အခန်း (၂၅)

အချိန်က တရွေ့ရွေ့ ကုန်ဆုံးသွားသည်။

ညကောင်းကင်ယံပေါ်မှာ လွင့်မျောနေသော တိမ်မည်းများက တိတ်တဆိတ် လွင့်ပြယ်သွားကြသည်။ လစန္ဒာသည် ကောင်းကင်ယံ၏ အလယ်ဗဟိုသို့ ရွေ့လျားသွားပြီး ထိန်ထိန်လင်းစွာ ထွန်းလင်းနေသည်။ သိမ်မွေ့သော လရောင်ခြည်အမျှင်တန်းများက ကမ္ဘာမြေပေါ်မှ အရာအားလုံးကို ဖုံးလွှမ်းထားသည်။ လရောင်ခြည်၏ ပွေ့ဖက်မှုအောက်မှာ နှင်းစက်များ ရွှဲစိုနေသော ပန်းပင်များက ဖြည်းဖြည်းချင်း ပွင့်လန်းလာကြသည်။ ဤသည်မှာ ထိုပန်းပင်များက လရောင်ခြည်၏ ကောင်းချီးပေးမှုကို လက်ခံနေကြသည့်အလားပင်။

တောင်ထွတ်ပေါ်မှ အဆက်မပြတ် စီးကျနေသော ရေတံခွန်သည် ငွေရောင်တလက်လက်ထနေ၏။

အနက်ရောင်မြူခိုးအလွှာတစ်ခုသည် တောင်ထွတ်ပေါ်မှ ကျောက်တုံးကြီးကို မသဲမကွဲ ဖုံးလွှမ်းထားသည်။ ကျောက်တုံးကြီး၏ ဘေးပတ်ပတ်လည်တွင် မရေမတွက်နိုင်သော ငွေရောင်အလင်းစက်များ စုဝေးရှိနေကြသည်။ ယင်းတို့က တစ်စုံတစ်ခု၏ ဆွဲဆောင်ခံထားရသည့်အလား အရပ်မျက်နှာအသီးသီးထံမှ ရောက်လာကြပြီး အနက်ရောင်မြူခိုးထဲသို့ အဆက်မပြတ် တိုးဝင်သွားနေကြသည်။ ငွေရောင်အလင်းက မြန်ဆန်စွာ သိပ်သည်းသွားပြီး ဘေးပတ်ဝန်းကျင်ကို ဖုံးလွှမ်းသွားသည်။ အဝေးမှကြည့်လျှင် ယင်းက ငွေရောင်အလင်းဘောလုံးနှင့် ဆင်တူပေသည်။

အနက်ရောင်မြူခိုးအလွှာနှင့် ငွေရောင်အလင်းဘောလုံးက အပြန်အလှန် ယှက်ထွေသွားသည့်အခါ အံ့ဖွယ်ကောင်းသော မြင်ကွင်းတစ်ခု ထွက်ပေါ်လာလေသည်။ ယင်းက လျှို့ဝှက်ဆန်းကြယ်သော ခံစားမှုကိုလည်း ပေး၏။

တစ်စုံတစ်ယောက်က လရောင်ခြည်၏ အကူအညီဖြင့် အနက်ရောင်မြူခိုးကို ကြည့်လျှင် ကျားနက်တစ်ကောင်က ကျောက်တုံးကြီးပေါ်မှာ တိတ်တဆိတ် လဲလျောင်းနေကြောင်း မြင်ရလိမ့်မည်။ ထိုကျားနက်၏ ခန္ဓာကိုယ်က အတော်လေး ကြီးမားသည်။ ၎င်းက မတ်တတ်မရပ်ဘဲ လဲလျောင်းနေသည့်တိုင် သာမန်ကျားတစ်ကောင်ထက် အများကြီး ပိုမြင့်မားနေဆဲပင်။ ၎င်း၏ ခန္ဓာကိုယ်အရွယ်အစားအရ အကယ်၍ ၎င်းသာ မတ်တတ်ရပ်မည်ဆိုလျှင် ၎င်းက တစ်မီတာခွဲခန့် မြင့်မားလိမ့်မည်။ တစ်ချက်ကြည့်ရုံဖြင့်ပင် ၎င်းက ဧရာမသားရဲတစ်ကောင်ဖြစ်ကြောင်း မည်သူမဆို ပြောနိုင်ပေသည်။

“ ဟူး ”

ကျားနက်က အသက်ရှူသွင်းရှူထုတ်ပြုလုပ်နေစဉ် အလွန်သိပ်သည်းသော ကျားရဲအရှိန်အဝါက အရပ်မျက်နှာအသီးသီးဆီသို့ အထိန်းအချုပ်မဲ့စွာ ပျံ့နှံ့သွားသည်။ ကျားရဲအရှိန်အဝါက အချင်းမီတာငါးရာကို အပြည့်အဝ ဖုံးလွှမ်းသွားသည်။ ဘေးပတ်ဝန်းကျင်မှ တိရိစ္ဆာန်များက ကြောက်လန့်တုန်ရီသွားကြပြီး အချင်းမီတာငါးရာအတွင်းမှ အမြန်ထွက်ပြေးသွားကြသည်။

ကံကောင်းစွာဖြင့် ဤဧရိယာထဲမှာ ငှက်အများကြီးနှင့် တိရိစ္ဆာန်အများကြီး မနေထိုင်ကြပေ။ သို့ဖြစ်၍ ကြောက်မက်ဖွယ်ကောင်းသော ကျားရဲအရှိန်အဝါက ကြီးမားသော ဆူပူအုံကြွမှုကို မဖြစ်စေပေ။

ကျားနက်၏ နဖူးပေါ်တွင် တမူထူးခြားသော ခရမ်းရောင် “ ဘုရင် ”စာလုံး ရှိသည်။ ကျားနက်၏ အရွယ်အစားက ပိုပြီးကြီးမားလာသည်နှင့်အမျှ “ ဘုရင် ”စာလုံးက ပိုပြီးကြီးမားလာသည်။ ထိုစာလုံးက လျှို့ဝှက်ဆန်းကြယ်သော မှော်ချိပ်တံဆိပ်တစ်ခုနှင့် ဆင်တူသည်။ ယင်းက အလွန်ထူးဆန်းသည်။ “ ဘုရင် ”စာလုံးထဲမှာ အထွတ်အမြတ်ဘုရင်ချီအမျိုးအစားတစ်ခု တည်ရှိနေသည်။ ထိုဘုရင်ချီက ကျားနက်၏ နဖူးပေါ်မှာ အစဉ်မပြတ် စီးဆင်းနေသည်။ ယင်းက ခြိမ်းခြောက်မှုအရှိန်အဝါကို ခပ်ဖျော့ဖျော့ ထုတ်လွှတ်နေသည်။

အသက်ရှူသွင်းရှူထုတ် ပြုလုပ်နေစဉ် ဘေးပတ်ဝန်းကျင်မှ မိုးမြေ၏ ဝိညာဉ်စွမ်းအားက သီရှီထျန်၏ ခန္ဓာကိုယ်ထဲသို့ အဆက်မပြတ် တိုးဝင်သွားနေသည်။ ဝိညာဉ်စွမ်းအားသည် သူ၏ ခန္ဓာကိုယ်ပေါ်မှ မရေမတွက်နိုင်သော မွေးညင်းပေါက်များမှတဆင့် မရီဒျန်များထဲသို့ ဖြတ်သန်းစီးဆင်းသွားနေသည်။ ယခု “ ကျားဟိန်းသံကျင့်စဉ် ”က သူ၏ ခန္ဓာကိုယ်ထဲမှာ အလိုအလျောက် လှည့်ပတ်နေသည်။

အကယ်၍ သီရှီထျန်သာ ယခုအချိန် နိုးနေမည်ဆိုလျှင် သူ၏ ခန္ဓာကိုယ်ထဲမှ မရီဒျန်အားလုံးက အပြန်အလှန် ချိတ်ဆက်နေကြပြီး စက်ဝိုင်းသဏ္ဍာန် ဖွဲ့စည်းနေကြောင်း ရှင်းလင်းစွာ သူအာရုံခံနိုင်လိမ့်မည်။ အစောနက ပိတ်ဆို့နေခဲ့သော သူ၏ အနောက်ခြေထောက်နှစ်ချောင်းထဲမှ မရီဒျန်များက ယခု ဖွင့်လှစ်သွားကြသည်။ အတားအဆီးမရှိတော့သည့်အခါ မိစ္ဆာစွမ်းအားက သူ၏ အနောက်ခြေထောက်နှစ်ချောင်းထဲမှ မရီဒျန်များထဲသို့ တသွင်သွင် စီးဆင်းသွားသည်။ ဤအခိုက်အတန့်မှာ မိစ္ဆာစွမ်းအားက မရီဒျန်အားလုံးထဲမှာ သူ့ဘာသာ အလိုအလျောက် စီးဆင်းသွားနေသည်။

မိစ္ဆာစွမ်းအားက စက်ဝိုင်းသဏ္ဍာန် တစ်ကြိမ်လှည့်ပတ်သွားတိုင်း အပြင်လောကထံမှ သူစုပ်ယူထားသော နေနှင့်လ၏ အနှစ်သာရနှင့် မိုးမြေကြားမှ ဝိညာဉ်စွမ်းအားက အလိုအလျောက် သန့်စင်သွားလိမ့်မည်။ ယခုအချိန်မှာ စွမ်းအင်သန့်စင်သော အလျင်က ယခင်ကထက် အဆပေါင်းများစွာ ပိုပြီးမြန်ဆန်လာ၏။ ထိုနှစ်ခုကြားမှ ကွာခြားမှုကို မနှိုင်းယှဉ်နိုင်ပေ။ စွမ်းအင်စုစည်းဆေးလုံးထံမှ ဝိညာဉ်စွမ်းအားသည်လည်း မြန်ဆန်စွာ သန့်စင်ခံလိုက်ရသည်။ ယင်းက အစောနကကဲ့သို့ မကြမ်းတမ်းတော့ပေ။ ယင်းက မိစ္ဆာစွမ်းအားအဖြစ် အလွယ်တကူ သန့်စင်ခံနေရ၏။

မိစ္ဆာစွမ်းအားကို သေချာစစ်ဆေးကြည့်လျှင် သူ၏ မရီဒျန်များထဲမှ မိစ္ဆာစွမ်းအားပမာဏက ယခင်ကထက် သိသိသာသာ လျော့နည်းသွားကြောင်း မြင်ရလိမ့်မည်။ သို့သော်လည်း အရွယ်အစားနှင့် သန့်စင်မှုပိုင်းတွင် ယင်းက ယခင်ကထက် အများကြီး ပိုသာလွန်ပေသည်။

တိတ်ဆိတ်နေသော လရောင်ခြည်အောက်မှာ အချိန်က တရွေ့ရွေ့ ကုန်လွန်သွားသည်။

လစန္ဒာက တဖြည်းဖြည်း စတင်နိမ့်ဆင်းသွားသည်။

ကျားနက်၏ ဘေးပတ်ဝန်းကျင်မှ အနက်ရောင်မြူခိုးထုသည် ဝေလငါး ရေစုပ်သကဲ့သို့ စုပ်ယူခံလိုက်ရလေသည်။ ယင်းက ကျားနက်၏ မွေးညင်းပေါက် တစ်သိန်းရှစ်ထောင်ထဲသို့ ဒလဟော တိုးဝင်သွားသည်။ နေနှင့်လ၏ အနှစ်သာရသည် သူ၏ ခန္ဓာကိုယ်ထဲသို့ အကုန်ဝင်ရောက်သွားပြီးနောက် နောက်တစ်ကြိမ် မစုဝေးသွားတော့ပေ။

သီရှီထျန်သည် ဖြည်းဖြည်းချင်း မျက်လုံးပြန်ဖွင့်လိုက်သည်။

ရင်းနှီးကျွမ်းဝင်သော ပတ်ဝန်းကျင်က သူ၏ အရှေ့မှာ ထွက်ပေါ်လာသည်။

ယင်းကို မြင်သောအခါ သီရှီထျန်က ရုတ်ချည်း မတ်တတ်ရပ်လိုက်သည်။

“ ငါမသေဘူး… ငါအသက်ရှင်နေသေးတယ် ”

ဖော်မပြနိုင်သော ဝမ်းသာပျော်ရွှင်မှုက သီရှီထျန်၏ နှလုံးသားထဲမှာ ထွက်ပေါ်လာသည်။ သူသတိမမေ့သွားမီ အတားအဆီးကို ချိုးဖြတ်ရန် နောက်ဆုံးအကြိမ် သူကြိုးစားခဲ့ကြောင်းသာ မှတ်မိသည်။ ယင်းက သူ၏ မျှော်လင့်ချက်အားလုံးပါဝင်သော နောက်ဆုံးအကြိမ် တိုက်ခိုက်မှုလည်း ဖြစ်သည်။ ထိုအချိန်တွင် သူက သူ့ခန္ဓာကိုယ်ထဲမှ စွမ်းအားအားလုံးကို ထိုတိုက်ခိုက်မှုထဲမှာ ထည့်သွင်းခဲ့သည်။

ထိုတိုက်ခိုက်မှုက အတားအဆီးပေါ်သို့ ကျရောက်သွားသည့်အခါ ကြီးမားသော သက်ရောက်မှု ထွက်ပေါ်လာသည်။ ယင်းက သူ၏ ခန္ဓာကိုယ်ကို အပြင်းအထန် တုန်ယင်စေပြီး သူ့ကို သတိမေ့မြောစေသည်။ ထိုနောက်ပိုင်းတွင် မည်သို့ဖြစ်ပျက်ခဲ့ကြောင်း သူမသိပေ။

သီရှီထျန်သည် အလွန်ပျော်ရွှင်နေသော်လည်း သူ၏ ခန္ဓာကိုယ်ကို စစ်ဆေးကြည့်ရန် မမေ့ပေ။ သူက နောက်ထပ် တုံ့ဆိုင်းမနေဘဲ သူ၏ မျက်လုံးကို မြန်ဆန်စွာ မှိတ်လိုက်သည်။ သူက စိတ်အာရုံကို သူ၏ ခန္ဓာကိုယ်ထဲသို့ စေလွှတ်လိုက်ပြီး သူ့ခန္ဓာကိုယ်၏ အခြေအနေကို အာရုံစိုက်လိုက်သည်။ သူက အတိတ်ဘဝတွင် လူသားဖြစ်ခဲ့ပြီး ယခု ပြန်လည်မွေးဖွားလာလေရာ သာမန်တိရိစ္ဆာန်များဆီမှာ မရှိသော စိတ်စွမ်းအားကို ပိုင်ဆိုင်ထားပေသည်။ အထူးသဖြင့် ကျင့်ကြံပြီးနောက်ပိုင်းမှာ သူ၏ စိတ်စွမ်းအားက ဖြည်းဖြည်းချင်း ပြောင်းလဲသွားသည်။ ယင်းက လျှို့ဝှက်ဆန်းကြယ်သော စွမ်းအားတစ်မျိုးဖြစ်ကြောင်း သူအာရုံခံနိုင်၏။

ထိုသို့စွမ်းအားကို မသေမျိုးကျင့်ကြံခြင်းလောကတွင် စိတ်စွမ်းအား၊ စိတ်ဝိညာဉ်အာရုံ သို့မဟုတ် နတ်ဘုရားစိတ်အာရုံဟု ခေါ်ကြသည်။

မိစ္ဆာမျိုးနွယ်စုတွင် ယင်းကို မိစ္ဆာအာရုံဟု ခေါ်ကြသည်။

အရိုးသားဆုံးဆိုရလျှင် ယင်းက နာမည်သာ ကွဲပြားသွားခြင်း ဖြစ်၏။ ကြီးမားသော တခြားမည်သည့်ခြားနားချက်မှ မရှိပေ။ ဤအခိုက်အတန့်မှာ သီရှီထျန်က သူ၏ မိစ္ဆာအာရုံကို အပြည့်အဝ ထုတ်လွှတ်လိုက်မည်ဆိုလျှင် အချင်းတစ်မိုင်အတွင်းမှ အရာအားလုံးကို ရှင်းလင်းစွာ သူမြင်နိုင်လိမ့်မည်။

မိစ္ဆာအာရုံဖြင့်ဆိုလျှင် သူမျက်စိမှိတ်ထားလျှင်ပင် သူ၏ ဘေးပတ်ပတ်လည်မှ အရာအားလုံးကို သူ့မျက်စိဖြင့် မြင်နေရသကဲ့သို့ ရှင်းလင်းစွာ သူအာရုံခံနိုင်လိမ့်မည်။ ထို့ပြင် မြင်ကွင်းအများစုက ယခင်ကနှင့် အနည်းငယ် မတူညီတော့ကြောင်း သူမြင်နိုင်သည်။ ယင်းက အလွန်အံ့ဖွယ်ကောင်း၏။

ယခု သူက မိစ္ဆာအာရုံကို အသုံးပြု၍ သူ၏ ခန္ဓာကိုယ်ထဲမှ အခြေအနေကို စစ်ဆေးကြည့်လိုက်သည်။

ချက်ချင်းဆိုသလိုပင် သူ၏ ခန္ဓာကိုယ်ထဲမှ အပြောင်းအလဲများကို သီရှီထျန် မြင်တွေ့သွားသည်။ သူက ဖော်မပြနိုင်အောင် စိတ်လှုပ်ရှားသွားသည်။ ယခု သူ၏ ခန္ဓာကိုယ်ထဲမှ မရီဒျန်အားလုံး ဖွင့်လှစ်သွားပြီ ဖြစ်၏။ ယခု မိစ္ဆာစွမ်းအားသည် သူ၏ ခန္ဓာကိုယ်ထဲ၌ မည်သည့်အတားအဆီးမှ မတွေ့ကြုံတော့ဘဲ တသွင်သွင် စီးဆင်းသွားနေသည်။ မရီဒျန်အားလုံးက တစ်ခုတည်းအဖြစ် ချိတ်ဆက်သွားကြသည်။

ယခု သူသည် “ ကျားဟိန်းသံကျင့်စဉ် ”ကို လှည့်ပတ်ပေးရန် မလိုတော့ပေ။ ကျင့်စဉ်က သူ၏ ခန္ဓာကိုယ်ထဲမှာ အလိုအလျောက် လှည့်ပတ်နေလိမ့်မည်။ ကျင့်စဉ်လှည့်ပတ်နေသည့် အလျင်က သူကိုယ်တိုင် ကျင့်စဉ်ကို လှည့်ပတ်ခြင်းကဲ့သို့ မမြန်ဆန်သော်လည်း ယင်းက မိစ္ဆာစွမ်းအားအနည်းငယ်ကို တိုးမြှင့်ပေးနိုင်ဆဲပင်။ သို့ဖြစ်၍ တစ်ပတ်ပြည့်အောင် လှည့်ပတ်သွားသည့်အခါတိုင်း သူ၏ မိစ္ဆာစွမ်းအားက ပမာဏအနည်းငယ် တိုးပွားသွားလိမ့်မည်။

သူက ခန္ဓာကိုယ်ကို လှုပ်ရှားလိုက်သည်။

“ ခရက်… ဂျွတ်… ”

ကြွပ်ဆပ်သော အရိုးအဆစ်မြည်သံများက သူ၏ ခန္ဓာကိုယ်တစ်ခုလုံးမှ ထွက်ပေါ်လာသည်။ ဤသည်မှာ ပြောင်းဖူးစေ့များက မီးအပူပေးခံနေရသည့်အလားပင်။ အရိုးအဆစ်မြည်သံများ ထွက်ပေါ်လာနေစဉ် ဖော်မပြနိုင်သော သက်တောင့်သက်သာရှိမှုက သူ၏ ခန္ဓာကိုယ်တစ်ခုလုံးဆီသို့ ပျံ့နှံ့သွားသည်။ သန်စွမ်းသော စိတ်ခံစားမှုက သူ၏ နှလုံးသားထဲမှာ ချက်ချင်း ထွက်ပေါ်လာသည်။

ဤအခိုက်အတန့်မှာ သူ့ခန္ဓာကိုယ်ထဲမှ တစ်စုံတစ်ခုက သူ့အား ကောင်းကင်ကို မျက်နှာမူ၍ ပါးစပ်ဟကာ ကျယ်လောင်စွာ ဟိန်းဟောက်ရန် တိုက်တွန်းနေ၏။

“ ငါ့ရဲ့ ခန္ဓာကိုယ်ထဲက မရီဒျန်အားလုံးက အပြန်အလှန် ချိတ်ဆက်သွားကြပြီ… အဲ့ဒါက ‘ ကျားဟိန်းသံကျင့်စဉ် ’ရဲ့ တတိယအဆင့်ကို ငါတတ်လှမ်းသွားပြီဆိုတဲ့ လက္ခဏာပဲ… နောက်ဆုံးတော့ ငါအဆင့်ချိုးဖြတ်နိုင်သွားပြီ ”

သီရှီထျန်သည် သူ၏ နှလုံးသားထဲမှ စိတ်လှုပ်ရှားမှုကို အတင်းအကျပ် ဖိနှိပ်လိုက်ပြီး တွေးတောလိုက်သည်။

“ တတိယအဆင့်နဲ့ စတုတ္ထအဆင့်ကြားမှာ ပိုပြီးကြီးမားတဲ့ အတားအဆီးရှိတယ်… အခု ငါက အဆင့်ချိုးဖြတ်သွားပြီဆိုပေမဲ့ စတုတ္ထအဆင့်ကို မတတ်လှမ်းခင် ငါ့ရဲ့ မရီဒျန်တွေထဲမှာ မိစ္ဆာစွမ်းအားတွေ အကန့်အသတ်မဲ့ ပြည့်လျှံနေအောင်လို့ အရင်လုပ်ရမယ်… အဲ့ဒီအတွက် အချိန်အများကြီး လိုအပ်လိမ့်မယ်… နေနဲ့လရဲ့ အနှစ်သာရကို စုပ်ယူပြီး စွမ်းအင်စုစည်းဆေးလုံးကို နေ့တိုင်း ငါမှီဝဲမယ်ဆိုရင် တတိယအဆင့်ကို ပြီးပြည့်စုံအောင် ကျင့်ကြံနိုင်လိမ့်မယ်… အဲ့ဒီနောက် မိစ္ဆာစံအိမ်ကို ဖွင့်လှစ်ဖို့ ငါစဉ်းစားရမယ် ”

“ ကျားဟိန်းသံကျင့်စဉ် ”၏ တတိယအဆင့်ကို ချိုးဖြတ်နိုင်သွားသည့်အတွက် လွန်စွာ သူပျော်ရွှင်သော်လည်း ယင်းက သူ၏ မိစ္ဆာလမ်းစဉ်အတွက် အစသာ ရှိသေးကြောင်း သီရှီထျန် ကောင်းကောင်း နားလည်သည်။ လက်ရှိ သူက မိစ္ဆာကျင့်ကြံသူတစ်ယောက်ပင် မဟုတ်သေးပေ။ မိစ္ဆာစံအိမ်ကို ဖွင့်လှစ်ပြီး စတုတ္ထအဆင့်သို့ သူချိုးဖြတ်နိုင်သည့်အခါမှ သူက စစ်မှန်သော မိစ္ဆာကျင့်ကြံသူတစ်ယောက် ဖြစ်လာလိမ့်မည်။ ထိုအချိန်ကျလျှင် သူက မိစ္ဆာသားရဲတစ်ကောင် ဖြစ်လာလိမ့်မည်။

သီရှီထျန်သည် ကျောက်တုံးကြီးပေါ်မှ ခုန်ဆင်းလိုက်သည်။

သူက ကျောက်တုံးကြီးထံသို့ လှည့်ကြည့်လိုက်သည့်အခါ စိတ်ရှုပ်ထွေးသော အရိပ်အယောင်က သူ၏ မျက်လုံးထဲမှာ ထွက်ပေါ်လာသည်။ အရိုးသားဆုံးဝန်ခံရလျှင် ထိုကျောက်တုံးကြီးဆီမှာ မည်သည့်လျှို့ဝှက်ချက် တည်ရှိနေကြောင်း အလွန် သူသိချင်သည်။ မည်သို့ဖြစ်ပါစေ အရေးကြီးသည့်အချိန်တိုင်းမှာ ထိုကျောက်တုံးကြီးက သူ့ကို ခဏခဏ ကူညီပေးခဲ့သည်။

“ တတိယအဆင့်ကို ငါချိုးဖြတ်သွားပြီဆိုတော့ အဲ့ဒီကျောက်တုံးကြီးကို အခု ငါဖြိုချပစ်နိုင်ပြီလား စမ်းသပ်ကြည့်ရမယ်… ဒီအခွင့်အရေးကို ကောင်းကောင်း အသုံးချပြီး အဲ့ဒီကျောက်တုံးကြီးထဲမှာ ဘယ်လိုအံ့ဖွယ်ရတနာ ပုန်းကွယ်နေလဲ ငါကြည့်မယ်… "

သီရှီထျန်သည် ကျောက်တုံးကြီးကို ကြည့်နေရင်း သူ၏ ခန္ဓာကိုယ်ထဲမှာ မိစ္ဆာစွမ်းအားက အဆုံးမဲ့စွာ စီးဆင်းနေကြောင်း အာရုံခံမိသွားသည်။ ယခင်ကနှင့် နှိုင်းယှဉ်လျှင် သူ၏ မိစ္ဆာစွမ်းအားက အရည်အသွေးတွင်ဖြစ်စေ ပမာဏတွင်ဖြစ်စေ အများကြီး ပိုတိုးမြှင့်သွားသည်။ ယင်းက အလွန်ကြီးမားသော ပြောင်းလဲမှု ဖြစ်၏။ အသစ်တိုးပွားလာသော ခွန်အားကြောင့် သူက ကျောက်တုံးကြီးကို ဖြိုချပစ်ရန် ဆန္ဒရှိလာသည်။ ထိုအတွေးသည် ထွက်ပေါ်လာသည်နှင့်ချက်ချင်း သူ၏ စိတ်ထဲမှာ အမြစ်တွယ်သွားသည်။