အလှည့်အပြောင်းများစွာ၃

"ဒီမှာ ဒီလူကိုမြင်တယ်မလား။ သူရှိနေမှတော့ ဘာကြောက်စရာလိုသေးလို့လဲ"

ထိုသို့ပြောဆိုရင်း ပေါင်ဟွားနတ်သမီးသည် ရှန်းယီ၏ ပခုံးကိုပေါ့ပေါ့ပါးပါး ပုတ်လိုက်ကာ တီးတိုးဆိုလိုက်လေသည်။

"မဆိုးပါဘူး၊ ရှင့်ကြောင့် ကျွန်မ မျက်နှာပန်းလှရပါတယ်"

"ကျွန်တော်... ကျွန်တော်..."

ထိုကျင့်ကြံသူသည် ရှန်းယီအား ရိုသေလေးစားစွာဖြင့် ကြည့်လိုက်မိသည်။ ထိုခဏတာ အပြန်အလှန်ပြောဆိုမှုမှတစ်ဆင့် မှင်ရောင်ဝတ်ရုံနှင့် လူငယ်မှာ မည်မျှအစွမ်းထက်ကြောင်း သူ နားလည်သဘောပေါက်သွားခဲ့လေသည်။

သူသည် ကံကြမ္မာကို လက်ခံလိုက်သည့်အလား သက်ပြင်းတစ်ချက်ချကာ ပြောလိုက်၏။

"တကယ်တော့ ဘာဖြစ်သွားလဲဆိုတာ ကျွန်တော်ကိုယ်တိုင်တောင် သေချာမသိလိုက်ဘူး။ရုတ်တရက်ကြီး ရေသတ္တဝါမျိုးနွယ်စု တစ်စု ပေါ်လာတာပဲ၊ ကျွန်တော်တို့ရဲ့အရှင်သခင်ကလည်း အခုထိဖြေရှင်းဖို့ ဘယ်သူ့ကိုမှ မလွှတ်သေးဘူး၊ တိတ်တဆိတ် ခွင့်ပြုထားသလိုမျိုးပဲ..."

"ဒီ ရှောင်ယွမ်လင်းကြောင့် ငါတော့ သေတော့မှာပဲ"ပေါင်ဟွားနတ်သမီး၏ ရင်ဘတ်မှာ ဒေါသသစ်များကြောင့် နိမ့်ချည်မြင့်ချည် ဖြစ်သွားရလေသည်။

သူမ မှတ်မိသလောက်ဆိုလျှင် သူနှင့် သူမ၏ ဂျူနီယာညီမလေးတို့ လက်ထပ်ခဲ့စဉ်က သူမကိုယ်တိုင်ပင်ကောင်းချီးပေးခဲ့ခြင်း ဖြစ်သည်။

လွန်စွာ အင်အားကြီးမားသော ရန်သူနှင့် ရင်ဆိုင်နေရလျှင်ပင် သတင်းစကားတစ်ခွန်းလောက် ပေးပို့ရန် နည်းလမ်း မရှာနိုင်တော့ဘူးလော။

သခင်မလေး ပိစွေ့မှ သူတို့ အရှင်သခင်၏ နာမည်ကို ဗြောင်ကျကျခေါ်ဝေါ်လိုက်သည်ကို မြင်သောအခါ၊ ထိုကျင့်ကြံသူ၏ မျက်ဝန်းများတွင် မျှော်လင့်ချက်ရောင်ခြည်တစ်ခု ရုတ်တရက် လင်းလက်သွားလေသည်။

သူမသည် လွတ်လပ်ကျင့်ကြံသူ တစ်ဦးဖြစ်သော်ငြား သေချာပေါက်အစွမ်းထက်ပေလိမ့်မည်။

တကယ်ပဲ မျှော်လင့်ချက် ရှိလာနိုင်ပြီလား။

"သခင်မလေး... ကျေးဇူးပြုပြီး အထဲဝင်ပါဦးခင်ဗျာ" သူသည် သူမကို အထဲသို့ဝင်ရန် အလျင်စလို လက်ဟန်ပြလိုက်လေသည်။

"ရပါတယ်၊ ဒီနေ့ကိစ္စတွေကို ကျွန်မ တာဝန်ယူ ဖြေရှင်းပေးပါ့မယ်"

မြို့သူမြို့သားများ၏ စိုးရိမ်တကြီး ကြည့်ရှုနေသော အကြည့်များရှေ့တွင် ပေါင်ဟွားနတ်သမီးသည် ယုံကြည်မှုအပြည့်ဖြင့် ရှေ့သို့ လှမ်းတက်သွားလေ၏။

ကျန်းယဲ့၏ မျက်နှာပေါ်တွင် ခါးသီးသော အမူအရာတစ်ခု ဖြတ်ပြေးသွား၏။ ယခုအချိန်အထိအခြေအနေ မည်သို့ရှိသည်ကို သူ လုံးဝ မသိသေးဘဲလျက် အားလုံးကို တာဝန်ယူရဲနေသည်။

ဤသို့သော ယုံကြည်မှုမျိုး မည်သည့်နေရာကနေ ရောက်လာပါသနည်း။

ထိုသို့တွေးမိစဉ် သူသည် စီနီယာရှန်းအား ခိုးကြောင်ခိုးဝှက် လှမ်းကြည့်လိုက်မိသည်။

'ဟုတ်သားပဲ... ကိုယ့်ဘေးနားမှာ ဒီလောက် အစွမ်းထက်တဲ့လူသတ်သမားကြီး ရှိနေမှတော့ ဘယ်သူက ယုံကြည်မှုမရှိဘဲ နေပါ့မလဲ။'

ထိုကဲ့သို့သော ကတိစကားကို ကြားလိုက်ရသောအခါ၊ မြို့တွင်း၌ ဆူညံလှုပ်ရှားမှုလှိုင်းတစ်ခု ချက်ချင်း ထကြွလာပြီး၊ သူတို့ကိုယ်တိုင်ပင် ပေါင်ဟွားနတ်သမီးအား ပွေ့ချီခေါ်ဆောင်သွားချင်နေသည့်အလား ထင်မှတ်ရလေသည်။

သူမသည် ဤခံစားချက်ကို အပြည့်အဝနှစ်သက်သဘောကျနေပုံရပြီး၊ ဓားကို အနည်းငယ် ရှက်ကိုးရှက်ကန်းဖြင့် ထပ်မံပြင်ဆင်လိုက်ကာ လူအုပ်ကြီးအားကြီးကျယ်ခမ်းနားစွာ ကျေးဇူးတင်ကြောင်း လက်ဟန်ပြလိုက်လေသည်။

"..."

ရှန်းယီသည် ကမ်းစပ်ကို တိတ်ဆိတ်စွာကြည့်နေခဲ့သည်။ ထင်ရှားသည်မှာ ဤနေရာရှိ မြင့်မားနေသော စိတ်အားထက်သန်မှုများက ရေအောက်ရှိ တစ်စုံတစ်ရာ၏ အာရုံစိုက်မှုကို ဆွဲဆောင်သွားခဲ့ခြင်းပင်။

မကြာမီမှာပင် ခေါင်းတွင်ဦးချိုများရှိပြီး ရုပ်ဆိုးအကျည်းတန်သော ငါးနှင့်တူသည့် ပုံရိပ်တစ်ခု ဖြည်းညင်းစွာ ထွက်ပေါ်လာလေသည်။

"ဘာတွေများ သဘောကျနေကြတာလဲ။ ငါ့ကိုလည်းဝေမျှကြပါဦးလား" ဟု ၎င်းက မြေမြို့ရိုးတစ်ဝိုက်ပျံ့နှံ့သွားသော အက်ကွဲကွဲ အသံကြီးဖြင့် ပြောလိုက်လေ၏။

ပတ်ဝန်းကျင် တစ်ခုလုံး ရုတ်တရက် တိတ်ဆိတ်သွားလေတော့သည်။

"ကျွတ်..."

လက်ဟန်ပြနေဆဲဖြစ်သော ပေါင်ဟွားနတ်သမီးမှာ တောင့်တင်းသွားပြီး၊ ကြားဖြတ်နှောင့်ယှက်ခံလိုက်ရသဖြင့်မကျေမနပ်ဖြစ်သွားသည်မှာ အထင်အရှားပင်။

ကမ်းစပ်ဘက်သို့ ကြည့်လိုက်သော သူမ၏ အကြည့်များမှာ စိတ်အနှောင့်အယှက်ဖြစ်မှုများ ကူးပြောင်းသွားလေ၏။

ထိုပုံရိပ်ထံမှ ထွက်ပေါ်နေသော အငွေ့အသက်ကို သတိပြုမိသွားပြီးနောက်၊ သူမ ခေါင်းကိုက်လာသလို ခံစားလိုက်ရကာ လက်များကို ချလိုက်လေသည်။

ဟင်းလင်းပြင်လျှောက်လှမ်းခြင်းအဆင့် သုံး...

ဤနေရာသို့မလာရောက်မီက ရှန်းယီ၏ စွမ်းရည်ထက် သာလွန်မည်မဟုတ်ကြောင်း သူမ ရဲဝံ့စွာ အာမခံထားခဲ့လေသည်။ သို့တိုင် ရောက်ရောက်ချင်းမှာပင် သူမ အခက်အခဲနှင့် ရင်ဆိုင်လိုက်ရ၏။

ရတနာပန်းပွင့်ဂိုဏ်း၏ သတင်းအချက်အလက်များက မည်ကဲ့သို့ ဤမျှ ခေတ်နောက်ကျနေရသနည်း။

သူမကိုယ်တိုင် တကယ်ပဲ ဝင်ပါရတော့မည်လော။

သတင်းပေါက်ကြားသွားပြီး အခြားသူများက သူမ ပါဝင်ပတ်သက်နေကြောင်း ခန့်မှန်းမိသွားပါက အားလုံး ပြီးဆုံးသွားပေလိမ့်မည်။

သူမ တုံ့ဆိုင်းနေစဉ်မှာပင်၊ ထိုရေသတ္တဝါမျိုးနွယ်စု နတ်ဆိုးသည် ကျောက်စိမ်းပြားတစ်ခုကို ထုတ်ယူကာ သတင်းစကားတစ်ခု စတင်ပေးပို့လိုက်လေ၏။

"အလကား ဝင်ပါချင်တဲ့ အမှိုက်တွေ ထပ်လာပြန်ပြီ..."

ထိုစကားများ ပြောဆိုလိုက်သည်နှင့်တပြိုင်နက် မြေမြို့ရိုးသူမြို့ရိုးသားများ၏ ယခင် တက်ကြွနေမှုများမှာ ကြောက်မက်ဖွယ်ကောင်းသော မှတ်ဉာဏ်များဖြင့် အစားထိုးခံလိုက်ရပြီး သူတို့သည် နောက်သို့ယိုင်နဲ့ယိုင်နဲ့ ဆုတ်ခွာသွားကြလေသည်။

သို့သော် ထိုအသံမှာ ရုတ်တရက်ရပ်တန့်သွား၏။

ရွှေရောင်မီးလျှံများဖုံးလွှမ်းနေသော ပုံရိပ်တစ်ခုသည် လေထဲသို့ ခုန်တက်သွားပြီး၊ သူ၏ ရှည်လျားသောလက်ချောင်းများမှာ လက်ဝါးတစ်ခုအဖြစ် စုစည်းသွားကာ နတ်ဆိုး၏ မျက်နှာပေါ်သို့ ရက်စက်စွာ ရိုက်ချလိုက်လေသည်။

"ဟင်"

ပေါင်ဟွားနတ်သမီးမှာ အရေးယူဆောင်ရွက်ရမည်လော၊ သတင်းပေါက်ကြားနိုင်ခြေကို မည်သို့ လျှော့ချရမည်နည်းဟု စဉ်းစားနေဆဲဖြစ်သော်လည်း၊ သူမအံ့အားသင့်သွားစေသည်မှာ ဟင်းလင်းပြင်လျှောက်လှမ်းခြင်းနယ်ပယ်အဆင့် နှစ် ရှိ ထိုကျင့်ကြံသူလေးသည် တိုက်ခိုက်မှုမစတင်မီ သူ၏တာအိုနန်းတော်ကိုပင် ထုတ်ဖော်ခဲ့ခြင်း မရှိပေ။

နောက်တစ်ခဏတွင် ပြတ်သားသော ကျိုးပဲ့သံတစ်သံ ထွက်ပေါ်လာလေ၏။

နတ်ဆိုး၏ လည်ပင်းမှာ ချက်ချင်း ကျိုးသွားခဲ့ပြီး၊ ၎င်း၏မျက်နှာပေါ်တွင် တွေဝေမှုများ ရှိနေဆဲဖြစ်ကာ ထိုလူငယ်ကို ပြန်လည်တိုက်ခိုက်ရန် ကြိုးပမ်းသည့်အနေဖြင့် ၎င်း၏ နတ်ဆိုးစွမ်းအင်များကို အလိုအလျောက် ဆင့်ခေါ်လိုက်လေသည်။

ရှန်းယီသည် ၎င်း၏တုံ့ပြန်မှုကို ကြိုတင်မျှော်လင့်ထားပုံရသည်။

သူ၏ လက်ချောင်းများက နတ်ဆိုး၏လက်မောင်းများကို ဖမ်းဆုပ်လိုက်ပြီး ကြမ်းတမ်းရက်စက်သောအင်အားဖြင့် အကြင်နာကင်းမဲ့စွာ ချိုးဖျက်ပစ်လိုက်လေ၏။

သူ၏ ခန္ဓာကိုယ်အတွင်း ကိန်းအောင်းနေသော ရွှေရောင်ဖီးနစ်ငှက်သည် ကျယ်လောင်သော အော်သံနှင့်အတူ ပေါက်ကွဲထွက်ပေါ်လာ၏။

ရှန်းယီ၏ အမူအရာမှာ ပြောင်းလဲခြင်းမရှိဘဲ သတ္တဝါ၏ ခန္ဓာကိုယ်အထက်ပိုင်းကို တိုက်ရိုက် ကြေမွသွားစေမည့် လက်သီးတစ်ချက် ပစ်သွင်းလိုက်လေတော့သည်။

ဖြစ်စဉ်တစ်ခုလုံးမှာ အလွန်လျင်မြန်လွန်းလှရာ မျက်တောင်တစ်ခတ်အတွင်းမှာပင် ပြီးဆုံးသွားခဲ့လေသည်။

ရှန်းယီ မြေပြင်ပေါ်သို့ ပြန်လည် ဆင်းသက်လာပြီး၊ လူတိုင်းက ပြောင်းလဲခြင်းမရှိသော သူ၏ချောမောသည့် မျက်နှာကို မြင်လိုက်ရသောအခါ၊ ကျန်းယဲ့မှာ တံတွေးကို အနိုင်နိုင် မြိုချလိုက်မိလေသည်။

ဤအရာက တတိယအကြိမ်ပင်။ စီနီယာရှန်း သူ၏ရှေ့တွင် လှုပ်ရှားခဲ့သည်မှာ ယခုဆိုလျှင် သုံးကြိမ်တိုင်တိုင် ရှိနေပြီ ဖြစ်သည်။

ပြိုင်ဘက်တိုင်းသည် သူ၏လက်ချက်ဖြင့် တူညီသောကံကြမ္မာကို ရင်ဆိုင်ခဲ့ရသည်... ချက်ချင်း သေပွဲဝင်ရခြင်းပင်။

ယခုအချိန်အထိ ရှန်းယီ၏ တာအိုနန်းတော် မည်သို့ပုံစံရှိသည်ကို သူ တစ်ခါမျှ မမြင်ဖူးခဲ့ချေ။

"ဒီနေရာကို ငါဘာကြီး ခေါ်လာမိတာလဲ"

ပေါင်ဟွားနတ်သမီး၏ ပါးစပ်မှာ အနည်းငယ် ဟသွားရလေသည်။ တစ်စုံတစ်ဦးက ဟင်းလင်းပြင်လျှောက်လှမ်းခြင်းအဆင့် သုံး ကို ဤမျှလျင်မြန်စွာ သတ်ဖြတ်နိုင်ခြင်းအတွက် သူမ အံ့ဩသွားခြင်း မဟုတ်ပေ။

ပြဿနာမှာ လှုပ်ရှားခဲ့သူ၏ ကျင့်ကြံခြင်းအဆင့်ပင် ဖြစ်သည်။

တကယ့်ကို တန်လိုက်တဲ့ အပေးအယူပဲ တကယ့်ကို ဂုဏ်ယူစရာပဲ။

ဟင်းလင်းပြင်လျှောက်လှမ်းခြင်းအစောပိုင်းအဆင့်ကို ထားလိုက်ဦး၊ အလယ်အလတ်အဆင့် ကျင့်ကြံသူတစ်ဦးပင် ဤမျှလျင်မြန်သော ဖြေရှင်းမှုကို လုပ်ဆောင်နိုင်ရန် ရုန်းကန်ရပေလိမ့်မည်။

သူမသည် ရင်ထဲရှိ စိတ်လှုပ်ရှားမှုကို ဖိနှိပ်လိုက်ပြီး လူအုပ်ကြီးကို ဆက်လက်၍ နှစ်သိမ့်ပေးရန် ပြင်ဆင်လိုက်သည်။

သို့သော် ထိုစဉ် သူမ၏နောက်ကျောဘက်မှ ဂရုမစိုက်ဟန်ရှိသော အသံတစ်သံကို ကြားလိုက်ရလေ၏။

"မင်းရဲ့ကျင့်ကြံခြင်းအဆင့်က ဘယ်လောက်ပဲရှိရှိ ငါ ဂရုမစိုက်ဘူး။ ဒါပေမဲ့ မင်းကိုယ်တိုင်ဝင်မပါချင်ဘူးဆိုရင်တော့ အခုကတည်းက လူခေါ်ထားလိုက်တော့"

"ဟင်"

ပေါင်ဟွားနတ်သမီးမှာ အံ့အားသင့်သွားကာ လှည့်ကြည့်လိုက်ရာ ရှန်းယီ၏ မှောင်မိုက်သော မျက်ဝန်းများနှင့် ဆုံတွေ့လိုက်ရလေ၏။

မည်သည့်အရာများ ဖြစ်နေသနည်း။ သူမသည် တာအိုနန်းတော်ကို ဆင့်ခေါ်ရန်မဆိုထားနှင့်၊ စွမ်းအင်များကိုပင် သိပ်ပြီး ထုတ်ယူသုံးစွဲထားခြင်း မရှိပေ။ သူက မည်ကဲ့သို့ သိနေရသနည်း။

"..."

ရှန်းယီသည် တင်ပျဉ်ခွေထိုင်ချလိုက်ပြီး သူ၏ စွမ်းအင်များကို စတင်ပြန်လည် ဖြည့်တင်းနေလေသည်။ သူ ပေါင်ဟွားဆေးလုံးများကို လိုအပ်သည်မှာ အမှန်ပင်ဖြစ်သော်လည်း၊ ၎င်းတို့အတွက် သူ၏ အသက်ကို စွန့်စားရန် ဆန္ဒရှိသည်ဟု မဆိုလိုပေ။

ဤနေရာရှိ အခြေအနေမှာအပေါ်ယံကြည့်ရသလောက် မရိုးရှင်းသည်မှာ ထင်ရှားလှပေသည်။ ၎င်းသည် မူလသဘောတူညီချက်ထက် ကျော်လွန်နေပြီဖြစ်ရာ အဆုံးသတ်ရမည့်အချိန် ရောက်ပြီဖြစ်သည်။

ချင်ကျိုးကိစ္စရပ်ကို ဖြတ်သန်းခဲ့ရပြီးနောက်၊ ရှန်းယီသည် အခြေအနေတစ်ခုလုံးကို ထိန်းချုပ်နိုင်စွမ်းမရှိပါက မျှခြေကိုဖျက်ဆီးမည့် အတွေးမျိုး မတွေးသင့်ကြောင်း အလွန်ပင် ကောင်းစွာ သိရှိထားခဲ့လေသည်။

ထိုသို့ လုပ်ဆောင်ခြင်းက ပိုမိုဆိုးရွားသော အကျိုးဆက်များကိုသာ ဖြစ်ပေါ်စေလိမ့်မည်။

"တကယ်ပဲ၊ သူတို့ချန်ထားခဲ့တဲ့ သတင်းစကားတွေနဲ့ သိပ်မတူဘူးပဲ"