ဖော်ထုတ်ခြင်း

မြေကမ္ဘာအရှင်တီကယ်အား "ကပြား" ဟု ခေါ်ဆိုခြင်းမှာ စော်ကားလိုသော သဘောထက် သူ၏ကိုယ်တွင်း၌ သွေးရိုးဗီဇများစွာ ရောနှောနေပြီး စစ်မှန်သော ယုံမင်နတ်ဆိုးမျိုးနွယ် သီးသန့်မဟုတ်တော့ခြင်းကို ဆိုလိုခြင်းဖြစ်သည်။ မျိုးနွယ်စုများစွာ၏ စွမ်းအားများကို ပေါင်းစပ်ထားသဖြင့် ကန့်သတ်ချက်များမှာ သိသိသာသာ လျော့နည်းသွားပြီး အကောင်းဆုံးသော သွေးရိုးဗီဇ အာနိသင်များကိုသာ ချန်လှပ်ထားနိုင်သောကြောင့် အရာအားလုံးမှာ ကွဲပြားသွားခဲ့ပြီ ဖြစ်သည်။

“ယီထျန်းယွမ်... မင်း ငါ့ကို စိတ်တိုင်းကျ စွပ်စွဲခဲ့ပြီးပြီ... အခုတော့ အဲဒီအတွက် အလျော်ပြန်ပေးရလိမ့်မယ်...”

မြေကမ္ဘာအရှင်တီကယ်၏ မျက်ဝန်းထဲတွင် သတ်ဖြတ်လိုစိတ်များ ပြည့်နှက်နေပြီး ဟိန်းဟောက်လိုက်သည်။

“သွေးသောင်းချီ စီရင်ချက်...”

နောက်တစ်ခဏ၌ သူ၏လက်ထဲမှ ကြိမ်လုံးရှည်ကို ဓားရှည်တစ်လက်နှင့် လဲလှယ်လိုက်သည်။ ကြိမ်လုံးမှာ ဓားရှည်ကဲ့သို့ ပေါက်ကွဲအား မရှိသဖြင့် ဓားရှည်သို့ ပြောင်းလဲလိုက်မှသာ သူ၏ကိုယ်တွင်းရှိ စွမ်းအားအားလုံးကို အစွမ်းကုန် ထုတ်ဖော်နိုင်မည် ဖြစ်သည်။ သူ၏ကိုယ်တွင်းရှိ သွေးရိုးဗီဇ စွမ်းအားအားလုံးမှာ သူ၏လက်ထဲမှ ဓားရှည်ပေါ်သို့ စုပြုံရောက်ရှိလာခဲ့သည်။

အဆင့်မြင့် နတ်ဆိုးအဆင့်ရှိသော ထိုဓားရှည်မှာ တုန်ခါလာပြီး တောက်ပသော အလင်းဖြူများ ထွက်ပေါ်လာခဲ့သည်။ ၎င်းမှာ ပြင်းထန်လှသော ကြယ်တာရာစွမ်းအားများ စီးဝင်လာမှုကြောင့် ဖြစ်ပေါ်လာသည့် ထိတ်လန့်ဖွယ် စွမ်းအားပင် ဖြစ်သည်။ မြေကမ္ဘာအရှင်တီကယ်သည် ယခုတစ်ကြိမ်တွင် အမှန်တကယ်ပင် အစွမ်းကုန် ထုတ်ဖော်လိုက်ပြီး ယီထျန်းယွမ်အား အသန်မာဆုံးသော ပုံစံဖြင့် သတ်ဖြတ်ရန် ကြိုးစားနေခြင်း ဖြစ်သည်။

ပရိသတ်များမှာလည်း မြေကမ္ဘာအရှင်တီကယ်၏ အစွမ်းကုန် ပေါက်ကွဲလာမှုကို ပထမဆုံးအကြိမ် မြင်တွေ့လိုက်ရသဖြင့် အံ့အားသင့်နေကြသည်။

“အလျော်ပေးရမယ် ဟုတ်လား...”

ယီထျန်းယွမ်မှာမူ တစ်ဖက်လူ၏ စွမ်းအားများအပေါ် အနည်းငယ်မျှပင် ကြောက်ရွံ့ခြင်း မရှိချေ။ သူ့အတွက်မူ ဤသည်မှာ မိစ္ဆာမျက်လုံး မြေကမ္ဘာအရှင်နှင့် အတူတူပင်ဖြစ်သည်။ သွေးရိုးဗီဇ အနည်းငယ်ကို ပေါင်းစပ်ထားရုံဖြင့် မိမိကိုယ်ကိုယ် အတုမဲ့ဟု ထင်နေခြင်းလော။ တစ်ဖက်သတ် အလွန်အမင်း သန်မာသော စွမ်းအားရှိမှသာ အတုမဲ့ဟု ခေါ်ဆိုနိုင်ခြင်း ဖြစ်သည်။ မြေကမ္ဘာအရှင်တီကယ် ပြသနေသော စွမ်းအားမှာ သာမန်မျှသာ ရှိနေသေးသည်။

“သေစမ်း...”

မြေကမ္ဘာအရှင်တီကယ်၏ နောက်ကျောတွင် ဧရာမ နဂါးကြီး၊ ဖီးနစ်ငှက်ကြီးနှင့် လင်းယုန်ကြီး စသည့် သွေးရိုးဗီဇ ပုံရိပ်ယောင်များမှာ ယီထျန်းယွမ်ထံသို့ အုပ်မိုးကာ ကျဆင်းလာခဲ့သည်။ ထိုခဏ၌ လောကတစ်ခုလုံးမှာ ထိုစွမ်းအားများဖြင့် ဖုံးလွှမ်းသွားပြီး ယီထျန်းယွမ်အတွက် ထွက်ပြေးစရာ နေရာမရှိတော့သကဲ့သို့ ဖြစ်နေသည်။

သို့သော် ယီထျန်းယွမ်မှာ ထွက်ပြေးရန် မလိုအပ်ချေ။ သူသည် ထျန်းချန်နတ်ဘုရားလှံကို တင်းတင်းဆုပ်ကိုင်ကာ မိစ္ဆာနတ်ဘုရားတစ်ပါးအဖြစ် ပြောင်းလဲလိုက်ပြီး နဂါးနတ်ဘုရားနှင့် ဖီးနစ် သွေးရိုးဗီဇများကိုပါ ထုတ်ဖော်လိုက်သည်။ ရှေးဟောင်းဝတ်စုံမှ တောက်ပသော အဝါရောင်အလင်းများ ထွက်ပေါ်လာပြီး လှံဦးတွင် အေးစက်သော အငွေ့အသက်များ ဝန်းရံလျက် တိုက်ပွဲအတွက် အဆင်သင့် ဖြစ်နေခဲ့သည်။

“ကောင်းကင်ရူးသွပ်ခြင်းစွမ်းရည်... တိမ်တိုက်လွှမ်းမိုးခြင်း...”

ကောင်းကင်ရူးသွပ်ခြင်းစွမ်းရည်၏ တတိယမြောက် တိုက်ကွက်ကို သူ ထုတ်ဖော်လိုက်သည်။ ဤကျင့်စဉ်တွင် တိုက်ကွက် သုံးကွက်သာ ရှိသဖြင့် သူသည် ရှေ့ဆုံး သုံးကွက်ကိုသာ အသုံးပြုနိုင်သည်။ သို့သော် ထိုသုံးကွက်မှာပင် လုံလောက်နေပြီ ဖြစ်သည်။ သူ ဤတိုက်ကွက်ကို အသုံးပြုလိုက်သည့်အခါ ထျန်းချန်နတ်ဘုရားလှံပေါ်တွင် ကြောက်မက်ဖွယ်ကောင်းသော ပုံရိပ်ယောင်တစ်ခု ပေါ်ထွက်လာခဲ့သည်။ ၎င်းမှာ ဤကျင့်စဉ်ကို တီထွင်ခဲ့သူ "ဆန်းကြယ်ဘိုးဘေး"၏ ပုံရိပ်ပင် ဖြစ်သည်။

“အဲဒါ... အဲဒါ ဆန်းကြယ်ဘိုးဘေးပဲ...”

ထျန်းယုနယ်မြေရှင်နှင့် အခြားသူများမှာ ယီထျန်းယွမ် ဤတိုက်ကွက်ကို ထုတ်ဖော်လိုက်သည်ကို မြင်သောအခါ အလွန်ပင် စိတ်လှုပ်ရှားသွားကြသည်။ ထျန်းယုနတ်ဘုရားနယ်မြေ၏ အသန်မာဆုံးသော ဤသိုင်းပညာကို ပြိုင်ပွဲဝင်များ ကျင့်ကြံရန်မှာ အလွန်ခက်ခဲလှသော်လည်း ယခု ယီထျန်းယွမ် အသုံးပြုနေသည့် တတိယမြောက် တိုက်ကွက်မှာပင် အစွမ်းမှာ သာမန်မဟုတ်တော့ချေ။

ဆန်းကြယ်ဘိုးဘေး၏ ခန့်ညားလှသော ပုံရိပ်ယောင် တစ်ခုတည်းကပင် မြေကမ္ဘာအရှင်တီကယ်၏ ပုံရိပ်ယောင် အမြောက်အမြားကို ဖိနှိပ်ထားရန် လုံလောက်နေသည်။

“ဝုန်း...”

ယီထျန်းယွမ်၏ လက်ထဲမှ ထျန်းချန်နတ်ဘုရားလှံမှာ ပြင်းထန်စွာ တုန်ခါလာပြီး ပတ်ဝန်းကျင်ရှိ ဟင်းလင်းပြင်မှာပင် အေးခဲသွားသကဲ့သို့ အရာအားလုံး နှေးကွေးသွားခဲ့သည်။ ဤတိုက်ကွက်က သူ၏ တိုက်ခိုက်ရေးစွမ်းအားကို ငါးဆခန့်အထိ မြင့်တက်စေသည်။ တတိယမြောက် တိုက်ကွက်ကပင် ဤမျှ စွမ်းအားရှိနေပါက နောက်ပိုင်း တိုက်ကွက်များမှာ ဆယ်ဆမက ပြင်းထန်ပေလိမ့်မည်။

ဤတိုက်ကွက်၏ ငါးဆအပြင်၊ ရှေးဟောင်းဝတ်စုံ၏ ငါးဆနှင့်အတူ ဆန်းကြယ်ထိခိုက်မု အာနိသင်ပါ ပေါင်းစပ်လိုက်သည့်အခါ သူ၏ စွမ်းအားမှာ ၁၅ ဆအထိ ပေါက်ကွဲထွက်လာခဲ့သည်။ ရူးသွပ်မုကို အသုံးမပြုဘဲနှင့်ပင် သူ၏ စွမ်းအားမှာ အဆင့်သစ်တစ်ခုသို့ ရောက်ရှိသွားခဲ့ပြီ ဖြစ်သည်။ သူ၏ နောက်ခံအင်အားမှာ မည်သည့်ပါရမီရှင်နှင့်မဆို ယှဉ်ပြိုင်ရန် လုံလောက်နေပြီဖြစ်သည်။

“ဘုန်း...”

ကြီးမားသော စွမ်းအားနှစ်ခုမှာ ထိပ်တိုက်ရင်ဆိုင်မိသွားပြီး တိုက်ပွဲကွင်းပြင်တစ်ခုလုံးတွင် ပြင်းထန်သော ပေါက်ကွဲမှုများ ဖြစ်ပေါ်လာခဲ့သည်။ စွမ်းအားဝဲဂယက်များမှာ အရပ်မျက်နှာအနှံ့သို့ ပျံ့နှံ့သွားပြီး ကမ္ဘာတုန်မတတ် အသံများ ထွက်ပေါ်လာခဲ့သည်။

ခဏအကြာတွင် ပေါက်ကွဲမှုများ ငြိမ်သက်သွားသည့်အခါ ယီထျန်းယွမ်သည် သူ၏ လှံဖြင့် မြေကမ္ဘာအရှင်တီကယ်၏ ရင်ဘတ်ကို ထိုးဖောက်ကာ လေထဲတွင် မထားသည်ကို အားလုံး မြင်တွေ့လိုက်ရသည်။ ယီထျန်းယွမ်မှာမူ မည်သည့်ဒဏ်ရာမျှ ရရှိခြင်း မရှိချေ။ မြေကမ္ဘာအရှင်တီကယ်၏ ဓားရှည်မှာမူ အဝေးသို့ လွင့်စင်ကာ မြေကြီးထဲသို့ စိုက်ဝင်နေခဲ့ပြီ ဖြစ်သည်။

“ဒါက မင်းရဲ့ အစွမ်းပဲလား...”

ယီထျန်းယွမ်သည် မြေကမ္ဘာအရှင်တီကယ်ကို လှံဖြင့် မကာ အေးစက်စွာ ကြည့်လိုက်သည်။

“ဝေါ့...”

မြေကမ္ဘာအရှင်တီကယ်မှာ သွေးများ ဆက်တိုက်အန်ထုတ်နေပြီး မျက်ဝန်းထဲတွင် ဒေါသနှင့် မကျေနပ်မှုများ ပြည့်နှက်နေသော်လည်း အားအင်ကုန်ခမ်းကာ လေထဲတွင် တွဲလောင်း ဖြစ်နေတော့သည်။ စွမ်းအားများစွာကို ထုတ်သုံးခဲ့သဖြင့် သူ၏ ခုခံနိုင်စွမ်းမှာ အစောပိုင်းကကဲ့သို့ မရှိတော့ချေ။

“မင်းမှာ ဒီထက်ပိုပြီး ပြင်းထန်တဲ့ စွမ်းအားတွေ ကျန်သေးတယ်ဆိုတာ ငါ သိပါတယ်... အဲဒါကို ထုတ်သုံးပြီး ငါတို့ကို ပြသလိုက်စမ်းပါဦး...”

ယီထျန်းယွမ်က ပြုံးလျက် ဆိုလိုက်သည်။

“ငါ... ငါ အရှုံးပေးပါတယ်... ဒါက ငါ့ရဲ့ အစွမ်းကုန်ပါပဲ...”

သူသည် မျက်နှာပျက်ယွင်းသွားပြီး သူ၏ မူလအသွင်ကို မထုတ်ဖော်ရန် ဆုံးဖြတ်ကာ အရှုံးပေးလိုက်သည်။ အကယ်၍ ထုတ်ဖော်လိုက်ပါက အရာအားလုံး ပျက်စီးသွားမည် ဖြစ်သောကြောင့် အရှုံးပေးလိုက်ခြင်းက ပို၍ ကောင်းမည်ဟု ယူဆခြင်း ဖြစ်သည်။

“ဟုတ်လား... ဒါဆိုရင်လည်း ငါက နည်းနည်းလောက် လှုံ့ဆော်ပေးရတာပေါ့...”

ယီထျန်းယွမ်သည် လှံကို အားစိုက်လိုက်ရာ ပြင်းထန်သော စွမ်းအားများမှာ တစ်ဖက်လူ၏ ခန္ဓာကိုယ်အတွင်းသို့ စီးဝင်သွားပြီး အတွင်းပိုင်းအထိ လှုံ့ဆော်လိုက်သည်။ လူတိုင်းတွင် မိမိကိုယ်ကိုယ် ကာကွယ်သည့် အသိစိတ် ရှိကြသဖြင့် အန္တရာယ်နှင့် ကြုံတွေ့ရသည့်အခါ မူလစွမ်းအားများ ပေါက်ကွဲထွက်လာတတ်သည်။

မြေကမ္ဘာအရှင်တီကယ်သည် မကောင်းသောအငွေ့အသက်ကို ခံစားလိုက်ရပြီး ဒေါသတကြီးဖြင့် လှံတံကို တွန်းထုတ်ကာ ထွက်ပြေးရန် ကြိုးစားသော်လည်း ယီထျန်းယွမ်က သူ့အား လုံးဝ ပိတ်ဆို့ထားခဲ့သည်။

“ထွက်ပြေးဖို့ ကြိုးစားနေတာလား... ဖြစ်နိုင်မယ် ထင်လို့လား...”

ယီထျန်းယွမ်သည် လှံကို ဝှေ့ယမ်းကာ မြေကမ္ဘာအရှင်တီကယ်ကို မြေပြင်သို့ ရိုက်ချလိုက်ပြီး သူ၏ ကိုယ်တွင်းစွမ်းအားများကို ဆက်လက် လှုံ့ဆော်ပေးနေခဲ့သည်။ ပရိသတ်များမှာ ယီထျန်းယွမ် ဘာလုပ်နေသလဲဆိုသည်ကို မသိကြဘဲ ပြိုင်ဘက်က အရှုံးပေးနေသည်ကိုပင် မညှာမတာ နှိပ်စက်နေခြင်းမှာ ရက်စက်လွန်းသည်ဟု ယူဆနေကြသည်။

သို့သော် ယီထျန်းယွမ်၏ လှုံ့ဆော်မှုအောက်တွင် မြေကမ္ဘာအရှင်တီကယ်သည် ဟိန်းဟောက်လိုက်ပြီး သူ၏ နောက်ကျောမှ လက်မောင်း ၁၂ ချောင်း ရုတ်တရက် ထွက်ပေါ်လာကာ မြေပြင်ကို ထောက်လျက် ယီထျန်းယွမ်အား ပြန်လည် တိုက်ခိုက်လာတော့သည်။

ယီထျန်းယွမ်သည် လှံကို လွှတ်လိုက်ပြီး ဘေးသို့ လျင်မြန်စွာ ရှောင်တိမ်းလိုက်သည်။ ထိုခဏ၌ ကွင်းပြင်တစ်ခုလုံးမှာ တိတ်ဆိတ်သွားပြီး အားလုံးမှာ မြင်တွေ့လိုက်ရသော မြင်ကွင်းကြောင့် မှင်တက်မိသွားကြတော့သည်။