အကြီးအကဲအဖွဲ့အစည်း (၄)

ဝမ်ဝေ့၏ ကုသမှု ပြီးဆုံးသွားသည်နှင့် မဟာအကြီးအကဲ သုံးဦးသည် ဓာတ်ငွေ့များ၊ ပိုးကောင်များ သို့မဟုတ် ထူးဆန်းသော အရာဝတ္ထုများကို အန်ထုတ်လိုက်ကြသည်။ သို့သော် နောက်ဆုံးတစ်ဦးဖြစ်သော မဟာအကြီးအကဲ ကျိုးရှစ်ဟုန်မှာမူ စက္ကန့်အနည်းငယ်မျှ ချွေးထွက်ရုံသာ ရှိသည်။

“မဟာအကြီးအကဲ ကျိုးရှစ်ဟုန်ကလွဲရင် ကျန်တဲ့သူတွေ အဆင်ပြေသွားပါပြီ။ သူ့အပေါ် သုံးထားတဲ့ နည်းလမ်းက ကျွန်တော့်စွမ်းရည်ထက် ကျော်လွန်နေတယ်” ဝမ်ဝေ့က ပြောလိုက်သည်။

“သူ့ကို ဘာလုပ်သင့်တယ်လို့ ထင်လဲ” ချီယွမ်က မေးလာသည်။

“ကျွန်တော်ရဲ့ နည်းလမ်းတွေ မတိုးတက်မချင်း သူ့ကို သီးသန့် ခွဲထုတ်ထားသင့်တယ်” ဝမ်ဝေ့က အကြံပြုလိုက်သည်။ ကျိုးရှစ်ဟုန်သည် အပြစ်မရှိသူ ဖြစ်သောကြောင့် သူ့ကို သတ်ပစ်ရန် သို့မဟုတ် ကြမ်းတမ်းသော ထောင်ထဲတွင် ပိတ်လှောင်ထားရန် မလိုပေ။

“နားလည်ပြီ”

“ကျန်တဲ့သူတွေရော ဘယ်လိုလဲ” ဝမ်ဝေ့က မေးလိုက်သည်။ အခြားအကြီးအကဲများ၊ သို့မဟုတ် အောက်ခြေရှိ တာဝန်ခံများနှင့် တပည့်များထဲတွင်လည်း ပြဿနာရှိသူများ ရှိနိုင်သေးသည်။

“အရိပ်အုပ်ချုပ်သူက သူတို့နောက်ကွယ်က လူတွေကို စောင့်ကြည့်ပြီး ဖော်ထုတ်ဖို့ တာဝန်ယူထားတယ်” ချီယွမ်က ထုတ်ဖော်ပြောကြားသည်။

“ဒါက အကောင်းဆုံး ချဉ်းကပ်မှုပဲ” ဝမ်ဝေ့က ခေါင်းညိတ်လိုက်သည်။ မဟာအကြီးအကဲများသည် အာဏာအရှိဆုံးနှင့် အရေးကြီးသော သတင်းအချက်အလက်များကို ရယူနိုင်သူများ ဖြစ်သောကြောင့် သူတို့ကို အရင်ကိုင်တွယ်ရခြင်းမှာ သဘာဝကျပါသည်။ သို့သော် ကျန်ရှိသူများကိုမူ နောက်ကွယ်မှ ရုပ်သေးကြိုးကိုင်သူများကို ဖော်ထုတ်ရန် အသုံးချနိုင်သည်။

“ဘိုးဘေးတို့ သတိထားရမယ်နော်” ဝမ်ဝေ့က သတိပေးလိုက်သည်။ စစ်ဆေးမှု အားလုံးကို ရှောင်ကွင်းနိုင်ပြီး လူတစ်ဦး၏ တည်ရှိမှုအနက်ရှိုင်းဆုံးနေရာအထိ ထိန်းချုပ်မှုများ ထားခဲ့နိုင်သူများသည် ဘယ်သောအခါမှ ရိုးရှင်းနိုင်သူများ မဟုတ်ပေ။

“ ငါ သတိထားပါ့မယ်” အရိပ်အုပ်ချုပ်သူက ရိုးရှင်းစွာ ခေါင်းညိတ်ပြသည်။

ချီယွမ်က ကျိုးရှစ်ဟုန်ကို ပို့ဆောင်လိုက်ပြီးနောက် ကျန်ရှိသော မဟာအကြီးအကဲ သုံးဦးကို အာရုံစိုက်လိုက်သည်။

“အရမ်း ပြင်းပြင်းထန်ထန် လုပ်ခဲ့မိတာကို တောင်းပန်ပါတယ်။ ငါ ပြောခဲ့သလိုပဲ မင်းတို့ကို လျော်ကြေးပေးပါ့မယ်”

“မဟုတ်တာ... ကျုပ်တို့ နားလည်ပါတယ်” မဟာအကြီးအကဲ ရှဲ့ယွဲ့ဟန်က ခံစားချက်မကောင်းသော အမူအရာဖြင့် ပြန်ဖြေသည်။ ရှဲ့မျိုးနွယ်သည် ဂိုဏ်း၏ လျှို့ဝှက်ကွန်ရက်ကို တာဝန်ယူထားရသော်လည်း မျိုးနွယ်စုတွင် အာဏာရှိသော သူကိုယ်တိုင်ပင် မသိလိုက်ဘဲ အန္တရာယ်ပြုခံခဲ့ရသည်။ သူ၏ အမှားများအတွက် အသတ်မခံရသည်မှာပင် ကံကောင်းလှပြီ ဖြစ်၏။

“ ကဲ... အစည်းအဝေးကို ဆက်ကြရအောင်” ချီယွမ်က လက်ကို ဝှေ့ယမ်းလိုက်ရာ လူတိုင်းအတွက် ကျောက်စိမ်းအဆောင်များ ပေါ်ထွက်လာသည်။ သို့သော် ထိုအဆောင်များတွင် အကြောင်းအရာကို မဖတ်မီ လူတိုင်း လက်မှတ်ရေးထိုးရမည့် စာချုပ်တစ်ခု ပါရှိသည်။

ဟမ် … ဒီစာချုပ်က တည်ရှိမှုကတိကဝတ်ရဲ့ ပုံစံကွဲတစ်ခုပဲ။ ဂိုဏ်းက လာမဲ့ခေတ်သစ်အတွက် စတင် လိုက်လျောညီထွေဖြစ်အောင် လုပ်နေပြီပဲ

ဝမ်ဝေ့က စာချုပ်တွင် လက်မှတ်ထိုးရင်း တွေးလိုက်သည်။ သို့သော် သူက ချက်ချင်းပင် ရှံ့မဲ့သွားလေသည်။

အထဲတွင်ပါရှိသည့် အကြောင်းအရာမှာ ဝမ်ဝေ့ ပေးထားသည့် သတင်းအချက်အလက်များ ဖြစ်နေသည်။ ၎င်းမှာ ဒိုင်မေးရှင်းအနိမ့်၏ အရေးပါမှု၊ သူ၏ ကောင်းကင်ဧကရာဇ်ခေတ်နှင့် ခုံရုံးက ငရဲဧကရာဇ်ကဲ့သို့သော ကိုယ်စားလှယ် ရာထူးသစ်များ ဖန်တီးကာ သာလွန်ခေတ်ကို မည်သို့ ပုံဖော်နိုင်မလဲဆိုသည့် ခန့်မှန်းချက်များ ဖြစ်ပေသည်။

“ဘိုးဘေး... ဒီသတင်းတွေက အမှန်ပဲလား” တစ်ဦးက မေးလာသည်။

“အမှန်ပဲ။ မဟာအကြီးအကဲ ဝမ်ဝေ့က ဒီအချက်အလက်အားလုံးကို တွက်ချက်ဖော်ထုတ်ခဲ့သလို ယုံကြည်ရတဲ့ ယမမင်း တစ်ပါးဆီကလည်း သတင်းရထားတာပဲ” ချီယွမ်က ခေါင်းညိတ်ပြသည်။ လူတိုင်း ဝမ်ဝေ့ကို ခဏမျှ ကြည့်လိုက်ကြပြီး အချို့က ခေါင်းပင် ညိတ်ပြကြသည်။

“ငါတို့ အခုကတည်းက အနာဂတ်အတွက် စီစဉ်ရမယ်။ အရင်ဆုံး ဒိုင်မေးရှင်းအနိမ့်နဲ့ ဆက်သွယ်မှုကို တိုးမြှင့်ရမယ်။ သူတို့နဲ့ ပိုပြီး မကြာခဏ ဆက်သွယ်ပါ၊ စည်းမျဉ်းတွေအတွင်းကနေ အရင်းအမြစ်တွေ ပိုပေးပါ။ ပြီးတော့ ပါရမီရှင်တွေကို ပိုပြီး စုဆောင်းပါ”

“ပါရမီရှင်တွေကို စုဆောင်းမယ်။ ဒိုင်မေးရှင်းအနိမ့်ကို ပုံရိပ်ယောင် လွှတ်ပြီး အဲဒီလူတွေကို ခေါ်လာဖို့ ပြောနေတာလား”

“အတိအကျပဲ”

“ကောင်းကင်တာအိုက ဒါကို ခွင့်ပြုမယ် ထင်လို့လား” ထိုကဲ့သို့သော နည်းလမ်းသည် ဒိုင်မေးရှင်းအနိမ့်မှ လူများအား အားကောင်းသော ကျင့်ကြံမှု မရှိဘဲ တက်လှမ်းခွင့် ပေးလိုက်ခြင်း ဖြစ်ပြီး ဒိုင်မေးရှင်းအမြင့်နှင့် ဒိုင်မေးရှင်းအနိမ့်အကြား ခြားနားခြင်း အယူအဆကို ပျက်ပြားသွားစေလိမ့်မည်။

“အဲဒီအကြံကို ချက်ချင်းကြီး ပယ်မချလိုက်နဲ့ဦး။ ကောင်းကင်တာအိုအနေနဲ့ ဒိုင်မေးရှင်းအနိမ့်ရဲ့ အရေးပါမှုကို နားလည်ထားသင့်သလို ငါတို့ လုပ်နေတာက မိုးမြေရဲ့ အနာဂတ် လမ်းကြောင်းပဲ။ ဒါကြောင့် ငါတို့ စံနမူနာသစ်တစ်ခု စတင်နိုင်မှာပါ”

“မဟာအကြီးအကဲ ခွန်အားကြီးခန္ဓာ ပြောတာလည်း ဟုတ်တယ်။ တကယ်လို့ ကောင်းကင်တာအိုက မပူးပေါင်းရင်တောင် ငါတို့က မျိုးဆက်တိုင်းမှာ ထာဝရအုပ်စိုးသူတစ်ဦးကို သတ်မှတ်ပြီး အဲဒီပါရမီရှင်တွေကို ခေါ်ဆောင်ခိုင်းလို့ ရတာပဲ” တစ်ဦးက အကြံပြုသည်။ မသေမျိုးများ တက်လှမ်းချိန်တွင် လူအချို့ကို ခေါ်ဆောင်သွားနိုင်သည့် စည်းမျဉ်းရှိသောကြောင့် ၎င်းမှာ ဖြစ်နိုင်ချေရှိသည်။

“ဒီအကြံပြုချက်တွေကို ငါ သဘောတူတယ်။ ဒါပေမဲ့ လာမဲ့ ကပ်ဘေးကြောင့် ဒိုင်မေးရှင်းအနိမ့်က တစ်ခါပြန်ပြီး အဆက်အသွယ် ပြတ်တောက်သွားနိုင်တာကိုတော့ သတိပေးချင်တယ်” အထွေထွေသောင်းပြောင်းက ဆိုသည်။

“ဒါကြောင့် အဆက်အသွယ် မပြတ်ခင် အခုကတည်းက စတင်ပြီး အုတ်မြစ်ချထားရမယ်”

“ငါလည်း အဲဒီအကြံကို သဘောတူတယ်။ ဒါပေမဲ့ အခုကတည်းက လူသစ်စုဆောင်းဖို့ တကယ် လိုလို့လား။ မဟာအကြီးအကဲ ဝမ်ဝေ့ရဲ့ ခန့်မှန်းချက်အရ အနာဂတ်မှာမှ ဒိုင်မေးရှင်းအနိမ့်က လူတွေဟာ သာလွန်အဆင့်ကို ဝင်ရောက်နိုင်ခြေ ပိုများမှာလေ။ အဓိကအချက်က အနာဂတ်မှာဆိုတာပဲ”

လူတိုင်း ဝမ်ဝေ့၏ အမြင်ကို စောင့်ဆိုင်းနေကြသည်။

“ ဒိုင်မေးရှင်းအနိမ့်မှာ မျိုးဆက် ၃၃ ဆက်ထက်မက ကြာခဲ့ပြီ” ဝမ်ဝေ့က တည်ငြိမ်စွာ ပြောလိုက်သည်။

“အခုဆိုရင် ကျင့်ကြံသူတွေနဲ့ ပါရမီရှင်အားလုံးရဲ့ အတွေးအခေါ်တွေ ပြောင်းလဲသွားပြီ။ သူတို့ ကျင့်ကြံခြင်း စတင်တာနဲ့ တစ်ပြိုင်နက် တာအိုကို သက်သေပြပြီးရင် ဘယ်လို အမွေအနှစ်မျိုး ဒါမှမဟုတ် ဘယ်လိုအသေးစားယန္တရားမျိုး ထားခဲ့မလဲဆိုတာကိုပါ စတင်စီစဉ်နေကြပြီ။ ဒါကြောင့် အကျိုးသက်ရောက်မှုတွေက စတင်နေပြီလို့ ပြောလို့ရတယ်”

အကြီးအကဲများက ထိုစကားကို စဉ်းစားကြည့်ပြီးနောက် မနာလိုသော အမူအရာများ ပြလာကြသည်။ အကယ်၍ သူတို့သာ ကျင့်ကြံရေး စတင်သည့် အသက် ၁၄၊ ၁၅ နှစ်ကတည်းက မဟာတာအိုသူတော်စင် တစ်ဦးဖြစ်ဖို့ အရေးပါသည့် ယန္တရားတစ်ခုကို မည်သို့ ဖန်တီးမည်ဟု စတင်စီစဉ်နိုင်ခဲ့လျှင် ရရှိမည့် အကျိုးကျေးဇူးမှာ အတိုင်းအဆမရှိ ဖြစ်လိမ့်မည်။

“ငါတို့ တပည့်တွေကိုလည်း အဲဒီလို အတွေးအခေါ်မျိုးနဲ့ လေ့ကျင့်ပေးသင့်တယ်” ယန်းအိုက်က အကြံပြုသည်။

“မင်းမှာ ဘာအစီအစဉ် ရှိလဲ”

“စနစ်သစ်တစ်ခု ချမှတ်မယ်။ တာအိုကို သက်သေပြပြီးရင် သူတို့က ငါတို့ နယ်မြေထဲက သာမန်သေမျိုးလူမှုအဖွဲ့အစည်းအတွက်ဖြစ်ဖြစ်၊ ဂိုဏ်းအတွက်ဖြစ်ဖြစ် အကျိုးရှိမဲ့ အသေးစား ယန္တရားတစ်ခု ဖန်တီးရမယ်။ အဲဒီ ရလဒ်အပေါ် မူတည်ပြီး ငါတို့က အဆင့်သတ်မှတ်ပြီး ဆုလာဘ်တွေ ပေးမယ်”

“ ဒါပေမဲ့ အဲဒီလို လုပ်ရပ်က တခြားအဖွဲ့အစည်းတွေကို သတိပေးလိုက်သလို ဖြစ်မသွားဘူးလား” တစ်ဦးက မေးသည်။

“ပြဿနာရှိမယ် မထင်ပါဘူး” ချီယွမ်က ဆိုသည်။

“မဟာယန္တရားက မဟာတာအိုသူတော်စင် ဖြစ်ဖို့ သော့ချက်ဆိုတာကို လူအနည်းငယ်ပဲ ခန့်မှန်းနိုင်မှာပါ။ သိရင်တောင် တာအိုအခွင့်အလမ်းဂိုဏ်း ဒါမှမဟုတ် ဒိုင်မေးရှင်းအနိမ့် လုပ်နေတာနဲ့ ဆက်စပ်မိဖို့ ခဲယဉ်းပါတယ်။ ပိုအရေးကြီးတာက ငါတို့ဂိုဏ်းက တပည့်တွေကို နည်းလမ်းအမျိုးမျိုးနဲ့ လေ့ကျင့်ပေးတာကြောင့် နာမည်ကြီးပြီးသားမို့ လူတွေက အဲဒီလိုပဲ ထင်နေကြမှာပဲ”

အခြားသူများ သတိပြုမိချိန်တွင် သူတို့သည် အပြတ်အသတ် သာလွန်နေပြီးသား ဖြစ်လိမ့်မည်။

“မင်း ဘယ်လိုထင်လဲ” ယန်းအိုက်က ဝမ်ဝေ့ကို ကြည့်ကာ မေးသည်။

“ကျွန်တော်ကတော့ အဲဒီအကြံကို ထောက်ခံတယ်။ ဒါပေမဲ့ ကျွန်တော်တို့ရဲ့ အဓိက အာရုံစိုက်မှုက ဒိုင်မေးရှင်းအနိမ့်မှာပဲ ရှိသင့်တယ်လို့ ထင်တယ်”

“အကျိုးသက်ရောက်မှုက အတူတူပဲ မဟုတ်ဘူးလား”

“မတူဘူး” ဝမ်ဝေ့က အခိုင်အမာ ပြန်ဖြေလိုက်သည်။

“အသေးစား ယန္တရားတစ်ခု ဖန်တီးခြင်းဆိုတဲ့ အယူအဆဟာ ဒိုင်မေးရှင်းအနိမ့်မှာ ယဉ်ကျေးမှုဆိုင်ရာ ခေတ်ရေစီးကြောင်းတစ်ခု ဖြစ်နေပြီ။ လူတိုင်းက ဒါကို လုပ်ချင်နေကြတာ။ ဘာလို့လဲဆိုတော့ ဒါက သူတို့အတွက် ကျော်ကြားမှု၊ ချမ်းသာမှုနဲ့ သမိုင်းမှတ်တမ်းတွေမှာ ထာဝရ တည်ရှိနိုင်ဖို့ နည်းလမ်းတစ်ခု ဖြစ်နေလို့ပဲ”

“တခြားသူတွေရဲ့ ယန္တရားဆိုင်ရာ စိတ်ကူးတွေကို ခိုးယူတာ ဒါမှမဟုတ် ရောင်းချတာမျိုးတွေတောင် ရှိနေရင် အံ့သြမိမှာ မဟုတ်ဘူး။ အဲဒီလောက်အထိ ဒိုင်မေးရှင်းအနိမ့်မှာ ဒီဖြစ်စဉ်က အရေးပါနေတာ။”

“ပြီးတော့ ခင်ဗျားတို့ တစ်ခု မေ့နေတာက... ဘာက ဒါတွေကို အသေးစား ယန္တရားဖြစ်စေတာလဲ ဆိုတာပဲ။ ကောင်းကင်တာအိုက ဒီယန္တရားတွေကို လက်ခံပြီးကမ္ဘာကြီးရဲ့ မရှိမဖြစ် အစိတ်အပိုင်းအဖြစ် ပေါင်းစပ်ပေးလိုက်တာကြောင့် ဖန်တီးသူဟာ မိုးမြေယန္တရားရဲ့ အနှစ်သာရကို နားလည်နိုင်စွမ်း ရရှိသွားတာပဲ။ တစ်နည်းအားဖြင့် ကျုပ်တို့ တပည့်တွေ ဖန်တီးတာက မိုးမြေက အသိအမှတ် မပြုမချင်းတော့ အတုအယောင်တွေပဲ ဖြစ်နေလိမ့်မယ်။”

“ ဒါ့အပြင် အောင်မြင်မှုအတွက် ရရှိတဲ့ ကုသိုလ်တွေနဲ့ ကောင်းကင်ဧကရာဇ်ခေတ်ရဲ့ ကံကြမ္မာ ကောင်းချီးတွေကိုလည်း မပြောရသေးဘူး။ ကျုပ်တို့ ဒီမှာရှိတဲ့ တပည့်တွေကို အဲဒီလို အတွေးအခေါ်မျိုး ရှိအောင် လုပ်ပေးနိုင်ပေမဲ့ အကျိုးသက်ရောက်မှုကတော့ တူမှာ မဟုတ်ဘူး”

ဝမ်ဝေ့သည် အိပ်မက်ကမ္ဘာနှင့် ကောင်းကင်ဧကရာဇ်စနစ်ကို တည်ဆောက်ခဲ့သူ ဖြစ်သလို သူ သီးသန့်ကျင့်ကြံနေစဉ်အတွင်း ဤ အသေးစားယန္တရားများ၏ အနှစ်သာရနှင့် အားသာချက်များကိုလည်း လေ့လာခဲ့သည်။ ထိုမှရရှိသော ဗဟုသုတများကို ချို့ယွင်းချက်ရှိသော သူ့တာအိုသာလွန်ခြင်းကို ဖန်တီးရာတွင် အသုံးပြုရန် စီစဉ်ထားလေသည်။

ဝမ်ဝေ့၏ စကားများကြောင့် အခန်းထဲတွင် ခဏမျှ တိတ်ဆိတ်သွားသည်။ လူတိုင်း စဉ်းစားနေကြလေ၏။ အထူးသဖြင့် ဒိုင်မေးရှင်းအမြင့်တွင် မွေးဖွားလာသော ဂိုဏ်းသားများမှာ မျက်မှောင်ကြုတ်နေကြသည်။

“အဲဒီလိုဆိုရင် ငါတို့ တပည့်တွေကို ဒိုင်မေးရှင်းအနိမ့်မှာ သွားပြီး ကျင့်ကြံခိုင်းရင်ရော” မဟာအကြီးအကဲ လီရှန့်ကျုံးက ဆိုသည်။

“ဒါက ပိုပြီး ပြဿနာမတက်နိုင်ဘူးလား။ ငါတို့က ကောင်းကင်တာအိုဆီက အပြုသဘောဆောင်တဲ့ လမ်းကြောင်းတစ်ခု လိုချင်တာလေ။ ဒါပေမဲ့ ဒိုင်မေးရှင်းအနိမ့်ရဲ့ သာယာဝပြောမှုကို ငါတို့ သွားပြီး နှောင့်ယှက်မယ်ဆိုရင် ချွင်းချက်ပေးမဲ့အစား ပြစ်ဒဏ်ပဲ ရလိမ့်မယ်”

“လူအများကြီး ပို့စရာ မလိုပါဘူး။ ပါရမီအရှိဆုံးသူတွေကို ရွေးပြီး သူတို့ သာမန်သေမျိုး ဖြစ်နေတုန်းမှာပဲ ပို့လိုက်မယ်။ အောက်ခြေကနေ စပြီး ကြီးထွားလာအောင် လုပ်မယ်။ သူတို့ကို နယ်ခြားကမ္ဘာတွေရဲ့ ကောင်းကင်ဆန္ဒတွေကိုပဲ ယှဉ်ပြိုင်ခိုင်းပြီး အသင်္ချေဧကရာဇ်ကမ္ဘာကိုတော့ ချန်ထားခဲ့ဖို့ ပြောလို့ရတာပဲ” လီရှန့်ကျုံးက ဆက်ပြောသည်။

“ကောင်းကင်တာအိုရဲ့ တုံ့ပြန်မှုကို စမ်းကြည့်လို့ ရတာပဲ” အထွေထွေသောင်းပြောင်းက ဆိုသည်။

“ဒါပေမဲ့ ငါ အကြံပြုချင်တာကတော့ ဒီ အသေးစားယန္တရားတွေကို လေ့လာဖို့ ပုံရိပ်ယောင်တွေ လွှတ်သင့်တယ်။ အဲဒီနည်းလမ်းက ပိုပြီး အကျိုးရှိနိုင်တယ်”

“မဆိုးတဲ့ အကြံပဲ။ ဒါပေမဲ့ မဟာတာအိုက ပုံရိပ်ယောင်တွေ အများကြီး ရှိနေတာကို ကြိုက်မှာမဟုတ်ဘူး။ ဒါကြောင့် အလှည့်ကျ စနစ်တစ်ခု လုပ်ရင်ရော” လိပ်ခွံက အကြံပြုသည်။

“ ငါ သဘောတူတယ်”

“ ဒါဆိုရင် ခိုင်မာတဲ့ အစီအစဉ်တစ်ခု ဆွဲကြစို့” ချီယွမ်က ခေါင်းညိတ်လိုက်သည်။

လူတိုင်း ဆွေးနွေးပြီးနောက် အကြောင်းအရာ အားလုံးအတွက် ခိုင်မာသော အစီအစဉ်တစ်ခုကို ချမှတ်လိုက်ကြသည်။ ထို့နောက် ထိုဆုံးဖြတ်ချက်များကို အကောင်အထည်ဖော်မည့်သူများကို ရွေးချယ်ပြီး သူတို့၏ ကြိုးစားမှုအတွက် ဆုလာဘ်များကိုပါ သတ်မှတ်လိုက်ကြသည်။ သို့သော် အစည်းအဝေးမှာ မပြီးဆုံးသေးပေ။ ဒိုင်မေးရှင်းအနိမ့်ဆိုင်ရာ ကိစ္စရပ်များကိုသာ ဆွေးနွေးရသေးခြင်း ဖြစ်သည်။

နောက်ထပ် အကြောင်းအရာမှာ သာလွန်ခေတ်၏ အပိုင်းကဏ္ဍများနှင့် ခုံရုံး၏ အခန်းကဏ္ဍ ဖြစ်ပေသည်။ ထိုစကားဝိုင်းကို စတင်လိုက်သူမှာ ငရဲစီရင်သူ ဖြစ်၏။