ဒါကိုပဲ သင်ခဲ့ တာလား

ပင်လယ်လှိုင်းလုံးကြီးများအလား ကျယ်လောင်လှသော အားပေးသံများနှင့်အတူ အင်မော်တယ်နန်းတော် တပည့်တစ်ဦးမှာ အလွယ်တကူပင် အနိုင်ရရှိသွားပြီး စင်မြင့်ပေါ်မှ ဆင်းလာခဲ့၏။

ပတ်ဝန်းကျင်ရှိ တပည့်များမှာ ဝမ်းသာအားရ ဟစ်အော်နေကြပြီး အခြားဂိုဏ်းအသီးသီးမှ လူများမှာမူ အံ့အားသင့်မှုကို မျက်နှာပေါ်တွင် အထင်အရှား ဖော်ပြနေကြပေသည်။

"တကယ်ကို... မယုံနိုင်စရာပဲ"

"အသက် ၂၃ နှစ်နဲ့ ဆန်းကြယ် အင်မော်တယ် အထွတ်အထိပ် အဆင့် ဆိုတာ ငါတို့ဂိုဏ်းမှာဆိုရင် စီမံသူ ကြီးအကဲ တစ်ယောက် ဖြစ်ဖို့တောင် လုံလောက်နေပြီ။"

"ဒါပေမဲ့ အင်မော်တယ်နန်းတော်မှာတော့ ထိပ်တန်း တပည့် တစ်ရာစာရင်းထဲက လူငယ်ပါရမီရှင် တစ်ယောက်ပဲ ရှိသေးတာလား၊ ဒါက တကယ်ကို... တုန်လှုပ်စရာပဲ"

လူတစ်ဦးက တအံ့တသြ ပြောလိုက်၏။

ဂိုဏ်းအများစုအတွက်မူ နေလအင်မော်တယ်နန်းတော်မှာ အဝေးက ကောင်းကင်ပေါ်ရှိ နတ်နန်းတော်ကြီးကဲ့သို့ပင် မော့ကြည့်ရုံသာ တတ်နိုင်ပြီး ကိုးကွယ်ဆည်းကပ်ရမည့် အရာတစ်ခု ဖြစ်ပေသည်။

သို့သော်လည်း အချို့မှာ တုန်လှုပ်နေရင်းမှ တစ်စုံတစ်ခုကို စဉ်းစားမိကြပြန်၏။

"အဲဒီ သတင်းကြီးနေတဲ့ ထျန်းဖူနန်းတော်ကရော ဒီလောက်အထိ အင်အားကြီးမှာလား"

ခဏအကြာတွင် နောက်တစ်ဦးက ပြောသည်။ "မတိမ်းမယိမ်းလောက်ပဲ ဖြစ်မှာပါ"

"ထျန်းဖူနန်းတော် တည်ထောင်တာက အင်မော်တယ်နန်းတော်လောက် မကြာသေးပေမဲ့ ဖွံ့ဖြိုးတိုးတက်မှုကတော့ အရမ်း မြန်တယ်။ နှစ်ပေါင်း ထောင်ဂဏန်းအတွင်းမှာပဲ ဒီကမ္ဘာရဲ့ နယ်မြေ အတော်များများကို သိမ်းပိုက်နိုင်ခဲ့ပြီး အင်မော်တယ်နန်းတော်ရဲ့ နယ်မြေတွေကိုတောင် အများကြီး လုယူနိုင်ခဲ့တာပဲ။"

"အဲဒီ သတင်းတွေသာ အမှန်ဆိုရင် ထျန်းဖူနန်းတော်က အင်မော်တယ်နန်းတော်ထက်တောင် ပိုပြီး အင်အားကြီးနိုင်တယ်"

တတိယမြောက် လူတစ်ဦးကလည်း ထိုစကားဝိုင်းထဲသို့ ဝင်လာကာ ပြော၏။ "ထျန်းဖူနန်းတော်က အင်မော်တယ်နန်းတော်ထက် ပိုသန်မာတာတော့ အသေအချာပဲ၊ မဟုတ်ရင် အင်မော်တယ်နန်းတော်က အခြား အင်အားကြီး နယ်မြေတစ်ခု ပေါ်ထွန်းလာတာကို ဘယ်လိုလုပ် လက်ခံမှာလဲ"

"မင်းတို့ မသိသေးဘူး၊ အခုဆိုရင် အင်အားစု တော်တော်များများက ထျန်းဖူနန်းတော်ဆီ ခိုလှုံဖို့ စိတ်ကူးနေကြပြီ၊ အင်မော်တယ်နန်းတော်က အတင်း ဖိနှိပ်ထားလို့သာပဲ။"

"အင်မော်တယ်နန်းတော် အတွင်းပိုင်းမှာတောင်မှ ကွဲပြားတဲ့ အသံတွေက အတော်လေး ကျယ်လောင်နေတာ"

ဤကဲ့သို့သော လျှို့ဝှက်ချက်များကို ပြောဆိုလာသောအခါ လူအများ၏ အာရုံစိုက်မှုကို ရရှိသွားတော့၏။

သို့သော် ခုနက စကားပြောသောလူမှာ ဘေးဒုက္ခ ရောက်မည်ကို စိုးရိမ်သဖြင့် ဆက်မပြောတော့ဘဲ နှုတ်ဆိတ်သွားခဲ့သည်။

ထို့နောက် တစ်ဦးက ပြုံး လျက် ပြောသည်။ "ဘယ်သူက ပိုသန်မာလဲဆိုတာ လက်တွေ့ တိုက်ခိုက်ကြည့်မှပဲ အမှန် သိရမှာပါ။"

"တကယ်လို့ ထျန်းဖူနန်းတော်က တပည့်တွေသာ ဒီပွဲကို လာတိုက်မယ်ဆိုရင် လူတိုင်း သိကြရမှာပေါ့"

အခြားသူများကလည်း ခေါင်းညိတ် ထောက်ခံကြ၏။

ထိုစကားပင် မဆုံးသေးမီမှာပင် ချစ်ကြည်ရေးပွဲကို စီစဉ်သူက နောက်ထပ် စင်မြင့်သခင် ကို ကျယ်လောင်စွာ ကြေညာလိုက်တော့သည်။

"တိမ်တိုက် ထျန်းဖူနန်းတော်ကနေ လာတဲ့ ပါရမီရှင် တပည့် ဖန်ကျဲ့ ကို နွေးထွေးစွာ ကြိုဆိုလိုက်ကြပါဦး"

လူတိုင်းမှာ ချက်ချင်းပင် ကြောင်အမ်းသွားကြ၏။ တကယ်ပဲ ရောက်လာတာလား

လူတိုင်းမှာ မတ်မတ်ထိုင်လိုက်ကြပြီး ထျန်းဖူနန်းတော်မှ တပည့်မှာ မည်မျှအထိ ခန့်ညားထည်ဝါသော အရှိန်အဝါ ရှိမလဲဆိုသည်ကို ကိုယ်တိုင် မြင်တွေ့ချင်နေကြပေသည်။

ထိုစဉ် ဖန်ကျဲ့မှာ လူတိုင်း၏ အကြည့်များအောက်တွင် အသက်ကို ပြင်းပြင်းရှူလိုက်ပြီး စင်မြင့်ပေါ်သို့ ပျံသန်း တက်လာခဲ့၏။

စစ်ဆေးမှုများ ပြုလုပ်ပြီးနောက် သူ၏ အရိုးသက်တမ်းနှင့် အချက်အလက်များကို လူတိုင်း သိသွားကြသည်။

"ဖန်ကျဲ့၊ ထျန်းဖူနန်းတော်ရဲ့ နံပါတ် ၁၀ ပါရမီရှင်၊ အသက် ၂၀ ၊ ရွှေအင်မော်တယ် အစောပိုင်း အဆင့် ကျင့်ကြံမှု"

ထိုသတင်းကို ကြားသောအခါ လူတိုင်းမှာ ဆွံ့အသွားကြတော့၏။

"ဘုရားရေ... အသက် ၂၀ နဲ့ ရွှေအင်မော်တယ် အဆင့်တဲ့လား၊ ဒါက ထျန်းဖူနန်းတော်ရဲ့ စွမ်းရည်ပဲလား"

"နံပါတ် ၁၀ ဆိုတာက ဘာကို ဆိုလိုတာလဲ၊ ထျန်းဖူနန်းတော် လူငယ်မျိုးဆက်ထဲမှာ အဆင့် ၁၀ လို့ ပြောတာလား၊ ဒါဆိုရင် အင်မော်တယ်နန်းတော်နဲ့ အတူတူလောက်ပဲပေါ့"

"မဟုတ်ဘူး... မဟုတ်ဘူး... ငါ့မှာ အတွင်းသတင်း ရှိတယ်၊ ထျန်းဖူနန်းတော်က ဒီပွဲကို တပည့် ဆယ်ယောက်ပဲ ခေါ်လာတာ၊ နံပါတ် ၁၀ ဆိုတာက အဲဒီ ဆယ်ယောက်ထဲမှာ အားအနည်းဆုံးလို့ ဆိုလိုတာ ဖြစ်မှာ။"

"ဟူး~~ ဒါဆိုရင်တော့ ဂိုဏ်းတစ်ခုလုံးရဲ့ နံပါတ် ၁၀ တော့ မဟုတ်နိုင်ဘူး၊ ဘယ်ဂိုဏ်းကမှ သူတို့ရဲ့ အတော်ဆုံး တပည့် ဆယ်ယောက်လုံးကို အပြင် ခေါ်မထုတ်လာဘူးလေ"

လူတိုင်းက တအံ့တသြ ပြော နေကြ၏။

အသက် ၂၀ အရွယ် ရွှေအင်မော်တယ် ဆိုသည်မှာ သူတို့အတွက် မယုံနိုင်စရာ ဖြစ်တည်မှုတစ်ခုပင်။

သို့သော်လည်း အချို့မှာမူ ထိုသို့ မထင်ကြပေ။

"ရွှေအင်မော်တယ် အစောပိုင်းအဆင့်လေးတင်ကို မင်းတို့က ကြောက်နေကြတာလား၊ အသုံးမကျတဲ့ လူတွေ။"

"ဒီလို ကလေးလေးကို အနိုင်ယူဖို့ အင်မော်တယ်နန်းတော် ထွက်လာစရာတောင် မလိုဘူး၊ ငါတို့ တျန်းတဂိုဏ်း ကပဲ ဖြေရှင်းပေးမယ်"

"ကွမ်းရွှမ် ကို သွားခိုင်းလိုက်"

ပြောပြီးနောက် သူက သူ၏ ဂိုဏ်းအတွင်းမှ ထိပ်တန်း ပါရမီရှင် တစ်ဦးကို စေလွှတ်လိုက်၏။

သူသည်လည်း ရွှေအင်မော်တယ် အစောပိုင်းအဆင့်ပင် ဖြစ်သည်။

အသက် ၂၅ နှစ် ရှိပြီ ဖြစ်သော်လည်း အသက်ကြီးခြင်းက ပို၍ တည်ငြိမ်မှု ရှိစေသဖြင့် ကြည့်ရသည်မှာ အတော်လေး အားကိုးရပုံပေါ်၏။

အပေါ် တွင် ထိုင်နေသော ထန်ထျန်းကမူ မေးစေ့ကို ပွတ်လိုက်မိသည်။

ဤတျန်းတဂိုဏ်းမှာ အသားစားရမှာ ကြောက်နေသလား မသိပေ၊ နံပါတ် ၁၀ နှင့် တိုက်ခိုက်ရမည့် အခွင့်အရေးကို အရယူရန် ဤမျှအထိ လောနေခြင်း ဖြစ်၏။

ကံမကောင်းစွာပင် သူ၏ အတွေးမှာ မှန်သော်လည်း အခြေအနေက လွဲချော်နေပေသည်။

ဖန်ကျဲ့မှာ ကျင့်ကြံမှု အဆင့်တူသော ထန်ထျန်း၏ လက်ထဲတွင် စက္ကန့်ပိုင်းအတွင်း ရှုံးနိမ့်ခဲ့သော်လည်း တျန်းတဂိုဏ်းကဲ့သို့သော အဆင့်အတန်းမျိုးက လာရောက် ယှဉ်ပြိုင်နိုင်သည့် အခြေအနေ မဟုတ်ပေ။

မကြာမီ စင်မြင့်ပေါ်ရှိ လူနှစ်ဦးမှာ တစ်ဦးနှင့်တစ်ဦး မျက်နှာချင်းဆိုင်လိုက်ကြ၏။

"မင်းက တျန်းတဂိုဏ်းကလား"

ဖန်ကျဲ့က တည်ငြိမ်စွာ မေးလိုက်သည်။

ကွမ်းရွှမ်က အနည်းငယ် ကြောင်သွားပြီးနောက် အေးစက်စွာ ပြန်ဖြေ၏။ "မှန်တယ်"

"သေချာ မှတ်ထားလိုက်ဦး၊ မင်းကို အနိုင်ယူမယ့်သူက တျန်းတဂိုဏ်းက ကွမ်းရွှမ် ပဲ"

ဖန်ကျဲ့က အသာအယာ ခေါင်းညိတ်ပြပြီး သူ၏ မျက်နှာပေါ်တွင် မည်သည့် ခံစားချက်မျှ မရှိပေ။

စင်မြင့်စီစဉ်သူ၏ အမိန့်ပေးသံနှင့်အတူ တိုက်ပွဲမှာ တရားဝင် စတင်ခဲ့ပြီ ဖြစ်၏။

ကွမ်းရွှမ်က ချက်ချင်းပင် ကောင်းကင်သို့ ပျံတက်သွားပြီး သစ်ထုတ်တ်ယူလိုသား အင်မော်တယ် လက်နက် တစ်ခုကို ထုတ်ယူလိုက်သည်။

ထိုလက်နက်မှာ ကြည့်ရသည်မှာ ထူးဆန်းသော်လည်း အော်ရာ မှာ ပြင်းထန်လှပြီး အဆင့်မြင့် အလယ်အလတ်အဆင့် အင်မော်တယ် လက်နက် တစ်ခုပင် ဖြစ်၏။

ထို့နောက် သူက ကျင့်စဉ်ကို လျင်မြန်စွာ အသုံးပြုလိုက်ရာ အဝါရောင် အလင်းလွှာများမှာ ဖန်ကျဲ့ထံသို့ ဆက်တိုက် တိုးဝင်သွားတော့သည်။

ကြည့်ရှုသူများမှာလည်း ရင်တထိတ်ထိတ်ဖြင့် ကြည့်နေကြ၏၊ အစကတည်းက အစွမ်းကုန် ထုတ်သုံးလိုက်ပုံရပေသည်။

တျန်းတဂိုဏ်းမှ လူများမှာမူ လက်သီးကို တင်းတင်းဆုပ်လျက် စိုးရိမ်တကြီး ကြည့်နေကြ၏။

သူတို့မှာ ထျန်းဖူနန်းတော် တပည့် ဖန်ကျဲ့ကို ကွမ်းရွှမ်က အပြတ်အသတ် ဖိနှိပ်ထားနိုင်လိမ့်မည်ဟု မျှော်လင့်နေကြသည်။

သို့သော်လည်း လောကကြီးမှာ သူတို့ မျှော်လင့်သလို ဖြစ်မလာခဲ့ပေ။

အလင်းလွှာများ နီးကပ်လာသော်လည်း ဖန်ကျဲ့၏ မျက်နှာမှာ ပြောင်းလဲခြင်း မရှိပေ။

အလင်းလွှာများ ရောက်လာခါနီးတွင် သူက ရုတ်တရက် ခေါင်းမော့လိုက်ရာ မျက်လုံးများအတွင်းမှ ရွှေရောင်အလင်းများ တောက်ပလာပြီး ပြင်းထန်သော အလင်းတန်း နှစ်ခုမှာ ကောင်းကင်ပေါ်ရှိ ကွမ်းရွှမ်ထံသို့ တိုက်ရိုက် ပစ်ဝင်သွားတော့၏။

ကြောက်မက်ဖွယ် အော်ရာ များမှာ စင်မြင့်တစ်ခုလုံးကို လွှမ်းမိုးသွားသည်။

ပြင်းထန်လှသည်ဟု ထင်ရသော အလင်းလွှာများမှာ ရွှေရောင်အလင်းတန်းများ၏ အရှေ့တွင် အလွယ်တကူပင် ပေါက်ထွက်သွားပြီး ဖန်ကျဲ့၏ အော်ရာ ကြောင့်ပင် တစ်စစီ ဖြစ်သွားကာ အမှုန် အဖြစ် ပြောင်းလဲသွားတော့၏။

နောက်တစ်စက္ကန့်တွင် ရွှေရောင်အလင်းတန်း နှစ်ခုမှာ ကွမ်းရွှမ်၏ ရှေ့သို့ ရောက်ရှိသွားပြီး သူ၏ ခုခံမှု အားလုံးကို ဖျက်ဆီးကာ ခန္ဓာကိုယ်ပေါ်သို့ ကျရောက်သွားခဲ့သည်။

ကွမ်းရွှမ်မှာ အော်ဟစ်သံနှင့်အတူ ကောင်းကင်ပေါ်မှ ပြုတ်ကျလာတော့၏။

မြေပြင်ပေါ်သို့ ရောက်ချိန်တွင်မူ သူ၏ ခန္ဓာကိုယ် တစ်ခုလုံးမှာ မည်းတူးနေပြီး မူလပုံစံပင် မပေါ်တော့ပေ။

ဤအရာအားလုံးကို လုပ်ဆောင်ခဲ့သော ဖန်ကျဲ့မှာမူ မည်သည့် ခံစားချက်မျှ မရှိဘဲ မူလနေရာတွင် တည်ငြိမ်စွာ ရပ်နေခဲ့သည်။ သူက ခြေတစ်လှမ်းပင် မရွေ့ခဲ့ပေ။

တိုက်ကွက် တစ်ကွက်တည်း။

ချက်ချင်း အနိုင်ယူခြင်း

လူတိုင်းမှာ ချက်ချင်းပင် ဆွံ့အသွားကြတော့၏။

ဒါက ထျန်းဖူနန်းတော်ရဲ့ နံပါတ် ၁၀ တပည့်လား

သူတို့မှာ ပါးစပ်အဟောင်းသားနှင့် ကြောင်အမ်းနေကြပေသည်။

အပေါ် တွင် ထိုင်နေသော ထျန်းဖူနန်းတော်မှ လူများမှာမူ အနည်းငယ် ပြုံးလိုက်ကြ၏။

ထန်ထျန်းက မေးစေ့ကို ပွတ်ရင်း "တော်တော် မိုက်တာပဲ" ဟု တိုးတိုးလေး ရေရွတ်လိုက်သည်။

"ဒါက ခန္ဓာ တစ်ခုကနေ ပါလာတဲ့ စွမ်းရည် မဟုတ်လား"

"အရင်က သူ ငါနဲ့ တိုက်တုန်းကတော့ ဒါမျိုး ထုတ်သုံးတာ မတွေ့မိပါဘူး"

ဘေးရှိ မိုရှုက သူ့ကို တစ်ချက် စောင်းကြည့်ကာ ပြော၏။ "ရှင်က သူ့ကို အခွင့်အရေးမှ မပေးတာ၊ သူ ဘယ်လိုလုပ် ထုတ်သုံးနိုင်မှာလဲ"

"ဒါပေမဲ့ ပြောရဦးမယ်၊ အဲဒီတိုက်ပွဲက ဖန်ကျဲ့အတွက် အကျိုးအမြတ် အများကြီး ရစေခဲ့တာ။ "

"သူ ပြန်ရောက်သွားတော့ ရှင်နဲ့ တိုက်ခဲ့တဲ့ ပုံရိပ်တွေကို သေချာ ပြန်လေ့လာခဲ့တယ်။"

"ပြီးတော့ ရှင့်ဆီကနေ တိုက်ခိုက်တဲ့ စတိုင် တွေကို အများကြီး သင်ယူခဲ့တယ်လေ"

ထန်ထျန်းမှာ အံ့အားသင့်သွားကာ "တိုက်ခိုက်တဲ့ စတိုင် ဟုတ်လား" ဟု ပြန်မေးမိ၏။ သူက လက်ကို နောက်ပစ်ထားပြီး အေးစက်သော အကြည့်ဖြင့် တည်ငြိမ်စွာ ရပ်နေသော ဖန်ကျဲ့ကို ကြည့်လိုက်သည်။

ငါက ပုံမှန်ဆိုရင် ဒီလိုပုံစံမျိုးကြီးလား

နေပါဦး...

မင်းက ငါ့ဆီကနေ ဒါကိုပဲ သင်ယူခဲ့တာလား