ဝိညာဉ်သန္ဓေသား အစောပိုင်းအဆင့် ပြီးပြည့်စုံခြင်း၊ ကျူးရှန်းဓားသိုင်းကို ကျင့်ကြံခြင်း(၂)။

ဤအချိန်တွင် သူမတို့၏ ချစ်ခြင်းမေတ္တာသည် အထွတ်အထိပ်သို့ ရောက်ရှိသွားကြသည်။

"ဘာတုန်းဟ..."

ကျိုးစွေ့ မျက်တောင်ခတ်လိုက်မိ၏။ သူ့ခန္ဓာကိုယ်ပေါ်ရှိ 'ချစ်ခြင်းမေတ္တာကူ'သည် ကြီးမားသော ချစ်ခြင်းမေတ္တာနှင့် သံယောဇဉ်များကို လောဘတကြီး ဝါးမြိုနေပြီး အပြည့်အဝ ကြီးထွားလာနေကာ၊ 'ချစ်ခြင်းမေတ္တာကူ'၏ စွမ်းအား ဆင့်ကဲပြောင်းလဲနေသည်ကို အာရုံခံမိလိုက်သည်။

"ယောက်ျား..."

ကျိပင်းယွီ၊ မုဇီယန်နှင့် ရှားကျင်းယန်တို့သုံးဦးသည် ကျိုးစွေ့ကို ချစ်ခြင်းမေတ္တာ အပြည့်ဖြင့် ကြည့်လိုက်ကြသည်။

မကြာမီတွင် ဧည့်ခန်းဆောင်ထဲမှ စည်းချက်ညီသော တာအိုတေးသွားသံစဉ်များ တီးခတ်လိုက်သည့်နှယ် တဖြန်းဖြန်း အသံများ ထွက်ပေါ်လာတော့သည်။

ရက်အနည်းငယ်ကြာပြီးနောက်...။

ကျိုးစွေ့သည် နူးညံ့စွဲမက်ဖွယ်ကောင်းသော အိပ်မက်ကမ္ဘာထဲမှ နိုးထလာခဲ့သည်။ ကျင့်ကြံခြင်းသည် အလွန် ပင်ပန်းသည်ဟု ဆိုရပေမည်။

ထင်ရှားသည်မှာ ဤကဲ့သို့သော ကျင့်ကြံခြင်းမျိုးသည် အတိုင်းအတာဖြင့် ကန့်သတ်ထားသင့်သည်။

သူသည် 'နဂါးဆင်ခန္ဓာ'ကို ပိုင်ဆိုင်ထားသဖြင့် အားအင် အကန့်အသတ်မရှိသော်လည်း၊ သူ၏ တာအိုလက်တွဲဖော်များ၏ ခန္ဓာကိုယ်ဖွဲ့စည်းပုံမှာမူ ထိုမျှ မကောင်းမွန်လှရာ အတော်အတန် ထိန်းသိမ်းရန် လိုအပ်ပေသည်။ ရေရှည်အတွက် ကြည့်ရမည် မဟုတ်ပါလော။

"ကြည့်ရတာ 'ကောင်းကင်မြေကြီး ဝိညာဉ်အမြစ်'တွေကို သွားရှာဖို့ လိုအပ်နေပြီ..."

"သူမတို့နဲ့ သင့်တော်တဲ့ 'ကောင်းကင်မြေကြီး ဝိညာဉ်အမြစ်'က အကန့်အသတ်မရှိ ဆင့်ကဲပြောင်းလဲနိုင်ရင် အကောင်းဆုံးပဲ..."

"မဟုတ်ရင် အဆင့်တစ်ခုမှာ တန့်နေပြီး ထပ်မံ ချိုးဖျက်နိုင်မှာ မဟုတ်တော့ဘူး..."

"ဒုတိယအချက်က ဒီ 'ကောင်းကင်မြေကြီး ဝိညာဉ်အမြစ်'ရဲ့ လွှမ်းခြုံနိုင်တဲ့ ဧရိယာ ကျယ်ဝန်းဖို့ လိုတယ်..."

"လွှမ်းခြုံဧရိယာ ကျယ်ဝန်းမှသာ လှုပ်ရှားနိုင်တဲ့ ဧရိယာလည်း ကျယ်ဝန်းမှာ... နေရာကျဉ်းကျဉ်းလေးမှာ ပိတ်မိနေလို့ မဖြစ်ဘူး..."

"အကောင်းဆုံးကတော့ ကျွန်းတစ်ကျွန်းလုံးကို လွှမ်းခြုံနိုင်ရင် ပိုကောင်းမယ်..."

"ဒါဆိုရင် 'ကောင်းကင်မြေကြီး ဝိညာဉ်အမြစ်'နားကနေ မခွာနိုင်ရင်တောင်မှ ကျွန်းပေါ်မှာ လွတ်လွတ်လပ်လပ် နေနိုင်သေးတယ်..."

"လှုပ်ရှားမှုဧရိယာ သိပ်ကန့်သတ်မခံရတော့ဘူးပေါ့..."

ကျိုးစွေ့ မျက်လုံးများကို မှေးစင်းလိုက်ပြီး သူ ရှာဖွေလိုသော 'ကောင်းကင်မြေကြီး ဝိညာဉ်အမြစ်'အကြောင်း စဉ်းစားလိုက်သည်။

သူ၏ သတ်မှတ်ချက်များ များပြားသော်လည်း စတုတ္ထအဆင့် 'ပစ္စည်းရှာဖွေကူ'၏ စွမ်းအားသည် ဆန်းကြယ်လှသည်ဖြစ်ရာ သူ၏ ဆန္ဒများကို ဖြည့်ဆည်းပေးနိုင်မည် ဖြစ်၏။

ဘုန်း...

ချက်ချင်းပင် စတုတ္ထအဆင့် 'ပစ္စည်းရှာဖွေကူ'၏ စွမ်းအားများ ထွက်ပေါ်လာပြီး ပျံ့နှံ့သွားကာ ဟင်းလင်းပြင် အနက်ပိုင်းနေရာမှ ကံတရားကြိုးမျှင်များကို ရှာဖွေနေတော့သည်။

အချိန်မည်မျှ ကြာမြင့်သွားမှန်း မသိပေ။ 'ပစ္စည်းရှာဖွေကူ'၏ ခန္ဓာကိုယ်မှ အလင်းရောင်များ လက်သွားပြီး သတင်းအချက်အလက်တစ်ခုသည် ကျိုးစွေ့၏ သိစိတ်ပင်လယ် အနက်ပိုင်းနေရာသို့ တိုးဝင်ရောက်ရှိလာတော့သည်။

"မဖြစ်နိုင်တာ... တကယ် ရှာတွေ့သွားတာလား..."

"ဒါပေမဲ့ ဒီ 'ကောင်းကင်မြေကြီး ဝိညာဉ်အမြစ်'က ချန်လန်ပင်လယ်ဒေသမှာ ရှိတာ မဟုတ်ဘဲ အခြား တိုက်ကြီးတစ်ခုမှာ ရှိနေတာပဲ..."

"'ပစ္စည်းရှာဖွေကူ'ရဲ့ ညွှန်ပြချက်အရ အရှေ့ဘက် ကုန်းမြေတိုက်ကြီးမှာ ရှိနေပုံပဲ..."

"ကြည့်ရတာ အရှေ့ဘက် ကုန်းမြေတိုက်ကြီးဆီ ကိုယ်ပွားတစ်ကောင် လွှတ်လိုက်မှ ရမယ်..."

ကျိုးစွေ့ မေးစေ့ကို ပွတ်သပ်လိုက်လေသည်။

လွန်ခဲ့သောရက်များက ကုယုံဂိုဏ်းမှ ချန်ထားရစ်ခဲ့သော ရှေးဟောင်း တည်နေရာရွှေ့ပြောင်းအစီအရင်ကို သူ သေချာ လေ့လာခဲ့သည်။

စုစုပေါင်း ရွှေ့ပြောင်းနိုင်သော နေရာ (၁၈) ခု ရှိပေသည်။

ထိုအထဲတွင် အရှေ့ဘက် ကုန်းမြေတိုက်ကြီးတွင် သုံးခု၊ အနောက်ဘက် ကုန်းမြေတိုက်ကြီးတွင် သုံးခု၊ မြောက်ဘက် ကုန်းမြေတိုက်ကြီးတွင် သုံးခုနှင့်၊ တောင်ဘက် ကုန်းမြေတိုက်ကြီးတွင် နောက်ထပ်သုံးခုရှိပြီး ကျန်သည်များမှာ ချန်လန်ပင်လယ်ဒေသတွင် ရှိကြသည်။

ဆိုလိုသည်မှာ ရှေးဟောင်း တည်နေရာရွှေ့ပြောင်းအစီအရင်၏ စွမ်းအားကို အသုံးပြုပြီး ကျင့်ကြံခြင်းလောကအနှံ့ကို သွားလာနိုင်ပေသည်။

မှန်ပေသည်၊ သူသည် ထိုကုန်းမြေတိုက်ကြီးများ၏ အခြေအနေကို သိပ်နားမလည်ပေ။

သို့သော် ကိစ္စမရှိပေ။

မည်သို့ပင်ဖြစ်စေ သူ့တွင် ကိုယ်ပွားများစွာ ရှိရာ ကိုယ်ပွားများကို စေလွှတ်ပြီး ကမ္ဘာအနှံ့ ဖြန့်ကြက်ထားနိုင်သည်။

ကျင့်ကြံခြင်းလောက၏ နေရာဒေသအသီးသီးမှ အခြေအနေများကို စုံစမ်းထောက်လှမ်းခိုင်းပြီး ကြိုတင်ပြင်ဆင်ထားနိုင်သည်။

"အင်း... 'စာအုပ်ကူ'က နတ်ဆိုးသတ်ဂိုဏ်းရဲ့ ကျင့်စဉ်တွေကို အကုန် ဝါးမြိုပြီးသွားပြီလား..."

ဤအချိန်တွင် ကျိုးစွေ့ စိတ်ထဲတွင် လှုပ်ရှားသွားပြီး 'စာအုပ်ကူ'ထံမှ သတင်းအချက်အလက်ကို ရရှိလိုက်သည်။

အမှန်တကယ်တွင် နတ်ဆိုးသတ်ဂိုဏ်းထံမှ ရရှိခဲ့သော ကျင့်စဉ်များနှင့် အမွေအနှစ် ကျောက်စိမ်းမှတ်တမ်းများကို ရရှိသည်နှင့်တပြိုင်နက် 'စာအုပ်ကူ'ကို ကျွေးမွေးခဲ့ခြင်း ဖြစ်၏။

သို့သော် ဤအမွေအနှစ် ကျောက်စိမ်းမှတ်တမ်းများ၏ အဆင့်အတန်းသည် မြင့်မားပြီး ပဉ္စမအဆင့် အမွေအနှစ်များလည်း ပါဝင်နေသည်။

ထို့ကြောင့် 'စာအုပ်ကူ'အတွက် အလွန် အဖိုးတန်သော အစာများ ဖြစ်ပြီး ချေဖျက်ရန် အချိန်ကြာမြင့်ခြင်း ဖြစ်သည်။

"ရှေးဟောင်းခေတ် နတ်ဘုရားအသွင်ပြောင်းအဆင့်ဂိုဏ်း နတ်ဆိုးသတ်ဂိုဏ်းဆိုတဲ့ ဂုဏ်ပုဒ်နဲ့ တကယ်ကို ထိုက်တန်ပါပေတယ်..."

"ဒီကျင့်စဉ်အမွေအနှစ်တွေ အကုန်လုံးက သတ်ဖြတ်ခြင်းလမ်းစဉ်နဲ့ ကြီးမားတဲ့ ပတ်သက်မှု ရှိနေတယ်..."

"သတ်ဖြတ်ဖို့အတွက် သီးသန့် မွေးဖွားလာတဲ့ ကျင့်စဉ်တွေပဲ..."

"'နတ်ဆိုးသတ်ဓားသိုင်း'၊ 'နတ်ဆိုးသတ်ကျင့်စဉ်' စသဖြင့်ပေါ့..."

"ဒါပေမဲ့ ယေဘုယျပြောရရင် နတ်ဆိုးသတ်ဂိုဏ်းရဲ့ စစ်မှန်တဲ့ ပင်မကျင့်စဉ်က အတုမဲ့ ဓားသိုင်းကျင့်စဉ်တစ်ခုကနေ ဆင်းသက်လာတာ..."

"အဲ့ဒီနာမည်က 'ကျူးရှန်းဓားသိုင်း' ..."

ကျိုးစွေ့ မျက်လုံးများကို မှေးစင်းလိုက်သည်။

နတ်ဆိုးသတ်ဂိုဏ်းမှ ချန်ရစ်ခဲ့သော အမွေအနှစ်များကို ဝါးမြိုပြီးနောက် သူသည် နတ်ဆိုးသတ်ဂိုဏ်း၏ အခြေခံကို ချက်ချင်း သိရှိသွားခဲ့သည်။

၎င်းသည် သတ်ဖြတ်လိုစိတ် ပြင်းထန်သော ဂိုဏ်းတစ်ခုဖြစ်ပြီး မိစ္ဆာလမ်းစဉ်ဂိုဏ်းနှင့်ပင် အနည်းငယ် ဆင်တူနေသည်။

မှန်ပေသည်၊ ၎င်းသည် ထိုခေတ်ကာလ၏ လိုအပ်ချက်အရ ပေါ်ပေါက်လာသော ဂိုဏ်းတစ်ခုဖြစ်ပြီး တည်ရှိခဲ့သောကာလမှာ တိုတောင်းသည်။

သို့သော် ဖြစ်ပေါ်စေခဲ့သော သက်ရောက်မှုမှာ အလွန် ကြီးမားသည်။

ရှေးဟောင်းမှတ်တမ်း အများအပြားတွင် နတ်ဆိုးသတ်ဂိုဏ်း၏ သမိုင်းကြောင်းကို မှတ်တမ်းတင်ထားကြသည်။

သို့သော် နတ်ဆိုးသတ်ဂိုဏ်း၏ ပင်မကျင့်စဉ်သည် 'ကျူးရှန်းဓားသိုင်း'မှ ဆင်းသက်လာလိမ့်မည်ဟု သူ ထင်မထားခဲ့ပေ။

ဆိုကြသည်မှာ နတ်ဆိုးသတ်ဂိုဏ်း၏ ဂိုဏ်းချုပ်သည် ဤအင်မော်တယ်ကျင့်စဉ်ကို ရရှိခဲ့ခြင်း ဖြစ်သည်။

ဤဓားသိုင်း၏ အဆင့်အတန်းသည် မယုံနိုင်လောက်အောင် မြင့်မားပြီး ဆဌမအဆင့် သို့မဟုတ် သတ္တမအဆင့်တွင် ရှိနိုင်ပေသည်။

အတိုချုပ်ပြောရလျှင် လူ့လောကတွင် မရှိသင့်သော ကျင့်စဉ်တစ်ခုပင် ဖြစ်၏။

နတ်ဆိုးသတ်ဂိုဏ်း၏ ဂိုဏ်းချုပ်သည် ဤဓားသိုင်းကို ရရှိပြီးနောက် ကျင့်ကြံခြင်းသည် အရှိန်အဟုန်ဖြင့် တိုးတက်လာပြီး တိုက်ခိုက်ရေးစွမ်းရည် ထိုးတက်သွားခဲ့သည်။

အဆင့်ကျော် တိုက်ခိုက်ခြင်းသည် ထမင်းစားရေသောက်သကဲ့သို့ ဖြစ်လာသည်။

နတ်ဆိုးများကို သတ်ဖြတ်ခြင်းသည် ရေသောက်သကဲ့သို့ လွယ်ကူသည်။

သို့သော် ဤဓားသိုင်းကို စတင် သင်ယူရန် ခက်ခဲလွန်းလှသည်။ နတ်ဆိုးသတ်ဂိုဏ်း ဂိုဏ်းချုပ်မှလွဲ၍ မည်သူမျှ မသင်ယူနိုင်ခဲ့ကြပေ။

ထိုအကြောင်းရင်းကြောင့်ပင် နတ်ဆိုးသတ်ဂိုဏ်း ဂိုဏ်းချုပ်သည် ဤဓားသိုင်းကို အပိုင်းလေးပိုင်း ခွဲခြားလိုက်ရသည်။

၎င်းတို့မှာ 'ကျူး'၊ 'လု'၊ 'ရှန်'၊ 'ကျွယ်' ဟူသော ဓားသိုင်းလေးမျိုး ဖြစ်သည်။

ဤအပိုင်းလေးပိုင်းမှ မတူညီသော သတ်ဖြတ်ခြင်း ဓားသိုင်းများနှင့် ကျင့်စဉ်များကို မွေးဖွားပေးလိုက်သည်။

ကျင့်ကြံသူများ၏ နားလည်သဘောပေါက်မှုအပေါ် မူတည်ပြီး မတူညီသော သတ်ဖြတ်ခြင်း ဓားကွက်များ ပေါ်ထွက်လာသည်။

ဤအင်မော်တယ်ကျင့်စဉ်တစ်ခုတည်းကပင် ကြီးမားသော နတ်ဘုရားအသွင်ပြောင်းအဆင့် ဂိုဏ်းကြီးတစ်ခုကို ဖန်တီးပေးခဲ့ပြီး၊ နတ်ဆိုးမရေမတွက်နိုင်အောင် သတ်ဖြတ်ကာ သွေးချောင်းစီးစေခဲ့သည်။

"'ကျူးရှန်းဓားသိုင်း'ရဲ့ အဆင့်အတန်းက အရမ်းမြင့်တယ်... အင်မော်တယ်ကျင့်စဉ် ဖြစ်နိုင်တယ်..."

"အတိတ်တုန်းက နတ်ဆိုးသတ်ဂိုဏ်း ဂိုဏ်းချုပ် သင်ယူနိုင်ခဲ့တာကလည်း သူမှာ 'ကောင်းကင်ဓားခန္ဓာ'ဆိုတဲ့ ထူးခြားတဲ့ ခန္ဓာကိုယ် ရှိနေလို့ပဲ..."

"ဒီလိုခန္ဓာကိုယ်မျိုးက ဘယ်လို ဓားသိုင်းမျိုးကိုမဆို သင်ယူလိုက်တာနဲ့ တတ်မြောက်သွားပြီး... မွေးရာပါ ဓားအင်မော်တယ်လို့ ပြောလို့ရတယ်..."

"ဝမ်းနည်းစရာက ရှေးဟောင်းခေတ်မှာတောင် ဒီလို ထူးခြားတဲ့ ခန္ဓာကိုယ်ပိုင်ရှင်က နတ်ဆိုးသတ်ဂိုဏ်း ဂိုဏ်းချုပ် တစ်ယောက်တည်း ရှိခဲ့တာပဲ..."

"နတ်ဆိုးသတ်ဂိုဏ်း ဂိုဏ်းချုပ်တောင်မှ နတ်ဘုရားအသွင်ပြောင်းအဆင့်အထိပဲ ကျင့်ကြံနိုင်ခဲ့တယ်..."

"နောက်ဆုံးတော့ နတ်ဘုရားအသွင်ပြောင်းအဆင့် နတ်ဆိုးအများအပြားရဲ့ ဝိုင်းဝန်းတိုက်ခိုက်မှုကြောင့် သေဆုံးသွားခဲ့ရတယ်..."

"မသေခင်မှာ နတ်ဘုရားအသွင်ပြောင်းအဆင့် နတ်ဆိုးအများအပြားကို သတ်ဖြတ်နိုင်ခဲ့ပေမယ့် နောက်ဆုံးတော့ ကိုယ်တိုင်လည်း သေဆုံးသွားခဲ့ရတာပဲ..."

"ဒါပေမဲ့ ဒီအချက်က 'ကျူးရှန်းဓားသိုင်း'ရဲ့ စွမ်းအားကြီးမှုကို သက်သေပြဖို့ လုံလောက်နေပြီ... ကျင့်ကြံခြင်းလောကရဲ့ နံပါတ်တစ် သတ်ဖြတ်ခြင်း ဓားသိုင်းဆိုတာ သေချာတယ်..."

ကျိုးစွေ့ မျက်လုံးများကို မှေးစင်းလိုက်သည်။

အမှန်အတိုင်း ပြောရလျှင် သူ ရရှိထားသော 'စစ်မှန်သောနဂါး ဓားသိုင်း'သည် စတုတ္ထအဆင့်သာ ရှိသေးပြီး မပြည့်စုံသော အခြေအနေတွင် ရှိနေသည်။

ပြီးပြည့်စုံသော 'စစ်မှန်သောနဂါး ဓားသိုင်း'ကို ရှာဖွေရန် ခက်ခဲသည်။

ဓားသိုင်းကျင့်စဉ်အသစ် မရှိပါက သူ၏ ဓားလမ်းစဉ်သည် လမ်းဆုံးသွားနိုင်ကြောင်း တွေးမိခဲ့သည်။

သို့သော် ယခုမူ မတူညီတော့ချေ။ နတ်ဆိုးသတ်ဂိုဏ်းထံမှ ပင်မကျင့်စဉ်ဖြစ်သော 'ကျူးရှန်းဓားသိုင်း'ကို ရရှိခဲ့ပြီ ဖြစ်သည်။

အကယ်၍ သင်ယူနိုင်ပါက သူသည် စစ်မှန်သော ပြိုင်ဘက်ကင်း ဓားအင်မော်တယ် ဖြစ်လာပေလိမ့်မည်။

သူ့တွင် 'ကောင်းကင်ဓားခန္ဓာ' မရှိသော်လည်း သူ့တွင် 'စာအုပ်ကူ'၏ အကူအညီ ရှိသည် မဟုတ်ပါလော။

'စာအုပ်ကူ' ပေးစွမ်းသော နားလည်သဘောပေါက်နိုင်စွမ်းဖြင့် ဤ 'ကျူးရှန်းဓားသိုင်း'ကို မသင်ယူနိုင်စရာ အကြောင်းမရှိဟု ယုံကြည်မိလေသည်။

"ဟုတ်သား... နတ်ဆိုးသတ်ဂိုဏ်းဆီကနေ ဝိညာဉ်လက်နက်တချို့လည်း ရထားသေးတာပဲ..."

"'မိစ္ဆာခွင်းဓား'တို့၊ 'နတ်ဆိုးသတ်ဓား'တို့က သတ်ဖြတ်လိုစိတ် ပြင်းထန်လွန်းတယ်... တာအိုလက်တွဲဖော်တွေ သုံးဖို့ မသင့်တော်ဘူး..."

"ဒီတော့ 'ရွှေစားကူ'တွေကို ကျွေးပစ်လိုက်တာ ပိုကောင်းမယ်..."

"သူတို့ စားပြီးရင် ဒီဝိညာဉ်လက်နက်တွေရဲ့ ဂုဏ်သတ္တိတွေကို ရရှိသွားမှာ..."

"အဲ့ဒီကျရင် သူတို့လည်း နတ်ဆိုးတွေနဲ့ မိစ္ဆာသားရဲတွေကို သတ်ဖြတ်နိုင်တဲ့ စွမ်းရည်ကို ပိုင်ဆိုင်လာပြီးတော့… ရန်သူရဲ့ အကာအကွယ်တွေကို ဖြိုခွင်းနိုင်လိမ့်မယ်..."

ကျိုးစွေ့ မေးစေ့ကို ပွတ်သပ်လိုက်လေသည်။

အနာဂတ်တွင် 'ရှေးဟောင်းနတ်ဆိုးကမ္ဘာ'မှ စစ်တပ်ကြီး ကျူးကျော်လာပါက 'ရွှေစားကူ'များကို အားကိုးရမည်ဟု သူ ခံစားမိသည်။

အုပ်စုလိုက် ဖွဲ့စည်းထားသော 'ရွှေစားကူ'များသည် အလွန် ကြောက်မက်ဖွယ်ကောင်းပြီး ဝိညာဉ်သန္ဓေသား စစ်တပ်တစ်ခုနှင့် ညီမျှပေသည်။ မည်သူက ခုခံနိုင်ပါမည်နည်း။