အခန်း (၃၁၂)

အခန်း။ ၃၁၂

သူမ၏ ခန္ဓာကိုယ်အတွင်းမှ အင်အားသစ်ကို ခံစားမိလိုက်သောအခါ ကျိရုရွှယ်၏ နှုတ်ခမ်းအစုံမှာ အသာအယာ ကွေးညွတ်သွားပြီး စိတ်ထဲတွင် ကြည်နူးမှုများဖြင့် ပြည့်နှက်သွားသည်။

သူမသည် သူမကိုယ်သူမ ဧကရီတစ်ယောက် ဖြစ်လာသကဲ့သို့ ခံစားနေရသည်။ လက်သီးတစ်ချက်ဖြင့် လူတစ်ယောက်ကို အသက်ပျောက်စေနိုင်ပြီး အချက်အနည်းငယ် ထိုးနှက်ရုံဖြင့် ဧရာမဝက်ဝံကြီးတစ်ကောင်ကိုပင် အနိုင်ယူနိုင်စွမ်းရှိနေပြီဖြစ်သည်။

ဤကဲ့သို့သော ခန္ဓာကိုယ်ကြံ့ခိုင်မှုမျိုးဖြင့်ဆိုလျှင် နောင်တွင် သူမသည် ဖျားနာခြင်းဝေဒနာ ခံစားရတော့မည်မဟုတ်သလို အအေးဒဏ်ကို အံတုကာ ဆောင်းရာသီ၏ အအေးဆုံးအချိန်၌ပင် နွေရာသီဝတ်စုံကို ဝတ်ထားနိုင်မည်ဟု ခန့်မှန်းမိသည်။

အမှန်စင်စစ် အဆင့် ၅ သို့ တက်လှမ်းနိုင်ခြင်းက ကျိရုရွှယ်အတွက် အပြောင်းအလဲများစွာ သယ်ဆောင်လာခဲ့ခြင်း ဖြစ်သည်။ ထိုအပြောင်းအလဲများထဲတွင် ရုပ်ပိုင်းဆိုင်ရာ ကြံ့ခိုင်မှုမှာ သူမအတွက် အရေးပါမှု အနည်းဆုံးသာ ဖြစ်သည်။

အဘယ်ကြောင့်ဆိုသော် သူမသည် ဖေဖေ့အနားတွင်သာ အမြဲရှိနေမည်ဖြစ်ရာ ကိုယ်တိုင်ကိုယ်ကျ တိုက်ခိုက်ရန် အခွင့်အရေးမှာ အလွန်နည်းပါးလှသည်။ တိုက်ခိုက်ရသည့်

တိုင်အောင် သူမ၏ ထူးခြားသော ပါရမီစွမ်းရည်ဖြင့် ရန်သူကို ချက်ချင်း အပြတ်ရှင်းနိုင်စွမ်းရှိရာ ရုပ်ပိုင်းဆိုင်ရာ ခွန်အားကို အသုံးပြု၍ လုံးထွေးသတ်ပုဒ်ရန် လိုအပ်မည်မဟုတ်ပေ။

ကျိရုရွှယ်သည် ထိုးနှက်ထားသော သူမ၏ ညာဘက်လက်ကို ပြန်မရုပ်သိမ်းသေးဘဲ လက်ဖဝါးကို အပေါ်သို့ လှန်ကြည့်လိုက်သည်။

ခဏချင်းမှာပင် ဗလာဖြစ်နေသော လက်ဖဝါးပြင်ပေါ်၌ အိပ်မက်ဆန်လှသော ဖန်သားရောင် ဝိညာဉ်အဆီအနှစ်များ ရုတ်တရက် ဝေ့ဝဲတက်လာသည်။

ထိုဖန်သားရောင်ဝိညာဉ်အဆီအနှစ်များသည် သူမ၏ လက်ဖဝါးပေါ်တွင် ဖြည်းညှင်းစွာ လည်ပတ်နေပြီး စူးရှတောက်ပသော အလင်းတန်းများကို ထုတ်လွှတ်နေသည်။

ကျိရုရွှယ်၏ မျက်ဝန်းများတွင် အပြုံးရိပ်များ ထင်ဟပ်လာသည်။

အဆင့် ၅ သို့ အောင်မြင်စွာ တက်လှမ်းနိုင်ခဲ့ပြီဖြစ်ရာ သူမသည် နောက်ဆုံးတွင် ဝိညာဉ်

ဆေးတောင့်ကို စုစည်းနိုင်ခဲ့ပြီး ဝိညာဉ်အဆီအနှစ်များကို စိတ်ကြိုက် အသုံးပြုနိုင်ပြီဖြစ်သည်။

ဤသည်မှာ အဆင့် ၅ သို့ ရောက်ရှိခြင်း၏ အမှတ်အသားဖြစ်သလို သူမအနေဖြင့် အဆင့်နိမ့် ဆင့်ကဲပြောင်းလဲသူအဆင့်မှ ကျော်လွန်သွားသည့် သင်္ကေတလည်း ဖြစ်သည်။ သူမသည် ဆင့်ကဲပြောင်းလဲခြင်း တံခါးမကြီးကို အလုံးစုံ ဖွင့်လှစ်နိုင်ခဲ့ပြီဖြစ်ပြီး စစ်မှန်သော ဆင့်ကဲပြောင်းလဲမှု လမ်းစဉ်ကို လျှောက်လှမ်းရန် အရည်အချင်း ပြည့်မီသွားပြီပင်။

ခန္ဓာကိုယ်အတွင်းသို့ ဝိညာဉ်အဆီအနှစ်များကို ပြန်လည်ရုပ်သိမ်းလိုက်ပြီးနောက် ကျိရုရွှယ်

သည် သူမ၏ လက်ဖဝါးကို ပြန်ချလိုက်ကာ စိတ်ကိုတည်ငြိမ်အောင်ထားပြီး သူမ၏ ဝိညာဉ်

စွမ်းအားပြောင်းလဲမှုများကို အာရုံခံကြည့်လိုက်သည်။

ယခင်က စိတ်ဝိညာဉ်စွမ်းအားများ ပြည့်လျှံနေပြီး ထပ်မံတိုးမြှင့်၍မရတော့သလို ခံစားရသည့် တင်းကျပ်မှုများမှာ အလုံးစုံ ပျောက်ကွယ်သွားပြီး စိတ်ထဲတွင် ပေါ့ပါးလန်းဆန်းသွားသည်။

အကယ်၍ သူမ၏ အတိတ်က စိတ်ဝိညာဉ်စွမ်းအားသည် ရေကန်ငယ်တစ်ခုအတွင်း လျှံကျလုနီးပါး ဖြစ်နေသော ရေများနှင့် တူသည်ဆိုပါကယခုအခါတွင်မူ ထိုရေကန်မှာ အိုင်ကြီးတစ်ခုအဖြစ် ကျယ်ပြန့်သွားခဲ့ပြီး အနည်းဆုံး ထက်ဝက်ခန့်အထိ ပြန်လည်ဖြည့်တင်းနိုင်စွမ်း ရှိနေပြီဖြစ်သည်။

ဤမျှ များပြားလှသော စိတ်ဝိညာဉ်စွမ်းအားကို တစ်ပြိုင်နက်တည်း ရရှိလိုက်ခြင်းကြောင့် သူမ၏ ပါရမီစွမ်းရည်နှစ်ခုလုံးတွင် အပြောင်းအလဲသစ်များ ဖြစ်ပေါ်လာခဲ့ပြီး ၎င်းတို့ကို ပိုမိုကျွမ်းကျင်ပိုင်နိုင်စွာ အသုံးပြုနိုင်လာခဲ့သည်။

ကျိရုရွှယ်သည် ခေတ္တစဉ်းစားပြီးနောက် ပထမဦးစွာ စိတ်စွမ်းအားဖြင့် ထိန်းချုပ်ခြင်းကို စမ်းသပ်ရန် ဆုံးဖြတ်လိုက်သည်။

နောက်တစ်ခဏတွင် ကျိရုရွှယ်၏ သေးငယ်သော ခန္ဓာကိုယ်လေးမှာ မည်သည့်အသံမျှမထွက်ဘဲ လေထဲသို့ တိတ်ဆိတ်စွာ ပေါ့ပါးစွာ မြောက်တက်သွားသည်။

စိတ်ဝိညာဉ်စွမ်းအား အနည်းငယ်မျှသာ သုံးစွဲလိုက်ရသည်ကို သိလိုက်ရသောအခါ ကျိရုရွှယ် ပြုံးလိုက်မိသည်။ ယခင်က သူမကိုယ်သူမ မြှောက်တင်ရန်အတွက် ယခုထက် အများကြီး ပိုမိုအားစိုက်ခဲ့ရသောကြောင့်ပင်

ယခုအခါ စိတ်ဝိညာဉ်စွမ်းအား ပမာဏ ပိုမိုများပြားလာသည်သာမက စွမ်းအားတစ်ခုချင်းစီ၏ အရည်အသွေးမှာလည်း သိသိသာသာ မြင့်တက်လာခဲ့သည်။ ယခင်က စိတ်ဝိညာဉ်စွမ်းအား အမျှင်တန်း ဆယ်ခုဖြင့် လုပ်ဆောင်ရသောအရာကို ယခုအခါ တစ်ခုတည်းဖြင့်ပင် ပြီးမြောက်အောင် စွမ်းဆောင်နိုင်နေပြီ ဖြစ်သည်။

ချက်ချင်းဆိုသလိုပင် ကျိရုရွှယ်သည် သူမ၏ စိတ်စွမ်းအားအားလုံးကို အသုံးချလိုက်ရာ အရှိန်အဟုန်ပြင်းသော ဒီရေလှိုင်းများအလား စွမ်းအင်များသည် အခန်းတွင်းရှိ အရာအားလုံးကို လွှမ်းခြုံသွားတော့သည်။

မျက်စိတစ်မှိတ်အတွင်းမှာပင် အခန်းထဲ၌ ကမ္ဘာမြေဆွဲအား မရှိတော့သကဲ့သို့ အရာဝတ္ထုအားလုံးမှာ ဖြည်းညှင်းစွာ မြောက်တက်လာသည်။ သူမထိုင်နေသော ကုတင်၊ ကွန်ပျူတာ၊ စားပွဲ၊ ဘေးနားရှိ ဗီရိုနှင့် အမှိုက်ပုံးတို့မှာ လေထဲတွင် လွင့်မျောနေကြသည်။

ထို့နောက် သူမ၏ စိတ်ကူးအတိုင်း သေးငယ်သော အရာဝတ္ထုအချို့မှာ လေထဲတွင် စတင်ပျံသန်းလာပြီး သူမ၏ ပတ်ပတ်လည်တွင် ဝိုင်းရံကာ လှည့်ပတ်နေကြတော့သည်။

မိနစ်အနည်းငယ်ကြာ စမ်းသပ်ကစားပြီးနောက် ကျိရုရွှယ်သည် ရပ်တန့်လိုက်ပြီး လက်ကို ဝေ့ယမ်းကာ လွင့်မျောနေသော အရာဝတ္ထုများကို မူလနေရာများသို့ ပြန်လည်ချထားလိုက်သည်။ တစ်စုံတစ်ခုက အသာအယာ ကိုင်ထားပေးသကဲ့သို့ပင် မည်သည့်အသံမျှ ထွက်မလာဘဲ ငြိမ်သက်စွာ နေရာတကျ ဖြစ်သွားတော့သည်။

အရာအားလုံးကို မူလနေရာသို့ ပြန်လည်ရောက်ရှိစေပြီးနောက် ကျိရုရွှယ်သည် ကြမ်းပြင်ပေါ်သို့ သက်ဆင်းကာ ကုတင်ပေါ်တွင် ပြန်လည်ထိုင်လိုက်သည်။

စိတ်ဝိညာဉ်စွမ်းအားများ သိသိသာသာ မြင့်တက်လာခြင်းကြောင့် ကျိရုရွှယ်သည် သူမ၏ စိတ်

စွမ်းအားကို အလွန်ပြောင်းလွယ်ပြင်လွယ်ရှိစွာ အသုံးပြုနိုင်လာခဲ့ပြီဖြစ်သည်။

သူမသည် ယခင်ထက် အဆပေါင်းများစွာ ပိုမိုလေးလံသော အရာဝတ္ထုများကို မြှောက်တင်နိုင်ပြီဖြစ်သည်။ အဝတ်အစားများနှင့် စောင်များဖြင့် ပြည့်နှက်နေသော ဗီရိုကြီးတစ်ခုကိုပင် အခြားအရာဝတ္ထုများ လွင့်မျောနေစဉ်မှာပင် အလွယ်တကူ မြှောက်တင်ထားနိုင်စွမ်း ရှိလာသည်။

ယခင်က သူမသည် သံမှိုငယ်လေးများကိုသာ အရှိန်ပြင်းပြင်းဖြင့် ပစ်လွှတ်နိုင်ခဲ့သော်လည်း ယခုအခါတွင်မူ လက်ညှိုးခန့်တုတ်သော သံမဏိချောင်းများကိုပင် ထိုကဲ့သို့ပင် အရှိန်အဟုန်ဖြင့် ပစ်လွှတ်နိုင်သည်။

သံမဏိချောင်းများကို သံမှိုပစ်သည့်အရှိန်ဖြင့်သာ တရစပ် ပစ်လွှတ်လိုက်မည်ဆိုပါက ၎င်းသည် အမြောက်ကျည်ဆန်များ မိုးရွာချလိုက်သကဲ့သို့ ပြင်းထန်သော ဖျက်ဆီးအားနှင့် မခြားနားတော့ပေ။

နောက်ဆုံးတွင် ကျိရုရွှယ်၏ စိတ်စွမ်းအားသည် ရုပ်ပိုင်းဆိုင်ရာ လက်နက်များ မလိုဘဲ ရန်သူကို တိုက်ရိုက် တိုက်ခိုက်နိုင်သော ပုံသဏ္ဌာန်အဖြစ် ပြောင်းလဲနိုင်လာခဲ့သည်။

နောက်တစ်ခဏတွင် ကျိရုရွှယ်သည် သူမ၏ လက်ကို တစ်ဖက်ပြန်ဆန့်ထုတ်ကာ ဝိညာဉ်

စွမ်းအားကို အသာအယာ လှုံ့ဆော်လိုက်ရာ မျက်စိတစ်မှိတ်အတွင်းမှာပင် ရေခဲအပ်များကဲ့သို့ ထက်မြက်လှသော စိတ်စွမ်းအားအပ်သုံးစင်း ဖြစ်ပေါ်လာသည်။ ထိုအပ်များမှာ အေးစက်စက် အလင်းတန်းများ ဖြာထွက်နေ၏။

ရှူး... ရှူး... ရှူး...

သူမ၏ စိတ်အာရုံ စေခိုင်းမှုနှင့်အတူ ထိုအပ်သုံးစင်းမှာ လေထုထဲသို့ တိုးဝင်ပျောက်ကွယ်သွားပြီး မျက်စိတစ်မှိတ်အတွင်းမှာပင် တစ်ဖက်ရှိ လူနေအဆောက်အအုံကို ထိုးဖောက်သွားတော့သည်။

ခဏအကြာတွင် ထုံထိုင်းသော အသံသုံးချက် ထွက်ပေါ်လာပြီး အဆောက်အအုံ၏ နံရံပေါ်တွင် သေးငယ်သော်လည်း နက်ရှိုင်းလှသော အပေါက်ငယ် သုံးခု ကျန်ရစ်ခဲ့သည်။ ထိုစိတ်စွမ်းအားအပ်များသည် သေးငယ်သော်လည်း ခိုင်ခံ့လှသော အားဖြည့်ကွန်ကရစ်နံရံကိုပင် ချက်ချင်း ဖောက်ထွက်သွားနိုင်သည်။

ကျိရုရွှယ်၏ မျက်လုံးသူငယ်အိမ်များ ကျုံ့သွားရသည်။ သာမန်ဇွန်ဘီ သို့မဟုတ် သားရဲတစ်ကောင်သာ ဤအပ်တစ်စင်းဖြင့် အထိမှန်ခံရပါက သေချာပေါက် ချက်ချင်းဆိုသလို အသက်ပျောက်သွားမည်မှာ အမှန်ပင်။

ကျိရုရွှယ်သည် စိတ်စွမ်းအားအပ်အချို့ကို ထပ်မံဖန်တီးကာ ပစ်လွှတ်လိုက်ရာ အားလုံးမှာ အဆောက်အအုံနံရံကို အလွယ်တကူ ထိုးဖောက်သွားကြသည်။

သူမ စိတ်ထဲမှ တွေးနေမိသည်မှာ "ဒါက တကယ့်ကို ကောင်းတာပဲ။ နောက်ဆိုရင် လေးလံတဲ့ သံမှိုတွေ၊ အပ်ချည်အပ်တွေကို သယ်သွားစရာ မလိုတော့ဘူး။ စိတ်စွမ်းအားနဲ့တင် လိုသလောက် ဖန်တီးယူလို့ ရပြီ"

သူမ၏ လက်ရှိ စိတ်စွမ်းအား အခြေအနေနှင့် အနာဂတ်တွင် အသုံးချနိုင်မည့် ပုံစံများကို နားလည်သွားပြီးနောက် ကျိရုရွှယ်သည် သူမ၏ ဒုတိယမြောက် စွမ်းရည်ဖြစ်သော အချိနထိန်းချုပ်ခြင်းကို စတင်စမ်းသပ်တော့သည်။

ထိုအချိန်တွင် ကျိရုရွှယ်သည် အခန်းထောင့်ရှိ ကွန်ပျူတာစားပွဲပေါ်မှ အစိမ်းရောင် ရှားစောင်းပင်လေးကို လှမ်းကြည့်လိုက်ရာ သူမ၏ မျက်ဝန်းများ တောက်ပသွားသည်။ ရှားစောင်းပင်လေးမှာ ကြက်ဥတစ်လုံးစာခန့်သာ ရှိပြီး ၎င်းကို စိုက်ထားသော အိုးနှင့်ယှဉ်လျှင် အတော်လေး သေးငယ်နေသည်။

သူမ၏ စွမ်းရည်စမ်းသပ်မှုအတွက် ဤရှားစောင်းပင်လေးကို ခေတ္တစတေးရန် ဆုံးဖြတ်လိုက်သည်။

ကျိရုရွှယ်က အချိန်ထိန်းချုပ်မှုစွမ်းရည်ကို အသုံးချလိုက်သည်နှင့် မမြင်နိုင်သော အင်အားတစ်ခုက ရှားစောင်းပင်လေးကို ဝန်းရံသွားတော့သည်။

မျက်စိတစ်မှိတ်အတွင်းမှာပင် စိုပြည်လန်းဆန်းနေသော ရှားစောင်းပင်လေးမှာ ရေဓာတ်များ ခမ်းခြောက်ကာ ဝါကျင်သွားပြီး နောက်ဆုံးတွင် ဆွေးမြည့်နေသော အညိုရောင် အမှိုက်ပုံတစ်ခုအဖြစ်သို့ ပြိုလဲကျသွားတော့သည်။

သက်ရှိတစ်ခု ရှင်သန်ခြင်းမှ သေဆုံးခြင်းသို့ ကူးပြောင်းသွားသည်ကို ကြည့်ရင်း ကျိရုရွှယ် သက်ပြင်းရှည်ကြီး တစ်ချက်ချလိုက်မိသည်။ အချိန်ထိန်းချုပ်မှု စွမ်းရည်မှာ တကယ့်ကို စိတ်ခြောက်ခြားစရာ ကောင်းလှသည်။

အထူးသဖြင့် အချိန်၏ နက်ရှိုင်းသော အဓိပ္ပာယ်အစအနကို ဆုပ်ကိုင်မိပြီးနောက် ဤစွမ်းရည်ကို သုံးစွဲရခြင်းမှာ စိတ်ဝိညာဉ်စွမ်းအား ကုန်ဆုံးမှု အလွန်များပြားလှသလို အလွန်တရာလည်း ထူးဆန်းကြောက်မက်ဖွယ် ကောင်းသည်။ မလိုအပ်ဘဲနှင့် ဤစွမ်းရည်ကို မသုံးခြင်းက ပိုကောင်းပေလိမည်။

အဆင့် ၅ သို့ ရောက်ပြီးနောက် ကျိရုရွှယ်၏ အချိန်ထိန်းချုပ်မှုမှာ အချိန်၏ နက်ရှိုင်းသော အဓိပ္ပာယ်ကို အနည်းငယ် အသုံးချနိုင်စွမ်း ရှိလာခဲ့ပြီ ဖြစ်သည်။

၎င်းကို အပြည့်အဝ ထုတ်ဖော်လိုက်ပါက ရန်သူကို အစွန်းကုန် ပင်ပန်းနွမ်းနယ်သွားစေနိုင်ပြီး သက်ရှိတစ်ခု၏ ပတ်ပတ်လည်ရှိ အချိန်ကို အဆပေါင်းများစွာ အရှိန်မြှင့်လိုက်သကဲ့သို့ ဖြစ်စေကာ ခဏချင်းအတွင်း ထိုသက်ရှိကို သေဆုံးခြင်းသို့ ပို့ဆောင်ပေးနိုင်မည် ဖြစ်သည်။

စိတ်စွမ်းအားရော၊ အချိန်ထိန်းချုပ်မှုပါ ရှိနေသဖြင့် ကျိရုရွှယ်အနေဖြင့် သူမသည် အဆင့် ၅ အတွင်း၌ ပြိုင်ဘက်ကင်းသူဟု ယုံကြည်ချက်အပြည့်ဖြင့် ပြောနိုင်ပြီဖြစ်သည်။

၎င်းအပြင် ယခုအခါ ဝိညာဉ်အဆီအနှစ်များကို ပိုင်ဆိုင်ထားပြီဖြစ်ရာ သူမ၏ အတိတ်ဘဝမှ အစွမ်းထက်သော တိုက်ပွဲနည်းပညာအချို့ကိုလည်း ပြန်လည်အသုံးချနိုင်ပြီဖြစ်သည်။ ထိုနည်းပညာများနှင့် ပေါင်းစပ်လိုက်လျှင် အဆင့် ၅ နယ်ပယ်အတွင်း၌ သူမအား မည်သူမျှ ယှဉ်နိုင်မည်မဟုတ်တော့ချေ။

ထိုအကြောင်းကို တွေးမိရင်း ကျိရုရွှယ်၏ စိတ်ထဲတွင် ရဲရင့်တက်ကြွသော စိတ်ဓာတ်များ ပေါ်ပေါက်လာပြီး မျက်နှာတွင် အပြုံးများဖြင့် ပြည့်နှက်သွားသည်။

သို့သော်လည်း ထိုအချိန်မှာပင် ကျိရုရွှယ်၏ အကြည့်များ ပြောင်းလဲသွားပြီး တစ်စုံတစ်ခုကို အာရုံခံမိလိုက်သည်။

"ဒါက... ကျောက်လင်း အဆင့်တက်နေတာလား"