ဂိုဏ်းပိုင်မွေးမြူရေးခြံကို ရောက်ပြီ

နောက်တစ်နေ့ နံနက်စောစောတွင် စုန့်ဝမ်သည် ကျိုးစစ်ယိနှင့် ချိန်းဆိုထားသည့်အတိုင်း တောင်အစွန်းရှိ ကွင်းပြင်ငယ်တွင် စောင့်နေသည်။

တစ်နာရီခွဲခန့် ကြာပြီးနောက် ကျိုးစစ်ယိ ရောက်လာသည်။ "ဂျူနီယာဝူ... အဖေ့ကို ဝင်တွေ့နေလို့ နည်းနည်းလေး နောက်ကျသွားတယ်၊ စောင့်ခိုင်းမိလို့ အားနာပါတယ်"

"ကိစ္စမရှိပါဘူး၊ ကျွန်တော်လည်း ခုလေးတင် ရောက်တာပါ။ စီနီယာအစ်မကျိုး... အခုပဲ ခရီးစလိုက်ကြရအောင်"

စကားပြောရင်း စုန့်ဝမ်က သူ့လှေပျံကို ထုတ်လိုက်သည်။

သို့သော် ကျိုးစစ်ယီက တားလိုက်သည်။

"ဂျူနီယာဝူ... သာ့ယန်ပြည်က မိုင်ပေါင်းသောင်းချီ ဝေးတာ။ မင်းရဲ့လှေက နှေးလွန်းလို့ အချိန်ကုန်လိမ့်မယ်။ ငါ့သင်္ဘောပျံကိုပဲ သုံးရအောင်"

ကျိုးစစ်ယိ လက်ဝှေ့ယမ်းလိုက်ရာ ပေ ၃၀ ခန့် ရှည်သော သင်္ဘောပျံတစ်စင်း ပေါ်လာသည်။ စုန့်ဝမ်လည်း မဆိုင်းမတွဘဲ သူ့လှေပျံကို ပြန်သိမ်းကာ သင်္ဘောပျံပေါ်သို့ ခုန်တက်လိုက်သည်။

……

နောက်သုံးရက်အကြာ နေ့လယ်ပိုင်းတွင် စုန့်ဝမ်တို့ သာ့ယန်ပြည်သို့ ရောက်ရှိခဲ့သည်။

သားရဲသခင်ဂိုဏ်း၏ သားရဲမွေးမြူရေးခြံမှာ လူသူကင်းဝေးရာ ရေအိုင်ကြီးတစ်ခု၏ ဘေးတွင် တည်ရှိသည်။ ရေအိုင်ကြီးမှာ အလွန်ကျယ်ဝန်းပြီး မျက်နှာပြင်ပေါ်တွင် မြူခိုးများ ဖုံးလွှမ်းနေသည်။ ရေပြင်မှ ဝိညာဉ်စွမ်းအင် အနည်းငယ် ထွက်ပေါ်နေသဖြင့် အောက်ခြေတွင် ဝိညာဉ်ကြောငယ်တစ်ခု ရှိနေကြောင်း ပေါ်လွင်နေသည်။ ဤဝိညာဉ်ကြောကြောင့်ပင် ဂိုဏ်းက မွေးမြူရေးခြံ တည်ဆောက်ထားခြင်း ဖြစ်သည်။ မွေးမြူရေးခြံမှာ ဧက ၃၀ ခန့် ကျယ်ဝန်းပြီး တစ်ဝက်မှာ ကုန်းပေါ်တွင်၊ ကျန်တစ်ဝက်မှာ ရေပေါ်တွင် ရှိသည်။

သူတို့သင်္ဘောပျံ ချဉ်းကပ်လာသည်ကို မွေးမြူရေးခြံရှိ ဂိုဏ်းသားများ တွေ့ရှိသွားကြသည်။ သင်္ဘောပျံတွင် ဂိုဏ်း၏အလံပါရှိသဖြင့် မလိုအပ်သော အထင်လွဲမှုများ မရှိခဲ့ပေ။ ကျိုးစစ်ယိက သင်္ဘောပျံကို မွေးမြူရေးခြံပေါ်တွင် ရပ်တန့်လိုက်သောအခါ ချီစုစည်းခြင်း နဝမအဆင့် ကျင့်ကြံသူတစ်ဦး ပျံတက်လာပြီး နှုတ်ဆက်လိုက်သည်။

"စီနီယာတို့က ဆေးတောင်ထိပ်က အကြီးအကဲတွေလား ခင်ဗျာ"

ကျိုးစစ်ယိက "ငါ့နာမည်က ကျိုးပါ၊ အကြီးအကဲကျိုးလို့ ခေါ်နိုင်တယ်။ ဒါကတော့ အကြီးအကဲဝူပါ" ဟု ပြောရင်း မိတ်ဆက်လိုက်သည်။

"ကျွန်တော်က ဒီမွေးမြူရေးခြံရဲ့ အုပ်ချုပ်သူ ဟယ်စူးပါ။ အကြီးအကဲတို့... ကျွန်တော့်နောက် လိုက်ခဲ့ပါ"

ကျိုးစစ်ယိက သင်္ဘောပျံကို သိမ်းဆည်းလိုက်ပြီး စုန့်ဝမ်နှင့်အတူ ဟယ်စူးနောက်သို့ လိုက်ပါသွားကြသည်။ ဟယ်စူးက သူတို့ကို ရေပေါ်တွင် တည်ဆောက်ထားသော အထပ် ၁၀ ထပ်ပါ အဆောက်အအုံကြီးတစ်ခု၏ ထိပ်ဆုံးအထပ်သို့ ခေါ်ဆောင်သွားသည်။ ထိုနေရာမှနေ၍ မွေးမြူရေးခြံတစ်ခုလုံးကို အပေါ်စီးမှ မြင်တွေ့နိုင်သည်။

နေရာထိုင်ခင်း ပြင်ဆင်ပြီးနောက် ဟယ်စူးက သူတို့အတွက် လက်ဖက်ရည် ဖျော်ပေးသည်။

"ဒီလက်ဖက်ရည်က ရေအိုင်ဘေးမှာရှိတဲ့ တောင်ပေါ်က ရတာပါ။ ဂိုဏ်းက လက်ဖက်ရည်လောက် ဝိညာဉ်စွမ်းအင် မများပေမဲ့ ရေအိုင်ရဲ့ မြူခိုးတွေကြောင့် ထူးခြားတဲ့ အရသာရှိပါတယ်၊ မြည်းစမ်းကြည့်ပါဦး"

ကျိုးစစ်ယီက စကားဖြတ်လိုက်သည်။

"မလိုပါဘူး၊ ငါတို့ကို ကျောက်စိမ်းမြွေတွေဆီ အမြန်ခေါ်သွားပါ။ တာဝန်ပြီးရင် ဂိုဏ်းကို အမြန်ပြန်ချင်လို့"

ဟယ်စူးက ပြုံးလိုက်သည်။

"အကြီးအကဲကျိုးက တကယ်ကို စိတ်မြန်တာပဲ၊ လိုက်ခဲ့ပါ"

ထိုစဉ် စုန့်ဝမ်၏ မျက်လုံးများထဲတွင် ထူးခြားသော အရိပ်အယောင်တစ်ခု ဖျပ်ခနဲ ပေါ်သွားသည်။ သူနှင့် ကျိုးစစ်ယိကို တစ်စုံတစ်ဦးက ဝိညာဉ်အာရုံဖြင့် တိတ်တဆိတ် စစ်ဆေးသွားသည်ကို သူခံစားမိလိုက်သည်။ သူ့ဝိညာဉ်အာရုံမှာ အခြေတည်အဆင့် အထွတ်အထိပ်တွင် ရှိနေ၍သာ သတိထားမိခြင်း ဖြစ်သည်။ ကျိုးစစ်ယိကမူ သတိမထားမိခဲ့ချေ။

ဤနေရာတွင် ပထမအဆင့် ဝိညာဉ်သားရဲများကိုသာ မွေးမြူထားပြီး အမြင့်ဆုံးကျင့်ကြံသူမှာ ချီစုစည်းခြင်း နဝမအဆင့်သာ ရှိသည်။ သို့ဆိုလျှင် ဤမျှ အစွမ်းထက်သော ဝိညာဉ်အာရုံက မည်သူ့ထံမှနည်း၊ ထိုသူမှာ အခြေတည်အဆင့် ဖြစ်သည်။ စုန့်ဝမ်က ရေပြင်ကို အမှတ်မထင် ကြည့်လိုက်သည်။ ထိုဝိညာဉ်အာရုံမှာ ရေအောက်မှ ထွက်ပေါ်လာခြင်း ဖြစ်သည်။ ရေအောက်တွင် အခြေတည်အဆင့် ကျင့်ကြံသူတစ်ဦး ပုန်းအောင်းနေချင်းပင်။ ဤမွေးမြူရေးခြံတွင် အဘယ်ကြောင့် အခြေတည်အဆင့် ကျင့်ကြံသူတစ်ဦး ပုန်းနေရသနည်း။ တာဝန်ခံဖြစ်သူ ဟယ်စူးကော သိပါသလား။

စုန့်ဝမ် အများကြီး မတွေးလိုက်ရ၊ ချက်ချင်းပင် အဖြေရသွားသည်။ ဟယ်စူးသည် မြွေခြံများရှိရာသို့ ခုန်ဆင်းရန် ပြင်လိုက်စဉ် သူ့ခန္ဓာကိုယ်မှာ ခေတ္တခဏ တောင့်တင်းသွားပြီးမှ ပုံမှန်ပြန်ဖြစ်သွားသည်။ ဟယ်စူးသည် ရေအောက်ရှိ ကျင့်ကြံသူထံမှ သတင်းစကား လက်ခံရရှိခြင်း ဖြစ်မည်ကို စုန့်ဝမ် သတိပြုမိလိုက်သည်။ ဆိုလိုသည်မှာ ဟယ်စူးသည် ထိုသူရှိနေသည်ကို သိထားသည်။ စုန့်ဝမ် စိတ်ထဲတွင် မေးခွန်းများစွာ ပေါ်လာသည်။ ရေအောက်ရှိ ကျင့်ကြံသူမှာ မည်သူနည်း၊ ဟယ်စူးက အပြင်လူများနှင့် ပူးပေါင်းပြီး တစ်ခုခု ကြံစည်နေသလား၊ သို့မဟုတ် ဂိုဏ်း၏ လျှို့ဝှက်တာဝန်တစ်ခုကို ထမ်းဆောင်နေသူလား၊ စဥ်းစားမရ ဖြစ်နေသည်။

ကျောက်စိမ်းမြွေများကို ကျောက်တုံးများဖြင့် တည်ဆောက်ထားသော ရေပေါ်မြွေခြံများတွင် ထားရှိသည်။ ဟယ်စူး၏ ဦးဆောင်မှုဖြင့် မြွေခြံတစ်ခုသို့ ရောက်လာသည်။ ထိုခြံထဲတွင် အစိမ်းနုရောင်မြွေ ၇ ကောင် ရှိပြီး၊ အကြီးဆုံးအကောင်၏ လုံးပတ်မှာ ပန်းကန်လုံးကြီးခန့် ရှိကာ အသေးဆုံးမှာ လက်မောင်းခန့် ရှိသည်။

စုန့်ဝမ်က စမ်းသပ်ရန်အတွက် မြွေခြံ၏ အကာအကွယ် အစီအရင်ကို ပိတ်ခိုင်းလိုက်သည်။ ဟယ်စူးက တွန့်ဆုတ်နေသော်လည်း ကျိုးစစ်ယိက ဖိအားပေးသဖြင့် အကာအကွယ်ကို ပိတ်ပေးလိုက်ရသည်။ မြွေများမှာ ရေထဲမှ ခုန်ထွက်ကာ သူတို့ကို တိုက်ခိုက်ရန် ကြိုးစားသော်လည်း စုန့်ဝမ်က သူ့အော်ရာဖြင့် ဖိနှိပ်လိုက်သည်။ ထို့နောက် အကြီးဆုံးမြွေကို ဆွဲယူကာ သားရဲအနှစ်သာရဆေးတစ်လုံး တိုက်ကျွေးလိုက်သည်။ မကြာမီမှာပင် ထိုမြွေမှာ ဆေးရှိန်ကြောင့် မိတ်လိုက်ရန် အဖော်ရှာသကဲ့သို့ ဂယောင်ဂတမ်း ဖြစ်လာသည်။

စုန့်ဝမ်က ဟယ်စူးကို အေးစက်စွာ ကြည့်လိုက်သည်။

"တာဝန်ခံဟယ်... အခု အခြေအနေက မင်း ဂိုဏ်းကို တင်ပြထားတာနဲ့ တခြားစီပဲ"

ဟယ်စူးက ထစ်ထစ်ငေါ့ငေါ့ဖြင့် ဖြေရန် ကြိုးစားနေစဉ် ကျိုးစစ်ယိက ဖြတ်ပြောလိုက်သည်။

"ဂျူနီယာဝူ... သေချာပြီ၊ သူ ငါတို့ကို လိမ်နေတာ။ ဟယ်စူး... နင် ဘာတွေ ဖုံးကွယ်ထားလဲဆိုတာ အကုန်ပြောစမ်း။ ဒီဆေးက မြွေတွေအပေါ်မှာ ထိရောက်မှုရှိတယ်ဆိုတာ ငါ သိပြီးသား"

စုန့်ဝမ်က ကျိုးစစ်ယိကို ထူးဆန်းစွာ ကြည့်လိုက်သည်။ သူမ တစ်ခုခုကို သိထားသည်မှာ သေချာသည်။ စုန့်ဝမ်က "စီနီယာအစ်မကျိုး... တာဝန်ခံဟယ်က မပြောချင်ဘူးဆိုလည်း ဂိုဏ်းကို ပြန်ပြီး အရှိအတိုင်း တင်ပြလိုက်ရုံပေါ့။ ငါတို့ တာဝန် ပြီးပြီလို့ သတ်မှတ်လို့ ရပါတယ်" ဟု ဆိုကာ ထွက်ခွာရန် ပြင်လိုက်သည်။ စုန့်ဝမ်က ဤလျှို့ဝှက်ချက်ထဲတွင် မပါဝင်လိုဘဲ ဂိုဏ်းသို့ အမြန်ပြန်လိုခြင်းသာ ဖြစ်သည်။

သို့သော် ကျိုးစစ်ယိက မကျေနပ်ပေ။ သူမက အမှန်တရားကို သိလိုသဖြင့် ဇွတ်အတင်း စစ်ဆေးရန် ပြင်နေသည်။

ထိုစဉ် ရေထဲမှ အသံတစ်သံ ထွက်ပေါ်လာသည်။

"ဆေးတောင်ထိပ်က အကြီးအကဲတွေ ဖြစ်ပြီးတော့ ဘာလို့ ချီစုစည်းခြင်း တပည့်လေးကို အနိုင်ကျင့်နေရတာလဲ"

စကားဆုံးသည်နှင့် လူတစ်ဦး ရေထဲမှ ခုန်ထွက်လာသည်။ ထိုသူမှာ အသက် ၄၀ ကျော်အရွယ် အမျိုးသားတစ်ဦး ဖြစ်ပြီး မျက်နှာမှာ ဖြူဖျော့နေသည်။ ထိုသူက ထွက်လာလာချင်း သူ့ကိုယ်သူ မိတ်ဆက်လာသည်။

"ငါ့နာမည်က လျိုကျန်းပါ၊ သားရဲသခင်ဂိုဏ်း ဆေးတောင်ထိပ်ရဲ့ တာဝန်ခံအကြီးအကဲ တစ်ယောက်ပဲ"

စုန့်ဝမ်က ယဉ်ကျေးစွာ နှုတ်ဆက်သော်လည်း ကျိုးစစ်ယိက တန်ပြန် မေးခွန်းထုတ်လိုက်သည်။

"ရှင်က ဆေးတောင်ထိပ်က အကြီးအကဲဆိုရင် ဆေးပညာ တတ်မှာပဲကို၊ ဘာလို့ ဂိုဏ်းကို အကူအညီတောင်းပြီး ငါတို့ကို လွှတ်ခိုင်းရတာလဲ”

လျိုကျန်းက "ငါ ဂိုဏ်းကို သတင်းပို့တုန်းက တာဝန်ခံအကြီးအကဲ တစ်ယောက် လွှတ်ပေးဖို့ တောင်းခဲ့တာ၊ အခုလို ဂုဏ်ထူးဆောင်အကြီးအကဲ နှစ်ယောက်ကို လွှတ်လိမ့်မယ်လို့ မထင်ထားဘူး" ဟု ပြန်ဖြေသည်။

ထိုအခါမှ စုန့်ဝမ် နားလည်သွားသည်။ လျိုကျန်းသည် အခက်အခဲတစ်ခု ကြုံနေရသဖြင့် အဆင့်မြင့် ဆေးဆရာတစ်ဦး စေလွှတ်ပေးရန် အကူအညီတောင်းခဲ့ခြင်း ဖြစ်သော်လည်း၊ ဂိုဏ်းက ဤတာဝန်ကို အရေးမကြီးသကဲ့သို့ လုပ်ဆောင်ကာ ဝေ့တင်းထံ လွှဲပေးခဲ့သည်။ ဝေ့တင်းကလည်း သူကိုယ်တိုင် မလာချင်သဖြင့် စုန့်ဝမ်တို့ကို လွှတ်လိုက်ခြင်း ဖြစ်သည်။

ကျိုးစစ်ယီ၏ ဇွတ်အတင်း မေးမြန်းမှုကြောင့် လျိုကျန်းသည် နောက်ဆုံးတွင် သူတို့နှစ်ဦးကို လျှို့ဝှက်ခန်းမတစ်ခုသို့ ခေါ်သွားရန် ဆုံးဖြတ်လိုက်သည်။

"ကောင်းပြီ... ငါနဲ့ လိုက်ခဲ့ကြ။ ဒါပေမဲ့ မင်းတို့ မြင်ရမယ့်အရာတွေက ထိပ်တန်းလျှို့ဝှက်ချက်ဖြစ်လို့ ဘယ်သူ့ကိုမှ မပြောရဘူး"

သူတို့သည် ရေအိုင်အောက်ခြေရှိ လျှို့ဝှက် လိုဏ်ခေါင်းအတွင်းသို့ ဝင်ရောက်သွားကြသည်။ ထိုနေရာတွင် ရေကန်ငယ်များ ပါရှိသော ဧကပေါင်းများစွာ ကျယ်ဝန်းသည့် မြေအောက်ခန်းမကြီးတစ်ခု ရှိသည်။ ထိုနေရာတွင် မြင်တွေ့လိုက်ရသော အရာကြောင့် စုန့်ဝမ်နှင့် ကျိုးစစ်ယိတို့မှာ အလွန်ပင် ထိတ်လန့်အံ့သြသွားကြသည်။

ရေကန်များထဲတွင် လူတစ်ပိုင်း မြွေတစ်ပိုင်း သတ္တဝါများ ရှိနေသည်။ သူတို့၏ ကိုယ်အထက်ပိုင်းမှာ လူအမျိုးသမီးပုံစံဖြစ်ပြီး အောက်ပိုင်းမှာ မြွေအမြီး ဖြစ်သည်။ ခန္ဓာကိုယ်တစ်ခုလုံးတွင် အကြေးခွံများ ဖုံးလွှမ်းနေသည်။

"ဒါ... ဒါတွေက ဘာတွေလဲ" စုန့်ဝမ်က အံ့သြတုန်လှုပ်စွာ မေးလိုက်သည်။

လျိုကျန်းက ဂုဏ်ယူဝင့်ကြွားစွာဖြင့် ရှင်းပြသည်။

"ဒါတွေက လူသားနဲ့ ကျောက်စိမ်းမြွေတွေ သားစပ်ထားတဲ့ မျိုးစပ်တွေပဲ။ လူ့သန္ဓေသားနဲ့ မြွေသန္ဓေသားတွေကို ပေါင်းစပ်ပြီး အကြိမ်ပေါင်း သောင်းချီ စမ်းသပ်ခဲ့ရတာ။ အခုတော့ အောင်မြင်သွားပြီ"

စုန့်ဝမ်မှာ အလွန်ပင် ထိတ်လန့်သွားသည်။ ဤသတ္တဝါများကို ဖန်တီးရန်အတွက် ကိုယ်ဝန်ဆောင် အမျိုးသမီးပေါင်း မည်မျှကို ရက်ရက်စက်စက် အသုံးချခဲ့ရမည်ကို မတွေးတတ်တော့။ ကျင့်ကြံခြင်းလောကထဲ နက်နက်ရှိုင်းရှိုင်း ရောက်လာလေ၊ လမ်းမှန်ဂိုဏ်းနှင့် နတ်ဆိုးဂိုဏ်းကြားတွင် ကြီးမားသော ခြားနားချက် မရှိသည်ကို ပို၍ နားလည်လာလေ ဖြစ်သည်။ တစ်ဖက်က ရက်စက်ကြမ်းကြုတ်မှုကို ပြောင်ပြောင်တင်းတင်း ကျူးလွန်ပြီး၊ အခြားတစ်ဖက်က လျှို့ဝှက်ကျူးလွန်ခြင်းဟုဆိုလျှင် မှားမည်မထင်။

သို့သော် သားရဲသခင်ဂိုဏ်းသည် ဤကဲ့သို့သော အားနည်းသည့် လူတစ်ပိုင်း မြွေတစ်ပိုင်း သတ္တဝါများကို အဘယ်ကြောင့် မွေးမြူနေရသနည်း။ စုန့်ဝမ်အမြင်တွင် ယင်းသတ္တဝါများသည် မည်သည့်အားသာချက်မျှ မရှိချေ။ သို့ဆိုလျှင် သက်ရှိတို့၏ လျှို့ဝှက်ချက်ကို စူးစမ်းရန် သက်သက်ပဲလား။

………….