အေးစက်သော အလင်းတန်း ဝင်းလက်ခြင်း

“ငါ့ရှေ့ကနေ လွင့်စင်သွားစမ်း...”

ယီထျန်းယွမ်သည် ကြမ်းတမ်းလှသော ခွန်အားများဖြင့် လှံကို ပြင်းထန်စွာ ရိုက်ချလိုက်ရာ ၎င်းတို့နှစ်ဦး၏ ရူးသွပ်ကောင်းကင်အမိန့် တိုက်ကွက်နှစ်ခုမှာ ထိပ်တိုက်တွေ့ဆုံသွားခဲ့သည်။

“ဘုန်း...”

ပြင်းထန်လှသော အသံနှင့်အတူ မိစ္ဆာမျက်လုံး မြေကမ္ဘာအရှင်မှာ မြေပြင်အတွင်းသို့ ရိုက်သွင်းခြင်း ခံလိုက်ရသည်။ သူ၏ လက်ထဲမှ နတ်ဘုရားလှံမှာလည်း လွင့်စင်သွားခဲ့ပြီး ဆုပ်ကိုင်ထားနိုင်စွမ်းပင် မရှိတော့ချေ။

မိစ္ဆာမျက်လုံး မြေကမ္ဘာအရှင်မှာ ခေါင်းနားပန်းကြီးသွားပြီး သူ၏ လက်မှာ ပြတ်တောက်တော့မတတ် ခံစားနေရသည်။ ယခုတင်က ပြင်းထန်လှသော ခွန်အားကို သူ၏ ခန္ဓာကိုယ်က တောင့်မခံနိုင်ခဲ့ချေ။

“မင်းရဲ့ ခန္ဓာကိုယ် အရည်အသွေးက အရမ်းကို ညံ့လွန်းတယ်... သူတစ်ပါးရဲ့ တိုက်ကွက်ကို တတ်မြောက်နိုင်တယ်ဆိုပေမဲ့ အတုခိုးတဲ့အခါမှာတော့ အရမ်းကို ပင်ပန်းလွန်းနေတယ်... မင်းရဲ့ စွမ်းရည်က သန်မာပေမဲ့ အားနည်းချက်ကလည်း အတော်လေး ထင်ရှားတယ်... မင်းက သူတစ်ပါး တိုက်ကွက်တွေကို အတုခိုးဖို့ပဲ အရမ်းအာရုံစိုက်နေပြီး ကိုယ်ပိုင်အခြေခံကိုတော့ ကောင်းကောင်း မတည်ဆောက်ထားဘူး... နည်းစနစ်တွေကိုပဲ တတ်မြောက်နေရုံနဲ့ ဘာထူးမှာလဲ...”

ယီထျန်းယွမ်သည် မိစ္ဆာမျက်လုံး မြေကမ္ဘာအရှင်ထံသို့ တစ်လှမ်းချင်း လှမ်းလာရင်း သူ၏ အကြီးမားဆုံးသော အားနည်းချက်ကို ထောက်ပြလိုက်သည်။ အမှန်စင်စစ် ၎င်းမှာ အကြီးမားဆုံး အားနည်းချက်တော့ မဟုတ်ချေ။ အကယ်၍ ခန္ဓာကိုယ်ကသာ လိုက်မီပါက တစ်ဖက်လူကို ဖိနှိပ်ရန် လုံလောက်သော်လည်း ယခု ယီထျန်းယွမ်နှင့် ယှဉ်လိုက်သည့်အခါတွင်မူ ကွာခြားချက်မှာ ကြီးမားလွန်းနေသည်။

ယီထျန်းယွမ်က စွမ်းအားကို အနည်းငယ်မျှ တိုးမြှင့်လိုက်ရုံဖြင့် မိစ္ဆာမျက်လုံး မြေကမ္ဘာအရှင်မှာ လိုက်မမီနိုင်တော့ချေ။ အဓိကမှာ ယီထျန်းယွမ်တွင် အားနည်းချက် မရှိခြင်းကြောင့်ပင်။ သူသည် အရှိန်အဟုန်ရော ခွန်အားပါ အားလုံး ပြည့်စုံနေသည်။

အကယ်၍သာ သူ၏ အရှိန်က မမြန်ခဲ့ပါက မိစ္ဆာမျက်လုံး မြေကမ္ဘာအရှင်သည် အရှိန်မြှင့်တင်သော တိုက်ကွက်များကို အသုံးပြု၍ ဝိုင်းဝန်းတိုက်ခိုက်ကာ မရှုံးနိမ့်သော အနေအထားတွင် ရှိနေပေလိမ့်မည်။ သို့သော် ကံဆိုးစွာဖြင့် သူသည် ယီထျန်းယွမ်နှင့် တွေ့ဆုံခဲ့ရခြင်း ဖြစ်သည်။

“ငါ... ငါက မင်းရဲ့ တိုက်ကွက်အားလုံးကို တတ်မြောက်နိုင်တယ်... မင်းရဲ့ တိုက်ကွက်အားလုံးကိုသာ ငါပိုင်ဆိုင်သွားရင် မင်းရဲ့ အရာအားလုံးကို ငါ ချေမှုန်းနိုင်လိမ့်မယ်...”

မိစ္ဆာမျက်လုံး မြေကမ္ဘာအရှင်သည် အကျယ်ကြီး ဟိန်းဟောက်လိုက်ပြီး သူ၏ မျက်ဝန်းများတွင် ဒေါသအလင်းတန်းများ ဝင်းလက်နေသကဲ့သို့ အရှက်ရမှုများလည်း ပြည့်နှက်နေသည်။ သူသည် အမြဲတမ်း သူတစ်ပါးကို ကစားစရာသဖွယ် လှည့်စားခဲ့သူဖြစ်ပြီး ယခုမှသာ ယီထျန်းယွမ်၏ ဖိနှိပ်ခြင်းကို ခံနေရသဖြင့် အလွန်ပင် အရှက်ရနေခြင်း ဖြစ်သည်။

နောက်တစ်ခဏ၌ မိစ္ဆာမျက်လုံး မြေကမ္ဘာအရှင်သည် တိုက်ကွက်အားလုံးကို ထုတ်ဖော်လိုက်ရာ ဟင်းလင်းပြင်တွင် ပုံရိပ်ယောင်များစွာ ပေါ်ထွက်လာသည်။ လင်းယုန်ပုံရိပ်ယောင်သာမက ဧရာမ သစ်ပင်ပုံရိပ်ယောင်နှင့် အလွန်ပင် သန်မာလှသော ဧရာမ ကျောက်ဆောင်ပုံရိပ်ယောင်များပါ ပေါ်ထွက်လာတော့သည်။

သူသည် ယီထျန်းယွမ်ထက် ပိုမိုသန်မာသော စွမ်းအားများစွာကို ပိုင်ဆိုင်ထားသည်။ ဥပမာအားဖြင့် လင်းယုန်ပုံရိပ်ယောင်၏ အရှိန်မှာ ဖီးနစ်ပုံရိပ်ယောင်ထက် ပိုမိုမြန်ဆန်သဖြင့် ယီထျန်းယွမ်ထက် ပို၍ မြန်ဆန်နိုင်သည်။

ဧရာမ သစ်ပင်ပုံရိပ်ယောင်က နူးညံ့မှုဖြင့် မာကျောမှုကို အနိုင်ယူနိုင်ပြီး ယီထျန်းယွမ်၏ တိုက်ကွက်များကို ရစ်ပတ်ကာ အစွမ်းမဲ့သွားအောင် လုပ်ဆောင်နိုင်သည်။

ဧရာမ ကျောက်ဆောင်ပုံရိပ်ယောင်က သူ၏ ခုခံကာကွယ်မှုကို ထူးခြားစေပြီး ပိုမိုသန်မာသော ခွန်အားများကို ခုခံနိုင်သကဲ့သို့ မိမိ၏ ခွန်အားကိုလည်း တိုးမြှင့်ပေးနိုင်သည်။

၎င်းမှာ တိုက်ရိုက် တိုးမြှင့်ခြင်းပင် ဖြစ်သည်။ တစ်ဖက်လူကို မနှိမ်နင်းနိုင်သည့်အခါတွင် တစ်ဖက်လူထက် ပိုမိုသန်မာသော စွမ်းအားကို အသုံးပြု၍ တိုက်ခိုက်ခြင်းဖြင့် တစ်ဖက်လူကို အနိုင်ယူရန် ကြိုးစားခြင်း ဖြစ်သည်။

၎င်းမှာ အလွန်ရိုးရှင်းသော နည်းလမ်းပင်။ ပြိုင်ဘက်က မြန်ဆန်သော အရှိန်ကို သုံးလျှင် မိမိက ပို၍ မြန်သော အရှိန်ဖြင့် ပြန်လည် တိုက်ခိုက်ခြင်းပင်၊ ဤသို့ပင် ဖြစ်သည်။

“အချည်းနှီး ရုန်းကန်နေတာပဲ...”

ယီထျန်းယွမ်သည် ခေါင်းခါယမ်းလိုက်ပြီး လက်ထဲမှ ထျန်းချန်နတ်ဘုရားလှံကို တင်းတင်းဆုပ်ကိုင်ကာ သူ၏ မျက်ဝန်းများတွင် စူးရှသော အလင်းတန်းများ ဝင်းလက်သွားသည်။ နောက်တစ်ခဏ၌ သူသည် မိစ္ဆာနတ်ဘုရားတစ်ပါးအဖြစ် ပြောင်းလဲသွားပြီး အနက်ရောင် အလင်းတန်းတစ်ခုက ထိုးဖောက်ထွက်ပေါ်လာရာ အရှိန်ရော ခွန်အားပါ အစွမ်းကုန် ထုတ်ဖော်ထားသော မိစ္ဆာမျက်လုံး မြေကမ္ဘာအရှင်ထက် များစွာ သာလွန်နေတော့သည်။

ဤသည်မှာ သူ၏ ထူးခြားလှသော အခြေခံစွမ်းအားကြောင့်ပင် ဖြစ်သည်။ အခြေခံစွမ်းအား အလွန်သန်မာနေမှသာ ပေါက်ကွဲထွက်လာသော စွမ်းအားမှာ အသန်မာဆုံး ဖြစ်ပေလိမ့်မည်။ သို့မဟုတ်ဘဲ သန်မာသော ကျင့်စဉ်များကိုသာ အတင်းအကျပ် အသုံးပြုနေပြီး မပေါက်ကွဲနိုင်ပါက ၎င်းမှာ ဤအခြေအနေတွင် အမှိုက်များသာ ဖြစ်ပေလိမ့်မည်။

“ဘုန်း...”

ပြင်းထန်လှသော အသံနှင့်အတူ မိစ္ဆာမျက်လုံး မြေကမ္ဘာအရှင်သည် သူ၏ တိုက်ခိုက်မှုကြောင့် ဥက္ကာခဲတစ်ခုကဲ့သို့ လေထဲမှ အရှိန်အဟုန်ဖြင့် ပြုတ်ကျသွားသည်။ မြေပြင်ပေါ်သို့ ရိုက်မိသည့်အခါ အကြိမ်ပေါင်းများစွာ လွင့်စင်သွားပြီး သွေးများ အဆက်မပြတ် အန်ထုတ်နေရတော့သည်။ စစ်မှန်သော ခွန်အား ကွာခြားချက်မှာ ချက်ချင်းပင် ထင်ရှားလာခဲ့သည်။

“နည်းစနစ်တွေကတော့ မှန်ကန်ပါတယ်... ဒါပေမဲ့ အခြေခံက အရမ်းညံ့လွန်းတယ်... နောက်ထပ် နှစ်အနည်းငယ်လောက် လေ့ကျင့်ဖို့ လိုလိမ့်အုံးမယ်...”

ယီထျန်းယွမ်သည် ဤကဲ့သို့သော ပါရမီရှင်ကို အသိအမှတ်ပြုသော သဘောထား ရှိနေဆဲပင်။ အမှန်စင်စစ် သူသည် အံ့ဩစရာကောင်းသော ပါရမီကို ပိုင်ဆိုင်ထားပြီး အခြားသူများထက် အစပြုမှု ပိုမို မြင့်မားနေသည်။

သို့သော် ပါရမီ အလွန်မြင့်မားလွန်းပါက မာနကြီးလာတတ်သည်။ မိစ္ဆာမျက်လုံး မြေကမ္ဘာအရှင်မှာ အရာအားလုံးက အဆင်ပြေချောမွေ့လွန်းနေသဖြင့် ဘာကိုမှ ဂရုမစိုက်တော့ဘဲ ကျင့်စဉ်တစ်ခုတည်းကိုသာ အထူးပြု၍ မကျင့်ကြံတော့ချေ။ များပြား ရှုပ်ထွေးလွန်းပြီး မကျွမ်းကျင်ပါက ၎င်းမှာ အဓိပ္ပာယ် များများစားစား မရှိတော့ချေ။

ယီထျန်းယွမ်တွင်လည်း ကျင့်စဉ်များစွာ ရှိသည်။ သို့သော်လည်း အချို့ကို အသုံးမပြုချေ။ အဓိက သူ လိုချင်သည်မှာ အကောင်းဆုံးသော အရာများ ဖြစ်ပြီး ထိုအဆင့်မြင့် ကျင့်စဉ်များကို အထွတ်အထိပ်ရောက်အောင် ကျင့်ကြံခြင်းကသာ လုံလောက်သည်ဟု ယူဆထားခြင်း ဖြစ်သည်။

သွေးရိုးဗီဇနှင့် ပတ်သက်လာလျှင်မူ များများရလေ ပိုကောင်းလေဖြစ်သဖြင့် ၎င်းကိုတော့ ထည့်မတွက်ချေ။

“ဟားဟားဟား...”

မိစ္ဆာမျက်လုံး မြေကမ္ဘာအရှင်သည် အဆက်မပြတ် ရယ်မောရင်း မြေပြင်မှ ထရပ်လိုက်သည်။ သူ၏ မျက်နှာမှာ ရှုံ့မဲ့နေပြီး ခက်ထန်လှသည်။

“မင်းတို့လို သာမန်လူတွေက ငါကို လာပြီး စာသင်ပေးချင်နေတာလား... ကြည့်ရတာ ငါက တကယ့် အရည်အချင်းကို ထုတ်မပြရင် မင်းက ငါ့ကို ခြေထောက်အောက်မှာ နင်းထားလို့ ရမယ် ထင်နေတာပဲ...”

မိစ္ဆာမျက်လုံး မြေကမ္ဘာအရှင်၏ မျက်လုံးအစုံမှ နီရဲသော အလင်းတန်းများ ထွက်ပေါ်လာပြီး အံ့ဩစရာကောင်းသော ကောင်းကင်နှင့် မြေကြီး စွမ်းအားများ ကိန်းအောင်းနေသည်။ ထိတ်လန့်ဖွယ်ကောင်းသော စွမ်းအားများက သူ၏ ခန္ဓာကိုယ်အတွင်းသို့ တစ်လွှာပြီးတစ်လွှာ ပေါင်းစပ်ဝင်ရောက်သွားပြီး တိုက်ကွက်များမှာ ယခင်အတိုင်းပင် ဖြစ်သော်လည်း ယခုတစ်ကြိမ်တွင်မူ သူသည် အဆင့်မြင့် ဝိညာဉ်လက်နက်အဆင့် ကျင့်စဉ်များစွာကို ပေါင်းစပ်ထည့်သွင်းလိုက်ခြင်း ဖြစ်သည်။

သူ၏ နောက်ကျောတွင် ပုံရိပ်ယောင်များ တစ်လွှာပြီးတစ်လွှာ ပေါ်ထွက်လာရာ မည်သည့်ကျင့်စဉ်မှာ မိစ္ဆာမျက်လုံး မြေကမ္ဘာအရှင် မိသားစု၏ ကျင့်စဉ်ဖြစ်သည်ကိုပင် မသိနိုင်တော့ချေ။ အမှန်စင်စစ် ၎င်းမှာ အရေးမကြီးတော့ချေ။ သူ့အတွက်မူ ကောင်းမွန်သော ကျင့်စဉ်ဖြစ်ပါက အသုံးချရမည် ဖြစ်ပြီး အားလုံးကို မိမိကိုယ်ပေါ်တွင် ပေါင်းစပ်လိုက်ခြင်းဖြင့် ခွန်အား တိုးမြှင့်ရန် ရည်ရွယ်ခြင်း ဖြစ်သည်။

ဤရည်ရွယ်ချက်မှာ အတော်လေး ထိရောက်လှသည်။ ဤ မိစ္ဆာမျက်လုံးအစုံ၏ ကူညီမှုဖြင့် တိုက်ခိုက်ရေးစွမ်းအားမှာ သိသိသာသာ မြင့်တက်လာပြီး ပိုမို သန်မာလာတော့သည်။

သို့သော် ယီထျန်းယွမ်၏ အမြင်တွင်မူ ၎င်းမှာ အလွန်ပင် ရှုပ်ထွေးလွန်းနေသည်။ သို့သော် ဤစွမ်းအားမှာ အမှန်ပင် ထိတ်လန့်စရာ ကောင်းလှပြီး အကယ်၍ သူသာ ဤကဲ့သို့ စွမ်းရည်ရှိပါက ဤအတိုင်းပင် အသုံးပြုပေလိမ့်မည်။

အဆက်မပြတ် ပေါင်းစပ်လိုက်ခြင်းဖြင့် ပိုမိုသန်မာသော ခွန်အားကို ရရှိနိုင်သည်မှာ အရှင်းလင်းဆုံးနှင့် အထိရောက်ဆုံးသော နည်းလမ်းပင် ဖြစ်သည်။

သို့သော် သူသည် သူတစ်ပါးထံမှ ခိုးယူသင်ယူထားခြင်း ဖြစ်ရာ ထိုကျင့်စဉ်များတွင် အားနည်းချက်များ ရှိနေပေသည်။ ဤပါရမီမှာ အရာအားလုံးကို ရာနှုန်းပြည့် နားလည်သဘောပေါက်နိုင်သည်ဟု မဆိုနိုင်ပေ၊ ထို့ကြောင့် ရူးသွပ်သွားရန် အလွန်လွယ်ကူသည်။

“သာမန်လူသားကောင်... သေစမ်း...”

မိစ္ဆာမျက်လုံး မြေကမ္ဘာအရှင်သည် ကျယ်လောင်စွာ ဟိန်းဟောက်လိုက်ပြီး ယီထျန်းယွမ်ထံသို့ ပြေးဝင်လာရာ သူ၏ နောက်ကျောမှ ပုံရိပ်ယောင် အမြောက်အမြားက တိုက်ပွဲကွင်းပြင်တစ်ခုလုံးကို ဖုံးလွှမ်းသွားသည်။ ကောင်းကင်တစ်ခုလုံးရှိ ပုံရိပ်ယောင်များမှာ တကယ့်ကို ကြောက်စရာ ကောင်းလှသည်။

ယီထျန်းယွမ်သည် မျက်လုံးကို အနည်းငယ် ပင့်ကြည့်လိုက်ပြီး ပြေးဝင်လာသော မိစ္ဆာမျက်လုံး မြေကမ္ဘာအရှင်ကို ကြည့်ကာ အနည်းငယ်မျှပင် မလှုပ်ရှားချေ။

“ပုံရိပ်ယောင်တွေ အများကြီး ပေါင်းစပ်ထားတာပဲ... ဒီကောင် ကျင့်စဉ် ဘယ်လောက်တောင် သင်ထားတာလဲ... တကယ်ကို ကြောက်စရာ ကောင်းလိုက်တာ...”

“ငါ မြင်ဖူးသမျှ ထူးခြားတဲ့ မိသားစု ကျင့်စဉ်တွေ အကုန်လုံးကို သူက ခိုးယူသင်ထားတာပဲ... သူနဲ့ ပြိုင်ဘက် ဖြစ်တဲ့သူတိုင်း ခိုးယူခံရတော့မှာပဲ...”

“ဟုတ်တယ်... ဒါက တကယ်ကို မုန်းစရာ ကောင်းတာပဲ... ငါ့မှာသာ အဲဒီလို စွမ်းရည်မျိုး ရှိရင် ဘယ်လောက်တောင် ကောင်းလိုက်မလဲ...”

ပရိသတ်များမှာ အလွန်ပင် မနာလို ဖြစ်နေကြသည်။ သူတို့သည် ယခင်က ရွံရှာမုန်းတီးခဲ့ကြသော်လည်း စိတ်ထဲတွင်မူ ဤကဲ့သို့သော ကျင့်စဉ်မျိုးကို ပိုင်ဆိုင်ချင်နေကြသည်။ အမှန်စင်စစ် ဤပါရမီမှာ အလွန်ပင် အစွမ်းထက်လှပြီး မည်သည့်ကျင့်စဉ်ကိုမဆို အတုခိုးနိုင်သည် မဟုတ်ပါလော။

အားနည်းချက်ကို ထိုးနှက်ခြင်း...

ယီထျန်းယွမ်၏ မျက်ဝန်းများမှာ အေးစက်သွားပြီး ထျန်းချန်နတ်ဘုရားလှံကို ကိုင်ကာ အမှတ်တစ်ခုသို့ ချိန်ရွယ်၍ အေးစက်သော အလင်းတန်းတစ်ခုအဖြစ် ထိုးဖောက်လိုက်သည်။

“ဝှစ်...”

ဝင်းခနဲ အလင်းစက်ကလေးတစ်ခုမှာ ဝင်းလက်သွားပြီး အထွတ်အထိပ် အမှတ်တစ်ခုအဖြစ် ထိုးဖောက်သွားရာ မည်သည့် အပိုအလုပ်မှ မပါဝင်ချေ။

မိစ္ဆာမျက်လုံး မြေကမ္ဘာအရှင်သည် အေးစက်သော အလင်းတန်းတစ်ခု ထိုးဖောက်လာသည်ကို မြင်တွေ့လိုက်ရသည်။ သူ မြင်လိုက်ရသော်လည်း မြင်လိုက်ရသည့် ခဏ၌ အရာအားလုံးမှာ နောက်ကျသွားခဲ့ပြီ ဖြစ်သည်။ သူ၏ ရင်ဘတ်တွင် ပြင်းထန်သော နာကျင်မှုကို ခံစားလိုက်ရပြီး တစ်ကိုယ်လုံး နောက်သို့ လွင့်စင်သွားကာ မြင့်မားသော ကောင်းကင်ယံမှ အရှိန်အဟုန်ဖြင့် ပြုတ်ကျသွားတော့သည်။

“ဘုန်း...”

ပြင်းထန်လှသော အသံနှင့်အတူ မြေပြင်ပေါ်သို့ တိုက်ရိုက် ကျရောက်သွားပြီး မည်သည့် ခုခံမှုမျှ မလုပ်နိုင်တော့ချေ။ သူ ကျရောက်သွားသော နေရာမှာမူ ပြိုင်ပွဲကွင်းပြင်၏ အပြင်ဘက်ပင် ဖြစ်တော့သည်။