နောက်ခါ တိုက်ရိုက်ပြော ၄

နန်ဟုန်သားခုနစ်ယောက်၏ နယ်မြေအတွင်း၌ ဤမျှအထိ ရဲတင်းစွာပြုမူရဲခြင်းမှာ နက်ရှိုင်းသော ရန်ငြိုးရှိခြင်း သို့မဟုတ် အလွန်တရာအင်အားကြီးမားခြင်းကြောင့်ဖြစ်ပေလိမ့်မည်။

မည်သို့သောဒုက္ခမျိုးဖြစ်စေကာမူ ၎င်းမှာ ရွှေယွဲ့ ကုန်သွယ်ရေးမဟာမိတ်အဖွဲ့က တောင့်ခံပေးရမည့် အရာမျိုးမဟုတ်ပေ။

"ကျွန်တော် သူ့ကို သိတယ်။"

ရှန်းယီသည် ခေါင်းညိတ်ပြပြီး ကျွန်းမျော၏ အစွန်းဘက်သို့ လျှောက်လှမ်းသွား၏။ နန်ယန်ဂိုဏ်းမှ အထောက်တော်အချို့မှာ ခဏတာ မှင်တက်သွားပြီးနောက် တစ်ယောက်တစ်ပေါက် ပြောဆိုလာကြသည်။

"စီနီယာရှန်း... စိတ်မမြန်ပါနဲ့ဦး"

သူတို့မှာ လောကအတွေ့အကြုံ မရှိသော လူသစ်များ မဟုတ်ကြပေ။ ဝမ်ချိုးကျင်းကဲ့သို့ အသေးစိတ် မတွေးနိုင်သော်လည်း အခြေအနေအချို့ကိုတော့ သူတို့ ခန့်မှန်းနိုင်ကြသည်။

ကျွန်းပေါ်၌ အကာအကွယ် အစီအရင်ရှိနေသရွေ့ အကောင်းဆုံးရွေးချယ်မှုမှာ ဂိုဏ်းထံမှ အကူအညီတောင်းခံရန်သာ ဖြစ်၏။ ခဏတာ ဒေါသကြောင့် ထွက်တိုက်ရန် လုံးဝမလိုအပ်ပေ။

အကယ်၍ နဂါးနန်းတော်ကိုယ်တိုင် ရောက်လာလျှင်ပင် နန်ယန်ဂိုဏ်း၏ မျက်နှာကို ထောက်ထားရမည် မဟုတ်ပါလား။

"စီနီယာရှန်း"

ဝမ်ချိုးကျင်းသည် ရှန်းယီကို မသေမျိုးအရှင်ဟု အမြဲခေါ်ဝေါ်ခဲ့ရာ ယခုမှပင် စာထဲ၌ ပါရှိသော ရှန်းယီဆိုသူမှာ မိမိရှေ့မှ လူငယ်ဖြစ်ကြောင်း သိရှိသွား၏။ သို့ဆိုလျှင် တစ်ဖက်လူမှာ သတင်းများကို ဖုံးကွယ်ပြီး ဤနေရာသို့ ခိုလှုံရန် ရောက်လာခြင်းလော။

သူမသည် ဒေါသကို ထိန်းချုပ်ကာ တည်ငြိမ်မှုကို ပြန်လည် တည်ဆောက်လိုက်ရင်း ဆိုလိုက်သည်။

"ခုနက ကျွန်မ စကားပြောတာ နည်းနည်းပြင်းသွားတယ်။ နန်ဟုန်သားခုနစ်ယောက်ကို အကူအညီတောင်းဖို့ အကြောင်းကြားလိုက်ပါ။ ရွှေယွဲ့မဟာမိတ်အဖွဲ့ရဲ့ အစီအရင်ကတော့ ခဏတဖြုတ် တောင့်ခံနိုင်ပါသေးတယ်။ သူတို့သာ ဖောက်နိုင်ရင် အပြင်ကနေ ဒီလို အော်ဟစ်နေမှာ မဟုတ်ဘူး။"

သို့သော် ကူညီမည့်သူ မရှိပေ။ သစ်တုံးကြီးကဲ့သို့ ကျင့်ကြံနေသော ထိုတစ်ဦးမှလွဲ၍ နန်ယန်ဂိုဏ်း၏ အင်အားအကောင်းဆုံးသူများမှာ ဤနေရာသို့ ရောက်ရှိနေကြပြီ ဖြစ်၏။

လူအများ၏ ခြံရံမှုဖြင့် ရှန်းယီသည် ရှစ်ထောင့်မျှော်စင်မှအေးအေးလူလူ ထွက်ခွာလာခဲ့သည်။ ကျွန်းမျော၏ အစွန်းသို့ ရောက်သောအခါ သူသည် အောက်ဘက်ရှိ လှိုင်းတံပိုးများကို ငုံ့ကြည့်လိုက်၏။

နန်ယန်၏ ရတနာနယ်မြေမှ ထွက်ခွာလာပြီးနောက် အကယ်၍ မရှင်းရသေးသော ရန်ငြိုးဟောင်း ရှိနေသည်ဆိုပါက ၎င်းမှာ အင်အားစုတစ်ခုတည်းသာ ဖြစ်နိုင်ပေသည်။ သို့သော် တစ်ဖက်လူက သတင်းအချက်အလက်များကို မည်သည့်နေရာမှ ရရှိသနည်းဆိုသည်မှာ စိတ်ဝင်စားစရာ ကောင်းလှ၏။

ရှန်းယီ ပေါ်လာသည်နှင့် ဝမ်ချိုးကျင်းသည်လည်း အနောက်မှ ကပ်လျက် လိုက်ပါလာပြီး ကျယ်ပြောလှသော သမုဒ္ဒရာကြီးကို လှမ်းကြည့်လိုက်သည်။ တစ်စုံတစ်ခုကို အာရုံခံမိသကဲ့သို့ သူမ၏ မျက်နှာထားမှာ ရုတ်တရက် ပြောင်းလဲသွားပြီး သက်တော်စောင့်များကို အချက်ပေးရန် ကျောက်စိမ်းပြားကို အသုံးပြုလိုက်၏။

နောက်တစ်စက္ကန့်တွင် ထူထဲလှသော အလင်းတံတိုင်းကြီးက ကျွန်းမျောတစ်ခုလုံးကို လွှမ်းခြုံသွားလေသည်။

လူရိပ်ခြောက်ခုသည် တစ်ပြိုင်နက် ပေါ်လာပြီး ကျွန်းမျောအထက်၌ လေးနက်သော မျက်နှာထားများဖြင့် ရပ်တန့်နေကြသည်။

ထိုအချိန်မှာပင် ရေပြင်ထက်၌ ကြီးမားသော လှိုင်းလုံးကြီးများ ထလာပြီး လှိုင်းထိပ်များ လျော့ကျသွားချိန်တွင် လူရိပ်တစ်ဆယ့်နှစ်ခု တိတ်ဆိတ်စွာ ပေါ်ထွက်လာ၏။ အားလုံးမှာ သံချပ်ကာများ ဝတ်ဆင်ထားပြီး ဓားချက်၊ လှံချက် ဒဏ်ရာများဖြင့် ပြည့်နှက်နေကာ မည်သူမည်ဝါဖြစ်ကြောင်း သက်သေပြနိုင်သည့် အရာတစ်ခုမျှ မပါရှိပေ။

သာမန် ရေနေမျိုးနွယ်စုများနှင့် မတူသည်မှာ သူတို့သည် အင်အားပြရန်အတွက် ပုစွန်စစ်သည် သို့မဟုတ် ဂဏန်းစစ်သူကြီး တစ်ဦးတစ်ယောက်မျှ ခေါ်ဆောင်မလာခြင်း ဖြစ်၏။ သူတို့၏ မျက်လုံးများထဲတွင် သတ်ဖြတ်လိုစိတ်များသာ ကိန်းအောင်းနေသည်။

အားနည်းဆုံးသူပင်လျှင် ဟင်းလင်းပြင်လျှောက်လှမ်းခြင်းအဆင့် ၆ တွင် ရှိနေပြီး ၎င်းတို့မှာ အဖွဲ့၏ တစ်ဝက်ခန့် ရှိသည်။ ကျန်ရှိသူများမှာ ဟင်းလင်းပြင်လျှောက်လှမ်းခြင်းအဆင့် ၇ ရှိ ရေနေမျိုးနွယ်စုမှ နတ်ဆိုးကြီးများ ဖြစ်ကြ၏။

ဦးခေါင်းတွင် ချိုပါသော ငါးနတ်ဆိုးတစ်ကောင်သည် ကျင့်ကြံသူတစ်ဦး၏လည်ပင်းကို အေးစက်စွာ ကိုင်မြှောက်ထားရင်း လှိုင်းတံပိုးများထက်တွင် ရပ်လျက် လူတိုင်းကိုရင်ဆိုင်လိုက်သည်။

"ရှန်းယီကို အပ်လိုက်စမ်း။ ဒါဆို ဒီကောင် အသက်ရှင်မယ်။"

"..."

ဝမ်ချိုးကျင်းသည် တည်ငြိမ်သူအဖြစ် ကျော်ကြားသော်လည်း ယခုအခါတွင်မူ သူမ၏ လက်ချောင်းများကိုအသံထွက်သည်အထိ တင်းတင်းဆုပ်ထားမိသည်။ နန်ဟုန်သားခုနစ်ယောက်၏ လက်အောက်ခံအဖြစ် သူမသည် ဤကဲ့သို့သော အရှက်ခွဲမှုကို မည်သည့်အခါကမှ မခံစားခဲ့ဖူးပေ။

သို့သော် သူမအနေဖြင့် မသေမျိုးဂိုဏ်းမှ ကျင့်ကြံသူကို အပြင်သို့ တွန်းမထုတ်ရဲပေ။ အကယ်၍ ထိုသို့သော သစ္စာဖောက်မှုမျိုး ပြုလုပ်မိပါက ရွှေယွဲ့ ကုန်သွယ်ရေး မဟာမိတ်အဖွဲ့မှာ အမှန်တကယ်ပင် ပျက်စီးသွားပေလိမ့်မည်။

"စီနီယာရှန်း... ပြန်လာပါဦး။ နောက်မှ ထပ်ဆွေးနွေးကြတာပေါ့။"

သူမသည် အသက်ကို ပြင်းပြင်းရှူလိုက်၏။ သူမ၏ အသံမှာ အေးစက်နေပြီး မဟာမိတ်ခေါင်းဆောင်ကို ကောင်းစွာသိသောသူများကမူ သူမသည် သည်းခံနိုင်စွမ်း၏ အဆုံးစွန်သို့ ရောက်နေပြီဖြစ်ကြောင်း သိနိုင်ကြပေသည်။

သူမ စကားမဆုံးမီမှာပင်ရုတ်တရက် ပြင်းထန်လှသော သားရဲဟိန်းသံကြီး ထွက်ပေါ်လာသည်။ ပင်လယ်ပြင်ထက်၌ ကြီးမားလှသော အရိပ်မည်းကြီးတစ်ခု ရုတ်တရက် ပေါ်လာပြီး ကောင်းကင်ယံမှနေ၍သမုဒ္ဒရာအတွင်းသို့ အရှိန်အဟုန်ဖြင့် ထိုးဆင်းသွားရာ မီတာများစွာ မြင့်သော လှိုင်းလုံးကြီးများ ထလာတော့သည်။

စောစောက စကားပြောခဲ့သော ငါးနတ်ဆိုးမှာ အရိပ်အယောင်ပင် မကျန်တော့ဘဲ ပျောက်ကွယ်သွား၏။

"..."

ကျန်ရှိနေသော ရေနေသတ္တဝါများမှာ ဘာဖြစ်သွားမှန်း မသိသေးမီမှာပင်အရိပ်တစ်ခုသည် ကောင်းကင်ကို ဖြတ်ကျော်လျက် ကျွန်းမျောပေါ်သို့ ကျဆင်းလာသည်ကို မြင်လိုက်ကြရသည်။ ထိုအခိုက်အတန့်တွင် လှိုင်းတံပိုးများမှာ ထပ်မံ ဆူပွက်လာပြီး အောက်ခြေမှနေ၍ အသက်ရှူရကျပ်စေသော ဖိအားကြီးတစ်ခု ပေါက်ကွဲထွက်လာ၏။

ခိုင်မာထွားကျိုင်းပြီး ခန့်ညားလှသော ပုံရိပ်တစ်ခုသည်ရေထဲမှ ဖြည်းညှင်းစွာ ထွက်ပေါ်လာသည်။ သူ၏ ခန္ဓာကိုယ်မှာ ကျောက်စိမ်းကဲ့သို့ တောက်ပနေ၏။

၎င်းမှာ ကြောက်မက်ဖွယ်ကောင်းသော ကျောက်စိမ်းကြံ့နတ်ဆိုးတစ်ကောင် ဖြစ်သည်။ ၎င်းသည် ရက်စက်သော အပြုံးကို ပြုံးလျက် ငါးနတ်ဆိုး၏ လည်ပင်းကို တင်းတင်းဆုပ်ကိုင်ထား၏။

သေခါနီး ငါးနတ်ဆိုး၏ သံချပ်ကာမှာ ကြေမွပျက်စီးနေပြီး ခြေလက်များကို အတင်းအယိမ်းအနွဲ့ပြုလုပ်နေသော်လည်း ကျောက်စိမ်းလက်ဖဝါး၏ ချုပ်ကိုင်မှုအောက်မှ ရုန်းထွက်နိုင်ခြင်း မရှိပေ။

နတ်ဆိုးမူလစွမ်းအင်များ စီးဆင်းပြီး နှစ်ပေါင်းနှစ်သိန်းကျော်ကြာ ညှဉ်းပန်းနှိပ်စက်မှုကို ခံယူထားရသော ၎င်းသည် လောကသို့ ပထမဆုံးအကြိမ် ပေါ်ထွက်လာခြင်း ဖြစ်၏။ ကျောက်စိမ်းကြံ့နတ်ဆိုးသည် မိမိရှေ့မှ နတ်ဆိုးအုပ်စုကို မထီမဲ့မြင် ကြည့်လိုက်သည်။

သခင်ဖြစ်သူ၏စေခိုင်းမှုကို ရရှိပြီးနောက် ၎င်းသည် အေးစက်လှသောသွားကြီးများကို ဖြဲပြလျက်လက်ကို အင်အားသုံး၍ ညှစ်ချလိုက်ရာ ငါးနတ်ဆိုး၏ ဦးခေါင်းမှာ သွေးညှော်နံ့များနှင့်အတူ ကြေမွသွားလေတော့သည်။

ဟင်းလင်းပြင်လျှောက်လှမ်းခြင်းအဆင့် ၈ နှင့် ညီမျှသောပြင်းထန်သည့် အရှိန်အဝါကြောင့် ပတ်ဝန်းကျင်တစ်ခုလုံးမှာ တိတ်ဆိတ်သွားပြီး သေခြင်းတရားကဲ့သို့ အေးစက်သွား၏။

"နောက်တစ်ခါ ဒီလိုမျိုး ထပ်ဖြစ်ရင်..."

ရှန်းယီသည် ဝမ်ချိုးကျင်းဘက်သို့ လှည့်ကြည့်ကာ အေးစက်စွာ ပြောလိုက်သည်။

"...တိုက်ရိုက်သာ ပြောလိုက်ပါ။"

လူတစ်ယောက်ကို ကယ်တင်ရန်မှာ အမြဲတမ်း ဤမျှကံကောင်းလိမ့်မည် မဟုတ်ပေ။

"သူတို့... သူတို့က..."

ဝမ်ချိုးကျင်းမှာ အံ့အားသင့်သွားပြီး မိမိ နားလည်မှုလွဲနေသလားဟု တွေးတောမိသည်။ ဤသည်မှာ မသေမျိုးအရှင်၏ တမင်လုပ်ဆောင်မှု မဟုတ်ဘဲ တိုက်ဆိုင်မှုသက်သက်သာလော။ ထို့အတူ ဤကြံ့နတ်ဆိုးက အဘယ်ကြောင့် မသေမျိုးဂိုဏ်းအတွက် တိုက်ခိုက်ပေးနေရသနည်း။

မဟုတ်သေးပေ။ ဝမ်ချိုးကျင်းသည် သေချာကြည့်လိုက်ရာ တစ်ခုခုထူးဆန်းနေသည်ကို သတိပြုမိသွား၏။ ဤသည်မှာ သာမန်နတ်ဆိုး မဟုတ်ပေ။

၎င်းမှာ အားကောင်းလှသော စိတ်ဝိညာဉ်ရုပ်သေး တစ်ရုပ်သာ ဖြစ်ပြီး ၎င်း၏အသက်ဝင်နေမှုနှင့် အဆင့်မှာ ရုပ်သေးဂိုဏ်းပင် ယှဉ်နိုင်ခြင်း မရှိပေ။ ၎င်းသည် သက်ရှိသတ္တဝါနှင့် ခွဲခြား၍မရလောက်အောင်ပင် တူညီလှသည်။ မိုးမြေ၏ ဖန်တီးမှုကိုပင် အတုခိုးယူနိုင်သော မည်သို့သော လက်ရာမျိုးပါနည်း။

"..."

ရှန်းယီသည် သူ၏အကြည့်များကို နတ်ဆိုးအုပ်စုထံသို့ ပြန်လည်ပို့ဆောင်လိုက်သည်။ ကံကောင်းထောက်မစွာဖြင့် သူသည်လည်း သူတို့၏ မည်သူမည်ဝါဖြစ်ကြောင်းကို ထုတ်ဖော်ရန် ဆန္ဒမရှိပေ။

သူ၏ လက်ရှိ အခြေခံအုတ်မြစ်မှာ နဂါးနန်းတော်ကို ရင်ဆိုင်နိုင်ရန် မလုံလောက်သေးပေ။

ယနေ့ လူများစွာ ရောက်လာခဲ့ကြပုံရပေ၏။ ထိုနဂါးငါးအိုကြီးမှာတော့ ယခုအချိန်ထိ မျက်နှာပြမလာသေးပေ။