အခန်း (၁၅၁၁-၁၅၁၂)

အခန်း ၁၅၁၁ - နောက်ဆုံး ဝှက်ဖဲ

"တစ္ဆေသင်္ဘောကို ရင်ဆိုင်မယ့် အသေးစိတ် အစီအစဉ်က ဒီလိုပဲ တစ္ဆေသင်္ဘော ပေါ်လာတာနဲ့ ဟယ်ယွဲ့လျန်က တစ္ဆေနယ်မြေကို သုံးပြီး အနီးနားတဝိုက်ကို ပိတ်ဆို့ထားရမယ် လက်တွေ့ကမ္ဘာကို တစ္ဆေပန်းချီကားထဲ ဆွဲသွင်းပြီး လူရှင်တွေနဲ့ တစ္ဆေတွေကို ခွဲခြားထားရမယ် အနီးနားမှာ လူရှင် မရှိရင် တစ္ဆေတွေရဲ့ အန္တရာယ်က လျော့နည်းသွားလိမ့်မယ် ဘာလို့လဲဆိုတော့ တစ္ဆေတွေရဲ့ သတ်ဖြတ်ခြင်း စည်းမျဉ်းကို ချိုးဖောက်မိမယ့်သူ မရှိတော့ဘူးလေ တချိန်တည်းမှာ ငါကလည်း တစ္ဆေရေကန်ကို အသုံးပြုပြီး အဆင့်နိမ့် တစ္ဆေအများစုကို ရေကန်အောက်ခြေမှာ မြှုပ်နှံထားမယ် အရင်တုန်းက လုပ်ခဲ့သလိုပေါ့"

"တကယ် အန္တရာယ်ကြီးတာက နောက်ပိုင်း တိုက်ပွဲတွေပဲ တချို့တစ္ဆေတွေက တစ္ဆေရေကန်ထဲမှာ မနစ်မြုပ်နိုင်ဘူး လူကိုယ်တိုင် သွားဖမ်းချုပ်မှ ရမယ် ဒီအဆင့် တစ္ဆေတွေကို ရင်ဆိုင်ရရင် ခေါင်းဆောင်တွေတောင် သေသွားနိုင်တယ် ဒါကြောင့် အဲဒီအချိန်ကျရင် ငါ ကိုယ်တိုင် လှုပ်ရှားမယ်"

ယန်ကျန့်သည် ယခု ထုန်ချန် ဟယ်ယွဲ့လျန် တို့နှင့်အတူ တစ္ဆေသင်္ဘောကို ရင်ဆိုင်မည့် အစီအစဉ် အသေးစိတ်ကို ဆွေးနွေးနေခြင်း ဖြစ်သည်။

"မင်းတစ်ယောက်တည်းလား ငါ မင်းနဲ့အတူ လိုက်တိုက်လို့ မရဘူးလား"

ထုန်ချန် အံ့သြသွားခဲ့သည်။

ယန်ကျန့်က ပြန်လည်ဖြေကြားလိုက်သည်။

"ဟုတ်ပါတယ် ငါတစ်ယောက်တည်းပဲ ငါက ကိုယ့်ကိုယ်ကို ပြန်လည်စတင်နိုင်တဲ့ စွမ်းရည် ရှိတယ် သဘာဝလွန် တိုက်ခိုက်မှု အများစုကို လစ်လျူရှုနိုင်တယ် ထင်းခုတ်ဓားနဲ့ အလောင်းကောင် သံချောင်းလည်း ရှိသေးတယ် ငါသာ တောင့်ခံနိုင်ရင် တော်တော်များများသော အန္တရာယ်ကြီးတဲ့ တစ္ဆေတွေကို ဖမ်းချုပ်နိုင်လိမ့်မယ် ဒါပေမယ့် ငါ ပြီးပြည့်စုံအောင် လုပ်နိုင်မယ်လို့ အာမမခံရဲဘူး ဒါကြောင့် ရှုံးနိမ့်မယ့် အခြေအနေကိုလည်း ထည့်သွင်းစဉ်းစားထားတယ် အဲဒီကျမှ မင်း ဝင်ပါပြီး ကျန်တဲ့ တစ္ဆေတွေကို ရှင်းလင်းရမယ်"

"ယန်ကျန့် မင်းရဲ့ အစီအစဉ်က နည်းနည်း ပြဿနာ ရှိနေသလိုပဲ ငါတို့ အတူတူ တိုက်ရင် ပိုပြီး ထိရောက်မယ် မဟုတ်ဘူးလား ဘာလို့ ငါ့ကို နောက်မှ ဝင်ခိုင်းရတာလဲ"

ထုန်ချန် နားမလည်နိုင် ဖြစ်နေဆဲ ဖြစ်သည်။

"ငါ့မှာ ငါ့အစီအစဉ်နဲ့ ငါ ရှိတယ် မင်း ငါ့စကား နားထောင်ရင် ပြီးတာပါပဲ"

ယန်ကျန့် ပြောလိုက်သည်။

ထုန်ချန် ခေတ္တမျှ စဉ်းစားပြီးနောက် ခေါင်းညိတ်လိုက်သည်။

"ကောင်းပြီလေ ငါ မင်းရဲ့ ဆုံးဖြတ်ချက်ကို ယုံကြည်တယ် ငါ ဘာပြင်ဆင်ထားရမလဲ"

"မင်းရဲ့ တစ္ဆေမျက်နှာမှာ အလားအလာတွေ အများကြီး ရှိတယ် ဒီတခါ အဲဒီ အလားအလာတွေ အကုန်လုံးကို ညှစ်ထုတ်ရမယ် မင်း လုပ်နိုင်ရင် အချိန်တိုအတွင်း သာမန်ထက်ထူးကဲတဲ့ သဘာဝလွန် စွမ်းအားကို ပိုင်ဆိုင်နိုင်လိမ့်မယ် ဒါပေမယ့် သဘာဝလွန် အရာဆိုတာ မသေချာ မရေရာမှုတွေနဲ့ ပြည့်နှက်နေတာပဲ မင်း အဲဒီအတွက်ကြောင့် သေချင်လည်း သေသွားနိုင်တယ် ငါ လောင်းကြေးမထပ်ရဲဘူး ဒါကြောင့် မင်းကို နောက်ဆုံးမှ သုံးဖို့ ချန်ထားတာ"

ယန်ကျန့် အလွန် လေးနက်စွာ ပြောဆိုလိုက်သည်။

"သြော် ဒီလိုကိုး"

ထုန်ချန် သဘောပေါက်သွားခဲ့သည်။ ထို့နောက် သူက ဆက်ပြောလိုက်သည်။

"ငါ အများဆုံး တစ္ဆေမိတ်ကပ်နဲ့ မျက်နှာ သုံးခုလောက်ပဲ ဆွဲနိုင်တယ် ဒါပေမယ့် တခြား ခေါင်းဆောင်တွေရဲ့ စွမ်းအားကို ငှားသုံးရုံနဲ့ အခြေအနေကို ပြောင်းလဲနိုင်မှာ မဟုတ်ဘူး တစ်ခုတည်းသော နည်းလမ်းက ခေါင်းဆောင်တွေထက် ပိုစွမ်းအားကြီးတဲ့ တစ္ဆေဆရာတွေရဲ့ စွမ်းအားကို ငှားသုံးမှ ရမယ်"

"မှန်တယ် ဒါကြောင့် အန္တရာယ် ရှိတာပေါ့"

ယန်ကျန့် ခေါင်းညိတ်လိုက်သည်။

"ငါ မင်းကို မျက်နှာ နှစ်ခု ပေးမယ် အဲဒါတွေက သမ္မတနိုင်ငံခေတ်က အထွတ်အထိပ် တစ္ဆေဆရာတွေရဲ့ မျက်နှာတွေပဲ မင်း အဲဒီမျက်နှာတွေကို ဆွဲလိုက်ရင် ဘာဖြစ်လာမလဲဆိုတာ ငါ မသိဘူး ဒါပေမယ့် ငါ သေချာပေါက် ပြောနိုင်တာ တစ်ခုကတော့ မင်းသာ အောင်မြင်သွားရင် တစ္ဆေသင်္ဘောရဲ့ နောက်ဆက်တွဲ ပြဿနာတွေကို မင်းတစ်ယောက်တည်းနဲ့ ဖြေရှင်းနိုင်လိမ့်မယ်"

"တကယ်လို့ ရှုံးသွားရင်ရော"

ဘေးနားရှိ ဟယ်ယွဲ့လျန်က မေးမြန်းလိုက်သည်။

ယန်ကျန့် သူမကို တစ်ချက် ကြည့်လိုက်သည်။

"ရှုံးသွားရင် မင်း အနီးနားတဝိုက်ကို ပိတ်ဆို့ထားလိုက် လူတွေကို တစ္ဆေပန်းချီကား ကမ္ဘာထဲ ဆွဲထည့်လိုက်ပြီး မက်မွန်ပွင့် ဥယျာဉ် စီမံကိန်းကို စတင်လိုက်တော့ ဌာနချုပ်က အဲဒီနေရာက သဘာဝလွန် ကိစ္စတွေကို မဖြေရှင်းနိုင်သရွေ့ တစ္ဆေပန်းချီကား ကမ္ဘာထဲက လူတွေကို ပြန်လွှတ်မပေးနဲ့ သူတို့ကို အထဲမှာပဲ ထာဝရ နေခိုင်းလိုက်"

ဟယ်ယွဲ့လျန် ဒီစကား ကြားလိုက်ရသည့်အခါ ကြောင်အမ်းသွားခဲ့သည်။

ယန်ကျန့် ဒီလိုစကားမျိုး ပြောထွက်လိမ့်မည်ဟု သူမ ထင်မထားခဲ့ပေ။ မက်မွန်ပွင့် ဥယျာဉ် စီမံကိန်းကို သဘောတူလိမ့်မည်ဟုလည်း မထင်ထားခဲ့ပေ။

"ဒါဆို ဒါက နောက်ဆုံး နည်းလမ်းပေါ့ တခြား အရေးပေါ် နည်းလမ်း မရှိတော့ဘူးလား"

ထုန်ချန် အံ့သြသွားခဲ့သည်။

သူ အသက်စွန့်ရမှာ မကြောက်ပေ။ သို့သော် သူက အစီအစဉ်၏ နောက်ဆုံး အဆင့် ဖြစ်နေလိမ့်မည်ဟု ထင်မထားခဲ့ခြင်း ဖြစ်သည်။

ဒါက သူ့ကို ကြီးမားသော ဖိအားများ ဖြစ်စေခဲ့သည်။

"ခေါင်းဆောင်တွေ သေကုန်ကြပြီ ဌာနချုပ်လည်း ပြိုလဲလုနီးပါး ဖြစ်နေပြီ ဘယ်သူမှ တာဝန်ယူနိုင်မယ့်သူ မရှိတော့ဘူး ငါတို့က နောက်ဆုံး ခံတပ်ပဲ စုဖန် ပြောသလို လူအကုန်လုံး စုစည်းပြီး တစ္ဆေသင်္ဘောကို ထပ်တိုက်မယ် ဆိုရင်တော့ တစ်မျိုးပေါ့ ဒါပေမယ့် အဲဒီလို လုပ်ရင် ပိုပြီး ရှုံးဖို့ များတယ် ငါ ဒီကိစ္စရဲ့ နောက်ကွယ်မှာ ပုံမှန် မဟုတ်တဲ့ အငွေ့အသက်တွေ ရနေတယ် ဒါကြောင့် အရင်ကလို လုပ်လို့ မရတော့ဘူး တစ္ဆေသင်္ဘော ပေါ်လာတာက ငါတို့ရဲ့ နောက်ဆုံး လက်ကျန် အင်အားကို ဖြုန်းတီးပစ်ချင်လို့ပဲ ငါတို့က အဲဒါကို သိသိကြီးနဲ့ သွားပူးပေါင်းပေးရလောက်အောင် မိုက်မဲနေကြတာလား အဲဒါက ကိုယ့်သေတွင်း ကိုယ်တူးတာပဲ"

ယန်ကျန့် တည်ငြိမ်စွာ ပြောဆိုလိုက်သည်။

ထုန်ချန် တိတ်ဆိတ်သွားခဲ့သည်။

ဘေးနားရှိ ဟယ်ယွဲ့လျန်လည်း စကားဆက်မပြောတော့ပေ။

ထုန်ချန် သတိမထားမိသော်လည်း ခေါင်းဆောင်တစ်ဦး ဖြစ်သော ဟယ်ယွဲ့လျန်သည် အခြေအနေ ပြောင်းလဲမှုများကို ခံစားမိနေသည်။ ယခုအချိန်တွင် အရာအားလုံး တည်ငြိမ်နေခြင်းမှာ ယန်ကျန့် အသက်ရှင်နေသေးသောကြောင့် ဖြစ်သည်။ ကျန်ရှိနေသော ခေါင်းဆောင်များနှင့် တစ္ဆေဆရာများသည် သူ့အမိန့်ကို နာခံကြသည်။ ယန်ကျန့်သာ သေဆုံးသွားပါက ဌာနချုပ်၏ အဓိက တိုင်ကြီး ပြိုလဲသွားသကဲ့သို့ ဖြစ်ပြီး တကယ့် အကျပ်အတည်း စတင်လာလိမ့်မည်။

"ယန်ကျန့် တကယ်တော့ ငါတို့ဆီမှာ မကစားရသေးတဲ့ ဖဲချပ်တစ်ချပ် ကျန်သေးတယ်"

ရုတ်တရက် လျိုစန်း၏ စက္ကူရုပ် ပြန်လည်ပေါ်လာပြီး စကားစပြောလိုက်သည်။

ချက်ချင်းပင် အခြားသူများအားလုံး လျိုစန်း၏ စက္ကူရုပ်ကို လှည့်ကြည့်လိုက်ကြသည်။

ယန်ကျန့်သည် လျိုစန်း၏ စက္ကူရုပ် ရောက်ရှိလာခြင်းကို မအံ့သြပေ။ တိုက်ရိုက်ပင် မေးမြန်းလိုက်သည်။

"မင်း ပြောတဲ့ ဖဲချပ်က ဌာနချုပ်က ရုပ်တုကြီးကို ပြောတာတော့ မဟုတ်ပါဘူးနော်"

"ဟုတ်တယ်"

လျိုစန်း၏ စက္ကူရုပ် ခေါင်းညိတ်လိုက်သည်။

"အရင်တုန်းက အဖိုးကြီးချင် သူ့ကိုယ်သူ ရုပ်တုထဲမှာ ချိပ်ပိတ်ထားခဲ့တာ အရေးပေါ် အချိန်ကျရင် သုံးဖို့အတွက်ပဲ အခု အချိန်တန်ပြီလို့ ငါ ထင်တယ်"

"ရွှေက သဘာဝလွန် အရာ အားလုံးကို တားဆီးထားတယ် ဒါကြောင့် အဖိုးကြီးချင် သေသလား ရှင်သလား ဆိုတာ ဘယ်နည်းနဲ့မှ စုံစမ်းလို့ မရဘူး တကယ်လို့ ရုပ်တုကို ဖွင့်လိုက်တဲ့အခါ အထဲမှာ တစ္ဆေတစ်ကောင် ဖြစ်နေရင် ဘယ်လိုလုပ်မလဲ"

ယန်ကျန့် မျက်မှောင်ကြုတ်ကာ မေးလိုက်သည်။

လျိုစန်း၏ စက္ကူရုပ်က ပြန်ဖြေလိုက်သည်။

"ဒါဆိုရင်လည်း ဒီလောကကြီးမှာ တစ္ဆေတစ်ကောင် ပိုလာတာပေါ့ ဘာပဲဖြစ်ဖြစ် တစ္ဆေသင်္ဘောကိုတောင် မဖြေရှင်းနိုင်မှတော့ ဒီတစ္ဆေတစ်ကောင် ပိုလာတာ ဘာထူးမှာလဲ"

ယန်ကျန့် ခေတ္တမျှ စဉ်းစားလိုက်သည်။ လျိုစန်း၏ အကြံပြုချက်သည်လည်း ဖြစ်နိုင်ချေ ရှိသည်ဟု တွေးမိလိုက်သည်။

တကယ်တမ်း အဲဒီအချိန်ရောက်လို့ တစ္ဆေသင်္ဘောက တစ္ဆေတွေကို ဆက်တိုက် လွှတ်ထုတ်နေတာကို ကြည့်နေရမယ့်အစား ရုပ်တုကို ရိုက်ခွဲပြီး အဖိုးကြီးချင်ကို နှိုးဖို့ ကြိုးစားတာက ပိုကောင်းပါသည်။ တကယ်လို့ အဖိုးကြီးချင်သာ အသက်ရှင်နေသေးရင်ရော။။။။ သူက တစ္ဆေသင်္ဘောကို ဖြေရှင်းနိုင်မယ့် နည်းလမ်း ရှိချင် ရှိနိုင်မှာ။ ဘာပဲဖြစ်ဖြစ် အဖိုးကြီးချင်က အသက်ရှည်ရှည် နေလာခဲ့သူ ဖြစ်ပြီး သဘာဝလွန် အကြောင်းတွေကို လက်ရှိ ဘယ်သူ့ထက်မဆို ပိုသိနားလည်ထားသူ ဖြစ်သည်။

"ကောင်းပြီ ဒါဆို အဖိုးကြီးချင်ရဲ့ ရုပ်တုကို အဆင်သင့် ပြင်ထားလိုက် တစ္ဆေသင်္ဘော ပေါ်လာတာနဲ့ တိုက်ရိုက် သယ်လာခဲ့"

ယန်ကျန့် ပြောလိုက်သည်။

လျိုစန်းက ပြောတယ်။

"ဘုရင်အဖွဲ့အစည်းနဲ့ မတိုက်ခင်ကတည်းက ဒုတိယဝန်ကြီးက အကုန် ပြင်ဆင်ပြီးသားပါ အမိန့်တစ်ခွန်းပဲ စောင့်နေတာ အချိန်တိုအတွင်း သယ်လာနိုင်လိမ့်မယ်"

ယန်ကျန့် ခေါင်းညိတ်လိုက်သည်။ ပြီးနောက် မေးလိုက်သည်။

"အခု တစ္ဆေသင်္ဘော အခြေအနေ ဘယ်လိုရှိလဲ"

"ဒီကိစ္စ ပြောဖို့ ငါ့စက္ကူရုပ် ဒီကို ရောက်လာတာ အခု ဟောင်းနွမ်းနေတဲ့ ရေကြောင်းမြေပုံက ပုံမှန် ပြန်ဖြစ်သွားပြီ တစ္ဆေသင်္ဘောရဲ့ တည်နေရာ ပျောက်သွားပြီ ဒါက ဘာကို ဆိုလိုသလဲဆိုတော့ တစ္ဆေသင်္ဘောက လက်တွေ့ကမ္ဘာထဲကနေ ပြန်လည် ပျောက်ကွယ်သွားပြီ ဆိုတဲ့ သဘောပဲ နောက်တစ်ခေါက် ဘယ်နေရာမှာ ပေါ်လာမလဲ ဆိုတာတော့ မသေချာဘူး ငါ အချိန်ပြည့် စောင့်ကြည့်နေတယ် သတင်းရတာနဲ့ မင်းကို ချက်ချင်း ပြောမယ်"

လျိုစန်း၏ စက္ကူရုပ်က ပြောလိုက်သည်။

"ကောင်းပြီ ဘာပဲဖြစ်ဖြစ် ငါ့ဘက်က ပြင်ဆင်ပြီးပါပြီ အချိန်မရွေး လှုပ်ရှားလို့ ရတယ်"

ယန်ကျန့် ပြောလိုက်သည်။

သူတို့အားလုံး ဆက်လက် စောင့်ဆိုင်းနေကြရသည်။

ရေကြောင်းမြေပုံ၏ အကူအညီ ရှိသော်လည်း ၅ မိနစ်သာ ကြိုတင် သိရှိနိုင်သည်။

၅ မိနစ် မတိုင်ခင် တစ္ဆေသင်္ဘော ပေါ်လာမလား၊ ဘယ်နေရာမှာ ပေါ်လာမလဲ ဆိုတာ ဘယ်သူမှ မသိနိုင်ပေ။

သို့သော် ထူးဆန်းသည်မှာ ဒုတိယအကြိမ် တစ္ဆေသင်္ဘော ပေါ်လာသည့် သတင်းသည် အလွန် လျှို့ဝှက်သော ကိစ္စဖြစ်သည်။ ယန်ကျန့်၊ လျိုစန်း တို့မှလွဲ၍ အခြား ပြင်ပလူများ မသိရှိပေ။ သို့သော် ဒီသတင်းသည် ဘယ်လို ပေါက်ကြားသွားသည်မသိ တစ္ဆေဆရာလောကတွင် ပျံ့နှံ့သွားခဲ့သည်။

အထူးသဖြင့် တစ္ဆေဆရာများ၏ ဝက်ဘ်ဆိုက်တွင် တစ္ဆေသင်္ဘောသည် တာဟိုင်မြို့ အနီးတွင် ပြန်လည် ရောက်ရှိနေပြီ ဖြစ်ပြီး အချိန်မရွေး ကမ်းကပ်နိုင်ကြောင်း အခိုင်အမာ ပြောဆိုနေကြသူများ ရှိနေသည်။

"ဘာ တစ္ဆေသင်္ဘော ပြန်လာပြီ ဟုတ်လား ဘုရင်အဖွဲ့အစည်း ပျက်စီးသွားပြီ မဟုတ်ဘူးလား တစ္ဆေသင်္ဘောက ဘယ်လိုလုပ် ပြန်ပေါ်လာနိုင်မှာလဲ"

တချို့က အံ့သြနေကြသည်။

"ဟားဟား တစ္ဆေသင်္ဘော ဒုတိယအကြိမ် ပေါ်လာပြီ တစ္ဆေတွေ သင်္ဘောတစ်စင်းစာ ထပ်လွှတ်ဦးမယ် ကျန်နေတဲ့ ခေါင်းဆောင်တွေ ဘာနဲ့ ခုခံမလဲ ဒီတခါတော့ အကုန် သေကြတော့မယ် ထင်တယ် ဘုရင်တွေလည်း သေကုန်ပြီ ခေါင်းဆောင်တွေလည်း သေကုန်ပြီ နောက်ဆို သဘာဝလွန် ဖြစ်ရပ်တွေကို ဖြေရှင်းနိုင်တော့မှာ မဟုတ်ဘူး စောစောစီးစီး ပြင်ဆင်ထားတာ ပိုကောင်းမယ် ငါကတော့ ကတုတ်ကျင်းတူးပြီး ပုန်းဖို့ ပြင်ထားပြီးပြီ"

တချို့က ဝမ်းသာအားရ ပြောဆိုနေကြသည်။

"ရဲကျန့် ရူးသွားပြီ ဘယ်သူမှ သူ့ကို မတားကြဘူးလား သူက ဘုရင်အဖွဲ့အစည်း ဝင်တွေကို လိုက်သတ်နေတယ် ပြီးတော့ ဘယ်က တစ္ဆေက လမ်းပြပေးနေလဲ မသိဘူး လျှို့ဝှက် စခန်းတွေကိုတောင် ရှာတွေ့နေတယ် ဒီအတိုင်း ဆက်သွားရင် သူ့လက်ထဲမှာ လူဘယ်နှယောက် သေဦးမလဲ မသိဘူး"

"ကိုယ့်ကံတရားနဲ့ ကိုယ်ပဲ နေကြပါတော့ ဆရာရဲက သဘာဝလွန် ဖိုရမ်က ညီလေးတွေအတွက် လက်စားချေနေတာ မင်းတို့ ဘုရင်အဖွဲ့အစည်းကလည်း တကယ် ကျင့်ဝတ် မရှိဘူး ရန်ဖြစ်ရင် ရန်ပဲ ဖြစ်ပေါ့ လူမရှိတဲ့အချိန် အသိုက်အမြုံကို ဝင်ဖျက်ဆီးတာ လွန်လွန်းတယ် အခုတော့ ခံရပြီပေါ့"

အွန်လိုင်းပေါ်တွင် ဆွေးနွေးငြင်းခုံမှုများ ဆက်တိုက် ဖြစ်ပေါ်နေသည်။

ထိုစဉ် အချိန်အတော်ကြာ စကားမပြောဘဲ ပျောက်နေသော သူတစ်ယောက် ရုတ်တရက် စကားပြောလာသည်။

"မင်းတို့ ဒီဝက်ဘ်ဆိုက်မှာ စကားပြောတာ သတိထားကြ ဒီဝက်ဘ်ဆိုက်ထဲမှာ စကားပြောနေတဲ့ သူတချို့က လူတွေ မဟုတ်ဘူး တစ္ဆေတွေ ဝက်ဘ်ဆိုက်ထဲကို တစ္ဆေအစစ်တွေ ဝင်ရောက်လာပြီ ငါ တစ္ဆေရဲ့ ပစ်မှတ်ထားတာ ခံနေရပြီ အခု ထွက်ပြေးနေရတယ် နောက်တစ်ခါ စကားပြောခွင့် ရမလား မသိတော့ဘူး ငါကံကောင်းဖို့ ဆုတောင်းပေးကြပါ"

နာမည် 'ငါ့မှာ အကြံတစ်ခု ရှိတယ်'

လူအတော်များများက ဒီ 'ငါ့မှာ အကြံတစ်ခု ရှိတယ်' ဆိုတဲ့ နာမည်ပိုင်ရှင်ကို သတိထားမိလိုက်ကြသည်။

ဒီစာကို ဖတ်ပြီးနောက် တစ္ဆေဆရာ အများအပြား ကျောချမ်းသွားကြသည်။

ဒီဝက်ဘ်ဆိုက်မှာ စကားပြောနေတဲ့ သူအများစုက လူရှင်တွေ မဟုတ်ဘူး တစ္ဆေအစစ်တွေ ဟုတ်လား။

ဒါကြောင့်လည်း ဒီရက်ပိုင်း ရင်းနှီးတဲ့ လူတော်တော်များများ အွန်လိုင်းမှာ ပျောက်နေကြတာကိုး။

တစ္ဆေရဲ့ ပစ်မှတ်ထားခံရပြီး အသတ်ခံလိုက်ရတာများလား။

အခန်း ၁၅၁၂ - အနာဂတ်အတွက် ဆွေးနွေးခြင်း

"ဟိုဘက်မှာ သဘာဝလွန် ဖြစ်ရပ်တစ်ခု ဖြစ်နေပုံရတယ် လူတွေ သေကုန်ကြပြီ သွားရှင်းသင့်လား"

တာဟိုင်မြို့ရှိ တိုက်ခေါင်မိုးတစ်ခုပေါ်တွင် ထုန်ချန်သည် အဝေးသို့ လှမ်းမျှော်ကြည့်ရင်း ပုံမှန် မဟုတ်သော အငွေ့အသက်များကို ခံစားလိုက်ရသည်။

မြို့ပြထဲတွင် ပုန်းအောင်းနေသော တစ္ဆေတစ်ကောင် ပြန်လည် ပေါ်ထွက်လာပြီး ဆူညံပွက်လောရိုက်မှုများကို ဖြစ်ပေါ်စေခြင်း ဖြစ်သည်။ ဒီနေရာမှနေ၍ ကယ်ပါယူပါ ဟူသော အော်သံများကို ကြားနေရသည်။ နာကျင်စွာ အော်ဟစ်သံများ ကောင်းကင်ယံတွင် ပဲ့တင်ထပ်နေသည်။ သို့သော် မည်သူမျှ သွားရောက် ကူညီခြင်း မပြုကြပေ။ အဘယ်ကြောင့်ဆိုသော် သာမန်လူများ အနေဖြင့် မိမိအသက်ရှင်ရန်ပင် မနည်း ရုန်းကန်နေရချိန်တွင် သူတစ်ပါးကို ကူညီရန် မဖြစ်နိုင်သောကြောင့် ဖြစ်သည်။

"တစ္ဆေသင်္ဘောက ပိုအရေးကြီးတယ် ဒီလို သဘာဝလွန် ဖြစ်ရပ်တွေနဲ့ အချိန်ကုန်နေလို့ မဖြစ်ဘူး တခြားလူတွေကို သွားရှင်းခိုင်းလိုက် တာဟိုင်မြို့မှာ လှုပ်ရှားနိုင်တဲ့သူတွေ ရှိသေးတယ်"

ဟယ်ယွဲ့လျန်က ဘေးနားတွင် မတုန်မလှုပ် ရပ်နေရင်း ပြောဆိုလိုက်သည်။

သူမသည် တစ္ဆေပန်းချီကား၏ စွမ်းအားကို မဆက်ခံမီက အလွန် ဉာဏ်ကောင်းသော အမျိုးသမီး တစ်ဦး ဖြစ်သည်။ ယခုအချိန်တွင်လည်း အခြေအနေကို ကောင်းစွာ သုံးသပ်နိုင်သည်။ လက်ရှိတွင် သူတို့အားလုံး အင်အားအကုန်သုံးပြီး တစ္ဆေသင်္ဘောကို ရင်ဆိုင်ရန် ပြင်ဆင်နေကြသည်။ အခြား ကိစ္စများအတွက် အချိန်ဖြုန်းရန် မသင့်တော်ပေ။

"ဟုတ်တယ် မင်းပြောတာ မှန်တယ်"

ထုန်ချန် ခေတ္တမျှ စဉ်းစားပြီးနောက် ခေါင်းညိတ် ထောက်ခံလိုက်သည်။

"ငါ လီယန်ကို ဖုန်းဆက်ပြီး ပြောလိုက်မယ် သူတို့အဖွဲ့ အခြေအနေ သိပ်မကောင်းပေမယ့် လှုပ်ရှားနိုင်ပါသေးတယ် ပြီးတော့ လျိုစန်းကိုလည်း စက္ကူရုပ်တွေ လွှတ်ခိုင်းလိုက်မယ်"

ပြောပြီးသည်နှင့် သူ ဖုန်းကို ကောက်ကိုင်လိုက်သည်။

ဘေးနားရှိ လျိုစန်း၏ စက္ကူရုပ်ကလည်း ခေါင်းညိတ်လိုက်သည်။

"ငါ ကိုယ်တိုင် သွားဖို့ အဆင်မပြေပေမယ့် စက္ကူရုပ် လွှတ်ပေးဖို့က ပြဿနာ မရှိပါဘူး စက္ကူရုပ်တွေက စွမ်းရည် သိပ်မရှိပေမယ့် လမ်းရှင်းပေးတာတို့ အန္တရာယ် ရှောင်ရှားတာတို့လောက်တော့ ကူညီပေးနိုင်တယ်"

မကြာမီ တိုက်အောက်ထပ်မှ စက္ကူရုပ် သုံးရုပ် ထွက်လာပြီး သဘာဝလွန် ဖြစ်ပွားရာ နေရာသို့ ဦးတည် သွားရောက်ကြသည်။

"အဲဒီလောက် ရှုပ်နေစရာ မလိုပါဘူး အခု တစ္ဆေသင်္ဘော မပေါ်လာသေးဘူးဆိုတော့ ငါ သွားရှင်းလိုက်မယ်"

ယန်ကျန့်သည် အနီရောင် လှံရှည်ကို ကိုင်ဆောင်ကာ လျှောက်လှမ်းလာသည်။

သူ၏ တစ္ဆေမျက်လုံးသည် အနည်းငယ် လှုပ်ရှားသွားပြီး အဝေးရှိ သဘာဝလွန် ဧရိယာကို လှမ်းကြည့်လိုက်သည်။ ထို့နောက် လက်ဖဝါးကို အနည်းငယ် အားစိုက်လိုက်ရာ လက်သည်းများသည် အနီရောင် လှံရှည်ထဲသို့ စိုက်ဝင်သွားသည်။ ပျစ်ချွဲနေသော သွေးများ လှံရှည်ပေါ်မှ စီးကျလာသည်။ ထူးဆန်းသည်မှာ ထိုသွေးများသည် အောက်သို့ စီးကျမသွားဘဲ အသိစိတ် ရှိနေသကဲ့သို့ ယန်ကျန့်၏ လက်ဖဝါးထဲသို့ ပြန်လည် စိမ့်ဝင်သွားသည်။

မကြာမီ ယန်ကျန့်၏ လက်ချောင်းများ နီရဲလာပြီး အာရုံခံစားမှု ကင်းမဲ့သွားသကဲ့သို့ ဖြစ်သွားသည်။

ဆုတောင်းပြည့်တစ္ဆေ၏ စွမ်းအားသည် သူ့ခန္ဓာကိုယ်ကို တိုက်စားနေချိန်တွင် ယန်ကျန့်က စကားစပြောလိုက်သည်။ သူ့အသံသည် နက်ရှိုင်းပြီး တစ္ဆေတစ်ကောင် တီးတိုးရွတ်ဆိုနေသကဲ့သို့ ဖြစ်နေသည်။

"လှံရှည် ပစ်လိုက်တာနဲ့ အဝေးက တစ္ဆေကို သေချာပေါက် စိုက်ဝင်ပါစေ"

ဆုတောင်းသံ ဆုံးသည်နှင့် ထူးဆန်းသော မြင်ကွင်းတစ်ခု ပေါ်လာသည်။

ပျစ်ချွဲနေသော သွေးနီရဲရဲများသည် လှံရှည်ပေါ်မှ အလွန်အမင်း စိမ့်ထွက်လာသည်။ ယခင်ကထက် အဆပေါင်းများစွာ ပိုမို မြန်ဆန်နေသည်။ ယန်ကျန့်၏ လက်နှစ်ဖက် လက်မောင်း ရင်ဘတ်အထိ နီရဲသွားပြီး ဆက်လက် ပျံ့နှံ့နေသည်။

သိသာလှသည်။

ဒီဆုတောင်း ပြည့်မြောက်ဖို့အတွက် ပေးဆပ်ရမည့် တန်ဖိုးက မသေးငယ်လှပေ။

ဒါက ဘာကို ပြသနေသလဲဆိုတော့ အဝေးက တစ္ဆေကို လှမ်းပစ်ပြီး သတ်ဖြတ်ဖို့ဆိုတာ လွယ်ကူတဲ့ကိစ္စ မဟုတ်ဘူး ဆိုတာပါပဲ။ ဆုတောင်းပြည့်တစ္ဆေရဲ့ စွမ်းအားကို သုံးရင်တောင် မလွယ်ကူပေ။

"ယန်ကျန့် မင်းခန္ဓာကိုယ်"

ထုန်ချန် အံ့အားသင့်သွားပြီး ပြောလိုက်သည်။

ဘေးနားရှိ လျိုစန်း၏ စက္ကူရုပ်နှင့် ဟယ်ယွဲ့လျန်တို့လည်း ချက်ချင်း လေးနက်သွားကြသည်။ ယန်ကျန့်၏ နီရဲနေသော ခန္ဓာကိုယ်ပေါ်မှ ကြောက်မက်ဖွယ်ကောင်းသော သဘာဝလွန် အငွေ့အသက်များကို ခံစားလိုက်ရသောကြောင့် ဖြစ်သည်။ ထိုအငွေ့အသက်များသည် အန္တရာယ်ကြီးမားကြောင်း သတိပေးနေသကဲ့သို့ပင် ဖြစ်သည်။

ယန်ကျန့် ပြန်မပြောဘဲ လှံရှည်ကို အဝေးသို့ ပစ်လွှတ်လိုက်သည်။

အနီရောင် လှံရှည်သည် လေထဲတွင် ပျံသန်းသွားပြီး တိုက်များကို ဖောက်ထွင်းကာ သဘာဝလွန် ဖြစ်ပွားရာ နေရာသို့ တန်းတန်းမတ်မတ် ဝင်ရောက်သွားသည်။

ဆုတောင်း ပြည့်မြောက်သွားသည်နှင့် ယန်ကျန့်သည် သူ့ခန္ဓာကိုယ်ကို ပြန်လည်စတင် လိုက်ပြီး ဆုတောင်းပြည့်တစ္ဆေ၏ တိုက်စားမှုကို ဖယ်ရှားလိုက်သည်။

"သဘာဝလွန် စွမ်းအားတိုင်းအတွက် တန်ဖိုးပေးဆပ်ရတာပဲ ငါလည်း မလွတ်ကင်းဘူး ငါနဲ့ တခြားလူတွေ ကွာခြားတာ တစ်ခုတည်း ရှိတယ် အဲဒါက ဒီတန်ဖိုးကို ငါ ပေးဆပ်နိုင်တယ် ဆိုတာပဲ"

ယန်ကျန့် ပြောလိုက်သည်။

"နောက်ဆက်တွဲ ကိစ္စတွေ စိတ်ပူစရာ မလိုတော့ပါဘူး ဒီလှံရှည်က တစ္ဆေကို မသတ်ရမချင်း ရပ်တန့်မှာ မဟုတ်ဘူး"

"တကယ် ကြောက်စရာကောင်းတဲ့ သဘာဝလွန် တိုက်ခိုက်မှုပဲ"

ဟယ်ယွဲ့လျန်၏ ခေါင်းဆောင်းအောက်မှ အံ့သြသံ ထွက်ပေါ်လာသည်။

သူမသည် ယခု ဘာမှမသိသော လူသစ် မဟုတ်တော့ပေ။ ယန်ကျန့်၏ လုပ်ရပ်သည် မည်သည့် ခေါင်းဆောင်ကိုမဆို ကြောက်ရွံ့စေနိုင်သည်။ အလောင်းကောင် သံချောင်းနှင့် ပြောသည့်အတိုင်း ဖြစ်လာစေသော စွမ်းအား ပေါင်းစပ်လိုက်လျှင် မည်သည့် တစ္ဆေ မည်သည့် လူကိုမဆို သတ်ဖြတ်နိုင်မည် ဖြစ်သည်။

"မင်းပဲ ဒီလို စွမ်းအားမျိုး သုံးနိုင်တာ ပြောတဲ့အတိုင်း ဖြစ်လာတယ် ဆိုတာ တကယ် အားကျစရာ ကောင်းတယ် တစ္ဆေနယ်မြေနဲ့ ပိတ်ဆို့ထားလိုက်ရင် မင်းကို ဘယ်သူမှ ယှဉ်နိုင်မှာ မဟုတ်ဘူး မင်းမွေးထားတဲ့ ခွေးကို ထည့်မတွက်ရင်တောင်ပေါ့"

လျိုစန်း၏ စက္ကူရုပ်က သက်ပြင်းချလိုက်သည်။

ယန်ကျန့် ပြောလိုက်သည်။

"တကယ်တော့ ငါ့ကို ယှဉ်နိုင်တဲ့ ခေါင်းဆောင်တွေ ဘုရင်တွေ အများကြီး ရှိတယ် ကွာခြားတာ တစ်ခုက သူတို့ ဘယ်လောက်ကြာကြာ တောင့်ခံနိုင်မလဲ ဆိုတာပဲ"

ဥပဒေစိုးမိုးရေး ခေါင်းဆောင် တစ်ယောက် အနေဖြင့် ဒီလောက် ယုံကြည်မှုတော့ ရှိရမည်။

"ငါသာ မင်းနဲ့ တိုက်ရင် တစ်မိနစ်တောင် ခံမယ် မထင်ဘူး"

လျိုစန်း ပြောလိုက်သည်။ ယန်ကျန့်၏ လှံရှည်ပေါ်တွင် သံချေးတက်နေသော ထင်းခုတ်ဓား ရှိနေသေးသည်ကို သူ မမေ့သေးပေ။ ထိုအရာကလည်း အလွန် အန္တရာယ်များသည်။

ဟယ်ယွဲ့လျန် တိတ်ဆိတ်နေသည်။

သူမ ယန်ကျန့်ကို ကြောက်ရွံ့ပြီး အမိန့်နာခံရခြင်းမှာ အကြောင်းမဲ့ မဟုတ်ပေ။

ယန်ကျန့် ပြောလိုက်သည်။

"ငါ့တစ်ယောက်တည်း စွမ်းရည်နဲ့ လက်ရှိ အခြေအနေကို ပြောင်းလဲဖို့ မဖြစ်နိုင်ဘူး အလွန်ဆုံး ဧရိယာ တစ်ခုလောက်ကိုပဲ ထိန်းထားနိုင်မယ် ငါ ပိုပြီး စွမ်းအားကြီးလာပြီး အဆင့်တစ်ခု ရောက်သွားမှသာ အရာအားလုံးကို ပြောင်းလဲနိုင်လိမ့်မယ် ဒါပေမယ့် အရမ်း ခက်ခဲတယ် သမ္မတနိုင်ငံခေတ်က အထွတ်အထိပ် တစ္ဆေဆရာတွေကို ငါ မြင်ဖူးတယ် သူတို့တောင် အနှစ် ၁၀၀ မပြည့်ခင်အထိပဲ ထိန်းထားနိုင်ခဲ့တာ"

"သူတို့ မတော်လို့ မဟုတ်ဘူး သူတို့ အသက်မရှည်လို့ပါ ဘယ်လောက်ပဲ စွမ်းအားကြီးတဲ့ တစ္ဆေဆရာ ဖြစ်ဖြစ် သေမယ့်နေ့ ရောက်လာမှာပဲလေ"

"သဘာဝလွန် စွမ်းအားနဲ့ တစ္ဆေဆရာရဲ့ သက်တမ်းက တကယ်တော့ ဆန့်ကျင်ဘက် ဖြစ်နေတယ် စွမ်းအားကြီးလေလေ ကိုယ့်သက်တမ်းကို ပြောင်းလဲဖို့ ခက်ခဲလေလေပဲ ငါသာ သာမန်လူ တစ်ယောက်ကို အသက် ၂၀၀ နေရပါစေလို့ ဆုတောင်းရင် လွယ်လွယ်လေး ဖြစ်လာလိမ့်မယ် ဒါပေမယ့် ငါ့ကိုငါ အသက် ၂၀၀ နေရပါစေလို့ ဆုတောင်းရင် တစ္ဆေက ချက်ချင်း နိုးထလာပြီး ငါ သေသွားလိမ့်မယ်"

လျိုစန်း၏ စက္ကူရုပ် ခေါင်းညိတ်လိုက်သည်။

"ဟုတ်တယ် ငါတို့က သဘာဝလွန် စွမ်းအားနဲ့ အသက်ဆက်နေရသလို သဘာဝလွန် စွမ်းအားရဲ့ ချုပ်နှောင်မှုကိုလည်း ခံနေရတယ် စွမ်းအားကြီးလေ ကိုယ့်ကိုယ်ကို ပြောင်းလဲဖို့ ခက်လေပဲ အဖိုးကြီးချင် ဆိုရင် ကြည့်လေ အသက်ရှည်ဆေးတွေ သူ့အပေါ် သက်ရောက်မှု မရှိဘူး ဘာလို့လဲဆိုတော့ သူက အရမ်း စွမ်းအားကြီးလွန်းလို့လေ ဒါကြောင့် လူ့သက်တမ်း ကုန်တာနဲ့ သူ သေရတော့တာ"

"ကွဲပြားတဲ့ လမ်းကြောင်းက မဆိုးပါဘူး ဒါပေမယ့် အသိစိတ် ပျောက်ကွယ်သွားမယ့် နေ့တစ်နေ့ ရှိလာမှာပဲ"

ထုန်ချန်က ပြောလိုက်သည်။

"ဒါကြောင့် သဘာဝလွန် စွမ်းအားကို လိုက်စားရင်းနဲ့ သက်တမ်း ကန့်သတ်ချက်ကို ကျော်လွှားနိုင်မယ့် နည်းလမ်းကို ရှာရမယ် နှစ်ခုစလုံး အထွတ်အထိပ် ရောက်သွားမှသာ ပြောင်းလဲမှုကြီး တစ်ခု ဖြစ်လာနိုင်မယ် ဟုတ်တယ်မလား"

"စွမ်းအားကြီးတဲ့ သဘာဝလွန် စွမ်းအား အဆုံးမရှိတဲ့ သက်တမ်း ပြီးတော့ ပုံမှန် လူ့အသိစိတ် ဒီသုံးခု ပေါင်းစပ်ထားတာက မင်း လိုချင်တဲ့ အရာလား"

လျိုစန်း၏ စက္ကူရုပ်က ယန်ကျန့်ကို မေးလိုက်သည်။

ယန်ကျန့် ပြောလိုက်သည်။

"မဟုတ်ဘူး ဒါ ငါ လိုချင်တာ မဟုတ်ဘူး ဒီခေတ်ကြီးက ဒီလို လူတစ်ယောက် လိုအပ်နေတာ သမ္မတနိုင်ငံခေတ်က တစ္ဆေဆရာတွေကလည်း ဒီလို လူတစ်ယောက် ပေါ်လာဖို့ စောင့်မျှော်နေကြတာ ဒါမှသာ တစ္ဆေနိုးထမှု ခေတ်ဆိုးကြီးကို အဆုံးသတ်နိုင်ပြီး အနာဂတ်အတွက် မျှော်လင့်ချက် ရှိလာမှာ မဟုတ်ရင် ငါတို့က အပေါက်ဖာတဲ့ လူတွေပဲ ဖြစ်နေဦးမှာ ဒီကမ္ဘာကြီးက ထာဝရ မျှော်လင့်ချက် မဲ့နေဦးမှာ"

ဟယ်ယွဲ့လျန်၏ အသံက ခေါင်းဆောင်းအောက်မှ ထွက်ပေါ်လာသည်။ ဒီတကြိမ် သူမ၏ အသံသည် အရင်နှင့် မတူဘဲ တစ်စုံတစ်ယောက်က ပြောနေသကဲ့သို့ ဖြစ်နေသည်။

"သမ္မတနိုင်ငံခေတ်က တစ္ဆေဆရာတွေက ဒီအချက်ကို ဖြည့်ဆည်းဖို့ နည်းလမ်းပေါင်းစုံ ကြိုးစားခဲ့ကြတယ် လမ်းကြောင်းပေါင်းစုံ လျှောက်ခဲ့ကြတယ် သက်တမ်း ကုန်ဆုံးမှာကို သိကြလို့ မျိုးဆက် တစ်ခုပြီးတစ်ခု လက်ဆင့်ကမ်းဖို့ ကြိုးစားခဲ့ကြတယ် မျိုးဆက်အလိုက် ကြိုးစားသွားရင် သက်တမ်း ပြဿနာ ပြေလည်သွားမယ်လို့ ယူဆခဲ့ကြတယ် တချို့ကကျတော့ ဒီခေတ်ရဲ့ အထွတ်အထိပ် စွမ်းအားတွေကို ထိန်းသိမ်းထားပြီး မျိုးဆက်အလိုက် စုဆောင်းသွားရင် လူနဲ့ တစ္ဆေကြားက ချိန်ခွင်လျှာ ညီမျှလာပြီး အရာအားလုံးကို အဆုံးသတ်နိုင်မယ်လို့ ထင်ခဲ့ကြတယ် တချို့ကကျတော့ တစ္ဆေနိုးထမှု ခေတ်ကြီးကနေ ထူးခြားတဲ့ လူတစ်ယောက် မွေးဖွားလာမယ်လို့ ယုံကြည်ခဲ့ကြတယ်"

"ဒါပေမယ့် လူအများစုက ကျရှုံးခဲ့ကြတယ်"

ယန်ကျန့်က ဆက်ပြောသည်။

"တစ္ဆေစာပို့တိုက် မန်နေဂျာ လော်ဝမ်ဆုန်းက မန်နေဂျာတွေကို ရွေးချယ်ပြီး မျိုးဆက်အလိုက် တစ္ဆေတွေကို ဖြေရှင်းခိုင်းချင်ခဲ့တယ် အဖိုးကြီးချင်ကလည်း နောက်မျိုးဆက် တစ္ဆေဘတ်စ်ကား ယာဉ်မောင်းကို ရှာဖွေချင်ခဲ့တယ် ရလဒ်ကတော့ တစ္ဆေစာပို့တိုက်မှာ ကျန်းရှန့်ကွမ်း ပေါ်လာပြီး အဖိုးကြီးချင် ရှာထားတဲ့ ယာဉ်မောင်းကလည်း ကားတိုက်ခံရပြီး သေသွားတယ် တိုက်ဖိန် ရှေးဟောင်းမြို့ရဲ့ ဝိညာဉ်ခေါ်သူ စုဆောင်းထားတဲ့ ဝှက်ဖဲတွေကလည်း တဖြည်းဖြည်း ကုန်ခမ်းလာတယ် လမ်းကြောင်းမှန်ပေါ် ရောက်ခဲ့တဲ့သူဆိုလို့ အစ်မဟုန် တစ်ယောက်ပဲ ရှိတယ်"

"ဒါပေမယ့် သူ့အသိစိတ်က လျိုချင်းချင်း ဆိုတဲ့ မိန်းမနဲ့ ရောနှောသွားပြီး မသန့်ရှင်းတော့ဘူး သူက အရင်မျိုးဆက် ကျန်းယို့ဟုန်ရဲ့ စွမ်းအားကို ဆက်ခံထားပြီး သမ္မတနိုင်ငံခေတ်က စွမ်းအားတွေကို ပြန်လည် အသုံးပြုနိုင်ပေမယ့် သက်တမ်း ပြဿနာကို ယာယီ ဖြေရှင်းထားနိုင်ပေမယ့် မသန့်ရှင်းတဲ့ အသိစိတ် ရှိနေတာက ပုံမှန် လူ့အသိစိတ် မရှိတော့ဘူး ဆိုတဲ့ သဘောပဲ နောက်ထပ် တစ်ဘဝ ထပ်နေရရင် တတိယဘဝ ရောက်ရင် သူ့စရိုက်က ပြောင်းလဲသွားလိမ့်မယ် နောက်ဆုံးကျ လူမလုပ်ချင်တော့ဘဲ တစ္ဆေလုပ်ချင်သွားရင် သူက မဟာမိတ် မဟုတ်တော့ဘဲ ကြောက်မက်ဖွယ် ရန်သူ ဖြစ်လာလိမ့်မယ်"

"ဝမ်ချာလင်းလည်း ဒီလိုပါပဲ ဝမ်မိသားစု စတုတ္ထမျိုးဆက် မွေးလာရင် ကောင်းမလား ဆိုးမလား မသိနိုင်ဘူး တကယ်လို့ ဝမ်လေးက လူဆိုးလုပ်မယ် ဆိုရင် ဝမ်မိသားစု မျိုးဆက်အလိုက် စုဆောင်းထားတဲ့ တစ္ဆေတွေနဲ့ဆိုရင် တစ္ဆေဆရာလောက တစ်ခုလုံးကို မွှေနှောက်လို့ ရသွားလိမ့်မယ်"

"အဲဒီအချိန်ကျရင် သူတို့ စိတ်ကြိုက် လုပ်ချင်ရာ လုပ်ပြီး ပျော်နေကြမှာ ဒါပေမယ့် ခေတ်ကြီးအတွက်တော့ ကြီးမားတဲ့ ထိုးနှက်ချက် ဖြစ်သွားလိမ့်မယ်"

ဟယ်ယွဲ့လျန်က ဆက်ပြောသည်။

"မင်း ပြောသလိုဆိုရင် ဒါကို ဘယ်သူမှ တကယ် မလုပ်နိုင်ဘူးပေါ့"

"အရမ်း ခက်ခဲတယ် မင်းလည်း သိတယ် အသက်ရှင်နေသေးတဲ့ သမ္မတနိုင်ငံခေတ်က လူကြီးလည်း သိတယ် ဒါကြောင့် ဒီအရာက လူက ဖန်တီးယူလို့ ရတာ မဟုတ်တော့ဘူး ကံတရား အပြောင်းအလဲတွေအပေါ် မူတည်နေပြီ"

ယန်ကျန့် ပြောလိုက်သည်။

သူ ဒီလောက် ခရီးပေါက်လာပြီးနောက် ရှေးလူကြီးများ၏ ကြိုးစားအားထုတ်မှုများကို နားလည်လာခဲ့ပြီ ဖြစ်သည်။

ကြိုးစားမှုတိုင်းတွင် မျိုးဆက်တစ်ခု၏ အကြီးမားဆုံး ဉာဏ်ပညာများ ပါဝင်နေခဲ့သည်။

တစ္ဆေစာပို့တိုက်၏ စာပို့သမား ရွေးချယ်မှုသည် မအံ့သြစရာ ကောင်းပေဘူးလော။

ယန်ကျန့် ကိုယ်တိုင်တောင် ဒီလောက် ကောင်းမွန်သော နည်းလမ်းကို စဉ်းစားမိမည် မဟုတ်ပေ။ ထိပ်တန်း တစ္ဆေဆရာများကို မွေးထုတ်ပေးနိုင်သလို အစွမ်းထက်ဆုံး လူကို မန်နေဂျာအဖြစ် ရွေးချယ်နိုင်သည်။ ဒီစနစ်သာ ဆက်လက် လည်ပတ်နေပါက သဘာဝလွန် ဖြစ်ရပ် အများအပြားကို ဖြေရှင်းနိုင်မည်မှာ သေချာသည်။

ဝမ်မိသားစု ကျိန်စာကို စတင်ခဲ့သော ပထမမျိုးဆက်သည် မတော်ပေဘူးလော။ သူသည် မျိုးဆက်အလိုက် စုဆောင်းမှုများ ပေးဆပ်မှုများ ပြုလုပ်ပြီး နောက်ဆုံး မျိုးဆက်တစ်ခုတွင် နှလုံးသားကြီးမားသော လူတစ်ယောက် ပေါ်ထွက်လာရန် မျှော်လင့်ခဲ့ခြင်း ဖြစ်ပေမည်။ ထိုလူက ဝမ်မိသားစု၏ တစ္ဆေဆယ်ချီ ရာချီကို ဦးဆောင်ပြီး တစ္ဆေဆရာလောကကို ထိန်းသိမ်းကာ တစ္ဆေနိုးထမှု ခေတ်ဆိုးကြီးကို အဆုံးသတ်ပေးလိမ့်မည်ဟု မျှော်လင့်ခဲ့ပေလိမ့်မည်။

အခြား အလားတူ ကိစ္စများ အများကြီး ရှိပါသေးသည်။

တချို့က ဒီခေတ်တွင် သူတို့၏ လုပ်ရပ်များကို လူသိရှင်ကြား ချန်ထားခဲ့သော်လည်း ပိုများသော လူများကမူ ကျရှုံးသွားပြီး သမ္မတနိုင်ငံခေတ်တွင် မြှုပ်နှံခံလိုက်ရသည် နာမည်တောင် မကျန်ရစ်ခဲ့ပေ။

ကျန်းရှန့်ကွမ်း ဆိုလျှင်လည်း တသက်လုံး ကြံစည်ခဲ့သော်လည်း နောက်ဆုံး ကျရှုံးသွားခဲ့သည်။ ယန်ကျန့်သာ သူ့ကို မသတ်ဘဲ လွှတ်ပေးခဲ့၍သာ အနာဂတ်တွင် ကျန်းရှန့်ကွမ်း ဆိုသော လူတစ်ယောက် မက်မွန်ပွင့် ဥယျာဉ် စီမံကိန်းကို အကောင်အထည်ဖော်ရန် ကြိုးစားခဲ့ဖူးသည် ဆိုတာ သိကြရပေမည်။

ဖုန်းချွမ်းတောင် အရင်တုန်းက တစ္ဆေခေါင်းတလားကို ထိန်းချုပ်ပြီး တစ္ဆေဖမ်းသမား၏ စွမ်းအားကို ရယူကာ သဘာဝလွန် ဖြစ်ရပ် အားလုံးကို အဆုံးသတ်ချင်ခဲ့ဖူးသည်။

ဒါပေမယ့် ဒီခေတ်ကြီးက ရက်စက်သည် မှောင်မိုက်သည် မျှော်လင့်ချက် ရောင်ခြည်လေး နည်းနည်း ပေါ်လာသည်နှင့် ချက်ချင်း ငြှိမ်းသတ်ပစ်တတ်သည်။

လျိုစန်း၏ စက္ကူရုပ်သည် အချိန်အတော်ကြာ တိတ်ဆိတ်နေပြီးမှ ပြောလိုက်သည်။

"ဒါပေမယ့် ယန်ကျန့် မင်း စဉ်းစားမိလား စွမ်းအားကြီးတဲ့ သဘာဝလွန် စွမ်းအား ရှည်လျားတဲ့ သက်တမ်း ပြီးတော့ ပုံမှန် လူ့အသိစိတ် ဒီသုံးခု လူတစ်ယောက်တည်းဆီမှာ စုဆောင်းမိရင် ကြောက်မက်ဖွယ်ကောင်းတဲ့ သတ္တဝါဆိုးကြီး တစ်ကောင် ဖြစ်လာနိုင်တယ် ဆိုတာကိုလေ လူတွေက ရည်မှန်းချက်ကြီးတယ် ပြီးတော့ ပြောင်းလဲလွယ်တယ်"

"လူတစ်ယောက်က ဘာချုပ်နှောင်မှုမှ မရှိတော့ရင် သူကိုယ်တိုင်က အကြောက်စရာ အကောင်းဆုံး ဖြစ်လာတတ်တယ်"

ယန်ကျန့် ပြောလိုက်သည်။

"ငါ သိပါတယ် ဒါကြောင့် အခက်ခဲဆုံးက တတိယအချက် ဖြစ်တဲ့ ပုံမှန် လူ့အသိစိတ်ပဲ ခံယူချက်တစ်ခု အတွေးအခေါ်တစ်ခုကို အချိန်ကြာမြင့်စွာ ထိန်းသိမ်းထားဖို့ ဆိုတာ အရမ်း ခက်ခဲတဲ့ ကိစ္စပဲ တစ်ခုကလွဲရင်ပေါ့"

"တစ်ခုက ဘာလဲ"

လျိုစန်း၏ စက္ကူရုပ်က ထပ်မေးလိုက်သည်။

သူ ဒီအကြောင်းအရာကို စိတ်ဝင်စားနေသည်။ ယန်ကျန့်၏ စကားများသည် အနာဂတ် ကမ္ဘာကြီး၏ လားရာကို ပြောင်းလဲစေနိုင်သောကြောင့် ဖြစ်သည်။

"လူ့အသိစိတ်က တစ္ဆေရဲ့ သတ်ဖြတ်ခြင်း စည်းမျဉ်းလိုမျိုး အလုပ်လုပ်ပြီး ပြောင်းလဲလို့ မရနိုင်ရင်ပေါ့"

ယန်ကျန့် ပြောလိုက်သည်။

"ဒါ မဖြစ်နိုင်ဘူး"

ထုန်ချန် ချက်ချင်း ဝင်ပြောလိုက်သည်။

ယန်ကျန့် အဝေးကို လှမ်းကြည့်လိုက်သည်။

"ဟုတ်တယ် ဒါ မဖြစ်နိုင်ဘူး"

"ဒါပေမယ့် အဲဒီလို လူမျိုး ရှိခဲ့ရင် အဲဒါ လူ မဟုတ်တော့ဘူးလို့ ငါ ထင်တယ်"

လျိုစန်း၏ စက္ကူရုပ်က ရယ်လိုက်သည်။

"ဘုရားသခင်လို့ ခေါ်ရင်တောင် မမှားဘူး ထင်တယ်"

"ဘုရားသခင် ဟုတ်လား မင်း ဒီရက်ပိုင်း ရဲကျန့်နဲ့ ပေါင်းတာ များနေပြီ ထင်တယ် သူ့နဲ့ ခပ်ဝေးဝေး နေစမ်းပါ သူက မတုံးပေမယ့် ဒီနားလေးမှာ ပြဿနာ ရှိတယ် ရောဂါကျွမ်းနေပြီ ကယ်လို့ မရတော့ဘူး"

ယန်ကျန့်က ခေါင်းကို လက်ညှိုးထိုးပြပြီး ပြောလိုက်သည်။

လျိုစန်း၏ စက္ကူရုပ် ရယ်မောလိုက်သော်လည်း ချက်ချင်း အပြုံး ရပ်တန့်သွားပြီး မျက်နှာထား လေးနက်သွားသည်။

ထုန်ချန်က ဒီအမူအရာကို သတိထားမိလိုက်သည်။

"တစ်ခုခု ဖြစ်လို့လား"

"ဟောင်းနွမ်းနေတဲ့ ရေကြောင်းမြေပုံပေါ်မှာ တစ္ဆေသင်္ဘော ပေါ်လာပြီ"

လျိုစန်း၏ စက္ကူရုပ်က လေးလေးနက်နက် ပြောလိုက်သည်။

"ဒါပေမယ့် ထူးဆန်းတယ် ဒီတခါ နေရာ ပြောင်းသွားတယ် ပင်လယ်ထဲမှာပဲ ရှိသေးတယ် တာဟိုင်မြို့နဲ့ ပိုဝေးသွားတယ်"

"လမ်းကြောင်း ပြောင်းသွားတာလား"

ထုန်ချန် မျက်လုံးများ အရောင်လက်သွားသည်။

လမ်းကြောင်း ပြောင်းသွားလျှင် အန္တရာယ် ယာယီ ကင်းဝေးသွားပြီဟု ဆိုလိုသည်။

"မဟုတ်ဘူး တစ္ဆေသင်္ဘောက ထိန်းချုပ်မှု လွတ်ပြီး နေရာ အတိအကျ မသွားနိုင်တော့တာ ဖြစ်မယ် တစ္ဆေဘတ်စ်ကား တိုက်ခံရပြီးနောက် ဘာမှ မဖြစ်ဘဲ နေမှာ မဟုတ်ဘူး သေချာပေါက် ထိခိုက်မှု ရှိမှာပဲ"

ယန်ကျန့် ချက်ချင်း ပြောလိုက်သည်။

လျိုစန်း ပြောလိုက်သည်။

"ဒီလိုဆိုရင် နောက်တစ်ခေါက် တစ္ဆေသင်္ဘော ကမ်းကပ်ရင် တာဟိုင်မြို့ ဖြစ်ချင်မှ ဖြစ်တော့မယ် ကြုံရာနေရာတစ်ခု ဖြစ်နိုင်တယ်"

"ဘယ်နေရာ ကမ်းကပ်ကပ် ငါ မပူဘူး ရေကြောင်းမြေပုံက ၅ မိနစ် ကြိုသိရတယ် ဘယ်နေရာဖြစ်ဖြစ် ငါ အရောက်သွားနိုင်တယ် ငါ စိုးရိမ်တာက တစ္ဆေသင်္ဘောက ဘယ်နေရာ ကမ်းကပ်မယ် ဆိုတာ ဂရုမစိုက်တော့ဘဲ ပေါ်လာတာနဲ့ တစ္ဆေတွေကို လွှတ်ထုတ်လိုက်မှာကိုပဲ"

ယန်ကျန့် သူ့စိတ်ထဲရှိ စိုးရိမ်မှုကို ပြောပြလိုက်သည်။

"မဖြစ်နိုင်ပါဘူး တွေ့ကရာနေရာမှာ တစ္ဆေတွေ လွှတ်ထုတ်မယ် ဟုတ်လား ဘာကြောင့်လဲ"

ထုန်ချန် အံ့သြသွားသည်။

ယန်ကျန့် ပြောလိုက်သည်။

"အခု တစ္ဆေသင်္ဘောကို ထိန်းချုပ်ထားတာ လူမဟုတ်ဘူး တစ္ဆေတွေလေ တစ္ဆေတွေက ဒီလိုလုပ်ရင် မထူးဆန်းပါဘူး တစ္ဆေတွေရဲ့ မျက်လုံးထဲမှာ ငါတို့က ရန်သူတွေပဲ သဘာဝလွန် အရာတွေ ထိန်းချုပ်မရ ဖြစ်သွားတဲ့ ခေတ်ကြီးက ရန်သူကို တိုက်ခိုက်ဖို့ အကောင်းဆုံး လက်နက်ပဲ"

"စိတ်မချရင် သွားကြည့်မလား"

ဟယ်ယွဲ့လျန်၏ အသံက ခေါင်းဆောင်းအောက်မှ ထွက်ပေါ်လာပြီး အကြံပြုလိုက်သည်။

"ငါလည်း အဲဒီလို တွေးနေတာ"

ယန်ကျန့် ပြောပြီး လျိုစန်း၏ စက္ကူရုပ်ကို ကြည့်လိုက်သည်။

လျိုစန်း၏ စက္ကူရုပ် ချက်ချင်း သဘောပေါက်သွားပြီး ရေကြောင်းမြေပုံပေါ်မှ ကော်ဩဒိနိတ် များကို အသုံးပြုကာ တည်နေရာ အတိအကျ ရှာဖွေလိုက်သည်။