အခန်း (၂၇၁-၂၇၂)

အခန်း (၂၇၁) - နိမိတ်ဆိုးနှင့် ယွန်လိုင်းမြို့မှ ထွက်ပြေးခြင်း (အပိုင်း ၂)

"အခြေအနေတွေ အားလုံး အေးဆေးနေတယ်ဆိုရင်တောင် ယွန်လိုင်းမြို့ကို ပြန်ဖို့ မလောသင့်ဘူး။ မလိုအပ်ဘဲနဲ့တော့ လောင်းကြေးမထပ်ချင်ဘူးလေ" ဟု ကျန်းဖန်က ပြတ်သားစွာ ပြောလိုက်သည်။

"လင်တော်မောင် ပြောတာ တကယ်မှန်တယ်။"

စုဝေဝေက ကျန်းဖန်ကို အားကျလေးစားစွာ ကြည့်လိုက်မိသည်။ သူမ၏ အမျိုးသားသည် အရာရာကို အမြဲတမ်း ပြည့်ပြည့်စုံစုံ ကြိုတင် ပြင်ဆင်ထားတတ်သူ ဖြစ်ကြောင်း သူမ သိနေသည်။ ထို့ကြောင့်လည်း သူတို့သည် ဘေးအန္တရာယ်များကို အမြဲ ရှောင်လွှဲနိုင်ခဲ့ကြခြင်း မဟုတ်ပါလား။

"မင်းကတော့ တော်တော်လေးကို သတိကြီးတာပဲနော်။ အခြေအနေလေး နည်းနည်း လှုပ်ခတ်တာနဲ့တင် ထွက်ပြေးဖို့ ဆုံးဖြတ်လိုက်တာလား"

သောင်းပြောင်းလဲခြင်း ဆေးပေါင်းဖိုကြီးက ဘာပြောရမှန်းမသိဘဲ ငြည်းတွားနေတော့သည်။ လက်ရှိသခင်မှာ တကယ့်ကို 'လိပ်ကျင့်ကြံသူ' တစ်ယောက်ကဲ့သို့ အလွန်အမင်း သတိကြီးလှသည်။ အနည်းငယ်မျှသော မတည်ငြိမ်မှုကို တွေ့သည်နှင့် ချက်ချင်း ထွက်ပြေးရန် ပြင်တော့သည်။

သို့သော် ဤကဲ့သို့သော လူစားမျိုးကသာ ကျင့်စဉ်လောက၌ ကြာရှည်စွာ ရှင်သန်နိုင်မည် ဖြစ်ကြောင်း ဆေးပေါင်းဖိုကြီး ဝန်ခံလိုက်ရသည်။ ကျင့်ကြံသူများအတွက် ကျင့်စဉ်အဆင့် မြင့်မားနေရုံဖြင့် မလုံလောက်ဘဲ၊ အသက်ရှည်ရှည် ရှင်သန်နိုင်ခြင်းကသာ အစစ်အမှန် အရည်အချင်း ဖြစ်ပေသည်။

ဝုန်း…

မျက်တောင်တစ်ခတ် အတွင်းမှာပင် ကျန်းဖန်နှင့် စုဝေဝေတို့သည် ပစ္စည်းများကို အလျင်အမြန် သိမ်းဆည်းကာ ထွက်ခွာလာခဲ့ကြသည်။ သူတို့ ယွန်လိုင်းမြို့သို့ ပြောင်းလာခဲ့သည်မှာ မကြာသေးသဖြင့် အိမ်နီးနားချင်းများနှင့်လည်း မရင်းနှီးကြပေ။

ထို့ကြောင့် သူတို့ ထွက်ခွာသွားခြင်းကို မည်သည့် ကျင့်ကြံသူမျှ သတိမပြုမိခဲ့ကြပေ။ လက်ရှိတွင် ယွန်လိုင်းမြို့ရှိ ကျင့်ကြံသူ အများစုမှာ မြို့တော်ဝန် ပြန်ရောက်လာသည့် သတင်းကောင်းကြောင့် ပျော်ရွှင်နေကြ၏။

သို့သော် ၎င်းမှာ ကျန်းဖန်နှင့် မသက်ဆိုင်ပေ။ သူသည် နိမိတ်ဖတ်အင်း၏ လမ်းညွှန်ချက်အတိုင်း ကိုယ်ဖော့အင်းကို အသုံးပြုကာ စုဝေဝေနှင့်အတူ ပီကျားတောင်ဆီသို့ အရှိန်အဟုန်ဖြင့် ပျံသန်းလာခဲ့သည်။

နာရီအနည်းငယ် ကြာပြီးနောက်…

ကျန်းဖန်နှင့် စုဝေဝေတို့သည် ဟင်းလင်းပြင်၌ မယုံနိုင်စရာကောင်းသော အမြန်နှုန်းဖြင့် ပျံသန်းနေကြသည်။ သူတို့သည် လေစီးကြောင်းများကြားတွင် တိမ်တိုက်များ၏ အထက်မှ ဖြတ်ကျော်လာခဲ့ခြင်း ဖြစ်သည်။

ထင်ရှားသည်မှာ အုတ်မြစ်တည်ဆောက်ခြင်း အစောပိုင်းအဆင့် ကျင့်ကြံသူ အချင်းချင်းကြားတွင်ပင် ကျန်းဖန်၏ အမြန်နှုန်းမှာ အဆပေါင်းများစွာ သာလွန်နေချေပြီ။

"ဒါက ငါ့ရဲ့ သွေးသားတော်ဝင် စွမ်းရည်ဖြစ်တဲ့ လက်ဝါးလေပြေရဲ့ စွမ်းအားလား"

ကျန်းဖန်သည် ကိုယ်ဖော့အင်းကို အသုံးပြုလိုက်သည့်အခါ သူ၏ ခန္ဓာကိုယ်ကို မရေမတွက်နိုင်သော လေစီးကြောင်းများက ဝန်းရံလာပြီး၊ တိမ်တိုက်များကို စီးနင်းနေရသကဲ့သို့ ခံစားလိုက်ရသည်။ လေကို ထိန်းချုပ်ရသည်မှာ ယခင်ကထက် များစွာ ပိုမိုလွယ်ကူလှ၏။

ပတ်ဝန်းကျင်ရှိ လေစီးကြောင်းများမှာ သူ၏ ခန္ဓာကိုယ်၏ အစိတ်အပိုင်းတစ်ခုသဖွယ် ဖြစ်နေပြီး၊ ချွေးပေါက်တိုင်းမှတစ်ဆင့် လေစီးကြောင်းများ ဝင်ထွက်နေကြသည်။ သူ၏ ကျောကုန်းပေါ်တွင်ပင် လေဖြင့် ပြုလုပ်ထားသော အတောင်ပံတစ်စုံ ပေါ်ထွက်လာပြီး၊ တစ်ချက် ခတ်လိုက်ရုံဖြင့် ဂျက်လေယာဉ်တစ်စင်းအလား အရှိန်အဟုန်ဖြင့် ရှေ့သို့ တိုးသွားနိုင်သည်။ ဤစွမ်းရည်သည် ခရီးသွားရာတွင်သာမက တိုက်ပွဲများ၌လည်း အလွန်ပင် အသုံးဝင်လှပေသည်။

ရွှစ်…

ထိုအချိန်တွင် ကျန်းဖန်သည် အဝေး၌ စုတ်တံတင်သည့်ခုံနှင့် တူသော ပီကျားတောင်ကို မြင်တွေ့လိုက်ရသည်။ သူ ရောက်လိုရာသို့ ရောက်ရှိပြီဖြစ်ကြောင်း ဗီဇအရ သိလိုက်ရသည်။

ဤတောင်သည် သစ်ပင်တောအုပ်များဖြင့် စိမ်းလန်းစိုပြေနေပြီး အခြားတောင်များနှင့် သိပ်မထူးခြားလှပေ။ သို့သော် ကျန်းဖန် သူ၏ ဝိညာဉ်အာရုံဖြင့် စစ်ဆေးလိုက်သောအခါတွင်မူ ချက်ချင်းပင် သတိပေးချက်တစ်ခု ရရှိလိုက်သည်။

တောအုပ်နက်ရှိုင်းသော နေရာ၌ စက်ဆုပ်ရွံရှာဖွယ်ကောင်းသော၊ ယုတ်မာညစ်ထေးသည့် အရှိန်အဝါ ၇ ခု၊ ၈ ခုခန့် ပုန်းအောင်းနေသည်ကို သူ သိလိုက်ရသည်။ ထိုအထဲတွင် အုတ်မြစ်တည်ဆောက်ခြင်း အစောပိုင်းအဆင့် ကျင့်ကြံသူတစ်ဦးပင် ပါဝင်နေသေးသည်။

"ဘာတွေ ဖြစ်ကုန်တာလဲ။ ငါတို့ရဲ့ ပုန်းခိုရာကို တစ်စုံတစ်ယောက်က ရှာတွေ့သွားတာလား။ ငါတို့ သတင်းတွေ ပေါက်ကြားသွားတာလား"

တောအုပ်ထဲမှ လူရိပ်တစ်ခုက ကျန်းဖန်တို့ ရောက်လာသည်ကို မြင်သည်နှင့် ထိတ်လန့်တကြား အော်ဟစ်လိုက်သည်။ ဤနေရာမှာ သူတို့၏ လျှို့ဝှက်ပုန်းခိုရာ ဖြစ်သဖြင့် မည်သူမျှ မသိနိုင်ဟု သူတို့ ထင်ထားခဲ့ခြင်း ဖြစ်သည်။

"မဖြစ်နိုင်တာ... ငါတို့ အမြဲတမ်း သတိထားပြီး လှုပ်ရှားခဲ့တာပဲ၊ ဘယ်လိုလုပ် ခြေရာခံမိမှာလဲ"

"ဟုတ်တယ်... ငါတို့ထဲက ဘယ်သူမှ သစ္စာဖောက်မှာ မဟုတ်ဘူး။ ငါတို့အားလုံးက မိစ္ဆာကျင့်ကြံသူတွေလေ။ တစ်လှေတည်း စီးလာကြတာ ကြာပြီဆိုတော့ သစ္စာဖောက်လုပ်ရင် တရားဝင်ဂိုဏ်းတွေရဲ့ အမြစ်ပြတ် သုတ်သင်တာကို ခံရမှာပဲဥစ္စာ"

"ဒါဆိုရင် ဒီကျင့်ကြံသူ နှစ်ယောက်က ဒီနေရာကို မတော်တဆ ရောက်လာတာ ဖြစ်ရမယ်။"

"ဒီလိုဆိုရင်တော့ မမြင်သင့်တာကို မြင်လိုက်မိတဲ့ သူတို့ရဲ့ ကံဆိုးမှုပဲပေါ့။ သဲလွန်စ မကျန်အောင် သူတို့ကို အပြတ်ရှင်းရမယ်"

ရုတ်တရက် တောအုပ်နက်ရှိုင်းသော နေရာမှ လူရိပ်များ ပေါ်ထွက်လာခဲ့သည်။ သူတို့ တစ်ကိုယ်လုံးတွင် သွေးရောင် မိစ္ဆာအရှိန်အဝါများ ဖုံးလွှမ်းနေပြီး အလောင်းပုံများကြားမှ ထွက်လာသော တစ္ဆေများကဲ့သို့ပင်။ သူတို့၏ မျက်နှာများမှာ သွေးစုပ်ဖုတ်ကောင်များကဲ့သို့ အစွယ်များ ထွက်နေပြီး၊ အရေပြားပေါ်တွင်လည်း သွေးရောင် အင်းစာလုံးများ ပေါ်ထွက်နေသည်။

သူတို့ ပတ်ပတ်လည်တွင် မရေမတွက်နိုင်သော ဝိညာဉ်ဆိုးများ ဝန်းရံနေကြ၏။ ထင်ရှားသည်မှာ သူတို့သည် သာမန်ကျင့်ကြံသူများ မဟုတ်ဘဲ မိစ္ဆာကျင့်ကြံသူများ ဖြစ်ကြသည်။

"သတိထား... ဒီကောင်တွေက မိစ္ဆာကျင့်ကြံသူတွေပဲ။ နာမည်ကျော် သွေးမိစ္ဆာကျင့်စဉ်ကို ကျင့်ကြံထားကြတာပဲ" ဟု သောင်းပြောင်းလဲခြင်း ဆေးပေါင်းဖိုကြီးက မိစ္ဆာကျင့်ကြံသူများကို ရင်းနှီးနေသည့်အလား သတိပေးလိုက်သည်။

"သွေးမိစ္ဆာကျင့်စဉ် ဆိုတာ ဘာလဲ" ကျန်းဖန်က မေးလိုက်သည်။

"အဲဒီကျင့်စဉ်က မိစ္ဆာကျင့်စဉ်တွေထဲမှာ တော်တော်လေးကို နာမည်ကြီးတာ။ တစ်ခါက သွေးမိစ္ဆာအရှင်သခင် ဆိုတဲ့လူ ပေါ်ခဲ့ဖူးတယ်။ သူက သွေးကို အဓိက စားသုံးပြီး ကျင့်ကြံတာ။ သူ ရောက်တဲ့နေရာတိုင်းမှာ သွေးပင်လယ်တွေ ဖြစ်သွားသလို၊ သတ်ဖြတ်မှုတွေလည်း မရေမတွက်နိုင်အောင် ရှိခဲ့တယ်။ ဂိုဏ်းပေါင်းများစွာ သူတိုက်ခိုက်လို့ ပျက်စီးခဲ့ရသလို၊ ကျင့်ကြံသူ အမြောက်အမြားရဲ့ သွေးတွေကိုလည်း သူ စုပ်ယူခဲ့တယ်"

"နောက်ပိုင်းမှာတော့ သွေးမိစ္ဆာအရှင်သခင် းက သန္ဓေတည်ဝိညာဉ်ရှင် အမြောက်အမြားရဲ့ ဝိုင်းဝန်းတိုက်ခိုက်မှုကြောင့် သေဆုံးသွားခဲ့ရတယ်။ ဒါပေမဲ့ ဒီကျင့်စဉ်က အရမ်းကို အရှိန်အဟုန်နဲ့ တိုးတက်တာဗျ။ မိစ္ဆာသားရဲတွေ၊ လူသားတွေနဲ့ တခြား သက်ရှိတွေရဲ့ သွေးကို ဆေးအဖြစ် သုံးတာလေ။ သွေးကို စုပ်ယူနိုင်သရွေ့ ကျင့်စဉ်အဆင့်က တရိပ်ရိပ် တက်နေမှာဖြစ်သလို၊ အဆို့အတားတွေကိုလည်း လွယ်လွယ်ကူကူ ဖောက်ထွက်နိုင်တာပေါ့"

"ဒါကြောင့်လည်း လေလွင့်ကျင့်ကြံသူ အမြောက်အမြားက အုတ်မြစ်တည်ဆောက်ခြင်း အတွက် မျှော်လင့်ချက်အဖြစ် ဒီကျင့်စဉ်ကို သတ်မှတ်ခဲ့ကြတာ။ အဲဒီ သွေးမိစ္ဆာအရှင်သခင်ကလည်း သူ့ရဲ့ ကျင့်စဉ်ကို ကမ္ဘာအနှံ့ ပျံ့သွားအောင် တမင် လုပ်ခဲ့တာလေ" ဟု ဆေးပေါင်းဖိုကြီးက လေးလေးနက်နက် ရှင်းပြလိုက်သည်။

ဝမ်ဟွာအရှင်သခင်သည်လည်း သွေးမိစ္ဆာအရှင်သခင်ကို နှိမ်နင်းရာတွင် ပါဝင်ခဲ့ဖူးသဖြင့် ဆေးပေါင်းဖိုကြီးမှာ ဤအကြောင်းကို ကောင်းစွာ သိထားခြင်း ဖြစ်သည်။

"ဘာလို့ ကမ္ဘာအနှံ့ ပျံ့အောင် လုပ်ရတာလဲ" ကျန်းဖန် စူးစမ်းစွာ မေးလိုက်သည်။

"ဟားဟား... မင်းက အဲဒီလူကို စိတ်ကောင်းရှိတယ်လို့ ထင်နေတာလား။ မှားတယ်... သူက တမင် ရည်ရွယ်ချက်ရှိရှိ လုပ်တာ။ သူ့အတွက်တော့ ဒီကျင့်စဉ်ကို ကျင့်တဲ့သူတိုင်းက 'သွေးကျွန်' တွေပဲ။ သူတို့ ကျင့်စဉ်အဆင့် မြင့်လာလေလေ၊ သွေးမိစ္ဆာအရှင်သခင် အတွက်တော့ အဖိုးတန် ဆေးလုံးတွေ ဖြစ်လာလေလေပဲ။ သူတို့ကို သူက ပြန်စားသုံးပြီး သူ့ရဲ့ ကျင့်စဉ်ကို မြှင့်တင်တာလေ"

"ဒါကြောင့် ဒီကျင့်စဉ်ကို ကျင့်တဲ့သူတွေက အချင်းချင်း ပြန်သတ်ကြတာပေါ့။ ဒါက 'မိစ္ဆာပိုးမွှား မွေးမြူခြင်း'နဲ့ တူတူပဲ။ အနိုင်ရတဲ့သူက အရာအားလုံးကို ရမှာဖြစ်ပြီး၊ ကျန်တဲ့သူတွေကတော့ အစာပဲ ဖြစ်သွားကြရမှာ။ ဒါကြောင့်လည်း မိစ္ဆာကျင့်ကြံသူတွေကို လူတိုင်းက ရွံရှာကြတာပေါ့။ သူတို့က တစ်ကမ္ဘာလုံးက ကျင့်ကြံသူတွေကို သူတို့အတွက် အရင်းအမြစ်အဖြစ်ပဲ သဘောထားတာကိုး"

"ဒီကျင့်စဉ်က စွမ်းအားကြီးပြီး လျင်မြန်စွာ အဆင့်တက်နိုင်သလို၊ ဝိညာဉ်အမြစ် ပါရမီကိုလည်း ဂရုစိုက်စရာ မလိုဘူးဆိုပေမဲ့ ဘေးထွက်ဆိုးကျိုးကတော့ အရမ်းကြီးမားတယ်။ ကျင့်စဉ် အောင်မြင်တဲ့အထိ သွေးကိုပဲ မှီဝဲနေရမှာဖြစ်သလို၊ နေရောင်ကိုလည်း ကြောက်ကြတယ်။ သွေးမရရင် သည်းမခံနိုင်လောက်အောင် ရေငတ်သလို ခံစားရပြီး၊ နောက်ဆုံးမှာ ရူးသွပ်ကာ ရှေ့မှာတွေ့တဲ့သူတိုင်းကို သတ်မယ့် သွေးမိစ္ဆာတွေ ဖြစ်ကုန်ကြတာပဲ။ အဲဒါကြောင့် မိစ္ဆာကျင့်ကြံသူမှန်သမျှကို အမြစ်ပြတ် သုတ်သင်ရမယ်" ဟု ဆေးပေါင်းဖိုကြီးက သတိပေးလိုက်သည်။

"သေကြစမ်း..."

ထိုအချိန်တွင် သွေးမိစ္ဆာကျင့်စဉ် ကျင့်ကြံထားသူများက သည်းမခံနိုင်တော့ပေ။ သူတို့၏ မျက်နှာများမှာ ရက်စက်ယုတ်မာသော အသွင်သို့ ပြောင်းလဲသွားကာ၊ ကြောက်မက်ဖွယ်ကောင်းသော သွေးရောင် အရှိန်အဝါများကို ထုတ်လွှတ်ရင်း ကျန်းဖန်နှင့် စုဝေဝေဆီသို့ သွေးရောင်ရိပ်များအလား အရှိန်အဟုန်ဖြင့် ပြေးဝင်လာကြလေတော့၏။

…..

အခန်း (၂၇၂) - ရှေးဟောင်း တယ်လီပို့ အစီရင်စုကို ရှာဖွေတွေ့ရှိခြင်းနှင့် သားရဲတစ်သောင်း တောင်တန်းမှ ထွက်ခွာခြင်း

"မင်းတို့ မိစ္ဆာကျင့်ကြံသူတွေက တကယ် ယဉ်ကျေးမှု မရှိတာပဲ"

ကျန်းဖန်သည် ထိုမိစ္ဆာကျင့်ကြံသူ အုပ်စုကို အေးစက်စက် အကြည့်ဖြင့် ကြည့်လိုက်သည်။ သူသည် သူ၏ လက်ကြီးကို ဝှေ့ယမ်းလိုက်ပြီး ကိုယ်ဟန်ချုပ်အင်းကို နှိုးဆွလိုက်၏။

ဝုန်း…

မျက်တောင်တစ်ခတ် အတွင်းမှာပင် လေစီးကြောင်းများဖြင့် ပြုလုပ်ထားသော သံကြိုးများသည် မိစ္ဆာကျင့်ကြံသူများ အုပ်စုကို ရစ်ပတ်သွားခဲ့သည်။ သွေးသားတော်ဝင် စွမ်းရည်ဖြစ်သော လက်ဝါးလေပြေကို ကျွမ်းကျင်ထားပြီး ဖြစ်သဖြင့်၊ ဤ အသက်သွေးကြောအင်း၏ စွမ်းအားမှာ ယခင်ကထက် အဆပေါင်းများစွာ မြင့်တက်လာခဲ့ချေပြီ။

လေသံကြိုးများကို ပိုမိုများပြားစွာ ဖန်တီးနိုင်ရုံတင်မကဘဲ၊ ၎င်းတို့မှာ ပိုမို၍လည်း ခိုင်ခံ့လှပေသည်။ အဆင့်တူ မိစ္ဆာသားရဲ တစ်ကောင်ပင်လျှင် ဤ ကိုယ်ဟန်ချုပ်အင်း၏ ချည်နှောင်မှုမှ ရုန်းထွက်နိုင်ရန် ခက်ခဲပေလိမ့်မည်။

မိစ္ဆာကျင့်ကြံသူများ အုပ်စုသည် သူတို့၏ ခန္ဓာကိုယ်များမှာ လုံးဝ လှုပ်ရှား၍ မရတော့ကြောင်း ချက်ချင်း သိလိုက်ရသည်။ သူတို့သည် သွေးမိစ္ဆာကျင့်စဉ်ကို အစွမ်းကုန် လည်ပတ်ကာ သူတို့၏ သက်စောင့်အားများကို ထုတ်လွှတ်ရန် ကြိုးစားခဲ့ကြ၏။ သို့သော်လည်း၊ ကြောက်မက်ဖွယ်ကောင်းသော ကိုယ်ဟန်ချုပ်အင်း ရှေ့တွင်မူ အရာအားလုံးမှာ အချည်းနှီးသာ ဖြစ်ခဲ့ရသည်။

ထိုအခိုက်အတန့်တွင် သူတို့သည် 'သံမဏိတံတိုင်းကြီး' ကို ဝင်တိုက်မိပြီ ဖြစ်ကြောင်း ချက်ချင်း နားလည်လိုက်ကြသည်။ သူတို့ရှေ့တွင် မဖိတ်ခေါ်ဘဲ ရောက်ရှိလာသူမှာ သံသယဖြစ်စရာမလိုဘဲ အုတ်မြစ်တည်ဆောက်ခြင်း ကျင့်ကြံသူတစ်ဦးပင် ဖြစ်ချေပြီ။

"ငါတို့တော့ သွားပြီ... ဒီလူက အုတ်မြစ်တည်ဆောက်ခြင်း ကျင့်ကြံသူပဲ"

"ဘာဖြစ်လို့ ဒီလိုနေရာမျိုးမှာ အုတ်မြစ်တည်ဆောက်ခြင်း ပညာရှင်တစ်ယောက် ပေါ်လာရတာလဲ။ ငါတို့ကို သတ်ဖို့ လာတာလား"

"မင်းက ဘယ်သူလဲဆိုတာ ငါတို့ မသိပေမဲ့၊ ငါတို့ကို သတ်ရဲရင်တော့ မင်းအတွက်လည်း ကောင်းတဲ့ ဇာတ်သိမ်း ရှိမှာမဟုတ်ဘူး"

"ဟုတ်တယ်... ငါတို့နောက်ကွယ်မှာ ရွှေအမြုတေ အဆင့်ရှိတဲ့ မိစ္ဆာကျင့်ကြံသူ ခေါင်းဆောင်ကြီး ရှိတယ်။ မင်းသာ ငါတို့ကို သတ်လိုက်မယ်ဆိုရင် ငါတို့ခေါင်းဆောင်က မင်းကို ဘယ်လိုမှ လွတ်အောင် ထားမှာမဟုတ်ဘူး။ မင်းကို အသေအလဲ လိုက်လံ သတ်ဖြတ်လိမ့်မယ်"

မိစ္ဆာကျင့်ကြံသူ အမြောက်အမြားမှာ ထိတ်လန့်တကြားနှင့် ဒေါသထွက်နေကြသည်။ သူတို့သည် ဤမျှအထိ ကံဆိုးလိမ့်မည်ဟု မထင်ထားခဲ့ကြပါ၊ ကြောက်မက်ဖွယ်ကောင်းသော အုတ်မြစ်တည်ဆောက်ခြင်း ကျင့်ကြံသူနှင့် တိုးလိမ့်မည်ဟု မတွေးမိခဲ့ကြပေ။ မျက်တောင်တစ်ခတ် အတွင်းမှာပင် သူတို့သည် တစ်ဖက်လူ၏ လက်ခုပ်ထဲက ရေကဲ့သို့ ဖြစ်သွားခဲ့ရသည်။

သူတို့မှာ ပြန်လည် ခုခံနိုင်စွမ်း လုံးဝ မရှိတော့ပေ။ ယခုအခါ သူတို့သည် ပင့်ကူအိမ်ထဲတွင် ပိတ်မိနေသော ပိုးကောင်လေးများကဲ့သို့ ခံစားနေရသည်။ ရုန်းကန်လေလေ၊ ထောင်ချောက်အတွင်း ပိုမို နစ်မွန်းလေလေပင်။

"ဆူညံလိုက်တာ"

ကျန်းဖန်သည် ထိုမိစ္ဆာကျင့်ကြံသူများထံမှ သွေးညှီနံ့များကို အာရုံခံမိလိုက်သည်။ ၎င်းမှာ လူသားပေါင်းများစွာ သူတို့လက်ချက်ဖြင့် သေဆုံးခဲ့ရကြောင်း ထင်ရှားလှပေသည်။ သူတို့ကို ဆက်လက် အသက်ရှင်ခွင့်ပေးထားခြင်းက အပြစ်မဲ့သူများစွာကို ထပ်မံ သေဆုံးစေရန် ခွင့်ပြုပေးလိုက်သကဲ့သို့ပင်။ ဤကဲ့သို့သော မိစ္ဆာကျင့်ကြံသူများကို ဆယ်ကြိမ်တိုင်တိုင် သတ်လျှင်ပင် အပြစ်မရှိဟု ဆိုရပေမည်။

"ကောင်းကင်မိုးကြိုးအင်း ..."

ချက်ချင်းဆိုသလိုပင် သူသည် သူ၏ ကိုယ်တွင်းရှိ အသက်သွေးကြောအင်း ဖြစ်သော ကောင်းကင်မိုးကြိုးအင်း ကို နှိုးဆွလိုက်သည်။ သူသည် သူ၏ လက်ကြီးကို ဝှေ့ယမ်းလိုက်ကာ ကောင်းကင်မှ မိုးကြိုးများကို ခေါ်ယူလိုက်သကဲ့သို့ပင်။

ခရမ်းရောင် ကောင်းကင်မိုးကြိုးများသည် ကောင်းကင်ယံမှ တစ်စက်ပြီးတစ်စက် ကျဆင်းလာခဲ့ပြီး၊ ဖျက်ဆီးအားပြင်းသော အရှိန်အဝါများကို ထုတ်လွှတ်လျက် မိစ္ဆာကျင့်ကြံသူများ အုပ်စုထံသို့ ဦးတည်သွားတော့သည်။

"ငါတို့တော့ တကယ် သွားပြီ... သူက 'မိုးကြိုးကျင့်ကြံသူ'လား"

ကောင်းကင်မိုးကြိုး၏ အရှိန်အဝါကို အာရုံခံမိလိုက်သောအခါ မိစ္ဆာကျင့်ကြံသူများ အုပ်စုမှာ လုံးဝ မျှော်လင့်ချက် ကုန်ဆုံးသွားခဲ့ရသည်။

မိစ္ဆာကျင့်ကြံသူများအတွက်မူ ကောင်းကင်မိုးကြိုး၏ စွမ်းအားမှာ သူတို့၏ အကြီးမားဆုံးသော ရန်သူတော်ကြီးပင် ဖြစ်သည်။ မည်သည့် မိစ္ဆာကျင့်ကြံသူမျှ ကောင်းကင်မိုးကြိုး၏ စွမ်းအားကို မကြောက်ဘဲ မနေနိုင်ပေ။

ကံကောင်းစွာဖြင့် မိုးကြိုးစွမ်းအားကို ကျွမ်းကျင်သော ကျင့်ကြံသူမှာ အလွန်ပင် ရှားပါးလှသဖြင့်သာ သူတို့ ခေါင်းထောင်နိုင်ခြင်း ဖြစ်သည်။ သို့သော် ယခုမူ သူတို့သည် တကယ့်ကို ကံဆိုးစွာဖြင့် မိုးကြိုးစွမ်းအားကို ကိုင်တွယ်နိုင်သော ကျင့်ကြံသူနှင့် ရင်ဆိုင်လိုက်ရခြင်းပင်။

ဝုန်း... ဂျိမ်း…

ခရမ်းရောင် ကောင်းကင်မိုးကြိုး တစ်စက်ချင်းစီသည် သူတို့၏ ကိုယ်ပေါ်သို့ ပြင်းထန်စွာ ကျရောက်သွားခဲ့၏။

ချက်ချင်းဆိုသလိုပင် မိစ္ဆာကျင့်ကြံသူများမှာ စူးစူးဝါးဝါး အော်ဟစ်လိုက်ကြရသည်။ သူတို့၏ ကိုယ်တွင်းရှိ သွေးရောင် မိစ္ဆာအရှိန်အဝါများနှင့် အမှောင်ထု စွမ်းအားများသည် ကောင်းကင်မိုးကြိုး၏ စွမ်းအားနှင့် တွေ့သောအခါ နေရောင်အောက်မှ ဆီးနှင်းများအလား တစ်စက္ကန့်မျှပင် မခံဘဲ အရည်ပျော်သွားခဲ့ရတော့သည်။

ခဏချင်းမှာပင် သူတို့၏ ခန္ဓာကိုယ်များမှာ ကောင်းကင်မိုးကြိုးကြောင့် တစ်စစီ ပျက်စီးသွားခဲ့ရသည်။ သူတို့၏ ခန္ဓာကိုယ်များမှာ သာမန်စွမ်းအားများနှင့် သတ်ရန် မလွယ်ကူသော်လည်း၊ ကောင်းကင်မိုးကြိုးရှေ့တွင်မူ သူတို့မှာ ဘာမှ မဟုတ်တော့ပေ။ မိုးကြိုး တစ်ချက်တည်းနှင့်ပင် သူတို့ကို ပြာအဖြစ် ပြောင်းလဲပစ်ရန် လုံလောက်ခဲ့သည်။

မျက်တောင်တစ်ခတ် အတွင်းမှာပင် မိစ္ဆာကျင့်ကြံသူများ၏ အသက်ဓာတ်မှာ ပျောက်ကွယ်သွားခဲ့ပြီး သွေးကွက်များအဖြစ်သို့ ပြောင်းလဲသွားခဲ့လေတော့၏။

"ကောင်းကင်မိုးကြိုးရဲ့ စွမ်းအားကတော့ ပြောစရာမလိုအောင် စွမ်းတာပဲ"

"ဒါကတော့ ဒီမိစ္ဆာအုပ်စုအတွက် တကယ့် ရန်သူတော်ကြီးပဲ"

"မင်းနဲ့ လာတိုးတာကတော့ သူတို့အတွက် တကယ် ကံဆိုးတာပဲ" ဟု သောင်းပြောင်းလဲခြင်း ဆေးပေါင်းဖိုကြီးက ရယ်မော၍ ပြောလိုက်သည်။

အမှန်စင်စစ် အခြားသော အုတ်မြစ်တည်ဆောက်ခြင်း ကျင့်ကြံသူများသာ ဤမိစ္ဆာအုပ်စုနှင့် တွေ့မည်ဆိုပါက ပြင်းထန်သော တိုက်ပွဲ ဖြစ်ပွားပေလိမ့်မည်။ သူတို့၌ လှည့်ကွက်များစွာ ရှိသဖြင့် လွတ်မြောက်သွားသူများလည်း ရှိနိုင်ပေသည်။

သို့သော် ကျန်းဖန်နှင့် တွေ့သောအခါတွင်မူ မိုးကြိုး တစ်ချက်တည်းနှင့်တင် အားလုံး ဇာတ်သိမ်းသွားခဲ့ရသည်။ သူတို့၏ အသက်ကယ် နည်းလမ်းများကိုပင် ထုတ်သုံးရန် အချိန်မရလိုက်ပေ။

ဝုန်း…

ကျန်းဖန်သည် မိစ္ဆာကျင့်ကြံသူများ၏ ဝိညာဉ်သိုလှောင်အိတ်များကို မစစ်ဆေးရသေးမီမှာပင် သတင်းစကားတစ်ခု သူ၏ အသိစိတ်ထဲသို့ စီးဝင်လာခဲ့သည်။

"လမ်းခရီး၌ မိစ္ဆာကျင့်ကြံသူများနှင့် တွေ့ဆုံကာ သူသေကိုယ်သေ တိုက်ခိုက်ခဲ့သည်။ ကံကောင်းစွာဖြင့် သူတို့ကို သုတ်သင်နိုင်ခဲ့ကာ အသက်ရှင် လွတ်မြောက်ခဲ့သည်။ သင်သည် ကံကောင်းခြင်းအမှတ် ၁၅,၀၀၀ နှင့် သတ္တမအဆင့် အခွင့်အလမ်းတစ်ခုကို ရရှိသည်။"

"ဟင်..."

ဤသတင်းစကားကြောင့် ကျန်းဖန်သည် မေးစေ့ကို ပွတ်သပ်ရင်း စဉ်းစားလိုက်မိသည်။

မိစ္ဆာကျင့်ကြံသူများကို သုတ်သင်လိုက်ရုံမျှဖြင့် ဤမျှများပြားသော ကံကောင်းခြင်း အမှတ်များကို ရလိမ့်မည်ဟု သူ မထင်ထားခဲ့ပေ။ ဖြစ်နိုင်သည်မှာ ဤမိစ္ဆာကျင့်ကြံသူများသည် မကောင်းမှုများစွာ ပြုလုပ်ခဲ့ကြသဖြင့် သူတို့ကို သုတ်သင်ခြင်းက ကုသိုလ်ထူး ရရှိစေသောကြောင့် ဖြစ်ပေလိမ့်မည်။

တစ်နည်းအားဖြင့် ဤသည်မှာ လူသားပေါင်းများစွာ၏ အသက်ကို ကယ်တင်လိုက်ခြင်းနှင့် အတူတူပင် ဖြစ်သည်။

ကံကောင်းခြင်း အမှတ်များအပြင် 'သတ္တမအဆင့် အခွင့်အလမ်း' တစ်ခုလည်း ပါဝင်နေသေးသည်။

ရွှစ်…

ကျန်းဖန်သည် အခွင့်အလမ်း အလင်းတန်းလေးကို နှိပ်လိုက်သောအခါ၊ ထိုအခွင့်အလမ်းမှာ ဤပီကျားတောင်ပေါ်မှာပင် ရှိနေကြောင်း ချက်ချင်း နားလည်လိုက်သည်။

"နိမိတ်ဖတ်အင်းက ပီကျားတောင်ကို လာဖို့ လမ်းညွှန်ခဲ့တာ မထူးဆန်းတော့ဘူးပဲ"

"ဒီကို လာတာက မိစ္ဆာကျင့်ကြံသူတွေကို သုတ်သင်နိုင်ခဲ့ရုံတင်မကဘဲ၊ သတ္တမအဆင့် အခွင့်အလမ်းကိုပါ ရလိုက်တာပဲ"

"ဒါက တကယ့်ကို ကြီးမားတဲ့ အကျိုးအမြတ်ပဲ။ ဒါပေမဲ့ ဒီမိစ္ဆာကျင့်ကြံသူတွေရဲ့ နောက်ကွယ်မှာ လူကြီးပိုင်းတွေ ရှိနေပုံရတယ်။ အခွင့်အလမ်းကို ရယူပြီးတာနဲ့ ငါ အမြန်ဆုံး ထွက်သွားရမယ်၊ မဟုတ်ရင် ဘေးဒုက္ခတွေ ထပ်ရောက်လာလိမ့်မယ်"

ကျန်းဖန်၏ မျက်လုံးများတွင် ထက်မြက်သော အရှိန်အဝါများ ပေါ်ထွက်လာခဲ့သည်။ မိစ္ဆာကျင့်ကြံသူများ ပြောသွားသည့် စကားအရ သူတို့သည် သာမန် လက်ပါးစေများသာ ဖြစ်ကြသည်။ တကယ့် လူကြီးပိုင်းမှာမူ ထိုလျှို့ဝှက်ဆန်းကြယ်သော ရွှေအမြုတေ အဆင့်ရှိ မိစ္ဆာခေါင်းဆောင်ကြီးသာ ဖြစ်ပေလိမ့်မည်။