အခန်း (၁၉၃၁-၁၉၃၄)

အခန်း (၁၉၃၁) - လျှို့ဝှက်ကုဒ် နံပါတ် B003

~B-အဆင့် ဧရိယာတွင် အသုံးပြုထားသော နည်းပညာများမှာ C-အဆင့်ထက် များစွာ ပိုမို မြင့်မားလှ၏။ ၎င်းတို့ကို အမြောက်အမြား ထုတ်လုပ်နိုင်ပြီ ဖြစ်သလို စမ်းသပ်မှုများစွာလည်း အောင်မြင်ထားသော်လည်း၊ ဘေးကင်းမှု အာမခံချက်မှာ (၉၀) ရာခိုင်နှုန်းအထက်တွင်သာ ရှိသေးသည်။

ဤအဆင့်ရှိ နည်းပညာမျိုးမှာ ဈေးကွက်တွင် တွေ့ရခဲလှပြီး၊ ကမ္ဘာ့ ထိပ်တန်း နည်းပညာများဟု ဆိုရပေလိမ့်မည်။

သာမန်လူများအနေဖြင့် ငွေပုံပေးလျှင်ပင် ဤနည်းပညာကို ထိတွေ့ခွင့်ရရန် မလွယ်ကူလှပေ။

ထိုနည်းတူပင်... ဤနေရာသို့ လေးဖို့ဒ် အင်စတီကျု၏ ဝါရင့် သုတေသန ပညာရှင်များနှင့် သုတေသန ခေါင်းဆောင်များသာ ဝင်ရောက်ခွင့် ရှိကြခြင်း ဖြစ်၏။

သူတို့ B-အဆင့် ဧရိယာသို့ ရောက်ရှိသွားသောအခါ၊ ပြပွဲ ဧရိယာမှာ C-အဆင့်ထက် များစွာ ပိုမို ကျယ်ဝန်းနေသည်ကို တွေ့လိုက်ရလေသည်။

ခန်းမဆောင်ကြီးမှာ ကျယ်ဝန်းလှသော်လည်း၊ ထိုနေရာတွင်မူ ဖိတ်ကြားခံရသည့် ဧည့်သည်တော် အနည်းငယ်၊ စမ်းသပ်ခံ လူသားများနှင့် ပြသမှုကို တာဝန်ယူထားသည့် ဝန်ထမ်းအချို့သာ ရှိနေကြ၏။

ထို ဧည့်သည်တော်များထဲတွင် ယဲ့ဖန်သည် ရင်းနှီးခြင်း မရှိသော်လည်း၊ သတင်းများနှင့် အင်တာဗျူးများတွင် တွေ့ဖူးသယောင် ရှိသော ပုံရိပ်အချို့ကို တွေ့လိုက်ရလေသည်။

'အင်း... ဒါတွေကတော့ တကယ့် ထိပ်တန်း လူကြီးလူကောင်းတွေ ဖြစ်ရမယ်။'

"ပရော်ဖက်ဆာ ဒတ်ချ်တို ရောက်လာပြီ..."

အထဲရှိ ဝန်ထမ်းများနှင့် ဧည့်သည်တော်များမှာ ပရော်ဖက်ဆာ ဒတ်ချ်တိုက ယဲ့ဖန်တို့ကို ဦးဆောင် ခေါ်လာသည်ကို မြင်သောအခါ ကပျာကယာပင် နှုတ်ဆက်ကြလေသည်။

"ရပါတယ်... ငါတို့ကို ဂရုမစိုက်ကြပါနဲ့... မင်းတို့ အလုပ်ကို ဆက်လုပ်ကြပါ..."

ပရော်ဖက်ဆာ ဒတ်ချ်တိုက အေးအေးဆေးဆေးပင် ပြန်လည် တုံ့ပြန်လိုက်ပြီးနောက် ယဲ့ဖန်ဘက်သို့ လှည့်ကြည့်လိုက်လေသည်။

"ယဲ့ဖန်... မင်းက မျိုးရိုးဗီဇ ပြုပြင်တဲ့ နည်းပညာအကြောင်းကို သိပ်မသိသေးဘူး မဟုတ်လား..."

"ဟုတ်ပါတယ်..." ယဲ့ဖန်က ဖုံးကွယ်မထားဘဲ အမှန်အတိုင်း ပြောလိုက်၏။

"ကျွန်တော် မျိုးရိုးဗီဇ ပြုပြင်ထားတဲ့ လူတချို့နဲ့တော့ ထိတွေ့ဖူးပါတယ်... ရွှယ်လီတို့ဆီကလည်း နည်းနည်းပါးပါး ကြားဖူးတာပေါ့... ဒါပေမယ့် နက်နက်နဲနဲတော့ မသိပါဘူးဗျာ..."

"ဒါဆိုရင်တော့... ဒီက ပြသမှုတွေ ပြီးသွားရင်တော့... မင်း နားလည်လွယ်မယ့် စကားလုံးတွေနဲ့ ငါ သေသေချာချာ ရှင်းပြပေးပါ့မယ်..."

ပရော်ဖက်ဆာ ဒတ်ချ်တို၏ စိတ်အားထက်သန်မှုကြောင့် ဝန်ထမ်းများနှင့် ဧည့်သည်တော်များမှာ ယဲ့ဖန်ထံသို့ အကြည့်များ ရောက်ရှိလာကြတော့၏။

ဧည့်သည်တော် အချို့မှာမူ ယဲ့ဖန်ကို ကြည့်ရင်း တစ်ဦးကိုတစ်ဦး တိုးတိုးတိတ်တိတ်ပင် ဆွေးနွေးနေကြလေသည်။

'ဒီလူငယ်က ဘယ်သူမို့လို့လဲ... ပရော်ဖက်ဆာ ဒတ်ချ်တိုက ဘာလို့ ဒီလောက်အထိ အလေးပေးနေရတာလဲ...' ဟု သူတို့ သိချင်နေကြပုံ ရပေသည်။

သို့သော်လည်း လူတိုင်းမှာ ပရော်ဖက်ဆာ ဒတ်ချ်တိုကို အလွန် လေးစားကြသဖြင့်၊ သူက အတိအလင်း ထုတ်မပြောသရွေ့ မည်သူမျှ ဝင်ရောက် မမေးမြန်းရဲကြပေ။

အင်စတီကျု ဝန်ထမ်းများက ဧည့်သည်တော်များကို စမ်းသပ်ခံ လူသား၏ အခြေအနေကို ဆက်လက် မိတ်ဆက်ပြသနေကြ၏။

"အားလုံးပဲ... ကျွန်တော်တို့ ဘေးနားက ကြွက်သား အဖုအထစ်တွေနဲ့ လူကြီးမင်းကို ကြည့်လိုက်ကြပါဦး..."

"ကျွန်တော်တို့ ဓာတ်ခွဲခန်းမှာတော့ သူ့ကို 'B003' လို့ လျှို့ဝှက် နံပါတ် ပေးထားပါတယ်..."

"ဆိုလိုတာကတော့... တတိယမျိုးဆက် မျိုးရိုးဗီဇ နည်းပညာရဲ့ တတိယမြောက် စမ်းသပ်ခံ ပုဂ္ဂိုလ်ပေါ့ဗျာ..."

"သူနဲ့ အပြင်က C-အဆင့် စစ်သည်တော်တွေ ဘာကွာသလဲ ဆိုတာကို လူကြီးမင်းတို့ မြင်နိုင်မလားဗျ..."

သူ့မေးခွန်းအား ရှိနေသော လူများ အားလုံးက ခေါင်းခါပြလိုက်ကြ၏။

B003 ၏ ကြွက်သားများမှာ ပိုမို ပြည့်စုံ ကောင်းမွန်နေပြီး၊ ရုပ်ရည်မှာလည်း ပိုမို ခန့်ညားကာ ကြည့်ကောင်း

နေသော်လည်း... C-အဆင့် ဧရိယာမှ လူများနှင့်မူ သိသိသာသာ ကွဲပြားခြင်း မရှိလှပေ။

"ကဲ... ဒါဆိုရင်တော့ B003 ရဲ့ စွမ်းဆောင်ရည်ကို ကျွန်တော် ပြသခိုင်းလိုက်ပါ့မယ်..."

ဝန်ထမ်းက ပြုံးလျက်ပင် B003 ကို အချက်ပြလိုက်လေသည်။

B003 သည် အချက်ပြချက်ကို ရရှိသည်နှင့်... သူ၏ ပတ်ဝန်းကျင်မှ ဝန်ထမ်းများ ဖယ်ပေးလိုက်ချိန်တွင်၊ သူ၏ အရှိန်အဝါမှာ ရုတ်ချည်းပင် ပြောင်းလဲသွားတော့၏။ ခုနက လူကြီးလူကောင်း တစ်ဦးအသွင်မှ... ရက်စက်သော သားရဲ တစ်ကောင်အဖြစ်သို့ ကူးပြောင်းသွားသကဲ့သို့ပင်။

သူ၏ အကြည့်များမှာ အလွန်ပင် စူးရှသွားရပြီး၊ သူ၏ တစ်ကိုယ်လုံးမှ ကြောက်မက်ဖွယ်ကောင်းသော ဖိအားများ ထွက်ပေါ်လာလေသည်။

သူသည် ကျားတစ်ကောင်အလား 'ဝုန်း' ခနဲ ခုန်အုပ်လိုက်ရာ... (၁၀) မီတာကျော် ဝေးသော နေရာသို့ ရောက်ရှိသွားပြီး၊ ထိုနေရာတွင် ရပ်ထားသော ကားငယ်လေး တစ်စီး၏ သံမဏိ ကိုယ်ထည်ကို လက်သီးတစ်လုံးတည်းဖြင့် ထိုးဖောက်ပြလိုက်လေတော့သတည်း။

ထို့နောက်တွင်တော့... သူသည် ထိုကားကိုပင် ပေအနည်းငယ် ဝေးရာသို့ ရောက်ရှိသွားအောင် လှမ်းကန်ပြလိုက်ပြန်၏။

"အို... ဘုရားသခင်..."

"ဒါ ဘယ်လို အရှိန်နဲ့ ပေါက်ကွဲအားမျိုးလဲဗျာ..."

လူအုပ်ကြီးကြားမှ အံ့ဩတုန်လှုပ်သံများ ဆူညံစွာ ထွက်ပေါ်လာတော့သည်။

"ဒီ B003 က... အပြင်က C-အဆင့် စစ်သည်တော်တွေရဲ့ အဆင့်မြှင့်တင်ထားတဲ့ ဗားရှင်းပေါ့လေ..."

"ကြည့်ရတာ... သူ့ရဲ့ ခန္ဓာကိုယ်ထဲမှာ မျိုးရိုးဗီဇ တွေကို ပိုပြီး ပေါင်းစပ်ထားပုံရတယ်... အဲ့ဒါကြောင့်ပဲ C-အဆင့် စစ်သည်တော်တွေထက် ပိုပြီး ထူးခြားတဲ့ စွမ်းဆောင်ရည်တွေ ရနေတာပေါ့..."

ပြသမှု ပြီးဆုံးသောအခါ B003 သည် ခန်းမဆောင် အလယ်သို့ ပြန်လည် လျှောက်လှမ်းလာပြီး၊ သူ၏ ခက်ထန်သော အရှိန်အဝါများကို ပြန်လည် သိမ်းဆည်းလိုက်လေသည်။

ထိုအခါမှ အင်စတီကျု ဝန်ထမ်းများသည် ခန်းမဆောင် အလယ်သို့ နောက်တစ်ကြိမ် ပြန်လည် ရောက်ရှိလာကြတော့၏။

---

အခန်း (၁၉၃၂) - ပရော်ဖက်ဆာ ဒတ်ချ်တို ထံမှ သဲလွန်စများ

~"မှန်ပါတယ် ခင်ဗျာ... လူကြီးမင်းတို့ ခန့်မှန်းတဲ့ အတိုင်းပါပဲ... B-အဆင့် ပြပွဲ ဧရိယာက စစ်သည်တော်တွေဟာ C-အဆင့် စစ်သည်တော်တွေရဲ့ အဆင့် မြှင့်တင်ထားတဲ့ ပုံစံတွေပဲ ဖြစ်ပါတယ်..."

"သူတို့ရဲ့ မျိုးရိုးဗီဇ ပိုများများကို ကျွန်တော်တို့တွေက အောင်မြင်စွာ ပြုပြင်ပြောင်းလဲပေးနိုင်ခဲ့ပြီး၊ အဲ့ဒီအတွက်ကြောင့်ပဲ ထူးခြားတဲ့ စွမ်းရည်တွေ ပိုပြီး ရရှိလာတာပေါ့..."

"တကယ်လို့ C-အဆင့် စစ်သည်တော် တစ်ယောက်က ခွန်အား၊ သွက်လက်မှု သို့မဟုတ် တုံ့ပြန်မှု စတဲ့ တစ်ခုတည်းသော စွမ်းရည်ကိုပဲ ဖော်ထုတ်နိုင်တယ် ဆိုရင်တော့... B-အဆင့် စစ်သည်တော် တစ်ယောက်ကတော့ ခွန်အား + သွက်လက်မှု၊ ဒါမှမဟုတ် ခွန်အား + သွက်လက်မှု + တုံ့ပြန်မှု စတဲ့ စွမ်းရည်ပေါင်းစုံကို တစ်ပြိုင်နက်တည်း ဖော်ထုတ်နိုင်တာ ဖြစ်ပါတယ်..."

"..."

မြင်ကွင်း တစ်ခုလုံး ဆွေးနွေးသံများဖြင့် နောက်တစ်ကြိမ် ဆူညံသွားရပြန်၏။

ပရော်ဖက်ဆာ ဒတ်ချ်တိုသည်လည်း ဤအခွင့်အရေးကို အသုံးချကာ ယဲ့ဖန်အား ရှင်းပြလေသည်။

"ဝန်ထမ်းတွေရဲ့ ရှင်းပြချက်နဲ့ ပြသမှုတွေကို ကြည့်ပြီးရင်တော့... B-အဆင့် နဲ့ C-အဆင့် တို့ရဲ့ ကွာခြားချက်ကို မင်း သိသွားလောက်ပြီ မဟုတ်လား..."

ယဲ့ဖန်က နားလည်သွားသယောင် ခေါင်းညိတ်လိုက်လေသည်။

သို့သော်လည်း B-အဆင့်၏ အထက်တွင် ရှိနေသေးသော A-အဆင့်၊ S-အဆင့် နှင့် SS-အဆင့် တို့ကို တွေးမိလိုက်သောအခါ၊ သူသည် အကုန်လုံးကို နားမလည်သေးကြောင်း သိလိုက်သဖြင့် ခေါင်းကို တစ်ဖန် ပြန်လည် ခါယမ်းလိုက်ပြန်၏။

သို့သော်လည်း ပရော်ဖက်ဆာ ဒတ်ချ်တိုကမူ ယဲ့ဖန်၏ ဆိုလိုရင်းကို နားလည်ပုံ ရလေသည်။ သူက ပြုံးလျက်ပင် ဆက်လက် ရှင်းပြတော့၏။

"ငါ မင်းကို ဥပမာလေး တစ်ခုနဲ့ ရှင်းပြပါ့မယ်... လူသားတစ်ယောက်ရဲ့ စွမ်းဆောင်ရည်တွေကို ထိန်းချုပ်ထားတဲ့ မျိုးရိုးဗီဇ တွဲပေါင်း သန်းတစ်ထောင် (၁ ဘီလီယံ) ရှိတယ်လို့ ထားလိုက်ပါတော့... ဒါဆိုရင် C-အဆင့် စစ်သည်တော် ဆိုတာက... တို့တွေ အဲ့ဒီ သန်းတစ်ထောင်ထဲက တစ်ခုတည်းသော မျိုးရိုးဗီဇကို အောင်မြင်စွာ ပြုပြင်နိုင်ခဲ့တဲ့ ရလဒ်ပေါ့..."

"B-အဆင့် စစ်သည်တော် ကျတော့... အဲ့ဒီ သန်းတစ်ထောင်ထဲက မျိုးရိုးဗီဇ (၁၀) ခုလောက်ကို အောင်မြင်စွာ ပြုပြင်နိုင်ခဲ့တဲ့ ရလဒ်ပေါ့ကွာ..."

"A-အဆင့်၊ S-အဆင့် နဲ့ SS-အဆင့် တွေကျတော့... အဲ့ဒီ သန်းတစ်ထောင်ထဲကမှ (၁၀၀)၊ (၁,၀၀၀) နဲ့ (၁၀,၀၀၀) အသီးသီးကို အောင်မြင်စွာ ပြုပြင်နိုင်ခဲ့တဲ့ အခြေအနေတွေပေါ့..."

"ဒီလောက်တောင် အချိုးအစား နည်းတာလားခင်ဗျ..."

ယဲ့ဖန် အနည်းငယ် အံ့အားသင့်သွားရလေသည်။

လူသားခန္ဓာကိုယ်၏ ကြီးမားလှသော စွမ်းအားများကို လှုံ့ဆော်ရန်အတွက် မျိုးရိုးဗီဇ အမြောက်အမြားကို ပြုပြင်ရမည်ဟု သူ ထင်မှတ်ထားခဲ့ခြင်း ဖြစ်၏။ ယခုမူ သန်းတစ်ထောင်တွင် တစ်ခုတည်းကိုသာ ပြုပြင်ရသေးသည် ဆိုတော့...

"ဒါက ငါ အကြမ်းဖျင်း ပြောပြတဲ့ ကိန်းဂဏန်းတွေပါ..." ပရော်ဖက်ဆာ ဒတ်ချ်တိုက ခေါင်းခါရင်း ပြုံးလိုက်လေသည်။

"တကယ်တော့... လူသားခန္ဓာကိုယ်ထဲမှာ ရှိတဲ့ မျိုးရိုးဗီဇ အချက်အလက်တွေက ငါပြောတာထက် အများကြီး ပိုပြီး များပြားလှပါတယ်..."

"တို့ရဲ့ C-အဆင့် စစ်သည်တော်တွေတောင်မှ... သန်းတစ်ထောင်မှာ တစ်ခု ဆိုတဲ့ အဆင့်ကို ရောက်ဖို့ အများကြီး လိုပါသေးတယ်..."

သူက သုတေသန ပညာရှင်တစ်ဦး၏ လေးနက်မှုဖြင့် ဆက်လက် ပြောဆိုလေ၏။

"အခု လက်ရှိ အခြေအနေမှာတော့... တို့တွေက လူသားမျိုးရိုးဗီဇတွေကို အဖြေရှာနေတုန်း အဆင့်ပဲ ရှိပါသေးတယ်... မျိုးရိုးဗီဇ ပြုပြင်တဲ့ နည်းပညာ ဆိုတာကလည်း... ဇီဝ အင်ဂျင်နီယာ နည်းပညာရဲ့ အခြေခံပေါ်မှာ မတော်တဆ ရှာဖွေတွေ့ရှိခဲ့တဲ့၊ လူသားရဲ့ စွမ်းဆောင်ရည်ကို လှုံ့ဆော်ပေးနိုင်မယ့် မျိုးရိုးဗီဇ အပိုင်းအစလေးတွေကို အသုံးချထားတာပဲ ရှိပါသေးတယ်..."

"မျိုးရိုးဗီဇ ပြုပြင်တယ် ဆိုတာကတော့... လူသားရဲ့ စွမ်းရည်တစ်ခုခုကို သက်ရောက်မှုရှိစေတဲ့ လျှို့ဝှက်ကုဒ်တွေကို ရှာဖွေပြီး၊ အဲ့ဒါကို တို့တွေ ရှာတွေ့ထားတဲ့ အကောင်းဆုံး ကုဒ်အဖြစ် ပြောင်းလဲလိုက်တာပေါ့... ပြီးရင် အဲ့ဒီ ကုဒ်ကို လှုံ့ဆော်ပေးခြင်းအားဖြင့်... စမ်းသပ်ခံ လူသားမှာ အဲ့ဒီ စွမ်းရည်တွေ ထွက်ပေါ်လာအောင် လုပ်တဲ့ နည်းပညာပေါ့ဗျာ..."

"..."

ပရော်ဖက်ဆာ ဒတ်ချ်တို၏ ရှင်းပြချက်မှာ တိုတောင်းသော်လည်း အလွန်ပင် ထိရောက်လှပေသည်။

ထို ရှင်းပြချက်များမှတဆင့်... ယဲ့ဖန်သည် မျိုးရိုးဗီဇ ပြုပြင်ပြောင်းလဲမှု နည်းပညာ၏ အခြေခံ သဘောတရားများနှင့်၊ လက်ရှိ ကြုံတွေ့နေရသော အခက်အခဲများ၊ တိုးတက်မှုများကို လျင်မြန်စွာ နားလည်သွားတော့၏။

အတိုချုပ် ပြောရလျှင်... မျိုးရိုးဗီဇ ပြုပြင်ခြင်း ဆိုသည်မှာ ဂိမ်းတစ်ခုထဲတွင် ဇာတ်ကောင်တစ်ခု၏ စွမ်းရည်များကို Upgrade လုပ်နေခြင်းနှင့် တူနေပေသည်။

အလှအပဆိုင်ရာ ပြုပြင်ခြင်းမှာ... ဇာတ်ကောင်၏ ရုပ်ရည်နှင့် ကိုယ်လုံးကိုယ်ပေါက်ကို မြှင့်တင်ပေးခြင်း ဖြစ်၏။

မျိုးရိုးဗီဇ စစ်သည်တော်များ ပြုပြင်ခြင်းမှာမူ... ဇာတ်ကောင်၏ တိုက်ခိုက်ရေး စွမ်းရည်များ ဖြစ်သော ခွန်အား၊ သွက်လက်မှု၊ ဉာဏ်ရည်၊ စိတ်ဓာတ် နှင့် ခံနိုင်ရည် စသည်တို့ကို မြှင့်တင်ပေးခြင်း ဖြစ်ချေသည်။

မွေးကင်းစ ကလေးငယ် ပြုပြင်ခြင်းမှာမူ... ဇာတ်ကောင်ကို စတင် ဖန်တီးကတည်းက ပါရမီနှင့် အလားအလာများအတွက် ငွေပုံအော သုံးစွဲလိုက်ခြင်းနှင့် တူလှပေသည်။

ထိုအထဲတွင် C-အဆင့် စစ်သည်တော်များမှာ... စွမ်းရည် တစ်ခု သို့မဟုတ် နှစ်ခုကို အတိုင်းအတာ တစ်ခုအထိ မြှင့်တင်ထားသည့် ရလဒ်များ ဖြစ်ကြ၏။

B-အဆင့် စစ်သည်တော်များမှာမူ... စွမ်းရည် သုံးခု သို့မဟုတ် ငါးခုအထိကို မြှင့်တင်ထားသည့် ရလဒ်များ ဖြစ်ချေသည်။

ဥပမာလေးတစ်ခုနှင့် ပြောရလျှင်... လေးဖို့ဒ် အင်စတီကျု၏ စံနှုန်းအရ C-အဆင့် စစ်သည်တော် တစ်ဦး၏ စွမ်းရည်မှာ အနည်းဆုံး +၁၀ အထိ ရှိနေလိမ့်မည်။

'နာရေး အဖွဲ့အစည်း' မှ လူအများစုမှာမူ +၁၊ +၂ သို့မဟုတ် +၃ အဆင့်တွင်သာ ရှိကြပြီး၊ +၅ အဆင့်သို့ ရောက်ရှိသူမှာ အလွန်ပင် ရှားပါးလှပေသည်။

B-အဆင့် စစ်သည်တော် တစ်ဦး ဖြစ်လာရန်မှာမူ... အနည်းဆုံး စွမ်းရည် သုံးခုမှာ +၁၀ အဆင့်သို့ ရောက်ရှိနေရမည် ဖြစ်၏။

ယဲ့ဖန်၏ အာရုံခံစားမှုအရ... ပြပွဲတွင် ပြသထားသော ထို B-အဆင့် စစ်သည်တော်၏ စွမ်းအားမှာ ယခင်က သူ ရင်ဆိုင်ခဲ့ရသော 'နယူးစတန်' ၏ အဆင့်အတန်းနှင့် မတိမ်းမယိမ်း ရှိနေလေသည်။

ဆိုလိုသည်မှာ... နယူးစတန်သည် ထိုစဉ်က B-အဆင့် မျိုးရိုးဗီဇ ပြုပြင်မှု နည်းပညာကို ရရှိထားသူ ဖြစ်နိုင်ခြေ အလွန် မြင့်မားလှပေသည်။

ပရော်ဖက်ဆာ ဒတ်ချ်တို၏ ပြောပြချက်အရ... ဤလုပ်ငန်းနယ်ပယ်တွင် B-အဆင့် မျိုးရိုးဗီဇ ပြုပြင်မှုကို ပြုလုပ်နိုင်သည့် သုတေသန အင်စတီကျုမှာ အလွန်ပင် နည်းပါးလှသည်ဟု ဆို၏။

ထင်ရှားသည်မှာ... ယဲ့ဖန် အနေဖြင့် ထို လျှို့ဝှက်အဖွဲ့အစည်းအကြောင်းကို ပိုမို သိရှိလိုပါက... ဤ ဇီဝ သုတေသန အင်စတီကျုများကိုသာ အခြေခံ၍ သဲလွန်စ ရှာဖွေရမည် ဖြစ်လေတော့သတည်း။

အခန်း (၁၉၃၃) - စိုးရိမ်စိတ်တို့၏ အရိပ်အယောင်

~"သာမန်လူတွေရဲ့ အမြင်မှာတော့... B-အဆင့် စစ်သည်တော် တစ်ယောက်ဟာ ဟို အမေရိကန် ရုပ်ရှင်တွေထဲက စူပါဟီးရိုးတွေလို အစွမ်းထက်နေပြီလို့ ထင်ရမှာပေါ့..."

ပရော်ဖက်ဆာ ဒတ်ချ်တိုက စကားကို ဆက်လိုက်ရင်း ယဲ့ဖန်အား သူ၏ နောက်မှ လိုက်လာရန် အချက်ပြလိုက်၏။

'အင်း... ဒါက အစပဲ ရှိသေးတာလား။'

"ဒါပေမယ့် တို့တွေရဲ့ အမြင်မှာတော့... ဒါဟာ အစပျိုးရုံပဲ ရှိပါသေးတယ်... တကယ် ကြည့်ကောင်းတာကတော့ B-အဆင့်ထက် သာလွန်တဲ့ စစ်သည်တော်တွေ၊ ဒါမှမဟုတ် ထူးခြားတဲ့ စွမ်းရည်တွေ ပါဝင်အောင် ပြုပြင်ထားတဲ့ သူတွေပေါ့... သာမန် အခြေအနေမျိုးမှာတော့ ဒီလိုလူ တစ်ယောက်ဟာ ရန်သူ တစ်ထောင်ကို တစ်ယောက်တည်းနဲ့ ရင်ဆိုင်နိုင်ဖို့ ဆိုတာ မခက်ခဲပါဘူးဗျာ..."

ယဲ့ဖန်သည် ပရော်ဖက်ဆာ ဒတ်ချ်တို၏ နောက်မှ လိုက်ပါသွားခဲ့၏။ သူတို့သည် B-အဆင့် ပြပွဲ ဧရိယာကို လျင်မြန်စွာ ဖြတ်ကျော်ခဲ့ကြပြီး၊ နည်းပညာ မြင့်မားလှသော စင်္ကြံလမ်းတစ်ခုအတွင်းသို့ ရောက်ရှိသွားကြတော့သည်။

ထိုနေရာ၌ ပရော်ဖက်ဆာ ဒတ်ချ်တိုသည် ဇီဝဆိုင်ရာ စစ်ဆေးမှုများနှင့် စက်မှု နံပါတ်ခတ်မှုများကို အဆင့်ဆင့် ပြုလုပ်ပြီးနောက် တံခါးကြီး တစ်ချပ်ကို ဖွင့်ပေးလိုက်လေသည်။

ယဲ့ဖန်နှင့် ကျန်လူများ အထဲသို့ လိုက်ဝင်သွားသောအခါ... ဤနေရာ၏ ပတ်ဝန်းကျင်မှာ အပြင်ဘက်ရှိ ပြပွဲခန်းမနှင့် လုံးဝ ကွဲပြားခြားနားနေသည်ကို တွေ့လိုက်ရ၏။

'ဪ... ဒါမှ တကယ့် ဇီဝ သုတေသန အင်စတီကျု ဆိုတဲ့ အငွေ့အသက်မျိုးပေါ့။'

ထိန်းချုပ်ခန်းနှင့် တူသော နေရာကို ဖြတ်ကျော်ပြီးနောက်၊ ခွဲစိတ်ခန်းများနှင့် တူသော နေရာများသို့ ရောက်ရှိသွားကြသည်။ ထိုနေရာရှိ ခွဲစိတ်ခန်း တစ်ခုစီတွင် အာဟာရရည်များ ပြည့်နှက်နေသော ဖန်ပြွန်ကြီး နှစ်ခုစီ ရှိနေပြီး၊ ထိုအထဲတွင် အိပ်မောကျနေသော စမ်းသပ်ခံ လူသား တစ်ဦးစီ ရှိနေကြ၏။

ခွဲစိတ်ခန်းများကို ကျော်ဖြတ်ပြီး ဓာတ်ခွဲခန်းသို့ ရောက်ရှိချိန်တွင်မှ... သူတို့သည် A-အဆင့် စစ်သည်တော်၏ ပြသမှုကို မြင်တွေ့ခွင့် ရရှိတော့သည်။

ထိုအခိုက်အတန့်၌ ယဲ့ဖန် တစ်ယောက် အမှန်တကယ်ပင် တုန်လှုပ်ခြောက်ခြားသွားရပြီ ဖြစ်ပါသည်။

အဘယ်ကြောင့်ဆိုသော်... သူ၏ အာရုံခံစားမှုအရ၊ A-အဆင့် စစ်သည်တော် 'A019' ၏ အရှိန်အဝါမှာ... ကိုယ်ခံပညာ လောကမှ 'အတွင်းအား ကျင့်စဉ် အထွတ်အထိပ်' ရောက်နေသော သိုင်းပညာရှင် တစ်ဦး၏ စွမ်းအားနှင့် မတိမ်းမယိမ်း ရှိနေသောကြောင့် ဖြစ်ချေ၏။

နဂါးနိုင်ငံနှင့် ဂျပန်နိုင်ငံတို့ကဲ့သို့ ကိုယ်ခံပညာ ထွန်းကားသော နိုင်ငံများတွင်ပင်... အတွင်းအား အထွတ်အထိပ်သို့ ရောက်ရှိရန် ဆိုသည်မှာ ရှားပါးလှသော ပါရမီရှင်များ ဖြစ်ရမည့်အပြင်၊ ဆယ်စုနှစ်ပေါင်းများစွာ အအေးအပူ မမှုဘဲ ကြိုးစားအားထုတ်မှသာ ဖြစ်နိုင်သော ကိစ္စမျိုး မဟုတ်ပါလော။

ယခုမူ လေးဖို့ဒ် အင်စတီကျု က မျိုးရိုးဗီဇ အပိုင်းအစလေး အချို့ကို ပြုပြင်လိုက်ရုံ၊ ပြီးလျှင် နောက်ဆက်တွဲ အာဟာရ ဖြည့်တင်းမှု အစီအစဉ်များကို လုပ်ဆောင်ပေးလိုက်ရုံဖြင့်... ထို အဆင့်အတန်းသို့ လျင်မြန်စွာ ရောက်ရှိသွားစေသည် ဆိုတော့...

'ဒါဟာ ကိုယ်ခံပညာရဲ့ အခြေခံ အုတ်မြစ်ကိုပါ ဖြိုဖျက်လိုက်တာပဲ မဟုတ်လား။'

ဖြတ်လမ်းနည်း ရှိနေပါလျက်နှင့်... မည်သူကများ ဆယ်စုနှစ်ပေါင်းများစွာ ပင်ပင်ပန်းပန်း လေ့ကျင့်ချင်တော့မည်နည်း။

သိုင်းပညာကို တစ်သက်လုံး ဖက်တွယ်လာခဲ့သူများ အဖို့တော့... ဤနည်းပညာမှာ သူတို့၏ သိုင်းဝိညာဉ်ကိုပါ ချိုးနှိမ်လိုက်ခြင်း ဖြစ်ပေလိမ့်မည်။

ယခင်ခေတ်က သေနတ်၊ အမြောက်များ ပေါ်ပေါက်လာချိန်တွင် ရှေးဟောင်း သိုင်းသမားများ ခံစားခဲ့ရသော ထိုးနှက်ချက်မျိုးထက်ပင် ပိုမို ပြင်းထန်နိုင်ပေသည်။

ထို့နောက်တွင် ပရော်ဖက်ဆာ ဒတ်ချ်တိုက A019 ၏ ခွန်အားကို ပြသခဲ့ရာ... ယဲ့ဖန်၏ နှလုံးသားမှာ လေးလံသွားရတော့၏။

သူ ခံစားမိခဲ့သည့်အတိုင်းပင် ဖြစ်ချေသည်။

A019 သည် အတွင်းအား အထွတ်အထိပ် သိုင်းသမား တစ်ဦး၏ စွမ်းရည်မျိုးကို အမှန်တကယ်ပင် ပိုင်ဆိုင်ထားလေသည်။

ရွှယ်လီ၊ လုခ် နှင့် ကျန်လူများ အံ့ဩမှင်သက်နေကြစဉ်မှာပင်... ယဲ့ဖန်သည် ပရော်ဖက်ဆာ ဒတ်ချ်တိုအား အလိုလိုပင် မေးမြန်းလိုက်မိတော့၏။

"ပရော်ဖက်ဆာ... လေးဖို့ဒ် အင်စတီကျု မှာ ဒီလို A-အဆင့် မျိုးရိုးဗီဇ ပြုပြင်မှု အောင်မြင်တဲ့ ဖြစ်ရပ်တွေ အများကြီး ရှိလားခင်ဗျာ..."

ပရော်ဖက်ဆာ ဒတ်ချ်တိုမှာ သူ၏ ပြသမှုများကို အဆုံးသတ်လိုက်ပြီးနောက်၊ ယဲ့ဖန်တို့အား ကော်ဖီသောက်ရန် သူ၏ ရုံးခန်းဆီသို့ ခေါ်ဆောင်လာခဲ့တော့၏။

ယဲ့ဖန်၏ မေးခွန်းကို ကြားသောအခါ သူက ခေါင်းကို ချက်ချင်းပင် ခါယမ်းလိုက်၏။

"လက်ချိုးရေတွက်လို့ ရနိုင်လောက်တဲ့ အဆင့်ပဲ ရှိပါသေးတယ်..."

"A-အဆင့် နည်းပညာ ဆိုတာက... စမ်းသပ်မှု အဆင့်ဆင့်ကို အောင်မြင်ထားပေမယ့်၊ အမြောက်အမြား ထုတ်လုပ်ဖို့ မဖြစ်နိုင်သေးတဲ့ နည်းပညာလေ... ဘေးကင်းမှုကို အာမခံနိုင်ပေမယ့်၊ အောင်မြင်မှုနှုန်းကတော့ အလွန်ပင် နည်းပါးလှပါတယ်..."

သူက သက်ပြင်း တစ်ချက်ကို ညင်သာစွာ ချလိုက်ရင်း...

"အခုအချိန်မှာ တစ်ကမ္ဘာလုံး အတိုင်းအတာနဲ့ ကြည့်ရင်တောင်မှ... လေးဖို့ဒ် အင်စတီကျု တင် မကပါဘူး... ဒီလို အောင်မြင်စွာ ပြုပြင်နိုင်ခဲ့တဲ့ စမ်းသပ်ခံ လူသား အရေအတွက်ဟာ ဆယ်ဂဏန်းလောက်ပဲ ရှိပါသေးတယ်..."

ထိုအခါမှသာ ယဲ့ဖန်၏ စိုးရိမ်ပူပန်နေသော နှလုံးသားမှာ အနည်းငယ် ပြေလျော့သွားရ၏။ သူက ဆက်လက် မေးမြန်းလိုက်ပြန်သည်။

"ဒီနည်းပညာရဲ့ အောင်မြင်မှုနှုန်းကို ဘယ်အချက်တွေက အဓိက ကန့်သတ်နေတာလဲခင်ဗျာ..."

"A019 ရဲ့ စွမ်းဆောင်ရည်ကို ကြည့်လိုက်ရင်တော့... ဒါဟာ လူသားပုံစံ စစ်လက်နက် တစ်ခုလို့ ပြောရင်တောင် မမှားပါဘူး... အင်အားကြီး နိုင်ငံတွေက ဒီစွမ်းရည်ကို မြင်ကြမှာပဲလေ... သူတို့တွေက ဘယ်လောက်ပဲ ကုန်ကျပါစေ၊ ဒီနည်းပညာ တိုးတက်အောင် တွန်းအားပေးကြမှာ မဟုတ်လား..."

ပရော်ဖက်ဆာ ဒတ်ချ်တိုသည် ယဲ့ဖန်၊ ရွှယ်လီ နှင့် ကျန်လူများအတွက် ကော်ဖီကို ငှဲ့ပေးလိုက်ရင်း... ခေါင်းကို တစ်ဖန် ပြန်လည် ခါယမ်းလိုက်ပြန်တော့သည်။

"မင်းရဲ့ ယူဆချက်က တစ်စိတ်တစ်ပိုင်းတော့ မှန်ပါတယ်... ဒါပေမယ့် နောက်ဆုံး ရလဒ်ကတော့ လုံးဝကို လွဲချော်နေတယ်ဗျ..."

---

အခန်း (၁၉၃၄) - မျက်စိပွင့်သွားစေသော အမှန်တရား

~"ဟင်..."

ယဲ့ဖန် အနည်းငယ် အံ့အားသင့်သွားရလေသည်။

သူ နားလည်ထားသလောက် ဆိုလျှင်... မည်သည့် အာဏာပိုင် အဖွဲ့အစည်းမဆို ဤမျှ အစွမ်းထက်သော မျိုးရိုးဗီဇ စစ်သည်တော်များကို ရယူလိုကြမည်မှာ အမှန်ပင် ဖြစ်ချေသည်။

ပရော်ဖက်ဆာ ဒတ်ချ်တိုသည် ယဲ့ဖန်အား ကော်ဖီကို မြည်းစမ်းရန် လက်ဟန်ပြလိုက်ပြီးမှ... ရှင်းပြတော့၏။

"အကြောင်းကတော့... မျိုးရိုးဗီဇ စစ်သည်တော်များ ပြုပြင်တဲ့ နည်းပညာမှာ... အစကတည်းက မြင်မရတဲ့ ကန့်သတ်ချက် တစ်ခု ရှိနေလို့ပဲ... အသက် (၄၀) ကျော်သွားတဲ့ လူတွေကို C-အဆင့်ထက် မြင့်တဲ့ စစ်သည်တော်တွေ ဖြစ်အောင် ပြုပြင်ဖို့ ဆိုတာကတော့... အင်မတန်မှပဲ ခက်ခဲလှပါတယ်..."

"မျိုးရိုးဗီဇ စစ်သည်တော်တွေတင် မကပါဘူး... ဆေးပညာ နယ်ပယ်က မျိုးရိုးဗီဇ နည်းပညာ အတော်များများကလည်း... အသက်အရွယ် ကြီးရင့်သူတွေအပေါ်မှာ သုံးလို့ မရတော့ပါဘူး..."

"အကြောင်းကတော့... ၏ောလူသားတစ်ယောက်ဟာ အသက်အရွယ် တစ်ခုကို ရောက်ရှိသွားတဲ့အခါ၊ ခန္ဓာကိုယ်ထဲက ဆဲလ်တွေရဲ့ ပြောင်းလဲမှုနဲ့ မျိုးရိုးဗီဇတွေရဲ့ ဖော်ပြနိုင်စွမ်းက... အလိုလိုပဲ ဖိနှိပ်ခံလိုက်ရလို့ပဲကွ... ငါတို့ဘက်က နည်းပညာနဲ့ ဘယ်လောက်ပဲ အတင်းအကျပ် တွန်းအားပေးပါစေ... နောက်ဆုံး ရလဒ်ကတော့ အရမ်းကို အားနည်းနေဦးမှာပါပဲ..."

ယဲ့ဖန် ထိုစကားကို ကြားသောအခါ အချက်အလက်များစွာကို သဘောပေါက်လိုက်မိတော့သည်။

'အင်း... ဒါဆိုရင် အသက်ကြီးတဲ့လူတွေက ဒီနည်းပညာရဲ့ အကျိုးကျေးဇူးကို မခံစားရဘူးပေါ့။'

လက်ရှိတွင် ဩဇာအာဏာ ရှိနေသူများနှင့် နာမည်ကျော်ကြားသူ အများစုမှာ အသက်အရွယ် ကြီးရင့်သူများသာ ဖြစ်ကြသည် မဟုတ်ပါလော။

ဤနည်းပညာသည် ထို အာဏာရှိသူများအဖို့တော့... ၎င်းတို့ကို ပြုပြင် ပြောင်းလဲထားသော လူများ၏ သစ္စာရှိမှုကို အာမခံချက် မပေးနိုင်သရွေ့... ကြီးမားလှသော ခြိမ်းခြောက်မှုကြီး တစ်ခုသာ ဖြစ်နေတော့သည်။

ဘာပဲဖြစ်ဖြစ်... အတွင်းအား အထွတ်အထိပ် ရောက်နေသော စစ်သည်တော် တစ်ဦးကို... သာမန် ကိုယ်ရံတော်များ သို့မဟုတ် လုံခြုံရေး ကိရိယာများဖြင့် ကာကွယ်နိုင်ရန်မှာ မလွယ်ကူလှပေ။

အကယ်၍သာ၊ ထို ပြုပြင် ပြောင်းလဲထားသည့် သူတွေက... သစ္စာဖောက်သွားမည် ဆိုလျှင်တော့... အရင်ဆုံး အန္တရာယ် ကြုံရမည့် သူတွေက

ထို အာဏာရှိသူတွေပဲ မဟုတ်ပါလော။

"အဲ့ဒီအတွက်ကြောင့်ပဲ... ထိပ်တန်း မျိုးရိုးဗီဇ ပြုပြင်မှု နည်းပညာတွေကို အင်အားကြီး နိုင်ငံတွေက ပံ့ပိုးပေးရမယ့်အစား... တစ်ဖက်ကနေ ပြန်ပြီး ဖိနှိပ်ချုပ်ချယ်

နေကြတာပေါ့လေ..."

ပရော်ဖက်ဆာ ဒတ်ချ်တိုသည် ကော်ဖီကို တစ်ငုံ သောက်လိုက်ရင်း လက်ရှိ အခြေအနေကို ယဲ့ဖန်အား ရှင်းပြလေ၏။

"ဒါပေါ့... ဒါက ယေဘုယျ ပြောပြတာပါ... အမှန်တကယ်တော့ အင်အားကြီး နိုင်ငံတွေရဲ့ အတွင်းပိုင်းမှာလည်း သဘောထားတွေက ကွဲပြားနေကြတာပဲလေ... နိုင်ငံတော် အဆင့်အနေနဲ့ ဖိနှိပ်နေပေမယ့်လည်း... လူတစ်ချို့ကတော့ တခြား အတွေးတွေ ရှိနေတတ်ကြတယ်..."

"ဥပမာ ပြောရရင်... တို့ လေးဖို့ဒ် အင်စတီကျု မှာလည်း အင်အားကြီး နိုင်ငံတွေက လာတဲ့ ဖောက်သည်ကြီးတွေ အများကြီး ရှိပါတယ်... သူတို့ရဲ့ ပံ့ပိုးမှုတွေနဲ့၊ တချို့သော အဖွဲ့အစည်းတွေရဲ့ စီးပွားဖြစ် ထောက်ပံ့မှုတွေသာ မရှိဘူး ဆိုရင်တော့... တို့တွေ ဒီနေ့အထိ ရပ်တည်နိုင်မှာ မဟုတ်သလို၊ သုတေသနတွေကိုလည်း ဆက်ပြီး လုပ်နိုင်မှာ မဟုတ်ပါဘူး..."

ယဲ့ဖန်သည် ခပ်ဖွဖွ ခေါင်းညိတ်လိုက်ပြီးနောက်၊ သူ အစိတ်ဝင်စားဆုံးသော မေးခွန်းဆီသို့ ပြန်လည် လှည့်လိုက်လေသည်။

"ပရော်ဖက်ဆာ... ကျွန်တော် မူလ မေးခဲ့တဲ့ မေးခွန်းကိုတော့ မဖြေရသေးဘူးနော်... ပတ်ဝန်းကျင် အခြေအနေတွေကို ခဏ ဖယ်ထားလိုက်မယ် ဆိုရင်... A-အဆင့် မျိုးရိုးဗီဇ ပြုပြင်မှု အောင်မြင်ဖို့အတွက် Restrict ဖြစ်စေတဲ့ အဓိက အခက်အခဲတွေက ဘာတွေလဲခင်ဗျာ..."

"အိမ်း…မင်း မေးတဲ့ မေးခွန်းကတော့... ဒီ လုပ်ငန်းနယ်ပယ်ရဲ့ အကြီးမားဆုံး လျှို့ဝှက်ချက် တစ်ခုပဲကွ..."

သည်တစ်ကြိမ်တွင်၊ ပရော်ဖက်ဆာ ဒတ်ချ်တိုက ရှားရှားပါးပါးပင် ခပ်ရေးရေး ပြုံးလိုက်လေသည်။

"ပုံမှန်ဆိုရင်တော့ ဒီလို မေးခွန်းမျိုးကို 'စီးပွားရေး လျှို့ဝှက်ချက်' လို့ပဲ ဖြေရမှာပေါ့... ဒါပေမယ့် မင်းကတော့ လူစိမ်း မဟုတ်တော့ဘူးဆိုတော့... ငါ ခြွင်းချက်အနေနဲ့ ပြောပြပါ့မယ်..."

"အမှန်တရားကတော့... တို့တွေရဲ့ လူသားမျိုးရိုးဗီဇ ကုဒ်တွေအပေါ် နားလည်မှုက အခုထိ မပြည့်စုံသေးဘူး ဆိုတာပါပဲ... ဒီအဆင့်ရှိတဲ့ ပြုပြင်ပြောင်းလဲမှုတွေဟာ... ဖန်ဆင်းရှင်က အန်စာတုံး လှိမ့်လိုက်တာနဲ့ ဘာမှ မခြားလှပါဘူး... တို့တွေ လိုချင်တဲ့ ရလဒ် ရပါ့မလားဆိုတာ ဘယ်သူမှ အာမခံချက် မပေးနိုင်ဘူးလေ..."

ယဲ့ဖန်၏ မျက်ဝန်းအိမ်များ အနည်းငယ် လှုပ်ရှားသွားရ၏။

ပရော်ဖက်ဆာ ဒတ်ချ်တိုက ခေါင်းညိတ်ပြလျက် ဆက်ပြောလေသည်။

"A-အဆင့် မျိုးရိုးဗီဇ ပြုပြင်မှု တစ်ခုချင်းစီအတွက်... ခွဲစိတ်မှု ကုန်ကြမ်းတွေနဲ့ မျိုးရိုးဗီဇ ဆေးရည်တွေကို ပြင်ဆင်ရတဲ့ စရိတ်က... တကယ့်ကို ကောင်းကင်ဘုံက ကိန်းဂဏန်းတွေလိုပါပဲ... အရမ်းကို များပြားလွန်းလှပါတယ်..."

"တစ်ခါ ရှုံးနိမ့်သွားတိုင်း... အဲ့ဒီ ကုန်ကျစရိတ်တွေက ပိုပြီးတော့ များလာမှာပဲလေ..."

"ပြီးတော့ တို့တွေ စမ်းသပ်ကြည့်သလောက်တော့... လူတစ်ယောက်ဟာ ဒီလို မျိုးရိုးဗီဇ ပြုပြင်တာကို ရှုံးနိမ့်မှု ဘယ်နှစ်ကြိမ်အထိ တောင့်ခံနိုင်မလဲ ဆိုတဲ့ ကန့်သတ်ချက်လည်း ရှိနေသေးတယ်..."

"အဲ့ဒါကြောင့်ပဲ... ဒီအဆင့်ရှိတဲ့ နည်းပညာတွေဟာ ကုန်ကျစရိတ်ကိုလည်း မထိန်းချုပ်နိုင်သလို၊ ရလဒ်ကိုလည်း အာမခံချက် မပေးနိုင်ဘူး... အောင်မြင်မှုနှုန်း ဆိုတာကလည်း လုံးဝ မသေချာတဲ့ ကိစ္စပဲပေါ့ဗျာ..."

ယဲ့ဖန်အတွက်တော့ ဤသတင်းမှာ သတင်းကောင်းတစ်ခုပင် ဖြစ်ချေ၏။

‘ကုန်ကျစရိတ်ကိုလည်း မထိန်းနိုင်၊ ရလဒ်ကိုလည်း မသေချာ၊ အောင်မြင်မှုနှုန်းကလည်း မရှိဘူး ဆိုမှတော့... A-အဆင့် စစ်သည်တော်တွေကို အမြောက်အမြား ထုတ်လုပ်ဖို့ ဆိုတာကတော့... လက်ရှိ အခြေအနေမှာ လုံးဝ မဖြစ်နိုင်တဲ့ ကိစ္စပဲပေါ့။

ကိုယ်ခံပညာနဲ့ တိုက်ခိုက်ရေး လောကရဲ့ အုတ်မြစ်ကို ဖြိုဖျက်မယ့် နည်းပညာ တော်လှန်ရေးကြီးဟာ... အခုချက်ချင်းတော့ ရောက်လာဦးမှာ မဟုတ်သေးဘူးပေါ့လေ။’

သို့သော်လည်း သူက ဆက်လက် စပ်စုလိုက်ပြန်သည်။

"ဒါဆိုရင်... A-အဆင့်တောင်မှ မရင့်ကျက်သေးဘူး ဆိုရင်တော့... S-အဆင့် နဲ့ SS-အဆင့် မျိုးရိုးဗီဇ နည်းပညာတွေကရော... အခု ဘယ်အခြေအနေကို ရောက်နေပြီလဲခင်ဗျာ..."

"ပြီးတော့... A-အဆင့် စစ်သည်တော် တစ်ယောက်တောင် ဒီလောက် အစွမ်းထက်နေမှတော့... S-အဆင့် ဆိုတဲ့ တစ်ယောက်ရဲ့ တိုက်ခိုက်ရေး စွမ်းရည်က ဘယ်လောက်အထိ များ ရှိနေမလဲဗျ..."

---