အခန်း (၁၉၈၅-၁၉၈၆)

အပိုင်း(၁၉၈၅)

"ဟုတ်လား..."

ကပ္ပတိန်၏ စကားကြောင့် သူတော်စင် နွေဦးကွင်းပြင်နှင့်အတူ ရောက်ရှိလာသော အခြားသူတစ်ဦးမှာ စိတ်ဝင်တစား ဖြစ်သွားသည်။ သူမထံမှ ထွက်ပေါ်နေသော အဂ္ဂိရတ် အော်ရာမှာ အလွန်ပင် ထူထပ်ကြွယ်ဝလှရာ ၎င်းက အဂ္ဂိရတ်လမ်းစဉ်တွင် သူမ၏ ကျွမ်းကျင်မှုကို ဖော်ပြနေခြင်းပင်။

သူမသည် ဖြူဝင်းသော အသားအရေနှင့် နီမြန်းသော မျက်ဝန်းများကို ပိုင်ဆိုင်ထားသည့် လှပသော မိန်းကလေးငယ် တစ်ဦးဖြစ်သည်။ သူမသည် လက်ပြတ် မက်မွန်ရောင် ဂါဝန်တိုလေးကို ဝတ်ဆင်ထားပြီး အသက် ၁၂ နှစ် သို့မဟုတ် ၁၃ နှစ်အရွယ် ကလေးမလေးတစ်ဦးအဖြစ် ဟန်ဆောင်ထားသည်။ သူမ၏ ရုပ်သွင်မှာ ကျင့်စဉ်ကြောင့်လား သို့မဟုတ် ရည်ရွယ်ချက်ရှိရှိ ဖန်တီးထားခြင်းလား ဆိုသည်မှာ ခန့်မှန်းရ အလွန်ခက်ခဲလှသည်။

သူတော်စင် နွေဦးကွင်းပြင်နှင့် ခြားနားစွာပင်... သူမသည် အဂ္ဂိရတ် ပညာရှင် တစ်ဦး ဖြစ်သဖြင့် ပိုမို လူသိများပြီး ပိုမို ကြည်ညိုခြင်း ခံရသည်။ ထို့ပြင် သူမသည် သာမန် အဂ္ဂိရတ် ပညာရှင် မဟုတ်ဘဲ... အကြီးတန်းဝင် အစစ်အမှန် လောက အဂ္ဂိရတ် ရှန့်ထို တစ်ဦး ဖြစ်သည်။ သူမမှာ အဂ္ဂိရတ် ရှန့်ထို အဖြူရောင် ကောင်းကင်ပင် ဖြစ်သည်။

အဂ္ဂိရတ်လမ်းစဉ်၏ 'သေမျိုးအဆင့်' တွင် အဆင့်တစ်ခုစီကို တရားဝင်၊ မူလနှင့် မဟာ ဟု သုံးဆင့် ခွဲခြားထားသကဲ့သို့ 'လျှို့ဝှက်အဆင့်' တွင်မူ ဂျူနီယာ၊ စီနီယာနှင့် အထွတ်အထိပ် ဟူ၍ ခွဲခြားထားသည်။ ၎င်းမှာ 'သေမျိုးလမ်းစဉ်' နှင့် 'လျှို့ဝှက်လမ်းစဉ်' အကြားရှိ ကွာခြားချက်ကို အလွန် ရိုးရှင်း ပြတ်သားစွာ ဖော်ပြနေခြင်း ဖြစ်သည်။

အသက်အရွယ် မည်မျှပင် ရှိစေကာမူ... အဆင့်နိမ့်သူကို 'ဂျူနီယာ' ဟု ခေါ်ပြီး မြင့်သူကို 'စီနီယာ' ဟု ခေါ်သည်။ ၎င်းသည် ‘မြေကြီး အဂ္ဂိရတ် ရှန့်ထို' နှင့် 'လောကရှန့်ထို အဂ္ဂိရတ် ရှန့်ထို' တို့အကြား နှိုင်းယှဉ်၍ မရနိုင်သော ကွာခြားချက်ရှိကြောင်းကိုလည်း ပြသနေခြင်းပင်။ 'လောကရှန့်ထို' အဆင့်ရှိ 'ဂျူနီယာ' တစ်ယောက်သည် ‘မြေကြီးရှန့်ထို’ အဆင့်ရှိ 'အထွတ်အထိပ်' ထက် အဆပေါင်းများစွာ သာလွန်ပေသည်။

အဂ္ဂိရတ် ရှန့်ထို အဖြူရောင်ကောင်းကင်၏ ကျင့်ကြံခြင်းမှာ 'ကောင်းကင် ရှန့်ထို' အဆင့်တွင် ရှိသည်။ သူမတွင် 'အဂ္ဂိရတ် ဝိညာဉ်' ရှိသည့် လက္ခဏာ မတွေ့ရသော်လည်း သူမ၏ ပါရမီနှင့် စွမ်းရည်မှာမူ အံ့မခန်းလှပေ။

"ဘာလို့ ငါတို့ ရောက်လာတာကို သူ့ကို အသိမပေးတာလဲ..."

သူမ၏ အသံမှာ ကလေးမလေး တစ်ယောက်၏ အသံ မဟုတ်ဘဲ ရင့်ကျက်သော အမျိုးသမီးငယ် တစ်ဦး၏ အသံမျိုး ဖြစ်သည်။ သူမ၏ မျက်ဝန်းများမှာ အနည်းငယ် ကျဉ်းမြောင်းသွားရာ မကျေမနပ် ဖြစ်နေကြောင်း သိသာလှသည်။

ကပ္ပတိန်မှာ ချက်ချင်းပင် မျက်နှာပျက်သွားပြီး အလောတကြီး ဖြေလိုက်၏။

"ကျွန်တော် ကြိုးစားခဲ့ပါတယ် ရှန့်ထို အဖြူရောင်ကောင်းကင်... ဒါပေမဲ့ သူက..."

သူသည် ထို 'အာရုဏ်ဦး အဂ္ဂိရတ် ရှန့်ထို' မှာ ဆက်ဆံရ ခက်ခဲကြောင်း ပြောချင်သည်။ အဝေးမှ စိတ်ဝိညာဉ်ချင်း ဆက်သွယ်ရန် ကြိုးစားမှုတိုင်းမှာလည်း ပြင်းထန်သော တန်ပြန်မှုကိုသာ ကြုံတွေ့ခဲ့ရသည်။ သူ၏ လက်အောက်ငယ်သား တစ်ဦးမှာ ယခုထိတိုင် နာလန်မထနိုင်သေးပေ။ ထို့ပြင် သင်္ဘောပေါ်မှ မည်သူမျှ ကောင်းကင်နှလုံးသား ဂလက်ဆီ အတွင်း နောက်တစ်လအတွင်း ဝင်ရောက်ခွင့်မရှိဟူသော သတိပေးချက်မှာလည်း ရက်သတ္တပတ် အတော်ကြာကတည်းက ထုတ်ပြန်ထားခြင်း ဖြစ်သည်။

'ကောင်းကင်နှလုံးသား ဂလက်ဆီ' အတွင်းရှိ ကမောက်ကမ ဖြစ်မှုများမှာ ဤအမည်မသိ အဂ္ဂိရတ် ရှန့်ထိုကြောင့် ဖြစ်ကြောင်း ထင်ရှားလှပြီး သူသည် သူ၏ ခွင့်ပြုချက်မပါဘဲ မည်သူ့ကိုမျှ ဝင်ခွင့်မပေးပေ။ ၎င်းမှာ အလွန်ပင် ဗိုလ်ကျစိုးမိုးလွန်းလှသည်။ ထို့ပြင် အစစ်အမှန် သူတော်စင်ဖြစ်သည့် ထိန်ကျန့်ဝမ်ကိုပင် ဤသူက သတ်ဖြတ်ခဲ့သည်ဟု ဆိုရာ...

သူသည် ထိုသတိပေးချက်ကို ချိုးဖောက်ပြီး သူ၏ အသက်နှင့် နွေဦးလေပြည် သင်္ဘောကို မည်သို့ စတေးရဲပါမည်နည်း။

"ရှင်းရှင်းလင်းလင်းပဲ ပြောပါ..."

ယခုတစ်ကြိမ် အသံရှင်မှာ အရပ်ရှည်ပြီး သန်မာသော သက်ကြီးပိုင်း အမျိုးသား တစ်ဦး ဖြစ်သည်။ သူသည် လက်ပြတ် ဝတ်စုံကို ဝတ်ဆင်ထားသဖြင့် သူ၏ သန်မာသော ကြွက်သားများကို မြင်တွေ့နိုင်ပြီး အောက်ပိုင်းတွင်မူ သံချပ်ကာများကို အပြည့်အစုံ ဝတ်ဆင်ထားသည်။ သူ၏ အကြည့်မှာ ထက်မြက်ပြီး ကျားမျက်လုံးများကဲ့သို့ ရှိနေသည်။ သူသည် 'သိုင်းအရှင် ကျားနှလုံးသား' ဟု လူသိများပြီး 'လျှို့ဝှက်အရှင်’ (အာဏာရှင်ရှန့်ထို) အဆင့်ရှိ အင်အားကြီး ပုဂ္ဂိုလ်တစ်ဦး ဖြစ်သည်။ သူသည် အဂ္ဂိရတ် ရှန့်ထို အဖြူရောင်ကောင်းကင်၏ တာအို ကာကွယ်သူလည်း ဖြစ်သည်။

သူ စကားပြောလိုက်သောအခါ ကပ္ပတိန်မှာ လန့်ဖျပ်သွားပြီး ထိန်ကျန့်ဝမ်နှင့် တွေ့ဆုံခဲ့ပုံ၊ ဝေ့ဝူယင်၏ ကြေညာချက်နှင့် နောက်ဆက်တွဲ လုပ်ဆောင်ချက်များကို အသေးစိတ် ရှင်းပြတော့သည်။

"ချိပ်စည်းရော ဘယ်လိုနေလဲ..."

ယခုတစ်ကြိမ် မေးလိုက်သူမှာ သက်လတ်ပိုင်း အမျိုးသမီး တစ်ဦး ဖြစ်သည်။ သူမသည် ရိုးရှင်းသော အဖြူရောင် ပညာရှိ ဝတ်စုံကို ဝတ်ဆင်ထားပြီး ပညာရှိဆန်သော ဆွဲဆောင်မှုမျိုး ရှိသည်။ သူမသည် စာအုပ်တစ်အုပ်ကို ကိုင်ဆောင်ထားပြီး ထိုစာအုပ်ပေါ်ရှိ သင်္ကေတများမှာ အမြဲတမ်း ပြောင်းလဲနေကာ နယ်ပယ်ပေါင်းစုံကို ဖန်တီးနေသကဲ့သို့ပင်။ သူမသည် 'ပိုင်ပန်' ဟု လူသိများသော 'ကောင်းကင် ရှန့်ထို' တစ်ဦးဖြစ်ပြီး ဝင်္ကပါနှင့် အစီအရင်မျာတွင် အလွန် ကျွမ်းကျင်သူ ဖြစ်သည်။

သူမ၏ စကားကြောင့် အဖြူရောင်ကောင်းကင်နှင့် သိုင်းအရှင်သခင် ကျားနှလုံးသားတို့မှာ အနည်းငယ် တည်ကြည်သွားကြသော်လည်း သူတော်စင် နွေဦးကွင်းပြင်၏ အမူအရာမှာမူ မပြောင်းလဲပေ။

"ချိပ်စည်းက အကောင်းအတိုင်းပါပဲ..."

ကပ္ပတိန်၏ စကားကြောင့် သူတို့အားလုံးမှာ တိတ်တဆိတ် သက်ပြင်းချနိုင်ခဲ့ကြသည်။

"ကျွန်တော်တို့ အာရုဏ်ဦး အဂ္ဂိရတ် မျိုးရိုး ဆိုတဲ့ နာမည်ကို စုံစမ်းကြည့်ပြီးပါပြီ... အဲ့တာက မကြာသေးခင်ကမှ ပေါ်ပေါက်လာတာ ဖြစ်ပေမဲ့ 'လျှို့ဝှက်မြေကြီး' အဆင့် ထုတ်ကုန်တွေနဲ့ 'လျှို့ဝှက်လောက’ အဆင့် ထုတ်ကုန် အချို့ကိုလည်း ထုတ်လုပ်ထားပါတယ်"

ကပ္ပတိန်က အစီအရင်ခံလိုက်သည်။ သူတော်စင် မပါဝင်သော မည်သည့် ဟင်းလင်းပြင် သင်္ဘောမဆို ကောင်းကင် နိမိတ်ဖတ် ပညာရှင်များ သို့မဟုတ် ပုရောဟိတ်များ ပါဝင်ရစမြဲ ဖြစ်သည်။ ဝေ့ဝူယင်မှာ အစကတည်းက အလွန်ဝေးကွာသော နေရာတွင် ရှိနေသဖြင့် သူတို့ မသိရှိနိုင်ခဲ့သော်လည်း သူ ရောက်ရှိလာပြီး သူ၏ အမည်ကို ကြေညာလိုက်သောအခါမှ ရက်သတ္တပတ် အတော်ကြာ အစွမ်းကုန် စုံစမ်းခဲ့ကြခြင်း ဖြစ်သည်။

သူတို့သည် အဂ္ဂိရတ် ဖော်စပ်နည်းများကို မသိရှိနိုင်သော်လည်း ဝေ့ဝူယင်က သူ၏ ပစ္စည်းများကို အဂ္ဂိရတ်လမ်းစဉ်တွင် မိတ်ဆက်ခဲ့သဖြင့် အနည်းဆုံး အချက်အလက်များကိုမူ ရရှိနိုင်ခဲ့ကြသည်။

"အကျိုးအာနိသင်တွေကကော..."

အဖြူရောင်ကောင်းကင်၏ မျက်ဝန်းများတွင် စူးစမ်းလိုစိတ်များ ဖြစ်ပေါ်လာသည်။ အဂ္ဂိရတ်လမ်းစဉ်နှင့် ပတ်သက်လျှင် သူမသည် အမြဲတမ်း စိတ်ဝင်စားသူ ဖြစ်သည်။

“ရှန့်ထို အဖြူရောင်ကောင်းကင်... ကျွန်တော်တို့... အကျိုးအာနိသင်တွေကိုတော့ အခုထိ မသိရသေးပါဘူး..."

ကပ္ပတိန်က စိတ်ပျက်လက်ပျက်ဖြင့် ပြန်ဖြေလိုက်သည်။ သို့သော်လည်း ဝေ့ဝူယင်သည် 'လောကရှန့်ထို' အဆင့်ရှိ အစစ်အမှန် အဂ္ဂိရတ် ပညာရှင် တစ်ဦးဖြစ်ကြောင်းကိုမူ အတည်ပြုနိုင်ခဲ့သည်။

"မသိရသေးဘူး ဟုတ်လား... ဒါဆိုရင် အဲ့ဒီ ပစ္စည်းတွေရဲ့ အာနိသင်က တကယ်ကို ထူးခြားတာ ဖြစ်ရမယ်"

သိုင်းအရှင်သခင် ကျားနှလုံးသားက အခိုင်အမာ ပြောလိုက်သည်။ သူသည် သူတော်စင်ကို သတ်နိုင်သော 'လောကရှန့်ထို အဂ္ဂိရတ် ပညာရှင်' တစ်ဦး၏ အရေးပါမှုကို အဖြူရောင်ကောင်းကင်အား သတိပေးလိုက်ခြင်းပင်။

အဖြူရောင်ကောင်းကင်မှာလည်း ထိုအချက်ကို နားလည်ထားသဖြင့် အတွေးနက်စွာဖြင့် ခေါင်းငုံ့နေမိသည်။

"စိတ်မပူပါနဲ့... မဟာ ဧကရာဇ်မင်းမြတ် ပိုင်... ချိပ်ပိတ်ရဲ့ အခြေအနေကို သွားစစ်ဆေးပေးပါ"

သူတော်စင် နွေဦးကွင်းပြင်က ပိုင်ပန်းကို အမိန့်ပေးလိုက်သည်။ ပညာရှိ အမျိုးသမီးမှာ ရိုသေစွာဖြင့် ဦးညွှတ်ပြီး သင်္ဘောအတွင်းပိုင်းသို့ ဝင်ရောက်သွားတော့သည်။

သူတော်စင် နွေဦးကွင်းပြင်၏ မျက်ဝန်းများမှာ မှေးမှိန်စွာ တောက်ပလာ’။ နွေဦးလေပြည် သင်္ဘော၏ သတ္တုအလွှာများကို ကျော်ဖြတ်ကာ 'ကောင်းကင်နှလုံးသား ဂလက်ဆီ' အတွင်းသို့ ထိုးဖောက် ကြည့်မြင်နေသကဲ့သို့ပင်။

'ခင်ဗျားက ဘယ်သူလဲ... အာရုဏ်ဦး အဂ္ဂိရတ် ရှန့်ထို...'

...

ကောင်းကင်နှလုံးသား ဂလက်ဆီနှင့် မတွေးဆနိုင်လောက်အောင် ဝေးကွာလှသော ကမ္ဘာတစ်ခုတွင်၊ ဦးခေါင်းမှ ခြေဖျားအထိ ရွှေရောင်ဝတ်ရုံကို ခြုံလွှမ်းထားသော လူရိပ်တစ်ခုသည် တင်ပျဉ်ခွေထိုင်နေသည်။ သူ၏ လက်များမှာ သေမျိုး သို့မဟုတ် လျှို့ဝှက် အာဏာရှင်များ မပြုလုပ်နိုင်သော ထူးခြားသည့် လက်ဟန် တစ်ခုကို ဖော်ဆောင်ထားပြီး မျက်လုံးများကို မှိတ်ထားသည်။ ပတ်ဝန်းကျင်တစ်ခုလုံးမှာ ထူထပ်မှောင်မိုက်သော မြူခိုးများဖြင့် ဖုံးလွှမ်းနေပြီး ထိုရွှေရောင်ဝတ်ရုံခြုံထားသူ၏ လက်တစ်ကမ်း ပတ်လည်သာလျှင် ကြည်လင်နေသည်။

"မင်းတို့နှစ်ယောက် ဘာတွေ ကြံစည်နေကြတာလဲ"

လူရိပ်က ခေါင်းမော့လိုက်၏။ သူ၏ အသံကြောင့် ကောင်းကင်ဘုံတစ်ခုလုံး တုန်ခါသွားပြီး ရွှေရောင် အလင်းစက်များမှာ မီးတောက်များကဲ့သို့ လေထုထဲတွင် ပေါ်လာလိုက် ပျောက်သွားလိုက် ဖြစ်နေသည်။ သူပြောဆိုသော ဘာသာစကားမှာ သေမျိုးဘာသာစကား သို့မဟုတ် 'လျှို့ဝှက်ဘာသာစကား' မဟုတ်ဘဲ အသံထွက်နှင့် အဓိပ္ပာယ်ဖော်ဆောင်မှု အဆင့်အတန်း လုံးဝခြားနားသော ပိုမိုမြင့်မားသည့် ဘာသာစကားတစ်ခု ဖြစ်သည်။

"မဟာတာအိုတွေက ပြိုင်ပွဲလုပ်နေကြတာလား... မင်းတို့ရဲ့ ရခဲလှတဲ့ စိတ်ဝင်စားမှုကို ဘာက ဖမ်းစားလိုက်တာလဲ"

ရွှေဝတ်ရုံခြုံထားသူက ရွှေရောင်မြူခိုးများကို ဖြည်းညှင်းစွာ မှုတ်ထုတ်လိုက်ရာ ၎င်းမှာ လူတစ်ရပ်စာရှိသော ရွှေမှန်ချပ်တစ်ခုအဖြစ် ပြောင်းလဲသွားပြီး သူ၏ ဝေဝေဝါးဝါး ပုံရိပ်ကို ထင်ဟပ်စေသည်။ ထိုမှန်ချပ်မှာ ပုံပျက်သွားပြီး အခြားပုံရိပ်တစ်ခုကို ဖော်ပြရန် ကြိုးစားနေသည်။

ရုတ်တရက်ပင်၊ ထိုရွှေမှန်ချပ်မှာ နေမင်း၏ အပူရှိန်ဖြင့် အလောင်ခံရသကဲ့သို့ အရည်ပျော်သွားသည်။ ထို့နောက် အရှိန်အဟုန်ဖြင့် အငွေ့ပျံသွားပြီး ၎င်း၏ တုန်ခါမှုကြောင့် ရှေ့ရှိ လေထုမှာ တုန်ခါလာကာ ဟင်းလင်းပြင်ကိုယ်တိုင် ပျောက်ကွယ်သွားပြီး အနက်ရောင် ဟင်းလင်းပြင်ကြီးတစ်ခု ဖြစ်ပေါ်လာသည်။

"..."

ရွှေဝတ်ရုံခြုံထားသူမှာ တိတ်ဆိတ်သွား၏။ အချိန်အနည်းငယ် ကြာပြီးနောက်တွင် ထာဝရရှင်သန်သော အော်ရာတစ်ခုသည် နတ်ဘုရားတို့၏ အရှင်သခင်အလား ဆင်းသက်လာသည်။ ဤအော်ရာကြောင့် မှောင်မိုက်သော မြူခိုးများမှာ အနည်းငယ် ပို၍ ထူထပ်သွားသည်။ ထိုအော်ရာသည် မှန်ချပ်ရှိခဲ့သော နေရာတွင် ခဏတာ ဝဲပျံနေပြီးနောက် ဘာမျှမလုပ်ဘဲ ပြန်လည် ထွက်ခွာသွားခဲ့သည်။

"ဒါ ဘာကြီးလဲ..."

ရွှေဝတ်ရုံခြုံထားသူ၏ လက်များမှာ တုန်ယင်နေ၏။

"ငါ့ရဲ့ လှောင်အိမ်ကို ဒီထက်ပိုပြီး ခိုင်မာအောင် လုပ်ဖို့ လိုလို့လား..."

သူ၏ ဖြစ်တည်မှု အနက်ရှိုင်းဆုံးမှ ထွက်ပေါ်လာသော ဟိန်းဟောက်သံမှာ မြူခိုးများအတွင်း ပဲ့တင်ထပ်သွားသော်လည်း မြူခိုးများက ထိုအသံကို စကြဝဠာတစ်ခုလုံးသို့ မပျံ့နှံ့အောင် ထိန်းချုပ်ထားလိုက်လေသည်။

...

"ယောက်ဖ... မင်း တကယ်ပဲ ဒါကို လုပ်တော့မှာလား... ဒါက သူတော်စင် နွေဦးကွင်းပြင်ကို ဘာအကျိုးအမြတ်မှ မရှိဘဲ ရန်စလိုက်သလို ဖြစ်နေလိမ့်မယ်"

သခင်လေးရှန့်က စိတ်မပါလက်မပါဖြင့် မေးလိုက်သည်။ သူသည် အခြေအနေကို သတိပေးနေခြင်းသာ ဖြစ်သော်လည်း အတွင်းစိတ်တွင်မူ ကမ္ဘာကြီး ကမောက်ကမ ဖြစ်နေသည်ကို ဝိုင်သောက်ရင်း ကြည့်ချင်နေသူ ဖြစ်သည်။

ဝေ့ဝူယင်က တိုက်ရိုက် မဖြေကြားသော်လည်း သူ၏ မျက်ဝန်းထဲရှိ ပြတ်သားမှုများမှာ နောက်ဆုတ်မည်မဟုတ်ကြောင်း ဖော်ပြနေသည်။

***

အပိုင်း(၁၉၈၆)

လွန်ခဲ့သော မိနစ်အနည်းငယ်က...

သူတော်စင် နွေဦးကွင်းပြင်သည် အခြားလူသုံးဦးနှင့်အတူ ဂလက်ဆီအလွှာ၏ အခြားတစ်ဖက်သို့ ရောက်ရှိလာသည်ကို သူတို့နှစ်ဦး မြင်တွေ့ခဲ့ရသည်။ သူကိုယ်တိုင် လာရောက်ခြင်းမှာ 'ကောင်းကင်နှလုံးသား ဂလက်ဆီ' အတွင်းရှိ သူ၏ ကြိုးပမ်းမှုများကို မည်မျှ တန်ဖိုးထားကြောင်း ပြသနေသည်။ ထို့နောက် ဝေ့ဝူယင်က 'ဟင်းလင်းပြင် တံခါး' တစ်ခုကို ဖွင့်ကာ အတွင်းသို့ ဝင်သွားသဖြင့် သခင်လေးရှန့်မှာလည်း မေးခွန်းပေါင်းများစွာဖြင့် နောက်မှ လိုက်သွားခဲ့ရသည်။

ဟင်းလင်းပြင်တံခါးမှ ထွက်လာသည်နှင့် သခင်လေးရှန့်၏ ပထမဆုံး စကားမှာ...

"အား..."

သူသည် မခုခံနိုင်သော အင်အားတစ်ခုက သူ့အား ဆွဲငင်နေသည်ကို ခံစားလိုက်ရသည်။ သူသည် 'လျှို့ဝှက်ကြယ်တာရာ အဆင့်' ကျင့်ကြံခြင်း အခြေခံကို အစွမ်းကုန် အသုံးပြု၍ ခုခံသော်လည်း မရဘဲ ကြယ်များကို အလင်းတန်းများအဖြစ် မြင်ရသည်အထိ အရှိန်အဟုန်ဖြင့် ဆွဲခေါ်ခြင်း ခံနေရသည်။ သေလုမတတ် ကြောက်လန့်မှုကြောင့် သူ၏ ဦးရေပြားများ ထုံကျင်လာပြီး အရိုးများပင် တကျွတ်ကျွတ် မြည်လာသည်။

ထိုအချိန်တွင် သန်မာသော လက်တစ်ဖက်က သူ၏ ခါးကို ဖက်တွယ်ကာ ဆွဲယူလိုက်သဖြင့် သူသည် ရှင်သန်ခြင်း အလင်းရောင်ကို မြင်လိုက်ရသည်။ ထိုနွေးထွေးမှုမှာ သူ၏ အမြင်များကို ပြောင်းလဲသွားစေသည်။

သူ သတိပြန်ဝင်လာသောအခါ ဝေ့ဝူယင်၏ လက်မောင်းထဲတွင် ရောက်နေကြောင်း သိလိုက်ရသည်။ သူသည် ကယ်တင်ရှင်၏ နတ်ဘုရားဆန်သော ခန့်ညားမှုကြောင့် သူသည် ပြောစရာ စကားမဲ့သွားရသည်။

'မိန်းကလေးတွေ ဘာလို့ သူရဲကောင်းတွေကို ချစ်မိကြသလဲဆိုတာ ငါ အခုမှ နားလည်တော့တယ်...'

သူတွေးမိသွားသည်။ ဝေ့ဝူယင်က နောက်သို့ ဆုတ်လိုက်ရာ သူတို့သည် များပြားလှသော အကွာအဝေးကို ဖြတ်ကျော်လိုက်သကဲ့သို့ ဖြစ်သွား၏။ ထို့နောက်... ဝေ့ဝူယင်က သူ့ကို အာလူးအိတ်တစ်အိတ်လို ဘေးသို့ ပစ်ချလိုက်သဖြင့် သခင်လေးရှန့်မှာ သူ၏ အခြေအနေမှန်ကို ပြန်လည် သတိရသွားသည်။ သူသည် ကိုယ်ဟန်ကို ထိန်းလိုက်ပြီးနောက် သူ၏ အရက်ဘူးကို ထုတ်ကာ အားရပါးရ တစ်ငုံသောက်လိုက်သည်။

ထိုအခါမှသာ သူ၏ စိတ်များ တည်ငြိမ်သွားပြီး အခြားအကြောင်းအရာများကို အာရုံစိုက်နိုင်တော့သည်။

‘ငါတို့ ဘယ်ရောက်နေတာလဲ...’

သူ ပတ်ဝန်းကျင်ကို ကြည့်လိုက်သောအခါ ကြီးမားသော အနက်ရောင် ဟင်းလင်းပြင်ကြီးတစ်ခုကို မြင်လိုက်ရသည်။ ထို့ပြင် သူ၏ စိတ်ဝိညာဉ် အာရုံခံမှုအားလုံးမှာ ထိုဟင်းလင်းပြင်ထဲသို့ စုပ်ယူခံနေရသဖြင့် ဤနေရာမှာ စိတ်ဝိညာဉ် အာရုံခံမှုကို တားမြစ်ထားသော နယ်မြေဖြစ်ကြောင်း သူ သိလိုက်သည်။ ဝေ့ဝူယင် ဝင်လာနိုင်လျှင် ပြန်ထွက်နိုင်မည်ဟု သူ ယုံကြည်သဖြင့် သိပ်တော့ မစိုးရိမ်တော့ပေ။

‘ငါတို့ ဗဟိုချက်ကို ရောက်နေတာ’

ဝေ့ဝူယင်က ပြန်ဖြေလိုက်သည်။ သူ၏ ငွေရောင်မျက်ဝန်းများတွင် ဝိညာဉ်အလင်းတန်းများ တောက်ပနေပြီး ကောင်းကင်ဘုံ နတ်မျက်လုံး ကို အစွမ်းကုန် အသုံးပြုထားသည်။ သူ၏ ဝိညာဉ်အင်အားမှာ အထွတ်အထိပ်သို့ ရောက်ရှိနေသဖြင့် သူ မြင်တွေ့နေရသော အရာများမှာ လျှို့ဝှက် အာဏာရှင် များနှင့် သူတော်စင်များကိုပင် တုန်လှုပ်စေပေလိမ့်မည်။

"ဗဟိုချက်... ဘာရဲ့ ဗဟိုချက်လဲ..."

သူ ဘယ်ညာ ကြည့်သော်လည်း အမှောင်ထုနှင့် ဝေ့ဝူယင်မှလွဲ၍ ဘာမျှ မမြင်ရပေ။ အလင်းစွမ်းအင် လုံးဝမရှိသော ဤနေရာတွင် ဝေ့ဝူယင်ကို မည်သို့ မြင်နေရသနည်းဟု သူ သိချင်နေသည်။

"..."

ဝေ့ဝူယင်က ဘာမှ ပြန်မပြောချေ။

"..."

သခင်လေးရှန့် ခေါင်းခါလိုက်မိသည်။ သူ၏ စကားများနှင့် စိတ်ဝိညာဉ် စွမ်းအင်များမှာ ဝေ့ဝူယင်ထံသို့ မရောက်ရှိဘဲ ဝေ့ဝူယင်ကသာ သူ၏ အသိစိတ် ပင်လယ်ထဲသို့ တိုက်ရိုက် စကားပြောနေခြင်း ဖြစ်ကြောင်း သူ သိလိုက်ရသည်။

'ကောင်းကင်နှလုံးသား ဂလက်ဆီရဲ့ ဗဟိုချက်ပဲ... အတိအကျ ပြောရရင် ငါတို့က ဗဟိုချက်ရဲ့ အလယ်တည့်တည့်မှာ ရှိနေတာ'

ဝေ့ဝူယင်၏ မျက်ဝန်းမှ အလင်းရောင်ကြောင့်သာ ပတ်ဝန်းကျင်ကို မြင်နေရခြင်း ဖြစ်သည်။ ဝေ့ဝူယင်သည် သူ့ကို ဆွဲငင်နေသော ထိတ်လန့်ဖွယ် ဆွဲငင်အားကို ဂရုမစိုက်ဘဲ အလင်းအရင်းအမြစ်တစ်ခုအဖြစ် ရပ်တည်နေသည်။

'ဂလက်ဆီရဲ့ ဗဟိုချက် ဟုတ်လား... နောက်မနေနဲ့ဦး... ယောက်ဖ... ဟား ဟား... အဲ့ဒါက ဧရာမ တွင်းနက်ကြီးလေ... ဘလက်ဟိုးလေ... သူတော်စင်တွေတောင် ဂလက်ဆီရဲ့ ဗဟိုချက်နားကို မကပ်ရဲကြဘူး... ဆွဲငင်အားတစ်ခုတည်းနဲ့တင် ဝိညာဉ်ကို ချေဖျက်ပစ်နိုင်တာ... နောက်မနေပါနဲ့'

သခင်လေးရှန့်သည် တုန်တုန်ရင်ရင်ဖြင့် အရက်ကို ထပ်သောက်လိုက်သည်။ သူ၏ မျက်လုံးများက ဘေးဘီကို ကြည့်ရင်း ခုနက သေလုမတတ် ကြုံခဲ့ရသည်ကို သတိရကာ မျက်လုံးများ ပြူးထွက်သွားသည်။

'ဘုရားရေ... ငါတို့ ဘယ်လိုလုပ်ပြီး အသက်ရှင်နေတာလဲ...'

သခင်လေးရှန့်သည် ပါးစပ်ထဲမှ ဝိုင်များပင် ထွက်ကျလုနီးပါး ဖြစ်သွားသော်လည်း နှမြောသဖြင့် ပြန်မြိုချလိုက်သည်။

'နေပါဦး... မင်းက ဗဟိုချက်ရဲ့ အလယ်တည့်တည့် လို့ ပြောတာလား... ငါတို့က ဂလက်ဆီရဲ့ ပုံသဏ္ဌာန်ကို ထိန်းထားပေးတဲ့ ဧရာမ တွင်းနက်ကြီးရဲ့ ဗဟိုထဲမှာ ရောက်နေတာလား...'

သူ၏ စိတ်ထဲတွင် အတွေးများ ရှုပ်ထွေးသွားပြီး ဝေ့ဝူယင်၏ ဘေးသို့ အလိုလို ကပ်သွားမိသည်။ သူသည် ဂလက်ဆီများ၏ တည်ဆောက်ပုံနှင့် ဧရာမ တွင်းနက်ကြီးများ၏ အန္တရာယ်ကို ကောင်းကောင်း သိရှိထားသူ ဖြစ်သည်။

'ငါတို့ ဘာလို့ ဒီကို ရောက်နေတာလဲ...'

သူ စိတ်အနည်းငယ် တည်ငြိမ်သွားသောအခါမှ မေးလိုက်သည်။

ဝေ့ဝူယင်က ချက်ချင်းပင် ပြန်ဖြေလိုက်သည်။

'ထိန်ကျန့်ဝမ် ဒီကို လာတုန်းက ဂလက်ဆီအလွှာရဲ့ ပုံသဏ္ဌာန် မမှန်တာကို သူ သတိထားမိခဲ့တယ်... အဲ့ဒီ ပုံမှန်မဟုတ်မှုရဲ့ အရင်းအမြစ်က ဒီဂလက်ဆီရဲ့ ဗဟိုချက်ဖြစ်တဲ့ ဒီတွင်းနက်ကြီးထဲကနေ လာတာဆိုတာ သူ သိခဲ့ရတယ်...'

'သူ သိခဲ့တယ် ဟုတ်လား... သူ ငါ့ကို တစ်ခါမှ မပြောဖူးပါဘူး...'

သခင်လေးရှန့်သည် ဝေ့ဝူယင်က ဤအချက်အလက်ကို မည်သို့ သိရှိသနည်းဟု တွေးမရ ဖြစ်နေသည်။ ထိန်ကျန့်ဝမ်၏ မှတ်ဉာဏ်များကို ရယူလိုက်ခြင်းလား။ သူတော်စင် တစ်ဦး၏ မှတ်ဉာဏ်ကို ရယူရန်မှာ အလွန် ခက်ခဲလှပေသည်။

'ဒါတင်မကဘူး... သူတော်စင် နွေဦးကွင်းပြင်က ဒီကို ရောက်လာပြီး သူ့ရဲ့ နွေဦးလေပြည် သင်္ဘောကို ထားခဲ့တယ်ဆိုတာလည်း သူ သိခဲ့တယ်... သင်္ဘောကို စောင့်ကြပ်နေတဲ့ ကပ္ပတိန်က သူတော်စင် နွေဦးကွင်းပြင်ဟာ "အစီအရင် ပညာရှင်" တစ်ယောက်နဲ့အတူ ဒဏ်ရာတွေနဲ့ ထွက်သွားခဲ့တယ်လို့ အရက်မူးပြီး ပြောခဲ့ဖူးတယ်...'

'ထိန်ကျန့်ဝမ်က အဲ့ဒီတုန်းက သားရဲတွေနဲ့ တိုက်ခိုက်လို့ ဖြစ်မယ်လို့ ထင်ခဲ့ပေမဲ့ နောက်ပိုင်းမှ သူ အချက်အလက်တွေကို စုစည်းကြည့်လိုက်တော့ ဂလက်ဆီ တစ်ခုလုံးရဲ့ တစ်နေရာရာမှာ အစီအရင် တစ်ခုကို တည်ဆောက်ထားပြီး ၎င်းက ဂလက်ဆီအလွှာရဲ့ ပုံသဏ္ဌာန်ကို ပြောင်းလဲနေတာ ဖြစ်မယ်လို့ သူ နားလည်သွားခဲ့တယ်'

‘အစီအရင် ဟုတ်လား။ ဘယ်လို အစီအရင်မျိုးက ဂလက်ဆီ တစ်ခုလုံးရဲ့ ပုံသဏ္ဌာန်ကို ပြောင်းလဲနိုင်မှာလဲ... အဲ့ဒါက "လျှို့ဝှက်လောက" အထွတ်အထိပ် ဒါမှမဟုတ် "လျှို့ဝှက်ကောင်းကင်" အဆင့်လောက် ရှိရမယ် မဟုတ်လား...'

သခင်လေးရှန့်သည် ဝေ့ဝူယင်က ဤပြင်းထန်လှသော ဆွဲငင်အားနှင့် အလင်းမဲ့သော နေရာတွင် အကာအကွယ်တစ်ခုအဖြစ် ရပ်တည်ပေးနေသည်ကို အံ့ဩနေမိသည်။ ဝေ့ဝူယင်၏ ခန္ဓာကိုယ်ထဲတွင် တွင်းနက်ကြီးတစ်ခု ရှိနေ၍လော။ ဧရာမ တွင်းနက်ကြီးနှင့် ယှဉ်နိုင်သော အင်အားမျိုးလား။

ဝေ့ဝူယင်က ဆက်ပြောသည်။

'အဲ့ဒါက ထိန်ကျန့်ဝမ်ရဲ့ အတွေးပဲ... အဲ့ဒီ အစီအရင်က ဘာအတွက်လဲဆိုတာ သူ သိချင်ခဲ့တယ်... ဒါပေမဲ့ ထိန်ကျန့်ဝမ်က ပါးနပ်တဲ့သူ ဖြစ်တော့ သူက ဒီကိစ္စကို စုံစမ်းဖို့အတွက် အချိန်မရွေး လှုပ်ရှားနိုင်တဲ့ ကိုယ်ပွားမျိုးစေ့ တစ်ခုကို ချန်ထားခဲ့တယ်...'

'နောက်ပိုင်းမှာ သူက အဲ့ဒီကိုယ်ပွားကို အသုံးပြုပြီး စုံစမ်းခဲ့ပေမဲ့ အဲ့ဒီ အစီအရင်ရဲ့ ရည်ရွယ်ချက်ကိုတော့ သူ မသိခဲ့ရဘူး'

ဝေ့ဝူယင်၏ ငွေရောင် မျက်ဝန်းများမှာ ပိုမို တောက်ပလာသည်။

သခင်လေးရှန့်မှာ တုန်လှုပ်သွား၏။

'ထိန်ကျန့်ဝမ်တောင် မသိခဲ့ဘူး ဟုတ်လား... အဲ့ဒီတော့ သူ့ရဲ့ ကိုယ်ပွားက ဘာဖြစ်သွားလဲ'

'အဲ့ဒီကိုယ်ပွားဟာ တွင်းနက်ထဲကို စုပ်ယူခံရပြီး အသတ်မခံရခင်မှာ ဒီဧရာမတွင်းနက်ကြီးကနေ မိုင်ပေါင်းတစ်သန်းအကွာအဝေးလောက်အထိ ရောက်ခဲ့တယ်... ဒါဟာ ထိန်ကျန့်ဝမ်က သူ့ရဲ့ကိုယ်ပွားကနေတစ်ဆင့် နောက်ဆုံးရရှိခဲ့တဲ့ သတင်းအချက်အလက်ပဲ...'

သခင်လေးရှန့်က ချက်ချင်းတုံ့ပြန်လိုက်သည် ...

'ဒါပေမဲ့ ဘယ်လိုလုပ်ဖြစ်နိုင်မှာလဲ... ထိန်ကျန့်ဝမ်ရဲ့ ကိုယ်ပွားဆိုတာ အနည်းဆုံးတော့ လောကအင်ပါယာ ဒါမှမဟုတ် မူလတရားသူကြီး တစ်ယောက်ရဲ့ အင်အားမျိုး ရှိရမှာလေ။'

ဝေ့ဝူယင်က အတော်ကြာအောင် ပြန်မဖြေခဲ့ပေ။ သခင်လေးရှန့်ကလည်း ထပ်မမေးတော့ဘဲ ဧရာမတွင်းနက်ကြီးထဲမှာ ရှိနေပြီး မသေဆုံးဘဲ ရှင်သန်နေရသည့် ဤအတွေ့အကြုံသစ်ကို တခြားသူများကို ပြန်ပြောပြဖို့ စိတ်ကူးယဉ်နေမိသည်။ သူက ဤအခြေအနေကို အရသာခံချင်နေသည်။ သူ ဝိုင်အိတ်ကို မော့သောက်ရင်း ဝေ့ဝူယင်က တွင်းနက်ကြီးထဲတွင် ဆွဲငင်အားနှင့် အလင်းရောင်ကို ဘယ်လိုများ ထိန်းချုပ်ထားသလဲဆိုတာ သူသိချင်နေမိသည်။

သခင်လေးရှန့် မသိလိုက်သည့် အရာကား... ဝေ့ဝူယင်သည် တွင်းနက်ဗဟိုချက်တွင် ရှင်သန်နေရုံသာမက၊ ‘မြေဆွဲအား အရင်းအမြစ် ကြယ်တာရာကပ်ဘေး' အတွင်း သူကိုယ်တိုင်က တွင်းနက်တစ်ခု ဖြစ်လာခဲ့ခြင်းပင်။

***