ကမ္ဘာ့ကံကြမ္မာကို လဲလှယ်ခြင်း

အချိန်အများကြီး အကုန်မခံဘဲ ထန်ထျန်းက ထိုအဆင့်မြင့် အင်မော်တယ် ကျင့်စဉ် တစ်ရာလုံးကို အကြီးစား အောင်မြင်မှုအဆင့်အထိ အကုန်လုံး နားလည်သဘောပေါက်သွားခဲ့ပြီ ဖြစ်၏။

အနန္တတာအိုနိယာမ ကြယ်တာရာပင်လယ်ကြီးက ယခုအခါ အလွန်တောက်ပနေပြီး အိမ်မက်ဆန်လှပေသည်။

အနန္တတာအိုနိယာမ နယ်ပယ်၏ ဧရိယာမှာလည်း ပိုမိုကျယ်ပြန့်လာသလို နယ်ပယ်အတွင်း ထန်ထျန်း၏ ထိန်းချုပ်နိုင်စွမ်းမှာလည်း သိသိသာသာ အားကောင်းလာခဲ့၏။

ယခင်က သူသည် အင်မော်တယ်အရှင်ကို မကြောက်ရုံမျှသာ ရှိခဲ့လျှင် ယခုမူ မည်သည့် အင်မော်တယ်အရှင်မဆို သူ၏ နယ်ပယ်အတွင်းသို့ ပေါ့ပေါ့ဆဆ ဝင်ရောက်လာပါက ပြန်ထွက်သွားနိုင်ခွင့် မရှိစေရဟု ထန်ထျန်းတွင် လုံလောက်သော ယုံကြည်ချက် ရှိနေပြီ ဖြစ်သည်။

သို့သော် နှမြောစရာကောင်းသည်မှာ သူ၏ ခွန်အားမှာ ကောင်းကင်နှင့်မြေကြီးကဲ့သို့ ပြောင်းလဲသွားခဲ့သော်လည်း အနန္တတာအိုနိယာမ လမ်းစဉ်မှာမူ အကြီးစား အောင်မြင်မှုအဆင့်သို့ တက်လှမ်းနိုင်ခြင်း မရှိသေးပေ။

သူ နားလည်ထားသော အဆင့်မြင့် အင်မော်တယ် ကျင့်စဉ်များ များပြားလာသည်နှင့်အမျှ ထိုတိုးတက်မှုနှုန်းမှာ တဖြည်းဖြည်း နှေးကွေးလာခဲ့၏။

ဤအခြေအနေနှင့် ပတ်သက်၍ ထန်ထျန်းက ရင်းနှီးပြီးသား ဖြစ်ပေသည်။

အဘယ်ကြောင့်ဆိုသော် အနန္တတာအိုနိယာမ လမ်းစဉ် အသေးစား အောင်မြင်မှု မတိုင်ခင်ကလည်း ဤကဲ့သို့ပင် ဖြစ်ခဲ့သောကြောင့် ဖြစ်၏။

ထင်ရှားသည်မှာ ၎င်းက အနန္တတာအိုနိယာမ လမ်းစဉ်ကို နောက်ထပ် တစ်ဆင့် တက်လှမ်းနိုင်ရန်အတွက် အဆင့်မြင့် အင်မော်တယ် ကျင့်စဉ်များထက် ပို၍ မြင့်မားသော တည်ရှိမှုတစ်ခု လိုအပ်နေခြင်းပင်။

"အဆင့်မြင့် အင်မော်တယ် ကျင့်စဉ်ထက် ပိုပြီး အစွမ်းထက်တဲ့ ကျင့်စဉ်မျိုး ရှိတယ်လို့ မကြားဖူးပါဘူး"

ထန်ထျန်း မျက်မှောင်ကြုတ်လိုက်မိ၏။

ဤကမ္ဘာတွင် ကျင့်စဉ်များ၊ လျှို့ဝှက်ချက်များနှင့် စွမ်းအားများစွာ ရှိသော်လည်း ၎င်းတို့အားလုံးတွင် အကန့်အသတ် တစ်ခု ရှိနေပေသည်။

ထိုအကန့်အသတ်မှာ အဆင့်မြင့် အင်မော်တယ် ကျင့်စဉ်ပင် ဖြစ်၏။

အဆင့်မြင့် အင်မော်တယ် ကျင့်စဉ်များကြားတွင် အားနည်းခြင်း၊ အားကောင်းခြင်း ကွာခြားမှု ရှိနိုင်သော်လည်း ၎င်းတို့ အားလုံးက တစ်ဖက်တစ်လမ်းမှ အထွတ်အထိပ်ကို ကိုယ်စားပြုကြပေသည်။

ယခု သူက အဆင့်မြင့် အင်မော်တယ် ကျင့်စဉ် တစ်ရာကျော်ကို အကြီးစား အောင်မြင်မှုအဆင့်အထိ လေ့ကျင့်ထားသော်လည်း အခြားကျင့်ကြံသူများအဖို့မူ အဆင့်မြင့် အင်မော်တယ် ကျင့်စဉ် တစ်ခုကိုသာ အကြီးစား အောင်မြင်မှု ရရှိထားလျှင်ပင် အထွတ်အထိပ်သို့ ရောက်ရှိနေပြီ ဖြစ်ကာ အဆင့်တူကြားတွင် ပြိုင်ဘက်ကင်းနေပြီ ဖြစ်၏။

ယနေ့အထိ ထန်ထျန်းက ထိုအကန့်အသတ်ကို ကျော်လွန်သော တည်ရှိမှုမျိုး ရှိသည်ဟု မကြားဖူးခဲ့ပေ။

ခဏမျှ စဉ်းစားပြီးနောက် ထန်ထျန်းက ညင်သာစွာ သက်ပြင်းချလိုက်၏။

သူ့ အဆင့်မှာ နိမ့်လွန်းနေသေးသဖြင့် ထိုသို့သော အဆင့်ရှိသည့် အရာများနှင့် မထိတွေ့ရသေးခြင်း ဖြစ်နိုင်ပေသည်။

သို့မဟုတ်လျှင်...

သူက ခေါင်းမော့ကာ ဝေးကွာလှသော ကောင်းကင်ကို ကြည့်လိုက်၏။

တကယ်၍ ထိုအကန့်အသတ်ထက် မြင့်မားသော တည်ရှိမှုမျိုး ရှိနေခဲ့လျှင် ၎င်းက သေချာပေါက် ကောင်းကင် ထိပ်ဆုံး နေရာတွင်သာ ရှိနေပေလိမ့်မည်။

"ဟူး... ထားလိုက်ပါတော့"

"ဘယ်လိုပဲဖြစ်ဖြစ် တစ်နေ့ကျရင် အဲဒီကို သွားရမှာပဲ"

"အခု အခြေအနေကလည်း တော်တော်လေး သုံးလို့ရနေပါပြီ"

ထန်ထျန်းက သူ့ကိုယ်သူ နှစ်သိမ့်လိုက်၏။

သို့သော် သူ၏ စကားကိုသာ အခြားကျင့်ကြံသူများ ကြားသွားပါက နေရာတင် သွေးအန်သွားနိုင်ပေသည်။

အဆင့်မြင့် အင်မော်တယ် ကျင့်စဉ် တစ်ရာကျော်ကိုမှ "တော်တော်လေး သုံးလို့ရတယ်" ဟု ပြောနေသည်မှာ...

တကယ်ကို ပြောစရာ စကား မရှိတော့ပေ။

နယ်ပယ်၏ စွမ်းရည် ကို ခဏမျှ ထပ်မံ လေ့လာပြီးနောက် ထန်ထျန်းက ၎င်းကို ပြန်သိမ်းလိုက်ကာ စနစ်အတွင်းသို့ အာရုံစိုက်လိုက်ပြန်သည်။

ကမ္ဘာ့ကံကြမ္မာ - သုံးစွဲမှုအမှတ် ၁၀၀ ထရီလီယံ

ကမ္ဘာ့ နိယာမ - သုံးစွဲမှုအမှတ် ၁ ထရီလီယံ

ကမ္ဘာ့မူလ - သုံးစွဲမှုအမှတ် ၁ ထရီလီယံ

ကျင့်စဉ်များကို ဉာဏ်အလင်းပွင့်ရန်အတွက် ၁၀ ထရီလီယံ သာ သုံးခဲ့ရသဖြင့် ယခု သူ၏ လက်ထဲတွင် ၃၀၀ ထရီလီယံ ကျန်ရှိနေသေး၏။

အတိအကျပင် ထိုအမြင့်ဆုံး ရတနာ သုံးမျိုးလုံးကို တစ်ကြိမ်စီ လဲလှယ်၍ မည်သို့သော စွမ်းရည် များ ရှိသည်ကို ကြည့်နိုင်ပေသည်။

တစ်ခုချင်းစီ စလိုက်ရအောင်!ယ

ထန်ထျန်းက အသက်ကို ပြင်းပြင်းရှူကာ စိတ်ကို ပြင်ဆင်ပြီးနောက် တိုက်ရိုက် လဲလှယ်လိုက်၏။

"ကမ္ဘာ့ကံကြမ္မာ လဲလှယ်မှု အောင်မြင်ပါသည်"

စနစ်အသိပေးသံကို ကြားရသည့်အခါ ထန်ထျန်း၏ စိတ်ထဲတွင် အနည်းငယ် စိတ်လှုပ်ရှားသွားပြီး အာရုံစိုက်ကာ စောင့်နေမိသည်။

ဤအရာက ဟင်းလင်းပြင် ခန္ဓာ ထက်ပင် အဆ တစ်ရာ ပို၍ ဈေးကြီးသော အရာ မဟုတ်ပါလား

မည်သို့သော ကမ္ဘာပျက်လောက်သည့် စွမ်းရည် မျိုး ရှိမလဲဆိုသည်ကို သူ အလွန် မျှော်လင့်နေမိ၏။

သို့သော် ထန်ထျန်းကို အံ့အားသင့်စေသည်မှာ လဲလှယ်မှု ပြီးဆုံးသွားသော်လည်း မည်သည့် လှုပ်ရှားမှုမျှ ထွက်ပေါ်မလာခြင်းပင် ဖြစ်သည်။

သူက ပတ်ဝန်းကျင်ကို အံ့သြစွာ ကြည့်လိုက်မိပြီး နောက်ဆုံးတွင် သူ၏ လက်ချောင်းထိပ်တွင် ဆန်စေ့ခန့်သာ ရှိပြီး ကိုးရောင်ခြည် ဖြာထွက်နေသော လျှို့ဝှက်ဆန်းကြယ်သည့် အငွေ့အသက်တစ်ခုကို တွေ့လိုက်ရ၏။

"ဒါပဲလား"

ထန်ထျန်းမှာ ချက်ချင်းပင် ကြောင်အ သွားရသည်။

သူ မူလက စိတ်ကူးထားသည်နှင့် ကွာခြားချက်မှာ ကြီးမားလွန်းလှပေ၏။

ကောင်းကင်နှင့် မြေကြီး တုန်ခါသွားပြီး အင်မော်တယ်ဧကရာဇ်များကိုပင် တုန်လှုပ်စေမည့် ထူးခြားဖြစ်စဉ်မျိုး ဖြစ်လာမည်ဟု သူ ထင်ထားခဲ့ခြင်း ဖြစ်သည်။

ထန်ထျန်းက လက်ချောင်းကို မြှောက်ကာ မျက်စိရှေ့သို့ ကပ်ကြည့်လိုက်၏။

ဆန်စေ့ခန့်သာ ရှိသော အလင်းတန်းလေးမှာ သူ၏ လက်ချောင်းထိပ်တွင် ပျင်းရိစွာ လှုပ်ရှားနေပေသည်။

အချိန်အတော်ကြာ ကြည့်နေသော်လည်း ထူးခြားသည့် အချက်ကို မတွေ့ရပေ။

အရောင် ရှိနေသည်မှလွဲ၍ ကျန်အရာအားလုံးမှာ ဟာလာဟင်းလင်း ဖြစ်နေသကဲ့သို့ပင်။

"အင်း..."

ထန်ထျန်း ဘာလုပ်ရမည်ကို မသိတော့ပေ။

စဉ်းစားကြည့်လျှင် စနစ်က သူ့ကို လိမ်စရာ အကြောင်းမရှိပေ။

ဘာပဲဖြစ်ဖြစ် ဒုတိယမြောက် အဈေးအကြီးဆုံး ရတနာ မဟုတ်ပါလား။

သူ အလေးအနက် စဉ်းစားနေမိ၏။

ထိုကိုးရောင် ဆန်စေ့လေး၏ အမည်မှာ ကမ္ဘာ့ကံကြမ္မာ ဖြစ်သည်။

ဆိုလိုသည်မှာ ၎င်းသည် သေချာပေါက် ကံကြမ္မာ နှင့် ပတ်သက်သော အရာ ဖြစ်ပေလိမ့်မည်။

၎င်းကို စားလိုက်လျှင် ကံကောင်းလာမည်ဟု ဆိုလိုခြင်းလား။

ထန်ထျန်း မေးစေ့ကို ပွတ်နေမိ၏။

ဤအရာ၏ စွမ်းရည် ကို မသိရသေးသဖြင့် သူကိုယ်တိုင် အရင်စမ်းသပ်သူတော့ အဖြစ်မခံလိုပေ။

ရှောင်းရွှယ်၊ လီဟုန်နှင့် လန်ယွီတို့မှာလည်း သူ၏ လက်ရုံးများ ဖြစ်သဖြင့် စမ်းသပ်ချက်အတွက် အသုံးမပြုလိုပေ။

သို့သော် ဤအရာမှာ တာအိုကျောက်စိမ်း သန်း ၁၀၀ တန်ဖိုးရှိသဖြင့် တခြားသူများကိုလည်း အလကား မပေးချင်ပေ။

စဉ်းစားရင်းနှင့် ထန်ထျန်း၏ အကြည့်မှာ ပြတင်းပေါက်အပြင်ဘက်ရှိ ခြံဝင်းငယ်လေးဆီသို့ ကျရောက်သွား၏။

သာမန် ရွှေငါးလေး တစ်အုပ်မှာ ရေကန်အတွင်း၌ ကူးခတ်ဆော့ကစားနေကြပေသည်။

"အင်း... ဟုတ်ပြီ"

"ဒီခြံဝင်းထဲက အရာအားလုံးက ငါ့ အပိုင် တွေပဲ"

"တကယ်လို့ မင်း ဒီအရာကြောင့် ထူးခြားတဲ့ အခွင့်အရေး ရသွားရင်တောင် ငါ အရှုံးမရှိဘူး"

ထန်ထျန်းက သူ၏ ပစ်မှတ်ကို သတ်မှတ်လိုက်၏။

ထို့နောက် သူက ရွှေငါးလေး တစ်ကောင်ကို ကျပန်းရွေးချယ်ကာ လက်ချောင်းဖြင့် ညင်သာစွာ တောက်လိုက်ရာ ဆန်စေ့ခန့်ရှိသော ရောင်စုံအလင်းတန်းလေးမှာ ငါးလေး၏ ခန္ဓာကိုယ်အတွင်းသို့ တိုက်ရိုက် ဝင်ရောက်သွားခဲ့သည်။

ကံကြမ္မာမှာ လျင်မြန်စွာ ပေါင်းစပ်သွားပြီး ရွှေငါးလေးမှာ ခေတ္တမျှ တုံ့ဆိုင်းသွားကာမှ ဆက်လက် ဆော့ကစားနေပြန်သည်။

မည်သည့် ပြောင်းလဲမှုမျှ ဖြစ်မလာသကဲ့သို့ပင်။

ထန်ထျန်း မျက်မှောင်ကြုတ်ကာ ဆက်လက် စောင့်ကြည့်နေမိ၏။

သို့သော် နောက်ပိုင်းတွင် ဖြစ်ပျက်လာသော အရာများကမူ သူ့ကို မျက်လုံးအပြူးသား ဖြစ်သွားစေခဲ့သည်။

ရွှေငါးလေးမှာ ကံကြမ္မာနှင့် ပေါင်းစပ်ပြီးနောက် သူငယ်ချင်းများနှင့်အတူ ဆက်လက် ဆော့ကစားနေ၏။

သူတို့က ရေထဲတွင် အရှိန်မြှင့်တင်ပြီး ရေမျက်နှာပြင်ပေါ်သို့ ခုန်တက်ကာ ရေစက်ကလေးများ ဖြာထွက်စေရင်း ဆော့ကစားကြခြင်း ဖြစ်သည်။

သို့သော် သူတို့ ဆော့ကစားနေစဉ်မှာပင် ထန်ထျန်း ရွေးချယ်ထားသော ရွှေငါးလေးမှာ မတော်တဆမှု ဖြစ်ခဲ့၏။

၎င်းက ခွန်အား နည်းနည်း ပိုပါသွားသဖြင့် လမ်းကြောင်းကို မထိန်းနိုင်ဘဲ ရေကန်အပြင်ဘက်ရှိ ကုန်းပေါ်သို့ တိုက်ရိုက် ခုန်တက်မိကာ ကမ်းစပ်သို့ ရောက်သွားခဲ့သည်။

ကံ အလွန်ဆိုးသည်ဟု ဆိုရပေမည်။

သို့သော် အလွန် တိုက်ဆိုင်လှသည်မှာ ၎င်းကျရောက်သွားသော နေရာတွင် ပုပ်နေသော "ချင်းလင်အသီး" တစ်လုံး ရှိနေခြင်းပင်။

ချင်းရွှီခြံဝင်းတွင် ဝိညာဉ်မြက်များနှင့် ဝိညာဉ်အသီးများစွာ ရှိပြီး ချင်းလင်အသီးမှာ အဆင့်နိမ့် ဝိညာဉ်အသီး တစ်မျိုးသာ ဖြစ်သဖြင့် ထန်ထျန်းနှင့် လီဟုန်တို့က ဂရုမစိုက်ဘဲ အချိန်အတိုင်းအတာတစ်ခုရောက်မှသာ အကုန်လုံးကို ရှင်းလင်းလေ့ ရှိသည်။

တိုက်ဆိုင်စွာပင် ယခုတစ်ကြိမ်တွင် မရှင်းလင်းရသေးပေ။ တိုက်ဆိုင်စွာပင် ထိုအသီးမှာ စောစောမှည့်ပြီး ကြွေကျကာ ပုပ်သွားခဲ့ခြင်း ဖြစ်၏။

တိုက်ဆိုင်စွာပင် ရွှေငါးလေးမှာ ရေထဲမှ ခုန်ထွက်လာပြီး ထိုပုပ်နေသော အသီးရှိရာသို့ ကျရောက်သွားခဲ့ကာ အသက်ရှူနေစဉ်မှာပင် အသီးကို အကြိမ်အနည်းငယ် ကိုက်မိသွားခဲ့သည်။

ကမ်းစပ်မှာ စိုစွတ် ချောကျိနေသဖြင့် ရွှေငါးလေးမှာ ခဏမျှ ရုန်းကန်ပြီးနောက် ရေကန်ထဲသို့ ပြန်ရောက်သွားခဲ့၏။

သို့သော် အသီးကို အမှန်တကယ် စားလိုက်ရခြင်း ဖြစ်ပေသည်။

သိပ်မကြာမီမှာပင် ၎င်း၏ ခန္ဓာကိုယ်မှာ စတင် ပြောင်းလဲလာတော့သည်။

ဝိညာဉ်အသီး၏ အာနိသင်ကြောင့် ၎င်းက ပတ်ဝန်းကျင်ရှိ ဝိညာဉ်စွမ်းအားများကို လျင်မြန်စွာ စုပ်ယူလာ၏။

ခဏအကြာတွင် လူသားကျင့်ကြံသူများ၏ ချီသန့်စင်ခြင်း အဆင့်သို့ တိုက်ရိုက် ရောက်ရှိသွားခဲ့သည်။

ရှေ့မှ မြင်ကွင်းကို ကြည့်ရင်း ထန်ထျန်းမှာ တိတ်ဆိတ် သွားရ၏။

တကယ်ပဲ ဤမျှ တိုက်ဆိုင်နေသည်လား။

သို့သော် သူ မထင်မှတ်ထားသည်မှာ ပို၍ တိုက်ဆိုင်သော အရာများက နောက်တွင် ရှိနေခြင်းပင်။

ချီသန့်စင်ခြင်း အဆင့်သို့ ရောက်ပြီးနောက် ရွှေငါးလေးမှာ ဉာဏ်ပညာ စတင် ပွင့်လင်းလာပြီး သူငယ်ချင်းများနှင့် လမ်းခွဲကာ တစ်ကိုယ်တော် လှည့်လည်တော့သည်။

၎င်းက ရေကန်နှင့် ချောင်းငယ် ဘေးတစ်လျှောက်ရှိ ဝိညာဉ်အသီးများကို လျင်မြန်စွာ ရှာဖွေစားသောက်ခဲ့ရာ ကျင့်ကြံခြင်းအဆင့်မှာ အရှိန်အဟုန်ဖြင့် မြင့်တက်လာခဲ့၏။

သို့သော် ရှာဖွေစားသောက်နေစဉ်အတွင်း ၎င်းက ဉာဏ်ပညာ ပွင့်လင်းနေသော အခြား "ငါးကြင်း" တစ်ကောင်နှင့် တွေ့ဆုံကာ အငြင်းပွားမှု ဖြစ်ပွားခဲ့သည်။

ငါးကြင်း မှာ ပို၍ သန်မာသော်လည်း ၎င်း၏ ပထမဆုံး တိုက်ခိုက်မှုမှာပင် ရေကန်အတွင်းရှိ အစီအရင် ကို တိုက်ရိုက် တိုက်မိသွားခဲ့၏။

၎င်းမှာ ငါးအုပ်ကို စီမံရန် လီဟုန် ချထားသော အစီအရင် ဖြစ်သည်။

အစီအရင်မှာ လျှို့ဝှက်ထားသဖြင့် ငါးများ မြင်တွေ့နိုင်ခြင်း မရှိပေ။

၎င်းက အန္တရာယ် မပေးသော်လည်း တိုက်ခိုက်ခံရပါက တန်ပြန် တိုက်ခိုက်လေ့ ရှိပေသည်။

တိုက်ဆိုင်စွာပင် ငါးကြင်း မှာ ၎င်းကို တိုက်မိသွားခြင်း ဖြစ်၏။

ခေါင်းနှင့် တိုက်မိပြီး နေရာတင် သေဆုံးသွားခဲ့သည်။

ရွှေငါးလေးမှာ ခေတ္တမျှ မှင်တက်သွားပြီးမှ ငါးကြင်း အတွင်းရှိ နတ်ဆိုးစွမ်းအား အားလုံးကို ဝါးမြိုလိုက်၏။

သို့သော် ပြဿနာမှာ ငါးကြင်း ၏ စွမ်းအားမှာ ပြင်းထန်လွန်းသဖြင့် ရွှေငါးလေးမှာ မစုပ်ယူနိုင်ခြင်းပင် ဖြစ်သည်။

၎င်းသည် ခံရခက်လှသဖြင့် ရေကန်အတွင်း လျှောက်ပြေးနေစဉ် မတော်တဆ မှောင်မည်းနေသော ရွှံ့အိုင်တွင်းတစ်ခုထဲသို့ တိုးဝင်မိသွားခဲ့သည်။

သို့သော် ထပ်မံ၍ တိုက်ဆိုင်စွာပင် ထိုရွှံ့အိုင်တွင်းထဲတွင် သေလုမြောပါး ဖြစ်နေသော "ကဏန်းအိုကြီး" တစ်ကောင် ပုန်းအောင်းနေပေသည်။

ကဏန်းအိုကြီးမှာ ရွှေငါးလေးကို စွမ်းအားအားလုံး စုပ်ယူနိုင်အောင် ကူညီပေးခဲ့သလို သူ၏ ကျန်ရှိနေသော နတ်ဆိုးစွမ်းအားများကိုပါ လွှဲပြောင်းပေးခဲ့၏။

ထို့ပြင် ရတနာပစ္စည်းသဖွယ် ဖြစ်နေသော သူ၏ လက်မကြီး နှစ်ခုကိုပါ ရွှေငါးလေးကို လက်နက်အဖြစ် ပေးအပ်ခဲ့လေသည်...။

ဤသို့ဖြင့် နာရီဝက်ပင် မပြည့်မီ အချိန်အတွင်းမှာပင် တိုက်ဆိုင်မှုများနှင့် အခွင့်အရေးများ ဆက်တိုက် ရရှိခဲ့သဖြင့် ရွှေငါးလေးမှာ သာမန်ငါးဘဝမှနေ၍ အုတ်မြစ်ချခြင်း အဆင့်သို့ တိုက်ရိုက် ခုန်တက်သွားခဲ့ပြီ ဖြစ်၏။

ကျင့်ကြံခြင်း အမြန်နှုန်းမှာ လူသားပါရမီရှင်များထက်ပင် များစွာ ပိုမြန်နေပေသည်။

ထန်ထျန်းက အခန်းထဲမှနေ၍ ဖြစ်စဉ်တစ်ခုလုံးကို ကြည့်ခဲ့၏။

သူက တိတ်ဆိတ်သွားပေသည်။

အချိန်အတော်ကြာမှသာ သက်ပြင်းရှည်ကြီး တစ်ချက် ချလိုက်မိတော့သည်။

"ဪ..."

"ဒါက ကမ္ဘာ့ကံကြမ္မာ ဆိုတာကိုး..."

"ငါတော့ အရှုံးပေါ်သွားပြီ..."