မြောက်ပိုင်းဒေသမှ ထွက်ပြေးခြင်း

တစ်ချိန်တည်းမှာပင်...

နှင်းတောင်တန်းတစ်သိန်းတွင်...

တောင်ထိပ်တစ်ခုပေါ်၌ အစိမ်းရောင်ဝတ်ရုံ ဝတ်ဆင်ထားသော လူလတ်ပိုင်းအရွယ် အမျိုးသားတစ်ဦး ရှိနေသည်။ သူ၏မျက်နှာသည် ဖြူဖျော့နေပြီး နဖူးပေါ်တွင် ချွေးစေးများ သီးနေကာ ရှင်းပြ၍မရနိုင်သော ကြောက်ရွံ့မှုတစ်ခုက သူ့အား လွှမ်းမိုးထားပေ၏။

ဤလူသည် မြောက်ပိုင်းနတ်ဆိုးလှိုဏ်ဂူရှိ အစိမ်းရောင်နတ်ဆိုးမျိုးနွယ်မှ အစိမ်းရောင်နတ်ဆိုးခေါင်းဆောင် ဝမ်ချန်ပင်။

အစောပိုင်းက နတ်ဆိုးစစ်သူကြီးဆယ့်နှစ်ဦးသည် မိုးကောင်းကင်ယံတွင် စိတ်လွတ်ကိုယ်လွတ် ပျံသန်းနေခဲ့ကြသဖြင့် သူ၏စိတ်အာရုံကို ဖမ်းစားသွားခဲ့သည်။ ထိုနတ်ဆိုးစစ်သူကြီးဆယ့်နှစ်ဦးသည် အလွန်အားနည်းပုံရပြီး ရှားပါးသော ကောင်းကင်ဘုံရတနာတချို့ကို မတော်တဆ စားသုံးမိပြီးမှ အသိဉာဏ် ရရှိလာသော သာမန်မွေးမြူရေးတိရစ္ဆာန်များနှင့် အလွန်အမင်း တူညီနေသည်။

ယေဘုယျအားဖြင့် ပြောဆိုရလျှင် သာမန်အချိန်များတွင် ထိုကဲ့သို့ သတ္တဝါများ ထွပ်ပေါ်လာပါက သူသည် တစ်ချက်ပင် လှည့်ကြည့်မိမည် မဟုတ်ချေ။ သို့သော် ယခုကဲ့သို့ အထူးကာလတွင် နှင်းလွင်ပြင်၌ သောင်းနှင့်ချီသော ထိပ်သီးကျင့်ကြံသူများ စုဝေးနေကြသည်။

အစွမ်းထက်သော ပုဂ္ဂိုလ်အများစုသည် သူတို့၏အရှိန်အဝါကို ဖုံးကွယ်ထားနိုင်သော်လည်း ထိပ်သီးကျင့်ကြံသူ အမြောက်အများ၏ အသက်စွမ်းအားများ ဤနေရာ၌ စုစည်းနေသည်။ ထိုကြောင့် နတ်ဆိုးဘုရင်များပင်လျှင် ဤနေရာသို့ ချဉ်းကပ်လာဝံ့ခြင်း မရှိလေရာ နတ်ဆိုးငယ်လေးများကို ဆိုဖွယ်ရာပင် မရှိချေ။

သို့သော် ဤနတ်ဆိုးငယ်လေးများသည် ထိုဖိအားလွှမ်းမိုးမှုကို လျစ်လျူရှုပြီး လွတ်လပ်စွာ ပျံသန်းနေကြသည်။ ဤပုံမှန်မဟုတ်သော ဖြစ်ရပ်သည် သူ၏စိတ်အာရုံကို ဖမ်းစားနိုင်ခဲ့ပေ၏။ ဤ နတ်ဆိုးငယ်ဆယ့်နှစ်ကောင်သည် ရိုးရှင်းခြင်း မရှိကြောင်း သူ ဝိုးတဝါး ခံစားမိသည်။

ထို့နောက် သူသည် စိတ်ဝိညာဉ်ခန္ဓာကိုယ်တစ်ခုကို ခွဲထုတ်ပြီး နတ်ဆိုးစစ်သူကြီးဆယ့်နှစ်ဦး၏နောက်သို့ တိတ်တဆိတ် လိုက်ပါသွားခဲ့သည်။

မျှော်လင့်ထားသည့်အတိုင်း....

နတ်ဆိုးစစ်သူကြီးဆယ့်နှစ်ဦး၏ နောက်ဆက်တွဲ လုပ်ရပ်များသည် သူ၏လောကအမြင်ကို လုံးလုံးလျားလျား ပြောင်းလဲသွားစေခဲ့သည်။ သူတို့သည် ယန်သုံးပါးနယ်ပယ် ဒုတိယအဆင့် ထိပ်သီးကျင့်ကြံသူနှစ်ဦးကို သူတို့၏အစာအဖြစ် သတ်မှတ်ခဲ့ကြသည်။

သူ့ကို ပို၍ထိတ်လန့်တုန်လှုပ်စေသည်မှာ ထိုယန်သုံးပါးနယ်ပယ် ဒုတိယအဆင့် ထိပ်သီးကျင့်ကြံသူနှစ်ဦးသည် ယခင်က မြောက်ပိုင်းနတ်ဆိုးလှိုဏ်ဂူ၏ချေမှုန်းခြင်းကို ခံခဲ့ရသော အပြာရောင်နတ်ဆိုးမျိုးနွယ်တွင် အမှုထမ်းခဲ့သည့် အပြာရောင်နတ်ဆိုးတမန်တော်နှစ်ပါး ဖြစ်နေခြင်းပင်။

ထို့နောက် သူ ပို၍ပင် မျှော်လင့်မထားမိသော မြင်ကွင်းတစ်ခု ထပ်မံ၍ ပေါ်ပေါက်လာခဲ့ပေ၏။ ဂုဏ်သရေရှိသော ယန်သုံးပါးနယ်ပယ် ဒုတိယအဆင့် ထိပ်သီးကျင့်ကြံသူနှစ်ဦးသည် ထို မွေးမြူရေးတိရစ္ဆာန်အုပ်စုနှင့် ယှဉ်ပြိုင်ရာတွင် ပြိုင်ဘက်မဟုတ်ခဲ့ချေ။

ဒါတွေက ဘယ်လို ထူးဆန်းတဲ့ သတ္တဝါတွေလဲ...

ဝမ်ချန်သည် ကြီးမားသော မုန်တိုင်းများစွာကို ကြုံတွေ့ခဲ့ဖူးသည်ဟု သူ့ကိုယ်သူ အစဥ်အမြဲ ဂုဏ်ယူခဲ့သည်။ သို့ရာတွင် မြေကမ္ဘာနွားနတ်ဆိုး မိုးပြာနဂါးမြင်းနှင့် သာမန်ဟု ထင်ရသော မွေးမြူရေး တိရစ္ဆာန်တစ်အုပ် ရက်စက်စွာ တိုက်ခိုက်နေကြသည်ကို မြင်လိုက်ရခြင်းက သူ၏လောကအမြင်ကို အသစ်ဖြစ်စေဆဲပင်။

ထို့နောက်တွင် စာခြောက်ရုပ် ထွက်ပေါ်လာခဲ့သည်။

စာခြောက်ရုပ်သည် အပြာရောင်နတ်ဆိုးတမန်တော်နှစ်ပါး ထွက်ပြေးရန်အတွက် ဖန်တီးထားသော အကြောင်းပြချက်တစ်ခုသာ ဖြစ်သည်ဟု သူ မူလက ထင်မှတ်ထားခဲ့သည်။ သို့ရာတွင် စာခြောက်ရုပ်က ထိုမွေးမြူရေး တိရစ္ဆာန်ဆယ့်နှစ်ကောင်ကို ချက်ချင်းနှိမ်နင်းလိုက်သည်အား သူ မြင်တွေ့မိပေ၏။

ဤအရာက သူ့ကို ထပ်မံ၍ တုန်လှုပ်ချောက်ချားစေသည်။

ထူးခြားမှုရှိပုံမရသော ဤစာခြောက်ရုပ်သည် အမှန်တကယ်ကို ကြောက်မက်ဖွယ်ကောင်းသော တည်ရှိမှုတစ်ခု ဖြစ်နေသလော...

သို့သော် စာခြောက်ရုပ်၏စွမ်းအားကြောင့် ထိတ်လန့်တုန်လှုပ်ရန် သူ့ထံတွင် အချိန်မရှိခဲ့ပေ။ နောက်ထပ်မြင်တွေ့ရသော မြင်ကွင်းက သူ့ကို ပို၍ပင်မယုံကြည်နိုင်အောင် ဖြစ်စေခဲ့သည်။

အကြောင်းအရင်းမှာ စာခြောက်ရုပ်သည် နောက်ကွယ်မှ အသန်မာဆုံး တည်ရှိမှု ဖြစ်သည်ဟု သူ တွေးထင်နေချိန်တွင်...

ဤအချိန်အခိုက်အတန့်၌ တခြားလူငယ်တစ်ဦး ထွက်ပေါ်လာခဲ့သည်။ ထို့ပြင် စာခြောက်ရုပ်သည် ထိုလူငယ်လေး၏ အစေခံတစ်ယောက်သာ ဖြစ်နေပေ၏။

ဤအရာက သူ့ကို ပြောစရာ စကားမရှိလောက်အောင် အံ့အားသင့်သွားစေခဲ့သည်။ ကြီးမားသော လှိုင်းတံပိုးများက သူ့အပေါ်သို့ တစ်ခုပြီးတစ်ခု ရိုက်ခတ်နေသကဲ့သို့ဖြစ်ပြီး သူ့ကို အသက်ရှူမှားစေခဲ့သည်။

တစ်ချိန်တည်းမှာပင် ဝမ်ချန်သည် ကျုံးချင်နှင့် စာခြောက်ရုပ်၏စကားဝိုင်းရှိ အသေးစိတ် အချက်အလက်များမှတဆင့် အရာများစွာကို နားလည်သဘောပေါက်လိုက်သည်။

ပထမဦးစွာ နတ်ဆိုးမြို့တော် ပေါ်ထွက်လာခြင်းသည် ဤလူငယ်နှင့် ခွဲခြား၍မရအောင် ဆက်စပ်နေပေလိမ့်မည်။ သူ၏ လုပ်ရပ်များသည် ပိုင်လင်း အမွေအနှစ်ကို ရရှိစေရန်အတွက် ဖြစ်ကြောင်းကိုပင် သူ ဝိုးတဝါး ခံစားမိသည်။

ဤသတင်းသည် သူ၏မျက်နှာကို စိမ်းဖန့်သွားစေပြီးနောက် ဖြူဖျော့သွားစေခဲ့သည်။

တစ်ချိန်တည်းမှာပင် ယခင်က ပိုင်လင်းကို စောင့်ရှောက်ပေးခဲ့ပြီး သူတို့၏မြောက်ပိုင်းနတ်ဆိုးလှိုဏ်ဂူကို အကြီးအကျယ် ဆုံးရှုံးစေခဲ့သူများသည် အပြာရောင်နတ်ဆိုးမျိုးနွယ် လုံးဝ မဟုတ်ကြောင်းကိုလည်း သူ နားလည်သဘောပေါက်လိုက်၏။ ထိုအစား ဤလူငယ်နှင့်စာခြောက်ရုပ်သာ ဖြစ်နေခဲ့သည်။

ဆိုလိုသည်မှာ အပြာရောင်နတ်ဆိုးမျိုးနွယ်သည် မှားယွင်းစွာ စွပ်စွဲခံခဲ့ရပြီး သူတို့၏ပျက်သုဉ်းမှုကို ဖြစ်စေခဲ့ခြင်းပင်။

ဤအရာကို နားလည်သဘောပေါက်ပြီးနောက် ဝမ်ချန် စိတ်မကောင်း ဖြစ်သွားခဲ့သည်။ အလွန်အစွမ်းထက်သော မြောက်ပိုင်းနတ်ဆိုးလှိုဏ်ဂူသည် နားလည်မှုလွဲမှားခြင်းတစ်ခုကြောင့် ဂိုဏ်းမှမျိုးနွယ်စုတစ်စုကို အမြစ်ပြတ်သုတ်သင်ခဲ့မိသည်။

စဉ်းစားကြည့်ရုံဖြင့် ဝမ်ချန်သည် အပြာရောင်နတ်ဆိုးမျိုးနွယ်ကိုယ်စား နာကြည်းမှုကို ခံစားလိုက်ရသည်။

ထိုစဉ်က အဖြူရောင်နတ်ဆိုးမျိုးနွယ် ချေမှုန်းခံရသော်လည်း သူတို့၏အခြေအနေသည် သဘာဝကျမှု အနည်းငယ်ရှိခဲ့သည်။ အကြောင်းအရင်းမှာ လောကကြီးကို ထိတ်လန့်တုန်လှုပ်စေသော ပါရမီရှင်တစ်ဦး ထွက်ပေါ်လာခြင်းက မျိုးနွယ်စုအမြောက်အများ၏ မနာလိုမှုကို ဖြစ်ပေါ်စေခဲ့သဖြင့် သူတို့ကို ဖယ်ရှားရန် ပူးပေါင်း ဆောင်ရွက်ခဲ့ကြခြင်းကြောင့်ပင်။

အပြာရောင်နတ်ဆိုးမျိုးနွယ်ကမူ နားလည်မှုလွဲမှားခြင်းလေးတစ်ခုကြောင့် အမြစ်ပြတ်သုတ်သင်ခံလိုက်ရခြင်းဖြစ်သည်။

အချိန်တခဏအတွင်းတွင် ဝမ်ချန်သည် ကျိန်ဆဲချင်စရာကောင်းသော အပြစ်ရှိစိတ်ကို အမှန်တကယ် ခံစားလိုက်ရသည်။

အမှန်အားဖြင့် ဤအပြစ်ရှိစိတ် အရိပ်အယောင်သည် အချိန်တခဏကြာခန့်သာ ကြာမြင့်ခဲ့ပေ၏။

အကြောင်းအရင်းမှာ ဤအချိန်တွင် ကျုံးချင်က သူ့ကို ရှာတွေ့သွားသောကြောင့်ပင်။ ထိုလူငယ်သည် စကားတစ်ခွန်းမျှ မပြောဘဲ သူ စေလွှတ်လိုက်သောကိုယ်ပွားကို တိုက်ရိုက်ဖျက်ဆီးလိုက်သည်။

သူ၏ကိုယ်ပွား ဖျက်ဆီးခံလိုက်ရသော အခိုက်အတန့်တွင် ဝမ်ချန်သည် စစ်မှန်သော သေခြင်းတရားကို ကြုံတွေ့လိုက်ရသကဲ့သို့ ခံစားမိပေ၏။

ကျုံးချင်မှ သူ့ကို ပေးစွမ်းသော ခံစားချက်အတွက်မူ...

အလွန်စွမ်းအားကြီးပြီး ခုခံရန် မဖြစ်နိုင်လောက်အောင် စွမ်းအားကြီးကာ မွန်းကြပ်စေလောက်အောင် စွမ်းအားကြီးလွန်းသည်။

သူ၏ကိုယ်ပွားသည်ယန်သုံးပါးနယ်ပယ် ပထမအဆင့် ကျင့်ကြံသူတစ်ဦး၏ တိုက်ခိုက်နိုင်စွမ်းကို ပိုင်ဆိုင်ထားသော်လည်း ကျုံးချင် ရိုက်ထုတ်လိုက်သော လက်ဝါးချက်ကို ရင်ဆိုင်ရာတွင် ပြန်လည်တိုက်ခိုက်နိုင်စွမ်း လုံးဝမရှိခဲ့ချေ။

နှင်းတောင်များကြားတွင် ဝမ်ချန်သည် ကြောက်ရွံ့မှုများဖြင့် နောက်သို့ပြန်လှည့်ကြည့်လိုက်သည်။ မည်သူမျှ လိုက်မလာသည်ကို မြင်လိုက်ရသဖြင့် သူ သက်ပြင်းချလိုက်၏။

သို့သော် မကြာမီမှာပင် သူ၏စိတ်နှလုံးသား လေးလံသွားသည်။

ကျုံးချင်သည် မြောက်ပိုင်းနတ်ဆိုးလှိုဏ်ဂူ အပေါ် ပြင်းထန်သော ရန်ငြိုးထားရှိကြောင်း သူ ခန့်မှန်းနိုင်သည်။ သူ၏ကိုယ်ပွားသည် ထိုလူနှင့် အဝေးမှနေ၍ အကြည့်ချင်းဖလှယ်ခဲ့သဖြင့် လူငယ်၏မျက်လုံးများမှတဆင့် အရာများစွာကို ပိုင်းခြားသိမြင်ခဲ့သည်။ သူ၏ အထောက်အထားကို သိရှိသည်နှင့် ထိုလူငယ်ထံတွင် နက်ရှိုင်းသော ရွံရှာမုန်းတီးမှုနှင့် သတ်ဖြတ်လိုစိတ် အရိပ်အယောင်တစ်ရပ်တို့ ထွက်ပေါ်လာခဲ့သည်။

ဝမ်ချန်သည် အလွန်ကြောက်လန့်နေခဲ့ပြီး ဝေးနိုင်သမျှ ဝေးဝေးသို့ ထွက်ပြေးရန်သာ သူ၏စိတ်ထဲ၌ ကြုံးဝါးနေမိသည်။ ထိုကဲ့သို့ လျှို့ဝှက်ဆန်းကြယ်ပြီး စွမ်းအားကြီးသော လူတစ်ယောက်၏ ပစ်မှတ်ထားခြင်းကို ခံရသဖြင့် အနာဂတ်တွင် သူ ငြိမ်းချမ်းစွာ အိပ်စက်နိုင်တော့မည်မဟုတ်ဟု သူ ခံစားနေရသည်။

ထို့ပြင် ပိုင်လင်း၏နောက်ကွယ်တွင် ထိုကဲ့သို့သော တည်ရှိမှုမျိုး ရှိနေသဖြင့် သူတို့ မြောက်ပိုင်းနတ်ဆိုးလှိုဏ်ဂူသည် သူ့ကို ယှဉ်ပြိုင်နိုင်ရန် အလှမ်းကွာဟနေသည်။ ထို့ပြင် သူတို့သည် ပိုင်လင်းကို လိုက်လံဖမ်းဆီးနေကြသည် ဖြစ်ရာ ဤလူငယ်သည် သူမအတွက် သူတို့ကို အမြစ်ပြတ်သုတ်သင်ရန် အလားအလာများသည်။

ဤအကြောင်းကို တွေးတောမိသည်နှင့် သူ ထိတ်လန့်တုန်လှုပ်သွားခဲ့သည်။ အကြောင်းအရင်းမှာ ဤနတ်ဆိုးမြို့တော်သည် သူတို့၏ မြောက်ပိုင်းနတ်ဆိုးလှိုဏ်ဂူအတွက် သင်္ချိုင်းမြေ ဖြစ်လာလိမ့်မည်ဟု သူ ခံစားနေရသောကြောင့်ပင်။

သို့သော် ကြွင်းကျန်သည့် မျိုးနွယ်စုခေါင်းဆောင် ငါးယောက်ကို သူ အသိပေးသင့် မသင့် စဉ်းစားမိချိန်၌ ဝမ်ချန် အနည်းငယ် ဇဝေဇဝါ ဖြစ်သွားခဲ့သည်။

အချိန်တခဏကြာမျှ စဉ်းစားပြီးနောက် သူ တီးတိုးရေရွတ်လိုက်၏။

"ထားလိုက်ပါတော့... မျိုးနွယ်စုခေါင်းဆောင် ခြောက်ယောက်လုံး အတူတူ ထွက်ပြေးကြရင် လှုပ်ရှားမှုက ကြီးမားလွန်းပြီးတော့ တခြားသူတွေရဲ့ သံသယကို အလွယ်တကူ ဖြစ်စေလိမ့်မယ်... သေရမယ်ဆိုရင် ငါ့မိတ်ဆွေတွေ အရင် သေပါစေဆိုတဲ့စကား ရှိတယ်လေ... သူတို့ ကိုယ့်ကိုယ်ကိုယ် ဂရုစိုက်နိုင်ကြဖို့ပဲ မျှော်လင့်ရတော့မှာပေါ့..."

ဤသို့ တွေးတောလိုက်ပြီးနောက် ဝမ်ချန် ထွက်ပြေးတော့သည်။ သူသည် ဝေးနိုင်သမျှ ဝေးဝေးသို့ပြေးကာ ဖြစ်နိုင်လျှင် မြောက်ပိုင်းဒေသမှ ထွက်ပြေးသည်က အကောင်းဆုံးဖြစ်ပေမည်။

ဝမ်ချန်၏စိတ်နှလုံးသားသည် ကျုံးချင်နှင့် စာခြောက်ရုပ်အပေါ် ထားရှိသော ကြောက်ရွံ့မှုများဖြင့် လုံးဝပြည့်နှက်နေသည်ဟု ပြောဆိုရပေမည်။ သူသည် ခုခံရန် မစဉ်းစားရဲသလောက်နီးပါးပင်။ ယခုချိန်၌ သူသည် မည်သူမည်ဝါ၏ အာရုံစိုက်မှုကိုမျှ ခံယူရခြင်းမရှိဘဲ ဘေးကင်းရာသို့ ထွက်ပြေးနိုင်ရန်သာ မျှော်လင့်နေတော့သည်။

အကယ်၍ သူ၏လူယုံတချို့ကို ခေါ်ဆောင်သွားနိုင်လျှင် သူ ခေါ်ဆောင်သွားပေမည်။ သူ မခေါ်နိုင်လျှင်လည်း သူ့ထံ၌ ရွေးချယ်စရာ မရှိချေ။

ဤသို့ တွေးတောလိုက်ပြီးနောက် ဝမ်ချန်သည် မြောက်ပိုင်းနတ်ဆိုးလှိုဏ်ဂူ၏ ပင်မစခန်းသို့ အမြန်ဆုံးအရှိန်ဖြင့် ပြန်သွားလိုက်သည်။ သူ၏ လူယုံများကို စတင်ဆက်သွယ်ရန် မလုပ်ဆောင်နိုင်သေးမီမှာပင် အနီရောင်နတ်ဆိုးမျိုးနွယ်၏ အထူးတမန်တော်က သူ့ကို မြင်တွေ့သွားခဲ့သည်။

"အစိမ်းရောင်နတ်ဆိုး ခေါင်းဆောင်... ကျွန်တော့်တို့ခေါင်းဆောင်က မျိုးနွယ်စုခေါင်းဆောင်ခြောက်ယောက်လုံးကို အစည်းအဝေးလုပ်ဖို့ ဖိတ်ခေါ်ထားတယ်... ကျေးဇူးပြုပြီး အရှင်က လိုက်ခဲ့ပေးပါ ..."

ဒီအချိန်ကြီး ဘာအစည်းအဝေးလဲ...

ဝမ်ချန်က ငြင်းဆန်ချင်သော်လည်း ဤအချိန်တွင် ငြင်းဆန်ခြင်းက တခြားသူများ၏ သံသယကို ဖြစ်ပေါ်စေနိုင်ကြောင်း သူ သိရှိထားသည်။ ယခုလောလောဆယ်တွင် သူသည် ဤ အစည်းအဝေးကို တက်ရောက်ပြီးမှ တခြားကိစ္စများကို စီစဉ်ရပေမည်။