အခန်း (၂၈၃)

"မတိုက်တော့ဘူး... မတိုက်တော့ဘူး"

ထိုစဉ်မှာပင် ကျောက်လင်းသည် ချုံပုတ်ထဲမှ ယိုင်တိုင်တိုင်ဖြင့် ပြန်ထွက်လာသည်။ သူမ၏ မျက်နှာမှာ စိတ်ပျက်အားငယ်မှုများဖြင့် ပြည့်နှက်နေပြီး ဆံပင်များတွင်လည်း သစ်ရွက်ခြောက်အချို့ ကပ်ညှိနေကာ မေးစေ့တွင် ရွှံ့ကွက်များ ပေကျံနေသည်။ သူမ၏ အဝတ်အစားနှင့် ဆံပင်များမှာ ဖရိုဖရဲဖြစ်နေပြီး အတော်ပင် နွမ်းနယ်နေသည့်ပုံ ပေါက်နေတော့သည်။

"ဒါက တကယ့်ကို ပုံမှန်မဟုတ်တော့ဘူး။ အရင်က တိုက်တုန်းက လုချွမ်းက ဒီလောက်မသန်မာပါဘူး အခု တစ်ဆင့်တက်ရုံနဲ့ ဘယ်လိုလုပ် ဒီလောက်ကြီး သန်မာသွားရတာလဲ။ ပြီးတော့ အဲဒီဓားအရှိန်အဝါကလည်း... တကယ့်ကိုပဲ..."

ကျောက်လင်းသည် လုချွမ်းကို အထက်အောက် အကဲခတ်ကြည့်ရင်း သူမ၏ မျက်ဝန်းများမှာ မယုံကြည်နိုင်မှုများဖြင့် ပြည့်နှက်နေသည်။ အထူးသဖြင့် လုချွမ်း ပစ်လွှတ်လိုက်သော ကြောက်မက်ဖွယ် ဓားအရှိန်အဝါကို ပြန်တွေးမိသောအခါ သူမ၏လက်ထဲရှိ အက်ကွဲကြောင်းများဖြင့် ပြည့်နေသော သံမဏိဓားကို ကြည့်ကာ မသိမသာ တုန်ယင်သွားမိသည်။

ထိုဓားအရှိန်အဝါ၏ စွမ်းအားမှာ သူမ ထင်ထားသည်ထက် များစွာ ကျော်လွန်နေပြီး သူမ၏ သံမဏိဓားပင် မတောင့်ခံနိုင်ခဲ့ချေ။ အကယ်၍ ၎င်းသာ သူမ၏ ခန္ဓာကိုယ်ကို တိုက်ရိုက်ထိမှန်ခဲ့မည်ဆိုလျှင်...

"ဖေဖေက တကယ့်ကို အံ့သြဖို့ကောင်းတာပဲ"

ကျိရုရွှယ်သည် လုချွမ်းအနားသို့ အပြေးလေး ရောက်လာပြီး ပြုံးရွှင်စွာဖြင့် ချီးကျူးလိုက်သည်။ သူမ၏ ဖခင်အပေါ် ကြည့်သော အကြည့်များမှာ အထင်ကြီး လေးစားမှုများဖြင့် ပြည့်လျှံနေတော့သည်။

သူမဖခင်၏ စွမ်းအား တိုးတက်မှုနှုန်းမှာ အမှန်တကယ်ပင် မြန်ဆန်လွန်းလှသဖြင့် ကျိရုရွှယ်ကိုယ်တိုင်ပင် အံ့အားသင့်နေရသည်။ အချိန်သိပ်မကြာလိုက်ဘဲ သူသည် အဆင့် ၅ သို့ပင် ရောက်ရှိနေပြီ ဖြစ်သည်။ လက်ရှိ အခြေအနေအရဆိုလျှင် ဤကမ္ဘာပေါ်တွင် သူမ၏ဖခင်မှလွဲ၍ အခြားသူ မည်သူမျှ အဆင့် ၅ သို့ ရောက်ရှိနိုင်ဦးမည် မဟုတ်ချေ။

"ရူးချင်စရာပဲ... တကယ့်ကို ရူးချင်စရာပဲ။ တခြား အဆင့် ၄ တိုက်ခိုက်ရေး အမျိုးအစား ဇွန်ဘီတွေထက်တောင် ပိုပြီး သန်မာနေဦးမယ် ထင်တယ်"

ကျောက်လင်းသည် လုချွမ်းကို တစ်ကိုယ်တည်း တိုးတိုးလေး ရေရွတ်ရင်း အိမ်ထဲသို့ ပြန်ဝင်လာခဲ့သည်။ ကျောက်လင်းက အရှုံးပေးလိုက်ပြီ ဖြစ်သဖြင့် လုချွမ်းကလည်း ဆက်လက် တိုက်ခိုက်ခြင်း မပြုတော့ချေ။

အဆင့် ၄ ဇွန်ဘီရုပ်သေးများကို ပိုမိုထိန်းချုပ်လိုစိတ် ပြင်းပြနေသော လုချွမ်းသည် သူ၏ သံမဏိဓားကို ဘေးရှိ ဇွန်ဘီရုပ်သေးတစ်ကောင်ထံ အလျင်အမြန် ကမ်းပေးလိုက်သည်။ ထို့နောက် စက္ကူနှင့် ဘောပင်ကို ထုတ်ယူကာ ရေးသားလိုက်သည်။

"ချီချီလေး... သမီး အန်တီကျောက်လင်းနဲ့ အိမ်ထဲအရင်ဝင်နှင့်တော့နော်။ ဖေဖေ လုပ်စရာရှိလို့ အပေါ်ကို လောလောဆယ် မလိုက်တော့ဘူး"

"ဟုတ်ကဲ့ပါ ဖေဖေ"

ကျိရုရွှယ်က လိမ္မာပါးနပ်စွာ ခေါင်းညိတ်လိုက်သည်။ ဖခင်ဖြစ်သူသည် အဆင့် ၄ ဇွန်ဘီရုပ်သေးများကို ပိုမိုထိန်းချုပ်နိုင်ရန် ကြိုးစားတော့မည်ဖြစ်ကြောင်း သူမ ရိပ်မိလိုက်သည်။

စက္ကူပေါ်ရှိ စာသားများကို မြင်သောအခါ ကျောက်လင်းက လုချွမ်းကို စပ်စုသော မျက်လုံးများဖြင့် ကြည့်လိုက်သည်။

ဒီလူ ဘာတွေ ထပ်လုပ်ဦးမလို့လဲ။ အဆင့်တက်ပြီးတာနဲ့ အလုပ်တွေက တန်းစီနေတာပဲ။ လျှို့ဝှက်ချက်တွေကလည်း များလိုက်တာ။

သူမ တွေးနေမိသည်။

သို့သော် ကျောက်လင်းသည် ပညာရှိစွာပင် ထပ်မမေးတော့ဘဲ လေးနက်စွာသာ ပြောလိုက်သည်

"စိတ်မပူပါနဲ့ လုချွမ်း ချီချီလေးကို ငါ့ဆီသာ အပ်ထားလိုက်။ နင့်အလုပ်တွေကိုသာ သွားလုပ်တော့"

ထို့နောက် ကျောက်လင်းသည် ကျိရုရွှယ်ကို ခေါ်ဆောင်ကာ အပေါ်ထပ်သို့ ဖြည်းညင်းစွာ တက်သွားခဲ့သည်။

သူတို့နှစ်ဦး အပေါ်ထပ်သို့ တက်သွားသည်ကို ကြည့်ပြီးနောက် လုချွမ်းသည် ချက်ချင်းပင် လှုပ်ရှားလိုက်တော့သည်။ ပထမဦးစွာ သူသည် အခန်းအတွင်းရှိ စွမ်းအင်ကျောက်တုံးများကို သွားရောက်ယူဆောင်ရန် ဇွန်ဘီရုပ်သေးတစ်ကောင်ကို အမိန့်ပေးလိုက်သည်။

ယင်းနောက် လုချွမ်းသည် ဇွန်ဘီရုပ်သေး အုပ်စုကြီးကို ခေါ်ဆောင်ကာ ယခင်က အဆင့် ၄ ဆင့်ကဲဇွန်ဘီများကို ဖန်တီးခဲ့သည့် နေရာသို့ သွားရောက်ခဲ့သည်။

ပထမဦးစွာ သူသည် ပိုင်ချန်မြို့ဧရိယာမှ သူထိန်းချုပ်ထားသော အဆင့် ၂ ဆင့်ကဲဇွန်ဘီများကို စုစည်းကာ တန်းစီရပ်စေလိုက်သည်။ လုချွမ်းသည် ဇွန်ဘီရုပ်သေးအချို့ကို ထိန်းချုပ်ပြီး ထိုအဆင့် ၂ ဇွန်ဘီများထံသို့ အဆင့် ၂ စွမ်းအင်ကျောက်တုံးများကို လိုက်လံဝေငှပေးလိုက်သည်။

ဆက်လက်၍ ၎င်းဇွန်ဘီများကို အဆင့်တက်ရန်အတွက် လိုအပ်သော စွမ်းအင်များအဖြစ် ထိုကျောက်တုံးများကို ဝါးမျိုစေလိုက်သည်။

ဝုန်း...

ကျောက်တုံးများမှ ထွက်ပေါ်လာသော သန့်စင်သည့် စွမ်းအင်များသည် အဆင့် ၂ ဇွန်ဘီရုပ်သေး တစ်ကောင်ချင်းစီ၏ ခန္ဓာကိုယ်အတွင်း၌ ပေါက်ကွဲထွက်သွားပြီး ၎င်းတို့၏ သွေးသားနှင့် အရိုးအဆစ်တိုင်းကို ပြုပြင်ပြောင်းလဲပေးကာ အထက်အဆင့်သို့ တက်လှမ်းရန် တွန်းအားပေးလိုက်တော့သည်။

ချက်ချင်းဆိုသလိုပင် ဟယ်ဥယျာဉ်ရပ်ကွက်တစ်ခုလုံးတွင် ဇွန်ဘီများ၏ ဟိန်းဟောက်သံများ ဆက်တိုက် ထွက်ပေါ်လာတော့သည်။ ထိုအသံမှာ ဝိညာဉ်များ အော်ဟောက်နေသည့်အလား အလွန်ပင် စူးရှပြီး နားကွဲလုမတတ် ဖြစ်နေတော့သည်။

ဆယ်မိနစ်ကျော်ခန့် ကြာပြီးနောက်တွင်မူ အဆင့် ၂ ဇွန်ဘီရုပ်သေး အုပ်စုလိုက်မှာ အဆင့်မြှင့်တင်ခြင်း လုပ်ငန်းစဉ်ကို ဖြတ်ကျော်နိုင်ခဲ့ကြသည်။

စိတ်အမိန့်တစ်ချက်ဖြင့် လုချွမ်းသည် အသစ်စက်စက် အဆင့်တက်လာသော အဆင့် ၃ ဆင့်ကဲဇွန်ဘီရုပ်သေးများကို နေရာတွင်တင် မလှုပ်မယှက်ဖြစ်အောင် ချုပ်နှောင်ထားလိုက်သည်။

ထို့နောက် လုချွမ်းသည် အဆင့် ၄ ဇွန်ဘီရုပ်သေးအချို့ကို ထိန်းချုပ်ကာ ထိုအဆင့် ၃ ဇွန်ဘီများ၏ ဦးခေါင်းခွံများကို ရိုက်ခွဲစေပြီး အတွင်းရှိ စွမ်းအင်ကျောက်တုံးများကို ထုတ်ယူစေသည်။ သူသည် ဤလုပ်ငန်းစဉ်တစ်ခုလုံးကို ပြတ်သားပြီး ထိရောက်မြန်ဆန်စွာ ကိုင်တွယ်ဆောင်ရွက်သွားခဲ့သည်။

နောက်ဆုံးတွင် လုချွမ်းသည် နဂါးကျားဂိုဏ်းကဲ့သို့သော နေရာများမှ စုဆောင်းရရှိထားသည့် အဆင့် ၃ စွမ်းအင်ကျောက်တုံးများကို စုစည်းလိုက်ရာ တာဖန်း၏ လက်ဖဝါးပေါ်တွင် တောင်ငယ်လေးတစ်ခုပမာ ပုံနေတော့သည်။

ထိုအဆင့် ၃ ကျောက်တုံးပုံကြီးကို ကြည့်ရင်း လုချွမ်း၏ မျက်ဝန်းများမှာ စိတ်လှုပ်ရှားမှုကြောင့် တောက်ပနေသည်။ ယခုတစ်ကြိမ်တွင်မူ သူသည် ဤအဆင့် ၃ ကျောက်တုံးများကို အသုံးပြု၍ အဆင့် ၄ ဇွန်ဘီရုပ်သေးများကို ပျိုးထောင်ပေးတော့မည် ဖြစ်သည်။

တွန့်ဆုတ်မနေတော့ဘဲ လုချွမ်းသည် သူ၏ ထိန်းချုပ်မှုအောက်ရှိ အဆင့် ၃ ဆင့်ကဲဇွန်ဘီရုပ်သေးများကို ရှေ့သို့ ခေါ်ထုတ်ကာ ချက်ချင်းပင် စတင်လှုပ်ရှားတော့သည်။

ယခင် အဆင့် ၂ ဇွန်ဘီများတုန်းကကဲ့သို့ပင် ၎င်းတို့ကို တန်းစီရပ်စေလိုက်သည်။ ပထမဦးစွာ အဆင့် ၃ ဆင့်ကဲဇွန်ဘီတစ်ကောင်ကို ရှေ့သို့ တိုးထွက်လာစေသည်။ လုချွမ်းသည် အသင့်ပြင်ထားသော အဆင့် ၃ စွမ်းအင်ကျောက်တုံးတစ်ခုကို ထိုဇွန်ဘီရုပ်သေးထံ ကမ်းပေးလိုက်သည်။

ယခုတစ်ကြိမ်တွင်မူ လုချွမ်းသည် ယခင်ကကဲ့သို့ တာဖန်းနှင့် အာဖန်းတို့ကို ဘေးကနေ ဝိုင်းချုပ်ခိုင်းသည့် နည်းလမ်းကို အသုံးမပြုတော့ချေ။ အဘယ်ကြောင့်ဆိုသော် ယခုအခါ သူကိုယ်တိုင်မှာ အဆင့် ၅ သို့ ရောက်ရှိနေပြီဖြစ်ရာ ဤအဆင့် ၃ ဇွန်ဘီများသည် အဆင့် ၄ သို့ တက်လှမ်းသွားလျှင်ပင် သူ၏ ထိန်းချုပ်မှုအောက်မှ ရုန်းထွက်နိုင်မည် မဟုတ်သောကြောင့် ဖြစ်သည်။

ယခုမှာမူ အသီးအပွင့်များကို ရိတ်သိမ်းရမည့် အချိန်ပင်။

ဝူး... ဝူး... ဝူး...

အချိန်များ ကုန်လွန်လာသည်နှင့်အမျှ ဟယ်ဥယျာဉ်ရပ်ကွက်အတွင်း၌ ပြင်းထန်လှသော ဟိန်းဟောက်သံများမှာ တစ်ကျော့ပြီးတစ်ကျော့ ထွက်ပေါ်လာကာ အရပ်မျက်နှာအနှံ့သို့ ပဲ့တင်ထပ်နေတော့သည်။

တစ်နာရီခန့် ကြာပြီးနောက်တွင်မူ လုချွမ်းသည် သူ၏ရှေ့တွင် ရပ်နေသော အဆင့် ၄ ဇွန်ဘီရုပ်သေး အုပ်စုကြီးကို ကြည့်ကာ မျက်နှာတစ်ခုလုံး ပြုံးပျော်လျက် ရှိနေတော့သည်။

လုချွမ်း၏ ရှေ့တွင် လျှပ်စီး ၂၊ လျှပ်စီး ၃... ဧရာမဇွန်ဘီ ၂၊ ဧရာမဇွန်ဘီ ၃... ဆန်းဖန့်၊ စီဖန့်... စသည်ဖြင့် အဆင့် ၄ ဇွန်ဘီရုပ်သေးများ တန်းစီရပ်နေကြသည်။

နောက်ဆုံးတွင် လုချွမ်းသည် စုစုပေါင်း အဆင့် ၄ ဇွန်ဘီရုပ်သေး ၂၅ ကောင် တိတိကို ပိုင်ဆိုင်သွားခဲ့ပြီ ဖြစ်သည်။ အရေအတွက် များပြားလွန်းလှသဖြင့် နောက်ပိုင်းမှ အဆင့်တက်လာသော ဇွန်ဘီများကို တစ်ကောင်ချင်း နာမည်ပေးရန်ပင် လုချွမ်း စိတ်မကူးတော့ချေ။ အားလုံးမှာ အစွမ်းချင်း တူညီကြခြင်းပင်။

ထိုအဆင့် ၄ ဇွန်ဘီရုပ်သေးများသည် တစ်ကိုယ်လုံးမှ ပြင်းထန်သော စွမ်းအင်အရှိန်အဝါများကို ထုတ်လွှတ်လျက် မတ်တပ်ရပ်နေကြရာ ၎င်းတို့၏ ပေါင်းစပ်စွမ်းအားမှာ အရပ်မျက်နှာအနှံ့သို့ ရိုက်ခတ်နေပြီး ကောင်းကင်ယံတစ်ခုလုံးကိုပင် မှောင်မိုက်သွားစေသကဲ့သို့ ခံစားရစေသည်။ ဤမျှ ခမ်းနားထည်ဝါသော စစ်တပ်မျိုးနှင့်ဆိုလျှင် လုချွမ်းအနေဖြင့် ဤကမ္ဘာပျက်ကပ်ကြီးအတွင်း အလိုရှိသလို ခြယ်လှယ်နိုင်စွမ်း ရှိနေပြီဖြစ်သည်။

သို့သော် လုချွမ်းမှာ ဤမျှနှင့် မတင်းတိမ်နိုင်သေးဘဲ သူ၏ဘေးရှိ မသေနိုင်သူ ၁ ထံသို့ အကြည့်ကို လွှဲပြောင်းလိုက်သည်။ ယခုအခါ သူကိုယ်တိုင်မှာ အဆင့် ၅ သို့ ရောက်ရှိနေပြီဖြစ်ရာ သူ၏ လက်အောက်ခံများထဲတွင်လည်း အဆင့် ၅ ဇွန်ဘီတစ်ကောင်မှာ အုပ်ချုပ်သူအဖြစ် ရှိနေသင့်သည်ဟု သူ ခံစားရသည်။ အစွမ်းထက်လှသော အဆင့် ၅ ဇွန်ဘီရုပ်သေးတစ်ကောင်မှာ တိုက်ပွဲအတွင်း ရန်သူကို မမျှော်လင့်ဘဲ တိုက်ခိုက်နိုင်မည့် ဝှက်ဖဲတစ်ချပ်လည်း ဖြစ်သည်။

ဥပမာအားဖြင့် လုချွမ်းနှင့် အမြဲတစေ ထိပ်တိုက်တွေ့နေသော အာဏာပိုင်များက သူ့ကို ဝိုင်းဝန်းဖမ်းဆီးရန် အစွမ်းထက်သော ဆင့်ကဲပြောင်းလဲသူ အမြောက်အမြားကို စေလွှတ်ခဲ့လျှင်ပင် မှောင်ရိပ်အတွင်း ပုန်းအောင်းနေသော အဆင့် ၅ ဇွန်ဘီရုပ်သေးက ၎င်းတို့ကို ကြီးမားသော အံ့အားသင့်မှု သို့မဟုတ် သေမင်းတံခါးဝသို့ ပို့ဆောင်ပေးနိုင်မည် ဖြစ်သည်။

လုချွမ်း၏ အဆင့် ၄ ဇွန်ဘီများထဲတွင် ကိုယ်ယောင်ဖျောက်ရာ၌ အတော်ဆုံး၊ အမြန်ဆုံး တိုက်ခိုက်နိုင်စွမ်းရှိပြီး အဆောက်အအုံများပေါ်သို့ မရိပ်မိအောင် တက်နိုင်စွမ်းရှိသူမှာ မသေနိုင်သူ ၁ သာ။ ၎င်းသာ အဆင့် ၅ သို့ ရောက်သွားပါက လုချွမ်း၏ ထိန်းချုပ်မှုအောက်တွင် ကြောက်မက်ဖွယ်ကောင်းသော လုပ်ကြံသတ်ဖြတ်သူတစ်ဦး ဖြစ်လာပေလိမ့်မည်။

လုချွမ်းသည် စွမ်းအင်ကျောက်တုံးများကို မသေနိုင်သူ ၁ ထံသို့ တစ်ခုပြီးတစ်ခု ကျွေးလိုက်တော့သည်။

ဝူး...

ချက်ချင်းဆိုသလိုပင် ကျောက်တုံးများမှ ထွက်ပေါ်လာသော အတိုင်းအဆမရှိ ကြီးမားလှသည့် စွမ်းအင်များသည် မသေနိုင်သူ ၁ ၏ ခန္ဓာကိုယ်ကို အတင်းအဓမ္မ ဆုတ်ဖြဲဖျက်ဆီးကာ အသစ်ပြန်လည် တည်ဆောက်တော့သည်။ ထိုနာကျင်မှုကြောင့် ၎င်းမှာ အဆက်မပြတ် ဟိန်းဟောက်နေတော့သည်။ မသေနိုင်သူ ၁ ၏ ခြေလက်များမှာ မြေပြင်ကို အတင်းကုတ်တွယ်ထားပြီး တစ်ကိုယ်လုံးလည်း မရပ်မနား တုန်ယင်နေသည်။

နောက်တစ်ခဏတွင် မသေနိုင်သူ ၁ ၏ အဆင့် ၅ သို့ ကူးပြောင်းခြင်း ဖြစ်စဉ် စတင်တော့သည်။

ပထမဆုံး ပြောင်းလဲလာသည်မှာ ၎င်း၏ လက်များ သို့မဟုတ် ရှေ့ခြေလက်များပင်။ မူလက သာမန်လက်ချောင်း ၅ ချောင်း ရှိခဲ့သော်လည်း ယခုအခါ အရိုး၊ အသားနှင့် သွေးကြောများမှာ လျင်မြန်စွာ ပေါင်းစပ်သွားပြီး နက်မှောင်သော သံမဏိ တံစဉ်းဓားအစုံအဖြစ်သို့ ပြောင်းလဲသွားခဲ့သည်။ ထိုတံစဉ်းဓားများမှာ ထူးခြားစွာ ရှည်လျားလှပြီး သံမဏိရောင် အလင်းတန်းများ ဖြာထွက်နေကာ ၎င်း၏ အသွားမှာ သံကိုပင် ဒိန်ခဲလှီးသကဲ့သို့ ပိုင်းဖြတ်နိုင်မည့်အလား အလွန်ထက်ရှပြီး အန္တရာယ်များလှသည်။

မကြာမီမှာပင် မသေနိုင်သူ ၁ ၏ အခြားသော ခန္ဓာကိုယ်အစိတ်အပိုင်းများမှာလည်း စတင်ပြောင်းလဲလာတော့သည်။ လုချွမ်းသည် မျှော်လင့်ချက်အပြည့်ဖြင့် ဤဖြစ်စဉ်ကို စောင့်ကြည့်နေမိသည်။ သူသည် နောက်ဆုံးတွင် အဆင့် ၅ ဆင့်ကဲဇွန်ဘီရုပ်သေးတစ်ကောင်ကို ပိုင်ဆိုင်ရတော့မည်ပင်။