သားရဲသခင်ဂိုဏ်းကို ဝင်ရောက်ပြီ
Vol. 17 Ch. 180
နောက်နေ့မနက်တွင် စုန့်ဝမ်သည် သူ့ပုံစံကို အသက် ၃၀ ကျော်အရွယ် အမျိုးသားတစ်ဦးအဖြစ် ပြောင်းလဲလိုက်သည်။ မျက်နှာတွင် အသက်အရွယ်နှင့် မလိုက်အောင် ပင်ပန်းနွမ်းနယ်နေသော အမူအရာကို ဖန်တီးထားပြီး ကျင့်စဉ်အဆင့်ကိုမူ အခြေတည် အစောပိုင်းအဆင့်မှာပင် ထားရှိလိုက်သည်။
ထို့နောက် ဈေးအလယ်ဗဟိုရှိ အဆောက်အအုံကြီးတစ်ခုသို့ ဦးတည်သွားလိုက်သည်။ ဤနေရာမှာ ဈေးလုံခြုံရေးအဖွဲ့ အခြေစိုက်ရာဖြစ်သလို သားရဲသခင်ဂိုဏ်း၏ အုပ်ချုပ်ရေး အခြေစိုက်ရုံးလည်း ဖြစ်သည်။
စုန့်ဝမ် အနီးသို့ ရောက်သောအခါ အစောင့်တစ်ဦးက တားလိုက်သည်။
“ရပ်လိုက်စမ်း၊ ဒါက သားရဲသခင်ဂိုဏ်းရဲ့ နေရာပဲ။ မဆိုင်သူတွေ ဝေးဝေးနေကြ”
ထိုသူမှာ ချီစုစည်းခြင်း အဋ္ဌမအဆင့် လူငယ်တစ်ဦး ဖြစ်သော်လည်း ဂိုဏ်း၏အရှိန်အဝါကြောင့် အလွန်ပင် မောက်မာလှသည်။
စုန့်ဝမ်က စိတ်မဆိုးဘဲ အေးအေးဆေးဆေးပင် ပြောလိုက်သည်။
“ငါက ဆေးဖော်စပ်သူတစ်ယောက်ပါ။ နာမည်က ဝူရှန်းလို့ ခေါ်ပါတယ်။ သားရဲသခင်ဂိုဏ်းက ဆေးဖော်စပ်သူ စုဆောင်းနေတယ် ကြားလို့ လာခဲ့တာပါ”
ထိုစကားကို ကြားသောအခါ လူငယ်၏ အေးစက်သော မျက်နှာမှာ အနည်းငယ် ပျော့ပြောင်းသွားပြီး လေးစားသော လေသံဖြင့် မေးလိုက်သည်။
“စီနီယာက ဆေးဖော်စပ်သူလား၊ အလယ်အလတ်အဆင့် ဆေးဖော်စပ်သူလားခင်ဗျာ”
စုန့်ဝမ်က ခေါင်းခါပြလိုက်သည်။
“အမှန်အတိုင်း ပြောရရင် ငါ အခြေတည်အဆင့်ကို ရောက်တာ နှစ်အတော်ကြာပေမဲ့ အလယ်အလတ်အဆင့် ဆေးနည်းတစ်ခုမှ မတတ်သေးဘူး။ ဒါပေမဲ့ အဆင့်နိမ့်ဆေးတွေကိုတော့ အတော်များများ ဖော်စပ်နိုင်ပါတယ်”
ထိုစကားကြောင့် လူငယ်မှာ စိတ်ပျက်သွားခြင်း မရှိဘဲ ပို၍ပင် နွေးထွေးစွာ ကြိုဆိုလိုက်သည်။
“ကျွန်တော့်နောက်ကို လိုက်ခဲ့ပါ စီနီယာ၊ ကျွန်တော် အကြီးအကဲဝမ်ဆီ ခေါ်သွားပေးပါ့မယ်”
သားရဲသခင်ဂိုဏ်းကဲ့သို့ ဂိုဏ်းကြီးများပင်လျှင် အခြေတည်အဆင့် လေလွင့်ကျင့်ကြံသူများကို လက်ခံလိုကြသည်။ အထူးသဖြင့် ဆေးဖော်စပ်သူဆိုလျှင် ပို၍ပင် အလိုရှိကြသည်။
အစောင့်လူငယ်၏ ဦးဆောင်မှုဖြင့် စုန့်ဝမ်သည် အဆောက်အအုံအတွင်း ချောမွေ့စွာ ဝင်ရောက်နိုင်ခဲ့ပြီး မကြာမီ အခန်းကျယ်တစ်ခုသို့ ရောက်ရှိသွားသည်။
ခေတ္တစောင့်ပြီးနောက် အခြေတည်အဆင့် နှောင်းပိုင်းကျင့်ကြံသူတစ်ဦး ပေါ်လာသည်၊ သူကား လူငယ်ပြောသော အကြီးအကဲဝမ်ပင် ဖြစ်သည်။
အပြန်အလှန် နှုတ်ဆက်ပြီးနောက် အကြီးအကဲဝမ်က ပြုံးရွှင်စွာဖြင့် လိုရင်းကိစ္စကို စတင်ပြောဆိုသည်။
“မိတ်ဆွေဝူ... မင်းက သားရဲဘုရင်ဂိုဏ်းကို ဝင်ချင်တဲ့ ဆေးဖော်စပ်သူတစ်ယောက်လို့ ငါ့တပည့်ဆီက ကြားတယ်”
စုန့်ဝမ်က စိတ်မကောင်းဟန်ဖြင့် ပြောသည်။
“ကျွန်တော် လေလွင့်ကျင့်ကြံသူအဖြစ် ဆယ်စုနှစ်ချီ ဖြတ်သန်းခဲ့ပြီးပါပြီ၊ အဲဒါ ဘယ်လောက် ခက်ခဲလဲဆိုတာ အကြီးအကဲဝမ်လည်း သိမှာပါ။ အခြေတည်အဆင့် ရောက်တာ နှစ်အတော်ကြာပေမဲ့ အလယ်အလတ်အဆင့် ဆေးနည်းတစ်ခုမှ မရသေးဘူး။ သားရဲသခင်ဂိုဏ်းက ဆေးဖော်စပ်သူတွေ ခေါ်နေတယ်လို့ ကြားလို့ လာခဲ့တာပါ”
“မင်းရဲ့ ကျင့်စဉ်အဆင့်နဲ့ ဆေးဖော်စပ်သူ အဆင့်အတန်းအရ ဂိုဏ်းကို ဝင်ဖို့ကတော့ ပြဿနာမရှိပါဘူး။ ဒါပေမဲ့ ဂိုဏ်းက နောက်ကြောင်း မသေချာသူတွေကို သေချာ စစ်ဆေးလေ့ရှိတယ်။ မင်း အရင်က ဘယ်မှာ ကျင့်ကြံခဲ့တာလဲ။ မင်းကို အာမခံပေးနိုင်မယ့် ကျင့်ကြံသူ မိသားစု ဒါမှမဟုတ် အင်အားစုတွေရော ရှိသလား”
“ကျွန်တော် ငယ်ငယ်ကတည်းက ကျင့်ကြံခြင်းမှာပဲ အချိန်ကုန်ခဲ့တာပါ။ တံခါးပိတ် ကျင့်ကြံတာ ဒါမှမဟုတ် ဆေးဖော်ပြီး အရင်းအမြစ် ရှာတာပဲ လုပ်ခဲ့တယ်။ အဲဒီကြားမှာ အကြောင်းအမျိုးမျိုးကြောင့် ဈေးအတော်များများကို ပြောင်းရွှေ့ခဲ့ရတယ်။ ဒါကြောင့် အခုအချိန်မှာ ကျွန်တော့်ကို အာမခံပေးမယ့်သူ ရှာဖို့ကတော့ ခက်ပါလိမ့်မယ်။ အကြီးအကဲဝမ်အနေနဲ့ ကျွန်တော့်ကို အကူအညီလေး တစ်ခုလောက် ပေးနိုင်မလားခင်ဗျာ"
စကားပြောရင်း စုန့်ဝမ်သည် သိုလှောင်အိတ်တစ်ခုကို ထုတ်ယူ၍ အကြီးအကဲဝမ်ထံ ကမ်းပေးလိုက်သည်။
သို့သော် အကြီးအကဲဝမ်က ထိုအိတ်ကို လက်မခံဘဲ လက်ကို ဝှေ့ယမ်းကာ ငြင်းပယ်လိုက်သည်။
"မိတ်ဆွေဝူ... ငါ့စေတနာကို အထင်လွဲနေပြီထင်တယ်။ ငါ မင်းအတွက် အာမခံပေးမယ်။ ဒါပေမဲ့ မင်းရဲ့ ဝိညာဉ်ကျောက်တုံးတွေကို မက်မောလို့မဟုတ်ပါဘူး။ ငါက မင်းနဲ့ မိတ်ဆွေဖြစ်ချင်ရုံသက်သက်ပါ။ နောင်တစ်ချိန်မှာ ငါ့ဘက်က အကူအညီတောင်းစရာရှိရင် မင်းဘက်ကလည်း ကူညီပေးဖို့ မျှော်လင့်ပါတယ်"
အကြီးအကဲဝမ်က သိုလှောင်အိတ်ကို လက်မခံသဖြင့် စုန့်ဝမ်သည် ရှားပါးသည့် လူကြီးလူကောင်းတစ်ယောက်နဲ့ တွေ့ပြီဟု တွေးလိုက်မိသေးသည်။ သို့သော် တစ်ဖက်လူ၏ စကားကို ကြားရသောအခါ ဤလူသည် အကျိုးအမြတ်ကြီးကြီးရရန် ငါးစာချနေခြင်းသာ ဖြစ်ကြောင်း သဘောပေါက်သွားသည်။ အနာဂတ်တွင် ကျေးဇူးတုံ့ပြန်မှုကို လိုချင်သောကြောင့် ယခု ကူညီခြင်းပင်။
စုန့်ဝမ်က အားနာဟန်ဖြင့် သိုလှောင်အိတ်ကို ပြန်သိမ်းကာ တောင်းပန်လိုက်သည်။
"ကျွန်တော် အများကြီး တွေးမိသွားပုံရတယ်၊ အကြီးအကဲဝမ် ခွင့်လွှတ်ပေးပါဦး"
"မိတ်ဆွေဝူ... ကိုယ့်ကိုယ်ကိုယ် အပြစ်မတင်ပါနဲ့။ ပထမဆုံးတွေ့ဆုံချိန်မှာ အထင်လွဲတာက သဘာဝပါ။ မင်းက ပွင့်လင်းတဲ့သူဆိုတာ ငါမြင်နေရတယ်၊ ငါ့စိတ်နဲ့လည်း ကိုက်ညီတယ်။ နောင်မှာ ပိုပြီး ရင်းရင်းနှီးနှီး နေကြတာပေါ့"
အပြန်အလှန် နှုတ်ဆက်စကားများ ပြောပြီးနောက် အကြီးအကဲဝမ်သည် ပေ ၂၀ ခန့် ရှည်သော သင်္ဘောပျံတစ်စင်းကို ထုတ်ဆင့်၍ စုန့်ဝမ်ကို သားရဲသခင်ဂိုဏ်းသို့ ခေါ်ဆောင်သွားသည်။
…………
များမကြာမီ သားရဲသခင်ဂိုဏ်း ဋ္ဌာနချုပ်သို့ ရောက်ရှိလာသည်။ တောင်တန်းများကြားတွင် တည်ရှိသော တောင်ထိပ် ဒါဇင်ပေါင်းများစွာမှာ တိမ်တိုက်များကြားသို့ ထိုးဖောက်ဝင်ရောက်နေပြီး မြူခိုးများ ဖုံးလွှမ်းနေကာ နတ်ဘုံနတ်နန်းကဲ့သို့ ခမ်းနားလှပသည်။ တောင်ထိပ်တစ်ခုနှင့် တစ်ခုကို သံကြိုးတံတားများဖြင့် ဆက်သွယ်ထားသည်။ သို့သော် များစွာသော တပည့်များမှာ ဓားပျံများ၊ ဝိညာဉ်သားရဲများ စီးနင်းကာ ပျံသန်း သွားလာနေကြသည်။
သားရဲသခင်ဂိုဏ်း၏ အတွင်းပိုင်းတွင် ပုဆိန်ဖြင့် ထွင်းထုထားသကဲ့သို့ မတ်စောက်ပြီး အန္တရာယ်များလှသော တောင်ထိပ်တစ်ခု ရှိသည်။ ထိုတောင်ထိပ်တွင် ခမ်းနားပြီး အရှိန်အဝါကြီးမားသည့် အဆောက်အဦးကြီးတစ်ခု တည်ရှိသည်။ အကြီးအကဲဝမ်က သင်္ဘောပျံကို အဆောက်အဦးရှေ့ရှိ ရင်ပြင်တွင် ငြိမ့်ညောင်းစွာ ဆင်းသက်လိုက်သည်။
"မိတ်ဆွေဝူ... ဒါက ဂိုဏ်းရဲ့ ဥပဒေစိုးမိုးရေးခန်းမပဲ။ မင်းက လေလွင့်ကျင့်ကြံသူဘဝကနေ ဝင်လာတာဆိုတော့ စည်းကမ်းအရ နတ်ဆိုးကျင့်ကြံသူတွေ ဂိုဏ်းထဲ ခိုးမဝင်နိုင်အောင် နောက်ကြောင်းစစ်ဆေးရမယ်။ မင်းရဲ့ သက်ရှည်ကျင့်စဥ်အော်ရာအရဆို ပြဿနာ မရှိပါဘူး၊ ဒီစစ်ဆေးမှုက လုပ်ရိုးလုပ်စဥ် သက်သက်ပါပဲ"
သားရဲဘုရင်ဂိုဏ်းသို့ ဝင်ရောက်မည့် လုပ်ထုံးလုပ်နည်းများကို စုန့်ဝမ် ကြိုတင်စုံစမ်း သိရှိထားပြီးသား ဖြစ်သည်။ အသစ်ဝင်လာသော လေလွင့်ကျင့်ကြံသူတိုင်း ဤစစ်ဆေးမှုကို ဖြတ်ကျော်ရမည်။ အကြီးအကဲဝမ်၏ ဦးဆောင်မှုဖြင့် စုန့်ဝမ်သည် အနက်ရောင် ကျောက်တုံးများဖြင့် တည်ဆောက်ထားသော အခန်းတစ်ခုသို့ ရောက်လာခဲ့သည်။ အခန်းအတွင်း၌ အဘိုးအိုတစ်ဦးသည် မျက်စိမှိတ်၍ တင်ပျဉ်ခွေ ထိုင်နေသည်။ ဤအဘိုးအိုမှာ အစွမ်းထက်သော ရွှေအမြုတေအဆင့် ကျင့်ကြံသူတစ်ဦး ဖြစ်သည်။ စုန့်ဝမ်နှင့် အကြီးအကဲဝမ် ဝင်လာသော်လည်း အဘိုးအိုက မျက်စိဖွင့်မကြည့်ပေ။
"တပည့်ဝမ်မင် ဒုတိယခန်းမမှူးဖုန်းကို ဂါရဝပြုပါတယ်" ဟု အကြီးအကဲဝမ်က ဦးညွှတ်နှုတ်ဆက်လိုက်သည်။
စုန့်ဝမ်ကလည်း လိုက်၍ "ကျွန်တော် ဝူရှန်းက စီနီယာကို ဂါရဝပြုပါတယ်" ဟု ဆိုလိုက်သည်။
အဘိုးအိုက ခေါင်းကို အသာအယာ ညိတ်ပြသော်လည်း စကားမပြောပေ။ အကြီးအကဲဝမ်က စုန့်ဝမ်ကို ညွှန်ပြကာ လာရင်းကိစ္စကို ရှင်းပြလိုက်သည်။ ဒုတိယခန်းမမှူးဖုန်း မျက်စိဖွင့်လိုက်ရာ သူ့အကြည့်မှာ နက်ရှိုင်းလှသော ရေကန်ကြီးကဲ့သို့ ဖြစ်နေပြီး စုန့်ဝမ်တစ်ကိုယ်လုံးကို ဝိညာဉ်အာရုံဖြင့် စစ်ဆေးလိုက်သည်။ ထို့နောက် စုန့်ဝမ်ဆီမှ သက်ရှည်ကျင့်စဥ်အော်ရာကို ခံစားမိပြီး နတ်ဆိုးကျင့်ကြံမှု အရိပ်အယောင် မတွေ့ရသဖြင့် ကျေနပ်သွားသည်။
အနက်ရောင် ဆီမီးခွက်တစ်ခုသည် ဒုတိယခန်းမမှူးဖုန်း၏ ရှေ့တွင် ပေါ်လာပြီး စုန့်ဝမ်ကို "မင်းမှာ နတ်ဆိုးအငွေ့အသက် မရှိဘူး၊ စစ်ဆေးမှု အောင်မြင်တယ်။ အခု ဒီဝိညာဉ်မီးအိမ်ပေါ်မှာ မင်းရဲ့ ဝိညာဉ်အပိုင်းအစတစ်ခု ထားခဲ့လိုက်၊ ဒါဆိုရင် သားရဲသခင်ဂိုဏ်းရဲ့ တရားဝင် တပည့်တစ်ယောက် ဖြစ်ပြီ။ အဲဒီမတိုင်ခင် ငါသတိပေးချင်တာက သားရဲသခင်ဂိုဏ်းကို တစ်ခါဝင်ရင် တစ်သက်လုံး ဂိုဏ်းသားပဲ။ ဂိုဏ်းရဲ့ စည်းကမ်းတွေကို တိတိကျကျ လိုက်နာရမယ်။ ဖောက်ဖျက်ရင် ဥပဒေအရ အပြစ်ပေးခံရမယ်။ အရင်က လေလွင့်ကျင့်ကြံသူဘဝလို လွတ်လွတ်လပ်လပ် နေလို့မရတော့ဘူး"
"လမ်းညွှန်ပေးတဲ့အတွက် ကျေးဇူးတင်ပါတယ် ဒုတိယခန်းမမှူး။ ကျွန်တော် သားရဲသခင်ဂိုဏ်းကို စိတ်ရင်းနဲ့ ဝင်ချင်တာပါ၊ စည်းကမ်းတွေကို သေချာမှတ်သားပါ့မယ်"
ဒုတိယခန်းမမှူးဖုန်းသည် စုန့်ဝမ်၏ အဖြေကို ကျေနပ်ပုံရသည်။
"မင်းက အခြေတည်အဆင့် ကျင့်ကြံသူဆိုတော့ မင်းရဲ့ ဝိညာဉ်အပိုင်းအစကို ထုတ်ဖို့ ငါကူညီပေးစရာ မလိုတော့ဘူး မဟုတ်လား"
"မလိုပါဘူး ဒုတိယခန်းမမှူး၊ ကျွန်တော်ဘာသာ ကျွန်တော် လုပ်နိုင်ပါတယ်"
စုန့်ဝမ်လည်း အသက်ကို အောင့်ကာ စိတ်ကို စုစည်းပြီး သိစိတ်ပင်လယ်အတွင်း ကြိုတင်ပြင်ဆင်ထားသော ဝိညာဉ်အပိုင်းအစတစ်ခု ဆွဲထုတ်ကာ ဝိညာဉ်မီးအိမ်အတွင်း ထည့်သွင်းလိုက်သည်။ မီးအိမ်မှာ ချက်ချင်းပင် မှိန်ဖျော့ဖျော့ အလင်းတစ်ခု ထွက်ပေါ်လာသည်။
ဒုတိယခန်းမမှူးဖုန်းသည် ဝိညာဉ်မီးအိမ်ကို ယူကာ မန္တန်လက်ဟန်တစ်ခု ပြုလုပ်လိုက်သည်။ မီးအိမ်မှ အလင်းတစ်ခု ထွက်ပေါ်လာပြီး စုန့်ဝမ်အပေါ်သို့ ကျရောက်သွားသည်။ ဤသည်မှာ မီးအိမ်အတွင်းရှိ ဝိညာဉ်အပိုင်းအစမှာ စုန့်ဝမ်ထံမှ တကယ်လာခြင်း ဟုတ်၊ မဟုတ် စမ်းသပ်ခြင်း ဖြစ်သည်။ စမ်းသပ်မှု အောင်မြင်သဖြင့် ဒုတိယခန်းမမှူးဖုန်း လက်ကို ဝှေ့ယမ်းလိုက်ရာ ဝိညာဉ်မီးအိမ်မှာ အခန်းအပြင်သို့ ပျံထွက်သွားပြီး ဂိုဏ်းသားများ၏ ဝိညာဉ်မီးအိမ်များ သိမ်းဆည်းရာနေရာသို့ ဦးတည်သွားတော့သည်။ ဒုတိယခန်းမမှူးဖုန်းသည် ဆက်သွယ်ရေး ကျောက်စိမ်းပြားကို ထုတ်ယူ၍ တစ်နေရာဆီသို့ သတင်းတစ်ခု ပေးပို့လိုက်သည်။
ထို့နောက် တံဆိပ်တစ်ခု ထုတ်ယူကာ စုန့်ဝမ်ထံမှ အော်ရာ အငွေ့အသက်တစ်ခုကို ထုတ်ယူပြီး တံဆိပ်အတွင်းသို့ ပိတ်လှောင်ကာ စုန့်ဝမ်ထံ ပေးလိုက်သည်။
"ဝူရှန်း... အခုကစပြီး မင်းက သားရဲသခင်ဂိုဏ်းရဲ့ တပည့်တစ်ယောက် ဖြစ်သွားပြီ။ ငါ ဆေးတောင်ထိပ်ရဲ့ တောင်သခင်ဆီ သတင်းပို့ထားပြီးပြီ။ မင်း အဲဒီကို ရောက်ရင် တစ်ယောက်ယောက်က လာကြိုပါလိမ့်မယ်"
"ကျေးဇူးတင်ပါတယ် ဒုတိယခန်းမမှူး၊ ကျွန်တော် သွားခွင့်ပြုပါဦး"
……..
စုန့်ဝမ်နှင့် ဝမ်မင်တို့သည် တရားဥပဒေစိုးမိုးရေးခန်းမမှ ထွက်လာခဲ့ကြသည်။ ဝမ်မင်က စုန့်ဝမ်ကို ဆေးတောင်ထိပ်သို့ ပို့ဆောင်ပေးပြီးမှ နှုတ်ဆက်ကာ ထွက်ခွာသွားသည်။
ဆေးတောင်ထိပ်မှာ ဝိညာဉ်စွမ်းအား ကြွယ်ဝပြီး သစ်ပင်ပန်းမန်များ ဝေဆာနေသော မြင့်မားသည့် တောင်ကြီးတစ်လုံး ဖြစ်သည်။ စုန့်ဝမ် ရောက်ရှိသည်နှင့် ချီစုစည်းခြင်း သတ္တမအဆင့် တပည့်တစ်ဦးက လာကြိုသည်။
"အခုပဲ ဂိုဏ်းဝင်လာတဲ့ အကြီးအကဲဝူ ပါလားခင်ဗျာ"
သားရဲဘုရင်ဂိုဏ်းတွင် အကြီးအကဲ အဆင့်အတန်း (၄) မျိုး ရှိသည်။ ဂုဏ်ထူးဆောင်အကြီးအကဲ၊ တာဝန်ခံအကြီးအကဲ၊ သက်ကြီးအကြီးအကဲ နှင့် ခန်းမမှူး တို့ ဖြစ်သည်။ ဂုဏ်ထူးဆောင်အကြီးအကဲမှာ အမည်သာရှိပြီး အာဏာမရှိပေ၊ အခြေတည်အဆင့်သို့ ရောက်သော တပည့်တိုင်း အလိုအလျောက် ဂုဏ်ထူးဆောင်အကြီးအကဲ ဖြစ်လာသည်။ တာဝန်ခံအကြီးအကဲများမှာမူ ဂိုဏ်း၏ အရေးကိစ္စများကို စီမံခန့်ခွဲသူများ ဖြစ်သည်။ ထို့ကြောင့် ထိုတပည့်က စုန့်ဝမ်ကို အကြီးအကဲဟု ခေါ်ခြင်းမှာ ဂုဏ်ထူးဆောင်အကြီးအကဲကို ခေါ်ခြင်း ဖြစ်သည်။
စုန့်ဝမ်က ခေါင်းညိတ်ပြလိုက်သည်။
"ငါ ဝူရှန်း ပါ၊ မင်းက ဘယ်သူလဲ"
"ကျွန်တော့်နာမည်က လောကျိုးပါ။ အကြီးအကဲဝူကို ရွှမ်ဆေးခန်းမဆီ ပို့ဆောင်ပေးဖို့ အမိန့်ရထားပါတယ်"
"ကျေးဇူးပဲ" ဟု စုန့်ဝမ်က ဆိုလိုက်သည်။
သူတို့နှစ်ဦးမှာ ဆေးတောင်ထိပ်၏ အောက်ခြေသို့ ပျံသန်းသွားကြသည်။ လမ်းတွင် လော်ကျွဲက ဆေးတောင်ထိပ်၏ အခြေအနေကို ရှင်းပြသည်။ တောင်ခြေတွင် ထျန်း၊ တိ၊ ရွှမ်၊ ဟွမ်ဟု အမည်ပေးထားသော ဆေးခန်းမ (၄) ခု ရှိသည်။ ဟွမ်ဆေးခန်းမတွင် ဆေးဖော်စပ်သူ အများဆုံးရှိပြီး၊ အခြေတည်အဆင့်ဖြစ်သော စုန့်ဝမ်မှာ ရွှမ်ဆေးခန်းသို့ သွားရမည်ဖြစ်သည်။
မကြာမီ သူတို့သည် တောင်၏ အရိပ်ကျသောဘက်ရှိ ခမ်းနားသော ခန်းမတစ်ခုသို့ ရောက်ရှိလာသည်။ ဆေးခန်းမများမှာ တောင်၏ အတွင်းပိုင်းတွင် ထွင်းထု တည်ဆောက်ထားခြင်း ဖြစ်သည်။ လောကျိုး၏ ပြောပြချက်အရ တောင်အောက်ခြေတွင် မြေကမ္ဘာအမြုတေသန့်စင်မီးဟု ခေါ်သော ဝိညာဉ်မီးရှိပြီး ယင်းကို ဆေးဖော်ရန် အသုံးပြုခြင်း ဖြစ်သည်။
ကျောက်ခန်းမတစ်ခု၏ အဝင်ဝသို့ ပို့ဆောင်ပေးပြီးနောက် လော်ကျွဲသည် ထွက်ခွာသွားသည်။ စုန့်ဝမ် အခန်းအတွင်း ဝင်လိုက်ရာ ကျင့်ကြံသူ (၄) ဦးကို တွေ့လိုက်ရသည်။ အမျိုးသား (၂) ဦးနှင့် အမျိုးသမီး (၂) ဦး ဖြစ်သည်။ အလယ်တွင် ထိုင်နေသူမှာ အခြေတည် အလယ်အလတ်အဆင့်ရှိ အမျိုးသားတစ်ဦး ဖြစ်သည်။ သူ့ရှေ့တွင် ဆေးဖိုတစ်ခု ရှိပြီး၊ ၎င်းအောက်တွင် လက်ဖဝါးအရွယ်ခန့်ရှိသော တွင်းတစ်ခုမှ ပြင်းထန်သော အပူရှိန်များ ထွက်ပေါ်နေသည်။ ဤတွင်းမှာ မြေအောက်ရှိ ဝိညာဉ်မီးနှင့် တိုက်ရိုက်ဆက်နေခြင်း ဖြစ်သည်။ ကျန်သုံးဦးမှာ အခြေတည်အဆင့်သို့ ရောက်ခါစ လူငယ်များ ဖြစ်ကြသည်။
စုန့်ဝမ်က ဂါရဝပြု နှုတ်ဆက်လိုက်သည်။
"ဂါရဝပြုပါတယ် စီနီယာတို့။ ကျွန်တော်ကဝူရှန်း ပါ၊ အခုမှ ဂိုဏ်းထဲဝင်လာတာမို့လို့ စောင့်ရှောက်ပေးကြပါဦး"
အလယ်မှ အမျိုးသားက အနီးရှိ ကျောက်ဖျာကို ညွှန်ပြသည်။
"ဝူရှန်း... အဲဒီ ကျောက်ဖျာပေါ်မှာ ထိုင်။ မင်းက အသစ်ဆိုတော့ မိတ်ဆက်ပေးမယ်။ ငါ့နာမည်က ဝေ့တင်း၊ ရွှမ်ခန်းမရဲ့ တာဝန်ခံအကြီးအကဲပါ။ ဒီသုံးယောက်ကတော့ လွန်ခဲ့တဲ့ သုံးနှစ်အတွင်း ဂိုဏ်းကို ရောက်လာတဲ့ အခြေတည်အဆင့် ကျင့်ကြံသူတွေပဲ"
ဝေ့တင်းက အမျိုးသမီးတစ်ဦးကို ညွှန်ပြသည်။ ထိုအမျိုးသမီးမှာ လှပပြီး ကိုယ်လုံးကိုယ်ပေါက် ပြေပြစ်ကာ ပြုံးရွှင်နေသဖြင့် နွေးထွေးသော ခံစားချက်ကို ပေးသည်။
"သူ့နာမည်က ကျော့ရွှေယွင်၊ ဆေးတောင်ထိပ်ရဲ့ ပြင်ပတပည့်တွေထဲက ထူးချွန်သူတစ်ယောက်ပဲ"
ကျော့ရွှေယွင်က ပြုံး၍ - "အကြီးအကဲဝေ့က မြှောက်ပင့်လွန်းနေပါပြီ" ဟု ဆိုပြီး စုန့်ဝမ်ဘက်သို့ လှည့်ကာ "နှုတ်ဆက်ပါတယ် ဂျူနီယာဝူ" ဟု ဆိုလိုက်သည်။
ဝေ့တင်းက လူငယ်တစ်ဦးကို ဆက်လက် ညွှန်ပြသည်။
"သူကတော့ ဟော်တင်း၊ ဆေးဖော်စပ်တာမှာ ပါရမီရှင်တစ်ယောက်ပဲ။ တောင်ထိပ်သခင်ကိုယ်တိုင် သူ့ကို တပည့်အဖြစ် လက်ခံထားပြီးပြီ။ တောင်ထိပ်သခင်က တံခါးပိတ်ကျင့်ကြံနေလို့ ငါက ခဏ သင်ကြားပေးနေတာ"
ဟော်တင်းမှာ ပါရမီရှင်တို့၏ မာန်မာနရှိပုံရပြီး စုန့်ဝမ်ကို အသာအယာ ခေါင်းညိတ်ပြခဲ့သည်။
ဝေ့တင်းက နောက်ဆုံး အမျိုးသမီးငယ်ကို ညွှန်ပြသည်။
"သူ့နာမည်က ကျိုးစစ်ယိ၊ ဝိညာဉ်သားရဲတောင်ထိပ် ဒုတိယအကြီးအကဲရဲ့ သမီးပဲ။ အသက် ၂၀ နဲ့ အခြေတည်အဆင့်ကို ရောက်ခဲ့တဲ့ ပါရမီရှင်တစ်ယောက်ပေါ့။ ငယ်ငယ်ကတည်းက ဆေးဖော်ရတာ ဝါသနာပါလို့ အဖေဖြစ်သူရဲ့ ခွင့်ပြုချက်နဲ့ ဒီကို ရောက်လာတာ"
ကျိုးစစ်ယီမှာ ငယ်ရွယ်နုပျိုပြီး အလွန်လှပသည်။ သူမက စုန့်ဝမ်ကို စူးစမ်းလိုဟန်ဖြင့် မျက်လုံးဝိုင်းဝိုင်းလေးများဖြင့် ကြည့်နေသည်။
စုန့်ဝမ်က ဂါရဝပြုလိုက်သည်။
"နှုတ်ဆက်ပါတယ် အကြီးအကဲဝေ့၊ စီနီယာအစ်မကျော့၊ စီနီယာဟော်နဲ့ စီနီယာအစ်မကျိုး"
ဝေ့တင်းက ဆက်ပြောသည်။
"မင်းတို့ လေးယောက်စလုံး ရောက်ပြီဆိုတော့ နောက်ထပ် ၁၀ နှစ်အတွင်း ငါ့ဆီမှာ ဆေးဖော်စပ်ခြင်းကို လေ့လာရမယ်။ ကျင့်ကြံတဲ့အခါ အခက်အခဲရှိရင်လည်း မေးမြန်းနိုင်တယ်။ ဒီဆေးခန်းမမှာ အတွေ့အကြုံရှိတဲ့ ဆေးဆရာတွေ အများကြီးရှိတယ်၊ သူတို့ဆီကလည်း လေ့လာနိုင်တယ်။ ဒီနေ့တော့ မင်းတို့ကို ကျင့်စဥ်ထောက်ကူဆေးလုံး ဖော်စပ်နည်းကို အရင် သင်ပေးမယ်"
ဝေ့တင်းက ဆေးဖော်စပ်နည်းကို လက်တွေ့ပြသသည်။ သူသည် အလွန်ကျွမ်းကျင်သူဖြစ်ပြီး တစ်ရက်အတွင်း ဆေးလုံး ၇ လုံး ရရှိခဲ့သည်။
"တစ်သုတ်မှာ အများဆုံး ၈ လုံးအထိ ရနိုင်ပေမဲ့ အဲဒါက တတိယအဆင့် ဆေးဆရာတွေမှ ဖြစ်တာ။ ဒုတိယအဆင့် ဆေးဆရာတွေကတော့ ၇ လုံးပဲ ရနိုင်တယ်။ အဲဒါက ဝိညာဉ်အာရုံ စူးစိုက်မှု ကွာခြားလို့ပဲ။ နောက်တစ်လအတွင်း မင်းတို့ ဒီဆေးဖော်နည်းကို ကျွမ်းကျင်အောင် လေ့ကျင့်ရမယ်။ တစ်ယောက်ကို ဆေးဖက်ဝင်အပင် ၁၀ စုံစီ ရမယ်။ ကုန်သွားလို့ ထပ်လေ့ကျင့်ချင်ရင် ကိုယ်တိုင် ဝယ်ရမယ်။ ဂိုဏ်းကနေ ထောက်ပံ့ကြေး တစ်လကို ဝိညာဉ်ကျောက်တုံး ၁၀၀ ရမှာဖြစ်ပေမဲ့ အဲဒါက ကျင့်ကြံဖို့ မလုံလောက်ဘူး။ ပိုလိုချင်ရင် ဆေးဖော်စပ်ခြင်းကို အမြန်သင်ယူပြီး ဂိုဏ်းကပေးတဲ့ တာဝန်တွေကို ပြီးအောင် လုပ်ရမယ်။ နောက်နှစ်လနေရင် ဝိညာဉ်လက်နက်တောင်ထိပ်က အကြီးအကဲရှန်းဆီကို ဆေးလုံးတစ်သုတ် ပေးပို့ရမယ်။ မင်းတို့ အမြန်သင်ယူပြီး ငါ့ကို ကူညီနိုင်မယ်လို့ မျှော်လင့်ပါတယ်"
ကျိုးစစ်ယီက မျက်လုံးဝိုင်းလေးများဖြင့် ကြည့်ရင်း မေးလိုက်သည်။
"အကြီးအကဲဝေ့... အကြီးအကဲရှန်းက ဆေးလိုချင်ရင် ဆေးတောင်ထိပ်ကနေ တရားဝင် မဝယ်ဘဲ ဘာလို့ အကြီးအကဲဆီကနေ ဝယ်နေတာလဲ"
ထိုစကားကြောင့် ဝေ့တင်း၏ မျက်နှာမှာ ဒေါသနှင့် စိုးရိမ်စိတ်တို့ ရောပြွမ်းသွားသည်။ ဒေါသတကြီး အော်ဟစ်ချင်ပုံရသော်လည်း ကျိုးစစ်ယိ၏ နောက်ခံကြောင့် စိတ်ထိန်းလိုက်ရပြီး အခန်းအပြင်သို့ ထွက်သွားတော့သည်။
ထိုစဉ် ကျော့ရွှေယွင်က ထရပ်ပြီး "အကြီးအကဲဝေ့၊ စိတ်မပူပါနဲ့၊ ကျွန်မတို့ အမြန်သင်ယူပြီး အချိန်မီ ပြီးအောင် ကူညီပါ့မယ်" ဟု အော်ပြောလိုက်သည်။
သို့သော် ဝေ့တင်းက လှည့်ပင်မကြည့်ဘဲ ထွက်သွားသည်။
ဝေ့တင်း ထွက်သွားသောအခါ ကျိုးစစ်ယီက နှာခေါင်းရှုံ့လိုက်သည်။
"စီနီယာအစ်မကျော့... အကြီးအကဲဝေ့ကို ဖားချင်ရင် ကိုယ့်ဘာသာကိုယ် ဖားပါ။ ကျွန်မတို့ကို ဆွဲမထည့်ပါနဲ့။ ကျွန်မ ဒီကိုလာတာ ဆေးပညာသင်ဖို့၊ တခြားသူအတွက် အခမဲ့ အလုပ်သမား လုပ်ပေးဖို့ မဟုတ်ဘူး"
ကျော့ရွှေယွမ်က ခေါင်းငုံ့ကာ ခေတ္တစဉ်းစားပြီး ပြန်ပြောသည်။
"မိန်းကလေးကျိုး... ရှင်က မြင့်မြတ်တဲ့ နောက်ခံနဲ့ ပါရမီရှိသူဆိုတော့ တခြားသူကို ဖားဖို့ မလိုအပ်ဘူးဆိုတာ ကျွန်မ နားလည်ပါတယ်။ ဒါပေမဲ့ ကျွန်မကတော့ ရှင့်လို မဟုတ်ဘူး။ ကျွန်မက သာမန်မိသားစုကလာတဲ့ သာမန်ပါရမီရှင်တစ်ယောက်ပဲ။ အရင်းအမြစ်တွေရဖို့ ဂိုဏ်းက အကြီးအကဲတွေကို ဖားရတာပဲ။ ရှင့်လိုသာ နေခဲ့ရင် ကျွန်မ ခုထိ အပြင်စည်းတပည့်ဘဝမှာပဲ ရှိနေဦးမှာပဲ။ ကျွန်မကို အောက်တန်းကျတယ်လို့ ထင်ရင်လည်း ထင်နိုင်ပါတယ်။ အမှန်တော့ ကျွန်မလည်း ဒီလို မလုပ်ချင်ပါဘူး၊ ဒါပေမဲ့ တခြားရွေးချယ်စရာ မရှိလို့ပါ"
စကားပြောပြီးနောက် ကျော့ရွှေယွင်သည် ဆေးဖော်စပ်ရန် ဘေးအခန်းသို့ ဝင်သွားတော့သည်။
………..