ဖုံးကွယ်ထားသော လျှို့ဝှက်ချက်

ငှားရမ်းခြင်း ဝိညာဉ်စာချုပ်ကို ယူ၍ ထန်ထျန်းက ချင်းရွှီခြံဝင်းသို့ ပြန်လာခဲ့၏။

ယနေ့ကိစ္စမှာ အနည်းငယ် အတက်အကျ ရှိခဲ့သော်လည်း အောင်မြင်စွာ ပြီးဆုံးသွားခဲ့ပြီ ဖြစ်သည်။

မြေပိုင်ဆိုင်မှု စာချုပ်ကို ရရှိခဲ့ပြီ ဖြစ်ရာ အစီအစဉ်များ ရေးဆွဲပြီး အခြေစိုက်စခန်းကို တည်ဆောက်ရန်သာ လိုတော့ပေသည်။

ကျင့်ကြံခြင်း လောကအတွက် တည်ဆောက်ရေး ဟူသည်မှာ အလွန်လွယ်ကူသော ကိစ္စတစ်ခု ဖြစ်၏။ ထန်ထျန်းသည်လည်း ၎င်းကို ဗာဂျရာ ခံတပ်ကြီးတစ်ခုကဲ့သို့ ဖြစ်အောင် တည်ဆောက်ရန် မရည်ရွယ်ထားပေ။

အနည်းဆုံးတော့ ယခုလောလောဆယ်တွင် ထိုသို့ မစဉ်းစားသေးဘဲ အခြေခံ လိုအပ်ချက်များ ပြည့်စုံလျှင်ပင် လုံလောက်လှပြီ ဖြစ်သည်။

ဤကိစ္စအတွက် ကျွမ်းကျင်သူများကို ရှာဖွေခိုင်းလျှင် တစ်ရက်အတွင်း ပြီးစီးနိုင်မည်ဟု သူ ခန့်မှန်းထား၏။

ထန်ထျန်းကတော့ အလောမကြီးဘဲ အရာအားလုံး အခြေကျပြီးမှသာ ဆောင်ရွက်ရန် ဆုံးဖြတ်ထားပေသည်။

ထို့နောက်တွင်တော့ အကြွေးတစ်စိတ်တစ်ပိုင်းကိုလည်း အောင်မြင်စွာ ပေးနိုင်ခဲ့ပြန်သည်။

တာအိုကျောက်စိမ်း သန်း ၄၀၀ ကျော်နှင့် သုံးစွဲမှုအမှတ် ဘီလီယံ ၃၅၀ တို့မှာ သူ၏ လက်ထဲသို့ ရောက်ရှိလာခဲ့ပြီ ဖြစ်၏။

ဆရာများနှင့် မတွေ့ဆုံမီ ထန်ထျန်းတွင် တခြားလုပ်စရာ ကိစ္စမရှိသဖြင့် သူ၏ ကျင့်ကြံခြင်း အခန်းသို့ လာခဲ့သည်။

ဤနေရာရှိ ကျင့်ကြံခြင်းအခန်းမှာ ကျင့်ကြံခြင်း ကွင်းပြင်ကြီး လေးခုနှင့် စွမ်းရည် ချင်း တူသော်လည်း ကုံးချန်ခြံဝင်း လောက်တော့ မပြင်းထန်ပေ။

သို့သော် ဤနေရာ၏ အားသာချက်မှာ လျှို့ဝှက်လုံခြုံမှု ရှိပြီး မည်သူမျှ လာရောက် နှောင့်ယှက်နိုင်ခြင်း မရှိပေ။

နေရာယူပြီးနောက် ထန်ထျန်းက သူ့ ကျင့်ကြံခြင်းကို ဖြေလျော့ ပေးလိုက်၏။

ဤအတောအတွင်း သူက အထူးတလည် မကျင့်ကြံခဲ့သော်လည်း ကမ္ဘာဉီး ရတနာပစ္စည်းများကို ပိုင်ဆိုင်ထားသူ ဖြစ်ရာ စားသောက် အိပ်စက်နေရုံမျှဖြင့် သူ၏ ကျင့်ကြံခြင်း တိုးတက်မှုနှုန်းမှာ သာမန်ကျင့်ကြံသူများ လိုက်မမှီနိုင်လောက်အောင် မြန်ဆန်လှပေသည်။

အချိန် နှစ်ပတ်ကျော် ကုန်လွန်သွားသည့်အခါ သူက ဆန်းကြယ် အင်မော်တယ် အဆင့်၏ အထွတ်အထိပ် သို့ ရောက်ရှိနေခဲ့ပြီ ဖြစ်သည်။

မကြာသေးမီက အလုပ်များနေသဖြင့် ကျင့်ကြံခြင်းအဆင့်ကို ဖိနှိပ်ထားခဲ့ခြင်းသာ ဖြစ်၏။ မဟုတ်ပါက ရွှေအင်မော်တယ် အဆင့်သို့ ရောက်ရှိနေသည်မှာ ကြာပြီ ဖြစ်သည်။

ယခုအခါ သူ၏ ကျင့်ကြံခြင်း အစွမ်းအားလုံးကို ဖြေလျော့ ပေးလိုက်သည့်အခါ ခန္ဓာကိုယ်အတွင်း၌ ကြီးမားသော ပြောင်းလဲမှုများ ချက်ချင်း ဖြစ်ပေါ်လာတော့သည်။

ဆန်းကြယ် အင်မော်တယ် အဆင့်၏ နောက်ဆုံး အတားအဆီးမှာ ကြီးမားလှသော အင်မော်တယ် စွမ်းအားများ၏ တိုက်ခိုက်မှုအောက်တွင် လျင်မြန်စွာ ပြိုလဲသွားခဲ့၏။

အမွှေးတိုင်တစ်တိုင်စာခန့် အချိန်ကုန်လွန်သွားသောအခါ အားကောင်းသော အော်ရာ တစ်ခုက ထန်ထျန်း၏ ခန္ဓာကိုယ်မှ ထွက်ပေါ်လာပြီး ကျင့်ကြံခြင်းအခန်း တစ်ခုလုံးကို လွှမ်းမိုးသွားခဲ့သည်။

နောက်ဆုံး အတားအဆီးမှာ ချက်ချင်း ပွင့်ထွက်သွားပြီး ထန်ထျန်းက ရွှေအင်မော်တယ် အဆင့်သို့ အောင်မြင်စွာ တက်လှမ်းနိုင်ခဲ့ပြီ ဖြစ်၏။

နက်နဲလှသော အင်မော်တယ် စွမ်းအား ပင်လယ်ကြီးက ထန်ထျန်း၏ ဒန်တျန် အလယ်တွင် တည်ရှိနေပြီး ဖြည်းညင်းစွာ လည်ပတ်နေပေသည်။

ခန္ဓာ အမျိုးမျိုးကို ပိုင်ဆိုင်ထားသဖြင့် သူ၏ ခန္ဓာကိုယ် ကြံ့ခိုင်မှုမှာလည်း ကြီးမားသော ခြေလှမ်းသစ်တစ်ခုသို့ တိုးတက်သွားခဲ့၏။

အထူး ထူးချွန်သော ပါရမီရှင် အချို့မှလွဲ၍ အဆင့်တူ ကျင့်ကြံသူများမှာ သူ၏ ခန္ဓာကိုယ် ခုခံမှုကိုပင် ဖောက် နိုင်လိမ့်မည် မဟုတ်ပေ။

သူ့ခန္ဓာကိုယ်အတွင်းရှိ ပြည့်လျှံနေသော စွမ်းအားများကို ခံစားရင်း ထန်ထျန်းမှာ စိတ်လှုပ်ရှားမှုကို မထိန်းနိုင်တော့ပေ။

သူ ဖြတ်သန်းလာခဲ့သော လမ်းတစ်လျှောက် အထူးသဖြင့် သေမျိုးနယ်ပယ် တွင် ရှိစဉ်က သူသည် အမြဲတမ်း ဂရုတစိုက် နေထိုင်ခဲ့ရ၏။ သတိလက်လွတ် ဖြစ်သွားပါက အင်အားကြီးသူတစ်ဦး၏ လက်ဝှေ့ယမ်းမှုတစ်ခုတည်းနှင့်ပင် အသတ်ခံရနိုင်သည်ကို သူ စိုးရိမ်ခဲ့ရသည်။

နတ် ဖီးနစ်ခန္ဓာ မှ ရရှိလာသော ထူးဆန်းသည့် ဥကြီး ရှိနေသော်လည်း သူက ခြေလှမ်းမှန်မှန်ဖြင့်သာ လျှောက်လှမ်းခဲ့ပေသည်။

အင်မော်တယ် ဖြစ်လာပြီးမှသာ ဤကမ္ဘာပေါ်တွင် သွားလာနိုင်သည့် ယုံကြည်ချက် အနည်းငယ်ကို ရရှိခဲ့ခြင်း ဖြစ်၏။

ယနေ့ ရွှေအင်မော်တယ် အဆင့်သို့ ရောက်ရှိမှသာ သူက ခွန်အားသန်မာသး တစ်ဦးဟု ခံစားလိုက်ရတော့သည်။

အမြင့်ဆုံး ပါရမီနှင့် အမြင့်ဆုံး ခန္ဓာများက သူ့ကို အဆင့်တူ ကျင့်ကြံသူ အားလုံးကြားတွင် အထက်စီးမှ နေစေပြီး အဆင့်ကြီး တစ်ခုလုံးကို ကျော်လွန်၍ တိုက်ခိုက်နိုင်စွမ်းကိုလည်း ပေးစွမ်းပေသည်။

"အနန္တတာအိုနိယာမ နယ်ပယ်" နှင့် "ရှင်းယွဲ့ အင်မော်တယ်ဓား" တို့က သူ့ကို စွမ်းအားကြီးသူ များကိုပင် မကြောက်ရွံ့စေတော့ဘဲ အင်မော်တယ်အရှင် ကိုယ်တိုင် ဆင်းသက်လာလျှင်ပင် ရင်ဆိုင်နိုင်သည့် ခွန်အားကို ပေးစွမ်းထား၏။

အင်မော်တယ်ဧကရာဇ် နှင့် ပတ်သက်၍မူ...

သိထားသည်မှာ အလွန်နည်းပါးလွန်းသဖြင့် သေချာပေါက် ပြောနိုင်ခြင်း မရှိပေ။

သို့သော် ဤကမ္ဘာတွင် အင်မော်တယ်ဧကရာဇ် မည်မျှ ရှိပါသနည်း။

ထိုသို့သော အဆင့်ရှိ ပုဂ္ဂိုလ်ကြီးများမှာ သာမန် ရွှေအင်မော်တယ်လေး တစ်ဦးကို အရေးလုပ်၍ နှိမ်နင်းလိမ့်မည် မဟုတ်ပေ။

"ဒါဆို... ငါ ကြိုက်သလို လျှောက်သွားလို့ ရပြီပေါ့"

ထန်ထျန်းက ညင်သာစွာ ပြုံးလိုက်၏။

သို့သော် မကြာမီမှာပင် ထိုအတွေးကို ပြန်ဖျောက်လိုက်သည်။

တစ်စုံတစ်ခုကို ကြောက်ရွံ့၍ မဟုတ်ဘဲ သူက ဤကဲ့သို့ နေထိုင်သည့် ပုံစံကိုသာ ကျင့်သားရနေသောကြောင့် ဖြစ်၏။

တကူးတက အပြင်ထွက်ပြီး ကြွားဝါပြနေလျှင်လည်း သူကိုယ်တိုင်ပင် အနေရခက်နေပေလိမ့်မည်။

အရာရာကို သဘာဝအတိုင်းသာ ဖြစ်ပါစေတော့။

ထို့အပြင် သူ၏ ရည်မှန်းချက်မှာ ဤမျှနှင့်တင် မဟုတ်သေးပေ။

စိတ်ကို ပြန်လည် တည်ငြိမ်အောင် ထားပြီးနောက် ထန်ထျန်းက စနစ်နေရာလွတ်ကို ကြည့်လိုက်၏။

သုံးစွဲမှုအမှတ် ဘီလီယံ ၃၅၀ ဟူသည်မှာ နောက်ဆုံး ရတနာပစ္စည်းများကို လဲလှယ်ရန် လုံလောက်လှပြီ ဖြစ်သည်။

သို့သော် ထန်ထျန်းမှာ အလောမကြီးဘဲ အဆင့်မြင့် အင်မော်တယ် ကျင့်စဉ် များကို ဉာဏ်အလင်းပွင့်ခြင်း အကြိမ် ၁၀၀ ကျော်ကို အရင် လဲလှယ်လိုက်၏။

ယခင်က ကျင့်စဉ်မျှော်စင် တွင် ရှိစဉ်က သူသည် ထိုအဆင့်မြင့် အင်မော်တယ် ကျင့်စဉ် များကို အသေးစား အောင်မြင်မှုအဆင့် အထိသာ နားလည်အောင် လုပ်ထားခဲ့ခြင်း ဖြစ်သည်။

ကျင့်စဉ် များကို အမြောက်အမြား အလကား ရယူနိုင်ရန်အတွက် သူ၏ သုံးစွဲမှုအမှတ်များကို ချွေတာသုံးစွဲခဲ့ခြင်း ဖြစ်ပြီး အကြီးစားအောင်မြင်မှု အထိ မရောက်အောင် ထိန်းထားခဲ့ခြင်း ဖြစ်၏။

သို့သော် ယခုမူ မည်သည့် ကန့်သတ်ချက်မှ မရှိတော့ပေ။

"ဒါဆို... စလိုက်ရအောင်"

ထန်ထျန်းက အသေးစားအောင်မြင်မှု အဆင့်တွင် ရှိနေသော ပထမဆုံး အဆင့်မြင့် အင်မော်တယ် ကျင့်စဉ် ကို ထုတ်ယူပြီး "ဉာဏ်အလင်းပွင့် ခြင်း" ကို တိုက်ရိုက် ရွေးချယ်လိုက်၏။

"ဉာဏ်အလင်းပွင့်ခြင်း အောင်မြင်ပါသည်"

စနစ်အသိပေးသံ ထွက်ပေါ်လာသည်နှင့်တစ်ပြိုင်နက် ရင်းနှီးနေသော "အနန္တတာအိုနိယာမ ကြယ်တာရာပင်လယ်" ကြီးက ထန်ထျန်း၏ ရှေ့တွင် တစ်ဖန် ပေါ်လာပြန်သည်။

ကြယ်တာရာပေါင်းများစွာမှာ ပင်လယ်ကြီးအတွင်း နစ်မြုပ်လိုက် ပေါ်လိုက်ဖြင့် လင်းတလှည့် မှိန်တလှည့် ဖြစ်နေပေ၏။

ကြယ်တာရာ ဆယ်ဂဏန်းခန့်သာ အလွန်တောက်ပစွာ လင်းလက်နေပြီး ကြယ်တာရာပင်လယ်အတွင်း တောက်ပနေပေသည်။

ထိုအရာများမှာ ယခင်က အထွတ်အထိပ် အထိ လေ့ကျင့်ထားသော အဆင့်မြင့် အင်မော်တယ် ကျင့်စဉ် များပင် ဖြစ်၏။

ထိုအရာများကပင် "အနန္တတာအိုနိယာမ နယ်ပယ်" ကို ဖန်တီးပေးခဲ့ပြီး "အနန္တတာအိုနိယာမ လမ်းစဉ်" ကို အသေးစားအောင်မြင်မှု အဆင့်အထိ တွန်းပို့ပေးခဲ့ခြင်း ဖြစ်သည်။

"ဒီတစ်ခါ အဆင့်မြင့် အင်မော်တယ် ကျင့်စဉ် ၁၀၀ ကျော်ကို နားလည်သွားရင် အနန္တတာအိုနိယာမ လမ်းစဉ်က နောက်ထပ် တစ်ဆင့် ထပ်တက်နိုင်မလားဆိုတာ သိချင်မိတယ်"

ထန်ထျန်းက တွေးနေမိ၏။

ထို့နောက် သူက ဉာဏ်အလင်းပွင့်ခြင်း များကို အသုံးပြု၍ ထိုအဆင့်မြင့် အင်မော်တယ် ကျင့်စဉ် အားလုံးကို အကြီးစား အောင်မြင်မှု အထိ လျင်မြန်စွာ မြှင့်တင်လိုက်တော့သည်။

တောက်ပသော ကြယ်တာရာများမှာ ကြယ်တာရာပင်လယ်အတွင်း တစ်လုံးပြီးတစ်လုံး ထွက်ပေါ်လာခဲ့၏။

အဆင့်မြင့် အင်မော်တယ် ကျင့်စဉ် များကို "ကောင်းကင်ကျင့်စဉ်" ဟုလည်း ခေါ်ဆိုကြသည်။

၎င်းနှင့် အလယ်အလတ်အဆင့် အင်မော်တယ် ကျင့်စဉ် များကြား ကွာခြားချက်မှာ စွမ်းအားတစ်ခုတည်းတွင် မဟုတ်ပေ။ ၎င်းတို့ကြားရှိ စစ်မှန်သော ကွာခြားချက်မှာ နိယာမ အဆင့်တွင် ရှိနေခြင်းပင် ဖြစ်၏။

အဆင့်မြင့် အင်မော်တယ် ကျင့်စဉ် များက ဤကမ္ဘာ၏ အခြေခံအကျဆုံးသော နိယာမ များနှင့် ဆက်နွှယ်နေပေသည်။

၎င်းက နိယာမ များအောက်တွင် အမြင့်ဆုံးသော တစ်ခုတည်းသော ကျင့်စဉ် ဖြစ်သည်ဟု ဆိုနိုင်၏။

ထို့ကြောင့်ပင် ထန်ထျန်းက ၎င်းကို အသုံးပြု၍ "အနန္တတာအိုနိယာမ လမ်းစဉ်" ကို အသေးစားအောင်မြင်မှု အဆင့်သို့ ရောက်အောင် လုပ်နိုင်ခဲ့ခြင်း ဖြစ်သည်။

ထို့ပြင် နယ်ပယ်ကို ဖန်တီးနိုင်ပြီး နိယာမ အချို့ကိုလည်း ထိန်းချုပ်နိုင်ခဲ့ခြင်း ဖြစ်၏။

ကြယ်တာရာများ တစ်လုံးပြီးတစ်လုံး တောက်ပလာသည်နှင့်အမျှ ထန်ထျန်းက "အနန္တတာအိုနိယာမ နယ်ပယ်" မှာ မျက်မြင်ကိုယ်တွေ့ အလွန်လျင်မြန်စွာ ကျယ်ပြန့်လာသည်ကို ခံစားလိုက်ရသည်။

တစ်ချိန်တည်းမှာပင် သူ၏ နယ်ပယ်အတွင်း နိယာမ စွမ်းအားများကို ထိန်းချုပ်နိုင်စွမ်းမှာလည်း လျင်မြန်စွာ မြင့်တက်လာခဲ့၏။

သိပ်မကြာမီမှာပင် နယ်ပယ်မှာ ဆယ်ဆမက ကျယ်ပြန့်သွားပြီး ချင်းရွှီခြံဝင်း တစ်ခုလုံးနှင့် ပတ်ဝန်းကျင် မီတာ ၅၀၀ ခန့်အထိ နယ်ပယ်အတွင်းသို့ ရောက်ရှိသွားခဲ့သည်။

ဤနယ်ပယ်အတွင်း၌ ထန်ထျန်းက အရာအားလုံးကို စိုးမိုးထားသော စစ်မှန်သည့် နတ်ဘုရားတစ်ပါးကဲ့သို့ပင် ဖြစ်၏။

သူက နယ်ပယ်အတွင်း ဖြစ်ပျက်နေသော အသေးစိတ် အချက်အလက် အားလုံးကို အသေအချာ မြင်နေရပေသည်။

ပျားနှင့်ပိတုန်းများ၏ တုန်ခါနေသော အတောင်ပံများ၊ ပုရွက်ဆိတ်များ၏ လှုပ်ရှားနေသော အာရုံခံဉီးမှင် များ၊ မြေအောက်အနက်ပိုင်းတွင် မြေကျစ်နေသော ပိုးကောင်များ၊ ခြံဝင်းအတွင်း၌ ဆယ်မီတာကျော်အထိ အမြစ်တွယ်နေပြီး နေရောင်ခြည်နှင့် အာဟာရများကို စုပ်ယူနေသော မိုးမခပင်ကြီးကိုလည်း မြင်နေရ၏။

မြင်နိုင်ရုံသာမက ထိန်းချုပ်နိုင်စွမ်းလည်း ရှိပေသည်။

သူက အရာအားလုံး၏ လမ်းကြောင်းများကို လွယ်ကူစွာ ပြောင်းလဲနိုင်ပြီး မြစ်ရေကို ပြောင်းပြန်စီးဆင်းစေခြင်း၊ သစ်ပင်ကြီးကိုပင် မျိုးစေ့လေးအဖြစ် ပြန်လည် ပြောင်းလဲပစ်ခြင်းတို့ကို လုပ်နိုင်ပေသည်။

အရာအားလုံးမှာ သူ၏ ထိန်းချုပ်မှုအောက်တွင် ရှိနေ၏။

ယခုအချိန်တွင် သူက ကိစ္စအရပ်ရပ်ကို စနစ်တကျ လုပ်ဆနေသော လန်ယွီ နှင့် လွီကျူး ညီအစ်မ နှစ်ဦးကိုလည်း မြင်နေရသလို ရှောင်ကျိနှင့် ဆော့ကစားနေသော လီဟုန် ကိုလည်း မြင်နေရပေသည်။ ထို့ပြင် ကြိုးစားပမ်းစား ကျင့်ကြံနေသော ကုရှောင်းရွှယ် ကိုလည်း မြင်နေရ၏။

ကုရှောင်းရွှယ်၏ ကျင့်ကြံခြင်း အမြန်နှုန်း မှာ အမှန်တကယ်ပင် အံ့မခန်းပင်။

သူမ၏ ဒန်တျန် အတွင်း အင်မော်တယ် စွမ်းအားများမှာ သောင်းကျန်းနေပြီး မကြာမီတွင် ဆန်းကြယ် အင်မော်တယ် အဆင့်သို့ တက်လှမ်းနိုင်တော့မည်ဟု ခန့်မှန်းရသည်။

သို့သော် တစ်ချိန်တည်းမှာပင် သူမ၏ ဝိညာဉ်ခန္ဓာ နေရာတွင် ပါးလွှာလှသော ရောင်စုံ အကာအကွယ်တစ်ခု ဖုံးအုပ်နေသည်ကိုလည်း ထန်ထျန်း မြင်လိုက်ရ၏။

ဤအလင်းအကာအကွယ်မှာ ထန်ထျန်း၏ ကြည့်တာကို မတားဆီးနိုင်သော်လည်း ထန်ထျန်း မသိနိုင်သည့် အလွန်အရေးကြီးသော တစ်စုံတစ်ခုကို ဖုံးကွယ်ထားသည်မှာ သေချာပေသည်။

ဖြစ်နိုင်သည်မှာ ဤအရာကပင် ကုရှောင်းရွှယ်၏ ခန္ဓာကိုယ်အတွင်း ဖြစ်ပေါ်နေသော ထူးခြားချက်များ၏ အကြောင်းရင်း ဖြစ်နိုင်ပေသည်။

"အရင်က ဒါကို မမြင်ခဲ့ဖူးဘူး၊ အခုကျမှ မြင်နိုင်တာလား"

ထန်ထျန်းက မေးစေ့ကို ပွတ်ရင်း စဉ်းစားနေမိ၏။

ဖြစ်နိုင်သည်မှာ "အနန္တတာအိုနိယာမ လမ်းစဉ်" ပိုမို တိုးတက်လာပြီး နယ်ပယ် ပိုမို အားကောင်းလာသည်နှင့်အမျှ...

ဤရောင်စုံ အကာအကွယ်နောက်ကွယ်တွင် ဖုံးကွယ်ထားသော လျှို့ဝှက်ချက်မှာလည်း...

နောက်ဆုံးတွင်တော့ ပေါ်ပေါက်လာတော့မည် ဖြစ်ပေသည်။