စိန်ခေါ်မှု

“ထန်ဖုန်းယင် ဖြစ်လောက်တယ်...”

ရွှီနင်က ထောင်ချင်းယွမ်၏ မေးခွန်းကို ပြန်ဖြေလိုက်သည်။

ရွှီနင်အတွက်တော့ ဒီမေးခွန်းက သိပ်အရေးမကြီးလှပေ။ သူသည် သာမန်လူသားနယ်ပယ် အဆင့် ၄ သို့ ရောက်ရှိနေပြီဖြစ်ရာ စခန်းအမှတ် ၃ တွင် သူ့အတွက် ပြိုင်ဘက်မရှိတော့ချေ။

“ထန်ဖုန်းယင်က ဒီရက်ပိုင်း သိုင်းပညာကို ကြိုးကြိုးစားစား လေ့ကျင့်နေတယ်လို့ ကြားတယ်... တိုးတက်မှုလည်း အရမ်းမြန်ပြီး ချီနယ်ပယ်ကို ရောက်ဖို့ ခြေတစ်လှမ်းပဲ လိုတော့တာ... သူ့ကို ယှဉ်ဖို့ မလွယ်လောက်ဘူး”

ထောင်ချင်းယွမ်က ရွှီနင်ကို အကြံပြုလိုက်သည်။ “ထန်ရွာက ထန်ချန်ဆိုတဲ့ အဝါရောင်ပြားပိုင်ရှင် နောက်တစ်ယောက် ရှိသေးတယ်... သူက နည်းနည်းအားနည်းတော့ မင်း သူ့ကိုပဲ စိန်ခေါ်သင့်တယ်”

“ထန်ချန်...”

ရွှီနင် ဒီနာမည်ကို သိသည်။ အရင်က စားသောက်ဆောင်တွင် ရန်ဖြစ်ကြစဉ်က ထောင်ကျင်နှင့် ထန်ချန်တို့ အပြန်အလှန် ပြင်းပြင်းထန်ထန် တိုက်ခိုက်ခဲ့ကြဖူးသည်။

“မနက်ဖြန်ကျမှ ကြည့်တာပေါ့”

ရွှီနင်ကတော့ ပြိုင်ဘက်က ဘယ်သူလဲဆိုတာ ဂရုမစိုက်ပေ။

ထောင်ချင်းယွမ်က ရွှီနင်ကို သံသယဖြင့် ကြည့်လိုက်သည်။

‘ရွှီနင်များ...’

ရွှီနင်၏ သိုင်းပညာ ပိုပြီးတိုးတက်သွားပြီလားဟု ထောင်ချင်းယွမ် ခံစားမိလိုက်သည်။

‘ဒါပေမဲ့ ရွှီနင်က အတွင်းအားပြည့်ဝအဆင့်ကို ရောက်တာ မကြာသေးပါဘူး’

“အစ်ကိုချင်းယွမ်...”

ထောင်ချင်းဖင် ရောက်လာပြီး သူတို့နှစ်ယောက်ကြား ဝင်ပြောလိုက်သည်။ “ရွာက တခြားလူတွေ အခြေအနေ ဘယ်လိုလဲဟင်”

မနက်ဖြန်သည် စစ်ဆေးအကဲဖြတ်မည့်နေ့ ဖြစ်သည်။ ထောင်ချင်းဖင်၏ ရင်များ တဒိုန်းဒုန်း ခုန်နေပြီး ကိုယ့်ကိုယ်ကိုယ် ယုံကြည်မှု လုံးဝမရှိဖြစ်နေသည်။

“အားလုံးလည်း အတူတူပါပဲ... စိတ်လှုပ်ရှားနေကြတာပေါ့”

ထောင်ချင်းယွမ်သည် ညဘက်တွင် လူတိုင်းနှင့် စကားစမြည်ပြောကာ ဟာသများပြောပြီး စိတ်ပြေလက်ပျောက် ဖြစ်စေခဲ့သည်။

သူတို့အဖွဲ့၏ အဓိကခေါင်းဆောင်ဖြစ်သည့်အားလျော်စွာ ဤသည်မှာ သူ့တာဝန်ပင် ဖြစ်သည်။

ထောင်ချင်းဖင်၏ အခန်းထဲတွင် ရွှီနင်နှင့် စကားပြောပြီးနောက် ထောင်ချင်းယွမ် ထွက်ခွာရန် ပြင်လိုက်သည်။

သူ ထောင်ကျင်ကို သွားရှာရပေဦးမည်။

ထောင်ကျင်၏ အခြေအနေ သိပ်မဟန်ကြောင်း ထောင်ချင်းယွမ် ခံစားမိသည်။ သူမ၏ သိုင်းပညာ လေ့ကျင့်မှုတွင် အခက်အခဲ တစ်စုံတစ်ရာနှင့် ကြုံတွေ့နေရပုံ ပေါ်သည်။

မနက်ဖြန်ကျမှပဲ ထောင်ချင်းယွမ် ကိုယ်တိုင် အဖြေရှာရပေတော့မည်။

“ရွှီနင်...”

မထွက်ခွာမီ ထောင်ချင်းယွမ် သက်ပြင်းချလိုက်သည်။ “မင်းက မဟူရာသံချပ်ကာဝတ်တပ်ဖွဲ့ထဲ ဝင်ပြီး နှစ်လမပြည့်ခင်မှာပဲ ယာယီတပ်ခွဲမှူး ဖြစ်လာခဲ့တယ်... မင်းက ထောင်ရွာသားတွေထဲမှာ အအောင်မြင်ဆုံးပဲ”

ရွှီနင်သည် ထောင်ချင်းယွမ်ကို ကောင်းစွာ သိသည်။ သူသည် သဘောထားကြီးပြီး မနာလိုဝန်တိုစိတ် လုံးဝမရှိသူ ဖြစ်သည်။

“ခေါင်းဆောင်ချွီးက ရွေးလို့ ကံကောင်းသွားတာပါ”

ရွှီနင်က လက်ကာပြရင်း ပြန်ဖြေလိုက်သည်။

ရွှီနင်သည် ယခင်ကအတိုင်း နှိမ့်ချနေဆဲဖြစ်ကြောင်း ထောင်ချင်းယွမ် သတိပြုမိလိုက်ပြီး လေးစားအားကျမိသွားသည်။

ရာထူးတိုးသွားသော်လည်း သူတို့၏ ဆက်ဆံရေးမှာ ပြောင်းလဲသွားခြင်း မရှိပေ။

ရွှီနင်ကဲ့သို့ တစ်ခြားမျိုးရိုးနာမည်ဖြင့် ထောင်ရွာအသိုင်းအဝိုင်းထဲသို့ ဝင်ဆံ့နိုင်သူမှာ ရှားပါးလှသည်။

“ကောင်းပြီလေ... မနက်ဖြန် စစ်ဆေးမှုအတွက် ကံကောင်းပါစေ”

ထောင်ချင်းယွမ်က ရွှီနင်ကို နှုတ်ဆက်ပြီး ထောင်ကျင်ကို ရှာရန် ထွက်သွားလေသည်။

…

နောက်တစ်နေ့…

စခန်းအမှတ် ၃ မှ လူသစ်အားလုံး စောစောစီးစီး ထကြလေသည်။

စားသောက်ဆောင်တွင် စားသောက်ပြီးနောက် အားလုံးသည် စစ်ရေးပြကွင်းသို့ သွားလိုက်ကြသည်။

စစ်ရေးပြကွင်းထဲတွင် သစ်သားစင်မြင့် သုံးခု ဆောက်လုပ်ထားပြီး ဘေးတွင် ပုံစံမျိုးစုံရှိသော လက်နက်များ ချထားသည်။

ထိုလက်နက်များမှာ ဓားအစစ်များ ဖြစ်သော်လည်း အသွားမသွေးထားပေ။

ခဏကြာ စောင့်ဆိုင်းပြီးနောက် ဝေ့ချန်ချင်းနှင့် ခေါင်းဆောင် ချွီးတယိုတို့ အတူတူ ရောက်လာကြသည်။

သူတို့၏ စစ်ဆေးအကဲဖြတ်မှုကို တာဝန်ယူမည့် မဟူရာသံချပ်ကာဝတ်တပ်ဖွဲ့ တစ်ဖွဲ့လည်း ပါလာသည်။

ထိုအဖွဲ့သည် စခန်းအမှတ် ၃ မှ လူသစ်များ မဟုတ်ဘဲ ဝေ့ချန်ချင်း၏ လက်အောက်ငယ်သားများ ဖြစ်ကြသည်။

နေရာပြင်ဆင်မှုများ ပြီးစီးပြီး တာဝန်ရှိသူများလည်း ရောက်ရှိလာပြီဖြစ်ရာ စစ်ဆေးမှု စတင်တော့မည် ဖြစ်သည်။

ဝေ့ချန်ချင်းသည် ကွင်းဘေးရှိ စင်မြင့်ပေါ်တွင် ထိုင်နေသည်။

ချွီးတယိုသည် သူ့ဘေးတွင် မတ်တပ်ရပ်နေလေသည်။

အရာအားလုံး အဆင်သင့်ဖြစ်သည်ကို မြင်သောအခါ ချွီးတယိုမှ စတင်အော်ပြောလိုက်သည်။

“မင်းတို့အားလုံး စစ်ဆေးမှု စည်းမျဉ်းတွေကို သိပြီးသား ဖြစ်မှာပါ... ဒါပေမဲ့ ငါ ထပ်ပြောပြမယ်”

“ပထမအချက်... စစ်ဆေးမှု ပုံစံက လက်တွေ့တိုက်ခိုက်ရမှာ... မင်းတို့ထဲက တချို့က ပါရမီရှိပေမဲ့ အားနည်းနေသေးတော့ ဒီစစ်ဆေးမှုက မတရားဘူးလို့ ထင်ကောင်းထင်ကြလိမ့်မယ်”

“ဒါပေမဲ့ တကယ်တမ်း ရန်သူနဲ့ တိုက်ခိုက်တဲ့အခါ သူတို့က မင်းရဲ့ ပါရမီကို ဂရုစိုက်မှာ မဟုတ်ဘူး... မင်းကို ဘယ်လိုသတ်ရမလဲ ဆိုတာပဲ တွေးမှာ... နောက်ဆုံးတော့ ပါရမီကို ခွန်အားအဖြစ် ပြောင်းလဲနိုင်ဖို့က အဓိကပဲ”

“ဒါ့အပြင် ပြီးခဲ့တဲ့ သုံးလအတွင်း စိမ်းပြာရောင်သတ္ထုပြား နဲ့ အဝါရောင်သတ္ထုပြား ပိုင်ဆိုင်ထားတဲ့ ပါရမီရှိသူတွေက အရင်းအမြစ်တွေကို ပိုရခဲ့ကြတယ်... ဒီတစ်ခါ အဆင့် လျှောကျသွားရင်တော့ ကိုယ့်ကိုယ်ကိုယ်ပဲ အပြစ်တင်ကြပေတော့”

ခေါင်းဆောင်ချွီးတယို၏ စကားများက လူအုပ်ထဲမှ အချို့ကို လှုပ်ခတ်သွားစေသည်။

တစ်ချိန်တည်းမှာပင် ပါရမီမရှိဟု သတ်မှတ်ခံထားရသော်လည်း ကြိုးစားအားထုတ်မှုကြောင့် တိုးတက်လာသူများအတွက် မျှော်လင့်ချက် ရောင်ခြည် သန်းစေခဲ့သည်။

“ဒုတိယအချက်... စိန်ခေါ်မှုအကြောင်း ပြောမယ်... ဒီနေ့ လူတိုင်း ကိုယ့်ထက်အဆင့်မြင့်တဲ့သူကို စိန်ခေါ်ခွင့် ရှိတယ်... စိန်ခေါ်မှု အောင်မြင်ရင် ပြိုင်ဘက်ရဲ့ သတ္ထုပြားနဲ့ အရင်းအမြစ်တွေကို ရမယ်... မအောင်မြင်ရင်တော့ လက်ရှိအဆင့်မှာပဲ နေရမယ်... မှတ်ထားရမှာက မင်းတို့ရဲ့ သတ္ထုပြားအဆင့်က လျှောကျသွားရင်တော့ စိန်ခေါ်ခွင့် ထပ်မရတော့ဘူး”

“ပြီးတော့ ဒီနေ့ တစ်ကြိမ် စိန်ခေါ်ခံရပြီးတာနဲ့ နောက်ထပ် စိန်ခေါ်မှုတွေကို ငြင်းပယ်ခွင့် ရှိတယ်... ဒါပေမဲ့ ကိုယ်နဲ့အဆင့်တူ သတ္ထုပြားပိုင်ရှင်တွေ အကုန်လုံး စိန်ခေါ်ခံရပြီးမှသာ ငြင်းလို့ရမယ်... တစ်ချိန်တည်းမှာပဲ ကိုယ့်ထက် အဆင့်နှစ်ဆင့်မြင့်တဲ့လူကို စိန်ခေါ်လို့ မရဘူးဆိုတာ မှတ်ထားပါ”

ဤစည်းမျဉ်းက စိန်ခေါ်ခံရသူများအတွက် အတိုင်းအတာတစ်ခုအထိ အကျိုးရှိစေသည်။

တစ်ကြိမ် စိန်ခေါ်ခံရပြီးနောက် နောက်ထပ် စိန်ခေါ်မှုများကို ငြင်းပယ်နိုင်သဖြင့် ခွန်အားကုန်ခမ်းမည်ကို စိုးရိမ်စရာ မလိုတော့ပေ။

“ကဲ... စစ်ဆေးမှု တရားဝင် စတင်ပြီ”

“မီးခိုးရောင်ပြားတွေကနေ စပြီး စိန်ခေါ်မယ့် အလှည့်စဉ်ကို မဲနှိုက်ကြမယ်”

ချွီးတယိုက မဟူရာသံချပ်ကာဝတ်တပ်ဖွဲ့ဝင် တစ်ဦးကို စတင်ရန် လက်ဟန်ပြလိုက်သည်။

လူတစ်ရာကျော် ရှိနေသော စစ်ရေးပြကွင်းပြင်ကြီးသည် တိတ်ဆိတ်ငြိမ်သက်သွားပြီး လေထုမှာ တင်းမာနေလေသည်။

ရွှီနင်သည် လူအုပ်ကြားရှိ လူတိုင်း၏ မျက်နှာပေါ်တွင် စိုးရိမ်စိတ်များကို မြင်လိုက်ရသည်။

လူအုပ်၏ အနောက်ဘက်တွင် ရှိနေသော ထောင်ကျင်သည် လက်သီးကို ကျစ်ကျစ်ပါအောင် ဆုပ်ထားပြီး လေးနက်သော မျက်နှာထား ဖြစ်နေသည်ကို သူ သတိထားမိလိုက်သည်။

“ပထမဆုံး မီးခိုးရောင်ပြား စိန်ခေါ်သူ ထောင်ချင်းဖင်... ဒုတိယ မီးခိုးရောင်ပြား စိန်ခေါ်သူ ထန်ဖုန်းလု...”

မဟူရာသံချပ်ကာဝတ်တပ်ဖွဲ့ဝင်သည် မီးခိုးရောင် သစ်သားသေတ္တာထဲမှ စက္ကူလိပ် သုံးခုကို နှိုက်ယူလိုက်သည်။

သူက တစ်ခုချင်းစီ ဖွင့်ဖတ်ပြီး လူသုံးဦး၏ နာမည်ကို ခေါ်လိုက်သည်။

စိန်ခေါ်မှု သုံးခုကို တစ်ပြိုင်နက်တည်း ပြုလုပ်မည်ဖြစ်ရာ ကွင်းထဲတွင် စင်မြင့်သုံးခု ရှိနေခြင်း ဖြစ်သည်။

“ပထမဆုံးက ငါလား”

ထောင်ချင်းဖင်၏ နာမည် ထွက်လာသောအခါ သူ့မျက်နှာတွင် စိုးရိမ်စိတ်နှင့် ဝမ်းသာစိတ်များ ရောထွေးသွားသည်။

စည်းမျဉ်းအရ ပထမဆုံး စိန်ခေါ်ခွင့်ရသူသည် ပြိုင်ဘက် ရွေးချယ်စရာ အများဆုံး ရရှိလေသည်။

ဤအခြေအနေတွင် သူသည် နှိုင်းယှဉ်ချက်အရ အားနည်းသော ပြိုင်ဘက်ကို ရွေးချယ်နိုင်ပြီး သန်မာသူများကို အခြားသူများအတွက် ချန်ထားခဲ့နိုင်သည်။

လူသုံးဦး တစ်ပြိုင်နက် ထွက်လာကြပြီး စင်မြင့်များရှေ့သို့ ရောက်လာကြသည်။

“မင်းတို့ စိန်ခေါ်ချင်တဲ့ စိမ်းပြာရောင်သတ္ထုပြား ပိုင်ရှင်တွေရဲ့ နာမည်ကို ပြောပါ”

မဟူရာသံချပ်ကာဝတ်တပ်ဖွဲ့ဝင်က မေးလိုက်သည်။

“ကျွန်တော် ထန်ရွာက ထန်ဖုန်းဟယ်ကို ရွေးပါတယ်”

ထောင်ချင်းဖင်က ပြိုင်ဘက်ကို ဦးဆုံး ရွေးချယ်လိုက်သည်။

ထောင်ချင်းဖင်သည် ကြိုတင်လေ့လာမှုများ ပြုလုပ်ထားပြီးဖြစ်ရာ ထန်ရွာမှ အားအနည်းဆုံး စိမ်းပြာရောင်ပြား ပိုင်ရှင်ကို ရွေးချယ်လိုက်ခြင်း ဖြစ်သည်။

“ကျွန်တော် ထောင်ရွာက ရွှီနင် ကို ရွေးပါတယ်”

ဒုတိယမြောက် မီးခိုးရောင်ပြား စိန်ခေါ်သူ ထန်ဖုန်းလု ရွေးချယ်လိုက်သူမှာ ရွှီနင် ဖြစ်နေသည်။

ထောင်ရွာမှ လူတိုင်း၏ အာရုံများ သူ့ထံ ရောက်လာသည်ကို ရွှီနင် ခံစားလိုက်ရသည်။

ဒီလောက်မြန်မြန် ရွေးချယ်ခံရလိမ့်မည်ဟု သူ မထင်ထားခဲ့ပေ။

သို့သော် ရွှီနင်မှာ လုံးဝ ထိတ်လန့်ခြင်း မရှိပေ။ သူသည် စင်မြင့်ပေါ်သို့ တည်ငြိမ်စွာ လျှောက်သွားလိုက်သည်။

‘ထန်ဖုန်းလုက ရွှီနင် ဘယ်လောက်သန်မာလဲဆိုတာ သိမှာပဲ...’

ထောင်ချင်းယွမ် သံသယဝင်သွားသည်။ ‘ငါ အရင်က စုံစမ်းဖူးတာတော့... ဒီ ထန်ဖုန်းလုက မညံ့ဘူး... မဟူရာသံချပ်ကာဝတ်တပ်ဖွဲ့ထဲ ဝင်ပြီးကတည်းက ထန်ဖုန်းယင်နဲ့ အတူတူ လေ့ကျင့်လို့ သူ့ခွန်အားတွေ အများကြီး တိုးတက်လာတယ်... စိမ်းပြာရောင်ပြား ပိုင်ရှင်ကို အနိုင်ယူဖို့ အခွင့်အရေး များတယ်... ဒါပေမဲ့ သူက ရွှီနင်ကိုမှ ရွေးလိုက်တယ် ဆိုတော့ အခွင့်အရေးကို ဖြုန်းတီးလိုက်တာပဲ’

စင်မြင့်ပေါ်မှ ထန်ဖုန်းလုသည် လူအုပ်ထဲမှ ထန်ဖုန်းယင်ကို လှမ်းကြည့်လိုက်သည်ကို ထောင်ချင်းယွမ် ရုတ်တရက် သတိထားမိလိုက်သည်။

ထန်ဖုန်းလုသည် ထန်ဖုန်းယင်၏ ညွှန်ကြားချက်အတိုင်း လုပ်ဆောင်နေခြင်းဖြစ်ကြောင်း ထောင်ချင်းယွမ် ချက်ချင်း သဘောပေါက်လိုက်သည်။

‘ရွှီနင်ရဲ့ ခွန်အားကို ထန်ဖုန်းယင် သိရအောင်လို့ သူက စိမ်းပြာရောင်သတ္ထုပြား ရမယ့် အခွင့်အရေးကို စွန့်လွှတ်လိုက်တာပဲ... ထန်ရွာသားတွေက တော်တော် ကောက်ကျစ်တာပဲ’

ထောင်ချင်းယွမ် တွေးလိုက်မိသည်။

ထန်ဖုန်းလုနှင့် ထန်ဖုန်းယင်တို့၏ အကြည့်ချင်း ဖလှယ်မှုကို ရွှီနင်လည်း သတိထားမိလိုက်သည်။

သို့သော် ရွှီနင်၏ အမြင်တွင်မူ ဒါတွေအားလုံးက အဓိပ္ပါယ် မရှိပေ။

ချီနယ်ပယ်နှင့် အတွင်းအားပြည့်ဝအဆင့် ကြားမှ ကွာခြားချက်မှာ အရမ်းကြီးမားလွန်းသည်။ သူ့ပြိုင်ဘက်သာ ပြင်ပသိုင်းပညာကို ပြီးပြည့်စုံခြင်းအဆင့်ထိ မရောက်ရှိထားလျှင် ရွှီနင်ကို လုံးဝ ယှဉ်နိုင်မည် မဟုတ်ပေ။

ရွှီနင်မှာ တိုက်ပွဲကို မျှော်လင့်စောင့်စားနေမိသည်။

ဒါသည် သူ ချီနယ်ပယ်သို့ ရောက်ပြီးနောက်ပိုင်း ပထမဆုံးအကြိမ် တိုက်ခိုက်ရခြင်း ဖြစ်သည်။

သူ၏ ချီနယ်ပယ် ခွန်အားကို စမ်းသပ်ရန်အတွက် ယခုတိုက်ပွဲကို အခွင့်အရေးတစ်ခုအဖြစ် အသုံးပြုပေတော့မည်။