တစ်ယောက်နှင့် သုံးယောက် အဖွဲ့

ပိုင်ကျီဟန်၏ အရှိန်အဝါမှာ ဆက်လက် မြင့်တက်နေဆဲဖြစ်ပြီး နောက်ဆုံးတွင် တစ်နေရာ၌ ရပ်တန့်သွားခဲ့သည်။

ဗလာသန့်စင်ခြင်း အထွတ်အထိပ်အဆင့်

သူသည် အသက်ကို ဖြည်းညှင်းစွာ ရှူထုတ်လိုက်ပြီး သူ၏ အကြောများထဲ၌ စီးဆင်းနေသော ကြောက်မက်ဖွယ် စွမ်းအားများကို ခံစားလိုက်ရသည်။

သူ၏ အရိုးများမှာ တုန်ခါနေပြီး သွေးများသည် မိုးကြိုးပဲ့တင်ထပ်သံကဲ့သို့ ဟိန်းဟောက်နေကာ ချီစွမ်းအားများသည်လည်း ကျယ်ပြန့်လာသော စွမ်းအင်စုရပ်ထဲ၌ အဆုံးမရှိ စီးဆင်းနေသည်။

သူ့အနေဖြင့် ဤထက်ပို၍ မြင့်အောင် လုပ်ဆောင်နိုင်ပြီး သူ၏ ခန္ဓာကိုယ်သည်လည်း ကြီးမားသော ပြဿနာမရှိဘဲ ခံနိုင်ရည်ရှိသင့်သည်။

သို့သော် သူ ရပ်တန့်လိုက်သည်။

၎င်းမှာ ကောင်းကင်ဘုံအမိန့်တော် ပြောင်းပြန်လှန်ခြင်း ကျင့်စဉ်ကို သူ ပထမဆုံးအကြိမ် အသုံးပြုခြင်း ဖြစ်သည်။

ဤအခြေအနေကို ဆက်လက်ထိန်းထားပါက ရေရှည်တွင် ခန္ဓာကိုယ်အပေါ် မည်မျှ ဝန်ပိစေမည်ကို သူ အပြည့်အဝ နားမလည်သေးသလို၊ ဤထက် ပိုတိုးလိုက်လျှင် သူ၏ အခြေအနေမှာ မည်မျှအထိ တည်ငြိမ်မှု ရှိမည်ကိုလည်း မသိသေးပေ။

လောလောဆယ်တွင်မူ ဗလာသန့်စင်ခြင်းအဆင့် အထွတ်အထိပ်မှာ လုံလောက်သည်ထက် ပိုနေပြီဖြစ်သည်။

မဟာကောင်းကင်ဘုံတက်ခြင်းအဆင့်ရှိ မိစ္ဆာအကြီးအကဲ သုံးဦးကို စမ်းသပ်ရန်အတွက် အလွန်ပင် လုံလောက်လှသည်။

မိစ္ဆာအကြီးအကဲ သုံးဦးသည် သူ့ကို သတ္တဝါဆန်းတစ်ခုကို ကြည့်နေသကဲ့သို့ စိုက်ကြည့်နေကြသည်။ "ဒါ ဘယ်လိုလုပ် ဖြစ်နိုင်မှာလဲ?"

အရပ်ရှည်ရှည် မိစ္ဆာအကြီးအကဲ၏ မျက်စိသူငယ်အိမ်များ ကျုံ့သွားသည်။

ကျင့်စဉ်အဆင့် တစ်ဆင့်မက ခုန်တက်သွားခြင်းပင်။

သူတို့သည် သက်တမ်း ရာနှင့်ချီ၍ နေထိုင်ခဲ့ကြသူများ ဖြစ်သည်။

တားမြစ်ထားသော ကျင့်စဉ်များနှင့် အသက်ဓာတ်ကို လောင်မြိုက်စေသည့် အတတ်ပညာများကို မြင်ဖူးခဲ့ကြသည်။

သို့သော် ယခုအရာကမူ?

၎င်းမှာ အခြေခံ အသိတရားအားလုံးကို ဆန့်ကျင်နေသည်။

ဝိညာဉ်ခွဲခြမ်းစိတ်ဖြာခြင်းအဆင့် ကျင့်ကြံသူတစ်ဦးကို ဗလာသန့်စင်ခြင်းအဆင့်သို့ အတင်းအဓမ္မ တွန်းပို့သော နည်းစနစ်များမှာပင် အသုံးပြုသူကို တစ်သက်လုံး ဒုက္ခိတဖြစ်စေနိုင်သော သို့မဟုတ် ချက်ချင်း သေစေနိုင်သော တားမြစ်ချက်များဟု သတ်မှတ်ကြသည်။

သို့သော် ပိုင်ကျီဟန်သည် ဗလာသန့်စင်ခြင်းအဆင့်သို့ ကူးမြောက်သွားရုံသာမက— အမြင့်ဆုံး အထွတ်အထိပ်အဆင့်အထိပါ ရောက်ရှိသွားခြင်း ဖြစ်သည်။

"ပြီးတော့ သူ့ရဲ့ အသက်ရှူသံကလည်း တည်ငြိမ်နေတယ်..."

ဒဏ်ရာရထားသော အကြီးအကဲက အက်ရှရှအသံဖြင့် ရေရွတ်လိုက်သည်။

ထိုသို့သော ကျင့်စဉ်မျိုးကို မြင်လိုက်ရသဖြင့် တုန်လှုပ်သွားကြသော်လည်း သူတို့ ကြောက်ရွံ့ခြင်း မရှိကြပေ။

အရိုးစုနှင့်တူသော မိစ္ဆာအကြီးအကဲသည် နိမ့်ပါးပြီး နားမခံသာသော ရယ်သံတစ်ခုကို ထုတ်ဖော်လိုက်သည်။

"ခဲခဲခဲ... ဒါတော့ ဘာဖြစ်လဲ?"

သူ၏ ဟောင်းလောင်းပေါက် မျက်တွင်းများထဲတွင် စိမ်းဖန့်ဖန့် မီးတောက်များ ပြင်းထန်စွာ တောက်လောင်လာသည်။

"ဗလာသန့်စင်ခြင်းအဆင့်ဆိုတာ ဗလာသန့်စင်ခြင်း အဆင့်ပဲရှိသေးတာ။"

သူသည် ရှေ့သို့ တစ်လှမ်းတက်လိုက်ရာ မိစ္ဆာချီများသည် အနက်ရောင် ဒီရေလှိုင်းများကဲ့သို့ လှိုင်းထလာသည်။

"မင်းက မဟာကောင်းကင်ဘုံတက်ခြင်းအဆင့် ကျင့်ကြံသူမှ မဟုတ်တာ။"

ကျန်ရှိသူများသည်လည်း လှုပ်ရှားလာပြီး သူ့ကို ဝိုင်းရံလိုက်ကြသည်။

"ပြီးတော့ ငါတို့က သုံးယောက်ရှိတယ်။"

သူတို့၏ သတ်ဖြတ်လိုသော အရှိန်အဝါများမှာ ပိုင်ကျီဟန်အပေါ် ထပ်မံ ကျရောက်လာသည်— လေးလံသည်၊ ဖိနှိပ်ထားသည်၊ ကရုဏာမဲ့လှသည်။

သူတို့သည် အစောပိုင်းက တုန်လှုပ်မှုကို ပြန်လည် ထိန်းချုပ်နိုင်ခဲ့ကြပြီ ဖြစ်သည်။

မည်သို့ပင်ဆိုစေ သူတို့သည် သေရေးရှင်ရေး တိုက်ပွဲပေါင်းများစွာကို ဖြတ်သန်းခဲ့ကြသော ဝါရင့်ပညာရှင်များ မဟုတ်ပါလော။

သူတို့ တစ်ခုကိုတော့ ရှင်းရှင်းလင်းလင်း နားလည်ထားကြသည်။

ဤမျှ ကြောက်မက်ဖွယ်ကောင်းသော နည်းစနစ်မျိုးသည် ပေးဆပ်မှု တစ်ခုခု မရှိဘဲနှင့်တော့ မရနိုင်ပေ။

"ဘယ်နည်းစနစ်မှ ထာဝရ မတည်မြဲဘူး" အရပ်ရှည်ရှည် အကြီးအကဲက အေးစက်စွာ ပြောလိုက်သည်။

သူက လှောင်ပြုံး ပြုံးလိုက်သည်။

"ပိုပြီး အစွမ်းထက်လေလေ၊ ကြာချိန်က ပိုတိုလေလေပဲ။"

ဒဏ်ရာရထားသော အကြီးအကဲသည်လည်း ယုတ်မာသော အကြည့်များဖြင့် ခေါင်းညိတ်လိုက်သည်။

"မင်း ဒီအခြေအနေကို ကြာကြာ ထိန်းထားနိုင်မှာ မဟုတ်ဘူး၊ အဲဒါအပြင် ဗလာသန့်စင်ခြင်းအဆင့်က ငါတို့သုံးယောက်ကို ယှဉ်ဖို့ မလုံလောက်သေးဘူး။"

ပိုင်ကျီဟန်က တိတ်ဆိတ်စွာ နားထောင်နေသည်။

ထို့နောက် သူ ပြုံးလိုက်သည်။

"မင်းတို့ ပြောတာ မမှားဘူး"

ဤအခြေအနေကို အကန့်အသတ်မရှိ ထိန်းထားနိုင်ဖို့ဆိုတာ မဖြစ်နိုင်ပေ

"ဒါပေမဲ့" ပိုင်ကျီဟန်က ဓားကို မြှောက်ရင်း ဆက်ပြောလိုက်သည်။ သူ၏ မျက်ဝန်းများသည် နှင်းခဲကဲ့သို့ ထက်ရှနေ၏။ "မင်းတို့ တစ်ခုတော့ မှားနေတယ်။"

သူ့ပတ်ဝန်းကျင်ရှိ ဖိအားများမှာ ရုတ်ချည်းပင် စုစည်းသိပ်သည်းသွားသည်။

"မင်းတို့ သုံးယောက်ကို ရှင်းထုတ်ဖို့ ငါ့မှာ အချိန်အများကြီး မလိုဘူး။"

သူ၏ ဓားရည်ရွယ်ချက်သည် ပေါက်ကွဲထွက်လာပြီး ယခင်ကထက် များစွာ ပိုမို သိပ်သည်းဆွဲဆောင်မှု ရှိလာသည်။

ဗလာသန့်စင်ခြင်းအဆင့် အထွတ်အထိပ် ချီစွမ်းအားသည် ထာဝရဝိညာဉ်ဓားနှင့် အပြည့်အဝ ပေါင်းစပ်သွားတော့သည်။

အရိုးစုနှင့်တူသော မိစ္ဆာအကြီးအကဲ၏ စိမ်းဖန့်ဖန့် မီးတောက်များ ပြင်းထန်စွာ တောက်လောင်လာသည်။

"ဒီလောက်အထိ မာန်တက်နေတာကပဲ မင်းရဲ့ သေတွင်းဖြစ်သွားစေရမယ်”

သူ လှုပ်ရှားလိုက်ချေပြီ။

တစ်ခဏအတွင်း သူ၏ ခြေဖဝါးအောက်ရှိ ဟင်းလင်းပြင်သည် ပြိုကျသွားပြီး မိစ္ဆာချီများသည် အပြင်ဘက်သို့ ပေါက်ကွဲထွက်သွားသည်။

သူ၏ ပုံရိပ်မှာ ပျောက်ကွယ်သွားပြီး ပိုင်ကျီဟန်၏ ရှေ့မှောက်တွင် တစ္ဆေတစ်ကောင်ကဲ့သို့ ပြန်လည် ပေါ်လာကာ လက်သည်းများဖြင့် လည်ချောင်းကို တိုက်ရိုက် ဆုပ်ကိုင်ရန် ကြိုးစားလိုက်သည်။

သေစေနိုင်သော တိုက်ကွက်— မြန်ဆန်သည်၊ ရက်စက်သည်၊

သို့သော်— ပိုင်ကျီဟန်မှာ ထိုနေရာတွင် မရှိတော့ပေ။

အရိုးစုအကြီးအကဲ၏ မျက်စိသူငယ်အိမ်များ ကျုံ့သွားသည်။

မြန်လွန်း၏

ထိုအတွေး မဆုံးခင်မှာပင် ထက်ရှသော သတ္တုချင်း ထိခိုက်သံတစ်ခု ထွက်ပေါ်လာသည်။

ချလွမ်

ထာဝရဝိညာဉ်ဓားသည် အထက်သို့ ဝေ့ဝဲတက်လာပြီး သေစေနိုင်သော ထိုတိုက်ကွက်ကို အားစိုက်စရာမလိုဘဲ တားဆီးလိုက်သည်။

အချင်းချင်း ထိတွေ့မှုကြောင့် လေထုထဲ၌ ဂယက်လှိုင်းများ ထသွားသော်လည်း ပိုင်ကျီဟန်၏ ခန္ဓာကိုယ်မှာ အနည်းငယ်မျှပင် တုန်လှုပ်ခြင်း မရှိပေ။

နောက်သို့ လွင့်ထွက်သွားသူမှာ အရိုးစုအကြီးအကဲသာ ဖြစ်သည်။

"ဘာလဲဟ”

သူ စူးစူးဝါးဝါး အော်ဟစ်လိုက်သည်။

တစ်ချိန်တည်းမှာပင် အရပ်ရှည်ရှည် မိစ္ဆာအကြီးအကဲနှင့် ဒဏ်ရာရထားသော အကြီးအကဲတို့သည် ဝဲယာနှစ်ဖက်မှ တိုက်ခိုက်လာကြသည်။

ပိုင်ကျီဟန် နောက်မဆုတ်ပေ။

ရွှမ် ရွှမ်

သူ့ရှေ့ရှိ ဟင်းလင်းပြင်သည် ခေါက်ချိုးခံလိုက်ရသလို ဖြစ်သွားသည်။

အဆိပ်အတောက်များ ပါဝင်သော လက်ဝါးရိုက်ချက်သည် လေထဲတွင်ပင် အပိုင်းပိုင်း ပြတ်တောက်သွားပြီး မိစ္ဆာချီများမှာ မြူခိုးများကဲ့သို့ လွင့်စင်သွားသည်။

အရှိန်မသတ်ဘဲ ပိုင်ကျီဟန်သည် လက်ကောက်ဝတ်ကို လှည့်ကာ ဓားဖျားကို နောက်ဘက်သို့ ဝှေ့ယမ်းလိုက်သည်

ချလွမ်

အရပ်ရှည်ရှည် မိစ္ဆာအကြီးအကဲ၏ သွေးရောင်သန်းနေသော အနက်ရောင်လှံသည် ကြေမွသွားပြီး အပိုင်းအစများမှာ သူ့ထံသို့ မရောက်ရှိခင်မှာပင် ပျောက်ကွယ်သွားတော့သည်။

တန်ပြန်တိုက်စစ်မှာ ချက်ချင်းပင် လိုက်ပါလာသည်။

ဒဏ်ရာရနေသော အကြီးအကဲသည် ဓားရည်ရွယ်ချက် သူ့ကို တိုက်ရိုက်မထိမှန်ခင် လက်မောင်းများကို မနည်းမြှောက်၍ ကာကွယ်လိုက်ရသည်။

ဝုန်း

သူ၏ ခန္ဓာကိုယ်မှာ နောက်သို့ လွင့်ထွက်သွားပြီး မြေပြင်ကို ဆောင့်မိကာ ပါးစပ်မှ သွေးများ ပန်းထွက်လာသည်။

အရပ်ရှည်ရှည် မိစ္ဆာအကြီးအကဲ၏ မျက်နှာအမူအရာသည် နောက်ဆုံးတွင် ပြောင်းလဲသွားခဲ့သည်။

၎င်းမှာ ရိုးရိုးရှင်းရှင်း အသက်ရှင်ကျန်ရစ်နေခြင်း မဟုတ်တော့ပေ။ ထိုထက်မကဘဲ သူတို့သုံးယောက်စလုံးကပင် ဖိနှိပ်ခံနေရခြင်း ဖြစ်သည်။

သူတို့ သုံးဦးစလုံး ပြန်လည် စုပေါင်း တိုက်ခိုက်ကြပြန်သည်— ယခင်ကထက် ပိုမြန်၊ ပိုကြမ်းတမ်းပြီး သတ်ဖြတ်လိုသော အရှိန်အဝါများကို အစွမ်းကုန် ထုတ်လွှတ်လိုက်ကြသည်။

သို့သော် ပိုင်ကျီဟန်မှာ သူတို့၏ တိုက်ကွက်များကြား၌ စီးဆင်းနေသော ရေကဲ့သို့ ကျွမ်းကျင်စွာ လှုပ်ရှားနေသည်။

တိုက်ကွက်တိုင်းသည် အရာမထင်ခင်မှာပင် ပျက်ပြယ်သွားသည်။

တန်ပြန်တိုက်စစ်တိုင်းက သူတို့ကို နောက်သို့ ဆုတ်သွားစေသည်။

တိုက်ပွဲအတွင်း ချီစွမ်းအားများ ထိတွေ့မှုကြောင့် ပတ်ဝန်းကျင်သည် ပုံပျက်ရှုံ့တွနေသော်လည်း အရာတစ်ခုကတော့ အလွန်ပင် ရှင်းလင်းလှသည်

မဟာကောင်းကင်ဘုံတက်ခြင်းအဆင့် မိစ္ဆာအကြီးအကဲ သုံးဦးသည် ပိုင်ကျီဟန်ကို ဖိအားပေးနေခြင်း မဟုတ်ဘဲ ပိုင်ကျီဟန်ကသာ ထိုသုံးဦးကို နောက်ဆုတ်သွားအောင် အတင်းအဓမ္မ ဖိအားပေးနေခြင်းပင်။

"ဒါ ဘယ်လိုလုပ် ဖြစ်နိုင်မှာလဲ”

အရပ်ရှည်ရှည် အကြီးအကဲသည် ဟိန်းဟောက်ရင်း သူ၏ လက်မောင်းများကို တုန်ခါသွားစေသော နောက်ထပ် ဓားချက်တစ်ခုကို ကာကွယ်လိုက်ရသည်။

အရိုးစုအကြီးအကဲသည် စိမ်းဖန့်ဖန့် မီးတောက်များ တဖျတ်ဖျတ် လှုပ်ခတ်လျက် အလျင်အမြန် နောက်ဆုတ်လိုက်သည်။

"သူက ဗလာသန့်စင်ခြင်းအဆင့်ပဲ ရှိသေးတာကို... ဘယ်လိုလုပ် ဒီလောက် သန်မာနေရတာလဲ”

ပိုင်ကျီဟန်သည် စုစည်းထားသော ဓားရည်ရွယ်ချက်ကြောင့် တုန်ခါနေသည့် ဓားကို ကိုင်ဆောင်ကာ နောက်ထပ် တစ်လှမ်း တက်လာပြန်သည်။

သူ၏ အကြည့်များမှာ တည်ငြိမ်အေးစက်နေ၏။

ဘေးနားတွင် ကြည့်နေသော မိုထျန်းကျီမှာ ပါးစပ်အဟောင်းသား ဖြစ်နေသည်။

ပိုင်ကျီဟန်သည် မဟာကောင်းကင်ဘုံတက်ခြင်းအဆင့် အကြီးအကဲ တစ်ဦးကို အနိုင်ယူခဲ့သည်ကိုပင် သူ မယုံကြည်နိုင်ဖြစ်ခဲ့ရရာ ယခုအခါ သုံးဦးကို တစ်ပြိုင်တည်း ရင်ဆိုင်ပြီး အသာစီး ရနေသည်မှာ သူ့အတွက် မှင်သက်

စရာပင်။

သူက ပိုင်ကျီဟန် သေလိမ့်မည်ဟု ထင်ခဲ့သည်။ မည်မျှပင် ပါရမီထူးချွန်ပါစေ၊ သေသွားလျှင် ဘာမှ အဓိပ္ပာယ်မရှိဟု ယူဆခဲ့သည်။

ဒါပေမဲ့ အခုကတော့?

မဟာကောင်းကင်ဘုံတက်ခြင်းအဆင့် မိစ္ဆာအကြီးအကဲ သုံးဦးသည် နောက်သို့ ဆုတ်ခွာနေရပြီး ရုန်းကန်နေကြရစဉ် ပိုင်ကျီဟန်ကမူ ယုံကြည်ချက်အပြည့်ဖြင့် ရှေ့သို့ တိုးလာနေသည်။

ဤမြင်ကွင်းကို မြင်လိုက်ရသူ မည်သူမဆို မည်မျှပင် မာနကြီးပါစေ မိမိကိုယ်ကိုယ် ယုံကြည်မှုများ ပျက်ပြားသွားစေရန် လုံလောက်လှသည်။

မိုထျန်းကျီက ဒေါသတကြီးဖြင့် သွားကြိတ်လိုက်သည်။

"သူ့ကို အမြန်သတ်လိုက်”

သူသည် စိတ်ပျက်အားမရ ဖြစ်နေမှုနှင့် ဒေါသများကို အကြီးအကဲ သုံးဦးထံ အော်ဟစ်ကာ ပုံချလိုက်မိသည်။ သူတို့သည် အသန်မာဆုံး ပညာရှင်များ ဖြစ်သင့်သော်လည်း ဆယ်ကျော်သက် လူငယ်လေးတစ်ယောက်ကို သနားစဖွယ် ရုန်းကန်နေကြရသည် မဟုတ်ပါလော။

ကြည့်ရှုနေကြသော မိစ္ဆာကျင့်ကြံသူ အများစုမှာလည်း ထိုနည်းတူ ခံစားနေရသည်။

ထိုသုံးဦးမှာ ပိုင်ကျီဟန်ကို စောစောစီးစီး သတ်ပစ်ပြီး တခြားနေရာတွင် သွားရောက် ကူညီသင့်သော်လည်း ယခုမူ သူတို့ကိုယ်တိုင်ပင် အသတ်ခံရလုနီးပါး ဖြစ်နေသည်မှာ ဘာမှ အဓိပ္ပာယ်မရှိပေ။

ရွှမ် ရွှမ်

မိစ္ဆာအကြီးအကဲ သုံးဦးသည် တဖြည်းဖြည်း အရှိန်လျှော့လိုက်ကြသည်။

သူတို့၏ လှုပ်ရှားမှုများမှာ ပိုမို တည်ငြိမ်လာပြီး ပို၍ သတိထားလာကြသည်။

အဆင်အခြင်မဲ့ တိုက်ခိုက်နေခြင်းကို ရပ်တန့်လိုက်ကြသည်။

"သူ့ရဲ့ ချီစွမ်းအားတွေကို လောင်မြိုက်နေတာပဲ" အရပ်ရှည်ရှည် မိစ္ဆာအကြီးအကဲက မျက်လုံးများကို ကျဉ်းမြောင်းရင်း အေးစက်စွာ ပြောလိုက်သည်။

"ဒီလို စွမ်းအားမြှင့်တင်မှုက ကြာကြာ မခံနိုင်ပါဘူး။"

ဒဏ်ရာရနေသော အကြီးအကဲသည် အသက်ရှူနှုန်းကို ပြန်ထိန်းပြီး နှုတ်ခမ်းပေါ်မှ သွေးများကို သုတ်လိုက်သည်။ "သူ့ဘာသာသူ အားကုန်သွားအောင် ထားလိုက်။ နောက်ဆက်တွဲ ဒဏ်ပြန်ထိတဲ့အချိန်ကျရင် သူ ဘာမှ လုပ်နိုင်မှာ မဟုတ်တော့ဘူး။"

အရိုးစုအကြီးအကဲက တိုးတိုးလေး ရယ်မောလိုက်သည်။ "ခဲခဲခဲ... အားကုန်သွားစမ်း လူငယ်လေး။ ကောင်းကင်ဘုံဆိုတာ အလကား ပေးလေ့မရှိဘူး၊ ပြန်ယူတတ်တယ်ကွ။"

သူတို့သည် တိုက်ခိုက်ခြင်းထက် ခုခံခြင်းကို ပိုမို ဦးစားပေးလာပြီး ပိုင်ကျီဟန်ကို ဝိုင်းရံကာ စတင် ပတ်ချာလည်နေကြတော့သည်

ပိုင်ကျီဟန်ကို တစ်ချက်ပြီးတစ်ချက် အဆက်မပြတ် ဓားဝှေ့ယမ်းစေရန် သူတို့က အချိန်ဆွဲနေကြသည်။

သူတို့ တစ်ခုကိုတော့ အသေအချာ ယုံကြည်ထားကြသည်-

မည်မျှပင် ထူးခြားဆန်းပြားသော ဗလာသန့်စင်ခြင်းအဆင့် ကျင့်ကြံသူဖြစ်ပါစေ၊ ဤမျှ ပြင်းထန်သော စွမ်းအားထုတ်လွှတ်မှုကို ကြာရှည်စွာ ထိန်းထားနိုင်မည် မဟုတ်ပေ။

သို့သော် သူတို့ မှားသွားခဲ့သည်။

ပိုင်ကျီဟန်၏ အသက်ရှူသံသည် အနည်းငယ်မျှပင် မြန်ဆန်မလာခဲ့ပေ။

သူ၏ ချီစွမ်းအားမှာလည်း ကုန်ဆုံးသွားခြင်း မရှိပေ

သူ၏ ချီသည် အောက်ခြေကို မမြင်နိုင်သော သမုဒ္ဒရာကြီးတစ်ခုကဲ့သို့ပင်။

ကောင်းကင်ဘုံအမိန့်တော် ပြောင်းပြန်လှန်

ခြင်း ကျင့်စဉ်သည် သူ၏ ခန္ဓာကိုယ်ထဲတွင် ဆက်လက် ဟိန်းဟောက်နေသော်လည်း သူ၏ စွမ်းအင်စုရပ်မှာ အားနည်းသွားသည့် အရိပ်အယောင် လုံးဝမပြပေ။

သူတို့ တိုက်ခိုက်ခဲ့သည်မှာ မိနစ်အတော်ကြာခဲ့ပြီဖြစ်သော်လည်း ပိုင်ကျီဟန်မှာ အားလျော့သွားသည့် အမှတ်အသား မရှိသေးချေ။

အရိုးစုအကြီးအကဲသည် မျက်မှောင်ကြုတ်လိုက်သည်။

"ဘာလို့ သူ့ရဲ့ အရှိန်အဝါက ကျမသွားတာလဲ?"

ထိုသံသယ မဆုံးခင်မှာပင်

ပိုင်ကျီဟန် လှုပ်ရှားမှုကို ရပ်လိုက်သည်။

သူ ဓားကို နှိမ့်ချလိုက်သည်။

တိုက်ပွဲကွင်းပြင်တစ်ခုလုံး ငြိမ်သက်သွား၏။

"ဟင်?" အရပ်ရှည်ရှည် အကြီးအကဲသည် လှောင်ပြုံးပြုံးလိုက်သည်။ "နောက်ဆုံးတော့ မင်းရဲ့ အကန့်အသတ်ကို ရောက်သွားပြီပေါ့လေ?"

ပိုင်ကျီဟန်က မော့ကြည့်လိုက်သည်။

ထာဝရဝိညာဉ်ဓားသည် တုန်ခါနေသည်။

ထို့နောက်

"အရိပ်ကိုးပါး စီးဆင်းနေသောအလင်းဓားချက်”

ကမ္ဘာလောကကြီးသည် နှစ်ခြမ်းကွဲသွားသလို ခံစားလိုက်ရသည်။

ပိုင်ကျီဟန် ပျောက်ကွယ်သွားသည်။

မြန်ဆန်သွားခြင်း မဟုတ်ဘဲ— လုံးဝ ပျောက်ကွယ်သွားခြင်း ဖြစ်သည်။

တိုက်ပွဲကွင်းပြင်တစ်ခုလုံးတွင် ပုံရိပ်ယောင် ကိုးခု တစ်ပြိုင်နက်တည်း ပွင့်လန်းလာပြီး ပုံရိပ်တိုင်းတွင် ထပ်တူညီသော ဓားရည်ရွယ်ချက်နှင့် သတ်ဖြတ်လိုသော ဖိအားများ ပါရှိနေသည်။

ကျန်ရှိနေသော သုံးဦးသည် ပိုင်ကျီဟန်၏ တိုက်ကွက်အတွက် ပြင်ဆင်လိုက်ကြသည်။

ပိုင်ကျီဟန်သည် ဒဏ်ရာရထားသော အကြီးအကဲကို လုပ်ခဲ့သလိုမျိုး လုပ်လိမ့်မည်ဟု ထင်ကာ သူ၏ အစွမ်းထက်သော နည်းစနစ်ကို ခုခံရန် ပြင်ဆင်လိုက်ကြခြင်းဖြစ်သည်။ သို့သော် ပိုင်ကျီဟန်သည် ကံကြမ္မာဖြတ်တောက်ခြင်း ဓားချက်ကို အသုံးပြုရန် အစီအစဉ်မရှိဘဲ ပစ်မှတ်တစ်ခုတည်းဖြစ်သော အရိုးစုအကြီးအကဲကိုသာ အာရုံစိုက်လိုက်

သည်

ဓားကိုးစင်းမှာ တစ်ပြိုင်နက်တည်း ကျဆင်းလာသည်။

တိုက်ကွက်တစ်ခုချင်းစီသည် ရေထဲတွင် စီးဆင်းနေသော အလင်းတန်းများကဲ့သို့ပင်— တိတ်ဆိတ်သည်၊ ချောမွေ့သည်၊ ရှောင်တိမ်း၍ မရနိုင်ပေ။

"မလုပ်နဲ့”

ရွှမ်

ငွေရောင်အလင်းတန်းသည် လှပသော အကွေးအဝိုက်ဖြင့် ဖြတ်သန်းသွားသည်။

အရိုးစုအကြီးအကဲ တောင့်တောင့်ကြီး ဖြစ်သွား၏။

သူ၏ မျက်တွင်းထဲမှ စိမ်းဖန့်ဖန့် မီးတောက်များမှာ တစ်ချက်မျှ တဖျတ်ဖျတ် လှုပ်ခတ်သွားပြီးနောက် ငြိမ်းသတ်သွားတော့သည်။

သူ၏ ဦးခေါင်းခွံသည် ခန္ဓာကိုယ်မှ ပြတ်တောက်သွားပြီး လေထဲတွင် လည်ပတ်သွားကာ မြေပြင်ပေါ်သို့ ဘုန်းဘုန်းလဲ ကျသွားသည်။

ခေါင်းမရှိသော ခန္ဓာကိုယ်သည် ခဏမျှ မတ်တတ်ရပ်နေပြီးမှ

ပြိုလဲသွားတော့သည်။

တစ်လောကလုံး တိတ်ဆိတ်သွား၏။

ကျန်ရှိနေသော မဟာကောင်းကင်ဘုံတက်ခြင်းအဆင့် မိစ္ဆာအကြီးအကဲ နှစ်ဦးသည် ထိတ်လန့်တကြား စိုက်ကြည့်နေကြသည်။

သူတို့ထဲမှ တစ်ယောက်— အသတ်ခံလိုက်ရချေပြီ။

ပိုင်ကျီဟန် ပြန်လည် ပေါ်လာသည်။ ဓားဖျားမှ မိစ္ဆာသွေးအကြွင်းအကျန်များ စီးကျနေစဉ် သူသည် တည်ငြိမ်စွာ ရပ်နေ၏။

သူ၏ အရှိန်အဝါမှာ တည်ငြိမ်နေဆဲပင်။

သူသည် ကျန်ရှိသော အကြီးအကဲနှစ်ဦးကို ကြည့်လိုက်သည်။ သူသည် သူတို့ကိုလည်း လွှတ်ပေးရန် အစီအစဉ် မရှိပေ။