ဝမ်ပေါင်ရေကန်ကို လှုပ်ခတ်သွားစေခြင်း

မိုကျွင်းက ပုံရိပ်ယောင်ကမ္ဘာ အကြောင်း ပြောလာသည့်အခါ ထန်ထျန်းမှာ ချက်ချင်း စိတ်ဝင်တစား ဖြစ်သွား၏။

ဤလျှို့ဝှက်ဆန်းပြားသော အင်အားစု အပေါ် သူက အမြဲတမ်း စူးစမ်းချင်စိတ် ရှိနေသလို အချို့သော ရည်ရွယ်ချက်များလည်း ရှိနေပေသည်။

"သေချာတာပေါ့"

မိုကျွင်းက ပြော ၏။ "မင်းက ဒီလောက်အထိ ဆူဆူညံညံ လုပ်ထားမှတော့ ပုံရိပ်ယောင်ကမ္ဘာ က အနံ့ခံပြီး ရောက်လာမှာပဲ။"

" သူတို့က သူတို့ရဲ့ စီးပွားရေး ပုံစံသစ်ကို လူသိများအောင် လုပ်ချင်နေကြတာဆိုတော့ ဒီလို အခွင့်အရေးမျိုးကို လက်လွတ်ခံမှာ မဟုတ်ဘူး"

ထန်ထျန်းက ဖြည်းညင်းစွာ ခေါင်းညိတ်လိုက်သည်။

ပြီးခဲ့သည့် အချိန်က ချန်တာအိုခန်းမ မှ စွေ့ရှစ်ရင် နှင့် စကားပြောစဉ်ကလည်း သူက ဤအတိုင်းပင် ပြောခဲ့ဖူး၏။

ထျန်းရှထုန် အသင်း အမှန်တကယ် တည်ထောင်ပြီးနောက် ပုံရိပ်ယောင်ကမ္ဘာ က ပူးပေါင်းဆောင်ရွက်ရန် ကိုယ်တိုင် လာ ရှာလိမ့်မည် ဖြစ်၏။

ပုံရိပ်ယောင်ကမ္ဘာ အကြောင်း ပြောဖြစ်သွားသဖြင့် ထန်ထျန်းမှာ မစောင့်နိုင်တော့ပေ။

လက်ရှိတွင် အရာအားလုံး အဆင်သင့် ဖြစ်နေပြီဖြစ်ရာ ပုံရိပ်ယောင်ကမ္ဘာ ၏ အဓိက နည်းပညာကိုသာ ရရှိမည်ဆိုလျှင် သူ၏ ဆန်းသစ်သော စိတ်ကူးစိတ်သန်းများကို အမှန်တကယ် အကောင်အထည် ဖော်နိုင်ပေလိမ့်မည်။

"မင်းတို့နဲ့ ပုံရိပ်ယောင်ကမ္ဘာ ကြားမှာလည်း ပူးပေါင်းမှု ရှိမှာပေါ့"

ထန်ထျန်းက မေးလိုက်၏။

မိုမိသားစု၏ သြဇာအာဏာဖြင့်ဆိုလျှင် ပုံရိပ်ယောင်ကမ္ဘာ က လက်လွတ်ခံမည် မဟုတ်ပေ။

သို့သော် မိုကျွင်းက စိတ်ပျက်လက်ပျက် ပြုံးကာ ခေါင်းခါပြ၏။

"မရှိဘူး။"

" မိသားစုထဲက လူကြီးတွေက ပုံရိပ်ယောင်ကမ္ဘာ နဲ့ ပတ်သက်ဖို့ ဆန္ဒမရှိကြဘူး။ "

"တကယ်တော့ ငါကတော့ သူတို့ရဲ့ စီးပွားရေး ပုံစံက အရမ်း စိတ်ဝင်စားဖို့ ကောင်းသလို တိုးတက်ဖို့ အလားအလာ အများကြီး ရှိတယ်လို့ ထင်တာပဲ"

ထန်ထျန်းမှာ အံ့သြသွားရတော့၏။

ပူးပေါင်းမှု မရှိဘူးလား။

သို့ဆိုလျှင် ပုံရိပ်ယောင်ကမ္ဘာ မှာ ပြဿနာ တစ်ခုခု ရှိနေလို့လား။

သူက မိုကျွင်းကို သူ၏ သံသယအား မေးလိုက်သည်။

မိုကျွင်းက ခေါင်းခါယမ်းကာ "ဘာကြောင့်လဲဆိုတာ ငါလည်း မသိဘူး၊ တစ်ခုခုကို စိုးရိမ်နေကြတဲ့ ပုံပဲ။"

" ဒါပေမဲ့ ထျန်းဖူနန်းတော် က ပုံရိပ်ယောင်ကမ္ဘာ ကို တည်ရှိခွင့် ပေးထားတယ်ဆိုရင်တော့ ကြီးကြီးမားမား ပြဿနာ မရှိနိုင်ဘူးလို့ ငါ ထင်တာပဲ။ "

"တကယ်တော့ ငါတို့ မိုမိသားစုတင် မဟုတ်ဘူး၊ ထိုက်ယိမဟာမိတ် ၊ ရှန်းယွဲ့ရေကန် နဲ့ အင်အားအကြီးဆုံး ရှောင်းယောင် မိသားစုတောင်မှ ပုံရိပ်ယောင်ကမ္ဘာ ရဲ့ ကမ်းလှမ်းမှုကို ငြင်းပယ်ခဲ့ကြတာ။ "

"ဖြစ်နိုင်တာကတော့ တစ်ခုခု အကြောင်းပြချက် ရှိလို့ပဲ နေမှာပါ"

ထန်ထျန်းမှာ တိတ်ဆိတ်သွား၏။

ဤအချက်မှာ သူ မျှော်လင့်ထားသည်ထက် ကျော်လွန်နေပေသည်။

သို့သော် သူက ပုံရိပ်ယောင်ကမ္ဘာ နှင့် ဆက်သွယ်လိုဆဲပင်။

အကယ်၍ အဓိက နည်းပညာကို အမှန်တကယ် ပိုင်ဆိုင်နိုင်မည်ဆိုလျှင် ထျန်းရှထုန် အသင်း ဟူသော အမည်နာမကို အဓိပ္ပာယ် ပြည့်ဝအောင် သူ လုပ်နိုင်မည်ဟု ယုံကြည်ချက် အပြည့်ရှိပေသည်။

ထိုအခါမှသာ အကန့်အသတ်မရှိသော သုံးစွဲမှုအမှတ် များကို ရရှိနိုင်မည် ဖြစ်၏။

သုံးစွဲမှုအမှတ် မလုံလောက်မည်ကို စိုးရိမ်နေရန် မလိုတော့ပေ။

မိုမိသားစုနှင့် ပုံရိပ်ယောင်ကမ္ဘာ တို့ ပူးပေါင်းမှု မရှိသဖြင့် စွေ့ရှစ်ရင် ကိုသာ ရှာရတော့မည် ဖြစ်၏။ အရင်ကလည်း ဤကိစ္စကို ဆွေးနွေးခဲ့ဖူးပေသည်။

ယနေ့ ဖြစ်ရပ်များနောက်ပိုင်းတွင် တွေ့ဆုံရန် ပို၍ပင် လွယ်ကူသွားပေလိမ့်မည်။

"ကောင်းပြီလေ၊ ငါ နားလည်ပါပြီ"

ထန်ထျန်းက ပြော ၏။

ထို့နောက် သူတို့ နှစ်ဦးက အသင်း တည်ထောင်ရန် အသေးစိတ် ကိစ္စရပ်များကို ထပ်မံ ဆွေးနွေးပြီးမှ အဆုံးသတ်လိုက်ကြသည်။

ဆက်လက်၍ ထန်ထျန်းက မိုကျွင်းနှင့်အတူ ရှန်းယွဲ့ရေကန် နှင့် မုမိသားစုမှ ကိုယ်စားလှယ်များနှင့် တွေ့ဆုံခဲ့၏။

ရှန်းယွဲ့ရေကန် ၏ ကိုယ်စားလှယ်မှာ ရှန်းမြောင်ရွှမ် ဟု အမည်ရသော အမျိုးသမီး ဖြစ်ပြီး အသက် ရာဂဏန်းရှိသော အင်မော်တယ်ဘုရင် တစ်ဦး ဖြစ်ကာ အလွန် တည်ငြိမ်လှပေသည်။

မုမိသားစု၏ ကိုယ်စားလှယ်မှာ မုတန့် ဟု အမည်ရသော လူငယ် ဖြစ်ပြီး ငယ်ရွယ် သော အင်မော်တယ်ဘုရင် ဖြစ်ကာ ယဉ်ကျေးသိမ်မွေ့ပြီး မိုကျွင်းနှင့် ပုံစံတူလှပေသည်။

မိုကျွင်းဟူသော ကြားခံ ရှိနေသဖြင့် နှစ်ဦးနှစ်ဖက်မှာ ပျော်ပျော်ရွှင်ရွှင် စကားပြောဆိုနိုင်ခဲ့ကြပြီး အနာဂတ် ပူးပေါင်းဆောင်ရွက်မှုများအတွက် ကောင်းမွန်သော မျှော်လင့်ချက်များကို ဖော်ပြခဲ့ကြ၏။

အမှန်အတိုင်း ပြောရလျှင် လူမှုရေးအရ ပြောကြခြင်းသာ ဖြစ်ပေသည်။

ထျန်းရှထုန် အသင်း တရားဝင် ဖွင့်လှစ်သည့်အခါ သူတို့ လာရောက် အားပေးမည်ဖြစ်ကြောင်းလည်း ပြောခဲ့ကြ၏။

ထန်ထျန်းကလည်း ကျေးဇူးတင်စကား ပြောလိုက်သည်။

သူတို့နှင့် တွေ့ဆုံပြီးနောက် ယနေ့ ခရီးစဉ်မှာ လုံးဝ ပြီးဆုံးသွားခဲ့ပေပြီ။

ထန်ထျန်းက မိုကျွင်းကို နှုတ်ဆက်ကာ ဝမ်ပေါင်ရေကန် မှ တစ်ဦးတည်း ထွက်လာခဲ့၏။

ဝမ်ကန်း တို့ တစ်ဖွဲ့မှာ ထျန်းဖူနန်းတော်သို့ ရောက်ရန် နောက်ထပ် နှစ်ပတ်ခန့် လိုသေးသည်။

ထိုမတိုင်မီ အခြေစိုက်စခန်း ကို အဆင်သင့် တည်ဆောက်ထားရမည် ဖြစ်၏။ ကျန်ရှိသော ကိစ္စများကိုမူ ဝမ်ကန်း ရောက်လာမှသာ အကုန် လွှဲအပ်လိုက်တော့မည် ဖြစ်သည်။

.....

ထန်ထျန်း၏ ဆရာ စုဆောင်းပွဲမှာ အနည်းငယ် အဆင်မပြေမှုများ ရှိခဲ့သော်လည်း နောက်ဆုံးတွင် သတ်မှတ်ထားသည်ထက် ပို၍ပင် အောင်မြင်သွားခဲ့၏။

သို့သော် အခြားသော အသင်းများအတွက်မူ ယနေ့ ဖြစ်ပျက်သွားသော ကိစ္စမှာ ဝမ်ပေါင်ရေကန် အတွင်းသို့ အင်အားပြင်း ဗုံးတစ်လုံး ပစ်ချလိုက်သကဲ့သို့ပင်။

ကောင်းကင်ကြီး တစ်ခုလုံး ပြောင်းပြန်လှန်သွားသကဲ့သို့ ဖြစ်ပျက်သွားရ၏။

စုဆောင်းပွဲ၏ အသေးစိတ် အချက်အလက်များ၊ အရှင်ချီ ပြောခဲ့သော စကားများ၊ အသံနေအသံထားနှင့် အမူအရာများမှာ အပြင်လောကသို့ အကုန် ပျံ့နှံ့သွားခဲ့ပြီ။

အသင်းအားလုံး ချက်ချင်းပင် ဆူညံသွားရတော့၏။

"ဘုရားရေ... အရှင်ချီ ကိုယ်တိုင် ကျောထောက်နောက်ခံ ပေးထားတာလား။ အဲဒီ ထန်ထျန်းက ဒီလောက်အထိ သြဇာလွှမ်းမိုးနိုင် တာလား"

"ဒါ ပထမဆုံးအကြိမ်ပဲ။ အရှင်ချီ ကိုယ်တိုင်က ထျန်းဖူနန်းတော် အနေနဲ့ စီးပွားရေးလောကထဲကို သွေးသစ်တွေ စီးဝင်လာတာကို အားပေးမယ်လို့ ပြောသွားတာ။ နှစ်ပေါင်းများစွာ တိတ်ဆိတ်နေတဲ့ ဝမ်ပေါင်ရေကန် မှာတော့ လှိုင်းလုံးကြီးတွေ ထလာတော့မှာပဲ"

"ဟားဟား... စိတ်လှုပ်ရှားဖို့ ကောင်းလိုက်တာ။ "

"ငါကတော့ ငါးသည်ပဲ၊ လှိုင်းကြီးလေ ငါးစျေးကောင်းလေပဲ"

"ဟုတ်တယ်၊ တကယ်လို့ ဒီလေ အရှိန်ကို အသုံးချပြီး ဒီသင်္ဘောကြီးပေါ် တက်နိုင်ရင်တော့ အနာဂတ်မှာ တကယ်ကို ကြီးပွားတော့မှာပဲ"

အလယ်အလတ်နှင့် အသေးစား အသင်းများမှာ အသင်းကြီးများ၏ ဖိနှိပ်မှုကို ခံနေရသဖြင့် ဤသတင်းကြောင့် အလွန် စိတ်လှုပ်ရှားနေကြပေသည်။

ဆန့်ကျင်ဘက်အနေဖြင့် အခွင့်ထူးခံ အရင်းအမြစ်များကို ရယူထားသော အသင်းကြီးများနှင့် ထိပ်သီး အသင်းကြီးများမှာမူ ထိုမျှအထိ မပျော်ရွှင်ကြပေ။

"ဘာတွေ လုပ်နေတာလဲ၊ ငါတို့ ဝမ်ပေါင်ရေကန် က ဒီအတိုင်း ကောင်းနေတာပဲကို ဘာ သွေးသစ်တွေ လိုအပ်လို့လဲ။ အားလုံး အေးအေးဆေးဆေး နေကြတာ မကောင်းဘူးလား"

"ဟမ့်... မင်းက ဘာလုပ်နိုင်မှာလဲ။ ဒါက ထျန်းဖူနန်းတော်ရဲ့ ဆုံးဖြတ်ချက်ပဲလေ၊ မင်းက ဆန့်ကျင် ချင်လို့လား"

"ဟွန့်... ထျန်းဖူနန်းတော် ကလည်း စည်းကမ်း ရှိပါတယ်။ ဝမ်ပေါင်ရေကန် ဆိုတာ လွတ်လပ်စွာ ယှဉ်ပြိုင်တဲ့ နေရာပဲ။ ထန်ထျန်းကသာ အခြေခိုင်အောင် မလုပ်နိုင်ရင် ဘယ်သူမှ ဘာမှ ပြောလို့မရဘူး"

"သူ အခြေမခိုင်နိုင်ဘူးလို့ မင်း သေချာလား။ သူတော်စင်ဆရာကြီး ၁၈ ဦးတောင် ရှိတာနော်။ သူတို့ နာမည်လေးတွေ တင်ထားရုံနဲ့တင် လူတွေ အုန်းအုန်းကျွက်ကျွက် လာကြမှာပဲ"

"တောက်... ငါတော့ ရှေ့ဆက်မယ့် လမ်းကို သေချာ ပြန်စဉ်းစားရတော့မယ်"

စကားပုံတစ်ခု ရှိသည်မှာ မိမိ၏ ရပ်တည်ချက်က မိမိ၏ အတွေးအခေါ်ကို ဆုံးဖြတ်သည် ဟူ၏။

အကျိုးအမြတ် ရရှိထားပြီးသူများအတွက် အပြောင်းအလဲကို အကြောက်ဆုံးပင်။

ထို့ကြောင့် ဝမ်ပေါင်ရေကန် ရှိ ထိပ်တန်း အသင်းများနှင့် အောက်ခြေ အသင်းများ၏ စိတ်ခံစားချက်မှာ လုံးဝ ကွာခြားနေပေသည်။

သို့သော် ထိပ်သီး အင်အားစုများမှာမူ တည်ငြိမ်နေဆဲပင်။

"ထျန်းဖူနန်းတော် ရဲ့ ဆုံးဖြတ်ချက်ကို ငါ ထောက်ခံတယ်။"

" ဝမ်ပေါင်ရေကန် ထဲကို အင်အားသစ်တွေ ဝင်လာတာ ကောင်းတဲ့ ကိစ္စပဲ"

"သူတော်စင်ဆရာကြီး ၁၈ ဦးလား... ထန်ထျန်းနဲ့ ပူးပေါင်းဆောင်ရွက်ဖို့ ငါ မျှော်လင့်နေပါတယ်။"

"ထန်ထျန်းအနေနဲ့ ဒီလို ရခဲတဲ့ အခွင့်အရေးကို ဆုပ်ကိုင်ပြီး အသင်းကို ကောင်းကောင်း စီမံနိုင်ပါစေကွာ၊ သူတော်စင်ဆရာကြီးတွေရဲ့ ဂုဏ်သတင်းကိုတော့ မညှိုးနွမ်းစေနဲ့ပေါ့"

"ငါကတော့ ထန်ထျန်းက အသင်းကို ဘယ်နေရာမှာ တည်ဆောက်မလဲဆိုတာ ပိုစိတ်ဝင်စားတယ်..."

ဤထိပ်သီး အသင်းကြီးများနှင့် အင်အားစုများသည် သူတို့၏ ရပ်တည်ချက်ကို မည်သူမျှ မလှုပ်ခါနိုင်ဟု ယုံကြည်ထားသဖြင့် အေးဆေး တည်ငြိမ်နေကြခြင်း ဖြစ်၏။

သူတို့က ထန်ထျန်း အခြေစိုက်မည့် နေရာကို ပို၍ စိတ်ဝင်စားနေကြပေသည်။

သို့သော် အတည်ပြုသတင်း မရှိသေးသဖြင့် ခန့်မှန်းနေကြရုံသာ ရှိ၏။

နောက်ဆုံးတွင် သူတို့က ထန်ထျန်းသည် ရှင့်ပေါင်ကျွန်း အတွင်း၌သာ ရှိမည်ဟု သတ်မှတ်လိုက်ကြပြီး မိုမိသားစု အနီးအနားတွင် အခြေစိုက်စခန်း တည်ဆောက်လိမ့်မည်ဟု အများစုက ထင်မြင်နေကြသည်။

သို့သော် ထန်ထျန်းက ရွှမ်ယွင်မျှော်စင် ၏ အာဏာကို စိန်ခေါ်လိမ့်မည်ဟု မည်သူမျှ မတွေးမိကြပေ။

ရွှမ်ယွင်မျှော်စင် ဘက်ကမူ ဤကိစ္စတွင် ပါဝင် ပြောဆိုခြင်း မရှိပေ။

အဘယ်ကြောင့်ဆိုသော် ချီဟယ်ရွှမ်း ထိုနေ့က လုပ်ခဲ့သော လုပ်ရပ်များမှာလည်း ပျံ့နှံ့နေပြီ ဖြစ်သောကြောင့်ပင်။

မှောင်မည်းနေသော အခန်းငယ်လေး တစ်ခုအတွင်း

"အဖိုးကြီးဟွမ် ... တကယ်ပဲ ပြန်ပြင်လို့ မရတော့ဘူးလား"

ချီဟယ်ရွှမ်း၏ မျက်နှာမှာ ဖြူဖျော့နေပြီး အသံမှာလည်း အက်ရှနေပေသည်။

ဤကိစ္စ၏ နောက်ဆက်တွဲ ရလဒ်မှာ ဤမျှအထိ ပြင်းထန်လိမ့်မည်ဟု သူ တကယ် မထင်ထားခဲ့ပေ။

ရွှမ်ယွင်မျှော်စင် အထက်ပိုင်းက သူ့ကို ရာထူးအားလုံးမှ ထုတ်ပယ်ပြီး အာဏာများကို ရုပ်သိမ်းလိုက်ပြီပင်။

စိတ်ဓာတ်ကျနေသော ချီဟယ်ရွှမ်းကို ကြည့်ပြီး အဖိုးကြီးဟွမ် က သက်ပြင်း ပြင်းပြင်း ချလိုက်၏။

"ကျေနပ်လိုက်စမ်းပါ၊ ဒါက အကောင်းဆုံး ရလဒ်ပဲ။"

" ရာထူး မရှိတော့တာပဲ ရှိတာ မင်းက ရွှမ်ယွင်မျှော်စင် ရဲ့ အတော်ဆုံး ပါရမီရှင်တွေထဲက တစ်ယောက် ဖြစ်နေတုန်းပဲ။"

" နောက်ပိုင်းကျရင် ကုံးချန်ခြံဝင်း မှာပဲ သေချာ ကျင့်ကြံတော့"

ချီဟယ်ရွှမ်းက မကျေမနပ်ဖြစ်နေသော အမူအရာဖြင့် အံ့ကြိတ်ကာ "ဒါပေမဲ့ ငါတို့က အင်အားကြီးတဲ့ ရွှမ်ယွင်မျှော်စင် ပဲလေ၊ ထန်ထျန်း တစ်ယောက်တည်းကို ကြောက်နေဖို့ လိုလို့လား။"

" သူက ဘာမှ မပြောရသေးခင်မှာပဲ ငါ့ကို ဒီလို အပြစ်ပေး လိုက်တာက သိပ်ပြီး ပျော့ညံ့လွန်းရာ မရောက်ဘူးလား"

သူ့စကားကို ကြားသည့်အခါ အဖိုးကြီးဟွမ် မှာ မျက်မှောင်ကြုတ်သွားရ၏။

"ဟယ်ရွှမ်း... စကားကို ဆင်ခြင်စမ်း"

" အထက်ပိုင်းရဲ့ ဆုံးဖြတ်ချက်ကို မသံသယဝင်နဲ့။"

" ပြီးတော့ မင်းကို ထန်ထျန်းက အပြစ်ပေး နေတာလို့ တကယ် ထင်နေတာလား"

အသိဉာဏ် ပျောက်ဆုံးနေသော ချီဟယ်ရွှမ်းကို ကြည့်ပြီး အဖိုးကြီးဟွမ် ၏ မျက်ဝန်းထဲတွင် စိတ်ပျက်ရိပ်များ ပေါ်လာပေသည်။

ပါရမီရှင်ဆိုသည်မှာ သူ အများကြီး မြင်ဖူးလှပြီ ဖြစ်၏။

စရိုက်မကောင်းမှုကြောင့် နောက်ဆုံးတွင် ဘာမှ မဟုတ်တော့ဘဲ ပျက်စီးသွားကြသူများကိုလည်း အများကြီး မြင်ဖူးခဲ့ပြီ ဖြစ်သည်။

အဖိုးကြီးဟွမ် ၏ စကားကို ကြားသော်လည်း ချီဟယ်ရွှမ်းမှာ မကျေမနပ် ဖြစ်နေဆဲဖြစ်ကာ ဆက်လက် ငြင်းခုံချင်နေသေး၏။

သို့သော် ဆရာကြီးက စိတ်မဝင်စားတော့ဘဲ သူ့ကို ထုန်းရှန့်တောင် သို့ အမြန် ပြန်ရန် ပြောကြားပြီးနောက် ထွက်ခွာသွားတော့သည်။

ချီဟယ်ရွှမ်းမှာ မကျေမနပ် ဖြစ်နေသော်လည်း အားကိုးရာမဲ့စွာဖြင့် ထုန်းရှန့်တောင် သို့ ပြန်လာခဲ့ရ၏။

သို့သော် သူ၏ ခြံဝင်းအတွင်းသို့ ခြေချလိုက်သည်နှင့် တစ်ပြိုင်နက် ခပ်အေးအေး အသံတစ်ခု ဘေးမှ ထွက်ပေါ်လာပေသည်။

"ငါ နင့်ကို စောင့်နေတာ ကြာပြီ"

"နင်က သတ္တိ တော်တော် ကောင်းတာပဲ၊ သူ့ကိုတောင် ထောင်ချောက်ဆင်ရဲတယ်ပေါ့။ "

"တစ်မိသားစုလုံးက လူငယ်တွေထဲမှာ သူ့ရဲ့ ဆန္ဒကို ဆန့်ကျင်ရဲတဲ့သူဆိုတာ လက်ချိုးရေလို့ ရတယ်"

ချီဟယ်ရွှမ်းမှာ ချက်ချင်းပင် ထိတ်လန့်သွားရတော့၏။

ရင်းနှီးနေသော ထိုအမျိုးသမီး၏ မျက်နှာကို ကြည့်လိုက်သည့်အခါမှ သူ့ကို မည်သူက အပြစ်ပေး နေသလဲဆိုသည်ကို သူ နောက်ဆုံးတွင် သိလိုက်ရတော့သည်။