တစ်ချက်တည်းနှင့် ပေါက်ကွဲသွားခြင်း

ယီထျန်းယွမ်၏ အခြေအနေကြောင့် လူအများစုမှာ သူသည် ထိပ်ဆုံး လေးယောက်စာရင်းသို့ ဝင်ရောက်နိုင်လိမ့်မည်ဟု မယုံကြည်ကြတော့ဘဲ ထိပ်ဆုံး ရှစ်ယောက်စာရင်း၌သာ ရပ်တန့်သွားလိမ့်မည်ဟု ထင်မြင်နေကြသည်။

ယခင်တိုက်ပွဲတွင် ရှုံးနိမ့်သွားခဲ့သော မုရုန်ရှောင်းသည် ပွဲကြည့်စင်ပေါ်မှနေ၍ ကြည့်ရှုရင်း လက်သီးကို တင်းတင်းဆုပ်ကာ အားပေးနေခဲ့သည်။

“ယီထျန်းယွမ်... အစ်ကို လုပ်နိုင်ပါတယ်... အားတင်းထားပါဦး...”

သူမသည် ယီထျန်းယွမ်၌ ဤမျှလောက်သော စွမ်းရည်သာ ရှိသည်ဟု မယုံကြည်ချေ။ သူသည် ဤပွဲကို သေချာပေါက် အနိုင်ယူနိုင်လိမ့်မည်ဟု ယုံကြည်နေခြင်းဖြစ်သည်။

“ယူချင်းရွှမ်... စိတ်ဝင်စားစရာပဲ...”

နတ်ဆိုးမျက်လုံး မြေကမ္ဘာအရှင်သည် ယီထျန်းယွမ်ကို ကြည့်ရင်း သူ၏ မျက်ဝန်းထဲတွင် စိတ်ပျက်ရိပ် အနည်းငယ်မျှပင် မရှိချေ။

“သူ မင်းကို ရှုံးမှာမဟုတ်ဘူးလို့ ငါယုံကြည်တယ်...”

နတ်ဆိုးမျက်လုံးသည် ယီထျန်းယွမ်၏ စွမ်းအားကို ကိုယ်တိုင် ခံစားဖူးခဲ့သည်။ ယီထျန်းယွမ် ဆက်လက် အနိုင်ရရှိလိမ့်မည်ဟု သူယုံကြည်နေခြင်းမှာ ယီထျန်းယွမ်သည် သူနှင့် တိုက်ခိုက်စဉ်က စွမ်းအားအားလုံးကို ထုတ်ဖော်ခဲ့ခြင်း မဟုတ်ဘဲ အစိတ်အပိုင်း အချို့ကိုသာ ပြသခဲ့သည်ဟု ခံစားမိသောကြောင့် ဖြစ်သည်။ အကယ်၍ ထိုသို့သာ မှန်ကန်ပါက ဤပွဲကို အနိုင်ရရှိရန်မှာ ပြဿနာ မရှိနိုင်ချေ။

အချို့က ယီထျန်းယွမ်ကို အနိုင်ရစေချင်ကြသလို အချို့ကမူ ဤမျှဆိုလျှင် လုံလောက်ပြီဟု ထင်မြင်ကြသည်။ ယီထျန်းယွမ် သေချာပေါက် ရှုံးနိမ့်လိမ့်မည်ဟု ထင်သူများလည်း ရှိကြသည်။ လူတိုင်း၏ အတွေးမှာ ကွဲပြားနေကြသော်လည်း ယီထျန်းယွမ် ရှုံးနိမ့်လိမ့်မည်ဟု ထင်သူများမှာ အများစု ဖြစ်နေဆဲ ဖြစ်သည်။ ယူချင်းရွှမ် ထုတ်ဖော်ပြသလိုက်သော စွမ်းရည်များကြောင့် သူသည် ဤပွဲကို အနိုင်ရရှိသွားလိမ့်မည်ဟု ၎င်းတို့ ချက်ချင်းပင် ထင်မြင်သွားကြခြင်း ဖြစ်သည်။

“ဒီ ယင်ယန်နတ်ဘုရားအမိန့်က အခြခံအဆင့် ကောင်းကင်တာအိုအဆင့် သိုင်းပညာတစ်ခု ဖြစ်နေတာကိုး...”

ယီထျန်းယွမ်က အသာအယာ ပြုံးလိုက်သည်။ ယူချင်းရွှမ် ထုတ်ဖော်ပြသလိုက်သော ကြောက်မက်ဖွယ်ကောင်းသော လျှို့ဝှက်ချက်ကို သူအကြမ်းဖျင်း သိရှိသွားခဲ့ပြီ ဖြစ်သည်။ ယူချင်းရွှမ် ဤမျှအထိ အစွမ်းထက်နေရခြင်းမှာ သူ၏ ထူးချွန်သော ပါရမီကြောင့်သာမက အဓိကအချက်မှာ သူ၌ အခြေခံ ကောင်းကင်တာအိုအဆင့် သိုင်းပညာ ရှိနေသောကြောင့် ဖြစ်သည်။ ကောင်းကင်တာအိုအဆင့် သိုင်းပညာမှာ စိတ်ဝိညာဉ်လက်နက် အဆင့်ထက်ပင် ပိုမိုမြင့်မားသော တည်ရှိမှုမျိုး ဖြစ်ပြီး ၎င်းတို့ နှစ်ခုကြားတွင် နှိုင်းယှဉ်စရာ အချက် မရှိချေ။

ဤ ကြောက်မက်ဖွယ်ကောင်းသော ကောင်းကင်တာအိုအဆင့် သိုင်းပညာ၏ အကူအညီနှင့် ယင်ယန်စွမ်းအင်တို့ ပေါင်းစပ်လိုက်သည့်အခါ ယီထျန်းယွမ်၏ တိုက်ခိုက်မှုမှာ လွယ်ကူစွာပင် ဖယ်ရှားခြင်း ခံလိုက်ရခြင်း ဖြစ်သည်။ ယီထျန်းယွမ် ယခု ထုတ်ဖော်လိုက်သော စွမ်းအားမှာ အားနည်းလှသည် မဟုတ်ချေ။ အကယ်၍ ဤမျှသော စွမ်းအားကိုပင် အလွယ်တကူ ချေဖျက်နိုင်သည်ဆိုပါက တစ်ဖက်လူ ပိုင်ဆိုင်ထားသော သိုင်းပညာမှာ ပိုမို အစွမ်းထက်နေရပေလိမ့်မည်။

တိုက်ပွဲကွင်းပြင်၌ တရားမျှတမှု ဆိုသည်မှာ မရှိသလောက်ပင် ဖြစ်ပြီး မိမိ၏ နောက်ခံ အင်အားပေါ်တွင်သာ ပိုမို မူတည်နေသည်။ တစ်စုံတစ်ယောက်တွင် နောက်ခံ အင်အား တောင့်တင်းနေပါက ၎င်းမှာ သေချာပေါက် အသာစီး ရရှိပေလိမ့်မည်။ ဥပမာအားဖြင့် တစ်ယောက်က သာမန် သံသတ္တုလက်နက်ကို ကိုင်ဆောင်ထားပြီး နောက်တစ်ယောက်က နတ်ဘုရားလက်နက်ကို ကိုင်ဆောင်ထားပါက မည်သူ ရှုံးနိမ့်မည်နည်း ဆိုသည်မှာ တစ်ချက်ကြည့်ရုံဖြင့် သိနိုင်လှသည်။ တိုက်ပွဲဆိုသည်မှာ ဤသို့ပင် ဖြစ်သည်။ ၎င်းကို တရားမျှတသည်ဟု ဆိုနိုင်သလို မတရားဟုလည်း ဆိုနိုင်သည်။ သေချာသည့် အချက်မှာ နောက်ဆုံးအထိ အနိုင်ရမည့်သူသည် သေချာပေါက် အံ့ဩဖွယ်ကောင်းသော နောက်ခံ အင်အား ရှိနေရပေလိမ့်မည်။

အထွဋ်အထိပ် ပါရမီ မရှိပါက အထွဋ်အထိပ် ရတနာ သို့မဟုတ် သိုင်းပညာ ရှိနေရပေမည်။ အကယ်၍ အံ့ဩဖွယ်ကောင်းသော သိုင်းပညာ မရှိပါက မိမိ၏ ပါရမီဖြင့်သာ ဖြည့်ဆည်းရပေလိမ့်မည်။ ထိုနည်းတူပင် အံ့ဩဖွယ် ပါရမီ မရှိပါကလည်း သိုင်းပညာ သို့မဟုတ် ရတနာများဖြင့်သာ ဖြည့်တင်းရမည် ဖြစ်သည်။ အကယ်၍ ၎င်းတို့ နှစ်ခုလုံး ရှိနေမည်ဆိုပါက ထိုသူမှာ တကယ့်ကို ထူးခြားလှပေလိမ့်မည်။ ထျန်ချင်းမှာ ထိုသူများထဲမှ တစ်ဦး ဖြစ်သလို ယခု မြင်တွေ့နေရသော ယူချင်းရွှမ်မှာလည်း ထိုသို့သော သူမျိုး ဖြစ်သည်။

“ယီထျန်းယွမ်... တောင်းပန်ပါတယ်... ဒီပွဲကိုတော့ ငါပဲ အနိုင်ယူလိုက်မယ်...”

ယူချင်းရွှမ်သည် ယီထျန်းယွမ်အား အနားယူရန် အချိန်အများကြီး မပေးတော့ဘဲ လက်နှစ်ဖက်ကို လျင်မြန်စွာ ပူးကပ်လိုက်ကာ ဧရာမ ယင်ယန်နတ်ဘုရားဝင်္ကပါကြီးကို ထုတ်ဖော်လိုက်သည်။ အဖြူနှင့်အမည်း ယင်ယန်စွမ်းအင်မှာ ကောင်းကင်တွင် လှည့်ပတ်နေခဲ့သည်။ ၎င်းမှာ အစောပိုင်းကထက် ပိုမို အားကောင်းလှပြီး ယီထျန်းယွမ်အား လုံးဝ ပိတ်ဆို့ထားကာ အကျပ်အတည်းသို့ တွန်းပို့ရန် ကြိုးစားနေသည်။

ယူချင်းရွှမ်သည် ယီထျန်းယွမ်၏ စွမ်းအားမှာ အားနည်းလှသည် မဟုတ်ကြောင်း သိရှိထားသဖြင့် တိုက်ရိုက် တိုက်ခိုက်ပါက ဒဏ်ရာရရှိစေရန် ခက်ခဲလှသည်။ အကောင်းဆုံး နည်းလမ်းမှာ အဆက်မပြတ် ပြန်လည် တုံ့ပြန်စေပြီး ယီထျန်းယွမ်အား တိုက်ခိုက်ရေးကွင်းပြင် အပြင်ဘက်သို့ လွင့်ထွက်သွားအောင် လုပ်ဆောင်ခြင်းပင် ဖြစ်သည်။ ထိုသို့ဆိုလျှင် သူ အနိုင်ရရှိပေလိမ့်မည်။ သူသည် ယီထျန်းယွမ်အား နှစ်ကြိမ်တိုင်တိုင် တိုက်ခိုက်ခဲ့သော်လည်း အသာစီး အများကြီး မရရှိခဲ့ချေ။ ယီထျန်းယွမ်၏ ကြောက်မက်ဖွယ်ကောင်းသော ခန္ဓာကိုယ် ကြံ့ခိုင်မှုမှာ အမှန်တကယ်ပင် ထိတ်လန့်စရာ ကောင်းလှသည်။

“ဟုတ်လား... ငါကတော့ အဲဒီလို မထင်ဘူး...”

ယီထျန်းယွမ်၏ မျက်ဝန်းများမှ ဆန်းကြယ်သော အလင်းတန်းများ ထွက်ပေါ်လာခဲ့ပြီး လှံကို ဝှေ့ယမ်းကာ နောက်တစ်ကြိမ် ထိုးနှက်လိုက်ပြန်သည်။ သူ၏ ခန္ဓာကိုယ်အတွင်းရှိ နဂါးနတ်ဘုရား သွေးရိုးဗီဇမှာ ပေါက်ကွဲထွက်လာခဲ့ပြီ ဖြစ်သည်။ ဤကဲ့သို့သော ပါရမီရှင်များကို ရင်ဆိုင်ရာတွင် စွမ်းအားအချို့ကို အသုံးမပြုဘဲ ရင်ဆိုင်ရန်မှာ မဖြစ်နိုင်ချေ။

“ဘုန်း...”

ပြင်းထန်လှသော စွမ်းအားမှာ ထို ယင်ယန်နတ်ဘုရားဝင်္ကပါကို နောက်တစ်ကြိမ် ထိုးဖောက်သွားခဲ့ပြန်သည်။ ၎င်းကို အဆပေါင်းများစွာ အားဖြည့်ထားခဲ့သော်လည်း ယီထျန်းယွမ်၏ ကြမ်းတမ်းလှသော လှံချက်ကို တားဆီးနိုင်ခြင်း မရှိခဲ့ချေ။

ယူချင်းရွှမ်၏ ပုံရိပ်မှာ ပြန်လည် ရောက်ရှိလာခဲ့ပြန်သည်။ ယခုတစ်ကြိမ်တွင် သူ၏ တိုက်ခိုက်မှုမှာ လုံးဝ ကွဲပြားသွားခဲ့ပြီ ဖြစ်သည်။ သူ၏ လက်ထဲရှိ ဖောက်ထွင်းမြင်ရသော လက်အိတ်မှာ အဖြူနှင့် အမည်းရောင် အလင်းတန်းများ ထွက်ပေါ်လာခဲ့သည်။ မျက်စိဖြင့် မြင်နိုင်သော ယင်ယန်နတ်ဘုရားဝင်္ကပါ အမြောက်အမြားမှာ သူ၏ လက်ဖဝါးအတွင်း၌ ပေါ်ပေါက်လာခဲ့ပြီး အဆက်မပြတ် လည်ပတ်နေကာ လူတစ်ယောက်ကို စုပ်ယူသွားနိုင်သည့် အနက်ရောင် ဝဲကတော့တစ်ခုနှင့် တူလှသည်။

“ယင်ယန် သတ်ဖြတ်ခြင်း...”

အဆက်မပြတ် လည်ပတ်နေသော ယင်ယန်နတ်ဘုရားဝင်္ကပါသည် ယီထျန်းယွမ်အား လုံးဝ ချေမှုန်းပစ်ရန် ကြိုးစားနေသည်။ ၎င်းမှာ ကြောက်မက်ဖွယ်ကောင်းသော စက်ယန္တရားကြီးတစ်ခုကဲ့သို့ တစ်ဖက်လူကို စုပ်ယူပြီး အပိုင်းပိုင်း ပြတ်တောက်သွားအောင် လုပ်ဆောင်နေခြင်း ဖြစ်သည်။ ယင်ယန်နတ်ဘုရားဝင်္ကပါသည် စွမ်းအားများကို ပြန်လည် တုံ့ပြန်နိုင်ရုံသာမက လူတစ်ယောက်ကို သတ်ဖြတ်နိုင်သည့် အစွမ်းထက် တိုက်ကွက်တစ်ခုအဖြစ်လည်း ပြောင်းလဲနိုင်သည်ဟု မထင်မှတ်ထားခဲ့ကြချေ။

အရေးကြီးဆုံး အချက်မှာ ၎င်းတွင် ကောင်းကင်တာအို စွမ်းအားများ ပါဝင်နေခြင်း ဖြစ်ပြီး ပတ်ဝန်းကျင်ရှိ စွမ်းအားများမှာ ဤနေရာသို့ အဆက်မပြတ် တိုးဝင်လာခဲ့သည်။ ဤသည်မှာ ကောင်းကင်တာအို၏ စွမ်းအား ဖြစ်ပြီး နိယာမတစ်ခု၏ စွမ်းအားပင် ဖြစ်သည်။ ကောင်းကင်တာအို စွမ်းအားကို မည်သို့သော သူများက ခုခံနိုင်ပါမည်နည်း။ ကောင်းကင်တာအိုအဆင့် သိုင်းပညာမှာ ကောင်းကင်တာအိုအပေါ်၌ အခြေခံထားခြင်း ဖြစ်ပြီး ပတ်ဝန်းကျင်ရှိ ကောင်းကင်တာအို စွမ်းအားများကို ဆွဲယူကာ မိမိ၏ ခန္ဓာကိုယ်၌ ပေါင်းစပ်နိုင်ခြင်း ဖြစ်သည်။ စိတ်ဝိညာဉ်လက်နက် အဆင့်ရှိ သိုင်းပညာမှာမူ စိတ်ဝိညာဉ် စွမ်းအားကိုသာ ဆွဲယူနိုင်ခြင်း ဖြစ်သည်။ သို့သော် ဆွဲယူနိုင်သော စွမ်းအားမှာ အလွန်ပင် နည်းပါးလှပြီး ကောင်းကင်တာအို စွမ်းအားနှင့် နှိုင်းယှဉ်ပါက မိုးနှင့်မြေကဲ့သို့ ကွာခြားလှသည်။

“ကောင်းကင်တာအိုအဆင့် သိုင်းပညာလား... ဒီလောက် ပြင်းထန်တဲ့ ကောင်းကင်တာအို စွမ်းအားကို ဘယ်သူက ခုခံနိုင်မှာလဲ...”

ရှုံးနိမ့်သွားခဲ့သော ပြိုင်ပွဲဝင် အများအပြားမှာ မနေနိုင်ဘဲ ထရပ်လိုက်ကြသည်။ ၎င်းတို့မှာ ပွဲကြည့်စင်ပေါ်မှနေ၍ ကြည့်ရှုနေကြပြီး ယူချင်းရွှမ် ထုတ်ဖော်လိုက်သော ကြောက်မက်ဖွယ်ကောင်းသော ကောင်းကင်တာအို စွမ်းအားကို ခံစားမိလိုက်သည့်အခါ ၎င်းတို့မှာ နောက်တစ်ကြိမ် ကောင်းကင်ဘေးဒုက္ခ၏ အောက်သို့ ရောက်ရှိသွားသကဲ့သို့ ခံစားလိုက်ရသည်။

“ယီထျန်းယွမ်... သေချာပေါက် ရှုံးပြီ...”

၎င်းတို့၏ စိတ်ထဲ၌ ဤအတွေးမှာ တစ်ပြိုင်နက်တည်း ပေါ်ပေါက်လာခဲ့သည်။ ယီထျန်းယွမ် သေချာပေါက် ရှုံးနိမ့်သွားတော့မည်ဟု ထင်မြင်နေကြခြင်း ဖြစ်သည်။ အစောပိုင်းက ယီထျန်းယွမ်၌ အခွင့်အရေး အနည်းငယ် ရှိသေးဟု ထင်ခဲ့သော်လည်း ယခုအခါတွင်မူ မျှော်လင့်ချက် မရှိတော့ချေ။ ကောင်းကင်တာအိုမှာ မိမိ၏ ရှေ့မှောက်သို့ ရောက်ရှိနေပြီ ဖြစ်ရာ မည်သို့လျှင် ဖိနှိပ်နိုင်ပါမည်နည်း။

“ကောင်းကင်တာအို ဆိုရင်လည်း ဘာဖြစ်လဲ... ငါ ဖျက်ဆီးပြမယ်...”

ယီထျန်းယွမ်၏ မျက်ဝန်းများမှ တောက်ပလှသော အလင်းတန်းများ ထွက်ပေါ်လာခဲ့ပြီး လက်ထဲရှိ နတ်ဘုရားလှံကို ကိုင်ဆောင်ကာ ပြင်းထန်စွာ ထိုးနှက်လိုက်သည်။ ကောင်းကင်တာအို ဖြစ်နေလျှင်ပင် သူက တစ်ချက်တည်းနှင့် ထိုးဖောက်ပြမည် ဖြစ်သည်။ ဤလှံချက် ရောက်ရှိလာပြီး ယူချင်းရွှမ်၏ လက်နှစ်ဖက်နှင့် ထိတွေ့သွားသည့် အခါတွင်မူ ထိုယင်ယန်စွမ်းအင်မှာ အဆက်မပြတ် ဝါးမြိုရန် ကြိုးစားလာခဲ့သည်။ ကြယ်တာရာလှံပင်လျှင် ဝါးမြိုခြင်း ခံလိုက်ရပြီး စွမ်းအားအားလုံးမှာ ထိုအခိုက်အတန့်၌ လုံးဝ ပျောက်ကွယ်သွားခဲ့ပြီ ဖြစ်သည်။

“အလကားပါပဲ... မင်းမှာ ဘယ်လောက်ပဲ ပြင်းထန်တဲ့ စွမ်းအားရှိရှိ အကုန်လုံးက တခြားကို ရွှေ့ပြောင်းခံရမှာပဲ... ဘာမှ ခြွင်းချက် မရှိဘူး...”

ယူချင်းရွှမ်၏ မျက်ဝန်းများမှာ ယင်ယန်အရောင်နှစ်မျိုးအဖြစ် ပြောင်းလဲသွားခဲ့ပြီး လက်ဖဝါးကို ပြင်းထန်စွာ တွန်းထုတ်လိုက်ကာ ယီထျန်းယွမ်၏ ကြယ်တာရာလှံကို မြဲမြံစွာ ဖမ်းဆုပ်ထားခဲ့သည်။ ပတ်ဝန်းကျင်ရှိ ဟင်းလင်းပြင်မှာပင် အေးခဲသွားသကဲ့သို့ ဖြစ်နေခဲ့သည်။

“ဒါက မင်းတွေ့ဖူးတဲ့ စွမ်းအားတွေက အရမ်း အားနည်းလွန်းလို့ပါ...”

ယီထျန်းယွမ်က မျက်လုံးကို ဖွင့်လိုက်သည့်အခါ သူ၏ ခန္ဓာကိုယ်အတွင်းရှိ ကိုယ်တွင်းကမ္ဘာမှာ အဆက်မပြတ် လည်ပတ်လာခဲ့ပြီး အတွင်းရှိ အကြမ်းတမ်းဆုံးသော ကြယ်တာရာ စွမ်းအားများမှာ အဆက်မပြတ် တိုးဝင်လာခဲ့သည်။ အရေးကြီးဆုံး အချက်မှာ ထိုဧရာမ ကိုယ်တွင်းကမ္ဘာကြီးသည် သူနှင့် တစ်သားတည်း ဖြစ်သွားခဲ့ခြင်းပင် ဖြစ်သည်။ သူသည် ကိုယ်တွင်းကမ္ဘာတစ်ခု ဖြစ်သလို ကိုယ်တွင်းကမ္ဘာသည်လည်း သူပင် ဖြစ်သည်။

ထရီလီယံနှင့်ချီသော စွမ်းအားမှာ ထိုအခိုက်အတန့်၌ ပေါက်ကွဲထွက်လာခဲ့ပြီး ထို ယင်ယန်နတ်ဘုရားဝင်္ကပါကို အဖြူနှင့် အမည်းရောင် အမှုန့်များအဖြစ် ချက်ချင်း ချေမှုန်းပစ်လိုက်သည်။ ယူချင်းရွှမ်မှာလည်း လှံချက်နောက်သို့ တစ်ပါတည်း အဝေးသို့ လွင့်ထွက်သွားခဲ့ရတော့သည်။

“ဝေါ့...”

ယူချင်းရွှမ်သည် ကောင်းကင်သို့ သွေးတစ်လုတ် ထွေးထုတ်လိုက်ရပြီး သူ၏ ခန္ဓာကိုယ်မှာ နောက်သို့ အဆက်မပြတ် လွင့်ထွက်သွားခဲ့ရာ နောက်ဆုံး၌ တိုက်ခိုက်ရေးကွင်းပြင် အပြင်ဘက်သို့ ရောက်ရှိသွားခဲ့သည်။ သူသည် ဘေးဘက်ရှိ နံရံကို ပြင်းထန်စွာ ဝင်တိုက်မိသွားခဲ့ပြီး ဘုန်းခနဲ အသံနှင့်အတူ ခိုင်ခံ့လှသော နံရံမှာပင် ပြင်းထန်စွာ တုန်ခါသွားခဲ့ရကာ ယူချင်းရွှမ်မှာလည်း နောက်တစ်ကြိမ် သွေးထပ်မံ အန်ထုတ်လိုက်ရပြန်သည်။

အရာအားလုံးမှာ တိတ်ဆိတ်သွားခဲ့ပြီ ဖြစ်သည်။ ကြောက်မက်ဖွယ်ကောင်းသော ကောင်းကင်တာအို စွမ်းအားမှာ တစ်ချက်တည်းနှင့် ပေါက်ကွဲသွားခဲ့ပြီ မဟုတ်ပါလော။