အခန်းပို

ကုန်းကုန်းဧကရာဇ်။ အပိုင်း (အပို)

မူရင်းစာရေးဆရာ - Silent Cake And Pastries

ဘာသာပြန် - Author Chang’e 🌕

True Immortal Team

ရိုးရှင်းစွာပင် ထိုတိုက်ခိုက်ရေးစွမ်းအားက တကယ်ကို အံ့မခန်းဖြစ်ပေလိမ့်မည်။

သို့သော်လည်း အလင်းတန်း သံဓားတစ်လက်အတွက် အပြာရောင်ကျောက်သလင်း ၄ အောက်စခန့် လိုအပ်ပြီး သံဓား ၅,၀၀၀ အတွက်ဆိုလျှင် ကျောက်သလင်း အချိန် ၁,၅၀၀ ကျင်ခန့် လိုအပ်လေသည်။ သို့သော် တုပိုင်၏ လက်ကျန်သိုလှောင်မှုမှာ နှစ်ကျင်ပင် မပြည့်တော့ဘဲ စမ်းသပ်မှုများ လုပ်ဆောင်ရင်းဖြင့်ပင် ကုန်လုနီးပါး ဖြစ်နေခဲ့ပြီ ဖြစ်၏။

အရှေ့ဘက် ပြည်ထောင်စု၏ ရေတပ်သင်္ဘောအုပ်စုကြီးက တခမ်းတနား ဝင်ရောက်လာပြီးဖြစ်၏။ မရေမတွက်နိုင်သော တပ်ဖွဲ့များက ကွမ်တုံနှင့် ဖူကျန်သို့ ကမ်းတက်လာကြပြီး စတင် စုရုံးနေကြပြီ ဖြစ်လေသည်။

ကမ္ဘာမြေကို တုန်လှုပ်သွားစေမည့် စစ်ပွဲကြီး၏ ခြေသံများက ပို၍ပို၍ နီးကပ်လာခဲ့ပြီဖြစ်၏။ ထို့ကြောင့် တုပိုင်သည် အချိန်နှင့်အမျှ အပြေးအလွှား လုကာ အပြာရောင် လျှပ်စစ်ကျောက်သလင်းများကို အတိုတောင်းဆုံး အချိန်အတွင်း ရှာဖွေရမည် ဖြစ်ပြီး ထို့နောက် ယင်းတို့ကို အကြီးအကျယ် တူးဖော်ကာ အလင်းတန်း သံဓားများကို အမြောက်အမြား ထုတ်လုပ်ပြီး တပ်ဖွဲ့များကို တပ်ဆင်ပေးရမည် ဖြစ်လေ၏။

တစ်ရက်လေးမျှပင် အချိန်ဖြုန်းတီး၍ မရနိုင်ပေ။ ဤအပြာရောင်ကျောက်သလင်းက အရှေ့ဘက် ပြည်ထောင်စုနှင့် ဖြစ်ပွားမည့် ဤစစ်ပွဲ၏ အဖြေကို လုံးဝ အဆုံးအဖြတ် ပေးသွားမည်ဟုပင် ပြောဆိုနိုင်လေသည်။

သေချာသည်မှာ အပြာရောင်ကျောက်သလင်းသာမက အနီရောင်ကျောက်သလင်းလေးလည်း ပါဝင်သေး၏။

ဤကျောက်သလင်း နှစ်မျိုးသည် တုပိုင်၏ စွမ်းအင်ယဉ်ကျေးမှုအတွက် အုတ်မြစ်များ ဖြစ်ကြပြီး အရှေ့ဘက် ပြည်ထောင်စု၏ သိပ္ပံနှင့် နည်းပညာ ယဉ်ကျေးမှုကို ကျော်လွန်နိုင်ရန်အတွက် အာမခံချက်တစ်ခုလည်း ဖြစ်လေသည်။

ထို့အပြင် ဤအပြာရောင်ကျောက်သလင်း သတ္တုကြောများသည် မြေအောက် အနက်ရှိုင်းဆုံးနေရာတွင် ပုန်းကွယ်နေကြလေ၏။

အိပ်မက်စနစ်၏ လမ်းညွှန်မှုအောက်တွင် တုပိုင်ကိုယ့်အားကိုသာ အားကိုးခြင်းဖြင့် အနည်းငယ်မျှ ပိုမို နက်ရှိုင်းစွာ စူးစမ်းရှာဖွေနိုင်မည် ဖြစ်လေသည်။ အခြားမည်သူကမျှ ယင်းတို့ကို လုံးဝ ရှာဖွေတွေ့ရှိနိုင်မည် မဟုတ်ပေ။

အကယ်၍ ရှာတွေ့ခဲ့လျှင်ပင် လုံးဝ ဝင်ရောက်နိုင်မည် မဟုတ်ချေ။ အဘယ်ကြောင့်ဆိုသော် ဤအပြာရောင်ကျောက်သလင်းများသည် မူလက အခြားကမ္ဘာတစ်ခုမှ ပြုတ်ကျလာသော ဧရာမ ဥက္ကာပျံအုပ်စုကြီးတစ်ခု ဖြစ်သောကြောင့်ပင်။

မြေအောက် အနက်ရှိုင်းဆုံးနေရာသို့ ရောက်ရှိသွားပြီးနောက် ယင်းတို့က ဤနေရာရှိ ဘူမိဗေဒ ပတ်ဝန်းကျင်ကို လုံးဝ ပြောင်းလဲပစ်ခဲ့လေသည်။ နေရာတိုင်းတွင် ကြောက်မက်ဖွယ်ကောင်းသော သဘာဝစွမ်းအင် အစီအရင်များ ရှိနေပြီး အရေးအကြီးဆုံးအချက်မှာ မြေအောက်တွင် လေ မရှိခြင်းပင် ဖြစ်လေ၏။

တုပိုင်တွင် နဂါးသွေးနှင့် မိစ္ဆာသွေးများ ရှိနေသောကြောင့် ဤမြေအောက် မီတာသောင်းချီ အနက်သို့ ဘေးကင်းချောမွေ့စွာ ဆင်းသက်နိုင်ခြင်း ဖြစ်လေသည်။ အကယ်၍ အခြားလူများ... ဥပမာ ကျီချင်းကျူကဲ့သို့သော မဟာဆရာသခင်များ ဖြစ်နေလျှင်ပင် ဤပတ်ဝန်းကျင်တွင် အချိန်ကြာမြင့်စွာ တောင့်ခံထားနိုင်မည် မဟုတ်ပေ။

တုပိုင်က နဂါးသတ်ဓားကို ကိုင်ဆောင်ကာ အသည်းအသန် တူးဆွနေခဲ့ပြီး ပြင်းပြင်းထန်ထန် တူးဖော်နေလေ၏။ မြေအောက် ငါးကီလိုမီတာ ၊ ရှစ်ကီလိုမီတာ ၊ မီတာတစ်သောင်း ၊ ဆယ့်နှစ်ကီလိုမီတာနှင့် ဆယ့်သုံးကီလိုမီတာအထိ ဆင်းသက်သွားခဲ့လေသည်။

“လခွမ်းတဲ့မှ... ရောက်ခါနီးပြီလား” တုပိုင်က မောဟိုက်စွာဖြင့် မေးလိုက်လေ၏။

အိပ်မက်စနစ်က ယုံကြည်မှုအပြည့်ဖြင့် ပြန်ဖြေလိုက်လေသည်။ “မကြာခင် ရောက်တော့မှာပါ”

“ချီးပဲ... ရောက်တော့မှာပါ ဟုတ်လား” တုပိုင်က စိတ်မရှည်စွာ ခွန်းတုံ့ပြန်လိုက်လေ၏။

အိပ်မက်စနစ်က အပြစ်ရှိသလို ရှင်းပြလိုက်လေသည်။ “စနစ်ရှင်... ကျွန်တော်က အရာရာကို စွမ်းဆောင်နိုင်သူ မဟုတ်ပါဘူး။ အချက်အလက်တွေကနေတစ်ဆင့်ပဲ တွက်ချက်ပေးရတာပါ”

တုပိုင်က လေးနက်စွာ ပြောလိုက်လေ၏။ “ဒီအပြာရောင်ကျောက်သလင်းက အရှေ့ဘက် ပြည်ထောင်စုနဲ့ တိုက်ပွဲမှာ အနိုင်ရဖို့အတွက် အစွမ်းထက်တဲ့ လက်နက်တစ်ခုကို ဖန်တီးနိုင်ရုံသာမကဘဲ ကမ္ဘာကြီးကို ချေမှုန်းနိုင်လောက်တဲ့ လုံးဝ ကွဲပြားခြားနားတဲ့ စွမ်းအင်ယဉ်ကျေးမှု တစ်ခုကိုပါ ဖန်တီးနိုင်စွမ်း ရှိတယ်မလား”

အိပ်မက်စနစ်က ထောက်ခံစွာ ပြန်ဖြေလိုက်လေသည်။ “ဟုတ်ပါတယ်”

အခြားကမ္ဘာတစ်ခုမှ လျှပ်စစ်ကျောက်သလင်းများကို ရှာဖွေတွေ့ရှိခြင်းက ဘာကို ဆိုလိုသနည်း။ ယင်းက တုပိုင်အနေဖြင့် ရေနွေးငွေ့အင်ဂျင်ခေတ်ကို တိုက်ရိုက် ကျော်ဖြတ်ကာ လျှပ်စစ်ခေတ်သို့ တိုက်ရိုက် ဝင်ရောက်သွားပြီ ဖြစ်ကြောင်းကို ဆိုလိုခြင်းပင် ဖြစ်လေ၏။

ဤအပြာရောင်ကျောက်သလင်းသည် အလင်းတန်း သံဓားများကို ဖန်တီးရာတွင် အသုံးပြုရုံသာမက စစ်သင်္ဘောအသစ်များ၏ စွမ်းအင်အဖြစ်ပါ အသုံးပြုနိုင်ပြီး တင့်ကားများ၏ စွမ်းအင်အဖြစ်ပင် အသုံးပြုနိုင်သေး၏။

သေချာသည်မှာ ထိုအဆင့်နည်းပညာက အနည်းငယ်တော့ ဝေးကွာနေသေးသည်။ အတိုချုပ်ပြောရလျှင် ယခုအချိန်တွင် အပြာရောင်ကျောက်သလင်းနှင့် အနီရောင်ကျောက်သလင်းတို့မှာ တုပိုင်၏ အမြင့်မားဆုံးသော မဟာဗျူဟာမြောက် ပစ္စည်းများ ဖြစ်ကြလေ၏။

တုပိုင်က မျှော်လင့်တကြီး မေးလိုက်လေ၏။ “ဒီမှာ အပြာရောင်ကျောက်သလင်း စုစုပေါင်း ဘယ်လောက် ရှိသလဲ”

အိပ်မက်စနစ်က မဝံ့မရဲ တီးတိုး ပြန်ဖြေလိုက်လေ၏။ “ကျွန်... ကျွန်တော် သိပ်မသိပါဘူး”

တုပိုင်က အံ့သြတကြီး မေးလိုက်လေသည်။ “ဘာလို့ မသိရမှာလဲ။ အဲဒီအချိန်တုန်းက အခြားကမ္ဘာတစ်ခုကနေ လျှပ်စစ်စွမ်းအင် ဥက္ကာပျံ ဘယ်လောက်တောင် ပြုတ်ကျလာခဲ့တာလဲ”

အိပ်မက်စနစ်က အသေအချာ ရှင်းပြလိုက်လေ၏။ “အဲဒီအချိန်တုန်းက အခြားကမ္ဘာတစ်ခုကနေ လျှပ်စစ်ဥက္ကာပျံတွေ အများကြီး ပြုတ်ကျလာခဲ့ပါတယ်။ ဒါပေမဲ့ ဒီကျောက်သလင်း အမျိုးအစားက အရမ်းကို ကျိုးပဲ့လွယ်တယ်။ ပြီးတော့ အနည်းငယ် ရှုပ်ထွေးတဲ့ စွမ်းအင်ပတ်ဝန်းကျင်ကလည်း သူတို့ကို ဖျက်ဆီးပစ်နိုင်တယ်။ ဒါကြောင့် ဒီတစ်ကြိမ်မှာ အပြာရောင်ကျောက်သလင်း ဘယ်လောက်အထိ တူးဖော်နိုင်မလဲ ဆိုတာကတော့ ကံတရားအပေါ်မှာပဲ လုံးဝ မူတည်နေပါတယ်”

တုပိုင်က စိတ်ပျက်လက်ပျက်ဖြင့် ဆက်လက်၍ တူးဖော်နေလိုက်သည်။ မြေအောက်တွင် အပြာရောင်ကျောက်သလင်း လုံလုံလောက်လောက် ရှိနေရန် ၊ အနည်းဆုံး ကျင် တစ်သောင်းအထက် ရှိနေရန်သာ သူ ဆုတောင်းနိုင်တော့၏။

ဤနည်းအားဖြင့် ဤကျောက်သလင်းများသည် ဤတိုက်ပွဲကို အနိုင်ရရန်အတွက် သူ့အတွက် အနည်းဆုံးတော့ လုံလောက်သွားမည် ဖြစ်လေသည်။

သေချာသည်မှာ ပိုများလေ ပိုကောင်းလေပင် ဖြစ်ပြီး အစွမ်းထက်သော စွမ်းအင်ယဉ်ကျေးမှု တစ်ခုလုံးကို ဖွင့်လှစ်နိုင်ရန်အတွက် အကောင်းဆုံးပင် ဖြစ်လေ၏။

ထိုအချိန်တွင် တုပိုင်၏ နားထဲသို့ ဆရာသခင်ကျီချင်းကျူ၏ အသံ ဝင်ရောက်လာခဲ့လေသည်။ “သခင်... မြို့တော်ကနေ မင်းသမီးနင်းရွှဲ့ ရောက်နေပါတယ်”

တုပိုင်၏ တစ်ကိုယ်လုံး ရွှံ့များ ပေကျံနေသော်လည်း မင်းသမီးနင်းရွှဲ့က သူ၏ ရင်ခွင်ထဲသို့ တိုက်ရိုက် ပြေးဝင်လာပြီး ရှိုက်ကြီးတငင် ငိုကြွေးလိုက်လေ၏။ “ခင်ပွန်း”

သူမ၏ အသံတွင် နာကျင်မှုများ ပြည့်နှက်နေပြီး ကလေးလေးတစ်ယောက်အလား ချွဲနွဲ့နေခဲ့လေသည်။

မြို့တော်ထဲတွင် ရှိနေစဉ်ကရော ၊ မြို့တော်မှ အနောက်တောင်ပိုင်းသို့ လာရာလမ်းတစ်လျှောက်လုံးတွင်ပါ သူမက အလွန် ပြတ်သားပြီး သတ္တိရှိစွာ ပြုမူနေထိုင်ခဲ့လေ၏။

သို့သော်လည်း တုပိုင်၏ ရင်ခွင်ထဲသို့ ရောက်ရှိသွားသော အခိုက်အတန့်တွင်တော့ သူမက ချက်ချင်းဆိုသလိုပင် အပြစ်ကင်းစင်သော မိန်းကလေးတစ်ယောက် ဖြစ်သွားလေတော့သည်။

“မယ်တော်ကြီး ကွယ်လွန်သွားပြီ... မယ်တော်ကြီး ကွယ်လွန်သွားပြီ...” နင်းရွှဲ့က တုပိုင်၏ ရင်ခွင်ထဲတွင် အသက်ရှူမဝလုမတတ် ဝမ်းနည်းပက်လက် ငိုကြွေးပြောဆိုလိုက်လေသည်။

တုပိုင်၏ မျက်နှာအမူအရာမှာ ရုတ်တရက် ပြောင်းလဲသွားခဲ့ပြီး လီဝမ်ဝမ်ကို တိုက်ရိုက် စူးရှစွာ ကြည့်လိုက်လေသည်။ သူ၏ အမိန့်သည် အလွန်ရိုးရှင်းလှပေသည်။ မယ်တော်ကြီး ၊ မင်းသမီးနင်းရွှဲ့နှင့် မွေးစားအဖေ လီဝမ်ဟွေ့တို့ကို ကယ်တင်ရန်ပင် ဖြစ်၏။

လီဝမ်ဝမ်က တုပိုင်ကို မျက်နှာချိုသွေးကာ ကြည့်လိုက်ပြီး သူမ၏ လှပသော မျက်နှာလေးမှာ သနားစရာကောင်းအောင် ပြောင်းလဲသွားခဲ့လေသည်။

သူမက တုပိုင်၏ အမိန့်ကို ဖီဆန်ခဲ့ခြင်း ဖြစ်၏။ အဘယ်ကြောင့်ဆိုသော် ထိုသို့ လုပ်ဆောင်ခြင်းက တုပိုင်၏ အကျိုးစီးပွားအတွက် ပိုမို ကောင်းမွန်လိမ့်မည်ဟု သူမ ခံစားခဲ့ရသောကြောင့် ဖြစ်လေသည်။

တုပိုင်မှာ တုန်ယင်သွားခဲ့ပြီး စိုးရိမ်တကြီး မေးလိုက်လေ၏။ “မွေးစားအဖေရော ဘယ်မှာလဲ”

မင်းသမီးနင်းရွှဲ့က ဝမ်းနည်းစွာ ပြန်ဖြေလိုက်လေသည်။ “ဖွားဖက်တော်လီက အရမ်း နောင်တရနေခဲ့တာ။ ဒါကြောင့် သူက ရုပ်သေးဧကရာဇ်ကို သတ်ဖို့ အချိန်အခါကောင်းကို ရှာဖွေရင်း မြို့တော်ထဲမှာပဲ ပုန်းအောင်းနေဖို့ ဆုံးဖြတ်လိုက်တယ်။ သူ လုပ်ခဲ့တဲ့ အမှားတွေအတွက် ပြန်ပြီး ပေးဆပ်ရမယ်လို့ ပြောသွားခဲ့တယ်”

တုပိုင်၏ မျက်လုံးများမှာ ပူနွေးလာခဲ့ပြီး မျက်နှာမှာလည်း တွန့်လိမ်သွားခဲ့လေ၏။

လီဝမ်ဝမ်က အမြန်ဝင်ရောက် ရှင်းပြလိုက်လေ၏။ “ကျွန်မက မွေးစားအဖေ့ကို သားရဲအရေခွံနဲ့ လုပ်ထားတဲ့ မျက်နှာဖုံးတစ်ခု ပေးခဲ့ပါတယ်။ ခင်ပွန်းသည် စိတ်ချလို့ ရပါတယ်။ အရင်က ဧကရာဇ်အပေါ် ထားရှိတဲ့ သူ့ရဲ့ ကြောက်ရွံ့မှုနဲ့ သစ္စာရှိမှုတွေကြောင့် မွေးစားအဖေက ရှုပ်ထွေးနေတဲ့ အခြေအနေမှာ ရှိနေခဲ့တာပါ။ အခုတော့ သူက ဧကရာဇ်ယုံတယ်ရဲ့ အကြောင်းကို သိသွားပြီ။ သူ့ရဲ့ ရင်ထဲမှာလည်း မုန်းတီးမှုတွေ ပြည့်နှက်နေပြီလေ။ အခုအချိန်က မွေးစားအဖေက လည်ဆယ်ပြီး ပါးနပ်တဲ့သူမို့ သူ အဆင်ပြေပါလိမ့်မယ်”

မင်းသမီးနင်းရွှဲ့က ဝမ်းနည်းစွာ ဆက်ပြောလိုက်လေသည်။ “မယ်တော်ကြီးက ဈာပနအခမ်းအနားမှာ ရုပ်သေးဧကရာဇ်ယုံတယ်ကို နန်းချဖို့ အမိန့်ထုတ်ပြန်ခဲ့ပြီး ခင်ပွန်းသည် ၊ ကျန်းနန်နယ်စားမင်း ဆုန်ချွဲ ၊ အစိုးရအဖွဲ့ အမတ်ချုပ်ကြီး ကူရွှင်ချန်နဲ့ အရှေ့ဘက်ကွပ်ကဲရေးရုံးရဲ့ ညွှန်ကြားရေးမှူးချုပ် လီဝမ်ဟွေ့တို့ကို မှာတမ်းခံ အမတ်ကြီးလေးပါးအဖြစ် ခန့်အပ်ခဲ့တယ်။”

“ပြီးတော့ ဧကရာဇ်သစ် တစ်ပါးကို တင်မြှောက်ဖို့အတွက်လည်း အမိန့်ပေးခဲ့တယ်။ အမတ်ချုပ်ကြီး ကူရွှင်ချန်က သေဆုံးသွားခဲ့ပြီဖြစ်ပြီး မွေးစားအဖေကလည်း မြို့တော်ထဲမှာ ကျန်ရစ်ခဲ့တယ်။ ဒါပေမဲ့ သူက ခင်ပွန်းသည် ချမှတ်တဲ့ ဆုံးဖြတ်ချက်မှန်သမျှကို ထောက်ခံတယ်လို့ ပြောခဲ့တယ်။”

“ခင်ပွန်းသည်က ဘယ်သူ့ကိုပဲ ဧကရာဇ်အဖြစ် တင်မြှောက်ပါစေ သူက တာ့နင်အင်ပါယာရဲ့ ဧကရာဇ်အပေါ် သစ္စာရှိပါ့မယ်တဲ့။ ဒါကြောင့် အခုဆိုရင် ခင်ပွန်းသည်နဲ့ ကျန်းနန်နယ်စားမင်း ဆုန်ချွဲတို့ရဲ့ သဘောထား အမြင်တွေပဲ ကျန်တော့တယ်။ ကျွန်မတို့က ဧကရာဇ်သစ်အတွက် ကိုယ်စားလှယ်လောင်းကို ဆွေးနွေးဖို့ ကျန်းနန်နယ်စားမင်းကို အနောက်တောင်ပိုင်းကို လာဖို့ ဖိတ်ခေါ်ရမယ်”

“ဧကရာဇ်သစ်အတွက် ကိုယ်စားလှယ်လောင်းလား” တုပိုင်က သူ၏ မျက်လုံးများကို မှိတ်လိုက်ပြီးနောက် နင်းရွှဲ့ကို လေးနက်စွာ ကြည့်ကာ ရေရွတ်လိုက်လေ၏။

ကုန်းကုန်းဧကရာဇ်။ အပိုင်း (အပို) ပြီး။

မူရင်းစာရေးဆရာ - Silent Cake And Pastries

ဘာသာပြန် - Author Chang’e 🌕

True Immortal Team