမိုကောင်းမွန်အောင် ပြုပြင်နိုင်ရန်အတွက် နောက်ထပ် စစ်ဆေးမှုအချို့ကို ဆက်လက်လုပ်ဆောင်ရန် သူ ဆုံးဖြတ်လိုက်သည်။

အကယ်၍ သူသာ ကာကွယ်ဆေးပါ ဖော်စပ်နိုင်လျှင် ပို၍ပင် ကောင်းမွန်ပေလိမ့်မည်။ သို့သော် ဒြပ်စင်ကြီးဆယ်ခုထဲမှ တစ်ခုကို သဘာဝအလျောက် ခုခံနိုင်စွမ်းရှိအောင် ဖန်တီးပေးရမည်

ဖြစ်သဖြင့် ၎င်းမှာ မဖြစ်နိုင်လောက်ဘူးဟု သူ ဝန်ခံလိုက်ရသည်။

လီယောင်းသည် အဆက်မပြတ် စီးဆင်းနေသော လျှပ်စီးတန်းများအောက်တွင် သက်သောင့်သက်သာ ထိုင်နေသည်။

လျှပ်စီးများက သူမ၏ ခန္ဓာကိုယ်ကို ထပ်ခါတလဲလဲ ထိမှန်နေသဖြင့် အလွန်အမင်း နာကျင်ရသော်လည်း သူမ၏ မျက်နှာတွင် မည်သည့် ပင်ပန်းနွမ်းနယ်သည့် အရိပ်အယောင်မျှ မရှိပေ။ ဘာပဲဖြစ်ဖြစ် ဤဝေဒနာကို နာရီဝက်နီးပါး ခံစားပြီးနောက်တွင် တစ်ချိန်ချိန်၌ အသားကျသွားသည်မှာ သဘာဝပင်။

သူမသည် လျှပ်စီးစွမ်းအင် အစအနတိုင်းကို ဘာတစ်ခုမျှ အလဟဿ မဖြစ်စေဘဲ စုပ်ယူလိုက်သည်။ ထို့နောက် ထိုကောင်းကင်ဘုံလျှပ်စီးများကို အခြားသော ဝိညာဉ်စွမ်းအင်များကဲ့သို့ပင် ခန္ဓာကိုယ်အနှံ့ လှည့်ပတ်စေခဲ့သည်။

နောက်တစ်ဆင့်အနေဖြင့် သူမသည် ထိုလျှပ်စီးစွမ်းအင်များကို သူမ၏ ခန္ဓာကိုယ် တစ်ရှူးများအတွင်းသို့ ဖြည်းညှင်းစွာ ထိုးသွင်းလိုက်၏။

တဖြည်းဖြည်းချင်းပင် သူမ၏ ကြွက်သားမျှင်များ၊ အရိုးများနှင့် အခြားသော ခန္ဓာကိုယ် ဖွဲ့စည်းပုံအားလုံးကို အစိတ်အပိုင်းအလိုက် ဖြိုခွဲကာ ၎င်းတို့အတွင်းသို့ လျှပ်စီးစွမ်းအင်များ ဖြည့်တင်းလိုက်ပြီးနောက် မူလအခြေအနေသို့ ပြန်လည်ရောက်ရှိအောင် တဖြည်းဖြည်းချင်း ပြန်လည်တည်ဆောက်စေခဲ့သည်။

အကယ်၍ သူမတွင် ပြန်လည်မွေးဖွားခြင်းဆေးလုံးသာ ရှိခဲ့လျှင် ဆေး၏ အာနိသင်ကို အသုံးချကာ ပြန်လည်ကောင်းမွန်နှုန်းကို မြှင့်တင်နိုင်သဖြင့် ဤဖြစ်စဉ်မှာ ပို၍လွယ်ကူမြန်ဆန်ပေလိမ့်မည်။ သို့သော် ယခုမူ သူမ၏ သဘာဝပြန်လည်ကုသနိုင်စွမ်းမှာ ထိုမျှအထိ မကောင်းသဖြင့် ခန္ဓာကိုယ်ကို ပြင်းထန်စွာ ထိခိုက်မသွားစေရန် စွမ်းအင်များကို အလွန်အကျွံ မဖြစ်စေဘဲ ဂရုတစိုက် လမ်းညွှန်ပေးနေရသည်။

စီနီယာအစ်ကို ပေးထားသော ဝိညာဉ်အစားအစာများကိုလည်း အကုန်စားသုံးပြီးပြီ ဖြစ်သဖြင့် သူမကိုယ်သူမ အန္တရာယ်ရှိသော အခြေအနေမျိုးထဲသို့ မရောက်စေချင်ပေ။

ဤပင်ပန်းခက်ခဲလှသော ဖြစ်စဉ်မှာ နောက်ထပ် နာရီဝက်ခန့်အထိ တဖြည်းဖြည်း ဆက်လက်ဖြစ်ပေါ်နေခဲ့သည်။

နောက်တစ်နေ့ နံနက်ခင်းသို့ ရောက်သောအခါ ပတ်ဝန်းကျင်ရှိ လျှပ်စီးမုန်တိုင်းမှာ တဖြည်းဖြည်း ငြိမ်သက်သွားခဲ့သည်။ လီယောင်းသည် သူမ၏ မျက်လုံးများကို ဖြည်းညှင်းစွာ ဖွင့်လိုက်ရာ သူမ၏ ခန္ဓာကိုယ်အတွင်းရှိ နက်ရှိုင်းသော ပြောင်းလဲမှုများကို ခံစားလိုက်ရသည်။

အောင်မြင်သွားပြီဟု သူမ ကျေနပ်စွာ တွေးလိုက်မိ၏။

သူမသည် သူမ၏ ကိုးပါးသောကောင်းကင်ဘုံ လျှပ်စီးခန္ဓာကို တတိယကောင်းကင်ဘုံအဆင့်သို့ တိုးမြှင့်နိုင်ခဲ့ပြီဖြစ်သည်။ ထို့ပြင် ခန္ဓာကိုယ်ကျင့်ကြံမှုကို ၁၉ လွှာမြောက်အထိ မြှင့်တင်နိုင်ခဲ့ကာ စိတ်ဝိညာဉ်ဖွဲ့စည်းခြင်းအဆင့်သို့လည်း အောင်မြင်စွာ ချိုးဖျက်၍ဝင်ရောက်နိုင်ခဲ့ပြီ ဖြစ်သည်။

“ဟင်း... ပိုးမွှားအချို့ ရောက်နေတာပဲ”

လီယောင်းက ကျယ်လောင်စွာ ရေရွတ်လိုက်သည်။

[အေး... အဲဒါပြောမလို့။ သူတို့နဲ့အတူ ပေါင်းစည်းခြင်းအဆင့်ကျင့်ကြံသူတစ်ယောက်ပါ ဒီနားမှာ ဝဲနေတယ်]

ဧကရီက ပြောလိုက်သည်။

[ငါတို့ ဆုတ်ခွာကြမလား အကယ်၍ မင်းသာ ဓားကို သုံးရင်...]

သူမ စကားမဆုံးမီမှာပင် လီယောင်းက ဖြတ်ပြောလိုက်သည်။

“မလိုဘူး”

သူမက ဓားကို ဆွဲထုတ်ရင်း ပြတ်သားစွာ ပြောလိုက်သည်။

“ဒီအခွင့်အရေးကို သုံးပြီး ကျွန်မ ဘယ်လောက်အထိ တိုးတက်လာသလဲဆိုတာ စမ်းသပ်

ကြည့်ရမယ်”