ချန်လန် အားဖြည့်တေးသွား

"ဟင်..."

ရွှဲ့လင်းရွှယ်၏ စကားကို ကြားလိုက်ရသောအခါ၊ စင်မြင့်အောက်ရှိ လူများမှာ အနည်းငယ် အံ့အားသင့်သွားကြပြီး၊ ချူလျန် ကိုယ်တိုင်လည်း ပါဝင်နေလေသည်။

ဤနေရာတွင် ရှိနေကြသူများမှာ တောင်တံခါးမြို့၏ အထက်တန်းလွှာများ ဖြစ်ကြပြီး၊ လူမှုဆက်ဆံရေး နယ်ပယ်တွင် ကျွမ်းကျင်သူများ ဖြစ်ကြသည်။

မြို့စားလေး ရှအန်းသည် မိမိ၏ အဆင့်အတန်းကို ပြသရန်အတွက် တမင် နောက်ကျမှ ရောက်လာပြီး၊ ထန်ယွမ် ရှေးဟောင်းစောင်းကဲ့သို့ တန်ဖိုးကြီးမားသော လက်ဆောင်ကို ပေးအပ်လိုက်ခြင်းဖြင့်၊ သူသည် ရွှဲ့လင်းရွှယ်အပေါ် ရည်ရွယ်ချက် ရှိနေကြောင်း လူတိုင်း မြင်သာနေပြီ ဖြစ်သည်။

ထို့ကြောင့် လီစံအိမ်အရှင်က ရွှဲ့လင်းရွှယ်အား ထန်ယွမ် ရှေးဟောင်းစောင်းဖြင့် တီးခတ်ရန် အကြံပြုလိုက်ခြင်းမှာ၊ အမှန်စင်စစ်အားဖြင့် သူမအနေဖြင့် မြို့စားလေးကို အကူအညီပေးသူအဖြစ် သဘာဝကျကျ ရွေးချယ်စေရန် လမ်းကြောင်းပေးလိုက်ခြင်း ဖြစ်သည်။

အဆင့်အတန်းအရ ကြည့်မည်ဆိုလျှင် ဖြစ်စေ၊ ပေးအပ်လိုက်သော လက်ဆောင်အရ ကြည့်မည်ဆိုလျှင် ဖြစ်စေ၊ မြို့စားလေးသည် ယနေ့ည၏ အထင်ရှားဆုံး ပုဂ္ဂိုလ်ဖြစ်ပြီး၊ သူနှင့် အပြန်အလှန် ဆက်ဆံခြင်းမှာ အသင့်လျော်ဆုံး ဖြစ်ပေသည်။

သို့သော် ရွှဲ့လင်းရွှယ်သည် ထင်မှတ်မထားသော လမ်းကြောင်းကို ရွေးချယ်လိုက်လေသည်။

မည်သူမျှ မသိရှိသော နာမည်တစ်ခုကို ရုတ်တရက် ခေါ်ယူလိုက်ခြင်းပင် ဖြစ်၏။

ချူလျန် မတ်တတ်ရပ်လိုက်ပြီး ပြုံးကာ ပြောလိုက်သည်။ "မိန်းကလေးရွှဲ့ ဖိတ်ခေါ်တဲ့အတွက် ဂုဏ်ယူမိပါတယ်... ဒါပေမဲ့ ကျွန်တော်က ဂီတအကြောင်း ဘာမှ နားမလည်ဘူး... ကူညီပေးဖို့က ဖြစ်မှ ဖြစ်နိုင်ပါ့မလား..."

"ကိစ္စမရှိပါဘူး..." ရွှဲ့လင်းရွှယ်က နူးညံ့စွာ ပြုံးလိုက်သည်။ သူမ၏ ရှေ့တွင် စောင်းတင်ခုံတစ်ခု ပြင်ဆင်ပြီးဖြစ်ကာ၊ ထန်ယွမ် ရှေးဟောင်းစောင်းကို တင်ထားပြီး ဖြစ်သည်။

သူမသည် စောင်းကိုယ်ထည်ကို ဖြည်းညင်းစွာ ပွတ်သပ်လိုက်ပြီး ပြောလိုက်သည်။ "ဘာလို့လဲဆိုတော့ ဒီည ကျွန်မ ပြင်ဆင်ထားတဲ့ သီချင်းက တောင်ပိုင်းဂီတမျှော်စင်ရဲ့ 'ချန်လန် အားဖြည့်တေးသွား' ဖြစ်လို့ပါ... ဒါဟာ စစ်ပွဲတွေမှာ တိုက်ခိုက်ရေးကို အထောက်အကူပြုတဲ့ နတ်ဘုရားစွမ်းရည်ပါဝင်တဲ့ တေးသွားပါ...

ဒါကို အသုံးပြုပြီး ကျွန်မတို့ တောင်ပိုင်းဂီတမျှော်စင်ရဲ့ ဂီတစွမ်းအား ဘယ်လောက် အံ့သြဖို့ကောင်းလဲ ဆိုတာကို လူတိုင်း သိရှိစေချင်လို့ပါ..."

"ဒါကြောင့်မလို့ ကျင့်ကြံခြင်း အဆင့်မြင့်မားတဲ့ ကျင့်ကြံသူတစ်ယောက်ကို အကူအညီပေးမယ့်သူအဖြစ် လိုအပ်ပါတယ်... သူရဲကောင်းလေးချူက ရှုတောင်ဂိုဏ်းကဆိုတော့ အသင့်လျော်ဆုံးပါပဲ... စင်ပေါ်တက်ပြီး ကူညီပေးနိုင်မလား..."

ချန်လန် အားဖြည့်တေးသွား...။

ဤနာမည်ကို ချူလျန် ကြားဖူးလေသည်။ တောင်ပိုင်းဂီတမျှော်စင်၏ ဂန္ထဝင် တေးသွားများထဲမှ တစ်ပုဒ်ဖြစ်သော်လည်း၊ ကိုယ်တိုင် နားမဆင်ဖူးပေ။

ရွှဲ့လင်းရွှယ်က ဤသို့ ပြောလာမှတော့၊ သူလည်း ငြင်းဆန်ရန် မကောင်းတော့သဖြင့် ခေါင်းညိတ်ပြီး လက်ခံလိုက်ရသည်။ "ဝမ်းမြောက်ဝမ်းသာ ပါဝင်ကူညီပါ့မယ်..."

ဘေးနားမှ လင်းပေ့ကမူ လေးနက်သော မျက်နှာထားဖြင့် ရေရွတ်လိုက်သည်။ "ကျင့်ကြံခြင်း အဆင့်မြင့်မားတယ်... ရှုတောင်ဂိုဏ်းက ဆင်းသက်တယ်... ငါကကော လူမဟုတ်လို့လားကွာ..."

သူနှင့် ခံစားချက်တူနေသူမှာ မျက်နှာချင်းဆိုင်ဝိုင်းမှ မြို့စားလေးပင် ဖြစ်သည်။ သူသည် အံကိုကြိတ်ကာ ပြုံးထားရပြီး၊ ရင်ထဲတွင် ဒေါသများ ပေါက်ကွဲနေလေသည်။

ငါက လူမဟုတ်လို့လား...

ငါ့မှာရော ခံစားချက် မရှိဘူးလား...

ငါက မင်း စိတ်ကျေနပ်ဖို့အတွက် ဒီလောက် အရင်းအနှီး စိုက်ထုတ်ထားတာကို... မင်းက ကျေးဇူးတင်ပါတယ် တစ်ခွန်းပဲပြောပြီး... ချက်ချင်း တခြားယောက်ျားနဲ့ သွားပြီး အီစီကလီ လုပ်နေတယ်ပေါ့...

ပြီးတော့… ငါပေးတဲ့ စောင်းကို သုံးပြီးတော့လေ...

နည်းနည်းလောက်တော့ ငါ့ကို ပါဝင်ခွင့် ပေးပါဦးလား...

အငိုမျက်လုံး အပြုံးမျက်နှာ ဟူသည့်အတိုင်း ရင်ထဲတွင် ဒေါသထွက်နေသော်လည်း၊ မျက်နှာတွင်မူ တည်ငြိမ်မှုကို ထိန်းသိမ်းထားရသည်။ မြို့စားလေးသည် စင်ပေါ်တက်သွားသော ချူလျန်၏ ကျောပြင်ကို ကြည့်ရင်း၊ ဒေါသများက ငယ်ထိပ်ထိ စောင့်တက်လာတော့သည်။

ချူလျန်သည် စောင်းခုံရှေ့သို့ ရောက်ရှိလာသည်။ ရွှဲ့လင်းရွှယ်မှာ ထိုင်နေပြီ ဖြစ်ပြီး၊ လက်ကို ဖြည်းညင်းစွာ မြှောက်ကာ ချူလျန်ကိုလည်း ကြမ်းပြင်ပေါ်တွင် ထိုင်စေလိုက်သည်။

"ကျွန်တော် ဘာလုပ်ရမလဲ..." ချူလျန် မေးလိုက်သည်။

"သူရဲကောင်းလေးချူ... စိတ်ကို တည်ငြိမ်အောင်ထားပြီး ကျင့်စဉ်ကို လည်ပတ်ထားရင် ရပါပြီ..." ရွှဲ့လင်းရွှယ်က ပြောပြလိုက်သည်။ "နောက်ပိုင်းမှာ ထူးခြားတဲ့ ပုံရိပ်ယောင်တွေ ပေါ်လာရင်တောင်... နေမထိထိုင်မသာ မဖြစ်သရွေ့... ဘာမှ လှုပ်ရှားစရာ မလိုပါဘူး..."

တစ်ချိန်တည်းမှာပင်၊ သူမသည် ထန်ယွမ် ရှေးဟောင်းစောင်း၏ ကြိုးများကို တစ်ချောင်းချင်း တီးခတ်ပြီး စောင်းသံကို စမ်းသပ်လိုက်သည်။

"ကောင်းပြီ..."

ချူလျန် ခေါင်းညိတ်လိုက်ပြီး အသက်ပြင်းပြင်း ရှူလိုက်ကာ၊ ခန္ဓာကိုယ်ထဲမှ စွမ်းအင်များကို လည်ပတ်စေပြီး၊ ရှုတောင်ဂိုဏ်း၏ 'ကိုးသွယ်ကောင်းကင် နက်ရှိုင်းနှလုံးသားကျင့်စဉ်' ကို ဖြည်းဖြည်းချင်း လှည့်ပတ်လိုက်လေသည်။

ခေါင်းကြီးအရုပ်ကို ရရှိပြီးကတည်းက၊ သူသည် ချီစုစည်းဆေးလုံးကို ထောက်ပံ့ပေးပြီး၊ ထိုအရုပ်ကို နေ့ညမပြတ် အလုပ်လုပ်ခိုင်းထားသဖြင့်၊ ကိုယ်တိုင် ကျင့်ကြံခြင်း မပြုလုပ်သည်မှာ ကြာပြီ ဖြစ်သည်။ ယခု ရုတ်တရက် ပြန်လည် ကျင့်ကြံလိုက်သောအခါ၊ ကြာမြင့်စွာ ဝေးကွာနေသော ရင်းနှီးမှုမျိုးကို ခံစားလိုက်ရသည်။

တည်ငြိမ်အေးဆေးသော ချီစွမ်းအင်များသည် သွေးကြောများထဲတွင် သတ်မှတ်ထားသော လမ်းကြောင်းအတိုင်း စီးဆင်းနေပြီး၊ သူ၏ စိတ်အခြေအနေသည်လည်း လျင်မြန်စွာ ငြိမ်သက်သွားတော့သည်။

...

ဒင်...

ရွှဲ့လင်းရွှယ်သည် ပထမဆုံး အသံကို တီးခတ်လိုက်လေသည်။

သူမ ချူလျန်ကို ရွေးချယ်ပြီး စင်ပေါ်တက်ခိုင်းခြင်းမှာ၊ သူမ၏ ကိုယ်ပိုင် အစီအစဉ် ရှိသောကြောင့် ဖြစ်သည်။ ဤသည်မှာ သူမ ရည်ရွယ်ချက်ရှိရှိ စမ်းသပ်မှုတစ်ခုဟုပင် ပြောနိုင်သည်။

သူတို့၏ အသက်အရွယ်တွင် စတုတ္ထအဆင့်သို့ ရောက်ရှိသော ကျင့်ကြံသူများကို ပါရမီရှင်ဟု ခေါ်ဆိုနိုင်ပြီး၊ မြင့်မြတ်ဂိုဏ်း (၉)ဂိုဏ်းနှင့် မြေကမ္ဘာဂိုဏ်း (၁၀)ဂိုဏ်းတို့တွင်လည်း ထိပ်တန်းစာရင်းဝင်များ ဖြစ်ကြသည်။

သူမသည် တောင်ပိုင်းဂီတမျှော်စင်၏ အတွင်းစည်းတပည့် တစ်ဦးအနေဖြင့်၊ ကျင့်ကြံခြင်း ပါရမီရှင်တစ်ဦးလည်း ဖြစ်ရာ၊ ကျင့်ကြံခြင်းအပိုင်းတွင် မည်သူ့ထက်မျှ မနိမ့်ကျပေ။

သို့သော် ထိုနေ့က ချူလျန် ထုတ်ဖော်လိုက်သော ဓားချီမှာ အလွန်ပင် ကြောက်မက်ဖွယ် ကောင်းလှသည်။ အကယ်၍ သူသည် ထိုအသက်အရွယ်ဖြင့် ထိုကဲ့သို့သော အဆင့်ကို ပိုင်ဆိုင်ထားပါက၊ သေချာပေါက် မျိုးဆက်တစ်ခုလုံးတွင် ပြိုင်ဘက်ကင်းသော ပါရမီရှင်တစ်ဦး ဖြစ်ပေလိမ့်မည်။

သို့သော် ထိုကဲ့သို့သော လူမျိုးမှာ၊ ရှုတောင်ဂိုဏ်းတွင် မည်သည့် နာမည်ဂုဏ်သတင်းမျှ မရှိပေ။ သူမသည် ရှုတောင်ဂိုဏ်းမှ ရွှီဇီယန်နှင့် ကျန်းယွဲ့ပိုင်တို့ကို မတွေ့ဖူးသော်လည်း၊ ထိုကဲ့သို့သော ကျင့်ကြံခြင်းမျိုး ရှိလိမ့်မည် မဟုတ်ဟု ထင်မြင်မိသည်။

အင်မော်တယ်ဂိုဏ်းသားချင်း ဖြစ်သည့်အတွက်၊ ရွှဲ့လင်းရွှယ်သည် သဘာဝကျကျ သိချင်စိတ် ဖြစ်ပေါ်မိသည်။

ရှုတောင်ဂိုဏ်းက မိမိတို့၏ အတော်ဆုံး တပည့်ကို ရည်ရွယ်ချက်ရှိရှိ ဖုံးကွယ်ထားခြင်းများ ဖြစ်နေမည်လော...။

သေချာပေါက် ချူလျန်တွင် အသက်ကယ်ပစ္စည်း တစ်ခုခု ရှိနေပြီး၊ ထိုဓားချီမှာ သူ ကိုယ်တိုင် ထုတ်ဖော်လိုက်ခြင်း မဟုတ်သည်လည်း ဖြစ်နိုင်သည်။

သို့သော် ထိုဖြစ်နိုင်ခြေမှာ အလွန် နည်းပါးလှသည်။ အဘယ်ကြောင့်ဆိုသော် ကျောက်စိမ်းပြားများ၏ ထူးခြားချက်ကြောင့်၊ သီးသန့် တိုက်ခိုက်ရေး မန္တန်များကို သိုလှောင်ထားခြင်းမှာ အကျိုးသက်ရောက်မှု သိပ်မကောင်းသဖြင့်၊ ဓားချီကို သိုလှောင်ထားသူ ရှားပါးလှသည်။

အကယ်၍ သူ၏ ကိုယ်ပိုင်ဓားသိုင်းကို အားဖြည့်ပေးသော ပစ္စည်းမျိုး ဆိုလျှင်လည်း၊ ထိုကဲ့သို့သော ရတနာမျိုးမှာ ရှားပါးလှပေသည်။

စဉ်းစား၍ အဖြေမထွက်သဖြင့်၊ ရွှဲ့လင်းရွှယ်သည် သူ၏ အနက်ရှိုင်းဆုံး အခြေအနေကို စမ်းသပ်ကြည့်ရန် ဆုံးဖြတ်လိုက်ခြင်း ဖြစ်သည်။

ထို့ကြောင့် ယခုကဲ့သို့သော လုပ်ရပ်များ ဖြစ်ပေါ်လာရခြင်းပင် ဖြစ်၏။

သူမ ပြောသကဲ့သို့ပင်၊ ချန်လန် အားဖြည့်တေးသွားသည် တောင်ပိုင်းဂီတမျှော်စင်၏ ဂန္ထဝင်အဖြစ်ဆုံး နတ်ဘုရားစွမ်းရည် တေးသွားများထဲမှ တစ်ပုဒ်ဖြစ်ပြီး၊ ဤသီချင်းသည် သာယာနာပျော်ဖွယ် ကောင်းခြင်းအပြင်၊ အကြီးမားဆုံး အာနိသင်မှာ နာမည်တွင် ပါသည့်အတိုင်းပင် ဖြစ်သည်။

အကူတေးသွား...။

ဒင်... ဒေါင်... ဒင်... ဒေါင်…

တေးသွားမှာ ပိုမို မြန်ဆန်လာပြီး၊ မိုးသက်လေပြင်းများကဲ့သို့ ဖြစ်လာသည်။ ထန်ယွမ် ရှေးဟောင်းစောင်း၏ ကြိုးများမှ စီးဆင်းထွက်ပေါ်လာပြီး၊ ရွှဲ့လင်းရွှယ်၏ ပြောင်မြောက်သော စောင်းပညာကို အပြည့်အဝ ဖော်ပြနေလေသည်။

စားပွဲဝိုင်းများတွင် ထိုင်နေကြသော ပရိသတ်များမှာလည်း၊ သွေးများ ဆူပွက်လာသကဲ့သို့ ခံစားလိုက်ရပြီး၊ စိတ်ဓာတ်များ တက်ကြွလာကြသည်။

လင်းပေ့သည် ဘေးနားရှိ မြို့စောင့်တပ်မှူး၏ ပခုံးကို ဖက်လိုက်ပြီး၊ စိတ်အားထက်သန်စွာဖြင့် "ဦးလေးကျန်း... ကျုပ် ဒီတစ်သက် နောင်တအရဆုံးက စစ်ထဲ မဝင်ခဲ့ရတာပဲ... ကြည့်ပေးစမ်းပါဦး ကျုပ်မှာ အခွင့်အရေး ရှိသေးလားလို့..."

သူ့ဘေးက မြို့ဝန်မင်းကိုလည်း ပုတ်ပြီး ပြောလိုက်သည် "ဦးလေးချန်... ခင်ဗျားပဲ ပြောကြည့်၊ ဒီထဲမှာ ခင်ဗျား ဘယ်ကောင်ကို ကြည့်မရတာလဲ၊ ကျုပ် သွားပြီး တစ်ချက်လောက် ထိုးပေးမယ်"

သူတို့မှာ စိတ်ဓာတ်ပိုင်းဆိုင်ရာ လှုံဆော်မှု ခံရရုံမျှဖြင့်၊ ဤမျှ ဖြစ်ပျက်နေကြခြင်း ဖြစ်သည်။

ရွှဲ့လင်းရွှယ်၏ ဘေးတွင် ထိုင်နေပြီး၊ ချန်လန် အားဖြည့်တေးသွားကို တိုက်ရိုက် လက်ခံရရှိနေသော ချူလျန်၏ ခံစားချက်မှာမူ ပိုမို ပြင်းထန်လှသည်။

စောင်းသံ စတင်သည်နှင့်၊ သူ၏ ကျင့်စဉ် လည်ပတ်မှုနှုန်းမှာ အဆပေါင်းများစွာ မြင့်တက်သွားပြီး၊ ကိုးသွယ်ကောင်းကင် နက်ရှိုင်းနှလုံးသားကျင့်စဉ်သည် ခန္ဓာကိုယ်ထဲတွင် အလွန် ချောမွေ့စွာ စီးဆင်းနေကာ၊ လှိုင်းတံပိုးများ ဝရုန်းသုန်းကား ဖြစ်ပေါ်နေသကဲ့သို့ ခံစားလိုက်ရသည်။

ဤကဲ့သို့ အရှိန်မြှင့်တင်ခြင်းမှာ၊ အကယ်၍ သူသည် လူတစ်ယောက်နှင့် တိုက်ခိုက်နေပါက၊ သူ၏ ချီစွမ်းအင် ပြန်လည်ပြည့်ဖြိုးနှုန်းမှာ ပုံမှန်ထက် အဆပေါင်းများစွာ မြန်ဆန်နေမည် ဟု ဆိုလိုခြင်း ဖြစ်သည်။

ထို့အပြင်၊ ဤစောင်းသံသည် သူ၏ စိတ်၊ ခန္ဓာ၊ စွမ်းအား အားလုံးကို ဘက်ပေါင်းစုံမှ အားဖြည့်ပေးနေကြောင်း ခံစားလိုက်ရသည်။ ချီစွမ်းအင် လည်ပတ်မှုအပြင်၊ အားအင်ပြန်လည် ပြည့်ဖြိုးမှု၊ ဝိညာဉ်အာရုံ တက်ကြွမှု စသည်တို့ ပါဝင်သည်။

ရိုးရိုးရှင်းရှင်း ပြောရလျှင် သူ၏ တိုက်ခိုက်ရေး စွမ်းရည်ကို နှစ်ဆခန့် တိုးမြှင့်ပေးနိုင်ပေသည်။

ယင်း၏ အကျိုးသက်ရောက်မှုမှာ သံသယ ဖြစ်ဖွယ် မရှိအောင် ပြင်းထန်လှပေသည်။

"တကယ့်ကို အစွမ်းထက်တဲ့ အကူအညီပဲ..." သူ စိတ်ထဲတွင် ရေရွတ်လိုက်မိသည်။

အဘယ်ကြောင့်ဆိုသော် ရွှဲ့လင်းရွှယ်သည် ယခုအချိန်တွင် ဤစောင်းသံ၏ စွမ်းအားကို သူ့တစ်ယောက်တည်းအပေါ်တွင်သာ စုစည်းထားခြင်း ဖြစ်ပြီး၊ တကယ်တမ်း တိုက်ပွဲတွင်မူ သူမ တစ်ပြိုင်နက်တည်း လွှမ်းမိုးနိုင်သူမှာ သူတစ်ယောက်တည်း မဟုတ်သည်မှာ သေချာသည်။

သူမတစ်ယောက် ပါဝင်ရုံဖြင့်၊ မိမိဘက်တော်သား ကျင့်ကြံသူများ၏ တိုက်ခိုက်ရေးစွမ်းရည်ကို နှစ်ဆခန့် တိုးမြှင့်ပေးနိုင်မည် ဖြစ်သည်။

ထိုစွမ်းအားသည်ကား...။

ချူလျန်တစ်ယောက် စိတ်ကူးယဉ် အတွေးတစ်ခုပင် ဝင်လာမိသည်။

အကယ်၍ တောင်ပိုင်းဂီတမျှော်စင်မှ တပည့်ငါးဦးကို ရှာဖွေပြီး၊ ဤချန်လန် အားဖြည့်တေးသွားကို တစ်ပြိုင်နက်တည်း တီးခတ်ကာ၊ အပြန်အလှန် အကျိုးသက်ရောက်စေမည် ဆိုပါက...

မင်းက ငါ့ကို ပိုသန်မာစေ၊ ငါက သူ့ကို ပိုသန်မာစေ၊ သူမက ငါ့ကို ပိုသန်မာစေ...

ဤကဲ့သို့ အပြန်အလှန် အားဖြည့်ပေးရင်း၊ အဆုံးမဲ့ လည်ပတ်နေသော ခရုပတ်ပုံစံ စွမ်းအားတိုးမြှင့်မှုကို ဖြစ်ပေါ်စေပြီး၊ နောက်ဆုံးတွင် ကြောက်မက်ဖွယ်ကောင်းသော အဆင့်တစ်ခုသို့ ရောက်ရှိနိုင်မည်လော...။

သူ အတွေးလွန်နေစဉ်၊ ချန်လန် အားဖြည့်တေးသွားသည်လည်း အထွတ်အထိပ်သို့ ရောက်ရှိလာပြီး၊ သူ၏ ချီစွမ်းအင် လည်ပတ်မှုမှာလည်း မကြုံဖူးလောက်‌သော အထွတ်အထိပ်သို့ ရောက်ရှိသွားကာ၊ ထူးဆန်းသော ခံစားမှုတစ်ခု ရင်ထဲသို့ ဝင်ရောက်လာပြီး၊ မီးခိုးငွေ့များနှင့် တိမ်တိုက်များ ပန်းထွက်လာတော့သည်။

ခဏချင်းတွင်၊ ချူလျန်၏ ပတ်ပတ်လည်တွင် ရောင်စုံအလင်းများ တောက်ပလာတော့သည်။

စင်မြင့်ပေါ်တွင် တင်ပလ္လင်ခွေ ထိုင်နေရင်း ပတ်ဝန်းကျင်တွင် အခိုးအငွေ့များ ထွက်ပေါ်လာကာ၊ မီးခိုးငွေ့များနှင့် တိမ်တိုက်များ ဖုံးလွှမ်းသွားပြီး သူတော်စင်တစ်ပါးအလား ဖြစ်သွားလေသည်။

ကျင့်ကြံခြင်းကို နားလည်သော လူအချို့ကသာ အာမေဍိတ်သံ ပြုလိုက်ကြသည်။ " ဒါက ကျင့်စဉ် နိမိတ်ပုံရိပ်ပဲ..."

ဒဏ္ဍာရီများအရ၊ ထိပ်တန်းကျင့်စဉ်များကို ပြီးပြည့်စုံသော အထွတ်အထိပ်သို့ ရောက်အောင် လှည့်ပတ်နိုင်ပါက၊ ကျင့်စဉ် နိမိတ်ပုံရိပ်များ ပေါ်လာတတ်သည်ဟု ဆိုကြသည်။ ဤသည်မှာ ကျင့်ကြံခြင်းအဆင့် အနိမ့်အမြင့်နှင့် မဆိုင်ဘဲ၊ လည်ပတ်မှု အတိုင်းအတာနှင့်သာ သက်ဆိုင်သည်။

သို့သော် ယေဘုယျအားဖြင့်၊ ဤကဲ့သို့ ပြီးပြည့်စုံသော လည်ပတ်မှုမှာ စိတ်ကူးယဉ်နေရုံသာ ရှိတတ်ပြီး၊ တာအိုသိရှိခြင်းအဆင့်အောက်တွင် ကျင့်စဉ် နိမိတ်ပုံရိပ် ပေါ်လာရန်မှာ မဖြစ်နိုင်သလောက် ရှိသည်။ တာအိုသိရှိခြင်းအဆင့် ကျင့်ကြံသူများအတွက်ပင် အတော်လေး ခက်ခဲပြီး၊ သတ္တမအဆင့် ကောင်းကင်မူလအဆင့်သို့ ရောက်ရှိမှသာ စိတ်တိုင်းကျ လုပ်ဆောင်နိုင်ပေလိမ့်မည်။

သို့သော် ယခုအချိန်တွင်၊ ရွှဲ့လင်းရွှယ်၏ ချန်လန် အားဖြည့်တေးသွား အားဖြည့်မှုအောက်တွင်၊ ချူလျန်သည် ဘဝတွင် ပထမဆုံးအကြိမ်အဖြစ် ကျင့်စဉ် နိမိတ်ပုံရိပ်၏ ဆွဲဆောင်မှုကို ခံစားလိုက်ရသည်။

ကိုးသွယ်ကောင်းကင် နက်ရှိုင်းနှလုံးသားကျင့်စဉ်သည်ကား စွမ်းအားအပြည့်ဖြင့် လည်ပတ်နေချေပြီ...။

"ဒါက..." ရွှဲ့လင်းရွှယ်သည် ဘေးနားရှိ ချူလျန်၏ မီးခိုးငွေ့များကို ကြည့်ပြီး၊ မျက်လုံးထဲတွင် အံ့သြသော အရိပ်အယောင်များ ပေါ်လာကာ၊ စိတ်ထဲတွင် တိတ်တဆိတ် ရေရွတ်လိုက်မိသည်။

"တော်တော်အားနည်းတဲ့ နိမိတ်ပုံရိပ်ပဲ..."