အလွန်အမင်းဒေါသထွက်ခြင်း

ယွမ်လဲ့ အရှင်သခင် ပေါက်ကွဲသွားသည်နှင့်အတူ ရှည်လျားလှသော မီးလျှံတစ်ခုမှာ ကောင်းကင်ယံသို့ ထိုးတက်သွားခဲ့သည်။ သူ၏ ခန္ဓာကိုယ်အတွင်း၌ သိုဝှက်ထားသော မီးလျှံများမှာ လုံးဝ ပေါက်ကွဲထွက်လာခဲ့ပြီး မီးလျှံလေဝဲတစ်ခုအဖြစ် ကောင်းကင်သို့ လွင့်တက်သွားတော့သည်။

“...”

ဘေးနားရှိ အုပ်ထိန်းသူများမှာ အချိန်မီ ရှောင်တိမ်းနိုင်ခဲ့သဖြင့်သာ တော်တော့သည်။ အနည်းငယ်သာ နောက်ကျပါက မီးလောင်ကျွမ်းခြင်း ခံရပေလိမ့်မည်။ သို့သော် ၎င်းတို့မှာ ကောင်းကင်အရှင် အဆင့်များ ဖြစ်ကြသဖြင့် မည်သို့ပင် လောင်ကျွမ်းစေကာမူ သေဆုံးလိမ့်မည် မဟုတ်ချေ။ ထို့အပြင် ဤမီးလျှံ၏ စွမ်းအားမှာလည်း အလွန်အမင်း ပြင်းထန်လှသည်တော့ မဟုတ်ချေ။

သို့သော် ယွမ်လဲ့ အရှင်သခင် သေဆုံးသွားခြင်းက ထျန်လဲ့နယ်မြေရှင်ကို အကြီးအကျယ် ဒေါသထွက်စေခဲ့သည်။

“မင်း ဘာလုပ်လိုက်တာလဲ... ယွမ်လဲ့က အရှုံးပေးနေတာကို မင်းက တမင်တကာ သတ်လိုက်တာလား...”

ထျန်လဲ့နယ်မြေရှင် ဒေါသထွက်သွားခဲ့ပြီ ဖြစ်သည်။ ယွမ်လဲ့ အရှင်သခင်မှာ သူ၏သား ဖြစ်နေသဖြင့် သူ မည်သို့လျှင် ဒေါသမထွက်ဘဲ နေပါမည်နည်း။

“ကျွန်တော် သူ့ကို မသတ်ခဲ့ပါဘူး... သူက အရမ်း ဒေါသထွက်လွန်းလို့ သူ့ကိုယ်ထဲက မီးလျှံတွေက ထိန်းချုပ်မရ ဖြစ်သွားတာပါ... တကယ်လို့ သူသာ အဲဒီလောက်အထိ ဒေါသမထွက်ခဲ့ရင် ဘာမှ ဖြစ်မှာ မဟုတ်ဘူး... အဲဒီမီးလျှံတွေက တဖြည်းဖြည်းချင်း အပြင်ကို ထွက်သွားမှာပဲလေ...”

ယီထျန်းယွမ်က ပခုံးတွန့်ပြလိုက်သည်။

သူ၏ ရိုက်ချက်တိုင်းတွင် မီးလျှံများ ပါဝင်နေခဲ့ပြီး တစ်ဖက်လူ၏ ခန္ဓာကိုယ်အတွင်းသို့ အဆက်မပြတ် ရိုက်သွင်းခဲ့ခြင်း ဖြစ်သည်။ တိုက်ခိုက်မှုများ များပြားလာသည်နှင့်အမျှ ယွမ်လဲ့ အရှင်သခင်၏ ကိုယ်တွင်း၌ စုစည်းနေသော မီးလျှံများမှာလည်း ပိုမိုများပြားလာခဲ့သည်။

၎င်းမှာ အချိန်ကိုက်ဗုံးတစ်ခုနှင့် တူလှသည်။ မည်သည့်အချိန်တွင် ပေါက်ကွဲမည်နည်းဆိုသည်မှာ ယွမ်လဲ့ အရှင်သခင်၏ အခြေအနေအပေါ်၌သာ မူတည်သည်။ အကယ်၍ ယွမ်လဲ့ အရှင်သခင် အလွန်အမင်း ဒေါသထွက်မည်ဆိုပါက ထိုဒေါသမှာ ဗုံးကို ချက်ချင်း ဖောက်ခွဲလိုက်မည့် မီးစာ ဖြစ်သွားပေလိမ့်မည်။

ယွမ်လဲ့ အရှင်သခင်မှာ အစောပိုင်းက အသက်ရှင်ရန် တောင်းပန်ခဲ့သော်လည်း သတိလစ်မသွားမီမှာပင် သတ်ဖြတ်လိုသော အငွေ့အသက်များကို ထုတ်ဖော်ခဲ့သည်မှာ ထင်ရှားလှသည်။ ဤသည်မှာ မိမိကိုယ်ကိုယ် သေမင်းထံ ပို့ဆောင်လိုက်ခြင်းပင်။ အကယ်၍သာ သူသည် ဒေါသမထွက်ခဲ့လျှင် မည်သည့်ပြဿနာမျှ ရှိလိမ့်မည် မဟုတ်ချေ။

သို့သော် သူ ဒေါသထွက်လိုက်သည့်အတွက် သေဆုံးရန်မှာ သေချာသွားခဲ့ခြင်း ဖြစ်သည်။

အမှန်တကယ်တွင်မူ ဤသည်မှာ ယီထျန်းယွမ်က တမင်လုပ်ဆောင်ခဲ့ခြင်း ဖြစ်သည်။ သူသည် ယွမ်လဲ့ အရှင်သခင် လုပ်ဆောင်ခဲ့သကဲ့သို့ပင် လင်ယွမ်ဖုန်းကို အသက်တစ်ရှိုက်စာ ချန်ထားခဲ့သကဲ့သို့ တစ်ဖက်လူ၏ ကိုယ်တွင်း၌ မီးလျှံများကို ချန်ထားခဲ့ခြင်း ဖြစ်သည်။

ယွမ်လဲ့ အရှင်သခင်က ရက်စက်သည့်အတွက် သူက ပို၍ ရက်စက်ပြခဲ့ခြင်း ဖြစ်သည်။ သေချာပေါက်ပင် သူသည် အသက်ရှင်ရန် အခွင့်အရေး အနည်းငယ် ပေးခဲ့သေးသည်။ ၎င်းမှာ ယွမ်လဲ့ အရှင်သခင် ဒေါသမထွက်ရန်ပင်။ သို့သော် ထိုသူမှာ ဒေါသထွက်ခဲ့သည့်အပြင် ယီထျန်းယွမ် အပြင်ထွက်လာသည့်အခါ သတ်ဖြတ်မည်ဟုပင် ခြိမ်းခြောက်ခဲ့သေးသည်။

ဤသို့ဆိုလျှင် မသေချင်သော်လည်း မရတော့ချေ။ ယီထျန်းယွမ်ကမူ ဤမြင်ကွင်းကို မြင်တွေ့ရသည်မှာ အလွန်ပင် ကျေနပ်ဖွယ် ကောင်းလှသည်။

“မင်း လျှောက်ပြောနေတာပဲ... မင်းသာ သူ့ကိုယ်ထဲကို မီးလျှံတွေ ထည့်မထားခဲ့ရင် ဒီလို အခြေအနေမျိုး ဘယ်ဖြစ်လာမှာလဲ...” ထျန်လဲ့နယ်မြေရှင်သည် သူ၏ ထိုင်ခုံမှ ဆင်းလာခဲ့ပြီး တိုက်ခိုက်ရေးကွင်းအတွင်းသို့ တိုက်ရိုက် ဝင်ရောက်လာခဲ့သည်။

မိမိ၏သား အသတ်ခံလိုက်ရသဖြင့် သူ မည်သို့လျှင် ဒေါသမပေါက်ကွဲဘဲ နေပါမည်နည်း။ ပုံမှန်အားဖြင့်ဆိုလျှင် သူသည် တိုက်ခိုက်ရေးကွင်းအတွင်းသို့ ဝင်ရောက်ခွင့် မရှိချေ။ ဤသည်မှာ စည်းကမ်းဖောက်ဖျက်လိုက်ခြင်းပင် ဖြစ်သည်။ ဘေးမှ အကြီးအကဲများ မတားဆီးနိုင်ခင်မှာပင် သူသည် အောက်သို့ ရောက်ရှိနေခဲ့ပြီ ဖြစ်သည်။

“နယ်မြေရှင်... စိတ်လျှော့ပါဦး... စိတ်လျှော့ပါဦး...”

ထျန်လဲ့နတ်ဘုရားနယ်မြေမှ အကြီးအကဲမှာလည်း လျင်မြန်စွာ ဆင်းလာခဲ့ပြီး ထျန်လဲ့နယ်မြေရှင်ကို စိတ်လိုက်မာန်ပါ မလုပ်ရန် တောင်းပန်တားဆီးနေခဲ့သည်။

“ငါ့ကို အခု ဘယ်လိုလုပ်ပြီး စိတ်အေးအေးထားခိုင်းနေတာလဲ...”

ထျန်လဲ့နယ်မြေရှင်၏ မျက်ဝန်းများမှာ နီမြန်းနေခဲ့ပြီး ခန္ဓာကိုယ်အတွင်းရှိ မိုးကြိုးစွမ်းအားများကို ထုတ်ဖော်ရန် အသင့်ဖြစ်နေခဲ့သည်။

“ဒါက စည်းကမ်းဖောက်ဖျက်တာပါ... ဒီအတိုင်း ဆက်သွားရင် ကျွန်တော်တို့ အပြစ်ပေးခံရလိမ့်မယ်...”

အကြီးအကဲမှာ ချွေးစေးများ ထွက်နေခဲ့သည်။ ယွမ်လဲ့ အရှင်သခင် သေဆုံးသွားခြင်းက ထျန်လဲ့နတ်ဘုရားနယ်မြေအပေါ် မည်မျှအထိ သက်ရောက်မှု ရှိမည်ကို သူ သိရှိထားသည်။ အထူးသဖြင့် သေဆုံးသူမှာ နယ်မြေရှင်၏ သားဖြစ်သလို ၎င်းတို့၏ သခင်လေးလည်း ဖြစ်နေသောကြောင့် ဖြစ်သည်။

“ထျန်လဲ့နယ်မြေရှင်... မင်းက စည်းကမ်းတွေကို ဖျက်ဆီးချင်နေတာလား...”

အကြီးအကဲ ကောက်ဟွမ်၏ မကျေနပ်သော အသံမှာ ကောင်းကင်ယံမှ ကျဆင်းလာခဲ့ပြီး အေးစက်လှသော အငွေ့အသက်များ ပါဝင်နေခဲ့သည်။ ၎င်းက ထျန်လဲ့နယ်မြေရှင်၏ စိတ်ကို အေးစက်သွားစေပြီး ချက်ချင်းပင် သတိပြန်လည်လာစေခဲ့သည်။

“အကြီးအကဲ ကောက်ဟွမ်... ကျွန်တော် ပြောချင်တာက သူက စည်းကမ်းဖောက်ဖျက်လိုက်တာပါ... ယွမ်လဲ့က ပြိုင်ပွဲကနေ ထွက်သွားပြီးပြီကို သူက ဘာလို့ သတ်လိုက်ရတာလဲ...”

ထျန်လဲ့နယ်မြေရှင်မှာ တည်ငြိမ်သွားခဲ့သော်လည်း အလွန်ပင် ဒေါသထွက်နေဆဲ ဖြစ်သည်။

“ကျွန်တော် ပြောပြီးသားပဲလေ... သူ့ကို ကျွန်တော် မသတ်ခဲ့ပါဘူး... သူ့ကိုယ်ထဲမှာ မီးလျှံအချို့ ရှိနေတာပါ... သူက အရမ်းကို ဒေါသထွက်သွားလို့ အဲဒီမီးလျှံတွေက ပေါက်ကွဲထွက်လာတာပဲလေ... ဒါမှမဟုတ် လူအများကြီးရဲ့ ရှေ့မှာ ကျွန်တော်က မသိမသာနဲ့ တိုက်ခိုက်နိုင်လောက်အောင် အဲဒီလောက်အထိ တော်နေတယ်လို့ ခင်ဗျား ထင်နေတာလား...”

ယီထျန်းယွမ်က သူ့အား ကြည့်ကာ အေးစက်စွာ ပြုံးလိုက်သည်။

“ယီထျန်းယွမ် ပြောတာ မှန်တယ်... ငါတို့အားလုံး ဘေးကနေ ကြည့်နေကြတာပဲ... သူ တိုက်ခိုက်တာ မရှိခဲ့ဘူး... ဒါကြောင့် စည်းကမ်းဖောက်ဖျက်တယ်လို့ မဆိုနိုင်ဘူး... မင်းကို နောက်ဆုံး အခွင့်အရေး ပေးမယ်... အခုချက်ချင်း ကွင်းထဲက ထွက်သွားတော့... မဟုတ်ရင် မင်းကို ပြိုင်ပွဲကနေ ထုတ်ပယ်တဲ့ အပြစ်ဒဏ် ပေးရလိမ့်မယ်...”

အကြီးအကဲ ကောက်ဟွမ်မှာ အလွန်ပင် တင်းကျပ်လှသည်။ စည်းကမ်းမှာ စည်းကမ်းသာ ဖြစ်ပြီး အထူးသဖြင့် ယီထျန်းယွမ်မှာ စည်းကမ်းဖောက်ဖျက်ခြင်း မရှိသောကြောင့် ဖြစ်သည်။

၎င်းတို့ အကြီးအကဲ ငါးဦးလုံးမှာ မျက်စိကန်းနေကြသူများ မဟုတ်ချေ။ တစ်စုံတစ်ရာကို မမြင်နိုင်ကြဘဲ နေပါမည်လော။

“ကောင်းပြီလေ...”

ထျန်လဲ့နယ်မြေရှင်သည် ယီထျန်းယွမ်ကို မကျေနပ်သော အကြည့်များဖြင့် ကြည့်လိုက်ပြီးနောက် သူ၏ မူလနေရာသို့ ပြန်လည် ပျံသန်းသွားတော့သည်။

ယီထျန်းယွမ်သည် ထိုနယ်မြေရှင်များကို ရန်စရမည်ကို မကြောက်ရွံ့ချေ။ ဘာပဲဖြစ်ဖြစ် သူသည် ဤနေရာ၌ မည်သည့်အရာကိုမျှ စိုးရိမ်စရာ မရှိသောသူ ဖြစ်သည်။ သူ မည်သည်ကို စိုးရိမ်နေရပါမည်နည်း။ ထို့အပြင် သူသည် အဆင့် ၂ နတ်ဘုရားနယ်မြေသို့ ဝင်ရောက်ပြီးနောက်တွင် ထျန်လဲ့နယ်မြေရှင်ကို ကြောက်စရာ လိုအပ်ပါဦးမည်လော။

အကယ်၍ တစ်ဖက်လူက လူလွှတ်၍ လုပ်ကြံမည်ဆိုပါကလည်း သူက ဝမ်းမြောက်ဝမ်းသာ လက်ခံပေလိမ့်မည်။ ၎င်းတို့မှာ သူ၏ အတွေ့အကြုံ အမှတ်များပင် ဖြစ်သည်။ တစ်ချိန်တည်းမှာပင် သူသည် ထျန်လဲ့နတ်ဘုရားနယ်မြေသို့ သွားရောက်ကာ သူ့အား လာရောက်ရန်စခြင်း၏ အကျိုးဆက်ကို သိရှိအောင် လုပ်ဆောင်ပေးမည် ဖြစ်သည်။

ဤကိစ္စပြီးနောက် လူတိုင်းမှာ တစ်ဦးကိုတစ်ဦး ကြည့်လိုက်ကြပြီး မှင်တက်မိသွားခဲ့ကြရသည်။ ယီထျန်းယွမ်မှာ တကယ်ကို ပြတ်သားလွန်းလှသည်ဟု သူတို့ မထင်မှတ်ထားခဲ့ကြချေ။ သတ်မည်ဆိုလျှင်လည်း ချက်ချင်း သတ်ဖြတ်လိုက်ခြင်းမှာ အနည်းငယ်မျှပင် ညှာတာခြင်း မရှိချေ။

ယီထျန်းယွမ်သည် လူအများ၏ အကြည့်များကို ဂရုမစိုက်ဘဲ မုရုန်ရှောင်းရှိရာဘက်သို့ လှည့်ကြည့်လိုက်သည့်အခါ မုရုန်ရှောင်းမှာ ဆက်တိုက် နောက်သို့ ဆုတ်ခွာနေရပြီး ရှုံးနိမ့်ရန် သေချာသလောက် ရှိနေသည်ကို တွေ့ရှိလိုက်ရသည်။

“ကြည့်ရတာ သူကတော့ ထိပ်သီး တစ်ဆယ့်ငါးဦး စာရင်းမှာပဲ ရပ်တန့်ရတော့မယ် ထင်တယ်...”

ယီထျန်းယွမ်က ခေါင်းခါလိုက်သည်။ ဤသည်မှာ မုရုန်ရှောင်းအတွက် အတော်လေးကို အံ့ဩဖွယ်ကောင်းသော စွမ်းဆောင်ရည် ဖြစ်နေခဲ့ပြီ ဖြစ်သည်။

သူမတွင် နတ်ဘုရားသစ်သား ခန္ဓာကိုယ် ရှိသလို မြေကမ္ဘာအရှင် အဆင့် ၇ ကျင့်စဉ် ရှိသော်လည်း ဤနေရာ၌ သူမ၏ အဆင့်မှာ အလယ်အလတ် တန်းစားလောက်သာ ရှိပြီး ထိပ်တန်း အဆင့်တွင် မရှိချေ။ ထိပ်သီး သုံးဆယ်အတွင်း ဝင်ရောက်နိုင်ခြင်းမှာပင် အလွန်ပင် ကောင်းမွန်လှပြီ ဖြစ်သည်။

မြေကမ္ဘာအရှင်ထျန်ချင်းနှင့် အခြားသူများဘက်တွင်မူ မြေကမ္ဘာအရှင်ထျန်ချင်း၏ တိုက်ပွဲမှာ အစောကတည်းက ပြီးဆုံးသွားခဲ့ပြီ ဖြစ်သည်။ အခြား ပါရမီရှင်တစ်ဦးမှာမူ ဆက်လက် တိုက်ခိုက်နေဆဲဖြစ်ပြီး ပြိုင်ဘက်နှင့် အကြိတ်အနယ် ဖြစ်နေကာ အချိန်မရွေး ရှုံးနိမ့်သွားနိုင်သည့် အခြေအနေမျိုး ဖြစ်နေသည်။

“ဒါကလည်း အရင်အတိုင်းပဲ... သူက တမင်တကာ စွမ်းအားတွေကို ဖုံးကွယ်ထားပြီးမှ ပြန်လည် တိုက်ခိုက်တာလား...”

ယီထျန်းယွမ်သည် ထိုပါရမီရှင်မှာ မိမိ၏ စွမ်းအားကို ဖုံးကွယ်ထားကြောင်း သိရှိလိုက်ရသည်။ ကောင်းကင်မျက်လုံးဖြင့် ကြည့်လိုက်သည့်အခါ ထိုသူ၏ အခြေအနေကို အကြမ်းဖျင်းအားဖြင့် မြင်တွေ့နိုင်ပြီး အကြိတ်အနယ် တိုက်ခိုက်နေပုံရသော်လည်း အမှန်တကယ်၌ သူ၏ တိုက်ခိုက်ရေးစွမ်းအားမှာ ပြိုင်ဘက်ထက် နှစ်ဆင့်ခန့် ပိုမို သန်မာနေခဲ့သည်။

သို့သော် သူသည် ခွန်အားကို အလွန် ကောင်းမွန်စွာ ထိန်းချုပ်ထားပြီး ထုတ်လွှတ်လိုက်သော အငွေ့အသက်များမှာလည်း တည်ငြိမ်နေသဖြင့် အစစ်အမှန်အတိုင်းပင် ဖြစ်နေသည်။ အကယ်၍ သူ့တွင် ကောင်းကင်မျက်လုံး မရှိပါက သူလည်း လှည့်စားခံရပေလိမ့်မည်။

တစ်ဖက်လူက အဘယ်ကြောင့် ဤသို့ စွမ်းအားကို ဖုံးကွယ်ထားရသနည်းဆိုသည်ကိုမူ သူ မသိရှိချေ။

မည်သို့ပင် ဖြစ်စေ၊ ဤသည်မှာ သေချာပေါက် ကောင်းသော ရည်ရွယ်ချက် မဟုတ်ချေ။ တစ်စုံတစ်ရာသော ရည်ရွယ်ချက် ရှိနေရပေလိမ့်မည်။ ဤအချက်က မြေကမ္ဘာအရှင်ထျန်ချင်းနှင့် ထပ်တူပင် ဖြစ်နေခဲ့ပြီး ယခုတစ်ကြိမ် နတ်ဘုရားနယ်မြေ တက်လှမ်းခြင်း တိုက်ပွဲမှာ ပုံမှန် မဟုတ်ကြောင်း သူ ခံစားလိုက်ရသည်။

“ဒါဆိုရင် တစ်ခုခုများ ဖြစ်တော့မှာလား...”

ယီထျန်းယွမ်က မျက်မှောင်ကြုတ်လိုက်ပြီး ဤသည်မှာ မရိုးရှင်းကြောင်း ခံစားလိုက်ရကာ မကောင်းသော အတိတ်နိမိတ် အချို့ကိုပါ ခံစားမိလိုက်သည်။

သူ ဆက်လက် မတွေးတော့ချေ။ ဖြစ်နိုင်သည်မှာ သူ၏ အတွေးများသာ ဖြစ်နိုင်ပြီး အခြေအနေမှာ ဤမျှလောက်အထိ ဆိုးရွားမည် မဟုတ်ချေ။ ထို့အပြင် သန်မာလှသော အကြီးအကဲ ငါးဦးလုံး ဤနေရာမှာ ရှိနေသည် မဟုတ်ပါလော။

ထို့နောက် သူသည် ဘေးဘက်တွင် တရားထိုင်ကာ အနားယူလိုက်ပြီး မိမိ၏ ကုန်ဆုံးသွားသော စွမ်းအင်များကို ပြန်လည် ဖြည့်တင်းလိုက်သည်။ မကြာမီမှာပင် မုရုန်ရှောင်းမှာ ရှုံးနိမ့်သွားခဲ့ပြီး ထိပ်သီး တစ်ဆယ့်ငါးဦး စာရင်း၌ ရပ်တန့်သွားခဲ့ရသည်။ သို့သော် သူမ၏ အခြေအနေမှာ ကောင်းမွန်ပြီး ပြင်းထန်သော ဒဏ်ရာမျိုး ရရှိခဲ့ခြင်း မရှိချေ။

“ဟူး... ကျွန်မ ရှုံးသွားပြီ... ထိပ်သီး တစ်ဆယ့်ငါးဦးအတွင်းလောက်ပဲ ဝင်တော့မယ်... နောက်တစ်ကြိမ်ကျရင်တော့ ထိပ်သီး ဆယ်ဦးအတွင်း ဝင်အောင် သေချာပေါက် ကြိုးစားမယ်...” မုရုန်ရှောင်းက ဒေါသတကြီးဖြင့် ပြေးလာပြီး ယီထျန်းယွမ်၏ ဘေးနားတွင် ထိုင်လိုက်သည်။

“ကြည့်ရတာ နောက်တစ်ကြိမ်ဆိုတာ ရှိတော့မှာ မဟုတ်ဘူး... မင်းက အရွေးခံရဖို့ သေချာသလောက်ပဲ... ဟိုဘက်က အကြီးအကဲ လိုရွီက မင်းကို အတော်လေး စိတ်ဝင်စားနေတာ...”

ယီထျန်းယွမ်သည် အကြီးအကဲ လိုရွီရှိရာဘက်သို့ လှမ်းကြည့်လိုက်ရာ ထိုသူမှာလည်း သစ်သားစွမ်းအား ခန္ဓာကိုယ် ပိုင်ရှင်ဖြစ်ကြောင်း တွေ့ရှိလိုက်ရသည်။

မုရုန်ရှောင်းမှာ နတ်ဘုရားသစ်သား ခန္ဓာကိုယ် ပိုင်ရှင်ဖြစ်သဖြင့် အရွေးခံရရန်မှာ ပြဿနာ မရှိချေ။